Na krutu fu Gado teyge „na sma fu kruktudu”
„Ibri bon di no e meki bun froktu, den e koti trowe èn e iti go na ini faya.” — MATEYUS 7:19.
1, 2. San na a sma fu kruktudu, èn fa a du gro kon?
DI NA apostru Paulus ondro na krakti fu Gado santa yeye ben taki na fesi fu na kon fu wan „sma fu kruktudu”, a ben taki taki a ben e bigin sori en fesi srefi na ini en dey. So leki na artikel a fesi ben tyari kon a krin, dan Paulus ben taki fu wan grupu fu sma di ben sa teki fesi ini na fadon komoto fu na tru krestendom. Fara na ini na fosi yarihondro, spesrutu baka na dede fu na lasti apostru, sma ben bigin dray baka gi na waarheid. Na kruktudu grupu ben tyari leri nanga gwenti kon di ben de kontrari na Wortu fu Gado. — 2 Tesalonika sma 2:3, 7; Tori fu den Apostru 20:29, 30; 2 Timoteyus 3:16, 17; 4:3, 4.
2 Te fu kba, na kruktudu grupu disi ben gro kon tron den kerkifesiman fu na krestenhèyt. Keysri Constantijn ben poti na makti fu na grupu dati steyfi na ini na di fu fo yarihondro di den kerki di ben fadon komoto na bribi ben tyari kon na ini wan trow-frubontu nanga na Lanti fu den heiden. Ala di na krestenhèyt ben tan prati ensrefi kon tron wan lo sekte, dan den kerkifesiman ben tan opo den srefi poti na tapu den sma di no sabi noti èn nofotron tu na tapu den grontapu tiriman. — 2 Tesalonika sma 2:4.
3. San sa de na strafu fu na sma fu kruktudu?
3 San ben sa de na strafu fu na sma fu kruktudu? Paulus ben taki na fesi: „Na kruktuduwan [sa] tyari kon a krin, di Masra Yeyses sa puru a pasi . . . èn sa tyari kon tron noti nanga na sori di [Yeyses] sa sori ensrefi taki a denoya” (2 Tesalonika sma 2:8). Disi wani taki taki na pori fu den kerkifesiman sa feni presi te Gado e tyari wan kba kon na a heri seti fu Satan. Gado e kobroyki en heymel Kownu, Krestes Yeyses, fu tyari den engel di de den legre di sa tyari na strafu kon (2 Tesalonika sma 1:6-9; Openbaring 19:11-21). Disi na san e wakti den kerkifesiman fu di den afrontu Gado nanga Krestes èn tyari milyunmilyun sma gwe fu na tru anbegi.
4. Akruderi sortu gronprakseri den sa krutu na sma fu kruktudu?
4 Yeyses ben gi na gronprakseri di sa dini fu krutu na sma fu kruktudu: „Luku bun nanga den falsi profeyti, di e kon na unu na ini skapu krosi, ma inisey den de krasi wolfu. Na den froktu fu den yu sa kon sabi den. Noyti sma e piki droyfi fu maka ofu figa fu brantimaka, a no so? Na so ibri bun bon e meki bun froktu, ma ibri pori bon e meki froktu di no warti noti; wan bun bon no kan meki froktu di no warti noti èn so srefi wan pori bon no kan meki bun froktu. Ibri bon di no e meki bun froktu, den e koti trowe èn e iti go na ini faya. . . . A no ala sma di e taygi mi taki: ’Masra, Masra’, sa kon na ini na kownukondre fu heymel, ma na sma di e du na wani fu mi Tta, di de na ini heymel.” — Mateyus 7:15-21; luku so srefi Titus 1:16; 1 Yohanes 2:17.
Bun kresten froktu
5. San na a fondamenti fu tumusi bun kresten froktu, èn san na wan fondamenti gebod?
5 Na fondamenti gi tumusi bun kresten froktu de na ini 1 Yohanes 5:3, pe tanapu: „Disi wani taki na lobi fu Gado, taki wi hori en komando.” Èn wan fondamenti komando de disi: „Yu musu lobi na sma na yu sey leki yu srefi” (Mateyus 22:39). Gado tru dienstknekti fu dati-ede musu abi lobi gi den sma na den sey, awinsi sortu ras ofu nationaliteit den de. — Mateyus 5:43-48; Rome sma 12:17-21.
6. Gi suma spesrutu kresten lobi musu sori gi?
6 Gado dienstknekti spesrutu musu abi lobi gi den sma di de den yeye brada fu den . „Efu wan sma e taki: ’Mi lobi Gado’ èn toku no wani si en brada na ay, a de wan leyman. Bika na sma di no lobi en brada, di a si, no kan lobi Gado, di a no si. Èn na komando disi wi kisi fu en, taki na sma di lobi Gado, musu lobi en brada tu” (1 Yohanes 4:20, 21). Na lobi dati, Yeyses ben taki, ben sa de wan marki fu kon sabi tru kresten: „Nanga disi ala sma sa sabi taki unu na mi disipri, efu unu abi lobi gi makandra.” — Yohanes 13:35; luku so srefi Rome sma 14:19; Galasiya sma 6:10; 1 Yohanes 3:10-12.
7. Fa tru kresten na a heri grontapu tyari kon makandra na ini wánfasi?
7 Brada lobi de na „lijm” di e tay Gado futuboy kon na wán: „Weri lobi gi yu srefi, bika a de na volmaakti banti fu wánfasi” (Kolose sma 3:14). Èn tru kresten musu de ini wánfasi nanga ala den brada fu den na a heri grontapu, bika Gado Wortu e komanderi: „Unu alamala musu taki ini akruderi nanga makandra. Pratifasi no musu de na mindri unu . . . De krosibey ini wánfasi na ini na srefi yeye èn na ini na srefi denki” (1 Korente sma 1:10). Fu kan hori na lobi nanga wánfasi disi na a heri grontapu, dan Gado futuboy musu de neutraal ini politik afersi fu na grontapu disi. Yeyses ben taki: „Den no de wan pisi fu grontapu, so leki mi no de wan pisi fu grontapu.” — Yohanes 17:16.
8. Fa Yeyses ben sori san kresten musu du?
8 Yeyses ben sori o fara san a ben abi na prakseri e go, di Petrus ben kobroyki wan feti-owru èn ben koti na yesi fu wan fu den man di ben kon fu kisi Yeyses. Yeyses ben gi tranga fu kobroyki so wan sortu fasi fu krakti, srefi fu kibri na Manpikin fu Gado gi gensman? Nôno, bika a ben taygi Petrus: „Sutu yu feti-owru go baka na en presi” (Mateyus 26:52). Tru kresten no e teki prati sobun na den feti fu den nâsi ofu na ini wan tra trowe fu brudu, srefi efu so wan weygri di den e weygri fu teki prati fu na neutraal posisi di den teki e abi leki bakapisi taki den e kiri den fu den bribi ede, so leki dati ben psa nanga furu fu den ini den yarihondro di psa èn srefi na ini wi ten. Den sabi taki soso Gado kownukondre na ondro Krestes sa puru feti nanga na trowe fu brudu fu têgo. — Psalm 46:9; Mateyus 6:9, 10; 2 Petrus 3:11-13.
9. (a) San na historiya e fruteri wi fu den fosi kresten? (b) Fa disi de tra fasi leki den relisi fu na krestenhèyt?
9 Na historiya e sori taki a de tru taki den fosi yarihondro kresten no ben trowe libisma brudu. Na fositen heyleriman ini theologie na ini Ingrisikondre, Peter de Rosa, e skrifi: „Na trowe fu brudu ben de wan seryusu sondu. Disi ben de wan reyde fu san-ede kresten sma ben de teyge streyfeti. . . . Ala di bigi feti nanga na kobroyki fu makti ben de fanowdu fu Rome ben kan tan, toku kresten ben feni taki den no ben kan teki prati na dati. . . . Kresten sma ben si den srefi, neleki Yeyses, leki boskopuman fu vrede; na no wan fasi den ben kan de wrokosani fu dede.” Na a tra sey a de so, taki den fasi fu anbegi fu na krestenhèyt di no de ini wánfasi nanga makandra, no hori na komando fu lobi èn trowe bun furu brudu. Den no de boskopuman fu vrede, ma furutron baka wrokosani fu dede.
Brudu payman fu Babilon na Bigiwan
10. San na Babilon na Bigiwan, èn fu san-ede den e kari en so?
10 Satan na a „tiriman fu na grontapu disi”, „na gado fu na seti fu sani disi” (Yohanes 12:31; 2 Korente sma 4:4). Wan pisi fu Satan grontapu na a seti fu falsi relisi di a bow kon bigi ini den hondrohondro yari, èn di panya na a heri grontapu. Na krestenhèyt tu nanga en kerkifesiman de wan pisi fu en. Na beybri e kari na seti disi fu falsi relisi di panya na a heri grontapu „Babilon na Bigiwan, na mma fu den [yeye] huru èn fu den tegu sani fu na grontapu” (Openbaring 17:5). Den rutu fu na disiten falsi fasi fu anbegi e go baka te na a owru foto Babilon, di ben sungu go na ini falsi relisi èn na ini leri nanga gwenti di ben afrontu Gado. Fu na reyde dati meki den e kari na kontrapisi fu na owru Babilon, Babilon na Bigiwan, na grontapu makti fu falsi relisi.
11. San na beybri e taki fu Babilon na Bigiwan, èn fu san-ede?
11 Fu na kerki Babilon Gado Wortu e taki: „Na ini en den feni na brudu fu profeyti èn fu santawan èn fu ala den sma di den srakti na grontapu” (Openbaring 18:24). Na sortu fasi den fasi fu anbegi fu na grontapu disi de frantiwortu fu na brudu fu ala sma di den ben srakti? Na a fasi disi, taki ala den relisi disi — den kerki fu na krestenhèyt èn den relisi di no de kresten — ben horibaka gi, ben luku psa ofu ben teki fesi srefi na ini den bigi feti fu den nâsi; so srefi den frufolgu èn kiri sma di e frede Gado èn di no e agri nanga den.
Wan bericht di e afrontu Gado
12. Fu san-ede den kerkifesiman fu na krestenhèyt abi moro fowtu leki tra kerkifesiman?
12 Den kerkifesiman fu na krestenhèyt abi moro furu fowtu ini na trowe fu brudu leki tra kerki tiriman. Fu san-ede? Fu di den no ben teki wwan na nen fu Gado na tapu den, ma so srefi tu di fu Krestes. Den ben fruplekti den srefi nanga dati fu waka baka den leri fu Yeyses (Yohanes 15:10-14). Ma den no ben waka na baka den leri dati èn ben poti bigi syen na tapu Gado nanga Krestes. Na frantiwortu fu na trowe fu brudu di de tapu den kerkifesiman de langalanga na ini den kruistocht, tra kerki feti, inquisitie nanga frufolgu, èn bakabaka na ini den luku psa di den e luku psa feti pe den memre fu den kerki ben kiri tra sma na ini tra kondre.
13. Gi sortu sani den kerkifesiman fu na di fu erfu te go miti na a di fu tinadri yarihondro ben de frantiwortu?
13 Na so fu eksenpre, den kerkifesiman fu na krestenhèyt ben tyari den kruistocht kon fu na di fu 11 te nanga na di fu 13 yarihondro. Den disi ben abi leki bakapisi wan bigi trowe fu brudu èn fufuru fu sani na ini na nen fu Gado nanga Krestes. Hondrodusundusun sma den ben kiri. Den kruistocht ben tyari so srefi fu noti ede na dede fu dusundusun pikin di ben kon so fara fu teki prati na a pikin-nengre kruistocht na ini na yari 1212.
14, 15. Sortu kommentaar wan katolik skrifiman e gi tapu san na Katolik Kerki ben tyari kon na ini na di fu tinadri yarihondro?
14 Na ini na di fu 13 yarihondro na Lomsu-Katolik kerki ben feni en bun, taki wan tra tegu sani di e afrontu Gado ben kon — na inquisitie. A ben bigin na ini Europa èn a ben panya go te na Mindri- nanga Zuid-Amerika, èn a ben hori moro leki siksi yarihondro langa. Na sani disi ben kon a libi èn na pawsuwroko ben horibaka gi en, a ben de wan ogri-ati muyti fu dwengi èn puru na pasi ala den sma di no ben kan agri nanga kerki. Ala di na kerki na fesi kba ben frufolgu sma di no ben de katolik, toku na inquisitie ben panya go na wan moro bigi kontren.
15 Peter de Rosa, di e kari en srefi wan „katolik di lobi en kondre”, e fruklari na ini en buku fu no so langa psa kba Vicars of Christ — The Dark Side of the Papacy: „Kerki ben de frantiwortu fu na frufolgu fu dyu, fu na inquisitie, fu na srakti fu dusundusun sma di no ben agri nanga kerki, fu na tyari kon agen na ini Europa na gi skin-ati na sma leki wan pisi fu na fasi fa krutubangi e wroko. . . . Pawsu ben poti srefi keysri na wroko èn ben puru den baka, ben aksi nanga tranga taki den ben musu tapu skreki gi den borgru fu den taki den o kisi skin-ati nanga dede efu den no teki na krestendom. . . . Na ogri di disi ben tyari kon gi na boskopu fu na evangelium, ben bigi srefisrefi.” Na wán enkri „ogri” fu son wan di den ben kiri, ben de, taki den ben abi wan beybri.
16, 17. Sortu sani e taki fu na inquisitie?
16 Fu pawsu Innocentius III (bigin fu na di fu tinadri yarihondro) de Rosa e taki: „Den ben teri luku taki na ini na lasti moro hebi pisi fu frufolgu ondro keysri Diocletianus [fu Rome ini na di fu dri yarihondro] na a heri grontapu so wan tu dusun kresten ben lasi libi. Na ini na fosi ogri sani di psa ini na kruistocht fu pawsu Innocentius [teyge „ketters” na ini Fransikondre] dan tin tron someni sma den ben srakti. . . . A ben de wan sani di seki sma fu si taki wan pawsu ben kiri ini wan slag moro furu kresten leki Diocletianus. . . . [Innocentius] no ben abi no wan problema fu kobroyki Krestes nen gi ala sani di Krestes ben kakafutu gi.”
17 De Rosa e taki taki „ini na nen fu na pawsu, [den inquisiteurs] ben de frantiwortu fu na moro ogri èn na moro langa ros tapu na libisma manirifasi ini na historiya fu na ras”. Fu na dominicaner inquisiteur Torquemada na ini Spanje a e taki: „Baka di na ini 1483 den ben poti en na wroko, a ben tiri tinafeyfi yari tapu wan ogri-atifasi. Na nomru fu sma di a kiri de moro leki 114.000, di 10.220 fu den a ben bron.”
18. Fa wan skrifiman e taki fu na inquisitie, èn fa a e fruklari taki a de moro leki siksi yarihondro?
18 Na skrifiman disi e kon na a bosroyti: „Na bericht fu na inquisitie ben sa de wan hati sani gi ibri organisâsi; gi na Katolik Kerki a pori den nen krinkrin. . . . San na historiya e sori de, taki moro leki siksi yarihondro baka makandra na pawsuwroko ben de na feyanti fu elementaire gerechtigheid. Fu aytitenti pawsu di ben kon baka makandra fu sensi na di fu tinadri yarihondro, dan no wan fu den ben sori taki a de teyge na theologie èn na wrokosani fu inquisitie. Na presi fu dati, na wan baka na trawan ben poti na ogri-ati spesrutu sani fu en fu wroko na ini na masyin disi di e tyari dede kon. Na kibritori de: fa pawsu ben kan go doro geslakti baka geslakti nanga na du disi fu ketterij? Fa den ben kan sori tapu ibri penti taki den no sabi na evangelium fu Yeyses?” A e piki: „Pawsu moro furu ben lobi fu taki kontrari na evangelium leki fu taki kontrari wan ’sma di no e meki fowtu’, bika dati ben sa meki na wroko fu na pawsu fadon.”
19. Sortu tra kruktudu aktiviteit moro furu fu den kerkifesiman e luku psa den?
19 So srefi na rol di den kerkifesiman ben prey ini na ogri seti fu katibo ben de wan kruktuduwan. Den nâsi fu na krestenhèyt ben kisi furu dusundusun Afrikan sma, tyari den gwe na farawe kondre, èn hondrohondro yari langa ben poti den leki srafu na ondro takru-ati du na skinfasi èn na yeyefasi. A ben de pikinso sma nomo fu na grupu fu den kerkifesiman di ben kakafutu fayafaya gi disi. Son wan fu den ben taki srefi taki a de na wani fu Gado. — Luku Mateyus 7:12
Brudupayman na ini na di fu twenti yarihondro
20. Fa na brudupayman fu na sma fu kruktudu doro na ini na yarihondro disi wan heymarki?
20 Na brudupayman fu na sma fu kruktudu ben doro wan heymarki na ini wi yarihondro. Den kerkifesiman horibaka gi feti di ben aksi tintinmilyun libi, den moro ogri feti fu ala ten. Den ben horibaka gi ala tu partèy na ini den tu grontapu feti, feti pe sma fu na srefi relisi, „brada”, ben kiri makandra. Na so fu eksenpre na ini na di fu Tu Grontapufeti Fransi nanga Amerkan katolik ben kiri Doysri nanga Italiyan katolik; Ingrisi nanga Amerkan anitri kiri Doysri anitri. Son tron den ben kiri trawan di no wwan ben abi na srefi relisi ma so srefi ben abi na srefi nationaal background. Den tu grontapufeti ben bigin na a mindri fu na krestenhèyt èn no ben a fu de so efu den kerkifesiman ben gi yesi na a komando fu lobi èn ben leri den bakaman fu den fu du na srefi.
21. San grontapu buku e taki fu na bemuy di kerkifesiman ben bemuy nanga bigi feti?
21 The New York Times ben piki taki: „Na ini na ten di psa dan katolik kerkifesiman fu presi pikinmoro ala ten horibaka gi den bigi feti fu den nâsi, blesi den legre èn seni begi fu wini go na Gado, ala di wan tra grupu biskopu na a tra sey na ini publiki ben begi fu kisi na wini. . . . Na kontrataki a mindri na kresten yeyefasi èn na hori fu feti . . . ben kon de moro nanga moro krin gi furu sma omoro den fetisani ben e kon ogri.” Èn U.S.News & World Report ben taki: „Na bun nen fu na krestendom na ini grontapu ben kisi seryusu problema nanga den furu tron, di den so kari kresten nâsi ben kobroyki tranga.”
22. Fu sortu sani moro den kerkifesiman de frantiwortu na ini wi ten?
22 Boyti fu dati, ala di den kerkifesiman no abi now wan officieel inquisitie, toku den kobroyki na anu fu Lanti fu frufolgu „profeyti” nanga „santawan” di no ben abi na srefi denki leki den. Den ben poti politik tiriman na ondro druk fu ’go denki ogri ini na dyakti fu na wèti’. Na a fasi disi den ben poti faya ofu ben feni bun taki sma di e frede Gado na ini wi yarihondro puru komoto fu den kondre fu no mag dray kon moro, poti go na ini stafu-oso, kisi fonfon ofu skin-ati ofu srefi dede. — Openbaring 17:6; Psalm 94:20, The New English Bible.
Kari den fu gi frantiwortu
23. Fu san-ede Gado sa kari na sma fu kruktudu fu gi frantiwortu?
23 Fu tru, na brudu fu profeyti nanga santawan èn fu ala den sma di srakti dya na grontapu de fu feni na ini falsi relisi (Openbaring 18:24). Fu di na trowe fu brudu na ini na krestenhèyt feni presi na wan moro ogri fasi, meki na fowtu fu den kerkifesiman de na moro bigiwan. Fa a de wan sani di fiti taki na beybri e kari den wan „sma fu kruktudu”! Ma Gado Wortu e fruklari tu: „No kori unu srefi: Gado no e meki sma spotu nanga en. Bika san wan sma e sai, na dati a sa koti tu” (Galasiya sma 6:7). Gado sa kari den kerkifesiman fu kruktudu fu gi frantiwortu.
24. Sortu sani di o psa èn di o seki na grontapu sa feni presi dyonsrode?
24 Yeyses ben taki: „Komoto na mi fesi, unu wrokoman fu kruktudu” (Mateyus 7:23). Èn a ben fruklari: „Ibri bon di no e meki bun froktu, den e koti trowe èn iti go na ini faya” (Mateyus 7:19). Heri esi na ten e doro now fu na faya kba fu na sma fu kruktudu kon, makandra nanga ala falsi relisi, te den politik elementi di a e prey leki huru gi, sa dray den srefi teyge en èn ’den no sa wani si na huru na ay èn sa meki a kon leygi èn nanga sososkin èn sa nyan den pisi fu en skin èn sa bron en krinkrin nanga faya’ (Openbaring 17:16). Fu di den sortu sani disi di sa psa na grontapu èn di e seki yu sa feni presi heri-esi, meki Gado dinari musu meki den bekenti na tra sma. Na tra artikel sa ondrosuku fa den e du disi.
Aksi fu luku san wi ben leri
◻ San na a sma fu kruktudu, èn fa a ben du gro kon?
◻ Sortu bun froktu tru kresten musu meki?
◻ San na Babilon na Bigiwan, èn omeni brudu payman a abi?
◻ Sortu bericht di e afrontu Gado na sma fu kruktudu ben bow?
◻ Fa Gado sa kari na sma fu kruktudu fu gi frantiwortu?
[Prenki na tapoe bladzijde 18]
Den kruistocht ben tyari kofarlek furu trowe fu brudu na ini na nen fu Gado nanga Krestes kon
[Sma di abi a reti foe a prenki]
Nanga switi primisi fu The British Library
[Prenki na tapoe bladzijde 19]
’Den katolik kerkifesiman fu presi pikinmoro ala ten ben horibaka gi bigi feti fu den nâsi fu den’
[Sma di abi a reti foe a prenki]
Legre fu Amerkankondre