Wan kari di gi nanga lobi na den wan di weri
„Kon na mi, oen alamala di e wroko tranga èn di abi hebi lai, èn mi sa gi oenoe kowroe-ati.” — MATEUS 11:28.
1. San Jesus ben si na Galilea na a di foe dri preikiwaka foe en?
PIKINMORO na a bigin foe a jari 32 G.T., Jesus ben de na a di foe dri preikiwaka foe en na a distrikt Galilea. A ben waka pasa heri foto nanga dorpoe, „e leri den na ini den snoga foe den èn e preiki a boen njoensoe foe a kownoekondre èn e dresi ibri sortoe siki èn ibri sortoe malengri”. Ala di a ben doe disi, a ben si ipi sma èn „a ben firi sari nanga den bikasi den ben foefoeroe den èn ben panja den leki skapoe sondro skapoeman”. — Mateus 9:35, 36.
2. Fa Jesus ben jepi a pipel?
2 Ma Jesus ben doe moro leki nomo foe firi sari gi den ipi sma. Baka di a ben leri den disipel foe en foe begi „a Masra foe a kotiwroko”, Jehovah Gado, dan a ben seni den go foe jepi a pipel (Mateus 9:38; 10:1). Dan a gi a pipel en persoonlijk djaranti fa foe kisi troetroe froelekti nanga trowstoe. A ben gi den a switi kari disi: „Kon na mi, oen alamala di e wroko tranga èn di abi hebi lai, èn mi sa gi oenoe kowroe-ati. Teki mi tjatjari na oenoe tapoe èn leri foe mi, bikasi mi abi safrifasi nanga sakafasi foe ati, èn oenoe sa feni kowroe-ati gi oenoe sili.” — Mateus 11:28, 29.
3. Foe san ede a kari di Jesus ben gi e hari a belangstelling foe sma na a srefi fasi na ini a ten disi?
3 Na ini a ten disi wi e libi na ini wan ten pe foeroe sma e firi taki den abi wan hebi lai na den tapoe (Romesma 8:22; 2 Timoteus 3:1). Gi wan toe foe den, soso foe wroko gi sani foe kan tan na libi, e teki so foeroe ten nanga krakti foe den, so taki den abi pikinso ten nanga krakti abra gi den osofamiri foe den, den mati, noso gi iniwan tra sani. Foeroe sma hebi nanga serjoesoe siki, kwinsi, depressie, nanga tra problema na skinsei nanga na emotioneelsei. Foe di son sma e firi a druk, meki den e proeberi foe feni froelekti te den e gi densrefi abra dorodoro na prisiri, njanjan, dringi, èn so srefi a fowtoe gebroiki foe drug. A no de foe taki, dati a bakapisi de taki den problema e drai kon ibri tron baka sondro taki den man feni wan loesoe gi den èn disi e tjari moro problema nanga druk kon na den tapoe (Romesma 8:6). A de krin taki a kari di Jesus ben gi nanga lobi, e hari a belangstelling foe sma na ini a ten disi na a srefi fasi leki fa a ben de na ini a ten dati.
4. Sortoe aksi wi moesoe loekoe so taki wi kan kisi winimarki foe a kari disi di Jesus ben gi nanga lobi?
4 Ma na ondro san den sma na ini a ten foe Jesus ben de, so taki a ben sori leki den „ben foefoeroe den èn den ben panja den”, èn di ben meki Jesus firi sari gi den? San na den hebi nanga den lai di den ben abi foe tjari, èn fa a kari di Jesus ben gi den, ben sa jepi den? Den piki na tapoe den aksi disi kan jepi wi foeroe foe kisi winimarki foe a kari di Jesus ben gi nanga lobi na den wan di weri.
Den wan „di e wroko tranga èn di abi hebi lai”
5. Foe san ede a ben fiti taki na apostel Mateus ben skrifi a sani disi di ben feni presi na ini Jesus en diniwroko?
5 A de warti foe si taki Mateus wawan ben skrifi foe a sani disi di ben feni presi na ini Jesus en diniwroko. Foe di Mateus di sma ben sabi leki Leifi toe, ben de wan belastingman, meki a ben sabi heri boen san na wan spesroetoe hebi di a pipel ben e tjari (Mateus 9:9; Markus 2:14). A boekoe Daily Life in the Time of Jesus e taki: „Den belasting di [den djoe ben moesoe] pai nanga moni èn nanga goedoe noso nanga wroko, ben hebi srefisrefi, èn den belasting ben moro hebi bikasi toe fasi foe pai belasting ben waka skinskin, namkoe foe pai belasting leki borgoe, nanga pai belasting na relisisei; èn no wan foe den belasting disi ben de pikinso.”
6. (a) San ben de a belasting sistema di den ben gebroiki na ini a ten foe Jesus? (b) Foe san ede den belastingman ben abi so wan takroe nen? (c) Foe sortoe sani Paulus ben feni taki a de fanowdoe foe memre den kompe kresten foe en?
6 A ben de a belasting sistema foe a ten dati di ben meki a sani disi moro hebi. Den lantiman foe Rome ben joeroe a reti foe teki belasting na den distrikt, gi den man di ben gi a moro hei prijs. Den man disi foe den sei, ben teki sma na ini a libimakandra foe a presi na wroko, foe tiri a troetroe teki di den e teki belasting. Ibri sma na ini a seti disi ben firi taki den abi a reti foe poti moro na tapoe a pai di a e kisi, noso na tapoe a pisi foe en. Foe eksempre, Lukas ben froeteri taki „wan man ben de di ben nen Sakeus; èn a ben de wan edeman foe den belastingman, èn a ben goedoe” (Lukas 19:2). Soleki fa a sori, na „edeman foe den belastingman”, Sakeus, nanga den wan di ben wroko na en ondro, ben kon goedoe ala di a pipel ben pina foe dati ede. A fowtoe gebroiki foe sani nanga a kroeka di ben kon foe a belasting sistema disi, ben meki taki a pipel ben si den belastingman a srefi leki sondari nanga sma di e doe hoeroedoe, èn a ben kan de so, taki den ben froedini dati toe na ini moro foeroe kefal (Mateus 9:10; 21:31, 32; Markus 2:15; Lukas 7:34). Foe di a pipel ben abi wan hebi di pikinmoro den no ben man tjari, meki a no e froewondroe taki na apostel Paulus ben firi taki a ben de fanowdoe foe memre den kompe kresten foe en, taki den no moesoe lasi pasensi na ondro a Rome tjatjari, ma foe „gi ala sma san den moesoe kisi, a sma di e aksi belasting, en belasting; a sma di e aksi grani, en grani”. — Romesma 13:7a; teki gersi Lukas 23:2.
7. Na sortoe fasi den strafoe wet foe Rome ben poti moro hebi na tapoe a lai foe a pipel?
7 Paulus ben memre den kresten toe foe gi „a sma di e aksi foe frede, a frede disi; a sma di e aksi foe lespeki, a lespeki disi” (Romesma 13:7b). Den Romesma ben de bekènti foe na ogri-atifasi foe den èn a hebi di den strafoe foe den ben hebi. Krawasi, fonfon nanga wan wipi, tranga ten na ini doengroe-oso, nanga dede-strafoe, ben de sani di den ben gebroiki foeroetron foe meki a pipel tan saka densrefi na den ondro (Lukas 23:32, 33; Tori foe den Apostel 22:24, 25). Srefi den djoe fesiman ben kisi a makti foe gi den sortoe strafoe disi na a fasi fa densrefi feni taki a e fiti (Mateus 10:17; Tori foe den Apostel 5:40). Gi iniwan sma di ben libi na ondro so wan sistema, a ben de wan sani di ben kwinsi den, èn srefi a ben de wan sani di ben hebi srefisrefi.
8. Na sortoe fasi den relisi fesiman ben poti wan hebi lai kon na tapoe a pipel?
8 Ma moro takroe leki den belasting nanga den wet foe Rome, ben de a hebi lai di den relisi fesiman foe a ten dati ben poti na tapoe a gewoon pipel. Te joe loekoe en boen, dan a ben sori taki disi ben de a prenspari sani nanga san Jesus ben broko en ede moro foeroe, di a ben taki foe a pipel leki sma di „e wroko tranga èn di abi hebi lai”. Jesus ben taki dati na presi taki den relisi fesiman ben gi howpoe èn ben trowstoe a pipel di den ben kwinsi, dan den relisi fesiman ben „tai hebi lai èn ben poti den na tapoe den skowroe foe sma, ma densrefi no wani foe fasi den nanga den finga srefisrefi” (Mateus 23:4; Lukas 11:46). A de krin foe si na ini den Evangelie, a fasi fa den skrifi soifri foe den relisi fesiman — spesroetoe den sabiman foe Boekoe nanga den Fariseiman — leki wan groepoe sma di abi bigimemre, di de sondro firi, èn di e hoigri. Den ben wisiwasi a gewoon pipel leki sma di no kisi leri èn di no krin, èn den ben tegoe gi den freimdesma di ben de na den mindri. Wan raport na tapoe a fasi fa den ben de, e taki: „Na ini a ten disi, a wet kan kroetoe wan man di e poti toemoesi foeroe lai na tapoe wan asi. Fa a de dan nanga wan man di ben poti 613 wet na tapoe ’a pipel foe a kondre’ di no ben kisi relisi leri; èn dan a no ben doe noti foe jepi den, èn e kroetoe den leki ogri sma?” A no de foe taki, dati a troetroe hebi no ben de a Wet foe Moses, ma den foeroe relisi gwenti di den ben poti na tapoe a pipel.
A troetroe sani di meki tranga ten de
9. Fa den situwâsi na mindri a pipel na ini a ten foe Jesus, gersi a di foe a ten foe Kownoe Salomo?
9 Son tron, den problema na monisei di ben de na tapoe a pipel, ben hebi srefisrefi, èn dati ben meki taki pôti sma ben de na ala sei. Den Israèlsma ben moesoe pai den reidelek belasting di ben skrifi na ini a Wet foe Moses. Dan na a ten di Salomo ben tiri, a pipel ben sorgoe gi den projekt di ben diri srefisrefi èn di ben de gi a heri nâsi, soleki a bow foe a tempel nanga tra bigi gebow (1 Kownoe 7:1-8; 9:17-19). Ma tokoe bijbel e taigi wi taki a pipel ben „njan nanga dringi nanga prisiri. . . . Èn Juda nanga Israèl ben go doro foe libi na ini seikerhèit, ibriwan na ondro en eigi win prani èn na ondro en eigi figa bon, foe Dan te go miti Berseiba, ala den dei foe Salomo” (1 Kownoe 4:20, 25). San ben meki taki sani ben difrenti?
10. San ben de a reide foe a situwâsi foe Israèl na ini a fosi jarihondro?
10 So langa leki a nâsi ben hori steifi na a troe anbegi, Jehovah ben feni den boen èn ben blesi den nanga seikerhèit èn sani ben waka boen gi den, ala di den ben abi foe pai foeroe moni leki wan nâsi. Ma Jehovah ben warskow den taki efoe den „ben sa drai baka dorodoro foe waka na [en] baka èn no e hori [en] komando”, dan a situwâsi foe den ben sa drai na wan takroe fasi. Foe taki en leti, „Israèl foe troe [ben sa] tron wan odo nanga wan spotoe na mindri ala den pipel” (1 Kownoe 9:6, 7). Na so sani ben kon de toe. Israèl ben kon na ondro freimde makti, èn a kownoekondre di ben de wan glori wan ten, ben kon lagi èn ben kon tron wan kolonie foe freimde tirimakti. Dati ben de wan takroe bakapisi srefisrefi foe di den no ben poti prakseri na tapoe den plekti na jejefasi di den ben abi!
11. Foe san ede Jesus ben feni taki sma ’ben foefoeroe a pipel èn ben panja den leki skapoe sondro wan skapoeman’?
11 Ala den sani disi e jepi wi foe froestan foe san ede Jesus ben feni taki sma „ben foefoeroe den èn den ben panja den”. Den ben de Israèlsma, a pipel foe Jehovah, di ben proeberi leki wan groepoe foe libi akroederi den wet di Gado ben gi èn foe go doro nanga na anbegi foe den na wan fasi di Gado feni boen. Ma tokoe, no soso den politik nanga bisnis makti, ma so srefi den relisi fesiman na den mindri di ben fadon komoto na bribi, ben handri nanga den na wan onregtfardiki fasi èn den ben kwinsi den. Den ben de „leki skapoe sondro wan skapoeman” bikasi den no ben abi no wan sma foe sorgoe gi den noso foe taki gi a boen foe den. Den ben abi jepi fanowdoe foe kakafoetoe gi toemoesi tranga situwâsi. A switi kari di Jesus ben gi nanga lobi, ben gi na a reti ten srefisrefi!
A kari di Jesus e gi na ini a ten disi
12. Sortoe druk den foetoeboi foe Gado nanga tra opregti sma e firi na ini a ten disi?
12 Na ini a ten disi, na foeroe fasi sani de a srefi. Opregti sma di e proeberi foe handri na wan eerlijk fasi te den e doe bisnis, e feni taki a druk nanga den sani di a kroektoe sistema foe sani e aksi foe den, hebi gi den foe tjari. Srefi den wan di gi den libi abra na Jehovah kan ondrofeni a bakapisi foe den pori krakti dati. Verslag e sori taki wan toe foe den foetoeboi foe Jehovah e feni en moeilek moro nanga moro foe doe ala den frantiwortoe foe den, ala di den wani doe dati. Den e feni taki wan hebi de na den tapoe, den e firi weri. Wan toe foe den e feni srefi taki a ben sa de wan froelekti gi den efoe den no ben sa abi foe broko den ede moro, èn efoe den e gowe pe sma no kan si den so taki den ben kan kisi densrefi baka. Oiti joe ben firi a fasi dati? Joe sabi wan krosibei mati di de na ini a situwâsi dati? Ija, a switi kari di Jesus e gi, wani taki foeroe gi wi na ini a ten disi.
13. Foe san ede wi kan de seiker taki Jesus kan jepi wi foe feni trowstoe nanga kowroe-ati?
13 Bifo Jesus ben gi a kari disi nanga lobi, a ben taki: „Ala sani mi kisi foe mi Tata, èn no wan sma sabi a Manpikin dorodoro leki a Tata, èn no wan sma sabi a Tata dorodoro leki a Manpikin èn ibriwan sma gi soema a Manpikin wani tjari En kon na krin” (Mateus 11:27). Bikasi foe a krosibei matifasi disi na mindri Jesus nanga en Tata, wi abi a djaranti taki te wi e teki a kari foe Jesus èn e tron den disipel foe en, dan wi kan kon na ini wan persoonlijk krosibei matifasi nanga Jehovah, „a Gado foe ala trowstoe”. (2 Korentesma 1:3; teki gersi Johanes 14:6.) Boiti dati, foe di a ’ben kisi ala sani’, meki Jesus Krestes wawan abi a krakti nanga a makti foe meki den hebi lai foe wi kon lekti. Sortoe hebi lai? Den hebi lai di den kroeka politik, bisnis èn so srefi relisi sistema e tjari kon na wi tapoe, èn so srefi a hebi lai di e kon na wi tapoe foe a sondoefasi nanga na onvolmaaktifasi di wi kisi abra. Disi na wan prakseri di e gi deki-ati nanga korostoe srefisrefi!
14. Foe sortoe tranga wroko Jesus ben kan gi froelekti?
14 Jesus ben go moro fara e taki: „Kon na mi, oen alamala di e wroko tranga èn di abi hebi lai, èn mi sa gi oenoe kowroe-ati” (Mateus 11:28). Jesus no ben taki srefisrefi kontrari a wroko di wan sma e wroko tranga, bikasi foeroetron a ben gi den disipel foe en a rai foe doe moeiti na ini a wroko di den ben moesoe doe (Lukas 13:24). Ma „wroko tranga” (Kingdom Interlinear) e tjari a prakseri foe wroko di e doe gi wan langa ten èn di e weri a skin, èn nofotron sondro wan warti bakapisi. Èn „abi hebi lai” e tjari a prakseri foe na abi di wan sma abi lai pasa san a kan tjari. Wi kan teki a difrenti disi gersi a diki di wan man e diki foe feni wan goedoe di kibri èn a diki di wan man e diki gotro na wan strafoeman kampoe. Ala toe foe den man disi e doe tranga wroko. A wan foe den e doe a wroko nanga faja, ma gi a trawan a de wan wroko di e froeferi èn e weri a skin èn di no e kaba. A difrenti na a marki foe a wroko noso taki wan marki no de.
15. (a) Sortoe sani wi moesoe aksi wisrefi efoe wi e feni taki wi e tjari wan hebi lai na tapoe den skowroe foe wi? (b) San wi kan taki foe a fonten foe den hebi lai foe wi?
15 Joe feni taki joe „e wroko tranga èn abi hebi lai”, èn taki toemoesi foeroe sani de di e teki a ten nanga a krakti foe joe? A gersi taki den lai di joe e tjari hebi toemoesi gi joe? Efoe dati de so, dan a kan de wan jepi efoe joe e aksi joesrefi: ’Gi san mi e wroko tranga? Sortoe lai mi e tjari?’ Na ini a tori disi, wan man di e froeklari sani foe bijbel, ben taki moro leki 80 jari pasa: „Efoe wi e loekoe den hebi lai foe a libi, dan wi kan prati den na ini toe groepoe; wi kan kari den, den wan di wisrefi e tjari na wi tapoe, nanga den wan di wi no man wai pasi gi den: den wan di e kon foe den sani di wisrefi e doe, nanga den wan di no e kon foe den sani di wisrefi e doe.” Dan a ben taki moro fara: „Foeroe foe wi ben sa froewondroe, baka te wi ondrosoekoe wisrefi serjoesoe, foe si o bigi a procent de foe den hebi lai di wisrefi e poti na wi tapoe.”
16. Sortoe hebi lai wi kan poti na tapoe wisrefi èn di no ben sa de wan koni sani?
16 San na wan toe foe den hebi lai di wi ben kan tjari na tapoe wisrefi? Na ini a ten disi, wi e libi na ini wan grontapoe di lobi materia sani, di lobi meki prisiri èn di de kontrari boen gwenti nanga wet (2 Timoteus 3:1-5). Srefi kresten di gi densrefi abra na Gado, de doronomo na ondro druk foe waka akroederi den modo foe krosi èn a grontapoe fasi foe libi. Na apostel Johanes ben skrifi foe „a lostoe foe a skin èn a lostoe foe na ai èn a prodo di wan sma e prodo nanga den sani foe tan na libi” (1 Johanes 2:16). Disi na tranga sani di kan wroko na wi tapoe èn di makriki kan abi krakti na wi tapoe. A de so, taki son wan ben wani foe go na ini bigi paiman soso foe njan boen foe moro foe den prisiri foe grontapoe noso foe tan hori wan sortoe fasi foe libi. Èn dan den e si taki den moesoe teki foeroe ten foe wroko, noso taki den moesoe teki difrenti wroko foe man kisi a moni di den abi fanowdoe foe pai den paiman foe den.
17. Sortoe situwâsi kan meki en moro moeilek foe tjari a lai, èn fa wi kan jepi disi?
17 Ala di wan sma kan denki taki a no fowtoe foe abi wan toe sani di tra sma abi noso foe doe den sani di tra sma e doe, tokoe a de prenspari foe ondrosoekoe finifini efoe a no e poti moro lai na en tapoe moro leki san de fanowdoe (1 Korentesma 10:23). Foe di wan sma no kan tjari moro leki a man, a moesoe poeroe wan sani foe man teki wan tra lai na en tapoe. Moro foeroe a de so taki a de den sani di de prenspari gi a boen foe wi na jejefasi — persoonlijk bijbelstudie, fisiti foe konmakandra, nanga a velddienst — di wi e poeroe fosi. A bakapisi na taki wi e lasi krakti na jejefasi, di e meki en moro tranga foe tjari a lai. Jesus Krestes ben warskow gi so wan kefar di a ben taki: „Poti prakseri na tapoe oensrefi, taki noiti oen ati no e kon hebi nanga njan pasa marki èn nanga dringi pasa marki èn nanga den broko-ede foe a libi, èn a dei dati wantronso, na ini wan momenti, e kon na oenoe tapoe leki wan trapoe” (Lukas 21:34, 35; Hebrewsma 12:1). A moeilek foe kon sabi wan trapoe èn foe lon gowe gi en, efoe wan sma abi hebi lai èn efoe a weri.
Froelekti nanga kowroe-ati
18. San Jesus ben pristeri gi den wan di e kon na en?
18 Foe dati ede, na wan lobi fasi Jesus ben pristeri a dresi: „Kon na mi, . . . èn mi sa gi oenoe kowroe-ati” (Mateus 11:28). Den wortoe „gi kowroe-ati” djaso nanga „kowroe-ati” na ini vers 29 e kon foe den Griki wortoe di e kroederi nanga a wortoe di a Septuaginta vertaling e gebroiki foe vertaal a Hebrew wortoe gi „sabadei” noso „a hori foe a sabadei” (Exodus 16:23). So boen, Jesus no ben pramisi taki den wan di ben sa kon na en no ben sa abi foe wroko moro, ma a ben pramisi taki a ben sa gi den kowroe-ati so taki den ben sa de klariklari gi a wroko di den moesoe doe akroederi a prakseri foe Gado.
19. Fa wan sma ’e kon na Jesus’?
19 Ma fa wan sma e ’kon na Jesus’? Jesus ben taigi den disipel foe en: „Efoe wan sma wani waka na mi baka, dan a moesoe drai baka gi ensrefi èn teki en pina-oedoe èn waka doronomo na mi baka” (Mateus 16:24). So boen, foe kon na Jesus, wani taki dati wan sma moesoe saka na eigi wani foe en na ondro a wani foe Gado nanga a wani foe Krestes, èn a moesoe teki wan lai foe frantiwortoe, èn a moesoe tan doe dati doronomo. Disi e aksi toemoesi foeroe foe wan sma? Den kostoe hei toemoesi? Meki wi loekoe san Jesus ben taki baka di a ben gi a kari nanga lobi na den wan di weri.
Joe kan memre disi?
◻ Na tapoe sortoe fasi a pipel foe den dei foe Jesus ben abi hebi lai na den tapoe?
◻ San ben de a troetroe reide foe a tranga situwâsi foe a pipel?
◻ Fa wi moesoe ondrosoekoe wisrefi efoe wi e feni taki wi abi toemoesi hebi lai na wi tapoe?
◻ Sortoe hebi lai wi kan poti na wi tapoe, di no de wan koni sani?
◻ Fa wi kan kisi a kowroe-ati di Jesus ben pramisi?
[Prenki na tapoe bladzijde 22]
San na wan toe foe den hebi lai di wi ben kan tjari na tapoe wisrefi?
[Sma di abi a reti foe a prenki]
Courtesy of Bahamas Ministry of Tourism