„Feni kowru-ati gi unu sili”
„Kon na mi, unu alamala di e naki unu skin èn di abi hebi lay, . . . èn unu sa feni kowru-ati gi unu sili. Bika mi ttyari de safu èn mi lay de lekti.” — MATEYUS 11:28-30.
1, 2. Na ini situwâsi na libismafamiri de someni yarihondro kba, èn san ben de na a tra sey na prakseri fu Gado bigin bigin?
„WI SABI taki ala san Gado meki e soktu èn e nyan pina makandra doronomo te now ete.” Na dati wan man ben skrifi someni yarihondro psa kba gi mati na ini Rome (Romen 8:22). Na ini den yari sensi a ten dati na soktu nanga na pen fu na heri libismafamiri ben kon de moro bigi nomo. Krutu sani a fesi, pina, hogridu nanga angri ben aksi ala sey wan sani di de wan ranpu. Na onregtfardiki ekonomiya sistema e puru milyun milyun sma na ini a wroko fu den èn srefi fu den oso, èn den krakti fu Satan e nyan den muyti na ondro fu kweki pikin ini na pasi di den ben sa musu go.
2 Ma kande na moro bigi ranpu e feni presi te siki ofu owrudey e puru fu sma a krakti nanga wartifasi fu den aladi den e tron pikinmoro soso leki leygi dosu fu san den ben de fositen. Na kofarlek pen nanga pina, di nofotron e tan hori wiki, mun, èn srefi yari, e meki na ati e krey èn e meki liba fu watra-ay lon. Fa disi de wan dipi sarifasi fu fruteri san a libi de! Wan koni kownu fu langaten psa kba ben taki fu na sari situwâsi fu na libisma: „Ala den dey fu en wroko wani taki pen nanga tergifasi” (Preykiman 2:23; 4:1). A libi seyker no de now san a ben musu de akruderi na prakseri di Gado ben abi bigin bigin. — Genesis 2:8, 9.
3. Gado ben meki libisma nanga na man di a ben o man fu du san, èn fa dati e kon tru now soso na ini wan marki di skotu?
3 Yehovah Gado ben meki libisma bun dorodoro nanga na man di a man trutru fu nyanbun fu na libi (Deuteronomium 32:4, 5). Go prakseri pikinso o switi a de fu nyan switi fu wan bun nnyan, o switi a de fu hari soyfri loktu ofu fu si wan moy sondongo! „Mi si na wroko di Gado gi den libisma pikin fu hori den srefi bezig nanga dati”, na srefi koni kownu fu langaten psa kba ben taki, „Ala sani a ben meki moy tapu en ten. . . . Mi kon sabi taki noti moro betre de gi den leki fu prisiri èn fu du bun na ini na ten fu wan sma libi; èn so srefi tu taki ibri libisma nyan èn tru tru e dringi èn e si na bun fu ala en tranga wroko. A de na presenti foe Gado.” — Preykiman 3:10-13.
4. San na a sari situwâsi fu someni sma, èn so leki den ondrofeni fu Yeyses e sori? (b) Sortu kari di e waran na ati Yeyses ben gi èn sortu aksi disi e kari kon?
4 Ma o pikinso sma man fu nyanbun fu den bun sani di Gado ben abi na prakseri gi wi. Yeyses Krestes ben sabi na mofina nanga sari toestand pe libisma de na ini. ’Bigi ipi sma ben kon na en,’ na beybri e taki, ’di ben abi malengriwan, sma di ben kisi mankeri, breniman, babawman nanga furu trawan na den, èn den ben trowe den gewoon so na en futusey.’ Fa Yeyses ben firi sari nanga den sortu onkoloku sma disi! (Mateyus 9:36; 15:30). Na wán okasi a ben gi na kari di e waran na ati: „Kon na mi, unu alamala di e naki unu skin èn di abi hebi lay, èn mi sa gi unu kowru-ati. Teki mi ttyari na unu tapu èn leri fu mi, bika mi abi safrifasi èn sakafasi fu ati, èn unu sa feni kowru-ati gi unu sili” (Mateyus 11:28, 29). Disi na seyker wortu di e gi howpu! Ma fu sortu kowru-ati Yeyses ben e taki? Èn fa wi kan feni dati?
Na waarheid di e gi kowru-ati
5. Fa Yeyses ben sori san na a pasi di e go na tru fri èn kowru-ati gi wi sili?
5 Di Yeyses ben de na a wwiri kanpufesa so wan siksi mun bifo a dede, a ben sori san ben de a fasi fu kon de fri èn na so fasi kisi tru tru kowru-ati. Te a e taki nanga den sma di ben poti bribi na ini en, a ben taki: „Efu unu e tan na ini mi wortu, dan unu sa de tru tru mi disipri èn unu sa sabi na waarheid èn na waarheid sa meki unu kon fri” (Yohanes 8:31, 32). Fu sortu waarheid Yeyses ben e taki? Fu san a sa fri wi? Na sortu fasi den arkiman fu en ben de srafu?
6. (a) Nanga sortu genstaki kerkisma di ben de gensman ben kon èn fu san-ede? (b) Na sortu fasi wi alamala de srafu?
6 Kerki sma di ben de gensman ben koti Yeyses mofo nanga den wortu: „Wi na Abraham bakapikin èn wi no ben de noyti srafu fu wan sma. Fa yu kan taki dan: ’Unu sa kon fri’?” Den dyu gensman dati ben abi bigi memre fu a famirigudu fu den. Aladi na nâsi ben kon nofotron na ondro freymde kownukondre di ben basi den, toku den dyu ben weygri fu sma kari den srafu. Ma Yeyses ben sori na sortu fasi den ben de srafu: „Fu tru, fu tru, mi e taygi unu: ala sma di e du sondu, na wan srafu fu sondu.” Ija, gi ala en arkiman a ben de taki den ’ben du sondu’, so leki dati de so srefi tu nanga ibriwan fu wi na ini a ten disi. Disi e kon fu di wi alamala ben kisi sondu fu wi ppa nanga mma di ben de bigin bigin. Ma Yeyses ben pramisi: „Efu na Manpikin meki unu fri dan unu sa de tru tru fri”. — Yohanes 8:33-36; Romen 5:12.
7. Fa tru fri kan kon de reti, èn san na a waarheid di e meki wi fri?
7 Tru fri kan kon so bun soso nanga yepi fu Gado Manpikin, Yeyses Krestes di ben gi en volmaakti libisma libi leki wan frulusu ofrandi. Na srakti-ofrandi disi e fri wi fu na sondu di e tyari dede kon èn e opo gi wi na okasi fu kisi têgo libi na in volmaakti gosontu èn koloku na ini Gado regtfardiki nyun grontapu (Yohanes 3:16; 1 Yohanes 4:10). Na waarheid di e meki wi kon fri, de fu dati-ede tu na waarheid di e go fu Yeyses Krestes nanga en ròl na ini a kon tru fu den prakseri fu Gado. Na Kownukondre, nanga Krestes leki kownu, sa meki a wani fu Gado gi na grontapu kon tru, èn Yeyses ala tron baka ben gi kotoygi fu na waarheid disi. — Yohanes 18:37.
Fa na waarheid e gi kowru-ati
8. Sortu eksenpre kan gi fu na fasi fa na waarheid e tyari kowru-ati kon?
8 Na fasi fa na waarheid e gi kowru-ati wi ben sa kan sori nanga, na tori fu wan uma di ben kisi fu yere taki a ben abi wan sortu kanker di e panya en srefi esi-esi. Na lay fu sabi na sani dati e maskaderi en te a e luku den hati baka pisi di kande e pori sani. Ma baka wan pisi ten a e go na wan tra datra èn den e ondrosuku en moro fara. Te den baka pisi fu den ondrosuku e sori taki ofu na fosi ondrosuku ben de wan aboysi ofu wan aparti kenki ben kon, dan yu kan go prakseri sortu wondru firi fu frulekti a e ondrofeni. Fa a de wan kowru-ati gi en sili!
9. Fa Yeyses ben gi frulekti fu di a ben leri sma na waarheid?
9 Di Yeyses ben kon na grontapu, dan tapu wan srefi sortu fasi sma ben go bukundun na ondro den soso bun fu noti sistema fu gwenti fu den dey dati. Yeyses ben taki fu den sabiman fu Buku nanga Fariseyman di ben de frantiwortu: „Den e tay hebi lay makandra èn e poti dati tapu den skowru fu den sma, ma srefi den no wani fasi den nanga den eygi finga” (Mateyus 23:4; Markus 7:2-5). Fa a ben de wan firi fu frulekti di Yeyses ben gi sma na waarheid di ben meki den kon fri fu den sortu gwenti disi di ben tyari den go na ini katibo! (Mateyus 15:1-9) Na ini na ten disi a no de tra fasi.
10. Sortu lay, di furu sma ben tyari ben puru na prisiri fu den, èn fa wan sma sa firi en srefi efu den lay disi teki puru fu di a leri sabi na waarheid?
10 Na ondro na hebi lay fu kerkileri di no de tru kande yu ben libi na ini frede gi wan pina na ini wan hèlfaya ofu vagevuur baka te yu dede. Ofu na a dede fu wan lobi pikin yu ben firi leki yu de maskaderi di wan kerki leriman ben fruteri yu taki Gado ben teki yu lobi nyunyun pikin kon na en fu di a ben abi ete wan engel fanowdu — neleki Gado ben abi yu pikin moro tranga fanowdu leki yu srefi. Kerki leriman sontron e fruteri so srefi tu na sma di abi wan ofu tra siki taki disi de wan fluku fu Gado. A no de tru tru wan kowru-ati fu sabi den beybri waarheid di e fri wan sma fu den sortu kerki ley disi di de leki wan hebi? Fa disi e tyari wan firi kon fu frulekti! — Preykiman 9:5, 10; Eseykièl 18:4; Yohanes 9:2, 3.
11. (a) San na wan fu den moro bigi lay, èn fa disi kan puru poti na wan sey? (b) Sortu kowru-ati Yeyses ben tyari gi sonduman di ben de na grontapu?
11 Wan fu den moro bigi lay fu tyari de di fu na firi fu fowtu fu den sondu ede di wi ben du. A de wan frulekti fu sabi taki den sondu disi sa puru a pasi nanga na verdienste fu Krestes frulusu-ofrandi. ’Na brudu fu Yeyses e krin wi fu ala sondu’, na beybri e dyaranti wi (1 Yohanes 1:7). Awinsi sortu kofarlek sani tu di wi ben du kande, wi kan kisi frulekti nanga kowru-ati fu wan krin konsensi èn na dyaranti taki Gado no e prakseri moro langa, den sondu fu wi efu wi abi tru tru berow (Psalm 103:8-14; 1 Korente sma 6:9-11; Hebrew sma 10:21, 22). Fa Yeyses ben tyari kowru-ati gi den sma di ben go bukundun na ondro sondu, so leki huru ofu belastingman so leki Sakeyus ben de wan fu den! Yeyses ben trowstu den nanga beybri waarheid aladi a ben nyan nanga den. — Lukas 5:27-32; 7:36-50; 19:1-10.
12. (a) Na ini sortu muylek omstandigheid sma ben de di Yeyses ben tyari kowru-ati gi? (b) Na suma Yeyses ben sori na ini na fosi yarihondro tapu wan aparti fasi taki en „ben de na pasi èn na waarheid èn na libi”?
12 Furu tra sma e tyari na hebi lay fu siki seryusu depressiviteit nanga na dipi sari di e kon fu a dede fu wan sma di den ben lobi sote. Ma Yeyses ben tyari kowru-ati kon gi ala den sortu sma disi di ’ben naki den skin èn ben abi hebi lay’ (Mateyus 4:4; 11:23, 29). A ben dresi wan uma di 18 yari langa ben suku yepi na datra sondro fu ben feni yepi. Yeyses ben dresi so srefi tu wan man di 38 yari ben siki, èn wan trawan di ben koboru breni. Yu kan tyari kon na yu fesi o prisiri den ben de di Yeyses ben dresi den? (Lukas 13:10-17; Yohanes 5:5-9; 9:1-7) Ala den sma di na ini bribi ben kon na Yeyses ben kon na a fonten fu waarheid, tru kowru-ati nanga libi. Na a weduwe di ben kisi en wan enkri manpikin baka komoto fu dede èn na ppa nanga mma di a dede 12-yari umapikin fu den ben dray kon baka a libi, Yeyses ben buweysi seyker tapu wan wondrufasi taki en ben de „na pasi èn na waarheid èn na libi”. — Yohanes 14:6; 17:3; Lukas 7:11-17; 8:49-56.
13. Na suma wi musu go fu kisi yepi so leki Yeyses ben leri èn san e psa te wi e poti en ray na ini wi libi?
13 A no de fu taki taki yu abi ten di yu e kon tanapu na fesi problema di de moro bigi leki yu srefi man teki. Yeyses ben leri wi taki wi musu go na Yehovah fu kisi yepi, so leki en srefi ben du tu (Lukas 22:41-44; Hebrew 5:7). Efu alaten baka wi e go na Gado na ini begi, dan wi sa agri nanga den firi fu na psalm singiman di ben skrifi: „Blesi Yehovah, di ala dey e tyari na lay fu wi, na tru Gado fu wi frulusu” (Psalm 55:22; 68:19). Iya, te yu sabi na waarheid a e tyari tru tru kowru-ati kon. A e tyari wi kon moro krosibey na Yehovah èn a e yepi wi fu frustan taki a kan nanga na yepi fu en fu handri nanga na moro muyliki situwâsi na ini a libi nanga bun bakapisi.
Kisi kowru-ati nanga yepi fu na Kownukondrehowpu
14. San ben hori Yeyses tanapu na ini tesi, èn san, na a moro prenspari sani efu wi e wani feni kowru-ati gi wi sili?
14 Fu feni tru kowru-ati gi wi sili wi musu abi wan krakti howpu. Howpu ben hori Yeyses tanapu. Na beybri e taki: „Nanga na prisiri di ben poti na en fesi a ben frudrage wan pina-udu, ben wisiwasi syen, èn a ben go sdon na a reti-anu fu na kownusturu fu Gado” (Hebrew sma 12:2). Na prisiri howpu di ben hori baka gi Yeyses, ben de taki a ben sa du wan sani gi na kon santa fu en Ppa nen fu di a ben kibri en soyfri retifasi èn taki a ben sa sori taki a de warti fu tiri leki Kownu fu Gado kownukondre. Fu hori wan krin prenki fu wan howpu, kande leki wan konpe tiriman nanga Krestes na ini heymel, ofu leki wan fu en onderdaan tapu na paradeysi grontapu, sa hori baka so srefi tu gi wi na ini a diniwroko fu Gado. Iya, na howpu dati na wan tumusi prenspari sani fu feni kowru-ati gi ai sili. — Romen 12:12.
15. San na den fruwakti fu wi sondro na Kownukondrehowpu?
15 Luku pikinso san den fruwakti fu wi fu libi ben sa de sondro na Kownukondrehowpu. Wan aparti libimarki de soso 70 noso kande 80 yari. Èn fa den yari dati e hari psa esi-esi, so leki ibriwan sma di de kba tapu en yari, sa fruteri yu! Iya, na beybri e taki ini waarheid fu na libi: „Seyker a sa hari psa esi-esi, èn wi e frey gwe” (Psalm 90:10). Toku wi wani taki den dey fu wi kon moro langa. Wi wani libi. Someni sani de fu du èn fu nyanbun fu den.
16. San wi musu de fu feni kowru-ati gi wi sili?
16 Fa a de fu dati-ede tumusi prenspari taki wi e kon ini bribi na „Krestes Yeyses, wi howpu” (1 Timoteyus 1:1). A ben taki: „Disi na a wani fu mi Ppa, taki ibriwan sma di e si na Pikin èn e sori bribi na ini en, mag abi têgo libi” (Yohanes 6:40, 51). Wi e bribi dati? Fu feni kowru-ati gi wi sili, dan dati de seyker fanowdu. Wi no kan go a dorosey fu dati. Ija, wi musu weri „leki helm na howpu fu frulusu” (1 Tesalonika 5:8 teki gersi nanga Hebrew sma 6:19). Na howpu dati musu kibri wi yeye nanga wi denki. Noso wi sa go so bukundun na ondro lay nanga muylekheid taki wi sa stòp èn sa lasi têgo libi. Fu yu ondrofeni kowru-ati gi yu sili, dan yu musu hori seyker wan krakti Kownukondrehowpu tu.
Kowru-ati nanga a du fu a wroko fu Gado
17. (a) San de fanowdu fu ondrofeni kowru-ati èn fu san-ede disi no de tumusi furu gi wi? (b) San na teki fu Krestes ttyari wani taki?
17 Ma fu kisi kowru-ati moro de fanowdu leki soso fu kon na Yeyses. A ben taki moro fara: „Teki mi ttyari na unu tapu [ofu: „kon nanga mi ondro mi ttyari”] èn leri fu mi, bika mi abi safrifasi èn sakafasi fu ati, èn unu sa feni kowru-ati gi unu sili. Bika mi ttyari de safu èn mi lay de lekti” (Mateyus 11:29, 30, Nyun-Grontapu-vertaling, Stukabeybri, futuwortu). Teki wan ttyari wani taki wroko. Ma luku taki Yeyses no e aksi wi fu wi srefi teki na ttyari na wi tapu èn fu du ala wroko wi wwan. Na prakseri de taki wi e kon nanga en na ondro wan ttyari. Na ini disi a e wani taki a teki fu na ttyari di Yeyses e pristeri, taki wi e gi wi srefi abra na Gado èn e sori disi nanga na dopu na ini watra èn dan e teki na frantiwortu fu wan disipri fu Krestes na wi tapu. Ma fa so wan ttyari fu na de fu wan disipri kan tyari kowru-ati kon?
18. (a) Fu san-ede na tyari fu Krestes ttyari e tyari kowru-ati kon? (b) Fa na preykiwroko e gi wi prisiri nanga kowru-ati?
18 Teki na ttyari fu Krestes e tyari kowru-ati kon fu di Yeyses abi safrifasi èn sakafasi fu ati. Fu di a no de onreydelek, meki a de wan kowru-ati fu wroko nanga en na ondro a srefi ttyari. A e hori den skotu nanga swakifasi fu wi na ini prakseri. A ben taki: „Mi ttyari de safu.” A de tru taki na ttyari fu de wan disipri e tyari wroko kon nanga en, na srefi preyki nanga leriwroko di Yeyses ben du èn di a ben gi en fositen bakaman leri na ini (Mateyus 28:19, 20; Tori fu den apostru 1:8). Ma fa a de wan wroko di e gi kowru-ati fu fruteri trawan fu wi lobi Gado, en Manpikin nanga na kownukondre! Fa a de wan kowru-ati fu fruteri sma fa den kan libi fu têgo na ini wan Paradeysi! Èn te den e teki na tapu wan bun fasi na Kownukondreboskopu di kan gi libi èn e moksi den srefi na wi na ini a dini fu Yehovah Gado, o bigi dan na prisiri fu wi no e de! — 1 Timoteyus 4:16.
19. Fu san-ede na ray fu Moses wefippa de aparti gi gemeente owruman na ini na ten disi?
19 Na ini yari di no psa so langa ete milyun milyun sma ben kon na Yehovah organisâsi di abi yepi fanowdu fu teki Krestes ttyari, èn disi e meki na wroko kon moro bigi gi kownukondre preykiman nanga den sma di e wey den. Gi den sortu yeye herder disi na ray di na profeyti Moses ben kisi fu en wefippa, de tumusi moy. A ben gi Moses na ray disi: „A no bun so leki fa yu e du. Yu sa kon weri psa marki, yu nanga na pipri disi di de nanga yu, bika na afersi disi de wan tumusi bigi lay gi yu. Yu no man du en yu wwan.” A ben gi Moses so bun na ray fu teki tra koniman di ben kan abi so srefi wan prati na a wey fu na pipri. Na waka na baka na ray disi ben sori taki a ben tyari winimarki kon (Exodus 18:17-27). Na ini na ten disi na gi fu leri doronomo kan meki furu bekwaam man kon, „presenti na ini libisma”. di so srefi kan du na pisi fu den na ini a wey fu na ipi so taki den gemeente owruman no sa weri psa marki. — Efesiya sma 4:8, 16.
20. San Yeyses Krestes nanga en ppa e aksi fu wi?
20 Ala di Krestes ben gi deki-ati na den bakaman fu en fu span den srefi krakti, toku no en èn so srefi tu no en Ppa e aksi taki wan sma fu wi e du moro leki san de reydelek. Di na wan seyker okasi son sma ben suku fowtu tapu Mariya, na sisa fu Lasarus, fu san a ben du gi Yeyses, Yeyses ben strafu den nanga den wortu: „Libi en meki a du en sani. . . . A du san a ben kan” (Markus 14:6-8; Lukas 13:24). Èn dati na ala san den e fruwakti fu wi — fu du san wi kan. Den sortu kresten aktiviteit disi no de wan hebi ma wan kowru-ati. Fu san-ede? Fu di a e tyari now tru tru satisfaksi kon èn nanga dati na seyker howpu fu têgo blesi na ini a ten di e kon.
21. (a) San na a lekti lay fu Krestes, èn san e meki nofotron na preykiwroko muylek? (b) San musu de na fasti bosroyti fu wi, èn sortu seyker fruwakti wi abi dan?
21 A de tru taki Satan sa sorgu taki wi kisi frufolgu so leki wi patna ttyariman Yeyses tu ben kisi frufolgu (Yohanes 15:20; 2 Timoteyus 3:12). Ma prakseri taki a no de na lekti lay fu Krestes di wi e ondrofeni leki wan hebi. Na presi fu dati a de na gens fu Satan nanga en wrokosani di nofotron e meki a wroko fu wi so muylek. Krestes lay de soso ini a du fu den sani di Gado ben aksi, èn den sani disi no de wan hebi lay (1 Yohanes 5:3). Meki wi go fu dati-ede doro fu tan nanga Krestes ondro en ttyari, e span wi srefi na ini a preyki nanga leri wroko, precies so leki en srefi ben du dati tu. Te wi e du dati dan wi sa feni kowru-ati gi wi sili so leki a ben pramisi.
Fa yu ben sa piki?
◻ San de so leki Romen 8:22 e taki na situwâsi fu na libismafamiri?
◻ Tapu sortu fasi sabi fu na waarheid e tyari kowru-ati kon?
◻ Fu san-ede na Kownukondrehowpu de so wan sani di e tyari kowru-ati kon?
◻ San na a ttyari fu Yeyses èn fu san-ede a de safu?
◻ Na tyari fu sortu lay sa tyari kowru-ati kon?