Fa joe kan meki den begi foe joe kon moro boen?
BEGI na wan foe den sani di no abi en speri na mindri den sani di Jehovah Gado gi wi na wan lobifasi. Gensman kan teki joe bijbel poeroe, noso den kan tapoe joe foe kon makandra nanga kompe anbegiman. Ma no wan sma kan teki a begi poeroe foe joe. A begi di wan sma e begi, na wan toemoesi warti sani. So boen, o prenspari a de gi ibriwan foe wi foe hori a grani disi hei èn foe gebroiki en boen èn dorodoro. San kan jepi joe foe meki den begi foe joe kon moro boen?
Bijbel a no wan boekoe di abi soso begi na ini. Tokoe, sma ben sa kan taki foe bijbel dati a de a moro boen leriboekoe tapoe a kontren foe begi gi a libisma famiri. Soso den Hebrew Boekoe foe bijbel wawan, abi moro leki 150 begi. Son wan foe den na sjatoe begi; trawan na langa begi. Sma ben begi den begi disi na poebliki noso na presi pe no wan tra sma ben kan si den. Kownoe noso sma ini katibo ben begi den begi disi. Sma ben begi den begi disi te den ben wini, noso te den ben de na ini banawtoe. Soleki fa David ben singi na Psalm 65:2, dan „ala sortoe foe sma” e go na Jehovah, a „Sma di e arki begi”. Foe san ede Gado ben jepi den skrifiman foe bijbel foe skrifi so foeroe sortoe foe begi?
Foe piki na aksi dati, poti prakseri tapoe 2 Timoteus 3:16. A e taki drape: „Ala den Boekoe foe bijbel Gado ben meki den skrifi nanga jepi foe en santa jeje èn den boen foe gi leri.” So boen, begi di skrifi na ini bijbel de foe tiri wi, neleki fa profeititori, gronprakseri, nanga historia foe bijbel de foe tiri wi. Fa wi kan feni boen foe den begi disi?
Foe di wi e ondrosoekoe finifini den begi di de na ini bijbel, meki wi kan si den begi di ben begi ini omstandigheid di gersi a srefi omstandigheid foe wi. Wi kan leri fa den begi e difrenti ini a marki foe san ede sma ben begi so èn a situwâsi a sma ben de na ini di a ben begi. Boiti dati, wi sa feni njoen fasi foe gi prèise èn foe gi tangi, èn wi sa feni krin wortoe gi den faja begi foe wi èn gi den tranga begi foe wi. Foe taki en sjatoe: Den begi foe bijbel kan jepi wi foe meki wi eigi begi kon moro boen.
Soleki fa a sori, dan Maria, di ben tron a mama foe Jesus, ben de wan sma di ben feni boen foe den wortoe di ben gebroiki ini wan begi di skrifi na ini bijbel. Baka di Maria nanga en famiriman Elisabet ben kisi bere foe wan manpikin nanga jepi foe Gado, Maria ben go loekoe Elisabet. Maria ben prèise Gado èn a ben gi Gado tangi, èn wan toe foe den wortoe di a ben gebroiki, troetroe gersi den srefi wortoe foe wan begi di skrifi na ini den Hebrew Boekoe foe bijbel. Soleki fa a sori, dan Maria ben sabi a begi di Hana ben taki. Hana ben de a mama foe a profeiti Samuèl. Moro leki 1000 jari bifo Maria ben kisi bere, Hana toe ben kisi wan manpikin nanga jepi foe Gado. A ben sa kan, taki Maria ben prakseri dipi foe a begi disi, bikasi a begi disi ben sori a fasi fa ensrefi ben firi? — 1 Samuèl 2:1-10; Lukas 1:46-55.
Fa a de nanga joe? Joe kan memre wan begi na ini bijbel, wan begi di ben begi ondro omstandigheid di gersi den srefi omstandigheid foe joe? Te joe e feni den sortoe begi disi, e leisi den, èn e prakseri dipi foe den, dan dati sa jepi joe foe meki joe eigi komunikâsi nanga Gado kon moro boen. Ini a tra artikel, wi e gi joe wan kari foe ondrosoekoe dri sortoe begi di de na ini den Santa Boekoe foe bijbel. Den begi disi, ben taki ondro difrenti omstandigheid di ben sa kan de den srefi omstandigheid foe joe.