A tja foe a dedestrafoe kon na a bigi hoeroe-oema e kon krosbé
„Den dati sa abi ogri-ati foe na hoeroe-oema, èn den sa meki a kon légi èn sondro krosi, èn den sa njan den pisi foe en skin èn bron en krinkrin nanga faja.” — Openb. 17:16.
1, 2. Sortoe bodoi Gado e gi en dienstknegti èn foe san-ede?
NA MEKIMAN, Jehovah, sabi precies san sa pasa ini na ten di e kon. En de na Sma „di foe sensi na bigin (e ferteri) fa sani sa waka” (Jes. 46:10). Foedi a de „volmaakti ini sabi”, dan a sabi den „finifini pisi fa sani sa waka” nanga na seti foe sani disi ini na „bigi benawtoe” di e kon (Job 37:16; Matt. 24:21). Foedi a de wan Gado foe lobi, a de tjari kon na krin gi den sma di e dini en loyaal, nofo foe den finifini pisi disi foe kan leri den tapoe joisti fasi èn bow den èn kibri den. Na bijbel e taki: „Na (Soeverein) Masra Jehovah no sa doe noti, efoe a no ben tjari kon na krin gi en knegti, den proféti, en froetrow afersi.” — Amos 3:7, NW, herziene Engelse uitgave foe 1971.
2 Soboen, Gado e gi en sakafasi dienstknegti wan spesroetoe sabi di trawan no abi. Na apostel Paulus ben taki foe disi: „Na koni disi, no wan foe den tiriman foe na seti foe sani disi ben kon sabi . . . Bikasi Gado ben tjari dati kon na krin gi wi nanga jepi foe en jeje” (1 Kor. 2:8-10). Now di Jehovah dienstknegti kisi na fesi sabi foe en, dan den de sreka-sreka — ja, den ben kisi na komando foe Gado — foe meki sma na heri grontapoe jere na warskow foe na kaba foe na seti foe sani di e kon, èn sosrefi toe meki bekenti na trowstoe boskopoe foe na njoen ordening. — Matt. 24:14.
3. Den dienstknegti foe Jehovah sa sabi oten na „bigi benawtoe” ben bigin troetroe?
3 Dati Jehovah e gi en loyaal dienstknegti na fesi sabi foe na kaba foe na seti foe sani disi, wani taki toe dati a de gi den bodoi di sa meki den si oten na „bigi benawtoe” sa bigin troetroe? Ja. San de den marki foe dati? Den abi foe doe nanga na tjari kon foe Gado kroetoe tapoe san na bijbel e kari „na Bigi Babylon, na mama foe den hoeroe-oema èn foe den tegoe sani foe grontapoe” (Openb. 17:5). Èn nownow kaba, ja, tapoe disi momenti, sani e pasa, di e sreka na pasi foe na tjari kon foe na kroetoe!
4. Foe sanede a de wan boen sani foe sabi san sa pasa nanga na owroe Babylon?
4 Soema de na agersi hoeroe-oema foe den Santa Boekoe? Fa wi kan taki dati den sani di tjari en pori kon, e bigin gro kon? Wi kan leri foeroe foe den sani disi te wi poti wi prakseri tapoe wan tra Babylon, na makti grontapoekondre foe moro leki toe doesoen jari pasa kaba. San ben pasa nanga na owroe Babylon, de moro leki historia. A de wan toemsi aparti profétisch parallel foe san sa pasa djonsro nanga na „bigi hoeroe-oema” ini wi ten. — Openb. 17:1.
NA „BIGI BABYLON” FOE OWROETEN
5. Foe sanede Nebukadnezar ben abi reden foe meki bigi?
5 „Disi no de na bigi Babylon, di misrefi ben bow gi na kownoefamiri oso nanga na tranga foe mi makti èn gi na wartifasi foe mi glori?” (Dan. 4:30). Disi ben de den wortoe foe meki bigi di na kownoe foe Babylon, Nebukadnezar ben taki, moro leki siksi hondro jari bifo wi gewoon teri. Agersi leki Nebukadnezar ben abi boen reden foe a meki bigi foe en, bikasi Babylon ben de ini na ten dati na moro bigi foto, na mamafoto foe na moro makti kondre di na grontapoe oiti ben sabi. Agersi dati na bigi foto disi no ben de foe wini, foedi a ben tapoe lontoe nanga dobroe skotoe foe ston. Agersi leki a ben abi toe, wan watrapasi — na liba Eufraat — di ben waka pasa na foto. Na ala toe sé foe na liba, inisé foe na foto, bigi skotoe nanga doro de, di ben kan sroto foe ben kan tapoe sma di ben wani kon na inisé.
6. Sma ben sabi Babylon foe sortoe sani ede?
6 Aladi na foto Babylon ben abi wan bigi sroedati makti, a ben de spesroetoe bekenti foe wan tra sani: A ben de na mama foe falsi aanbegi ini na owroe foto dati. Leki fa den taki dan no moro pikinso leki 53 tempel di den feni ini den ston-ipi foe na foto. The World Book Encyclopedia e taki: „Den Babylonsma no ben trowe noiti fositen gado, sodati na nomroe foe gado di den ben aanbegi, ben bigin go ini doesoen-doesoen. Ibri foto ben abi en égi patron gado nanga oema-gado, èn sosrefi toe gado di ben de wan agersifasi foe son, moenkenki nanga stari, na weer, den sani di e gro, den liba nanga na gron.” Na kerki krakti foe Babylon ben bigi so, dati te foe langa srefi na kristenheid ben kon doti nanga dati. Te leki na dé foe tide falsi-kerki prakseri nanga doe foe na antediluviaanse Babylon de foe feni ini pikinmoro ala religie foe disi grontapoe. — Gen. 11:1-9.
7. (a) San ben de na swaki presi foe Babylon di ben kon de wan ogri sani gi en? (b) San Jehovah ben sa doe nanga en?
7 Na foto Babylon foe Nebukadnezar ten ben abi wan swaki presi di ben sa de wan ogri sani gi en: A ben de wan owroe, bigi feanti foe na Troe Gado, Jehovah nanga en pipel. Sosrefi toe a ben trowe foeroe broedoe foe sma di no ben doe ogri. A bijbel e taki: „No wawan Babylon ben de na oorzaak dati den sma foe Israël di den ben wini ben fadon, ma sosrefi toe foe na oorzaak foe Babylon ede den sma foe na heri grontapoe di den wini ben fadon” (Jer. 51:49). Leki wan bakapisi foe disi Jehovah ben verklari: „Babylon, na moi sani foe den kownoekondre, na glori foe na bigifasi foe den Chaldewsma, moe tron leki di Gado ben drai Sodom nanga Gomorra. . . . na ten foe en kon krosibé, èn den dé foe en srefi no sa poti na wan tra ten.” Na profétitori dati, Jesaja ben skrifi ini na jari 732 bifo G.T. (Jes. 13:19-22). So wan hondro jari na baka Jeremia ben taki: „Foe na atibron ede foe Jehovah meki soema no sa libi drape moro, èn sma moe gwe libi en krinkrin. Foe taki foe ibri sma di e waka psa Babylon, a sa tanapoe nanga froewondroe èn froiti foe ala den tanteri foe en.” Ja, na „bigi Babylon di ben gersi leki a no de foe wini” ben sa tron „leki ston-ipi, na olo foe wolfoe, . . . sondro sma di e libi na ini”. — Jer. 50:13; 51:37.
8. Sortoe finifini pisi ben gi foe na fasi fa Babylon ben sa fadon?
8 Fa Babylon ben sa fadon precies? Jehovah ben ferteri Jesaja nanga Jeremia wan toe foe den finifini pisi foe en. Jesaja ben skrifi dati Jehovah de „na Sma di e taki gi na watra-dipi: ’Tron dampoe; èn ala oen liba mi sa meki kon dré’” (Jes. 44:27). Moro fara Jesaja ben verklari: „Disi Jehovah ben taki gi en salfoewan, gi Cyrus, di mi ben teki en reti-anoe foe go na en fesi foe poti naatsi na en ondro, sodati mi kan loesoe poeroe srefi den banti foe den djonkoe foe kownoe; foe opo na en fesi den doro nanga dobroe-fré, sodati srefi den portoe no sa sroto” (Jes. 45:1). Jeremia ben taki na fesi: „Den tranga man foe Babylon ben stop foe stré. . . . A makti foe den kon dré. Den tron leki oemasma” (Jer. 51:30). Na liba foe Babylon di ben kibri en, Eufraat, ben sa kon dré soboen; wan tiriman di Jehovah ben kari na nen langa bifo a ben gebore, „Cyrus”, ben sa de na winiman; den portoe na sé na liba no „ben sa sroto”; èn den sroedati foe Babylon ben sa „stop nanga stré”.
9. Foe sanede spesroetoe na fesa foe Belsazar ben de wan tegoe sani ini na ai foe Jehovah?
9 Na 5/6 oktober, ini na jari 539 bifo G.T. den profétitori dati ben kon troe soifri. A neti dati, na bigifasi Babylon kownoe Belsazar ben poti wan fésti-njanjan gi doesoen foe en granman nanga tra sma. Foedi a ben gebroiki na okasi foe hori wan kerki fesa, sodati a ben kan spotoe Jehovah, meki a ben meki den ben tjari den santa patoe kon na ini sé, di Nebukadnezar ben tjari komoto foe na tempel ini Jeruzalem ini 607 bifo G.T. Ini den patoe dati, di Gado pipel ben gebroiki fositen ini na diniwroko foe Jehovah, Belsazar nanga den tra sma ben dringi, nanga den oema foe na kownoe tapoe wan asranti fasi foe grani den gado foe den. — Dan. 5:1-4.
10. San ben de na anoe-skrifi tapoe na skotoe èn fa Belsazar ben doe?
10 Ma no moro langa den ben sa spotoe nanga Jehovah! Na ten ben doro gi en foe opo doe wan sani! „Tapoe na momenti dati den finga foe wan libisma anoe ben de foe si èn ben skrifi . . . tapoe na pleisterwroko foe na skotoe foe na paleisi foe na kownoe, èn na kownoe ben si na bakasé foe na anoe di ben skrifi” (Dan. 5:5). Di Belsazar ben si disi, a ben skreki sote dati „srefi en kindi ben naki na makandra” (Dan. 5:6). Nanga dekati Daniël ben tjari kon na krin na anoe-skrifi di ben komoto foe Gado èn a ben taki: „Gado ben teri den dé foe joe kownoekondre èn a ben meki wan kaba kon na en . . . joe ben wegi tapoe wan wegi èn joe ben de toemsi lekti . . . joe kownoekondre ben prati èn ben gi na den Mediasma nanga den Persiasma.” — Dan. 5:26-28.
11. Fa na bijbel-profétitori foe Babylon, ben kon troe te ini den moro finifini pisi?
11 Dorosé foe den skotoe foe Babylon, den Persia legre di Cyrus na Bigiwan ben tjari, makandra nanga den Mediasma ondro Darius, ben lontoe na foto. Aladi den Babylonsma ben de krinkrin ini den kerki fesa nanga foeroe babari foe spotoe Gado, èn den ben firi densrefi seker foe den gado nanga legre-makti foe den, dan Cyrus ben gebroiki wan toemsi moi koni foe feti. Na a noordsé foe Babylon den koni troep foe en ben meki wan olo ini na broki foe na liba Eufraat, sodati den ben meki na liba waka wan tra sé èn den watra no ben lon go moro fara na a zuidsé foe na foto. A no ben teki so langa ofoe na hé foe na watra foe na liba ini nanga lontoe Babylon ben bigin foe saka. Ini wan sjatoe ten na watra ben lagi nofo, dati den troep di Cyrus ben tjari ben kan go foe noordsé nanga zuidsé ini na bedi foe na liba èn na so fasi ben kan hari go te ini na ati foe na foto Babylon. Leki wan froewondroe sani, den portoe na ala toe sé foe na liba ini na foto, den droengoe Babylonsma di no ben firi a fesi san ben o pasa ben libi den opo. Nanga bigi groepoe den sroedati foe Cyrus ben hari go na inisé foe Babylon. „Ini na srefi neti dati, Belsazar, na chaldew kownoe ben dede” (Dan. 5:30). „A bigi Babylon” ben fadon — ini soso wán neti! Fa disi ben seki sani, no wawan Babylon, ma ala den naatsi di de a lontoe! Na kaba foe Babylon ben kon precies so leki Jehovah dienstknegti ben taki na fesi. Èn te foe wan pisi ten, dan Babylon ben tron troetroe wan „ston-ipi”, „wan presi di tan légi”, „sondro sma di e libi na ini”.
SAN A WANI TAKI GI WI TEN
12. San na apostel Johannes e taki ini Openbaring kapitel 17 foe na „Bigi Babylon”?
12 San disi wani taki gi wi ten? A wani taki foeroe. Moro leki siksi hondro jari baka na fadon foe Babylon, dan na apostel Johannes ben kisi Gado jeje foe skrifi na boekoe Openbaring (na Apocalypse). Ini disi a ben taki foe wan tra „Bigi Babylon” èn a ben skrifi foe en leki „na mama foe den hoeroe-oema èn foe den tegoe sani foe grontapoe” (Openb. 17:5). „Den kownoe foe grontapoe” na so Johannes ben skrifi „ben doe hoeroedoe nanga en, aladi den sma di e libi na grontapoe ben kon droengoe foe na win foe en hoeroedoe”. — Openb. 17:2.
13. (a) Foe sanede na disiten „Bigi Babylon” no kan de soso wan tra grontapoemakti? (b) Foe sortoe reden na hoeroe-oema abi na nen foe „Bigi Babylon”?
13 Foedi taki dja, dati den kownoe ben doe hoeroedoe nanga en, dan a de krin dati na „Bigi Babylon” disi no de gewoon wan tra kownoe. A de troetroe na agersifasi foe na sani di na owroe Babylon ben abi barinen foe en — falsi religie. Foe datede meki na disiten hoeroe-oema e tjari na srefi nen leki na owroe foto. Foeroe foe den falsi leri nanga doe di wi e feni ini na disiten kerki Babylon, wi kan tjari foe troe go wantronwantron baka na a kerki Babylon foe owroeten. Na hoeroe-oema, „na Bigi Babylon” foe wi ten e agersi soboen a grontapoe kondre foe falsi religie di hondro hondro jari ben meki den taki foe en, foedi a ben abi hoeroedoe gemeenschap nanga na grontapoe na presi foe dini Gado tapoe wan krin fasi. Boiti dati, Openbaring e taki foe en, èn dati de ete wan marki dati a de religie: „Bikasi nanga den ogrijeje doe foe joe (falsi religie), joe ben kori ala naatsi.” — Openb. 18:23.
14. Sortoe sani de a srefi na mindri den toe Babylon?
14 Hori na prakseri dati na owroe foto dati, Babylon, ben de wan bigi feanti foe Gado nanga en pipel èn a ben de frantwortoe foe na foeroe broedoe di ben trowe ini den feti foe en foe wini kondre. Na so na bijbel e taki foe na disiten bigi foto Babylon: „Ini en ben feni na broedoe foe proféti, nanga foe santawan nanga foe ala sma di ben slagti na grontapoe” (Openb. 18:24). Na hoeroe-oema disi ben vervolgoe Jehovah disten pipel, en kotoigi, hebi. A sosrefi toe wi kan taki dati a de frantwortoe foe na „broedoe foe ala sma di ben slagti na grontapoe” foedi a ben de na baka na feti foe den naatsi èn a ben gi sma na ala sé tranga foe kiri makandra.
15. Soema sa pori na hoeroe-oema, èn omeni ten disi sa teki?
15 Foedi „den sondoe foe en ben hé go te na hemel”, meki Gado sa tjari esesi na dedestrafoe kon tapoe na hoeroe-oema (Openb. 18:5, 21). Na bijbel e taki dati „tapoe wan dé den tanteri foe en sa kon”, ja, „ini wan joeroe”! (Openb. 18:8, 10). Dati sa akroederi nanga san ben pasa nanga na model foe en, na owroe Babylon, di ben fadon ini wán neti! Èn soema sa pori na hoeroe-oema? Jehovah sa gi pasi dati den politiek elementi di ben doe hoeroedoe nanga na hoeroe-oema, de den wrokosani di sa pori en. „Den sa abi ogri-ati foe na hoeroe-oema èn den sa meki a kon légi èn sondro krosi, èn den sa njan den pisi foe en skin èn bron en krinkrin nanga faja.” — Openb. 17:16.
16. San de den „watra” di na disiten Babylon sidon na tapoe èn sortoe parallel de ini disi nanga na Babylon foe owroeten?
16 Ete wan kroederi de mindri na owroe nanga na disiten Babylon, wan kroederi di abi te make nanga na pori foe den. Na owroe Babylon „ben sidon” tapoe watra, den letterlek watra foe na liba Eufraat. Na disiten Babylon sidon sosrefi toe „tapoe foeroe watra”, leki fa Openbaring 17:1 e taki. San den watra disi e agersi? Gado Wortoe e piki: „Den watra di oenoe ben si, pe na hoeroe-oema sidon, wani taki pipel nanga ipi sma nanga naatsi èn tongo” (Openb. 17:15). Loekoe pikinso dati ben waka na fesi na trowe foe na owroe Babylon wantronwantron a saka foe den letterlek watra foe na liba Eufraat. Den agersi watra (libisma) e saka na a srefi fasi ondro na disiten Babylon? Ja, foe troe, èn disi e psa leti na wi fesi! — Openb. 16:1, 12.
FA DEN „FOEROE WATRA” E SAKA
17. Na sortoe fasi den agersi watra e saka pe na hoeroe-oema sidon na tapoe?
17 Na sortoe fasi wi kan taki dati den agersi „foeroe watra” e saka gwe ondro na disiten Babylon èn na hé foe na watra e kon de moro lagi? Foedi miljoen-miljoen sma, sosrefi toe tindoesoen kerki fesiman nanga wrokoman, ben poeroe na jepi di den ben gwenti foe gi na den kerki foe den, dati meki den ben meki den kerki disi kon swaki srefi srefi. Disi de troe spesroetoe gi na kristenheid, di abi wan moro bigi fowtoe, foedi a de taki dati a de dini Gado nanga Kristus. Aladi wawan tron wi e jere, dati „wan kon na libi” de ini wan toe religie, spesroetoe ini groepoe di no de so orthodox, tog disi de moro foeroe frafra. Te joe poeroe wan toe na ini, dan na firi de ala sé krin èn a de foe si foe commentaar ini na grontapoepers, soleki disi:
„Wan sani pasa nanga na kristenheid. Ala sani e sori dati wi go ini wan langa, langa neti di wi no sa komoto na ini . . .
Wan boen de foe na kristendom nanga na Loomsoe bribi ini den publiki sistema ben gwe langaten. Wi de kotoigi foe na dede foe wan maatschappelek nanga politiek gestructureerd kristendom.” — na prenspari loomsoe skrifiman Malachi Martin, ini Providence (VS) koranti „Sunday Journal”, 17 februari 1980.
„Na mankeri foe priester nanga man ini na Westen e doro ini na wan naatsi baka na trawan na marki foe gevaar.” — „Time”, 21 augustus 1978.
„Na kristendom e hari ensrefi poeroe esesi baka . . . wan prenki foe bijgelovig agnosticisme, foe broeja nanga no abi foe sabi. . . . Sondro foe taki sani moro bigi leki a de, wi kan taki dati pikinmoro no wan enkri pikin sabi san de na kristendom troetroe.” — London Times, 25 september 1978, ini wan commentaar tapoe na rapport foe na Raad foe leri foe na Kerki foe Engeland (Ingrisikondre).
18, 19. Gi moro bewijsi foe na saka foe den „watra” disi?
18 Di paus Johannes Paulus 2 ben fisiti Fransikondre ini mei 1980, na New York Times (31 mei) ben gi leki commentaar: „Na krakti foe na kerki ini Fransikondre e go esi na baka. Wan ondrosoekoe fa sma e prakseri ben meki no langa pasa kaba èn disi ben sori dati soso 15 procent foe den sma e libi leki loomsoe, aladi 85 procent dopoe ini na kerki.” Ini Brazilia aartsbisschop Luciano Cabral Duarte ben taki: „Den loomsoe sma foe wi e kon swaki èn e go na ondro ini wan tranga jeje anemie (mankeri foe broedoe)” (Veja, 30 januari 1980). Ini Nigeria wan prékiman foe na presbyteriaanse kerki ben taki: „Na kerki gersi leki a lasi en firi foe śoema a de, soleki wan sma di e lasi en froestan èn e aksi: ’Soema mi de’ èn ’foe sanede mi de dja?’” (Daily Star, 11 september 1978) Ini Grikikondre wan koranti ben taki foe na Griki Orthodox Kerki, di ben kisi wan dé respeki:
„Ini disi ten sma e taki foeroe tron foe na kerki, dati wani taki den fesiman, spesroetoe den moro hé fesiman, foe bigi sjen sani ede èn a de wan fonten foe ala sortoe law- èn don sani.
Srefi na so wan fasi, dati na moro bigi pisi foe na Griki pipel now wan heri pisi ten kaba no e si na moro bigi pisi foe den kerki-fesiman leki wan respeki, jeje instituut, ma leki wan groepoe oproeroeman, sma di e meki schandaal, radicalen nanga sma di e soigi tra sma, di, na presi foe den ’tjari den ipi foe den’, e prisiri den nanga soso taki èn don sani.” — „To vima”, 15 oktober 1978.
19 Time e taki foe na moro prenspari centrum foe na Oostoe Orthodox Kerki ini Turkije: „Na historia patriarchaat, wan dé na centrum foe na afoe kristen grontapoe, didon e dede.” Na Amerkan rabbijn Alvin Reines e taki foe na djoe religie: ’Na Amerkan djoe-bribi de ini wan moeiliki ten sondro howpoe. Na problema de dati Amerkan djoe no e teki den leri foe na traditioneel judaisme.’ Ini Ingrisikondre ini den jari di pasa, someni kerki ben sroto leki wan bakapisi foe na go na baka foe na go na kerki, dati wán commentator ben kari den „wan sortoe di e dede gwe”. Ini Doisrikondre wan ondrosoekoe foe sabi fa sma e prakseri ben tjari kon na krin dati soso 17 procent foe Doisri ondro 35 jari e bribi dati Gado de. Di den ben aksi sma ini Japan: „Joe abi wan ofoe tra religie?” 60 procent ben piki „Nono”, aladi ete 7 procent no gi commentaar. Ini na wan kondre go miti na tra kondre na situwasi tapoe na tori foe religie foe disi grontapoe soleki ben skrifi ini na The Age foe Melbourne (Australia) — dati ala denominatie e ondrofeni „wan go na baka foe bribi sma”. Foedi den „bribi sma e go na baka” — na saka foe den „foeroe watra” pe na hoeroe-oema sidon na tapoe e feni presi now so krin, dan den pori-krakti kan de so fara ete? Nono.
20. Sortoe tranga rai Gado Wortoe e gi na reti-ati sma?
20 Na jepi di ben sa kon moro pikinso gi na hoeroe-oema e akroederi nanga san na bijbel profétitori e skrifi foe den „laatste dé” disi, pe tanapoe dati libisma ben sa abi „moro lobi gi prisiri leki lobi gi Gado” èn „ben sa abi wan fasi foe frede foe Gado, ma den no ben sa sori dati den abi na krakti foe en”. Na srefi profétitori ben gi moro fara na rai: „Drai baka gi den disi” (2 Tim. 3:4, 5) Na a srefi fasi na verklari de di e meki bekenti gi reti-ati sma di de ete ini na disiten „Bigi Babylon”: „Komoto na en mindri, mi pipel, efoe oenoe no wani teki prati ini den sondoe foe en, èn efoe oenoe no wani kisi afoe foe den tanteri foe en.” — Openb. 18:4.
21. Sortoe doe te foe kaba e meki na atibron foe Jehovah kon na tapoe, èn nanga sortoe bakapisi?
21 Now heri esi leki wan bakapisi foe na kroetoe di Gado e tjari kon tapoe en, „na bigi hoeroe-oema” sa kisi na dedestrafoe. Soleki a ben de nanga na owroe Babylon, na so na esi trowe foe na disiten Babylon sa de wan bigi seki gi na grontapoe (Openb. 18:9-19). Na pori foe en, de na sani di e marki na bigin foe na „bigi benawtoe”. Moro fara den kontra-Gado elementi sa drai densrefi kontra Jehovah dienstknegti ini wan moeiti foe pori den (Ezech. 38:16). Ma Jehovah e taki gi en loyaalwan: „Na sma di fasi joe, fasi mi popki foe mi ai” (Zach. 2:8). Disi e meki Gado doe wantronwantron wan sani. Jehovah e taki: „Èn a moe pasa tapoe na dé dati . . . dati mi atibron sa opo kon ini mi noso. Èn ini mi faja, ini na faja foe mi atibron, mi sa moesoe, taki” (Ezech. 38:18, 19). Te Gado e kon foe jepi en dienstknegti, dan a de naki den naatsi esi èn nanga wan krakti di e pori sani ini na „feti foe na bigi dé foe Gado na Almaktiwan”, Armageddon. Den sma di de feanti foe Gado èn foe en pipel, e kisi pori na so fasi, sodati na grontapoe sa kon krin foe ala ogridoe. — Openb. 16:14, 16; Spr. 2:22.
22. Na sortoe fasi den sma di de loyaal na Jehovah sa kisi pai?
22 Baka Armageddon na wondroe njoen seti e bigin! Den loyaalwan di e „komoto foe na bigi benawtoe”, e kisi wan bigi paiman. „Loekoe! Na tenti foe Gado de na den libisma, èn en sa libi na den mindri, èn den sa de den pipel foe en. Èn Gado srefi sa de na den. Èn a sa figi poeroe ala watra foe den ai, èn dede no sa de moro, no wan sari, no wan pen no sa de moro. Den fositen sani pasa kaba.” — Openb. 21:3, 4.
23. (a) Foe sanede wi moe teki dekati, aladi den toestand ini disi ten e kon moeiliki? (b) Wi moe gi sma di e soekoe waarheid, tranga foe doe san?
23 Oen teki dekati, oen ala di lobi retidoe! Sabi dati den dé foe na „bigi hoeroe-oema” nanga foe den politiek tiriman foe na seti foe sani di e kwinsi sma, ben teri èn dati Jehovah sa poeroe den na pasi heri esi. Abi na froetrow, foedi Gado „no kan lé”, dati a sa meki joe howpoe kon troe foe libi tego ini wan paradijsgrontapoe, pe „joe sa feni ibri dé switi prisiri ini vréde pasa marki” (Tit. 1:2; Ps. 37:11). Meki, ini na pisi ten disi, gebroiki foe Jehovah seti foe tranga joe na jeje fasi foe den moeiliki dé di de let na wi fesi. Te joe e doe disi, poti toe prakseri na tra sma „di e angri èn dré watra ete na retidoe”. Gi den sortoe sma disi tranga foe teki bijbel rai na ati: „Soekoe Jehovah, aladi a de ete foe feni. Kari en aladi a de krosibé.” — Matt. 5:6; Jes. 55:5.