„Teki mi tyatyari na un tapu”
1 Na ini wan grontapu di lai nanga problema èn nanga broko-ede, wi e kisi trutru frulekti fu di wi e teki a moi kari di Yesus e gi, fu teki a tyatyari fu en na wi tapu so taki wi kisi krakti baka (Mat. 11:29, 30). Te wi e teki a tyatyari na wi tapu fu tron wan disipel, dan wi abi fu du wan wroko di no makriki fu du, ma a wroko dati o gi wi krakti. A wroko disi abi fu du nanga a preiki di wi musu preiki a bun nyunsu fu a Kownukondre èn a yepi di wi musu yepi trawan, so taki den kan kisi krakti baka neleki wi di de na ondro a tyatyari fu Yesus di no hebi.—Mat. 24:14; 28:19, 20.
2 A diniwroko e gi wi krakti baka: Yesus no e aksi en bakaman fu teki a lai fu en na den tapu, aladi den e tyari den eigi lai kaba. A gi den a kari fu puru a hebi lai fu den na den tapu, èn na presi fu dati den o tyari a lai fu en di lekti. Wi no e firi brokosaka moro nanga den broko-ede fu a grontapu sistema disi pe nowan howpu no de. Boiti dati, wi no e gi ala wi krakti moro fu kon kisi gudu di kan lasi gowe (Luk. 21:34; 1 Tim. 6:17). Aladi wi abi furu fu du èn wi musu wroko fu man abi den sani di de fanowdu na ini na aladei libi, toku na anbegi fu Gado na a moro prenspari sani na ini wi libi (Mat. 6:33). Efu wi e tan hori na prakseri san na a moro prenspari sani na ini wi libi, dan a diniwroko no sa de wan hebi gi wi, ma a sa gi wi krakti baka.—Fil. 1:10.
3 A no de fu taki dati wi lobi fu taki fu sani di de prenspari gi wi (Luk. 6:45). Ala Kresten lobi Yehovah èn den trutru e warderi den blesi di a Kownukondre o tyari kon gi wi soleki fa Yehovah pramisi. Fu dati ede, wi e kisi trutru krakti baka te wi no e prakseri den broko-ede fu a libi te wi de na ini a diniwroko, èn te wi e taki fu a „bun nyunsu di abi fu du nanga bun sani” (Rom. 10:15). A no de fu taki dati, o moro wi e du wan sani, o moro bun wi o man du a sani dati, èn dati o meki wi abi moro prisiri. Fu dati ede, te wi e gi moro fu wi ten na ini a diniwroko, efu wi man du dati, dan dati sa gi wi moro krakti baka. Te sma e gi yesi na a boskopu fu wi, dan dati e gi wi trutru krakti baka (Tori. 15:3). Srefi te sma no wani arki a boskopu fu wi, noso te den e gens wi, toku a diniwroko sa gi wi krakti baka na yeye fasi, efu wi e hori na prakseri taki Yehovah e prisiri nanga a muiti di wi e du. Boiti dati, a blesi di a o gi wi kan meki taki wi kisi bun bakapisi te fu kaba.—Tori. 5:41; 1 Kor. 3:9.
4 Te wi e teki a kari fu Yesus, dan wi o abi a grani fu dini makandra nanga en leki Kotoigi fu Yehovah (Yes. 43:10; Openb. 1:5). Nowan tra sani de di kan gi wi so furu krakti baka, leki a sani dati!