„Mi tjatjari safoe èn mi lai lekti”
„Teki mi tjatjari na oen tapoe èn leri foe mi.” — MATEUS 11:29.
1, 2. (a) San joe ondrofeni na ini a libi foe joe di e tjari kowroe-ati gi joe? (b) San wan sma moesoe doe foe kisi a kowroe-ati di Jesus ben pramisi?
WAN kowroe wasi di teki na a kaba foe wan faja èn foktoe dei, noso wan boen neti-sribi baka wan langa waka di e weri skin — ai, dati e gi kowroe-ati srefisrefi! Na so a de te wan sma e poeroe wan hebi lai na en tapoe noso te wan sma kisi pardon foe sondoe nanga fowtoe (Odo 25:25; Tori foe den Apostel 3:19). A kowroe-ati di e kon foe den sortoe ondrofeni disi di e meki wi firi switi, e gi wi krakti baka, èn wi e kisi krakti foe kan doe moro.
2 Ala sma di e firi taki den abi hebi lai na den tapoe èn taki den weri, kan kon na Jesus, bikasi na dati Jesus ben pramisi den — kowroe-ati. Ma foe man feni a kowroe-ati dati di sma wani srefisrefi, dan wan sani de di wan sma moesoe wani foe doe. „Teki mi tjatjari na oen tapoe èn leri foe mi”, Jesus ben taki, „èn oenoe sa feni kowroe-ati gi oen sili” (Mateus 11:29). San na a tjatjari disi? Fa a e tjari kowroe-ati?
Wan safoe tjatjari
3. (a) Sortoe tjatjari den ben gebroiki na ini bijbel ten? (b) San tjatjari wani taki na agersifasi?
3 Jesus nanga den arkiman foe en ben sabi heri boen san na a tjatjari, bikasi den ben e libi na ini wan libimakandra pe den e doe gronwroko. Foeroetron, wan tjatjari na wan langa postoe di abi toe olo na ondrosei di fiti na den neki foe toe wroko meti, moro foeroe toe mankaw, foe poti den kon makandra foe hari wan ploegoe, wan pikin wagi, noso wan tra lai (1 Samuèl 6:7). Den ben gebroiki tjatjari gi libisma toe. Den tjatjari disi ben de gewoon postoe di den ben tjari na tapoe den skowroe nanga wan lai di fasi na ala toe sei foe a postoe. Nanga den tjatjari dati den wrokoman ben man foe tjari hebi lai (Jeremia 27:2; 28:10, 13). Foe di a abi foe doe nanga den lai èn nanga tranga wroko, meki den e gebroiki a tjatjari foeroetron na wan agersi fasi na ini bijbel, foe simbôliseer a tiri di wan sma e tiri na tapoe trawan noso a basi di wan sma e basi trawan. — Deuteronomium 28:48; 1 Kownoe 12:4; Tori foe den Apostel 15:10.
4. San a tjatjari e prenki, di Jesus e pristeri den wan di e kon na en?
4 San na a tjatjari dan, di Jesus ben kari den wan di wani kisi kowroe-ati, foe teki dati na den tapoe? Memre dati a ben taki: „Teki mi tjatjari na oen tapoe èn leri foe mi” (Mateus 11:29). Wan sma di e teki leri, na wan disipel. So boen, foe teki a tjatjari foe Jesus, wani taki eenvoudig foe tron en disipel (Filipisma 4:3). Ma disi e aksi moro leki nomo foe froestan den leri foe en. A e aksi taki wi moesoe handri akroederi nanga den — foe doe a wroko di Jesus ben doe èn foe libi na a fasi fa a ben libi (1 Korentesma 11:1; 1 Petrus 2:21). A e aksi taki wan sma moesoe de klariklari foe saka ensrefi na ondro en tirimakti èn na ondro den wan na soema a gi makti foe tiri (Efeisesma 5:21; Hebrewsma 13:17). A wani taki foe tron wan kresten di gi ensrefi abra na Gado èn di teki dopoe, èn di e teki ala den grani nanga den frantiwortoe di e kon nanga a gi di a gi ensrefi abra. Dati na a tjatjari di Jesus e pristeri gi ala sma di e kon na en foe kisi trowstoe nanga kowroe-ati. Joe de klariklari foe teki dati? — Johanes 8:31, 32.
5. Foe san ede a no ben sa de wan ondrofeni di takroe, foe teki a tjatjari foe Jesus?
5 A feni di wan sma e feni kowroe-ati te a teki wan tjatjari na en tapoe — dati a no sani di de kontrari makandra? Te joe loekoe en boen, dan a no de so, foe di Jesus ben taki dati en tjatjari „safoe”. A wortoe disi wani taki, switi, prisiri (Mateus 11:30; Lukas 5:39; Romesma 2:4; 1 Petrus 2:3). Foe di a ben de wan heri boen temreman, a ben kan de taki Jesus ben meki ploegoe nanga tjatjari, èn a ben sa sabi fa foe meki wan tjatjari di ben kan fiti boen foe ben kan doe foeroe wroko so makriki leki a kan. A ben kan poti wan pisi krosi noso leriboeba na ondrosei foe den tjatjari. Foeroe foe den e meki na a fasi dati, so taki a no sa griti toemoesi na tapoe a neki. Na a srefi fasi, na agersi tjatjari di Jesus e pristeri wi „safoe”. Ala di a de di wan sma de wan disipel foe en abi foe doe nanga son plekti nanga frantiwortoe, a no de wan ondrofeni di takroe noso wan sani di e kwinsi sma, ma wan ondrofeni di e gi kowroe-ati. Èn den komando foe en Hemel Tata, Jehovah, no de wan hebi lai toe. — Deuteronomium 30:11; 1 Johanes 5:3.
6. San Jesus ben sa wani taki di a ben taki: „Teki mi tjatjari na oen tapoe”?
6 Wan tra sani de di e meki taki a tjatjari foe Jesus „safoe” noso makriki foe tjari. Di a ben taki: „Teki mi tjatjari na oen tapoe”, dan a ben kan wani taki wán foe den toe sani. Efoe a ben abi a dobroe tjatjari na prakseri, dati na a tjatjari di e poti toe meti kon makandra foe hari a lai, dan a ben gi wi a kari foe kon na ondro a srefi tjatjari nanga en. Dati ben sa de wan blesi srefisrefi — foe abi Jesus na wi sei foe hari a lai foe wi makandra nanga wi! Na a tra sei, efoe Jesus ben abi a tjatjari na prakseri di wan gewoon man di e doe tranga wroko ben gebroiki, dan a ben pristeri wi a jepisani nanga jepi foe san wi kan meki ibri lai di wi moesoe tjari, moro makriki noso taki wi man tjari en. Awinsi sortoewan foe den a de, a tjatjari foe en na wan fonten foe troetroe kowroe-ati bikasi a e gi wi a djaranti: „Bikasi mi abi safoefasi èn sakafasi foe ati.”
7, 8. Sortoe fowtoe son sma e meki te den de nanga stress?
7 San wi moesoe doe dan efoe wi e firi taki a lai foe den problema na ini a libi di wi e tjari, e tron wan sani di wi no man teki moro èn taki a e wroko srefisrefi na tapoe wi senwe? Na wan fowtoe fasi son sma kan feni taki a tjatjari foe de wan disipel foe Jesus Krestes, tranga toemoesi noso e aksi toemoesi foeroe foe den, ala di a de den sorgoe foe na aladei libi di e poti hebi na den tapoe. Son sma di de na ini a situwâsi dati no e fisiti den kresten konmakandra moro, noso den no e teki prati moro na a diniwroko, foe di den e denki kande taki na a fasi disi den ben sa feni pikinso froelekti. Ma dati na wan serjoesoe fowtoe.
8 Wi e froestan taki a tjatjari di Jesus e pristeri „safoe”. Efoe wi no ben weri en na wan joisti fasi, dan a ben kan tanteri wi. Efoe dati de so, dan wi moesoe ondrosoekoe a tjatjari di de na tapoe wi skowroe. Efoe foe wan sani ede a tjatjari broko noso no e fiti boen, dan efoe wi e gebroiki en, dan a no sa aksi nomo moro moeiti foe wi sei, ma a sa abi pen leki bakapisi toe. Nanga tra wortoe, efoe a gersi leki theokrasia wroko e tron wan hebi lai gi wi, dan wi moesoe loekoe efoe wi e doe den na a joistifasi. San na a reide foe san ede wi e doe sani? Wi sreka nofo te wi e go na den konmakandra? Wi sreka na skinsei nanga na froestansei te wi e teki prati na a velddienst? Wi abi wan krosibei èn boen matifasi nanga tra sma na ini a gemeente? Èn moro prenspari, fa a persoonlijk matifasi de nanga Jehovah Gado èn nanga en Manpikin, Jesus Krestes?
9. Foe san ede a kresten tjatjari noiti no moesoe de wan hebi di kresten no man tjari?
9 Te wi e teki a tjatjari di Jesus e pristeri, nanga wi heri ati èn wi e leri fa foe tjari en na wan joisti fasi, dan noiti no wan reide de foe si dati leki wan hebi di wi no man tjari. A de so, taki efoe wi man si fa a situwâsi de — Jesus nanga wi na ondro a srefi tjatjari — dan a no moeilek gi wi foe si soema e tjari a moro bigi pisi foe a lai. A de a srefi leki te wan njofi pikin e hori na anoe foe en beibiwagi èn e prakseri taki na en e poesoe a wagi go na fesi, ma a no de foe taki, dati a de troetroe a papa noso mama di e doe dati. Leki wan lobi Tata, Jehovah Gado sabi heri boen den sani di e skotoe wi nanga den swakifasi foe wi, èn a e doe wan sani na tapoe den sani di wi abi fanowdoe, nanga jepi foe Jesus Krestes. „Gado sa sorgoe dorodoro gi ala den sani di oenoe abi fanowdoe, akroederi den goedoe foe en na ini glori nanga jepi foe Krestes Jesus”, Paulus ben taki. — Filipisma 4:19; teki gersi Jesaja 65:24.
10. San de na ondrofeni foe wan sma di teki a wroko foe en leki disipel na wan serjoesoe fasi?
10 Foeroe kresten di gi densrefi abra na Gado kon froestan disi nanga jepi foe den persoonlijk ondrofeni. Foe eksempre, Jenny e feni taki foe dini leki wan jepipionier ibri moen èn foe abi wan fasti grontapoe wroko di e poti foeroe druk na en tapoe, e poti en na ondro foeroe stress. Ma a e firi taki a pionierwroko e jepi en troetroe foe hori en balansi. A jepi di a e jepi sma foe leri a waarheid foe bijbel èn a si di a e si taki den e kenki den libi so taki Gado kan feni den boen — dati na san e gi en moro foeroe prisiri na ini en druk libi. Nanga en heri ati a e agri nanga den wortoe foe odo di e taki: „A blesi foe Jehovah — dati na san e meki sma goedoe èn a no e poti pen na tapoe.” — Odo 10:22.
Wan lekti lai
11, 12. San Jesus ben wani taki di a ben taki: „Mi lai lekti”?
11 Boiti taki Jesus ben pramisi wi wan „safoe” tjatjari, a ben gi wi a djaranti: „Mi lai lekti.” Wan „safoe” tjatjari e meki a wroko kon moro makriki kaba; efoe a lai lekti toe, dan a wroko de wan prisiri troetroe. San Jesus ben abi na prakseri dan nanga den wortoe dati?
12 Prakseri san wan gronman ben sa doe efoe a ben wani kenki a wroko foe den meti foe en. Kon meki wi taki, a e kenki a wroko foe ploegoe wan gron kon tron wan wroko pe a e hari wan pikin wagi. A gronman ben sa poeroe a ploegoe fosi èn dan a ben sa fasi a pikin wagi. A ben sa de wan don sani foe fasi a ploegoe makandra nanga a pikin wagi na den meti. Na so a de toe, Jesus no ben e taigi a pipel foe poti a lai foe en na tapoe foe a wan lai di den ben e tjari kaba. A ben taigi den disipel foe en: „No wan osoknekti kan de srafoe foe toe masra” (Lukas 16:13). So boen, Jesus ben poti a pipel na fesi wan bosroiti di den moesoe teki. Den ben sa go doro foe tjari a hebi lai di den ben abi, noso den ben sa saka a lai dati, èn e teki san Jesus ben e pristeri den? Jesus ben gi den a lobi deki-ati: „Mi lai lekti.”
13. Sortoe lai den sma na ini den dei foe Jesus ben e tjari, èn nanga sortoe bakapisi?
13 Na ini den dei foe Jesus, a pipel ben pina na ondro wan hebi lai di den Rome tiriman di ben dwengi den nanga tranga èn den hoigri relisi fesiman di ben hori densrefi steifi na den fasi foe doe sani, ben poti na den tapoe (Mateus 23:23). Son sma ben proeberi foe densrefi foe tjari wan kenki kon foe trowe a Rome tirimakti. Den ben kon abi foe doe nanga politik strei, soso foe kisi pori te foe kaba (Tori foe den Apostel 5:36, 37). Trawan ben wani nomonomo foe meki a situwâsi foe den kon moro boen, foe di den ben feti foeroe na baka materia sani (Mateus 19:21, 22; Lukas 14:18-20). Di Jesus ben pristeri den a fasi foe kisi froelekti, di a ben gi den a kari foe tron den disipel foe en, dan a no alamala foe den ben de klariklari foe teki dati. Den ben tweifri foe saka a lai di den ben e tjari, ala di a ben hebi, èn foe teki a lai foe Jesus (Lukas 9:59-62). A ben de wan fowtoe di ben tjari sari srefisrefi!
14. Fa den broko-ede foe a libi nanga den materia lostoe kan poti hebi lai na wi tapoe?
14 Efoe wi no e loekoe boen, wi kan meki a srefi fowtoe na ini a ten disi. Te wi e tron disipel foe Jesus, dan dati e fri wi foe feti na baka den srefi marki nanga warti sani di a pipel foe grontapoe e feti na baka. Ala di wi moesoe wroko tranga ete foe kisi den sani di wi abi ala dei fanowdoe, tokoe wi no e meki den sani disi teki a moro prenspari presi na ini wi libi. Ma tokoe den broko-ede foe a libi nanga a kori di materia sani e kori sma, kan abi wan tranga krakti na wi tapoe. Efoe wi e gi pasi foe dati, dan den lostoe dati kan tjokro a waarheid di wi teki nanga faja (Mateus 13:22). Wi kan abi so foeroe foe doe foe satisferi den sortoe lostoe disi, taki den kresten frantiwortoe foe wi kan tron plekti di e weri wi, èn di wi wani klari esi-esi. Wi no ben kan froewakti srefisrefi taki wi sa kisi kowroe-ati di sa kon foe a dini di wi e dini Gado nanga a fasi dati foe denki.
15. Sortoe warskow Jesus ben gi na ini a tori foe a lostoe gi materia sani?
15 Jesus ben sori taki wan libi foe tevredefasi, no e kon foe a feti di wi e feti foe satisferi ala den sani di wi wani, ma foe di wi kon sabi san na den moro prenspari sani na ini a libi. „Oenoe no moesoe broko oen ede nanga oen sili foe san oenoe sa njan noso san oenoe sa dringi, noso san oenoe sa weri na oen skin,” a ben froemane. „A no de so, taki a sili wani taki moro leki njanjan èn taki a skin de moro leki krosi?” Dan a ben poti prakseri na tapoe den fowroe foe hemel èn a ben taki: „Den no e sai, den no e koti, noso e tjari sani kon makandra na ini maksin; tokoe oen hemel Tata e gi den njanjan.” A ben taki foe den leili foe a sabana: „Den no e wroko tranga èn den no e meki krosi toe; ma mi e taigi oenoe taki srefi Salomo na ini ala en glori no ben weri so moi leki wán foe den disi.” — Mateus 6:25-29.
16. San ondrofeni sori foe den bakapisi foe a feti di sma e feti na baka materia sani?
16 Wi kan leri wan sani foe den eenvoudig praktis lès disi? A de so, taki o moro tranga wan sma e proeberi foe meki en ekonomia situwâsi kon moro boen na ini a libi, o moro a e kon fromoe na ini den sani di grontapoe e feti na baka èn o moro a lai na tapoe en skowroe e hebi. Grontapoe lai nanga bisnisman di abi osofamiri di broko, broko trow, takroe gosontoe nanga moro sani di e kon leki bakapisi foe a goedoe di den goedoe na materia-sei (Lukas 9:25; 1 Timoteus 6:9, 10). Wan man di ben wini wan Nobelprijs, Albert Einstein ben taki wan leisi: „Den goedoe di sma abi, a de di a de foe si taki sani e waka sma boen na skinfasi, a bekènti di sma bekènti, den kefalek diri libi di sma e libi — gi mi den sani disi de tegoe sani alaten. Mi e bribi taki wan eenvoudig fasi èn wan bescheiden fasi foe libi, moro boen gi ala sma.” Den wortoe disi e taki baka san na apostel Paulus ben gi leki wan eenvoudig rai: „A de wan jepisani foe kisi foeroe wini, a gi di sma e gi densrefi na ini a dini foe Gado makandra nanga a tevrede di sma tevrede nanga den sani di den abi.” — 1 Timoteus 6:6.
17. Sortoe fasi foe libi, bijbel e rikomanderi?
17 Wan prenspari sani de di wi no moesoe frigiti. Ala di „wan eenvoudig libi nanga wan bescheiden fasi foe libi” abi foeroe winimarki, tokoe dati wawan no e tjari tevredefasi. Foeroe sma de di e libi wan eenvoudig libi foe di den situwâsi foe den e dwengi den, ma den no tevrede noso kolokoe srefisrefi. Bijbel no e gi wi deki-ati taki wi no moesoe njan boen foe materia sani èn taki wi moesoe libi wan libi aparti foe a libimakandra. Krakti e poti na tapoe a gi di wan sma moesoe gi ensrefi na a dini foe Gado, no na tapoe a tevrede di wan sma tevrede nanga den sani di a abi. A de soso te wi e moksi den toe sani disi makandra taki wi e kisi a „jepisani foe kisi foeroe wini”. Sortoe wini? Moro fara na ini a srefi brifi dati, Paulus e sori taki den wan di „e poti den howpoe, no na tapoe goedoe di no de seiker, ma na tapoe Gado” sa „kibri wan toemoesi boen fondamenti gi a tamara foe den, so taki den kan hori steifi na a troetroe libi”. — 1 Timoteus 6:17-19.
18. (a) Fa wan sma kan feni troetroe kowroe-ati? (b) Fa wi moesoe si den kenki di wi moesoe tjari kande?
18 Wi sa kisi kowroe-ati efoe wi e leri foe saka a hebi lai foe wi di wi e tjari kande, èn teki a lekti lai di Jesus e pristeri wi. Foeroe sma di orga a libi foe den baka, so taki den kan abi wan moro boen prati na a Kownoekondre diniwroko, feni a pasi foe man libi wan kolokoe libi èn wan libi foe tevredefasi. A no de foe taki, dati a e aksi bribi nanga deki-ati foe wi foe doe so wan sani, èn kande problema de na pasi. Ma bijbel e froemane wi: „A sma di e loekoe a winti no sa sai siri; èn a sma di e loekoe den wolkoe no sa koti” (Preikiman 11:4). Foeroe sani no moeilek srefisrefi te wi teki a bosroiti kaba taki wi sa doe den. Ma a gersi taki a moro moeilek sani na foe teki a bosroiti san wi o doe. Wi kan weri wisrefi te wi e strei noso e kakafoetoe gi na idea foe teki a moeilek wroko. Efoe wi e tranga wi froestan èn e teki a tjalensi, dan wi ben sa kan froewondroe foe si sortoe blesi a e tjari. A psalm singiman ben gi a deki-ati: „Tesi èn si taki Jehovah boen, O pipel.” — Psalm 34:8; 1 Petrus 1:13.
„Kowroe-ati gi oen sili”
19. (a) San wi kan froewakti ala di den kondisi foe grontapoe e tan go na baka? (b) Te wi de na ondro a tjatjari foe Jesus, dan foe san wi kan de seiker?
19 Na apostel Paulus ben memre den fosi jarihondro disipel: „Wi moesoe go na ini a kownoekondre foe Gado pasa foeroe banawtoe” (Tori foe den Apostel 14:22). Dati e fiti gi a ten disi toe. Ala di den kondisi foe grontapoe e go na baka, a druk sa kon moro bigi na tapoe den sma di wani srefisrefi foe libi wan regtfardiki libi èn foe gi densrefi na a dini foe Gado (2 Timoteus 3:12; Openbaring 13:16, 17). Tokoe wi e firi a srefi fasi fa Paulus ben firi di a ben taki: „Na ala fasi den kwinsi wi, ma den no kwinsi wi taki wi no man boeweigi moro; wi no sabi san foe doe moro, ma no sondro wan boropasi; den froefolgoe wi, ma den no libi wi na baka sondro jepi; den trowe wi na gron, ma den no pori wi.” A reide na taki wi kan bow na tapoe Jesus Krestes foe gi wi a krakti di e pasa san de normaal (2 Korentesma 4:7-9). Te wi e teki nanga wi heri ati a tjatjari foe de wan disipel, dan wi kan njan boen foe a kontroe foe a pramisi foe Jesus: „Oenoe sa feni kowroe-ati gi oen sili.” — Mateus 11:29.
Joe kan froeklari disi?
◻ San na a safoe tjatjari di Jesus ben pristeri?
◻ San wi moesoe doe efoe wi e feni taki a tjatjari foe wi e kon tron wan hebi lai?
◻ San Jesus ben wani taki di a ben taki: „Mi lai lekti”?
◻ Fa wi kan sorgoe taki a lai foe wi e tan lekti?