Puru na bere kon a doro fu „na sma fu kruktudu”
„Komoto fu en, mi pipri, efu unu no wani teki prati na ini en sondu, èn . . . no wani kisi wan pisi fu den plaag fu en.” — OPENBARING 18:4.
1, 2. (a) Fa wi kan kon sabi na sma fu kruktudu? (b) Fa Gado e si den sma di e taki taki den e dini en ma di abi brudupayman na den tapu? (Mateyus 7:21-23)
GADO Wortu ben taki na fesi fu na kon fu wan „sma fu kruktudu”. A ben taki so srefi na fesi taki na kruktudu elementi disi ’ben sa puru na pasi èn tyari kon tron noti’ nanga anu fu Gado heymel Krutuman, Krestes Yeyses, di e tyari na dede strafu kon (2 Tesalonika sma 2:3-8). So leki den artikel na fesi sori, dan na sma disi fu kruktudu na den kerkifesiman fu na krestenhèyt. Langa ten psa kba den ben poti den waarheid fu na Wortu fu Gado na wan sey èn teki hèyden leri abra, so leki na Driwanfasi, helfaya nanga na sili di no e dede. Boyti fu dati, den kriya wroko di de kontrari den wèti fu Gado. Neleki den sma di Paulus ben warskow Titus gi, ’den e fruteri na publiki taki den sabi Gado, ma nanga den wroko fu den den e sori taki den no e erken en, bika den de wan tegu sani, no e gi yesi èn no bun gi no wan enkri bun wroko’. — Titus 1:16.
2 Yeyses ben taki: „Luku bun nanga den falsi profeyti, di e kon na unu na ini skapu krosi, ma inisey den de krasi wolfu. Na den froktu fu den yu sa kon sabi den.” Falsi profeyti ben sa meki „froktu di no warti noti” (Mateyus 7:15-17). Wan buweysi fu na takru kwaliteit fu na froktu fu den kerkifesiman de na kofarlek bigi brudupayman fu den. Furu yarihondro langa den ben horibaka gi den kruistocht, inquisitie nanga feti pe den trowe na brudu fu milyunmilyun sma. Na ini bigi feti pe memre fu den eygi relisi ben kiri makandra, den ben seni begi go na Gado èn blesi ala tu sey ini na feti. Kontrari fu dati, dan na apostru Paulus ben man fu taki: ’Mi de krin fu na brudu fu ala sma’ (Tori fu den Apostru 20:26). Den kerkifesiman no de dati. Gi den sortu sma dati Gado e taki: „Awinsi unu e seni furu begi kon, mi no e arki; nanga na trowe fu brudu unu ben furu unu eygi anu.” — Yesaya 1:15.
3. Sortu sani di o psa èn di de prenspari gi na heri grontapu e kon esi-esi?
3 Na ten di Gado sa tyari en dede strafu kon na tapu na sma fu kruktudu, e kon esi-esi. Dyonsro, so leki Yeyses ben taki na fesi, „wan bigi banawtu sa de so leki fu sensi na bigin fu grontapu te leki now no ben kon, nôno, èn so srefi no sa kon moro tu” (Mateyus 24:21). Na ten dati fu problema sa bigin nanga na kiri fu Babilon na Bigiwan, na grontapumakti fu falsi relisi, pe den relisi fu na krestenhèyt de na ini tu. Den politik elementi „sa meki a kon leygi èn nanga sososkin, èn den sa nyan den pisi fu en skin èn sa bron en krinkrin nanga faya” (Openbaring 17:16). Na bigi banawtu sa kon na wan kba nanga na pori fu na pisi di tan abra fu Satan grontapu na ini Armagedon, „na feti fu na bigi dey fu Gado na Almaktiwan”. — Openbaring 16:14, 16; 19:11-21.
Na plekti fu lobi trawan
4. San den sma di e anbegi Gado „ini yeye nanga waarheid” musu hori na ini prakseri?
4 Fu di den sani disi di o psa èn di o seki na grontapu o kon heri esi na tapu na grontapu pe libisma e libi, dan wan sma kan aksi en srefi sortu fruplekti de na tapu den sma di „e anbegi na Tta ini yeye nanga waarheid” (Yohanes 4:23). Fu kari wan, den musu hori na ini prakseri san Yeyses ben taki: „Efu unu e hori mi gebod, dan unu sa tan na ini mi lobi, neleki mi hori den gebod fu mi Tta èn e tan na ini en lobi. . . . Disi na mi gebod, taki unu lobi makandra so leki mi lobi unu. No wan sma abi moro bigi lobi leki disi, taki wan sma e gi en sili abra fu na bun fu en mati. Unu na mi mati efu unu e du san mi e komanderi.” — Yohanes 15:10-14; 1 Yohanes 5:3.
5, 6. (a) San Yeyses ben taygi en disipri fu du, di ben sa meki sma kon sabi den? (b) Na sortu fasi disi ben de wan nyun gebod?
5 Tru kresten sobun de fruplekti fu lobi trawan, spesrutu den kresten brada nanga sisa fu den na ini ala kondre (Tori fu den Apostru 10:34; Galasiya sma 6:10; 1 Yohanes 4:20, 21). Iya, kresten musu abi „tranga lobi gi makandra” (1 Petrus 4:8). Na sortu fu lobi dati di de na a heri grontapu e meki sma kon sabi den leki tru anbegiman, bika Yeyses ben taki: „Mi e gi unu wan nyun gebod, taki unu lobi makandra; so leki mi lobi unu, taki so tu unu lobi makandra. Nanga disi ala sma sa sabi taki unu na mi disipri, efu unu abi lobi gi makandra.” — Yohanes 13:34, 35.
6 San ben de nyun na a gebod dati? Den dyu na ondro na wèti fu Moses no ben kisi na komando, „lobi sma na yu sey leki yu srefi”? (Leviticus 19:18) Iya, ma Yeyses ben sori tapu wan ekstra sani di a ben taki: „So leki mi lobi unu.” Na lobi fu en ben wani taki tu taki a ben gi en libi abra fu na bun fu tra sma, èn en disipri musu de klari fu du na srefi (Yohanes 15:13). Dati ben de wan moro hey sortu fu lobi, bika so wan ofrandi na wèti fu Moses no ben aksi.
7. Sortu relisi ben gi yesi na ini na yarihondro disi na a wèti fu lobi?
7 Sortu relisi na ini wi yarihondro ben gi yesi na a wèti dati fu lobi? Seyker no den relisi fu na krestenhèyt, bika den ben srakti makandra na tintinmilyun na ini tu grontapufeti èn na tra feti. A de Yehovah Kotoygi di na a heri grontapu gi yesi na a wèti fu lobi. Den hori den srefi soyfri neutraal na ini den feti fu den nâsi, bika Yeyses ben taki taki en bakaman „no [musu] de wan pisi fu na grontapu” (Yohanes 17:16). Na so den kan taki neleki Paulus, taki den ’de krin fu na brudu fu ala sma’. Teki leki eksenpre fu disi fa na resolutie e bigin di Yehovah Kotoygi ben teki na tapu 27 november 1921 na a kongres na ini Washington D.C.:
„Leki kresten di e feti seryusu fu waka na baka den leri fu Krestes Yeyses wi Masra nanga en apostru, wi e bribi: taki feti na wan pisi di tan abra fu ogri-atifasi, leki wan sani fu pori den bun gwenti èn wan syen gi kresten pipri; taki den gronprakseri di Masra Yeyses Krestes leri sma, e meki taki a no kan taki kresten di gi den srefi abra teki prati na feti, na trowe fu brudu ofu iniwan tra sortu fu ogridu.”
8. San na historiya bericht e taki fu Yehovah Kotoygi ini na ten fu na di fu Tu Grontapufeti?
8 Fa den ben sori na fasi disi fu luku sani na ini na di fu Tu Grontapufeti? Na ini na moro ogri feti dati fu na heri libisma historiya wan sani fu feyfitenti milyun sma ben dede. Ma no wan kotoygi fu Yehovah ben kiri wan fu den! Na so fu eksenpre pikinmoro ala Doysri kerkifesiman ben horibaka fayafaya ofu nanga pasensi gi na nazisme. Kontrari fu dati, Yehovah Kotoygi ondro na tiri fu na nazisme hori densrefi soyfri neutraal èn weygri fu taki na Hitler-odi — dati wani taki fu taki taki frulusu e kon fu en — ofu fu de wan pisi fu en srudati apparaat. Fu dati-ede meki den no kiri no wan fu den yeye brada fu den fu tra kondre, noso wan tra sma na wan tra presi. Yehovah Kotoygi na ini ala tra kondre tan so srefi neutraal.
9. San psa nanga Yehovah Kotoygi na ini Doysrikondre nanga Oostenrijk ondro na tiri fu den Nazi?
9 Furu Kotoygi fu Yehovah, fu di den gi yesi na a wèti fu lobi, ben gi den sili abra fu na bun fu den mati. Wan takimakandra fu na buku Kirchenkampf in Deutschland, fu Friedrich Zipfel, e taki fu den Kotoygi: „Neygitenti na seybi procent fu den memre fu na pikin kerkigrupu disi ben de den sma di na nationaal-socialistis [nazi] ben frufolgu. Wan di fu dri pisi fu den dede, efu a ben de now fu di den sutu den kiri, ofu nanga tra ogridu, angri, siki ofu srafuwroko. Na hebi fu na kwinsi disi no ben abi en speri èn a ben de na bakapisi fu wan bribi di no ben seki èn di no ben de ini akruderi nanga na nationaal-socialistis ideologie.” Na ini Oostenrijk 25 procent fu Yehovah Kotoygi den ben sutu trowe ofu fon den kiri, ofu dede leki wan bakapisi fu siki ofu weriskin na ini nazi-kanpu.
10. Sortu frutrow den sma ben abi di ben dede fu di den ben gi yesi na a wèti fu lobi?
10 Den sma di fu den bribi ede ben dede, fu di den ben gi yesi na a wèti fu lobi, ben abi na frutrow taki ’Gado no de onregtfardiki, so taki a ben sa frigiti na wroko fu den èn na lobi di den sori gi en nen’ (Hebrew sma 6:10). Den ben sabi taki ’grontapu e psa gwe èn so tu na lostu fu en, ma taki na sma di e du na wani fu Gado, e tan fu têgo’ (1 Yohanes 2:17). Den ben abi na seyker howpu tapu wan opo-baka nanga têgo libi na den fesi. — Yohanes 5:28, 29; Tori fu den Apostru 24:15.
11. Na sortu fasi Yehovah futuboy de aparti, èn sortu profeytitori e kon tru na ini den?
11 Yehovah futuboy de aparti na ini na gi di den gi yesi na a gronprakseri di Petrus nanga tra apostru ben taki na fesi fu wan hey krutubangi: „Wi musu gi yesi na Gado leki tiriman moro leki libisma” (Tori fu den Apostru 5:29). Fu di Yehovah Kotoygi e du disi, meki den abi na yepi fu „na santa yeye, di Gado gi na den di e gi yesi na en leki tiriman” (Tori fu den Apostru 5:32). Dati na a krakti di e yepi den fu meki na profeytitori na ini Yesaya 2:2-4 kon tru. Drape ben taki na fesi taki na ini wi ten na tru anbegi ben sa kon bun baka èn taki sma fu ala nâsi nanga relisi ben sa hari kon. Wán bakapisi ben sa de: „Den sa naki den feti-owru tron plugu èn den lansri kon tron kron-nefi. Nâsi no sa opo feti-owru teyge nâsi, so srefi den no sa leri feti moro.” Fu di Yehovah futuboy e sreka den srefi tapu libi na ini wan nyun grontapu fu vrede, meki den no e leri feti moro. Den e leri na wèti fu lobi. — Yohanes 13:34, 35.
12. San den sma di e gi yesi na a wèti fu lobi musu du gi trawan?
12 Fu di kresten lobi wani taki so srefi ’fu lobi sma na yu sey leki yu srefi’, meki Gado futuboy no kan prakseri den srefi nomo nanga san den sabi (Mateyus 22:39). Furu moro sma de ete di ben sa wani dini Gado èn wani libi na ini en nyun grontapu. Ala di ten de fu dati ete, dan den disi tu musu kon sabi na wèti fu lobi èn den furu tra waarheid di abi fu du nanga na Universele Soeverein, Yehovah Gado. Den musu kisi leri taki soso Yehovah warti ini anbegi èn fa wan sma musu anbegi (Mateyus 4:10; Openbaring 4:11). Den sma di leri den sani disi kba, de fruplekti fu fruteri trawan fu den so taki den tu kan kon na ini na bun-ati fu Yehovah. — Eseykièl 33:7-9, 14-16.
Puru na bere fu na sma fu kruktudu kon a doro
13. San wi musu meki bekenti leki wan pisi fu wi kotoygi wroko na a heri grontapu, èn fu san-ede?
13 Yeyses ben taki taki na ’bun nyunsu fu na kownukondre sa preyki na a heri grontapu pe sma e libi leki wan kotoygi gi ala nâsi èn dan na kba sa kon’ (Mateyus 24:14). Leki wan pisi fu na gi kotoygiwroko disi na a heri grontapu dan Gado futuboy ben meki den krutu teyge na falsi relisi bekenti, spesrutu ini na tori fu den kerkifesiman fu na krestenhèyt. Den disi abi moro fowtu na ini na ay fu Gado, fu di den e taki taki den de kresten. Den bere musu puru kon a doro so taki den sma di wani dini Gado, kan kon fri fu na makti fu den èn kan teki den yoysti stap di sa meki den psa libilibi. Yeyses ben taki: „Na waarheid sa meki yu kon fri.” — Yohanes 8:32.
14. Sortu boskopu di de krin fu frustan musu meki bekenti ini na tori fu falsi relisi?
14 Sobun, Yehovah Kotoygi musu meki na boskopu disi di skrifi na ondro krakti fu Gado santa yeye èn di abi fu du nanga falsi relisi, bekenti: „Komoto fu en, mi pipri, efu unu no wani abi prati na ini en sondu, èn efu unu no wani kisi wan pisi fu en plaag. Bika den sondu fu en hey den srefi go te na heymel, èn Gado tyari na ongeregtighèyt fu en kon ini prakseri. . . . Ini wán dey den plaag fu en sa kon, dede nanga sari èn angriten, èn den sa bron en krinkrin nanga faya bika Yehovah Gado di e krutu en, de tranga.” — Openbaring 18:4-8.
15. Fa na yari 1914 prey wan rol ini Yehovah ten-schema, èn sortu bun bakapisi ben kon baka na Fosi Grontapufeti?
15 Beybri profeytitori e meki wi si taki „den lasti dey” fu na seti disi fu sani bigin na ini na yari 1914 pe bosroyti ben teki (2 Timoteyus 3:1-5, 13; Mateyus 24:3-13). Fu sensi na yari dati wi de na ini „na ten fu na kba” (Danièl 12:4). Leti baka na Fosi Grontapufeti èn ini akruderi nanga Yehovah ten-schema, dan en futuboy ben bigin bradi nanga krakti na meki bekenti fu Gado kownukondre so leki taki na fesi na ini Mateyus 24:14. Den ben bigin so srefi fu puru na wan krakti fasi na bere fu falsi relisi kon a doro, spesrutu na kruktudu grupu fu kerkifesiman fu na krestenhèyt di fadon komoto na bribi.
16. Fa na puru kon na doro fu na bere fu na sma fu kruktudu moro leki seybitenti yari kba ben kon moro krakti?
16 Now fu moro leki seybitenti yari èn nanga moro bigi krakti den futuboy fu Gado warskow sma gi den bidrigi aktiviteit fu na sma fu kruktudu. Baka na Fosi Grontapufeti soso wantu dusundusun Kotoygi ben de di e du disi. Ma now den gro kon tron „wan makti nâsi” fu moro leki dri nanga afu milyun faya bedinari, di orga na ini moro leki siksitenti dusun gemeente na a heri grontapu (Yesaya 60:22). Gado futuboy de fayafaya bezig fu meki na kownukondre fu Gado bekenti leki na wan enkri howpu gi na libismafamiri na wan fasi di e bradi ensrefi go moro nanga moro, èn na a srefi ten e puru den kerkifesiman bere kon a doro èn sori sma suma den de trutru — wan bidrigi sma fu kruktudu.
Fu san-ede nanga someni krakti?
17. Fu san-ede Yehovah futuboy nanga krakti ben puru na bere fu na sma fu kruktudu kon a doro?
17 Fu san-ede Yehovah futuboy ben puru na wan kraktifasi na bere fu na sma fu kruktudu kon a doro ini ala den yari disi? Fu di den milyunmilyun sma fu na bigi ipi fu Yehovah skapu di de kba na a pasi fu kisi frulusu, musu kisi kibri teyge Satan grontapu nanga en falsi relisi (Yohanes 10:16; Openbaring 7:9-14). Efu na bere fu den kerkifesiman no ben sa puru kon a doro, dan opregti sma di no de ete wan pisi fu na ipi fu Gado, no ben sa sabi fa fu tan farawe fu wan fowtu libifasi. Sobun, den musu kon sabi disi, so leki Yeyses ben sori sma disi di a ben taki fu den hoygri kerkitiriman fu en ten: „Den de breni tyariman. Efu now wan breniman e tyari wan breniman, dan ala tu sa fadon na ini wan olo.” — Mateyus 15:14; luku tu 2 Korente sma 4:4; 11:13-15.
18. San sma di e suku waarheid musu sabi?
18 Den kerkifesiman de wan pisi fu Satan grontapu (Yohanes 8:44). Ma a de wan grontapu di dyonsro Gado sa maskaderi fu têgo (2 Petrus 3:11-13; 1 Yohanes 2:15-17). Gado Wortu e warskow fu dati-ede: „Na sma di wani de fu dati-ede wan mati fu grontapu, e meki en srefi tron wan feyanti fu Gado” (Yakobus 4:4). Den kerkifesiman e poti na warskow dati na wan sey èn e tan moksi den srefi na ini politik afersi. Den e fruteri den bakaman fu den taki wan moro betre grontapu sa kon nanga yepi fu den muyti fu politikman. Ma dati na wan falsi howpu, fu di na grontapu disi na ondro Satan de na pasi fu kon na wan kba. Sma di e luku go na a grontapu disi fu howpu, den e bidrigi den. Den musu kisi fu yere na waarheid fu san o psa nanga a grontapu disi èn san o kon na ini na presi fu en. — Odo 14:12; 19:21; Mateyus 6:9, 10; Openbaring 21:4, 5.
19. Fa na grontapufasi fu son kerkifesiman no so langa kba ben tyari kon a doro na ini koranti?
19 Na grontapufasi fu son kerkifesiman ben puru kon a doro no so langa psa kba srefi na ini koranti, so leki fu eksenpre na yayofasi nanga gudu libi fu son telefisi domri. Wan nyunten skrifiman fu singi ben meki wan singi nanga na nen „Yeyses ben sa weri na ini en telefisi show wan Rolex [oloysi fu $ 10.000]?” Na tekst e go morofara nanga: „Yeyses ben sa teki prati na politik efu A ben dray kon baka na grontapu, A ben sa abi wan di fu tu oso ini [na moy] Palm Springs èn A ben sa pruberi fu kibri omeni gudu a abi?” Boyti fu dati, moro nanga moro kerkifesiman e taki bun fu homoseksueel libi ofu libi na libi dati. Na ini Amerkankondre na Katolik Kerki na a momenti disi e pay milyunmilyun dala schadeloosstelling fu di pristri ben meki na fowtu fu kobroyki pikin-nengre fu du seks nanga den. — Rome sma 1:24-27; 1 Korente sma 6:9, 10.
20. Fu san-ede Gado futuboy musu go doro fu puru na bere fu na sma fu kruktudu kon a doro?
20 So wan sortu ogri Gado futuboy no kan poti na wan sey ma fu na bun fu tra sma musu tyari en kon na doro. Na bigi ipi fu tra skapu musu kisi kibri teyge den di ben sa pruberi fu tyari den go so fara fu psa den wèti fu Gado. Èn wi musu suku den sma di „e soktu èn e geme fu ala den tegu sani di . . . e du”, èn den musu tyari konmakandra na ondro na tiri fu na Bigi Herder, Yehovah Gado èn „na tumusi bun Herder”, Krestes Yeyses di e kibri den. — Eseykièl 9:4; Yohanes 10:11; Odo 18:10.
21. San Yehovah Kotoygi sa tan meki bekenti?
21 Fu dati-ede Gado pipri no sa draydray fu meki en ati-bron bekenti na heri na grontapu fu Satan, so srefi na en sma fu kruktudu, den kerkifesiman fu na krestenhèyt. Nanga krakti den sa meki na boskopu fu na engel na ini Openbaring 14:7 bekenti: „Frede Gado èn gi en glori, bika na yuru fu na krutu fu na sey fu en kon.” Èn leki wan pisi fu na meki bekenti disi den sa meki so srefi na tranga warskow bekenti fu Openbaring 18:4 ini na tori fu falsi relisi: „Komoto fu en, mi pipri, efu unu no wani abi prati na ini en sondu, èn efu unu no wani kisi wan pisi fu en plaag.”
Aksi fu luku san wi leri
◻ San sa de na strafu fu na sma fu kruktudu èn fu san-ede?
◻ Sortu fruplekti Yehovah futuboy abi na fesi tra sma?
◻ Fa Yehovah pipri ben hori den srefi fri fu na brudu fu ala sma?
◻ San wi musu du ini na tori fu Babilon na Bigiwan?
◻ Fu san-ede wi musu go doro nanga wi krakti boskopu fu na sma fu kruktudu?
[Prenki na tapoe bladzijde 22]
Den apostru ben taygi wan hey krutubangi: „Wi musu gi yesi na Gado leki tiriman moro leki libisma”
[Prenki na tapoe bladzijde 23]
Opregti sma musu sabi san o psa nanga na grontapu disi nanga en relisi