Na rampoe di e wakti ala kerkiman foe a grontapoe
1. O foeroe den kerkisma de èn sortoe krakti na fadon foe na kerki kownoekondre disi sa abi tapoe den naatsi?
DEN kerkiman foe a grontapoe foeroe srefi srefi. Leki fa na World Almanac foe 1980 taki dan a de moro leki toe nanga afoe miljard sma (2.511.417.750). Ini disi joe abi sma di taki dati den de kristen, djoe, moslim, boeddhist, hindoes nanga trawan. Te na kerki kownoekondre dati di prati ini ensrefi, fadon broko, dan disi sa froewondroe na moro bigi pisi foe na libisma-famiri di tan na libi. Na froewondroe di a sa tjari kon ben taki na fesi tapoe a fasi disi: „Tapoe na babari, taki den wini Babylon, na grontapoe sa seki troetroe, èn na mindri den naatsi wan babari sa de foe jere.” „Arki! Babari foe Babylon, èn wan bigi fadon broko foe na kondre foe den Chaldéasma, bikasi Jehovah e foefoeroe Babylon nanga tranga, èn a sa meki na bigi sten na en mindri lasi gwe, èn den skwala foe den sa kon ogri troe-troe leki foeroe watra. Bikasi tapoe en, tapoe Babylon, na ogri foefoeroeman moe kon, èn den tranga man foe en den sa kisi foe troe. Den bo foe den moe broko, bikasi Jehovah de wan Gado foe pai baka. Sondro mankeri a sa pai baka.”
2. (a) Nanga sortoe „sten” na Babylon foe owroeten ben e taki, ma fa a ben go nanga en „sten”? (b) Leki fa Openbaring skrifi, dan tapoe san na disiten model foe en e rij èn san a sa doe nanga en?
2 Na kon troe foe disi sa wani taki wan eri kenki ini den afersi foe disi grontapoe (Jer. 51:2, 60, 64). Leki na di foe dri Grontapoe-makti foe na owroe historia, Babylon ben taki nanga wan „bigi sten” di abi makti. Ini 539 bifo G.T. en „sten” ben lasi gwe leki wan bakapisi foe den krasi skwala foe fetiman di wini. Na disiten eksempre foe en, na Bigi Babylon, ben taki srefi nanga wan moro krakti „sten” srefi. Na eri grontapoe ben arki. Ini na boekoe Openbaring, kapitel 17, den e agersi en nanga wan oema di sidon tapoesé foe wan sébi-ede werder meti, èn na redi kloroe meti disi e agersi wan grontapoe-organisatie. Den 7 ede foe en e agersi baka makandra den 7 grontapoemakti, te doro na Anglo-Amerkan Grontapoemakti foe now (Openb. 17:1-6). A di foe dri foe den 7 ede e agersi na Babylon Kownoekondre, èn na di foe fo na Medo Persia Kownoekondre. Na Bigi Babylon foe kerki ben doe hoeroedoe nanga ala den 7. A ben rij na tapoe den leki na bigi-misi foe den. Den ben dringi na kerki moksi-dringi di ben de ini en gowtoe beker. Foedi te foe kaba den kon weri nanga en, dan den sa kisi ogri ati foe en èn trowe en poeroe foe den baka.
3. (a) San Jehovah ben sa tjari kon tegen na owroe model foe na Bigi Babylon, èn foe pe? (b) Foe san ede den Medensma e kari tapoe so wan spesroetoe fasi
3 Dati a de troe troe tranga fanowdoe foe gwe libi na Bigi Babylon, de foe si ini den wortoe foe Jehovah, pe a de meki en prakseri bekenti „foe tjari naatsi kon makandra foe na kondre foe nordsé” go tegen na agersi model foe en foe owroeten nanga na prakseri foe feti nanga en. Foedi na „konmakandra” ben sa de sroedati di tjari konmakandra ondro na komando foe wàn persoon, den ben kan kari sosrefi toe wan „naatsi . . . foe noordsé” (Jer. 50:3, 8, 9). Na profétitori ben taki nanga reti na fesi dati „den kownoe foe den Medensma” ben sa teki wan prenspari presi a mindri naatsi di ben sa „konmakandra” (Jer. 51:11). A tori no e taki foe Persiasma ini na konmakandra foe naatsi. Disi no de wan fowtoe, bikasi Cyrus de Grote di ben teki na komando foe na „konmakandra” tapoe en, ben abi pikinso Meden broedoe ini en tité. Baka di a ben wini na kownoekondre foe den Meden, a ben teki moro foeroe Meden sroedati ini en legre. Cyrus ben kon na makti baka na ten foe Jeremia.
4. Soema ben bigin baka na fadon foe Babylon foe rigeri ini a foto dati èn fa Daniël ben taki tapoe wan joisti fasi na fesi soema ben sa teki na moro prenspari presi ini Medo-Persia?
4 Di Babylon ben fadon ini 539 bifo G.T., dan Darius na Medensma, di ben bigin tiri drape, ben de 62 jari (Dan. 5:30, 31). Ini Daniël 8:3 ben taki nanga reti foe na Kownoekondre foe den Meden nanga Persen, dati na pisi foe Persia bakaten ben sa go teki na moro prenspari presi. Cyrus na Pers ben de na sma di ben gi na komando dati den katibo djoe ben moe drai go baka na den kondre. — Ezra 1:1-4.
5. (a) Jehovah e tjari kon akroederi nanga sortoe sé pe winti e komoto te joe loekoe den doe foe pori sani? (b) Soema leki fa en taki a ben sa gebroiki leki en kodja foe masi naatsi nanga kownoekondre?
5 Soleki fa a ben de nanga na pori foe Jeruzalem, di ben pasa kaba ini 607 bifo G.T., na so na pori di ben sa miti Babylon, ben sa kon foe „nordsé” (Ezech. 1:4; 9:2; Jer. 50:41; 51:48). Tapoe a tori foe richting Psalm 75:6, 7 e tjari Gado kon akroederi nanga na „nordsé”, bikasi wi e lési drape: „No foe oostoesé, no foe westsé, no foe zuidsé foe kon hé e komoto. Bikasi Gado de na kroetoeman. A de saka na sma disi èn a de opo a sma dati.” Kownoe Nebukadnezar foe Babylon ini 609 bifo G.T. ben teki na nordsé pasi go na Jeruzalem nanga en oproeroe kownoe Zedekía. Toe jari na baka, na sma di e libi ini Sion ben kan bari: „Nebukadnezar, na kownoe foe BabyIon, . . . ben swari mi leki wan sneki (ofoe kaiman)” (Jer. 51:34, 35). Foe taki foe na prati di Jehovah Gado ben abi na a pori foe Jeruzalem, Jeremia e teki den wortoe di Jehovah ben taki na a ten dati ini 614 bifo G.T. foe Nebukadnezar leki na wrokosani foe en foe kiri sma: „Joe de gi mi leki wan kodja, leki wan fetisani, èn nanga jepi foe joe mi sa masi naatsi (Juda, Egypte, Moab, Ammon, Edom nanga trawan), èn nanga jepi foe joe mi wani trowe kownoekondre ini pori . . . èn nanga jepi foe joe mi wani masi Granman nanga rigeriman.” — Jer. 51:20-23.
6. Leki den wortoe na fesi taki, dan san Jehovah ben sa pai den sma foe Chaldéa?
6 Èn san ben sa pasa baka dati, o Jehovah? „Èn mi wani pai Babylon (no na Nebukadnezar) nanga den sma di e libi ini Chaldéa ala den takroedoe foe den, di den ben doe ini Sion (ofoe Jeruzalem) na oenoe fesi.” — Jer. 51:24, 59, 60.
7. Sortoe kari foe feti Jehovah ben meki sma jere ini 614 bifo G.T. tegen Babylon, èn soema ben gi jesi na dati?
7 Na kownoekondre foe den Medensma ben didon na a tra sé foe a liba Tigris, oostoesé nanga nordsé foe na Babylon kownoekondre ini den dé foe Nebudkadnezar nanga den kownoe di ben waka na en baka. Cyrus de Grote makandra nanga Darius, na kownoe foe den Medensma, ben hari go na nordsé go feti nanga na kondre foe den Chaldéasma nanga na mamafoto, Babylon, leki wan kon troe foe den profétitori. Den sma disi di ben pori sani èn foefoeroe sani foe Babylon ben gi jesi na a kari foe feti di Jehovah ben gi kaba sensi 614 bifo G.T.:
„Opo wan fraga ini na kondre. Bro wan toetoe na mindri den naatsi. Santa den naatsi gi en. Kari gi en den kownoekondre Ararat, Minni nanga Askenas (ini nordsé). Poti gi en wan oficiri foe teki sroedati na wroko. Meki den asi opo waka leki bosro sprenka. Santa den naatsi, den kownoe foe Medië, en granman, nanga ala en rigeriman èn na heri kondre foe ibri rigeri-makti gi en. Èn meki na grontapoe seki èn njan ebi sari, bikasi den prakseri foe Jehovah de kontra Babylon, foe meki na kondre foe Babylon de wan sani foe froewondroe, sondro sma di e libi na ini.” — Jer. 51:27-29.
8. Soema Jehovah e santa foe doe wroko tegen na Bigi Babylon, èn oten na pori foe en e kon? Baka na verloesoe foe soema?
8 Jehovah ben go abra foe „santa” na Persiasma Cyrus de Grote gi En sroedatiwroko tegen Babylon foe owroeten. Ini Jesaja 44:28 te nanga 45:7 Cyrus nen e kari èn Jehovah e kari en „mi herder” èn wan „salfoewan”. A ben de wan agersi fasi foe Jehovah Moro Bigi „Herder”, Jezus Kristus, di nanga en Jehovah e pori a sani di na Babylon foe owroeten e agersi, da foe taki na Bigi Babylon, na grontapoe kondre foe falsi religie. Jehovah ben fri sensi 1919 en pipel komoto foe katibo foe a grontapoe kondre na Bigi Babylon, nanga jepi foe a Moro Bigi Cyrus. Na pori foe na Bigi Babylon sa kon foe na srefi Moro Bigi Cyrus, èn dati sa de ini na „bigi benawtoe” di taki na fesi ini Openbaring 7:13, 14.
NA FADON FOE DEN „GADO” NANGA „OEMA-GADO”
9. Sortoe gado na Babylon foe owroeten ben abi èn na fasi fa den ben kaka foetoe gi na rampoe e agersi san gi na Bigi Babylon ini na „bigi benawtoe”?
9 Na Babylon foe owroeten ben abi boiti den obiaman-priester, sosrefi toe en gado, leki Bel, Merodach (Mardoek), Sukkoth, Benoth, Nebo, na oema-gado Isjtar (Astoreth) nanga tra gado (Jer. 50:2; 51:44; 2 Kon. 17:30; Jes. 46:1, 2). Foe sanede den gado disi no ben kan verloesoe na owroe Babylon? Na piki de, dati den afkodré-gado no ben de gado (1 Kor. 8:5, 6). Na fadon foe den de wan agersifasi foe na makti di ala gado foe na Bigi Babylon no abi foe verloesoe en foe na rampoe di sa miti en ini na „bigi benawtoe”. A no mankeri gado nanga oema-gado. Foe taki foe na hindoe-bribi leki fa den taki 330 miljoen gado de, nanga ini disi de sosrefi toe na dri-wan-gado Brahma, Visjnu nanga Shiva (The Americana, bladzijde 196, uitgave van 1929). Sosrefi toe joe abi gado foe Afrikan lo èn foe den vodouisten, den gado foe den boeddhisten èn foe den confucianisten, èn no foe frigiti na „dri-wan-gado” foe na kristenheid. Den no abi na makti foe tjari verloesoe kon.
10. Ini na stré di e kon, pe moe sori sòema abi den fasi foe de Gado, soema sa de na wan enkriwan di sa abi den fasi dati troetroe?
10 Ini na stré di e kon, pe a sa go foe sori troetroe soema abi den fasi foe de gado, a sa de wan afersi foe na Almakti Gado Jehovah kontra ala den gado nanga oema-gado dati foe na grontapoe kondre foe Babylonis falsi religie. Satan na Didibri, na gado foe na seti foe sani disi no sa kan foe bewijsi dati den foeroe Gado foe na Bigi Babylon de Gado di sma moe poti bribi ini den foe kisi verloesoe (Ef. 2:2; 2 Kor. 4:4). Soso Jehovah sa kon leki winiman na fesi ini na stré leki na wan libi nanga troe Gado, na Verloesoeman.
11. Sortoe wrokosani di wi kan si Jehovah e gebroiki ini na pori foe na Bigi Babylon, èn san Openbaring 17:11 e taki foe a wrokosani dati?
11 Ini na „stré foe gado” di e kon, Jehovah no sa gebroiki en Moro Bigi Cyrus, Jezus Kristus meki soema ai si, foe trowe na Bigi Babylon. A sa meki den rigeriman di e teki presi foe na di foe aiti Grontapoe-makti foe na bijbel historia go feti nanga na Bigi Babylon. Na Grontapoe-makti disi di wi kari leki laatste di de now a Verenigde Naties de na wrokosani di grontapoe naatsi ben prakseri ini 1919 èn di den gebroiki sensi a ten dati ini den moeiti foe den foe kibri grontapoe-vréde nanga sekerfasi. Na organisatie disi di libisma meki abi now now wan „konmakandra” foe 152 naatsi na en baka. Na wan spotoe fasi na bijbel e agersi en leki wan redi meti di abi 7 ede nanga 10 toetoe, aladi Openbaring 17:11 e taki foe na meti disi: „ensrefi de wan di foe aiti kownoe, ma a komoto foe den 7 (ede); èn a de waka go na pori.” Bifo na meti disi go ini pori ini „na feti foe na bigi dé foe Gado na Almakti Wan”, Jehovah e meki na di foe aiti Grontapoe-makti wini tapoe wan froewondroe fasi, ma no tapoe en. — Openb. 16:14, 16.
12. Soema e tiri na werder meti sensi a ben doe kon ini 1919, ma san a meti sa doe nanga na sma di e rij en leki fa Openbaring 17:15-17 e taki?
12 Sensi na agersi redi meti ben doe kon ini na jari baka na oorlog ini 1919, a ben meki na kerki hoeroe-oema, na Bigi Babylon ben rij na en baka foe tiri (Openb. 17:18). Ini na ten foe na „bigi benawtoe” èn te na joeroe foe Gado doro, dan en wortoe ini Openbaring 17:15-17 kan si leki wan marki foe bigin: „Den watra di joe (Johannes) ben si, pe na hoeroe-oema ben didon, wani taki volkoe, nanga ipi nanga naatsi nanga tongo. Èn den tin toetoe di joe ben si nanga na werder meti, sa abi ogri-ati gi na hoeroe-oema èn den sa meki a kon légi èn nanga sososkin, èn den sa njan den pisi foe en skin èn den sa bron en krinkrin nanga faja. Bikasi Gado ben gi den ini den ati foe doe na prakseri foe en, ja foe doe na wan prakseri foe den foe gi na kownoekondre foe den na a werder meti, te leki den wortoe foe Gado sa kon troe.”
13, 14. (a) San Jehovah, akroederi en prakseri, e meki den politiek elementi doe nanga na hoeroe-oema? (b) San den winiman foe en sa doe wantewante baka dati nanga Jehovah Kotoigi èn san sa de na bakapisi foe na doe foe den?
13 Soleki ben taki kaba na fesi, dan den naatsi di ben moksi densrefi nanga en ben gi fosi krakti na a Volkoebontoe èn moro fara na a organisatie foe Verenigde Naties foe wroko leki wan rem, sodati grontapoevréde nanga sekerfasi ben sa kan tan. Jehovah no ben tjari en so fara foe doe disi, ma foedi Jehovah kan si na fesi, a ben ferteri na fesi en prakseri ini en Wortoe. A ben taki moro fara na na fesi, dati den naatsi disi, di ben sa tjari densrefi „konmakandra”, ben sa weri foe na hebi foe na internationaal bemoeiman ini politiekafersi, a hoeroe-oema na Bigi Babylon. Te a iti trowe foe a baka foe na internationaal skin foe kibri vréde èn bron te foe kaba nanga faja, dan kristen kotoigi foe Jehovah no sa kon frede foe na rampoe di sa kon tapoe en. Nanga jepi foe na Wortoe foe Gado den sabi, dati den e teki presi dja na grontapoe gi na hemel „Masra foe den masra èn Kownoe foe den kownoe”, Jezus Kristus, èn dati disi de na réden foe sanede meki den winiman foe na Bigi Babylon ini na victori foe den sa drai kon feti nanga den leki na laatste ferferi sani gi den foe abi grontapoe-rigeri-makti. Ini na profétitori foe Openbaring 17:13, 14 den Kotoigi foe Jehovah e kisi foe jere disi tapoe a fasi disi:
14 „Den disi (den politiek elementi di de ini na Verenigde Naties) abi wan prakseri, èn foe dat’ede den e gi den krakti nanga makti na a werder meti. Den disi sa feti nanga na Lam, ma a Lam sa wini den, foedi en de Masra foe den masra èn Kownoe foe den kownoe. Den di kisi kari èn di den verkisi nanga den getrow-wan makandra nanga en sa doe disi sosrefi toe.”
15, 16. (a) San na toeka di sa kon te foe kaba tapoe na tori foe grontapoe-rigeri-makti sa wani taki troetroe? (b) San na apostel Johannes e meki wi si ini na ten di e kon foe na sani disi di sa psa èn fa a de waka?
15 Na toeka disi foe fetiman no de noti moro leki na „feti foe na bigi dé foe Gado na Almakti Wan” ini na grontapoe-sitoewasi di nen Har-mágedon (Openb. 16:13-16). Den kotoigi foe Jehovah, ondro na kibri foe Jehovah, sa si tapoe grontapoe na „feti” di skrifi ini Openbaring 19:11-21. Na kristen apostel Johannes e meki wi loekoe pikinso ini na ten di e kon èn e meki wi si fa na laatste toeka disi tapoe a tori foe den strépunt sa waka. A de skrifi fa na feti sa waka:
16 „Mi si na werder meti nanga den kownoe nanga den legre makandra foe feti nanga na sma di ben sidon tapoe na asi (Jehovah generaal, Jezus Kristus) nanga en legre (foe hemel èngel). Èn den ben graboe na werder meti èn makandra nanga en na falsi proféti (na Anglo-Amerkan Grontapoemakti) di ben doe na en fesi den wondroe, di a ben kori den sma di ben kisi na marki foe na werder meti èn den sma di e gi aanbegi na en prenki (na Verenigde Naties). Libi-libi den ben slenger ala toe ini na faja se, di e leti swarfoe. Ma den trawan ben dede nanga na langa owroe foe na sma di ben sidon tapoe na asi, wan owroe di e komoto foe en mofo. Èn ala fowroe (ini vers 17 nanga 18) ben njan den bere foeroe foe den skin foe den.”
17. Na rampoe disi e tjari wan kaba kon na san gi den atheïstis politiek elementi, èn san e psa baka dati nanga elementi di wi no kan si?
17 Na „bigi benawtoe” di Openbaring 7:14 e kari sa kon na wan kaba nanga na pori foe ala atheïstis elementi foe na seti foe sani di Didibri abi ondro en makti. Moro fara, dan na grontapoe tiriman di wi no kan si, Satan na Didibri, nanga ala en demoon-engel sa tai ini den doesoen jari di sa kon èn di den sa iti go ini na peti di no abi gron. — Openb. 20:1-3.
18. San Gado Wortoe e sori ofoe na moro bigi feti dati foe ala feti sa libi wi grontapoe krinkrin sondro libisma?
18 Na moro bigi feti foe ala leti sa libi wan grontapoe na baka di kon krin foe ala libisma libi? Di na owroe gronta-poe ini na ten foe Noach ben kon na wan kaba, dan disi no ben meki na grontapoe ben kon légi foe libisma, bikasi aiti sma ben komoto foe na grontapoe froedoe (2 Petr. 2:5). Na Gado foe Noach, Jehovah, ben meki na grontapoe foe „libi na tapoe” (Jes. 45:18). Nanga mofo foe en proféti Jesaja Jehovah ben taki na fesi na nen foe na Persia winiman, Cyrus de Grote, èn na verloesoeman disi foe den katibo djoe ben kon na libi foe agersi na Moro Bigi Verloesoeman, Jezus Kristus. Ini na „feti foe na bigi dé foe Gado na Almakti Wan” na Har-màgedon di e kon dan Jezus Kristus sa wini ala grontapoe feanti foe Jehovah nanga en pipel èn kiri den feanti dati foe Gado kownoekondre. Jezus Kristus no sa doe na kiriwroko disi nanga na lasi foe ala memre foe en salfoe foetoeboi, di kon gebore njoen nanga geest di de ete tapoe grontapoe, bikasi nanga dati joe no kan taki foe wan wini dorodoro foe na sé foe Gado kownoekondre. Ma fa a de nanga na „bigi ipi” getrouw kompe foe na salfoe fikapisi dati? Ini Openbaring 7:9-15 e kon na krin dati na „bigi ipi” disi sa pasa libi-libi na „bigi benawtoe” di e doro en hé marki ini Har-màgeddon.
NA „RAMPOE” DI E KON MOE MEKI BEKENTI
19, 20. (a) Bifo na rampoe disi broko kon, dan soema moe kisi foe jere en? (b) Fa Jehovah ben agersi na aankondiging disi ini a ten foe Jeremia?
19 Na grontapoe-rampoe dati de na mofodoro! Disi moe meki bekenti na a Bigi Babylon, di abi na heri grontapoe ondro en makti. Dati disi moe meki bekenti gi en ben agersi ini den dé foe Jeremia, ja, te ini 614 bifo G.T. A de ferteri wi foe disi:
20 „Na wortoe di na proféti Jeremia ben komanderi na Seraja, na manpikin foe Neria, na manpikin foe Machseja, di disi ben go nanga Zedekia, na kownoe foe Juda, na Babylon, ini na di foe 4 jari di a ben de kownoe; èn Seraja ben de kwartierméster. Èn Jeremia ben go abra foe skrifi ala den rampoe ini wan boekoe di ben sa kon tapoe Babylon, ja, ala den wortoe disi di ben skrifi kontra Babylon. Moro fara Jeremia taigi Seraja: ’So esi leki joe kon na babylon èn joe si en troetroe, dan joe moe lési ala den wortoe disi tranga. Èn joe moe taki: „O Jehovah, joesrefi ben taki kontra na presi disi, foe koti en poeroe, sodati no wan sma no sa de na ini, efoe a de libisma ofoe srefi osometi, ma dati foe tego a tron soso wan légi presi.” Èn a moe psa dati te joe kon klari foe lési na boekoe disi, joe sa moe tai wan ston na en, èn joe moe trowe en leti mindri na (liba) Eufraat. Èn joe moe taki: „A so Babylon sa songoe gwe èn no opo noiti moro foe na rampoe di mi e tjari kon tapoe en, èn den sa weri densrefi foe troe.”’” — Jer. 51:59-64.
21, 22. Fa na boekoe Openbaring e doe na srefi sani di Seraja ben doe na profétifasi, èn nanga sortoe wortoe?
21 Na sani di Seraja, na brada foe Baruch, ben moe doe foe agersi na trowe na gron foe na Babylon foe owroeten, wi e feni ete wan tron ini na boekoe Openbaring. Na skrifiman, na kristen apostel Johannes, e skrifi fosi foe na pori foe na internationaal hoeroe-oema, na Bigi Babylon, èn a de go moro fara foe taki:
22 „Èn wan tranga engel opo wan ston di ben de leki wan miriston èn a ben slenger en go ini na se, taki: ’A so Babylon, na bigi foto, sa slenger gwe esi, èn a no sa de foe feni noiti moro . . . No wan sten foe wan bruidegrom èn foe wan bruid sa de foe jere oiti ini en, foedi den koopman foe joe ben de den hé soema foe na grontapoe, bikasi nanga den obia-wroko foe joe joe ben kori ala naatsi ja, ini en a broedoe ben feni foe proféti nanga foe santawan èn foe ala sma di ben slagti tapoe grontapoe.’” — Openb. 18:21-24.
23. (a) Foe sanede na prisiri foe na atheïstis winiman foe na Bigi Babylon no sa de foe langa? (b) San den atheïsten dati sa proeberi dan foe doe foe dat’ede èn nanga sortoe bakapisi?
23 Na prisiri di den atheïstis „kownoe” ofoe politiek tiriman sa gi densrefi abra baka di den trowe na Bigi Babylon go ini na se foe pori, no sa de foe langa. Nanga den égi ai den sa si dati foeroe aanbegiman foe na libi Gado Jehovah sa de ete na libi, da foe taki, na fikapisi foe na Jeremiaklasse èn sosrefi toe den loyaal kompe foe den, na „bigi ipi” di na apostel Johannes ben si na fesi ini wan visioen. Ma den moe doe wan sani nanga den disi toe. Te den politiek tiriman sa proberi foe figi poeroe ala aanbegi foe na grontapoe te den o fasi na fikapisi nanga den mati foe den, dan a sa de leki den e fasi na hemel Masra foe den, Jezus Kristus, na Moro Bigi Cyrus. Disi sa wani taki feti nanga en ini Har-màgedon. Na feti dati sa pasa krinkrin na radiologis feti di den naatsi e proeberi foe no feti nanga makandra, bikasi komoto foe na kondre di wi no kan si, dan Jezus Kristus nanga en legre foe hemel èngel sa gi den hémemre man disi di kon feti nanga Jehovah Kotoigi wan slag di sa masi den krinkrin.
24. Soema sa abi na grani foe de ai-kotoigi foe na „feti dati foe na bigi dé”, èn fa den sa doe, winsi den no abi wan prati na ini?
24 Fa a sa de wan bigi grani foe de wan ai-kotoigi foe na „feti foe na bigi dé foe Gado Na Almakti wan” na Har-màgedon! Na fikapisi foe na Jeremiaklasse nanga den faja kompe foe den sa abi na grani dati dja tapoe grontapoe, na fetigron, ondro na kibri foe en èn sondro foe teki prati na a stré. Na so fasi sa kisi paiman, dati den ben meki bekenti „na dé foe na wraak foe na sé foe wi Gado”; na wroko foe den no sa de foe soso (Jes. 61:2). Soema sa man foe ferteri fa na prisiri sa de di den sa abi makandra nanga ala santa èngel foe na hemel ondro Kristus?
25. (a) Sortoe okasi na „bigi ipi” sma di sa tan na libi sa kisi baka na „feti”? (b) Na kon foe den toemsi bigi sani disi moe gi na pipel foe Jehovah sortoe dekati?
25 Nanga bigi prisiri den libi eksempre disi foe a makti foe Jehovah di kibri den, sa go ini en njoen seti foe sani tapoe wan krin grontapoe. Na okasi sa sori ensrefi foe bow njoen wan grontapoe paradijs, pe na getrouw „bigi ipi” sa prisiri foe tego na ini. Sortoe dekati na sani disi foe kisi ala den toemsi bigi sani moe gi ala sma di e klari densrefi now „mi pipel”, Jehovah pipel? Now doro kaba na dekati foe gi jesi na a tranga komando foe komoto libi na hémemre Bigi Babylon èn hori moro fara fasti na kristen neutraliteit na fesi foe ala en politiek fréri te sondro degedege wi hori Jehovah kownoekondre hé ini a anoe foe Kristus te na glori victoridé!
(Nanga disi wan kaba kon na den lo studi foe na profétitori foe Jeremia)