Aksi foe leisiman

Fa den winimarki di e kon foe den hei-priester diniwroko foe Krestes Jesus, di kari na Hebrewsma 4:15, 16, abi krakti na tapoe den „tra skapoe” nojaso?

Ala di na a fosi presi Jesus de wan Hei Priester gi den wan di sa de nanga en na hemel, tokoe kresten di abi a howpoe foe libi na grontapoe e kisi wini foe den diniwroko foe Jesus leki priester nownowde.

Foe sensi Adam, libisma de hebi nanga sondoe. Wi e pina foe onvolmaaktifasi di wi kisi abra foe wi papa nanga mama, na a srefi fasi fa den Israèlsma ben pina. Baka makandra den Israèlsma ben abi hei priester nanga tra kompe priester di ben tjari ofrandi gi den eigi sondoe èn gi den sondoe foe a pipel. Baka wan pisi ten, Jesus ben salfoe leki priester „tapoe a fasi foe Melkisedek”. Baka di Jesus ben opo baka, a ben sori ensrefi na fesi foe Jehovah foe pristeri En a waarde foe en volmaakti libisma srakti-ofrandi. — Psalm 110:1, 4.

San disi wani taki gi wi na ini a ten disi? Na ini en brifi gi den Hebrewsma, Paulus ben taki foe a dini di Jesus e dini leki Hei Priester. Na Hebrewsma 5:1, wi e leisi: „Ibri hei priester di teki na mindri foe libisma, ben poti na wroko foe sma ede, foe a loekoe den sani di abi foe doe nanga Gado, so taki a kan tjari presenti nanga ofrandi gi den sondoe.” Baka dati, na ini den vers 5 nanga 6, Paulus ben sori taki Jesus ben kon tron wan hei priester, èn disi ben kan tjari winimarki gi wi.

Fa so? Paulus ben skrifi: „Ala di a ben de wan Manpikin, tokoe a ben leri foe gi jesi na ini den sani di a ben njan pina foe den; baka di a ben tjari kon volmaakti, a ben tron gi ala sma di e arki en, a sani foe têgo froeloesoe” (Hebrewsma 5:8, 9). Na a fosi presi, a vers dati kan meki wi denki fa wi sa man kisi winimarki na ini a njoen grontapoe, pe den wan di tan loyaal na Gado nanga Jesus sa kisi froeloesoe foe den sondoe èn sa kisi têgo libi. Dati na wan krakti howpoe, di abi en gron tapoe a froeloesoe waarde foe Jesus en srakti-ofrandi èn a diniwroko foe en leki Hei Priester.

Ma troetroe, dan nownowde wi kan kisi wini kaba foe Jesus en rol noso en diniwroko leki hei priester. Loekoe san Hebrewsma 4:15, 16 e taki: „Wi no abi leki hei priester, wan sma di no kan firi nanga wi swakifasi, ma wan sma di ben kisi tesi neleki wi na ini ala fasi, ma sondro sondoe. Foe dati ede, meki wi go nanga fri foe taki na a kownoestoeroe foe a no-froedini boen-atifasi, so taki wi kan kisi sari-atifasi èn so taki wi kan feni no-froedini boen-atifasi leki jepi na a joisti ten.” O ten ben sa de „a joisti ten”? Dati ben sa de, te wi abi sari-atifasi nanga no-froedini boen-atifasi fanowdoe. Wi alamala, foe di wi onvolmaakti, moesoe firi taki wi abi disi fanowdoe nojaso.

Hebrewsma 4:15, 16 e sori taki Jesus — di de now wan priester na hemel — ben de wan libisma toe, so boen a kan firi troetroe san wi e firi. Gi soema? Gi wi. O ten? Now. Di Jesus ben de wan libisma, a ben ondrofeni hebi druk, densrefi druk di libisma e ondrofeni. Wan toe leisi, angri ben kiri Jesus èn a ben wani dringi. Èn ala di a ben de volmaakti, tokoe a ben kon weri. Dati moesoe meki wi firi korostoe. Foe san ede? Foe di Jesus ben kon weri leki fa tra sma e kon weri, dati meki foeroetron A sabi fa wi e firi. Memre toe, taki Jesus ben abi foe kakafoetoe gi a djaroesoe di den apostel foe en ben djaroesoe tapoe makandra èn fa den ben meki trobi foe dati ede (Markus 9:33-37; Lukas 22:24). Ija, sma no ben doe san Jesus ben froewakti. Dan dati no moesoe gi wi na overtoigi taki en e froestan wi te sma no e doe san wi e froewakti, èn wi e lasi ati? Seiker dati moesoe gi wi na overtoigi.

Te joe lasi ati, dan san joe kan doe? Paulus ben taki dati joe abi foe wakti nomo, teleki, na ini a njoen grontapoe, joe hei priester, Jesus, sa jepi joe foe kon volmaakti na skinsei èn na jejefasi? Nôno. Paulus ben taki: „Wi kan kisi sari-atifasi èn kan feni no-froedini boen-atifasi leki jepi na a joisti ten”, èn dati wani taki na ini a ten disi toe. Moro fara, di Jesus ben de wan libisma, a ben njan pina èn a ben abi en tranga, foe di „[a] ben kisi tesi neleki wi na ini ala fasi”. So boen, te wi e kisi foe doe nanga den sani disi, dan a de klariklari foe jepi wi, foe di a e froestan san e pasa nanga wi. Disi no e hari joe go na En?

Now loekoe vers 16. Paulus e taki, dati wi — èn disi abi na ini en den salfoe wan èn den wan di de den tra skapoe — kan go foe taki nanga Gado nanga fri foe taki (Johanes 10:16). Na apostel no ben wani taki, dati na ini den begi foe wi, wi kan taki san wi wani, srefi krasi sani, èn sani di sori taki wi no abi respeki. Na presi foe dati, tapoe a gron foe Jesus en srakti-ofrandi èn a rol di a abi leki hei priester, ala di wi de sondari, tokoe wi kan go foe taki nanga Gado.

Wan tra fasi fa wi kan kisi wini foe den diniwroko foe wi Hei Priester, Jesus Krestes, srefi now, abi foe doe nanga den sondoe foe wi, noso den fowtoe di wi e meki. A no de foe taki, dati wi no e froewakti taki, Jesus ben sa fiti gi wi a reti di e kon foe a srakti-ofrandi foe en na ini a sistema disi dorodoro. Srefi efoe a ben sa doe dati, dan tokoe wi no ben sa abi têgo libi ete. Joe e memre a kefal di skrifi na Lukas 5:18-26, di abi foe doe nanga a lanman di sma ben saka en bedi na ini wan olo na ini a daki? Jesus ben taigi en: „Man, joe kisi pardon foe joe sondoe.” Dati no ben wani taki dati a man ben abi spesroetoe sondoe di ben meki taki a tron wan lanman. A moesoe ben abi foe doe nanga a de di a man ben de wan sondari, èn na wan fasi a ben kan abi foe doe nanga a kisi di a kisi sondoe foe en papa nanga mama, di ben meki taki a ben kisi kwinsi.

Tapoe a gron foe a srakti-ofrandi di a ben sa tjari, dan Jesus ben kan poeroe den sondoe foe a man, neleki fa a bokoboko foe Azazel ben tjari den sondoe foe Israèl gowe tapoe a Verzoendag (Lefitikus 16:7-10). Tokoe, a lanman ben de wan libisma ete. A ben sa sondoe baka, èn baka ten a dede, soleki fa sondari moesoe dede (Romesma 5:12; 6:23). San Jesus ben taki, no ben wani taki dati a man ben kisi têgo libi wantewante. Ma a man ben kisi wan sortoe foe pardon foe sondoe tapoe a momenti dati.

Now prakseri foe wi situwâsi. Foe di wi de onvolmaakti, dati meki ala dei wi e meki fowtoe (Jakobus 3:2). San wi kan doe foe dati ede? We, na ini hemel wi abi wan Hei Priester di abi sari-ati èn di e jepi wi foe go taki nanga Jehovah na ini begi. Ija, soleki fa Paulus ben skrifi, wi alamala kan „go foe taki nanga [Gado] nanga fri foe taki na [en] kownoestoeroe foe no-froedini boen-atifasi, so taki wi kan kisi sari-ati èn kan feni no-froedini boen-atifasi leki jepi na a joisti ten”. Foe dati ede, nownowde ala sma di de foe den tra skapoe e kisi foe den diniwroko foe Krestes leki hei priester, toemoesi moi winimarki foe troe, so srefi toe wan krin konsensi.

Ala kresten di abi a howpoe foe libi na grontapoe, kan loekoe go na fesi foe kisi moro winimarki na ini a njoen grontapoe di e kon krosibei. Dan wi hei priester na hemel sa fiti srefisrefi a reti di e kon foe a srakti-ofrandi foe en, di sa meki wi kisi pardon foe sondoe dorodoro. So srefi toe a sa tjari moro winimarki kon foe di a sa sorgoe gi a gosontoe foe a pipel na skinsei èn na jejejasi. Èn Jesus sa meki a kisi di a pipel foe Gado sa kisi leri na grontapoe, kon moro bigi, foe di wan foe den moro bigi frantiwortoe foe den priester na Israèl ben de, a leri di den ben moesoe leri a pipel a Wet (Lefitikus 10:8-11; Deuteronomium 24:8; 33:8, 10). Foe dati ede, ala di wi e kisi wini foe Jesus en diniwroko leki priester nownowde, tokoe moro e wakti wi!