Babilon na Bigiwan fadon èn den leysi strafu gi en

„A FADON! Babilon na Bigiwan fadon, en di ben meki ala nâsi dringi fu na win fu na ati bron fu en hurudu !” „Babilon na Bigiwan fadon, èn a tron wan libipe fu ogri yeye èn wan kibripe fu ibri danpu di no krin èn wan kibripe fu ibri fowru di sma no wani si na ay èn di no krin!” — Openbaring 14:8, 18:2.

Fa na profeytitori disi de wan di e meki yu skreki! „Babilon na Bigiwan fadon!” Someni yarihondro na agersi taki disi ben wiki na gridi fu beybri ondrosukuman. Fu san-ede a ben sa musu wiki wi belangstelling? Fu di so leki den beybri profeytitori e taki dan san o miti Babilon na Bigiwan heri esi sa abi krakti tapu na heri libismafamiri. So leki wi ben si na ini den uitgave fu 1 nanga 15 april fu na tijdschrift disi, dan na makti huru uma disi sma e kon sabi krin leki na grontapu makti fu Satan fu falsi relisi.a

Ma na sortu fasi a fadon? Èn oten?

Babilon fadon ma a no pori

Fu frustan san na fadon fu Babilon na Bigiwan wani taki krin krin, dan wi musu frustan san ben psa di na owru Babilon ben fadon na ini 539 bifo G.T. Na ini na ten dati Gado pipli, Israèl, ben de pikinmoro 70 yari na ini katibo. Now den ben fruwakti fu kon fri so leki den wortu fu den profeyti fu den ben taki (Yeremya 25:11, 12; 29:10). Fa den ben musu prisiri srefi srefi di Cyrus na Persiya man ben meki Babilon fadon èn ben fri den dyu so taki den ben kan bigin fu dray go baka na a santa foto fu den, Yerusalen! — Yesaya 45:1-4.

Ma aladi Babilon makti tapu den dyu ben broko dan disi no ben wani taki na kba fu na owru Babilon. Na uma historiya skrifiman Joan Oates e skrifi ini a buku fu en Babilon: „Cyrus nanga a wini di a ben wini ben kon na ini Babilon, ben tapusma fu go ffuru sani tyari gwe, èn ben poti wan tiriman fu Persiyakondre, ma ben libi den sani fu a fasi fu anbegi èn na borgru fasi fu tiri sani . . .. Te yu luku en bun dan na fosi presi a e gersi taki na ondro na tiri fu Persia pikinso kenki ben kon na ini na privé libi fu den sma di ben libi na ini Babilon. Den fasi fu anbegi ben tan èn bisnis ben gro.” So bun Babilon ben tan dray ala di a ben fadon, ma nanga wan bigi difrenti — a pipli fu Gado, Israël, no ben de moro na ini katibo. Den ben dray go baka na Yerusalen fu opo na tru anbegi baka.

Di na Griki srudati edeman Alexander na Bigiwan ben hari go na ini Babilon na wan pisiten fu 331 bifo G.T., dan den sma di ben libi drape ben bari en wan switi kon. A ben bosroyti fu meki Babilon tron en tra prenspari foto ini owstusey, ma a ben dede bifo a ben kan meki na muyti disi fu en fu kisi grani kon tru. Nanga disi e kon na krin taki Babilon na a lati pisiten dati ben e dray ete.

Na fadon fu Babilon na ini 539 bifo G.T. no ben wani taki fu dati-ede taki na foto no ben de moro. A ben tan dray ete someni yarihondro. Fa disi de fu si na ini na disiten kontru fu den profeytitori di abi fu du nanga Babilon na Bigiwan?

Babilon na Bigiwan e ondrofeni wan fadon

Disi e kruderi nanga na fadon fu na agersi Babilon na Bigiwan, na grontaptu makti fu falsi relisi. Ini den fosi yari fu a di fu twenti yarihondro fu wi, bifo 1919, dan den Beybri ondrosukuman, so leki sma ben sabi Yehovah Kotoygi ini a ten dati, ben musu kon fri fu wan fasi fu yeye katibo na den denki nanga gwenti fu falsi relisi. Aladi den ben trowe falsi leri so leki na driwanfasi èn wan sili di no e dede, dan toku den ben doti ete nanga sani fu Babilon. Furu fu den ben kweki wan fasi fu regtvaardiki en srefi nanga yepi fu a kweki fu a karakter. Son wan ben gi grani na sma fu di den ben gi den srefi abra na wan dini fu libisma èn dati ben de, tapu na sma fu Charles T. Russel, na fosi presidenti fu na Wachttorengenootschap. Sondro taki den ben abi wan enkri beybri fondamenti fu disi, den ben hori friyaridey nanga kresneti. Na kroysi ben teki te na a ten dati ete wan prenspari presi na ini a prakseri fu den. Son wan fu den ben weri srefi wan kroysi nanga kownu-ati pina, aladi trawan ben pruberi fu kisi net so wan respeki grani leki na krestenhèyt. Ne na ini 1917 syatu baka na dede fu Russell wan prenspari kenki ben feni presi.

Na ini na yari dati na Wachttorengenootschap ben tyari kon a doro wan kommentaar tapu na buku Openbaring nanga leki nen The Finished Mystery. A buku disi ben puru a bere fu den kerki leriman fu na krestenhèyt kon a doro èn ben puru kon a doro so srefi tu a abi di den ben abi fu du nanga na bigi feti di ben de na a ten dati na ini Europa. Wan tu anitri kerki leriman, wan grupu fu sma di ben teki presi gi Babilon na Bigiwan na ini Canada, ben poti a prakseri fu den politiki mati fu den na ini na tiri fu Canada na tapu den wortu disi di ben teki puru fu a buku, èn ben feni fowtu na den Beybri ondrosukuman taki den e gi sma faya fu opo den srefi. Tapu 12 februari 1918 lanti ben tapu a wroko fu watch Tower Society na ini Canada.

Den kerki leriman na ini Verenigde Staten fu Amerkankondre ben de esi-esi fu waka baka na eksenpre fu den Canada brada fu den. Bifo wan tu dey lanti ben teki na ini los Angeles (Californiya) buku fu a Wachttorengenootschap. Dan na ini mei 1918 komando ben gi fu kisi J.F. Rutherford, na nyun presidenti fu na Wachttorengenootschap, nanga seybi tra sma di ben wroko nanga na Genootschap. Kefarlek esi den krestenman disi ben tyari go na fesi krutubangi na ini yuni èn strafu ben leysi gi den. Seybi ben kisi twenti yari strafu na ini strafu-oso, èn wan ben kisi tin yari. Fa den kerki leriman ben du tapu disi? Martin Marty e taki na ini en buku Modern American Religion: The Irony of It All: „Den kerki leriman ben dray baka gi den Russellsma [baka ten sma ben sabi den leki Yehovah Kotoygi] èn den ben prisiri srefi srefi fu sabi taki den tiriman fu Yehovah Kotoygi di den ben kragi ben sa kisi twenti yari strafu-oso strafu.” Den sma di ben teki presi gi Babilon na Bigiwan ben lafu. Den ben frigiti na odo: „A sma di e lafu leki a kriboywan, e lafu moro bun.”

Na so fasi na ini 1918 na agersi katibo na ini Babilon gi wan tu memre fu Yehovah pipli ben tron so srefi tu wan tru tru katibo. Wan skwala fu frufolgu di ben de kontrari Beybri ondrosukuman ben wasi psa abra Verenigde Staten, Canada nanga tra kondre. Nationalistisch kerki leriman ben orga na gewoon pipli fu yagi den puru fu den foto nanga dorpu. Den ben trowe tara na tapu Beybri ondrosukuman èn iti baka dati fowru wwiri a den tapu, èn so srefi tu fon den nanga tiki. Wan syen bericht fu kruktudu kontrari na pikin grupu disi fu opregti kresten ben kon de now.b

Ne wan onfruwakti kenki ini sani di ben psa ben kon na ini 1919. Na Bigi Feti ben stop na ini november 1918. Den Kotoygi ben aksi fu luku den strafu fu den tiriman fu na Wachttorengenootschap ete wan tron fu di den ben abi den fondamenti tapu krutu di no ben bun. A ben tergi den relisi feyanti srefi srefi di Rutherford nanga den konpe wrokoman fu en ben komoto fu strafuoso. Marty e taki fu disi: „Den orthodox kerkisma no ben prisiri nanga disi.” Te fu kba ala den sma di den ben kragi ben kon kisi den bun nen baka krin krin. Na katolik krutuman Martin T. Manton di ben krutu sani a fesi bifo a luku a tori, èn di baka ten pawsu Pius XI ben gi en a grani fu „Ridder na ini na Orde fu St. Gregorius na Bigiwan” ben weygri den ayti Kotoygi fu kon fri tapu borgtocht (na moni di e pay so taki wan sma kan fri fosi a kon a fesi krutu bangi) nanga na bakapisi taki neygi mun langa den ben de na ini strafu. A tru tru sma di a de ben kon baka ten a krin na ini 1939 di den ben poti en na ini strafu fu di a ben teki tyuku!

Di Rutherford nanga den konpe wrokoman fu en ben komoto na ini strafu na ini 1919 den ben dray go baka na a ede kantoro fu na Wachttorengenootschap na ini Brooklyn. Den ben bigin na a ten dati fu orga den srefi nyun baka ini na moro bigi kownukondre preykiwroko di grontapu oyti wan ten ben sabi. Den Beybri ondrosukuman ben broko den keti fu a frede fu libisma èn den ben si now krin pe den ben tanapu ini na tori fu ala falsi fasi fu anbegi. Babilon na Bigiwan ben de na feyanti fu den di no ben abi sari-ati èn en bere hen puru kon a doro leki a sma di fadon. Na tru anbegi ben musu opo baka a mindri den nâsi.

Den deki-ati kresten disi ben meki na oso fu oso preyki wroko fu den kon moro bigi. Fu puru na bere fu na falsi relisi kon na doro, meki den ben hori publiki optocht nanga bord pe ben tanapu a tapu: „Relisi na wan trapu èn e puru sani na sma skin” èn „Dini Gado nanga Krestes, na Kownu.” Na falsi relisi ben e gro èn ben du wroko te na a ten dati ete nètso leki fositen na ini na owru Babilon, ma ini a tori fu Yehovah Kotoygi Babilon na Bigiwan ben fadon na ini 1919. Den ben kon fri fu na skotu di Babilon ben skotu den!

Na makti fu Babilon di e broko saka

Now seybitenti yari a baka, wi kan si taki na makti fu Babilon na Bigiwan na ini furu pisi fu na grontapu disi e broko saka. Relisi gersi leki kande te now ete a e gro na ini den Verenigde Staten, pe wan pisi fu den sma di e wroko nanga den firi nomo e meki televisie evangelium preykiman nanga relisi psycholoog puru moni a den saka. Toku, srefi son wan fu den kikibuman disi di lobi gudu noso langa psa bere ben puru kon na doro èn ben kisi syen. Relisi gersi leki na ini na Republiek Korea e go na fesi, pe den kerki fu na krestenhèyt de bun dipi na ini politiki. A gersi leki Babilon na Bigiwan aladi „a fadon” de te now ete.

Ma leti na baka na kba fu na grontapu feti na orthodx relisi na ini kondre leki Doysrikondre, Denemarken, Sweden nanga Ingrisikondre ben lasi a moro bigi ipi fu den. Srefi katoliki kondre leki Italiya, Spanyorokondre nanga Fransikondre, e si taki sma ben libi den katoliki gwenti soleki na bigti nanga na go na mis. Na nomru fu sma di e stuka fu kon tron pristri saka srefi srefi. Èn soso kba taki na disi ten pawsu e feni en fanowdu moro leki sortu tra pawsu na ini na historiya tu fu waka lontu na heri grontapu na wan marki fu wan kerki di de ini wan muyliki ten.

Boyti fu dati, a de so taki moro furu socialistis kondre sensi 1917 no e gi so wan prenspari presi na relisi èn meki wan stop kon na a politiki makti di a ben abi a fesi. Na a heri grontapu na traditioneel relisi de te now ete na sani di e meki someni ogri-ati nanga brudu e fadon taki furu sma di e go denki sani ben dray baka gi ala relisi, efu a de now fu westsey ofu owstusey relisi. Iya, den agersi watra pe Babilon na Bigiwan sdon na tapu, dati wani taki den pipli di a e tiri a tapu e drey gwe. Den e leysi strafu gi Babilon na Bigniwan èn na tyari fu na strafu kon a tapu en de krosibey. — Openbaring 16:12; 17:1, 15.

Babilon — Fu san-ede den e leysi strafu gi en

Sortu reti fondamenti Yehovah abi fu krutu na grontapu makti fu falsi relisi? Son sma e denki kande taki Gado sa luku nanga prisiri ala skoro, atôso, nanga lobidu wroko di difrenti relisi meki go a fesi. Ma fa ala disi e kruderi nanga na kragi di Yehovah e tyari kon kontrari den relisi fu na grontapu? Meki wi go ondrosuku syatu na kragi dati èn na bericht di relisi meki.c

„Wan fu den seybi engel di ben abi den seybi preti ben kon èn ben taki nanga mi taki: ’Kon, mi sa sori yu a krutu di e kon tapu na bigi huru, di e sdon tapu furu watra, èn di den kownu fu grontapu ben du hurudu nanga en, aladi den sma di e libi a grontapu ben kon drungu nanga na win fu en hurudu’” (Openbaring 17:1, 2). So leki wi ben sori krin na ini wi uitgave fu 1 nanga 15 apri1 1989 dan na konkru fu relisi nanga nationaal tiriman ofu „den kownu fu grontapu”, di ben du den sma furu ogri ini na heri historiya yu kan teki dati gersi nanga na waka nanga libi fu wan gridi huru-uma di e du hurudu. Ma na kragi no kon a wan kba ete.

„En mi ben si taki na uma ben kon drungu fu na brudu fu den santawan èn fu na brudu fu den kotoygi fu Yeyses.” „Iya na ini en den ben feni na brudu fu profeyti èn fu „santawan èn fu ala sma di den ben srakti na grontapu” (Openbaring 17:5; 18:24). Babilon na Bigiwan musu kisi a fowtu fu a brudu payman fu di ini den yarihondro a ben meki tru krestensma dede fu den bribi ede makandra nanga wantu sma di ben abi na deki-ati fu vertaal na beybri ini na tongo fu na gewoon pipli, so srefi tu furu fu den sma di ben prefuru fu abi èn fu leysi na beybri. So srefi tu brudu srefi tu brudu payman e rostu tapu Babilon na Bigiwan fu di a de frantiwortu taki ini ten no so fara na wi baka tru kresten ben dede fu den bribi ede na ini strafu-oso nanga Concentratie kanpu efu disi ben de now na ondro na nascisme, fascisme ofu tra fasi fu diktatuur. Luku pikinso taki na kragi e go fu „ala sma di den srakti na grontapu” pe so bun so srefi tu den hondro hondro milyun sma na a heri grontapu de na ini èn di ben feni dede na ini den feti nanga a teki refen si fu brudu di ini na heri historiya ben de fu na sey fu sma di e taki taki den e anbegi Gado. — Teki gersi nanga Mateus 23:34-36; 2 Timoteus 3:5.

Na krutu fu Gado tapu Babilon na Bigiwan e sori ete wan kontren fu a fowtu fu en. Na krutu de: „Den afkodrey wroko fu yu kori ala den nâsi (Openbaring 18:23). A de wan moy sani fu si taki „a du fu afkodrey”, de na vertaling fu na griki wortu far.ma’ki.a, di moro furu ben abi fu du nanga na kobroyki fu dreysi, presi pe den e drey sani, towfru wortu; moro fara: gi sma vergif fu dringi; moro fara, towfru wroko”.d Na yeyefasi na falsi relisi ben gi den nâsi vergif, fu di a kori den fu go poti bribi na ini falsi gado nanga leri di ben puru a prakseri fu den fu Yehovah nanga na strey-aksi di abi fu du nanga na universele soevereiniteit. Na falsi relisi so srefi tu ben poti na fondamenti fu ibri sortu afkodrey nanga towfru wroko nanga na fowtu leri fu en fu na sili di no e dede, èn a meki den sma kisi frede gi den dedewan èn a gi den tranga fu anbegi den fositen gransma fu den. Na krutu fu Gado di a e krutu Babilon na Bigiwan de reti doro doro. So leki Yohannes ben skrifi sondu fu en hey en srefi go te na heymel, èn Gado ben tyari den ongeregteghèyti fu en kon ini prakseri.” — Openbaring 18:5.

San wi musu du?

San den sma musu du di lobi now opregti na waarheid fu di Babilon na Bigiwan fadon èn Gado ben krutu en? San e taki na ini Yesaya profeyti tori fu na owru Babilon, de srefi moro krakti ete tapu na falsi relisi na ini na ten disi. „Komoto gwe, komoto gwe, hari komoto fu drape, no fasi no wan sani di doti, hari komoto fu en mindri, hori yu srefi krin, unu di e tyari den wrokosani fu Yehovah” (Yesaya 52:11). Na tranga fanowdu kari disi e kruderi nanga na kari na ini Openbaring 18:4: „Èn mi ben yere wan tra sten fu heymel taki: ’Komoto fu en [Babilon na Bigiwan], mi pipli, efu yu no wani kisi afu fu en sondu, èn efu yu no wani kisi afu fu en plaag.’”

Iya, a de a ten fu broko ala banti nanga na falsi relisi. Ma efu wi e gwe libi Babilon na Bigiwan dan pe wi musu go dan? Wi musu dray go na Yehovah tru anbegi èn moksi wi srefi nanga en Kotoygi. Milyun milyun sma fu ala nâsi fu grontapu e hari go kba na den agersi „bergi fu Yehovah”. Yu so srefi tu e kisi a kari fu stuka makandra nanga Yehovah Kotoygi na beybri èn fu teki prati na a tru anbegi disi. — Yesaya 2:2-4; 43:10-12.

Now na aksi e tan: Efu Babilon na Bigiwan fadon èn strafu leysi gi en, san na a tra penti di de tapu na programa fu Gado? San de fu kon tapu Satan grontapu makti fu falsi relisi? Na ini na tra tijdschrift fu wi, fu 15 mei, wi sa go ondrosuku fini fini na aksi dati ini akruderi nanga den beybri tori.

[Futuwortu]

[Prenki na tapu bladzijde 11]

Ala di Babilon ben fadon na ini 539 bifo G.T., toku a ben dray hondro hondro yari ete leki wan foto

[Prenspari pisi na tapu bladzijde 13]

„Èn a musu psa na den lâsti dey taki na bergi fu na oso fu Yehovah sa poti steyfi tapusey na ede fu den bergi, èn seyker a sa poti hey tapusey fu de pikin bergi; èn na drape ala den nâsi musu lon go. A sa leri wi fu en pasi èn wi sa waka ini en pasi. Furu folku sa go trutru èn taki: ’Kon, èn meki wi go na a bergi fu Yehovah, èn en sa leri wi fu en pasi, èn seyker wi sa waka den pasi fu en.’ Bikasi fu Sion na wèt sa komoto, èn a wortu fu Yehovah fu Yerusalèn.” — Yesaya 2:2, 3.