Foe san ede den relisi foe grontapoe sa kon na wan kaba
„Komoto na en, mi pipel, efoe oenoe no wani abi wan prati nanga en na ini den sondoe foe en, èn efoe oenoe no wani kisi wan pisi foe den plaag foe en.” — OPENBARING 18:4.
1. (a) Na sortoe fasi Babilon a Bigiwan kon fadon? (b) Fa a sani disi ben abi krakti na tapoe Jehovah Kotoigi?
„BABILON A BIGIWAN fadon!” Ija, leki fa Jehovah e si en, dan a grontapoemakti foe falsi relisi fadon. Disi de so sensi 1919, di a fikapisi foe den brada foe Krestes ben komoto na ondro a makti foe krestenhèit, wan prenspari pisi foe a dangra Babilon. A bakapisi ben de, taki den fri foe kroetoe falsi relisi èn foe meki a regtfardiki tirimakti foe Gado bekènti nanga jepi foe a Kownoekondre foe a Mesias. Na ini a heri jarihondro disi den loyaal Kotoigi foe Jehovah poeroe a bere kon na doro foe ala den relisi foe Satan makandra, di a doe nanga den san a wani, èn di a gebroiki foe kori „a heri grontapoe pe sma e libi”. — Openbaring 12:9; 14:8; 18:2.
Fa Babilon a Bigiwan fadon?
2. Fa a de now nanga den relisi foe grontapoe?
2 Ma wan sma ben sa kan aksi: ’Fa joe kan taki dati Babilon fadon, foe di a gersi leki na someni kondre a e go boen nanga relisi?’ A Katolik bribi nanga na Islam e taki foe densrefi dati den abi moro leki wán miljard bribiman. A e go boen ete nanga a Protestant bribi na Noord-Amerika èn na Zuid-Amerika, pe njoen kerki nanga tra sortoe presi foe anbegi, e opo doronomo. Hondrohondro miljoen sma e doe den gwenti foe a Boeda bribi nanga a Hindoe bribi. Ma omeni boen krakti ala den relisi disi ben abi tapoe a fasi fa den miljardmiljard sma disi e tjari densrefi? A tapoe Katoliksma nanga Protestantsma foe kiri makandra na Noord-Ierland? A tjari troetroe vrede kon gi djoe nanga Moslimsma na a Mindri Owstoesei? A ben abi leki bakapisi taki Hindoesma nanga Moslimsma na India kon de wán? Èn, na ini a ten di pasa no so langa ete, a tapoe Ortodòks-sma foe Serfia, Katoliksma foe Krowâsia, nanga Moslimsma foe Bosnia foe feti na baka „a krin di den wani krin a ras” foe den, foe go foefoeroe sma, foe go didon na sma nanga tranga, èn foe kiri makandra? Nofo tron a de so, taki relisi na soso wan nen, wan sani di de frafra, ma di esi-esi no de moro te den sma e kisi pikinso kwinsi nomo. — Galasiasma 5:19-21; teki gersi Jakobus 2:10, 11.
3. Foe san ede relisi de na fesi Gado foe kisi kroetoe?
3 Leki fa Gado e si en, dan a hori di den ipi-ipi sma e horibaka gi relisi, no e kenki wan sani di de troe èn di no wan sma kan wai pasi gi dati — taki ala relisi de na fesi Gado foe kisi kroetoe. Babilon a Bigiwan, soleki fa a historia foe en e boeweisi, moesoe kisi wan takroe kroetoe, foe di „den sondoe foe en kon tron leki wan ipi di hei te na hemel, èn Gado tjari den onregtfardiki fasi foe en, kon na ini prakseri” (Openbaring 18:5). Hosea ben skrifi nanga profeitiwortoe: „Bika na winti den e tan sai, èn wan bigi winti na san den sa koti.” Ala den falsi relisi foe Satan na heri grontapoe sa kisi a moro bigi pori, foe di den no ben de loyaal na Gado, na en lobi, na en nen, èn na a Manpikin foe en. — Hosea 8:7; Galasiasma 6:7; 1 Johanes 2:22, 23.
Joe moesoe teki wan bosroiti
4, 5. (a) Na ini sortoe situwâsi wi e libi na ini a ten disi? (b) Sortoe aksi wi moesoe piki?
4 Wi e libi na ini a kriboi pisi foe „den lasti dei”, èn leki troe kresten wi e feti foe pasa den ’moeilek ten [disi] di tranga foe pasa’ (2 Timoteus 3:1-5). Troe kresten na sma di e libi na ini a grontapoe foe Satan foe wan sjatoe pisi ten nomo, a grontapoe di troetroe e sori den pori eigifasi foe Satan di de wan kiriman, wan leiman, nanga wan leiman di e pori sma nen (Johanes 8:44; 1 Petrus 2:11, 12; Openbaring 12:10). Na ala sei na wi lontoe ogri de di e doe nanga tranga, bedrigifasi, foefoeroe, kroekafasi, nanga toemoesi takroe hoeroedoe. Sma no e libi moro akroederi gronprakseri. Den wortoe di wi moesoe gebroiki foe sori fa a situwâsi de, na taki sma e libi soso foe kan abi prisiri èn den e prakseri densrefi nomo. Èn nofo tron na den kerki leriman di e doe neleki a no de so wan takroe sani taki sma e pori boen gwenti nanga wet, foe di den e meki a kroetoe di bijbel krinkrin e kroetoe a homo-sekslibi, hoeroedoe nanga soetadoe, lasi en krakti. So boen na aksi de: Joe e horibaka gi falsi anbegi èn e doe neleki a no de so wan takroe sani, noso joe e teki prati na a troe anbegi fajafaja? — Lefitikus 18:22; 20:13; Romesma 1:26, 27; 1 Korentesma 6:9-11.
5 Now a de wan ten foe prati sma foe makandra. Foe dati ede, moro reide de ete foe kon si a difrenti na mindri falsi anbegi nanga troe anbegi. San moro den relisi foe krestenhèit doe, meki den abi so bigi fowtoe? — Maleaki 3:18; Johanes 4:23, 24.
Den e kragi falsi relisi
6. Fa krestenhèit no ben de loyaal na a Kownoekondre foe Gado?
6 Ala di miljoenmiljoen sma na ini krestenhèit e gebroiki a Wi Tata Begi doronomo, pe den e begi taki Gado Kownoekondre moesoe kon, tokoe den horibaka fajafaja gi ibri sortoe politiek, ma den no e erken a theokrasia tiri. Hondrohondro jari pasa kaba, „den granman” foe Lomsoe kerki, soleki den kardinaal Richelieu, Mazarin, nanga Wolsey, ben de bigi politiekman foe grontapoe toe, minister foe kondre.
7. Fa Jehovah Kotoigi ben poeroe a bere foe den kerki leriman foe krestenhèit kon na doro moro leki 50 jari pasa kaba?
7 Moro leki 50 jari pasa kaba, Jehovah Kotoigi ben poeroe kon na doro na ini a brochure di abi a nen Religion Reaps the Whirlwind, taki krestenhèit abi foe doe nanga politiek.a Èn san den ben taki na a ten dati, e fiti na a srefi fasi ete na ini a ten disi: „Te sma e go ondrosoekoe na wan eerlijk fasi fa den kerki leriman foe ala den kerki e tjari densrefi, dan a sa kon na krin taki den relisi fesiman foe a heri ’krestenhèit’ e teki prati nanga foeroe belangstelling na a politiek foe ’a godelowsoe grontapoe foe now’ èn taki den e moksi densrefi nanga den afersi foe grontapoe.” Na ini a ten dati, den Kotoigi ben kroetoe paus Pius XII hebi, foe di a ben wroko makandra nanga a nasist-sma Hitler (1933) èn nanga a fascist-sma Franco (1941), èn den ben kroetoe a paus toe foe di na ini maart 1942, a ben kenki diplomaat nanga a nâsi Japan di ben go feti nanga tra kondre, soso wan toe moen baka a sjen sani di Japan ben doe foe trowe bom na tapoe Pearl Harbor. A paus no ben poti prakseri na tapoe a warskow foe Jakobus: „Soeta-oema, oenoe no sabi taki matifasi nanga grontapoe na feantifasi nanga Gado? Foe dati ede, a sma di wani foe de wan mati foe grontapoe, e meki ensrefi tron wan feanti foe Gado.” — Jakobus 4:4.
8. Fa Lomsoe kerki e moksi ensrefi nanga politiek na ini a ten disi?
8 Fa a situwâsi de na ini a ten disi? Te now ete a tiri foe paus e boemoei ensrefi nanga politiek, nanga jepi foe den kerki leriman foe en èn nanga jepi foe den gewoon kerkimemre di e teki presi gi en. No so langa pasa ete, difrenti paus sori taki den feni den Verenigde Nâsi boen foe di den ben e taki dati a falsi sani dati di libisma meki, sa tjari vrede kon na grontapoe. No so langa pasa ete, wan uitgave foe L’Osservatore Romano, na officieel koranti foe a Vatikan, ben meki bekènti taki seibi njoen diplomaat, „wrokoman foe a Santa Biskopoe kantoro”, ben pristeri den papira foe den na a „Santa Tata”. Joe denki taki Jesus nanga Petrus ben sa abi foe doe nanga den sortoe afersi dati foe kenki diplomaat nanga tra kondre? Jesus ben weigri foe den djoe meki en kon tron wan kownoe èn a ben taki dati a Kownoekondre foe en no ben de foe a grontapoe disi. — Johanes 6:15; 18:36.
9. Foe san ede wi kan taki dati den Protestant relisi no de moro betre leki den Katolik patna foe den?
9 Den Protestant fesiman betre moro leki den Katolik patna foe den? Na Amerkankondre, sma sabi taki foeroe foe den owroeten sortoe Protestant relisi, so srefi den Mormoonsma, abi foe doe nanga a wán noso tra politiek groepoe. A Kresten Coalitie abi boen foeroe foe doe nanga a politiek foe Amerkankondre. Tra Protestant kerki leriman e sori krin taki den de foe wan tra politiek groepoe. Son tron sma e frigiti taki na Amerkankondre den politiek takiman leki Pat Robertson nanga Jesse Jackson de, noso ben de „domri” toe, neleki fa Ian Paisley foe Noord-Ierland, di de wan memre foe a Parlement foe Ingrisikondre, de wan so srefi. Fa den e regtfardiki den posisi di den abi? — Tori foe den Apostel 10:34, 35; Galasiasma 2:6.
10. Sortoe krin froeklari den ben gi na ini 1944?
10 Neleki fa Religion Reaps the Whirlwind ben aksi na ini 1944, na so wi toe e aksi now: „Wan organisâsi di e meki froebontoe nanga grontapoe makti èn e go boemoei ensrefi fajafaja nanga politiek afersi foe a grontapoe disi, so taki a kan kisi wini èn a kibri foe a grontapoe disi, . . . kan de a gemeente foe Gado noso a kan teki presi gi Krestes Jesus na grontapoe? . . . Soleki fa a sori krin, dan ala den relisisma di abi den srefi marki na prakseri leki den kownoekondre foe a grontapoe disi, no kan teki presi gi a kownoekondre foe Gado di Krestes Jesus e tiri.”
Falsi relisi di abi a fasi foe Kain
11. Fa falsi relisi ben waka baka na eksempre foe Kain?
11 Na ini a heri historia, falsi relisi sori foe de neleki Kain di ben kiri en brada Abel. „A de krin foe si soema na den pikin foe Gado nanga den pikin foe Didibri, foe disi ede: Ibriwan sma di no abi regtfardikifasi, no e kon foe Gado, so srefi a sma di no lobi a brada foe en. Bika disi na a boskopoe di oenoe jere foe sensi a bigin, taki wi moesoe lobi makandra; no leki Kain, di ben kon foe a godelowsoewan èn ben kiri en brada. Èn foe san ede a ben kiri en? Foe di en eigi wroko ben de godelowsoe, ma di foe a brada foe en ben de regtfardiki.” Foe di Kain no ben man froedrage a soifri anbegi foe en brada di Gado ben feni boen, meki a ben gebroiki ogri di a ben doe nanga tranga — a lasti sani di sma e doe, te den no man taki foe san ede den e doe wan sani. — 1 Johanes 3:10-12.
12. Sortoe boeweisi de foe a prati di relisi abi na ini feti èn na ini strei?
12 Den troe tori e sori taki falsi relisi moesoe kisi a kragi disi? Na ini a boekoe Preachers Present Arms, a skrifiman ben taki: „Na ini a historia foe libisma libimakandra, . . . alaten den moksi toe makti foe kon wroko nanga makandra. Dati na feti nanga relisi. Èn foe ala den bigi relisi foe grontapoe, . . . no wan foe den gi ensrefi so na [feti] leki fa [krestenhèit] doe.” Wan toe jari pasa kaba, The Sun, wan koranti foe Vancouver, Kanada, ben taki: „Na wan swakifasi foe kande ala relisi di orga taki kerki e wroko na ondro a fraga . . . Sortoe feti ben strei pe den no ben taki dati Gado ben de na ala toe sei?” Kande joe si a boeweisi foe disi na ini wan kerki foe a presi pe joe e libi. Nofo tron, fraga foe a kondre poti leki wan moi sani lontoe na altari. Na ondro sortoe fraga joe denki taki Jesus ben sa waka ini pas leki wan sroedati? Ala den jarihondro den wortoe foe en ben de foe jere, taki: „Mi kownoekondre no de wan pisi foe a grontapoe disi!” — Johanes 18:36.
13. (a) Fa falsi relisi no ben man doe san a ben moesoe doe na Afrika? (b) Sortoe krin marki Jesus ben gi foe a krestendom?
13 Den relisi foe krestenhèit no leri den ipi foe den a waarheid foe troetroe brada lobi. Na presi foe dati, den e gi pasi taki trobi foe nationaliteit, lo nanga ras ede, e prati den memre foe den. Tori e sori taki den Katolik nanga Anglikan kerki leriman ben plèi wan ròl ini a prati di ben kon na Rwanda, èn disi ben abi leki bakapisi taki drape den ben kiri sma foe den lo na ipi-ipi. The New York Times ben skrifi: „A kiri di sma kiri makandra na Rwanda na ipi-ipi, meki taki foeroe Lomsoesma drape abi a firi taki a kerki foe den tori den. Nofo tron a kerki ben prati foe ras ede, den Hoetoe na a wán sei nanga den Toetsi na a tra sei.” A srefi koranti dati ben skrifi den wortoe foe wan Maryknoll priester di ben taki: „Na ini 1994, kerki na Rwanda no ben de srefisrefi san den ben moesoe doe. Wi kan taki dati foeroe sma foe Rwanda poeroe den nen na kerki. Den no e bribi moro na ini kerki.” Dati na wan heri tra sani leki den wortoe foe Jesus: „Nanga disi ala sma sa sabi taki oenoe na mi disipel, efoe oenoe abi lobi na oen mindri.” — Johanes 13:35.
14. Sortoe tori de bekènti foe a fasi fa bigi relisi di no de kresten relisi, e tjari densrefi?
14 Den tra bigi relisi foe Babilon a Bigiwan no gi wan moro betre eksempre. Na ogri fasi fa den kiri sma na ipi-ipi na ini 1947, di den ben prati India, e sori taki den bigi relisi drape no leri sma foe froedrage makandra. Ogri di sma e tan doe makandra na India e sori taki moro foeroe sma no kenki. A no de foe froewondroe taki a tijdschrift India Today ben taki: „Den moro ogri takroe, sma doe na ini a nen foe relisi. . . . Boen foeroe ogri di sma e doe nanga tranga e kon foe disi èn a de wan toemoesi tranga krakti.”
„Sani di e hari wi prakseri èn di gersi leki den de kontrari makandra”
15. Fa a de nanga relisi na ini a westsei pisi foe grontapoe?
15 Srefi sma foe grontapoe di e froeklari sani, si taki relisi no ben man overtoigi sma, a no ben man poti troetroe waarde dipi na ini sma, èn a no ben man kakafoetoe gi a krakti di grontapoe ben abi na den tapoe. Zbigniew Brzezinski, di ben abi a wroko fosi foe gi rai ini a tori foe veiligheid foe Amerkankondre, ben skrifi na ini en boekoe Out of Control: „Na sani di e hari wi prakseri èn di gersi leki den de kontrari makandra taki a moro bigi wini di den wortoe ’Gado dede’, ben abi foe den sei, no de na ini den kondre pe den marxistsma e tiri . . . ma na ini den Westsei demokrâsia libimakandra pe sma e denki fri, èn pe sma teki wan fasi foe no broko den ede moro nanga boen gwenti nanga wet. Na den [Westsei libimakandra] dati, relisi no abi wan bigi krakti moro na tapoe a sociaal libi foe sma.” A ben go doro: „Relisi lasi boen foeroe krakti di a ben abi na tapoe a koeltoeroe foe Europa, èn Europa foe now — srefi moro leki na Amerkankondre — na moro foeroe wan libimakandra pe relisi no abi krakti na tapoe.”
16, 17. (a) Sortoe rai Jesus ben gi ini a tori foe den kerki leriman foe en ten? (b) Sortoe moi gronprakseri Jesus ben taki ini a tori foe a meki foe froktoe?
16 San Jesus ben taki foe den djoe kerki leriman foe en ten? „Den leriman foe Wet nanga den Fariseiman poti densrefi sidon na tapoe a stoeroe foe Moses [foe leri sma a Torah, a Wet]. Dati meki, doe èn ondrow ala san den e taigi oenoe, ma no doe den sani di den e doe, bika den e taki, ma den no e doe en.” Ija, a hoigrifasi foe relisi a no wan njoen sani. — Mateus 23:2, 3.
17 Den froktoe di falsi relisi abi leki bakapisi, e kroetoe en. A markitiki di Jesus ben gi, e fiti troetroe: „Ibri boen bon e meki boen froktoe, ma ibri pori bon e meki froktoe di no abi waarde; wan boen bon no kan meki froktoe di no abi waarde, èn wan pori bon no kan meki boen froktoe toe. Ibri boen bon di no e meki boen froktoe, den e koti poeroe èn e trowe en na ini faja. So boen, na den froktoe foe den oenoe sa kon sabi den sma dati troetroe.” — Mateus 7:17-20.
18. Fa krestenhèit ben sa moesoe hori den ipi foe den krin?
18 San ben sa pasa efoe den relisi foe krestenhèit troetroe ben sa gebroiki a kresten tranga leri foe sluit sma uit, noso foe poeroe sma na den mindri, tapoe a gron foe ala den kroektoe sani di den sma dati e doe èn di e taki dati den na memre foe den kerki disi? San ben sa pasa nanga ala den leiman di no abi berow, so srefi ala den hoeroeman, soetaman, homoseks-sma, bedrigiman, sma di e doe trakroedoe, sma di e handri na ini drug nanga den sma di de wan srafoe foe drug, nanga memre foe den mafia orga? Wi no abi foe tweifri taki foe den takroe froktoe foe krestenhèit ede, meki a boen nomo taki Gado gi en pori. — 1 Korentesma 5:9-13; 2 Johanes 10, 11.
19. Sortoe sani sma erken ini a tori foe san relisi fesiman e doe?
19 Na algemeen konmakandra foe a Presbyterian kerki na Amerkankondre ben erken: „Wi e tanapoe na fesi wan rampoe di bigi srefisrefi. . . . Na mindri 10 te 23 procent foe den kerki leriman na ini a heri kondre ben wani foe doe seks noso ben abi seks nanga kerkisma, sma di ben kon soekoe jepi na den, wrokoman, èn go so moro fara.” Wan bisnisman foe Amerkankondre ben taki a tori heri boen: „Organisâsi foe relisi no ben man tjari den moreel waarde di den ben abi fositen, abra na tapoe sma, èn foeroe tron den tron wan pisi foe a problema.”
20, 21. (a) Fa Jesus nanga Paulus ben kroetoe hoigrifasi? (b) Sortoe aksi moesoe kisi wan piki ete?
20 Na ini a ten disi Jesus e kroetoe a hoigrifasi foe relisi, neleki fa a ben doe dati na ini en ten: „Oen hoigriman, den sani di Jesaja ben taki foe oenoe na profeiti fasi, fiti srefisrefi, di a ben taki: ’A pipel disi e gi mi grani nanga den mofoboeba, ma na ati foe den de fara foe mi. Na foe soso den e tan anbegi mi, foe di den e leri komando foe libisma leki fondamenti leri’” (Mateus 15:7-9). Den wortoe di Paulus ben skrifi Titus, e taki toe fa a situwâsi de na ini a ten foe wi: „Den e meki bekènti na poebliki taki den sabi Gado, ma nanga den wroko foe den, den e sori taki den no wani sabi en, foe di den de wan tegoe sani, èn den trangajesi èn den no boen foe doe no wan enkri sortoe boen wroko.” — Titus 1:16.
21 Jesus ben taki dati efoe wan breniman e tjari wan breniman, dan ala toe e fadon go na ini wan peti (Mateus 15:14). Joe wani kon na wan kaba makandra nanga Babilon a Bigiwan? Noso joe wani waka na tapoe reti pasi ala di joe ai opo krinkrin èn joe wani foe njan boen foe den blesi foe Jehovah? Den aksi di e kon now na: Sortoe relisi, efoe wan de, e meki den froktoe foe Gado? Fa wi kan kon sabi a troe anbegi di Gado feni boen? — Psalm 119:105.
[Foetoewortoe]
a A Watchtower Bible and Tract Society of New York, Inc., tjari en kon na doro na ini 1944; den no e druk en moro.
Joe kan memre disi ete?
◻ Sortoe posisi Babilon a Bigiwan abi now na fesi foe Gado?
◻ Foe san ede falsi relisi e kisi kroetoe?
◻ Fa falsi relisi sori taki a abi a fasi foe Kain?
◻ Sortoe gronprakseri Jesus ben sori foe kroetoe iniwan relisi?
[Prenki na tapoe bladzijde 23]
Na ini a heri historia den relisi fesiman boemoei densrefi nanga politiek
[Prenki na tapoe bladzijde 25]
Den kerki leriman disi ben de bigi politiekman toe
Kardinaal Mazarin
Kardinaal Richelieu
Kardinaal Wolsey
[Sma di abi a reti foe a prenki]
Kardinaal Mazarin nanga Kardinaal Richelieu: Foe a boekoe Ridpath’s History of the World (Pisi VI nanga Pisi V baka makandra). Kardinaal Wolsey: Foe a boekoe The History of Protestanism (Pisi I).