A dei di ’e bron leki wan onfoe’
„Loekoe! a dei e kon di e bron leki na onfoe.” — MALEAKI 4:1.
1. Sortoe aksi e opo ede kon di abi foe doe nanga Maleaki 4:1?
NA INI den lasti dei disi, den wan di Jehovah e froekisi foe skrifi a nen foe den na ini a memre boekoe foe en, de kolokoe. Ma fa a de nanga den wan di no e doro a marki foe kisi a grani dati? Awinsi den na tiriman noso den na gewoon sma nomo, fa a sa waka nanga den efoe den e handri na wan wisiwasi fasi nanga den wan di e meki a Kownoekondre foe Gado bekènti èn a boskopoe foe den? Maleaki e taki foe wan dei foe gi frantiwortoe. Na kapitel 4, vers 1, wi e leisi: „’Bikasi loekoe! a dei e kon di e bron leki na onfoe, èn ala den wan di prefoeroe èn ala den wan di e doe ogridoe, moesoe tron leki drei wiwiri. Èn a dei di e kon sa swari den troetroe,’ Jehovah foe den legre taki, ’so taki a no sa libi no wan roetoe noso taki.’”
2. Fa den e taki na ini a boekoe Esekièl na wan libilibi fasi foe a kroetoe foe Jehovah?
2 Tra profeiti ben teki a dei di Jehovah sa kroetoe den nâsi toe, gersi nanga a toemoesi takroe faja foe wan onfoe. O boen Esekièl 22:19-22 e fiti a kroetoe foe Gado na tapoe den sekte foe krestenhèit di fadon komoto na bribi! A tekst e taki: „Disi na san a Soeverein Masra Jehovah taki: ’Foe di oenoe alamala kon tron leki foeroe doti di e kon te den smelter isri, meki mi e tjari oenoe kon makandra . . . Neleki fa den e tjari solfroe nanga kopro nanga isri nanga loto nanga tin kon makandra na mindri foe wan onfoe, so taki den kan bro nanga faja na den tapoe, foe den kan smelter. Na so mi sa tjari den kon makandra ini na atibron foe mi èn na ini mi bigi atibron, èn mi sa bro èn meki oenoe smelter. Èn mi wani tjari oenoe kon makandra èn bro na oen tapoe nanga a faja foe mi atibron, èn oenoe moesoe smelter na mindri foe en. Soleki te solfroe e smelter na mindri foe wan onfoe, na so mi sa smelter oenoe na mindri foe en; èn oenoe moesoe sabi taki misrefi, Jehovah, kanti mi atibron na oen tapoe.’”
3, 4. (a) Sortoe sani den tiriman foe krestenhèit ben froeklari na wan hoigrifasi? (b) San na a takroe nen di relisi abi?
3 Foe troe, disi na wan krakti agersitori! Den tiriman foe krestenhèit di ben soekoe reide foe no gebroiki a nen foe Jehovah, èn di ben taki na wan blasfemia fasi foe a santa nen dati srefi, sa moesoe ondrofeni a dei dati foe kisi strafoe. Na wan asranti fasi den e froeklari taki den nanga den politiek patna foe den, sa seti a Kownoekondre foe Gado djaso na grontapoe, noso awinsi fa a no fa, den sa meki grontapoe tron wan presi di fiti gi a Kownoekondre.
4 Krestenhèit di fadon komoto na bribi, wroko makandra nanga politiek tiriman, te den ben e feti kefalek ogri feti. A historia e skrifi foe a Kruistocht foe den mindri-jarihondro, a gebroiki di den ben gebroiki a Katolik kroetoebangi foe Spanjorokondre foe dwengi sma foe drai den libi, a Dertig-jarige Orlokoe di ben pori wan bigi pisi foe Europa na ini a di foe 17-jarihondro, èn a Spanjoro Borgoe Orlokoe foe den jari foe 1930, foe meki a posisi foe a katolik kerki kon tranga na ini Spanjorokondre. Na ini den toe grontapoe orlokoe foe wi jarihondro, moro broedoe ben lon srefisrefi, di Katoliksma nanga Protestantsma ben feti nanga makandra, di difrenti groepoe ben kiri makandra sondro foe hori na prakseri soema den ben de, èn den ben kiri kompe-bribiman èn so srefi sma foe tra relisi. No so langa pasa, kefalek takroe feti ben de na mindri Katoliksma nanga Protestantsma na Ierland, na mindri pikin groepoe na ini wan srefi relisi na India, èn na mindri den relisi groepoe ini a kondre di ben nen Joegoslafia fosi. Den bladzijde foe a historia foe relisi lai nanga broedoe toe foe doesoendoesoen getrow Kotoigi foe Jehovah, di den ben kiri foe a bribi foe den ede. — Openbaring 6:9, 10.
5. Sortoe kroetoe e wakti falsi relisi?
5 Wi no man tra fasi, leki foe warderi a kroetoe strafoe foe Jehovah di e kon krosibei na tapoe Babilon a Bigiwan, a grontapoe tirimakti foe falsi relisi, makandra nanga den sma di e horibaka gi en. Openbaring 18:21, 24 e taki foe a strafoe disi: „Wan tranga engel ben opo wan ston di gersi wan bigi miriston èn a ben trowe dati na ini se, èn a ben e taki: ’Na so wan fasi, nanga wan esi-esi fringi den sa trowe Babilon a bigi foto go na ondro, èn a no sa de foe feni noiti moro. Ija, na ini en den ben feni a broedoe foe den profeiti èn foe den santawan èn foe ala den wan di den ben slakti na grontapoe.’”
6. (a) Soema moesoe tron leki drei wiwiri, èn foe san ede? (b) Sortoe djaranti de gi den wan di abi frede gi Jehovah?
6 Te foe kaba, ala den feanti foe regtfardikifasi, nanga ala den wan di de nanga den, „moesoe tron leki drei wiwiri”. A dei foe Jehovah sa bron na mindri den leki wan onfoe. „A no sa libi roetoe noso taki.” Na ini a dei dati foe gi frantiwortoe, a sa handri na wan joisti fasi nanga den jongoe pikin noso den bontaki, akroederi na ondrosoekoe di Jehovah o ondrosoekoe den roetoe finifini, den papa nanga mama foe den di e tiri den. Den ogri papa nanga mama no sa abi no wan geslakti foe go doro nanga den ogri fasi foe den. Ma den wan di e bribi na ini den Kownoekondre pramisi foe Gado, no sa seki. Foe dati ede Hebrewsma 12:28, 29 e gi a froemane: „Meki wi go doro foe abi no-froedini boen-atifasi, nanga san wi kan doe santa diniwroko di e plisi Gado, nanga frede gi Gado nanga dipi lespeki. Bikasi a Gado foe wi na so srefi wan faja di e pori sani.”
Jehovah na wan ogri-ati Gado?
7. Fa a lobi foe Jehovah de prenspari na ini a kroetoe foe en?
7 Disi wani taki dati Jehovah na wan ogri-ati Gado di lobi foe teki refensi? Kwetikweti! Na 1 Johanes 4:8, na apostel e taki wan toemoesi prenspari troetori: „Gado na lobi.” Dan na vers 16, a e poti moro krakti na tapoe, te a e taki: „Gado na lobi, èn a sma di e tan na ini lobi, e tan na ini wánfasi nanga Gado èn Gado e tan na ini wánfasi nanga en.” Na foe di a abi lobi gi a libisma famiri, meki Jehovah abi a prakseri foe krin grontapoe foe ala ogridoe. Wi lobi-ati Gado di abi sari-atifasi e froeklari: „So troe leki mi e libi, . . . mi no abi prisiri na ini a dede foe wan ogriwan, ma na ini disi, taki na ogriwan drai komoto na a pasi foe en èn e tan na libi troetroe. Drai komoto, drai komoto na joe takroe pasi, bikasi foe san ede joe moesoe dede?” — Esekièl 33:11.
8. Fa Johanes ben poti krakti na tapoe lobi, ma na a srefi ten ben sori taki a ben de a Manpikin foe Dondroe?
8 Johanes e sori foeroetron go tapoe a·gaʹpe lobi di gron tapoe gronprakseri, leki den dri Evangelie skrifiman makandra. Tokoe na Markus 3:17, den e taki foe Johanes leki a ’Manpikin foe Dondroe’. A ben de nanga jepi foe a santa jeje taki a Manpikin foe Dondroe disi, ben skrifi na apocalyps boskopoe na ini Openbaring, a lasti boekoe foe bijbel, di e taki foe Jehovah leki a Gado di e tjari kroetoe strafoe kon. A boekoe disi lai nanga wortoe di e taki foe kroetoe, soleki „a bigi win persbaki foe na atibron foe Gado”, „den seibi komki foe na atibron foe Gado”, èn „na atibron foe Gado, na Almaktiwan”. — Openbaring 14:19; 16:1; 19:15.
9. San Jesus ben taki foe den kroetoe foe Jehovah, èn fa den profeititori foe en ben kon troe?
9 Wi Masra Jesus Krestes, di de „a prenki foe a Gado di wi no kan si”, ben taki na wan deki-atifasi foe den kroetoe foe Jehovah, di a ben de djaso na grontapoe (Kolosesma 1:15). Foe eksempre, na wan krin fasi èn sondro draidrai, a ben meki den seibi heloe na Mateus kapitel 23 bekènti gi den hoigri relisi fesiman foe den dei foe en. A ben bosroiti a kroetoe di a ben kroetoe den nanga wan strafoe, nanga den wortoe disi: „Jerusalem, Jerusalem, di e kiri den profeiti èn di e ston den wan di ben kon na joe — omeni tron mi ben wani tjari den pikin foe joe kon makandra, neleki fa wan oema-fowroe e tjari den pikin-fowroe foe en kon na ondro en frei! Ma joe no ben wani dati. Loekoe! Mi e libi joe oso leigi na baka.” Dritenti nanga seibi jari na baka, kroetoe strafoe ben kon na den tapoe nanga jepi foe a legre foe Rome na ondro Generaal Titus. A ben de wan dei di ben gi frede, èn di de wan profeititori foe a dei di sa sori foe de wan dei di e gi moro frede, moro leki ala den dei di libisma ondrofeni — a dei foe Jehovah, di sa broko kon heri esi.
„Son” e skèin
10. Na sortoe fasi „a son foe regtfardikifasi” e tjari prisiri gi a pipel foe Gado?
10 Jehovah e meki wi kon sabi taki sma sa pasa a dei foe en libilibi. A e taki foe disi na Maleaki 4:2, te a e taki: „Gi oenoe di e frede mi nen, a son foe regtfardikifasi sa skèin foe troe nanga a dresi di a e dresi sma na ini den frei foe en.” A son dati foe regtfardikifasi, a no wan tra sma leki Jesus Krestes srefi. En na a jeje „leti foe grontapoe” (Johanes 8:12). Fa a e skèin? A e opo nanga dresi na ini den frei foe en — na a fosi presi, dresi na jejefasi di wi kan ondrofeni srefi na ini a ten disi, èn baka dati, dresi na skinfasi gi sma foe ala nâsi na ini a njoen grontapoe di moesoe kon ete (Mateus 4:23; Openbaring 22:1, 2). Na wan agersifasi, soleki fa Maleaki ben taki, den wan di kon betre „sa go doro, foe masi a gron neleki fa fatoe pikin kaw e doe dati”, di no so langa den loesoe den komopo na den kaw-pen. Omeni prisiri den wan sa ondrofeni di opo baka nanga a froewakti foe tron sma di sa kon volmaakti!
11, 12. (a) Sortoe kaba e wakti den ogrisma? (b) Fa a pipel foe Gado „e masi den ogriwan”?
11 Ma fa a de nanga den ogrisma? Na Maleaki 4:3 wi e leisi: „’Oenoe sa masi den ogriwan foe troe, bikasi den sa tron leki stòf na oen ondrofoetoe, tapoe a dei te mi sa handri’, na dati Jehovah foe den legre taki.” Ala di wi Fetiman-Gado sa kibri den wan di lobi en, tokoe a sa figi grontapoe kon krin foe den kefalek ogri feanti, èn a sa kiri den. A sa skotoe Satan nanga den ogri jeje foe en, so taki den no kan doe noti moro. — Psalm 145:20; Openbaring 20:1-3.
12 A pipel foe Gado no sa abi wan prati ini a pori di Gado sa pori den ogriwan. Fa den sa „masi den ogriwan” dan? Den e doe disi na wan agersifasi te den e teki prati na a bigi wini-fesa. Exodus 15:1-21 e taki foe so wan fesa. A fesa ben feni presi baka di Farao nanga den legre foe en ben kisi pori na ini a Redi Se. Leki wan kontroe foe Jesaja 25:3-9, a poeroe di a sa poeroe „den kefalek ogri feanti”, sa de na fesi foe a wini-njanjan di abi foe doe nanga a pramisi foe Gado: „A sa swari dede foe têgo, èn a Soeverein Masra Jehovah sa figi ala watra-ai foe ala den fesi. Èn a sa poeroe a sjen foe heri grontapoe, di ben de na tapoe a pipel foe en, bikasi na Jehovah srefi taki disi. Èn tapoe a dei dati wan sma sa taki foe troe: ’Loekoe! Disi na wi Gado. . . . Disi na Jehovah. Wi howpoe na en tapoe. Meki wi abi prisiri èn meki wi prisiri na ini a froeloesoe di a e gi.’” Wi no e prisiri foe espresi foe di nanga wan kowroe-ati wi e si fa tra sma e kisi pori, ma wi e prisiri foe di wi e si taki a nen foe Jehovah e kon santa èn foe di grontapoe e kon krin so taki libisma man libi na wan vredefasi na ini wánfasi na tapoe.
Wan bigi programa foe gi leri
13. Sortoe wroko foe gi leri sa feni presi ini a „njoen grontapoe”?
13 Na Maleaki 4:4, den djoe ben kisi a froemane foe „memre . . . a wet foe Moses”. Na ini a ten disi, wi moesoe waka na baka „a wet foe a Krestes”, soleki fa a taki na Galasiasma 6:2. Sondro tweifri a sa de so, taki den sma di pasa Armagedon libilibi, sa kisi moro leri di gron tapoe a wet foe Krestes, èn kande den bodoi disi sa skrifi na ini „den boekoe-lolo” foe Openbaring 20:12, di sa opo na a ten foe na opobaka. A dei dati sa bigi srefisrefi, te den wan di opo baka, sa kisi leri foe libi na a fasi foe a „njoen grontapoe”! — Openbaring 21:1.
14, 15. (a) Soema na a disiten Elia? (b) Sortoe frantiwortoe na Elia groepoe abi?
14 Dati sa de ete wan pisi foe a wroko foe gi leri di Jehovah ben taki foe dati, soleki fa skrifi na Maleaki 4:5: „Loekoe! Mi e seni Elia gi oenoe, a profeiti, bifo a kon foe a bigi dei foe Jehovah, di e gi frede.” Soema na a disiten Elia? Soleki fa Mateus 16:27, 28 e sori, di Jesus ben taki dati a „e kon ini en kownoekondre”, dan a ben taki: „A Manpikin foe libisma sa kon seiker ini a glori foe en Tata nanga den engel foe en, èn dan a sa pai ibriwan foe den akroederi a fasi fa a sma dati e tjari ensrefi.” Siksi dei na baka, di a ben de na tapoe wan bergi nanga Petrus, Jakobus, nanga Johanes, „a ben kisi wan transfiguratie na fesi foe den, èn en fesi ben skèin leki son, èn den dorosei krosi foe en ben kon brenki leki a leti”. En wawan ben de na ini a fisjoen disi? Nôno, bikasi „loekoe! drape Moses nanga Elia ben de foe si, èn den ben taki nanga en”. — Mateus 17:2, 3.
15 San disi ben kan wani taki? A ben sori go na Jesus leki a Moro Bigi Moses, di den ben taki na fesi foe en, na a ten te a ben sa kon foe kroetoe (Deuteronomium 18:18, 19; Tori foe den Apostel 3:19-23). Na a ten dati, a ben sa abi demakandra nanga wan disiten Elia foe doe wan toemoesi prenspari wroko, namkoe foe preiki a boen njoensoe disi foe a Kownoekondre na heri grontapoe bifo a bigi dei foe Jehovah, di e gi frede, sa broko kon. Maleaki 4:6 e taki foe a wroko foe na „Elia” disi: „A moesoe meki na ati foe den papa kon baka na den manpikin, èn na ati foe den manpikin kon baka na di foe den papa; so taki mi no kon èn mi naki a grontapoe disi troetroe so taki a sa pori.” So boen, „Elia” na a getrow èn koni srafoe-groepoe foe salfoe kresten djaso na grontapoe, na soema a Masra, Jesus, froetrow ala den goedoe foe en. Disi abi na ini toe, taki den moesoe gi a getrow osofamiri, a fanowdoe jeje „njanjan na a reti ten”. — Mateus 24:45, 46.
16. Sortoe prisiri bakapisi a wroko foe na Elia groepoe abi?
16 Na heri grontapoe na ini a ten disi, wi kan si den prisiri bakapisi foe a njanjan programa dati. A Waktitoren tijdschrift di den e druk 16.100.000 eksemplaar foe en na ini 120 tongo, foe san 97 tongo den e tjari kon na doro na a srefi ten, e soengoe grontapoe nanga „a boen njoensoe disi foe a kownoekondre” (Mateus 24:14). Na difrenti fasi den e gebroiki tra poeblikâsi di de na ini foeroe tongo, na ini a preikiwroko èn na ini a wroko foe Jehovah Kotoigi foe gi leri. Na Elia groepoe, a getrow èn koni srafoe, de na ai foe gi bogobogo na ala „den wan di sabi taki den abi nowtoe na jejefasi” (Mateus 5:3). Boiti dati, den wan di e teki a Kownoekondre howpoe disi èn di e handri na tapoe dati, e tai na ini wan toemoesi moi wánfasi di de na heri grontapoe. Na ini en, wan bigi ipi de toe „komoto na ala nâsi nanga lo nanga pipel nanga tongo” (Openbaring 7:9). Te a wroko disi doe kaba èn te a doro a marki di Jehovah wani, dan a kaba sa kon na ini a bigi dei foe en di e gi frede.
17. O ten a dei foe Jehovah, di e gi frede, sa broko kon?
17 Ma o ten a dei dati di e gi frede sa bigin wantronso? Na apostel Paulus e piki: „A dei foe Jehovah e kon soifri neleki wan foefoeroeman na neti. Te den e taki [kande na wan toemoesi apartifasi]: ’Vrede nanga seikerfasi!’ dan wantronso pori sa kon na den tapoe na ini wán momenti, neleki a pen foe banawtoe e kisi wan oema di de nanga bere; èn den no sa man lowe kwetikweti.” — 1 Tesalonikasma 5:2, 3.
18, 19. (a) Fa den sa meki bekènti taki „vrede nanga seikerfasi” de? (b) O ten a pipel foe Jehovah sa feni froelekti?
18 Soema na „den” na ini a profeititori disi? Den na den politiek fesiman di e froeklari taki den kan meki wan njoen seti foe sani di de na ini wánfasi, foe den difrenti pisi foe na ogri grontapoe disi. Den bigi sani di den meki, a Folkoebontoe nanga den Verenigde Nâsi, no meki a seti foe sani dati. Soleki fa a profeiti foe Jehovah ben taki na fesi, dan srefi now den „e taki, ’Vrede de! Vrede de!’ ala di vrede no de”. — Jeremia 6:14; 8:11; 14:13-16.
19 Ma disiten, a pipel foe Jehovah e horidoro na ondro den kwinsi nanga den froefolgoe foe na ogri grontapoe disi. Ma heri esi, soleki fa skrifi na 2 Tesalonikasma 1:7, 8, den sa feni froelekti „te Masra Jesus sa kon na krin, komoto na hemel, nanga den makti engel foe en ini wan flam faja, te a e tjari en refensi kon na tapoe den wan di no sabi Gado èn na tapoe den wan di no e gi jesi na a boen njoensoe foe wi Masra Jesus”.
20. (a) San Sefanja nanga Habakuk e taki na fesi foe a dei di ’e bron leki wan onfoe’? (b) Sortoe rai nanga deki-ati den profeititori disi e gi wi?
20 O esi dati sa kon? Foeroe foe wi e wakti wan langa ten kaba. Na a srefi ten, boen foeroe safri-ati sma di sa pasa libilibi, e gi piki na tapoe a kari na Sefanja 2:2, 3: „Soekoe Jehovah . . . Soekoe regtfardikifasi, soekoe safri-atifasi. Kande joe kan kisi kibri na a dei foe na atibron foe Jehovah.” Dan Sefanja 3:8 e go doro nanga a froemane: „’Foe dati ede, tan froewakti mi,’ na so Jehovah taki, ’te a dei te mi e opo go foe foefoeroe sani, bikasi a kroetoe bosroiti foe mi na foe tjari nâsi kon makandra, foe tjari kownoekondre kon na wán, so taki mi kan kanti kroetoe kon na den tapoe, heri mi faja atibron; bikasi nanga a faja foe mi, heri grontapoe sa kisi pori.’” A kaba de krosibei! Jehovah sabi a dei nanga a joeroe dati èn a no sa kenki a ten foe en. Meki wi horidoro nanga pasensi. „Bikasi a fisjoen de ete gi a fasti ten, èn a sa tan lon go doro te na a kaba, èn a no sa froeteri leitori. Awansi a sa meki oenoe wakti srefi na en tapoe, tan loekoe foe en nanga bigi froewakti; bikasi a sa kon troe sondro misi. A no sa kon lati” (Habakuk 2:3). A dei foe Jehovah, di e gi frede, e kon esi-esi moro krosibei. Memre taki a dei dati no o kon lati!
Foe loekoe sani sjatoe baka:
◻ Fa a sa waka nanga den tiriman èn nanga a gewoon pipel, tapoe a dei foe Jehovah, di e gi frede?
◻ Sortoe Gado na Jehovah?
◻ Foe sortoe wroko foe gi leri na a pipel foe Gado, den e taki?
◻ Sortoe froemane den profeiti foe Gado e gi wi, ala di a kaba de so krosibei?
[Prenki na tapoe bladzijde 25]
Na a ten foe a Katolik kroetoebangi foe Spanjorokondre, den ben dwengi foeroe sma foe drai den libi foe tron Katoliksma
[Sma di abi a reti foe a prenki]
The Complete Encyclopedia of Illustration/J. G. Heck