Na takru barinen huru — A fadon fu en

„A fadon! Babylon a Bigiwan fadon, en di ben meki ala nâsi dringi fu na win fu na atibron fu en hurudu!” — OPENBARING 14:8.

Na artikel disi makandra nanga na tra artikel ben de na tekst fu na kriboy lezing fu na symposium di ben abi leki nen „Na faste ten de krosibey”, di ben hori na ini 1988 tapu den „Gado gerègtegheid”-distriktkongres fu Yehovah Kotoygi.

1. Suma na a takru barinen „huru”, èn fu san-ede wi musu sabi suma na en?

NA TAKRU barinen „huru” — suma na en? Fu san-ede wi musu taki fu en? Den span buku di e taki fu kiri, film, tv nanga video-film no fruteri kba moro leki de nofo fu hurudu di e meki yu siki? Seyker! Ma na huru di e kari dya no de wan gewoon uma di en waka nanga libi no de krin. A de te yu luku en bun na moro makti, na moro takru nen, na moro lobi fu kiri huru fu na heri historiya. Èn a e pristeri moro leki 4000 yari kba en bun-ati fu bay! Fu kibri wi srefi wi musu sabi suma na en. Na ini Openbaring 14:8 wan èngel ini heymel e kari na uma disi di abi wan takru nen „Babylon na Bigiwan” èn e fruteri fu en leki wan uma die kori den nâsi. Fu di a de so kefarlek, meki na sabi di wi sabi taki Yehovah „faste ten” fu tyari na krutu kon tapu en „de krosibey”, musu meki wi de koloku. — Openbaring 1:3.

2. Na huru disi ben kisi en nen fu sortu sani, èn fa wan grontapu makti fu falsi relisi ben du kon?

² Na huru disi kisi en nen fu na owru Babylon, na heymemre foto di Nimrod, na ’ogri ontiman di ben de kontrari Yehovah’ ben opo moro leki 4000 yari psa kba na ini Metopotamiya. Di den Babylonsma ben bigin bow wan heyden relisi toren, Yehovah ben bruya a tongo fu den. èn ben panya den go te na den uku fu na grontapu. Den ben teki na relisi fu den go nanga den, èn na so wan grontapu makti fu Babylon relisi ben kon de. A de trutru Babylon NA BIGIWAN (Genesis 10:8-10; 11:1-9). Te na ini wi ten den ’kibritori’ fu na owru Babylon e de fu si ini den bribi overtoygi nanga gwenti fu den relisi fu na grontapu (Openbaring 17:7). Na Hebrew nen gi na foto, Babel, wani taki „Bruya”, wan nen di fiti gi na bruyafasi fu falsi fasi fu anbegi!

3. (a) O langa Babylon ben hori na pipri fu Gado na ini katibo, èn nanga san den Israëlsma ben kon nanga dati ini kontakti? (b) Oten Babylon ben ondrofeni wan fadon di ben de wan ranpu, èn fu san-ede a no ben kon ete na en kba?

³ Na owru Babylon di ben kisi en srefi agen fu na fosi klap èn ben tron nanga na wini di a ben wini Asiriya na ini 632 bifo G.T. na di fu dri grontapu makti na ini na beybri historiya. En glori na a fasi disi ben de fu wan syatu ten — ma ben tan no wan hondro yari srefi — ma ini a pisiten fu pikinmoro seybi tenti yari fu na pisiten dati a ben hori na pipri fu Gado, Israël na ini katibo. Nanga disi den Israëlsma ben kon ini krosibey kontakti nanga den dusun tempel nanga pikin tempel fu Babylon, den dri-wanfasi fu gado èn dri-wanfasi fu ddibri èn en anbegi fu mma nanga manpikin, èn en astrologie, so taki so kari gado di no e dede ben kisi grani. Fu dati-ede den Israëlsma di ben de ini katibo ben de na ini na grontapu centrum fu falsi fasi fu anbegi di na foto Babylon ben ondrofeni na ini 539 bifo G.T. wan fadon di ben de wan ranpu. Ma na kba fu en no ben kon ete! Den winiman fu en ben tan gebroyki en leki wan barinen relisi centrum.

Wan relisi makti na a heri grontapu

4. (a) San Yehovah profeyti ben fruteri na fesi fu Babylon, èn san ben miti Babylon? (b) Sortu tra Babylon de ete, leki wan bigi ranpu gi den pipri fu na grontapu?

⁴ Yehovah profeyti ben taki fu na krutu fu en taki Babylon ben musu figi puru „nanga na ssibi fu pori”, „netleki na dray tapu go na ondro fu Sodom nanga Gomora”. Den profeyti tori disi ben kon tru baka? Iya, te ini den moro finifini pisi! Baka wan pisiten na owru Babylon ben tron wan brokobroko ston ipi — pe sma no ben e libi moro, boyti sani leki sneki nanga ogri meti — soyfri so leki ben taki a fesi! (Yesaya 13:9, 19-22; 14:23; Yeremiya 50:35, 38-40) Na tra Babylon, na disiten Babylon na Bigiwan, de te now ete. Leki na grontapu makti fu falsi fasi fu anbegi, a e meki den leri èn bigi memre yeyefasi fu na fosi Babylon go doro. A de na moro prenspari wroko sani fu Satan fu breni den sma gi Yehovah Kownukondre prakseri. — 2 Korintesma 4:3, 4.

5. (a) Sortu relisi ben du kon di Babylon ben de na a heymarki fu en glori, ma fu san-ede Satan no ben man fu sungu na heri grontapu nanga falsi relisi? (b) Fa Satan ben gebroyki na falsi relisi baka di na kristendom ben du kon?

⁵ Na a di fu siksi yarihondro bifo Krestes, di na grontapu makti Babylon so srefi tu na hindu bribi, na budha bribi, na confusius bribi, nanga na syento bribi ben sori den srefi. Ma Satan ben man fu sungu na heri grontapu nanga na falsi fasi fu bribi? Nôno, bika wan fika pisi fu Yehovah Kotoygi fu owruten ben dray komoto fu Babylon go na Yerusalem baka fu opo nyun baka na anbegi fu Yehovah. Leki wan bakapisi fu dati meki taki siksi yarihondro a baka getrow dyu ben libi drape di ben kan bari na Mèsiyas wan switi kon èn ben kan tron den fosi memre fu na kristen gemeente. Na falsi fasi fu anbegi ben meki na pina dede fu Gado eygi Manpikin kon èn ben tron na wrokosani fu Satan fu gens na tru kristendom, so leki Yeyses nanga en apostel ben taki a fesi. — Mattéus 7:15; Tori fu den Apostel 20: 29, 30; 2 Petrus 2:1.

6. (a) Fa Satan ben pori na kristenleri. èn sortu leri di e afrontu Gado ben kon? (b) San ben psa nanga dusundusun sma di ben teki na beybri leri moro leki na di fu Babylon?

⁶ Spesrutu na baka na di fu tu pori na ini Yerusalem na ini 70 G.T. Satan ben gebroyki falsi apostel fu pori na kristen leri, fu di a ben smeltri na Babylon mistiek nanga Griki filosofie fu a grontapu kon na wan. Na so na wan dri-wan-gadofasi ofu na dri-wanfasi ben kon na ini na presi fu na beybri leri fu „wán Yehovah” (Deuteronomium 6:4; Markus 12:29; 1 Korintesma 8:5, 6). Èn na leri di na heyden filosoofman Plato ben gi fu na libisma sili di no kan dede, ben tyari kon fu poti den tumsi moy beybri leri di e go fu Krestes lusuprijs nanga na opobaka na wan sey. Nanga disi na pasi ben kon opo gi wan bun faya hèl èn wan vagevuur di no de so faya (Psalm 89:48; Ezechiël 18:4, 20). Den sortu leri disi di e afrontu Gado èn di e wroko tapu a frede di libisma e frede ben meki den monikisi fu den kerki kon furu. Boyti fu dati den kerki leriman ini a ten fu na inquisitie èn na Reformatie no ben kan wakti te leki den faya vlam fu na hèl faya ben sa pina na sma di go drape. Den katholiek sma èn den anitri sma ben tyari dusundusun sma di ben teki na beybri leri moro leki na Babylon leri go na a presi pe den ben e bron sma libilibi. Ma so leki wi sa si, dan na hurudu fu Babylon na Bigiwan e go moro fara leki na meki kon a fesi fu ley.

Yehovah dey fu krutu

7. (a) Oten èn fa Yehovah ben bigin fu meki gron waarheid kon bun baka èn ben puru Babylon leri kon a doro? (b) Sortu beybri gronprakseri den beybri ondrosukuman ben meki kon nyun baka?

⁷ Yehovah dey fu krutu tapu na huru disi musu kon ete! (Hebrewsma 10:30) Wan ten fu sreka sani ben de, di bigin ini den yari 70, fu na yarihondro di psa, di Yehovah „boskopuman” — ben seni wan grupu opregti beybri ondrosukuman go opo den beybri gron waarheid baka èn puru falsi Babylon leri kon a doro (Maleachi 3:1a). Na „boskopuman”-grupu disi ben agri nanga den profeyti wortu fu Openbaring 4:11: „Yu, Yehovah, iya wi Gado, warti fu kisi na glori èn na grani èn na krakti, bika yu ben meki ala sani èn fu yu wani ede den de, èn den ben meki den.” Na boskopuman ben de so srefi wan pritpangi fetiman fu Yeyses frulusu-ofrandi, a seti fu Gado fu lusu libisma. Na libisma famiri di bay kon fri ben sa de ini a fosi presi na „pikin ipi”, di sa tiri nanga Yeyses na ini en heymel Kownukondre èn bakaten den hondrohondro milyun sma di sa libi fu têgo tapu na paradijs grontapu— di a moro bigi pisi fu den sa kisi opobaka fu dede (Lukas 12:32; 1 Yohannes 2:2; Tori fu den Apostel 24:15). Iya,den beybri ondrosukuman dati ben meki den gron waarheid disi kon baka, èn na agersifasi ben ’poti na watraslang tapu na hèl èn ben kiri na faya’ fu na Babylon leri fu têgo pina.a

8. (a) Fa den kerki leriman fu na kristenheid ben teki na Fosi Grontapufeti fu pruberi fu way den beybri ondrosukuman puru? (b) San ben psa nanga na krutuman di ben hori aiti tiriman fu na Wachttoren Genootschap na ini strafu-oso fu di a weygri fu teki borgtocht fu den?

⁸ So wan fotenti yari langa den beybri ondrosukuman ben meki nanga deki-ati bekenti taki na yari 1914 ben sa marki na kba fu den ten fu den heyden. So leki sma ben fruwakti dan sani ben psa na ini a yari dati di ben seki grontapu èn di na Fosi Grontapu feti no ben de na wan di no ben wani taki noti. O, fa den kerki leriman fu na kristenheid — na moro prenspari pisi fu Babylon na Bigiwan — ben pruberi fu gebroyki na muyliki ten fu grontapu fu way den deki-ati beybri ondrosukuman dati puru! Na ini 1918 den ben man te fu kba fu meki den ayti tiriman fu na Wachttoren Genootschap ben poti go ini strafu-oso tapu a gron fu kragi fu gi sma tranga fu meki opruru, di den srefi ben denki. Den tiriman disi ben kon fri baka neygi mun èn bakaten den ben kisi den bun nen baka. Na Amerkan federale krutuman Martin T. Manton, di ben hori den beybri ondrosukuman disi na ini strafu-oso fu di a ben weygri fu meki den kon fri nanga na pay fu borgtocht (wan moni fu bay sma kon fri), pawsu Pius XI ben gi en bakaten wan grani èn meki en tron „ridder ini na orde fu St. Gregorius na Bigiwan”. Ma en barinen ben de fu wan syatu ten, bika na ini 1939 den ben leysi strafu gi en fu tu yari dungru-oso strafu èn wan hebi butu. Fu san-ede? Fu di den ben feni fowtu na en di a ben seri siksi bosroyti fu krutu fu wan moni fu ala nanga ala $ 186.000 fu tyuku!

9. Fa na profeytitori fu Maleachi e tyari krin kon tapu san ben miti Yehovah pipri, èn na suma na krutu ben bigin fu dati-ede?

⁹ So leki wi ben si dyonsrode, dan na ini 1918 wan pisiten fu hebi tesi ben bigin gi Yehovah pipri. Den wortu moro fara fu na profeti na ini Maleachi 3:1-3 poti leti tapu san ben psa: „Èn wantronso sa kon na en tempel na tru Masra [Yehovah], di unu e suku, èn na boskopuman fu na [Abraham] frubontu” — Yeyses. Iya, Yehovah e aksi moro fara: „Suma sa frudrage a dey fu en kon, èn suma sa hori doro te a sori ensrefi? Bika a sa de leki na faya fu wan sma di e soyfri sani èn leki na loog [na watra nanga sani na ini] fu na sma di e wasi sani.” Leki fa 1 Petrus 4:17 e taki dan na krutu e bigin na den sma di e taki taki den de fu „na oso fu Gado”. Tru kresten sma fu dati-ede ben kon soyfri èn krin gi Yehovah diniwroko.

„KOMOTO FU EN MINDRI, O MI PIPRI”!

10. Na ondro sortu krutu fu Gado na kristenheid ben kon, iya ala falsi relisi, na a ten fu 1919, nanga sortu bakapisi gi Babylon na Bigiwan?

¹⁰ Leki wan pisi fu Babylon na Bigiwan di no abi berow den kerki leriman fu na kristenheid no kan tan tanapu ini Yehovah krutu. Leki sma di teki prati na a trowe fu brudu ofu na grontapu feti èn leki frufolguman fu tru kresten den ben flaka den krosi fu den tapu wan tegu fasi (Yeremiya 2:34). Na presi fu bari odi gi na heymel Kownukondre fu Krestes, den ben meki wan Folku Bontu di libisma opo, du kon, di den ben go gi a nen fu „na politiki nen fu na Kownukondre fu Gado na grontapu”. Na a ten fu 1919 a ben de krin taki Yehovah ben leysi strafu gi na kristenheid — iya, gi ala falsi relisi. Babylon na Bigiwan ben fadon kba, èn ben kisi a dede strafu fu yere! Gi ala sma di lobi waarheid nanga regtvaardikifasi, a ben de ten fu gi yesi na a profeyti gebod di skrifi na ini Yeremiya 51:45: „Komoto na en mindri, o mi pipri, èn meki ibri sma meki en sili kon komoto gi na faya atibron fu Yehovah.”

11, 12. (a) San wan èngel e taki na ini Openbaring 17:1, 2 ini a tori fu na krutu fu Babylon na Bigiwan? (b) San na den „furu watra” pe na bigi huru sdon a tapu, èn fa a ben meki den sma di e libi na grontapu „kon drungu fu na win fu en hurudu”?

¹¹ Babylon na Bigiwan fadon! Ma a no kisi pori ete. Leki na grontapu makti fu falsi relisi a sa tan wan syatu ten ete leki na meystri wroko fu bidrigifasi fu Satan. San na a krutu fu Yehovah gi en te fu kba? Den no e libi wi sondro fu sabi dati! Meki wi opo pikinso ini wi beybri Openbaring 17:1, 2. Dyaso wan èngel e taki nanga na apostel Yohannes, èn nanga yepi fu en, nanga disiten ondrosukuman fu profeyti tori nanga den wortu: „Kon, mi sa sori yu na krutu tapu na bigi huru, di sdon tapu furu watra di den kownu fu grontapu ben du hurudu nanga en, ala den sma, di e libi na grontapu, ben kon drungu nanga na win fu en hurudu.” Den wortu „furu watra” abi fu du nanga na sekiseki ipi fu libisma di na bigi huru ben kwinsi so langa kba. Èn na profeyti tori e taki taki „èn den di ben libi na grontapu”, ben kon drungu nanga na win fu en. Den e dringi den falsi leri èn hurudu pasi fu grontapu fu Babylon na Bigiwan, san e meki den sekiseki tapu den futu, neleki den kon drungu fu na bunkopu win di den kisi na kibrifasi.

¹² Na ini Yakobus 4:4 wi e leysi: „Sutaman, unu no sabi taki na matifasi nanga na grontapu na feyantifasi nanga Gado?” Na di fu twenti yarihondro relisi disi wani srefisrefi fu kisi na bun-ati fu na grontapu, èn dati de spesrutu gi na kristenheid. No wwan a de so taki den kerki leriman fu en e tan misi fu meki na bun nyunsu fu Yehovah Kownukondre bekenti di opo nyunyun, ma den e swaki so srefi tu na moreel leri fu na beybri fu di den e luku psa na grontapu fasi a mindri den memre fu kerki fu broko ede tranga nanga den sani. Srefi den kerki leriman no de sondro fowtu efu a e go tapu trutru hurudu, di na apostel Paulus so krin e krutu di a ben taki: „No kori un srefi. No den huruman, no den diniman fu kruktu gado, no sutaman, no man di fu teyge natuurlek marki den e hori, no man di e ddon na man,. . . sa kisi Gado Kownukondre. Toku sonwan fu unu ben de dati. Ma unu wasi kon krin.” — 1 Korintesma 6:9-11.

„Lolo na ini tokotoko”

13, 14. (a) Sortu eksenpre e kon a krin taki den disiten kerki leriman no „wasi kon krin”? (b) Sortu fasi fu du sani wan kerki synode fu wan Anglikan kerki ben feni bun ini a tori fu tantaman syenpresiwroko èn nanga sortu nen leki fa wan koranti-man ben taki den ben musu dopu na kerki baka? (c) Nanga sortu wortu fu na apostel Petrus na situwâsi, pe den kerki leriman di fadon komoto na bribi, e tyari moy kon a fesi?

¹³ Den disiten kerki leriman „ben wasi kon krin”? We, luku leki eksenpre na situwâsi na ini Ingrisi kondre di ben de wan dey na tranga presi fu na anitri bribi. Na ini november 1987 di na Ingrisi fosi ministri ben gi den kerki fesiman tranga fu gi moreel tiri, dan na fesiman fu wan Anglikan kerki ben taki: „Matisma ofu tantaman abi net so furu leti a tapu fu sori na seks fu den leki ibri tra sma; wi musu wani si na bun na ini èn fu gi deki-ati fu den [den tantaman] de getrow a makandra.” Wan koranti fu Londen ben fruteri. „Tapu wán Anglikan theologie-heyskoro den matisma praktijk ben kon de so bigi psa marki taki den tiriman fu wan tra heyskoro ben tapu studenti fu fisiti drape.” Wán ondrosuku e taki „ini wán distrikt fu Londen kande moro leki afu fu a heri nomru fu kerki fesiman abi wan tantaman firi”. Èn na a ten fu wan kerki synode 95% fu den kerki fesiman fu na Anglikan kerki ben hori baka gi wan motie pe hurudu nanga sutadu den ben sori a tapu leki sondu, ma nó den tantaman syenpresiwroko; den sortu tantaman du disi, soleki sma ben taki no e doro na marki. Te wan korantiman e taki fu ala den sani disi, a e tyari kon a fesi taki na Anglikan kerki ben sa kan kisi dopu ete wantron nanga na nen Sodom nanga Gomôra. Wan tra koranti fu Londen ben taki: „Na Ingrisi pipri e skreki srefisrefi te a e luku wan geslagti di e gi pasi fu sani psa.”

¹⁴ Na apostel Petrus e fruteri heri moy fu a situwâsi pe den kerki leriman di fadon komoto a bribi ben kon de na ini na ini den yari pi psa, nanga den wortu: „A sani ben psa nanga den san na tru odo e taki: ’A dagu dray go baka na en eygi piyo, èn na mma agu di ben wasi go lolo ini a tokotoko’” — 2 Petrus 2:22.

15. (a) Sortu fadon fu moreel waarde ben feni presi ala pe, na ini na kristenheid? (b) Suma musu tyari na frantiwortu fu na koti disi fu ranpu?

¹⁵ Ala pe na ini na kristenheid, iya, na ini na heri grontapu wan kefarlek broko saka fu moreel waarde de fu si. Son grupu sma e si a trowlibi now leki wan sani di de tumusi furu, èn trowsma e feni taki tan getrow na makandra na ini a trowlibi no de a modo moro. Moro nanga moro sma e libi nanga makandra sondro fu trow èn na brokotrow cijfer a mindri den di trow, e go na loktu. Na ini den Verenigde Staten na nomru fu brokotrow ini den 25 yari di psa kon de moro leki 3 tron so furu te moro leki wan milyun ini wan yari. Na ini Ingrisikondre na nomru fu brokotrow na ini wan pisiten fu 20 yari sensi 1965 ben de moro leki 4 tron, fu 41.000 te 175.000. Sma di no trow moro furu e go libi nanga sma di no trow fu a srefi geslagti ofu fu a tra geslagti, èn furu fu den e kenki patna. Den e bari krey fu den kefarlek seks siki di kan tyari abra go tapu tra sma, spesrutu AIDS, èn di e grabu lontu den leki wan bakapisi fu na hurudu libifasi fu den, ma nanga tranga den wani tan go doro nanga den pori seks libi. Den kerki leriman fu na kristenheid no ben gi tranga leri na den kerkiman fu den di lasi pasi. Na ini na marki fa den e luku psa hurudu, meki den musu teki prati na ini na frantiwortu gi na koti disi fu ranpu. — Yeremiya 5:29-31.

16. (a) San e poti krakti a tapu taki Babylon na Bigiwan fadon, èn sortu kari di wan èngel ben kari na ini Openbaring 18:2 fiti? (b) San ala sma di wani fu psa libilibi na kba fu na grontapu musu du?

¹⁶ Ooktu nanga na sari moreel situwâsi ini na grontapu makti fu falsi fasi fu anbegi krakti e poti a tapu taki Babylon na Bigiwan fadon. Gado krutu en èn poti en drape fu kisi pori. Fa a krakti kari fu na èngel na ini Openbaring 18:2 de wan sani fu dati-ede di fiti: „A fadon! Babylon na Bigiwan fadon, en a tron wan libi presi fu ogri yeye en wan kibri presi fu ibri doti danpu en kibri presi fu ibri doti fowruy di sma no wani si na wan ay!” Èn fa a de tumusi prenspari taki ala sma di wani psa libilibi na kaba fu na grontapu, musu gi yesi na a kari fu vers 4: „Komoto fu en mi pipri, efu unu no wani abi prati nanga en na ini en sondu, èn efu unu no wani kisi afu fu en sondu”! Komoto gwe fu na falsi relisi, de wan tranga fanowdu stap fu psa libilibi „na bigi banawtu di de na fesi wi” (Openbaring 7:14). Ma so leki fa wi sa si, dan den e aksi moro fu wi!

[Futuwortu]

[Faki na tapu bladzijde 13]

NA MORAAL FU DEN KERKI LERIMAN

„Hondrohondro pikin di na ini den feyfi yari di psa katholik pristri na ini den Verenigde Staten ben muylek, ben hori serjusuu emotioneel trauma abra, na so ppa nanga mma, senwe datra, skowtu nanga fiskari e taki di ben abi fu du nanga den afersi disi.” — Akron Beacon Journal, 3 yanuari 1988.

„Na lomsu katholiki kerki na ini den Verenigde Staten musu pay milyunmilyun dala fu schadevergoeding na osofamiri di e taki taki pristri ben gebroyki den pikin fu den na wan fowtu fasi ini seks! Ala di dati de so toku a gro kon tron so wan seryusu problema taki furu afkati nanga den sma di ben ondrofeni disi e taki taki kerki e poti den sani disi a wan sey èn dofu gi den.” — The Miami Herald, 3 yanuari 1988.

[Prenki na tapu bladzijde 10]

Popki fu dri-wan-gado fu na owru Egipti èn fu na kristenheid

[Sma di abi a reti fu a prenki]

Saint-Remi Museum collection, Reims, photo by J. Terrisse

Louvre Museum, Paris

[Prenki na tapu bladzijde 15]

Na beybri e teki hurudu kerki tiriman gersi nanga wan mma agu di wasi èn di e dray baka go lolo na ini na tokotoko