Erken a bijbel gi san a de troetroe
„Wi e tan taigi Gado tangi toe, bikasi di oenoe ben teki Gado wortoe, di oenoe ben jere foe wi, oenoe no ben teki en leki a wortoe foe libisma, ma soleki a de troetroe, leki a wortoe foe Gado, di e wroko so srefi na ini oenoe di e bribi.” — 1 TESALONIKASMA 2:13.
1. Sortoe bodoi na ini bijbel e meki a boekoe dati wan toemoesi boen boekoe?
A SANTA bijbel na a boekoe di vertaal moro foeroe èn di prati na moro foeroe presi na grontapoe. Sma e erken en wantewante leki wan foe den bigi wroko di skrifi. Ma san moro prenspari, na taki bijbel e gi tiri di sma foe ibri ras nanga ibri nâsi abi tranga fanowdoe, awinsi sortoe wroko den e doe, noso sortoe posisi den abi na ini a libi (Openbaring 14:6, 7). Na wan fasi di e satisferi a froestan nanga na ati, bijbel e gi piki na tapoe aksi soleki: San na a marki foe a libisma libi? (Genesis 1:28; Openbaring 4:11) Foe san ede den tiri foe libisma no man tjari têgo vrede nanga seikerfasi? (Jeremia 10:23; Openbaring 13:1, 2) Foe san ede sma e dede? (Genesis 2:15-17; 3:1-6; Romesma 5:12) Fa wi kan kakafoetoe nanga boen bakapisi gi den problema foe a libi, ala di a grontapoe foeroe nanga problema? (Psalm 119:105; Odo 3:5, 6) San a tamara abi gi wi? — Danièl 2:44; Openbaring 21:3-5.
2. Foe san ede bijbel e gi piki di wi kan froetrow dorodoro, na tapoe den aksi foe wi?
2 Foe san ede bijbel e gi piki na tapoe den sortoe aksi disi, nanga makti? Bikasi a de a Wortoe foe Gado. Gado ben gebroiki libisma foe skrifi bijbel, ma soleki fa disi skrifi krinkrin na 2 Timoteus 3:16, „ala den Boekoe foe bijbel Gado ben meki den skrifi nanga jepi foe en santa jeje”. Bijbel a no libisma mekisani, di gron tapoe a fasi fa libisma srefi e froeklari den sani di ben feni presi na ini a libisma famiri. „Noiti den ben taki profeititori [froeklari foe sani di moesoe kon ete, komando foe Gado, den moreel markitiki foe bijbel] nanga libisma wani, ma sma ben taki foe di Gado wani, soleki fa santa jeje ben gi den foe taki.” — 2 Petrus 1:21.
3. (a) Gi eksempre di e sori o foeroe waarde bijbel abi gi sma na difrenti kondre. (b) Foe san ede sma ben de klariklari foe poti den libi na ini kefar soso foe leisi den Boekoe foe bijbel?
3 Foe di foeroe sma ben e warderi a waarde foe bijbel, meki den ben doe foeroe foe abi bijbel èn foe leisi en, ala di den ben de na ini kefar foe go na doengroe-oso, èn so srefi foe dede. Dati ben de so na Katolik Spanjorokondre, na ini den jari di pasa, pe den tiriman foe krestenhèit ben frede taki a makti foe den ben o kon moro swaki, efoe sma ben leisi bijbel ini den eigi tongo; disi ben de so toe na Albania, pe den ben meki strak plan na ondro wan tiri di ben bribi taki Gado no de, foe tjari wan kaba kon na ala krakti di relisi abi na tapoe libisma. Ma sma di ben abi frede gi Gado, ben kibri eksemplaar foe den Boekoe foe bijbel leki warti sani, èn den ben leisi den, èn den ben prati den nanga tra sma. Na ini a Di Foe Toe Grontapoefeti, na Sachsenhausen strafoeman-kampoe, den ben seni bijbel tapoe wan kibri fasi go foe a wan barak go na a trawan (ala di a no ben mag), èn den wan di ben man kisi a bijbel, ben hori pisi foe en na den ede, foe man prati en nanga trawan. Na ini den jari 1950, na Owstoe Doisrikondre di ben de wan komunist kondre na a ten dati, den Jehovah Kotoigi di ben de na doengroe-oso foe a bribi foe den ede, ben poti densrefi ini kefar foe tan moro langa den wawan na ini wan cel, te den ben gi pikin pisi foe bijbel na a wan strafoeman go na a trawan, so taki den ben kan leisi dati na neti. Foe san ede den ben doe disi? Bikasi den ben erken taki bijbel na a Wortoe foe Gado, èn den ben sabi taki „no foe brede wawan” ma foe „ibri wortoe di e komoto na a mofo foe Jehovah, sma e libi” (Deuteronomium 8:3). Den wortoe disi di skrifi na ini bijbel, ben meki taki den Kotoigi dati ben man foe tan na libi na jejefasi, ala di den ben miti nanga ogri pasa marki, di wi no man prakseri srefi.
4. Sortoe presi bijbel moesoe abi na ini a libi foe wi?
4 Bijbel no de wan boekoe di wi moesoe poti nomo na tapoe wan boekoe-planga foe loekoe na ini wawan leisi, èn a no de foe gebroiki soso te kompe bribiman e kon makandra foe anbegi. Wi moesoe gebroiki en ala dei, foe meki a skèin leti na tapoe situwâsi di wi e miti èn foe sori wi a reti pasi foe waka. — Psalm 25:4, 5.
A marki na foe leisi èn foe froestan en
5. (a) Efoe a kan, sortoe sani ibri wan foe wi moesoe abi gi ensrefi? (b) Fa sma na ini Israèl foe owroeten, ben kon sabi san ben de na ini den Boekoe foe bijbel? (c) Fa Psalm 19:7-11 abi krakti na tapoe a fasi fa joe e si a leisi di wi moesoe leisi bijbel?
5 Na ini den dei foe wi, eksemplaar foe bijbel de makriki foe kisi na ini moro foeroe foe den kondre, èn wi wani gi ibri sma di e leisi A Waktitoren, a tranga foe kisi wan eksemplaar. Na ini a pisi ten di den ben e skrifi bijbel, den no ben abi masjin foe druk bijbel. Moro foeroe sma no ben abi wan eksemplaar gi densrefi. Ma Jehovah sreka sani gi den foetoeboi foe en, so taki den kan jere den sani di ben skrifi. Foe dati ede, Exodus 24:7 e froeteri taki baka di Moses ben skrifi san Jehovah ben taigi en foe doe, dan Moses „ben teki a boekoe foe a froebontoe èn a ben leisi en so taki a pipel ben kan jere en”. Foe di den ben e si den wondroe sani di ben kon foe Gado èn di ben feni presi na tapoe a Bergi Sinai, meki den ben froestan taki den sani di Moses ben leisi gi den ben de foe Gado èn taki den ben moesoe kon sabi den bodoi disi (Exodus 19:9, 16-19; 20:22). Wisrefi moesoe sabi toe san skrifi na ini a Wortoe foe Gado. — Psalm 19:7-11.
6. (a) San Moses ben doe, bifo a nâsi Israèl ben go na a Pramisi Kondre? (b) Fa wi ben sa kan waka na baka na eksempre foe Moses?
6 A ben fiti gi a nâsi Israèl foe loekoe a Wet foe Jehovah baka èn foe loekoe a fasi fa a ben handri nanga den, foe di den ben sreka sani foe koti a Jordan Liba abra foe go na a Pramisi Kondre, èn na so wan fasi den no ben o waka lontoelontoe na ini a sabana moro. Foe di a krakti foe Gado en santa jeje ben boeweigi Moses, meki Moses ben loekoe a Wet nanga den baka. A ben memre den na den finifini tori foe a Wet èn a ben poti krakti na tapoe den gronprakseri èn na tapoe den fasi foe denki èn handri, di ben moesoe abi krakti na tapoe a matifasi di den abi nanga Jehovah (Deuteronomium 4:9, 35; 7:7, 8; 8:10-14; 10:12, 13). Te wisrefi e bigin nanga njoen toewijzing na ini a ten disi, noso te wi e miti nanga njoen situwâsi na ini a libi, dan a sa boen gi wi toe foe loekoe fa a rai foe den Boekoe foe bijbel moesoe abi krakti na tapoe den sani di wi e doe.
7. San ben doe foe poti den Wet foe Jehovah na ini den ati èn na ini den froestan, sjatoe baka di den Israèlsma ben koti a Jordan abra?
7 Sjatoe baka di Israèl ben koti a Jordan Liba abra, dan agen a pipel ben kon makandra, foe loekoe baka san Jehovah ben taigi den nanga jepi foe Moses. A nâsi ben kon makandra so wan 50 km na a noordsei foe Jerusalem. Afoe foe den lo ben de na fesi foe a Bergi Ebal èn afoe ben de na fesi foe a Bergi Gerisim. Drape Josua „ben leisi nanga wan tranga sten ala den wortoe foe a wet, den blesi nanga den floekoe”. Na so fasi, den man, den oema, nanga den pikinwan, makandra nanga den freimde sma di ben tan na den mindri, ben jere a wet baka na a joisti ten; den wet di e tiri a fasi fa sma no moesoe tjari densrefi na wan fasi di ben sa abi leki bakapisi taki Jehovah no ben sa feni den boen, èn den ben jere foe den blesi di den ben sa kisi efoe den ben gi jesi na Jehovah (Josua 8:34, 35). Den ben moesoe froestan boen san ben boen èn san ben ogri akroederi a fasi fa Jehovah e si sani. Boiti dati, den ben moesoe kerfoe na tapoe den ati wan lobi gi san boen èn den no ben moesoe wani si ogri sani na ai, soleki fa ibri wan foe wi na ini a ten disi e doe. — Psalm 97:10; 119:103, 104; Amos 5:15.
8. San ben de a winimarki te a nâsi Israèl ben e leisi a Wortoe foe Gado tapoe spesroetoe ten, te den ben kon makandra?
8 Boiti taki den ben leisi a Wet na den prenspari okasi dati na ini a historia, dan sani ben seti foe leisi a Wortoe foe Gado doronomo, soleki fa ben skrifi na Deuteronomium 31:10-12. Ibri di foe seibi jari, a heri nâsi ben moesoe kon makandra foe kon arki a leisi di den ben leisi a Wortoe foe Gado. Disi ben gi den njanjan na jejefasi. Den pramisi di abi foe doe nanga a Siri, ben tan libilibi na ini den froestan èn na ini den ati foe den, èn na so wan fasi disi ben de wan jepi foe tjari den getrow sma go na a Mesias. Den sani di ben seti gi njanjan na jejefasi di den Israèlsma ben de na ini a sabana, no ben tapoe di den ben go na ini a Pramisi Kondre (1 Korentesma 10:3, 4). Na presi foe dati, a Wortoe foe Gado ben kon moro goedoe foe di den tra openbaring foe den profeiti ben kon skrifi na ini en toe.
9. (a) A de so, taki den Israèlsma ben leisi den Boekoe foe bijbel soso te den ben kon makandra na ini bigi groepoe? Froeklari dati. (b) Fa den ben gi leri foe den Boekoe foe bijbel na ini ibri osofamiri, èn nanga sortoe marki den ben doe dati?
9 Den no ben moesoe loekoe den rai foe Gado Wortoe soso te den ben kon makandra na ini wan bigi groepoe. Ala dei den ben moesoe taki makandra foe den pisi foe Gado Wortoe nanga den gronprakseri di ben de na ini (Deuteronomium 6:4-9). Na moro foeroe presi na ini a ten disi, den jongoewan kan abi wan eksemplaar foe bijbel gi densrefi, èn a sa tjari wini gi den efoe den e doe dati. Ma na ini Israèl foe owroeten, dati no ben de a kefal. Na ini a ten dati, te papa nanga mama ben gi leri foe Gado Wortoe, dan den ben moesoe froetrow tapoe den sani di den ben memre èn den ben moesoe froetrow tapoe den waarheid di den ben kibri na ini den ati, makandra nanga den pikinpikin pisi di kande densrefi ben skrifi. Te den ben taki foeroetron foe a srefi sani, dan den ben proeberi foe bow safrisafri na ini den ati foe den pikin, wan lobi gi Jehovah èn gi den pasi foe en. A marki no ben de soso foe foeroe den ede nanga sabi, ma foe jepi ibri wan memre foe na osofamiri foe libi na so wan fasi taki a e sori lobi gi Jehovah èn gi en Wortoe. — Deuteronomium 11:18, 19, 22, 23.
A leisi di den ben leisi den Boekoe foe bijbel na ini den snoga
10, 11. Sortoe programa foe leisi den Boekoe foe bijbel, den ben abi na ini den snoga, èn fa Jesus ben si den sortoe okasi disi?
10 Wan pisi ten baka di den ben teki den djoe go na ini katibo na Babilon, dan den ben meki snoga leki presi foe anbegi. Den ben meki moro eksemplaar foe den Boekoe foe bijbel, so taki den ben kan leisi èn ben kan taki makandra foe Gado Wortoe na den konmakandra presi disi. Disi ben de wan foe den sani di ben meki taki so wan 6000 eksemplaar di abi tori foe den fositen Hebrew Boekoe foe bijbel na ini, di skrifi nanga anoe, ben tan te na ini a ten disi.
11 Wan prenspari pisi foe na anbegi na ini a snoga, ben de a leisi di den ben leisi a thora, di de a srefi leki den feifi fosi boekoe foe den disiten bijbel. Tori foe den Apostel 15:21 e froeteri taki na ini a fosi jarihondro Gewoon Teri, den ben leisi disi tapoe ibri Sabadei, èn a misjna e sori taki na a ten foe a di foe toe jarihondro, den ben leisi a thora tapoe a di foe toe èn na tapoe a di foe feifi dei foe a wiki. Wan toe sma ben leisi den tori di den ben kisi leki toewijzing, a wan baka a trawan. A ben de a gwenti foe den djoe di ben libi na Babilon, foe leisi a heri thora ibri jari; a ben de a gwenti na Palestina foe meki wan schema foe leisi en ini wan pisi ten foe dri jari. Den ben leisi èn ben froeklari den profeititori foe den Boekoe foe bijbel. Jesus ben abi a gwenti foe de drape na den bijbelleisi programa tapoe a Sabadei, na a presi pe a ben libi. — Lukas 4:16-21.
Doe wan sani persoonlijk na tapoe èn fiti en na ini a libi
12. (a) Fa a pipel ben abi winimarki di Moses ben leisi a Wet gi den? (b) Fa a pipel ben doe wan sani na tapoe dati?
12 A leisi di den ben moesoe leisi den Boekoe foe bijbel di skrifi nanga jepi foe Gado en santa jeje, no ben moesoe de wan sani di den ben doe nomo foe di den ben de froeplekti foe doe dati. Den no ben leisi en nomo foe satisferi a sabi di a pipel ben wani sabi sani nomonomo. Di Moses ben leisi „a boekoe foe a froebontoe” gi Israèl na a lagipresi di ben de na fesi foe a Bergi Sinai, dan a ben doe disi so taki den ben sa sabi den frantiwortoe di den abi na fesi foe Gado èn so taki den kan handri akroederi dati. Den ben o doe dati? A leisi di den ben leisi, ben aksi foe den taki den ben moesoe doe wan sani na tapoe. A pipel ben erken dati, èn den ben taki tranga, taki: „Ala sani di Jehovah taki, wi wani foe doe èn wi sa gi jesi.” — Exodus 24:7; teki gersi Exodus 19:8; 24:3.
13. San a pipel ben moesoe doe di Josua ben leisi den floekoe di ben sa kon te den no ben gi jesi, èn foe san ede?
13 Baka ten, di Josua ben leisi den blesi nanga den floekoe gi a nâsi, dan den ben moesoe doe wan sani na tapoe. Baka ibri wan foe den floekoe, den ben kisi a komando disi: „Èn ala sma moesoe taki, ‘Amen!’” (Deuteronomium 27:4-26) So boen, baka ibri penti di den ben kari, den ben taki dati den ben agri nanga dati èn nanga a kroetoe foe Jehovah di ben sa kon na tapoe den ogridoe di den ben kari. Fa dati ben moesoe de wan kefalek sani, di a heri nâsi ben bari taki den e agri!
14. Foe san ede a leisi di den ben e leisi a Wet na poebliki, ben sori foe abi spesroetoe winimarki na ini a ten foe Nehemia?
14 Na ini den dei foe Nehemia, di ala sma ben kon makandra na Jerusalem foe jere a Wet, dan den ben si taki den no ben doe den komando dorodoro, di ben skrifi drape. Na a okasi dati, wantewante den ben fiti den sani di den ben leri na ini den libi. San ben de a bakapisi? „Boen foeroe prisiri” (Nehemia 8:13-17). Baka di den ben leisi bijbel ibri dei na ini a heri wiki foe a fesa, dan den ben kon froestan taki moro ete ben aksi foe den. Na ondro begi den ben loekoe a historia foe a fasi fa Jehovah ben handri nanga a pipel foe en, bigin nanga den dei foe Abraham te go doro a ten foe den. Ala den sani disi ben boeweigi den foe sweri taki den ben o libi akroederi den sani di a Wet ben aksi foe den, foe no trow nanga sma foe tra kondre, èn foe teki den froeplekti foe ondrow a tempel èn foe dini na a tempel. — Nehemia, kapitel 8-10.
15. Fa den komando di gi na Deuteronomium 6:6-9 e sori taki na ini osofamiri, a leri di den ben gi di de na ini a Wortoe foe Gado, no ben moesoe de wan sani di den ben doe nomo foe di den ben froeplekti foe doe dati?
15 Na so a de toe na ini na osofamiri, taki a leri di den e gi foe den Boekoe foe bijbel, no moesoe de wan sani di den ben doe nomo foe di den ben de froeplekti foe doe dati. Soleki fa wi ben si kaba, na wan agersifasi na Deuteronomium 6:6-9, den ben taigi a pipel foe ’tai den wortoe foe Gado leki wan marki na den anoe’ — na so fasi den ben sa sori nanga na eksempre èn nanga den sani di den ben doe, taki den lobi den pasi foe Jehovah. Èn den ben moesoe poti den wortoe foe Gado leki ’wan edebanti na mindri den ai foe den’ — na so fasi den ben e hori den gronprakseri di de ini den Boekoe foe bijbel na prakseri doronomo, èn den ben e gebroiki den leki wan fondamenti foe teki bosroiti. (Teki gersi a fasi fa den ben skrifi den wortoe na Exodus 13:9, 14-16.) Den ben moesoe ’skrifi den na den doropostoe foe den oso foe den èn na tapoe den portoe foe den’ — na so fasi sma ben kan kon sabi den oso nanga den libimakandra foe den, leki presi pe den ben lespeki a Wortoe foe Gado èn ben fiti a wortoe foe Gado na ini den libi. Nanga tra wortoe, a libi foe den ben moesoe gi bogobogo boeweisi taki den ben lobi den regtfardiki komando foe Jehovah èn den ben fiti den na ini den libi. Dati ben gi foeroe winimarki srefisrefi! A de so, taki a Wortoe foe Gado abi a prenspari presi dati ini na aladei libi foe den osofamiri foe wi? A de wan sari sani taki den djoe ben kenki ala den sani disi ini sani di den ben doe nomo foe di den ben de froeplekti foe doe den, èn den ben e weri pikin dosoe na ini san den ben skrifi den tekst, foe gebroiki dati neleki wan tapoe. Den no ben anbegi Jehovah nanga den ati moro, èn Jehovah ben weigri foe teki na anbegi foe den. — Jesaja 29:13, 14; Mateus 15:7-9.
Frantiwortoe foe den wan di abi posisi leki opziener
16. Foe san ede a ben de prenspari gi Josua foe leisi den Boekoe foe bijbel doronomo?
16 Spesroetoe prakseri ben poti na tapoe den wan di ben de opziener foe a nâsi, te a ben abi foe doe nanga a leisi di den ben moesoe leisi den Boekoe foe bijbel. Jehovah ben taigi Josua: „Loekoe boen taki joe e doe ala sani akroederi a heri Wet.” Jehovah ben taigi en, so taki a ben kan doe a frantiwortoe dati: „Joe moesoe leisi en nanga wan safri sten, dei nanga neti, . . . bika dan joe pasi sa waka boen èn dan joe sa handri koni” (Josua 1:7, 8). Soleki fa a de troe gi ibri kresten opziener na ini a ten disi, na so a leisi di Josua ben leisi den Boekoe foe bijbel doronomo, ben sa jepi en foe hori den finifini komando di Jehovah ben gi en pipel, krin na prakseri. Josua ben moesoe froestan toe, fa Jehovah ben handri nanga den foetoeboi foe en na ini difrenti situwâsi. Te a ben leisi den sani di Jehovah ben abi na prakseri, dan a ben de prenspari gi en foe prakseri fa en eigi frantiwortoe abi foe doe nanga a prakseri dati.
17. (a) Efoe den kownoe ben wani njanboen foe a leisi di den ben moesoe leisi den Boekoe foe bijbel na a fasi fa Jehovah ben taki, dan san den ben moesoe doe boiti taki den ben e leisi nomo? (b) Foe san ede a de toemoesi prenspari gi kresten owroeman foe leisi bijbel doronomo èn foe prakseri dipi foe en?
17 Jehovah ben gi a komando taki ibri sma di ben dini leki kownoe foe a pipel foe En, ben moesoe meki wan eksemplaar foe a Wet foe Gado, na a bigin te a e tiri leki kownoe. Na eksemplaar dati ben sa abi en gron na tapoe na eksemplaar di den priester ben hori. Dan a ben moesoe „leisi en ala den dei foe en libi”. A marki no ben de nomo foe hori den sani di skrifi na ini, na ede. Na presi foe dati, a ben de so taki „a kan leri foe frede Jehovah en Gado” èn so taki „en ati no e opo ensrefi na tapoe den brada foe en” (Deuteronomium 17:18-20). Disi ben aksi foe en taki a ben moesoe prakseri dipi foe den sani di a ben leisi. Soleki fa den boeweisi e sori, wan toe foe den kownoe ben denki taki den ben abi toemoesi foeroe sani foe orga di ben meki taki den no ben man foe prakseri dipi foe san den ben leisi, èn a heri nâsi ben pina foe di den kownoe no ben poti prakseri na tapoe a plekti dati. A rol foe den owroeman na ini a kresten gemeente, no de kwetikweti a di foe wan kownoe. Ma tokoe, soleki fa a ben de troe gi den kownoe, na so a de toemoesi prenspari toe taki owroeman e leisi èn e prakseri dipi foe a Wortoe foe Gado. Efoe den e doe disi, dan dati sa jepi den foe si den wan di poti na ondro a sorgoe foe den, na wan joisti fasi. A sa jepi den toe foe man doe a frantiwortoe foe den leki leriman, na wan fasi di e gi Jehovah grani troetroe èn na wan fasi taki kompe kresten e kon tranga na jejefasi. — Titus 1:9; teki gersi Johanes 7:16-18; teki gersi 1 Timoteus 1:6, 7.
18. Na baka sortoe eksempre foe Paulus wi sa man waka, te wi e leisi bijbel doronomo èn te wi e studeri bijbel?
18 Na apostel Paulus, wan opziener foe a fosi jarihondro, ben de wan sma di ben sabi den Boekoe foe bijbel boen, di skrifi nanga jepi foe Gado en santa jeje. Te a ben gi kotoigi na den sma foe Tesalonika foe owroeten, dan a ben man foe taki-go-taki-kon boen nanga den foe den Boekoe foe bijbel, èn a ben man foe jepi den foe froestan san den Boekoe wani taki (Tori foe den Apostel 17:1-4). A ben doro na ati foe den opregti arkiman. Foe dati ede, foeroe foe den di ben arki en ben kon tron bribiman (1 Tesalonikasma 2:13). Joe man foe taki-go-taki-kon boen foe den Boekoe foe bijbel, leki wan bakapisi foe a leisi-programa foe joe èn foe a studeri di joe e studeri bijbel? A de so, taki a presi di a leisi foe bijbel abi na ini joe libi èn a fasi fa joe e leisi bijbel, e boeweisi taki joe e warderi troetroe san a wani taki foe abi a Wortoe foe Gado na joe? Na ini a tra artikel, wi sa loekoe fa wi kan gi wan boen piki na tapoe den aksi disi, srefi den wan di abi wan toemoesi druk schema.
Fa joe ben sa piki?
◻ Foe san ede sma ben de klariklari foe poti a libi nanga a fri foe den ini kefar, soso foe leisi bijbel?
◻ Fa wi e kisi winimarki te wi e loekoe den sani di ben seti gi Israèl foe owroeten foe jere a Wortoe foe Gado?
◻ San wi moesoe doe nanga den sani di wi e leisi na ini bijbel?
◻ Foe san ede a de spesroetoe prenspari gi kresten owroeman, foe leisi bijbel èn foe prakseri dipi foe en?
[Prenki na tapoe bladzijde 7]
Jehovah ben taigi Josua: „Joe moesoe leisi en nanga wan safoe sten, dei nanga neti”