Tan na ini a „loweman foto” èn tan na libi!
„Teleki a hei-priester dede, a moesoe tan na a loweman foto foe en.” — NUMERI 35:28.
1. Soema na a Sma di e teki refensi gi broedoe, èn sortoe sani a sa doe heri esi?
JEHOVAH en Sma di e teki refensi gi broedoe, Jesus Krestes, de srekasreka foe feti. Nanga den legre foe engel foe en, esi-esi a Sma disi di e teki refensi, sa doe wan sani teige ala den sma di abi broedoe paiman èn di no wani abi berow foe dati. Ija, Jesus sa dini leki a Sma di Gado sa gebroiki foe tjari kroetoestrafoe kon na ini a „bigi banawtoe” di e kon gawgaw moro krosibei (Mateus 24:21, 22; Jesaja 26:21). Na a ten dati, a libisma famiri no sa man lowe gi a bakapisi foe a broedoe paiman di den abi.
2. San na a wan-enkri troetroe kibripresi, èn sortoe aksi moesoe kisi piki?
2 A wan-enkri fasi fa wan sma kan kisi kibri, na foe go tapoe a pasi di e go na a sani di gersi a loweman foto èn lon gi en libi! Efoe wan loweman kisi primisi foe kon na a foto, dan a sa moesoe tan drape, bika dati de a wan-enkri troetroe kibripresi. Ma joe kan aksi joesrefi: ’Sensi moro foeroe foe wi noiti no kiri wan sma, dan wi abi broedoe paiman troetroe? Foe san ede Jesus na a Sma di e teki refensi gi broedoe? San na a loweman foto nojaso? Wan sma kan gowe libi a foto disi sondro foe lasi en libi?’
Troetroe wi abi broedoe paiman?
3. Sortoe sani di skrifi na ini a Wet foe Moses sa jepi wi foe si taki den miljardmiljard sma na grontapoe makandra abi broedoe paiman?
3 Wan sani di skrifi na ini a Wet foe Moses sa jepi wi foe si taki den miljardmiljard sma na grontapoe abi broedoe paiman. Gado ben poti na tapoe den Israèlsma wan broedoe paiman, di den alamala ben abi makandra a frantiwortoe gi. Efoe den ben feni wan sma di dede èn den no ben sabi soema kiri en, dan den kroetoeman ben moesoe marki o fara a ben de foe den foto lontoe en, foe si sortoe wan ben de a moro krosibei foto. Foe poeroe a fowtoe, den owroeman foe a foto dati di ben abi broedoe paiman, ben moesoe broko a neki foe wan jongoe kaw di no wroko ete èn dati den ben moesoe doe na wan lagi libakontren pe sma no ben kweki sani ete. Disi den ben doe na fesi foe den Leifi priester ’bikasi Jehovah ben froekisi den foe seti hari-taki di abi foe doe nanga ogridoe’. Den owroeman foe a foto ben wasi den anoe na tapoesei foe a kaw èn den ben taki: „Na anoe foe wi no ben trowe a broedoe disi, èn so srefi wi ai no ben si sma trowe a broedoe disi. No meki joe pipel Israèl, di joe ben loesoe, o Jehovah, tjari a frantiwortoe èn no poti a fowtoe gi a broedoe foe wan sma di no ben abi fowtoe, na tapoe joe pipel Israèl” (Deuteronomium 21:1-9). Jehovah Gado no ben wani taki a kondre foe Israèl ben kon doti nanga broedoe noso taki a pipel foe en makandra moesoe ben abi fowtoe foe broedoe paiman.
4. Sortoe tori foe broedoe paiman, Babilon a Bigiwan abi?
4 Ija, so wan sortoe sani de leki foe alamala abi broedoe paiman makandra. Prakseri foe a foeroe broedoe paiman di de tapoe Babilon a Bigiwan, a grontapoemakti foe falsi relisi. We, a droengoe nanga a broedoe foe den foetoeboi foe Jehovah! (Openbaring 17:5, 6; 18:24) Den relisi foe krestenhèit e taki dati den e waka baka a Kownoe foe Vrede, ma orlokoe, relisi kroetoebangi, nanga den kruistocht pe den ben kiri foeroe sma, meki taki a abi broedoe paiman na fesi foe Gado (Jesaja 9:6; Jeremia 2:34). Foe taki en leti, en moesoe tjari a moro bigi frantiwortoe gi den miljoenmiljoen sma di dede na ini den toe grontapoefeti na ini a jarihondro disi. Foe dati ede, den bakaman foe falsi relisi èn so srefi den sma di e horibaka gi en èn den sma di e teki prati na den feti foe libisma, abi broedoe paiman na fesi foe Gado.
5. Fa son sma ben de neleki a kiriman di no ben kiri foe espresi na Israèl?
5 Son sma meki taki trawan dede foe di den ben wani taki den dede, noso foe di den no ben e loekoe boen. Trawan abi wan prati makandra na ini a kiri foe trawan, kande foe di den relisi fesiman ben gi den na overtoigi taki disi na san Gado ben wani. Tra sma froefolgoe èn kiri den foetoeboi foe Gado toe. Srefi efoe wi no doe den sani disi, tokoe wi alamala abi a frantiwortoe gi a lasi di libisma lasi den libi foe di wi no ben sabi a wet foe Gado èn a wani foe en. Wi de neleki a kiriman di no ben kiri foe espresi ’di ben kiri a sma na en sei sondro taki a sabi dati èn di no ben de wan sma di no ben wani si a sma na en sei na ai bifo dati’ (Deuteronomium 19:4). Den sortoe sma disi sa moesoe begi Gado tranga foe a sori den sari-atifasi èn den moesoe lon go na a sani di gersi a loweman foto. Noso, den sa lasi den libi te den sa toeka nanga a Sma di e teki refensi gi broedoe.
Den toemoesi prenspari ròl foe Jesus
6. Foe san ede wi kan taki dati Jesus na a moro krosibei famiri foe a heri libisma?
6 Na Israèl, a sma di ben teki refensi gi broedoe ben de a man di ben de a moro krosibei famiri foe a sma di den ben kiri. Foe teki refensi gi ala den sma di dede na grontapoe, spesroetoe den foetoeboi foe Jehovah di sma kiri, e meki taki a Sma di e teki refensi gi broedoe na ini a ten disi ben sa moesoe de wan man di de a moro krosibei famiri foe a heri libisma famiri. A ròl dati ben fiti Jesus Krestes. A ben gebore leki wan volmaakti libisma. Jesus ben gi en libi foe dede sondro sondoe leki wan froeloesoe ofrandi, èn baka di a opo baka èn go na hemel, a ben pristeri a waarde foe en libi na Gado gi a boen foe ala den sondoe bakapikin foe Adam. Na so Krestes ben tron a Froeloesoeman foe a libisma famiri, a moro krosibei famiri foe wi — a Sma di abi ala reti foe teki refensi gi broedoe (Romesma 5:12; 6:23; Hebrewsma 10:12). Sma e kon sabi Jesus leki wan brada foe den sma di salfoe èn di e waka na ini den foetoestap foe en (Mateus 25:40, 45; Hebrewsma 2:11-17). Leki Kownoe na hemel, en e tron a „Têgo Tata” foe den sma di sa kisi winimarki foe a slakti-ofrandi foe en leki a pipel foe en na grontapoe. Den sma disi sa libi foe têgo (Jesaja 9:6, 7). So boen, a fiti taki Jehovah poti a moro krosibei Famiriman disi foe a libisma famiri leki a Sma di e teki refensi gi broedoe.
7. Leki a bigi Hei-priester, san Jesus e doe gi libisma?
7 So srefi Jesus na wan Hei-priester di no abi sondoe, di kisi tesi, èn di de nanga switifasi (Hebrewsma 4:15). Na a fasi dati, Jesus e fiti a waarde foe a verzoen-ofrandi foe en na a libisma famiri. Den loweman foto ben seti „gi den manpikin foe Israèl èn gi den freimde sma di e tan drape èn gi den sma di e kon foe tan na den mindri” (Numeri 35:15). So boen, a bigi Hei-priester ben fiti a waarde foe en slakti-ofrandi fosi tapoe den salfoe foetoeboi foe en, „den manpikin foe Israèl”. Nownow a e fiti en tapoe den ’freimde sma di e tan drape’ èn ’den sma di e kon foe tan na den mindri’ na ini a sani di gersi a loweman foto. Den „tra skapoe” disi foe a Masra Jesus Krestes, e howpoe taki den sa libi foe têgo na grontapoe. — Johanes 10:16; Psalm 37:29, 34.
A loweman foto na ini a ten disi
8. San na a sani di gersi a loweman foto?
8 San na a sani di gersi a loweman foto? A no de wan troetroe presi soleki Hebron, wán foe den siksi Leifi loweman foto èn na oso foe a hei-priester foe Israèl. A loweman foto na ini a ten disi na a sani di Gado seti foe kibri wi foe dede foe di wi e pasa a komando foe en di e sori taki broedoe na wan santa sani (Genesis 9:6). Efoe a e doe en foe espresi noso no foe espresi, dan ibri sma di e pasa a komando dati moesoe soekoe pardon na Gado èn soekoe taki Gado poeroe en sondoe nanga jepi foe bribi na ini a broedoe foe a Hei-priester, Jesus Krestes. Den salfoe kresten di abi a howpoe foe go na hemel èn a „bigi ipi” di abi a howpoe foe tan djaso na grontapoe, meki gebroiki foe den winimarki di e kon foe a slakti-ofrandi foe Jesus di e verzoen sondoe èn den de na ini a sani di gersi a loweman foto. — Openbaring 7:9, 14; 1 Johanes 1:7; 2:1, 2.
9. Fa Saulus foe Tarsus ben pasa a komando foe broedoe foe Gado, ma fa a ben sori taki a kenki en libi?
9 Bifo a ben tron wan kresten, na apostel Paulus ben pasa a komando foe broedoe. Leki Saulus foe Tarsus, a ben froefolgoe den bakaman foe Jesus èn so srefi a ben feni en boen taki trawan kiri den. „Tokoe”, na so Paulus ben taki, „den ben sori mi sari-atifasi, bikasi mi no ben sabi sani èn mi ben doe den sani dati foe di mi no ben abi bribi” (1 Timoteus 1:13; Tori foe den Apostel 9:1-19). Saulus ben de wan sma di ben sori berow, èn baka ten a ben boeweisi dati nanga foeroe wroko foe bribi. Ma moro leki bribi nomo na ini a froeloesoe paiman de fanowdoe foe wan sma kan go na ini a sani di gersi a loweman foto.
10. Fa wan sma kan kisi wan boen konsensi, èn san a moesoe doe foe tan abi wan boen konsensi?
10 Wan kiriman di no ben kiri foe espresi, ben kan tan na ini wan foe den loweman foto na Israèl, soso efoe a ben kan boeweisi taki a ben abi wan boen konsensi na fesi foe Gado na ini a tori foe a trowe foe broedoe. Foe kan kisi wan boen konsensi, wi moesoe oefen bribi na ini a slakti-ofrandi foe Jesus, abi berow foe den sondoe foe wi, èn kenki a fasi fa wi e libi. Wi moesoe aksi wan boen konsensi foe di wi e gi wisrefi abra na Gado nanga jepi foe Krestes na ini begi, e simboliseer disi nanga dopoe na ini watra (1 Petrus 3:20, 21). A boen konsensi disi e jepi wi foe kisi wan krin matifasi nanga Jehovah. A wan-enkri fasi foe tan hori wan boen konsensi na foe doe den sani di Gado e aksi foe wi èn foe doe a wroko di wi kisi foe doe na ini a sani di gersi a loweman foto, neleki fa den loweman na ini den loweman foto foe fositen ben moesoe gi jesi na den Wet èn ben moesoe doe a wroko di den ben kisi foe doe. A moro prenspari wroko gi a pipel foe Jehovah nojaso, na foe meki a Kownoekondre boskopoe bekènti (Mateus 24:14; 28:19, 20). Efoe wi e doe a wroko dati, dan dati sa jepi wi foe de sma di den kan gebroiki na ini a loweman foto na ini a ten disi.
11. Gi san wi moesoe wai pasi efoe wi wani tan kisi kibri na ini a loweman foto nojaso?
11 Efoe wi e gowe libi a loweman foto na ini a ten disi, dan wi kan kisi pori, bika heri esi a Sma di e teki refensi gi broedoe sa handri teige ala sma di abi broedoe paiman. Disi a no a ten foe den kisi wi dorosei foe a foto disi di e gi wi kibri noso foe den kisi wi na wan kontren pe kefar de èn di de krosibei foe a lanki foe den weigron foe a foto. Wi ben sa feni wisrefi dorosei foe a sani di gersi a loweman foto, efoe wi ben lasi bribi na ini a verzoen-ofrandi foe a Hei-priester (Hebrewsma 2:1; 6:4-6). So srefi, wi ben sa de na ini kefar efoe wi ben teki den fasi foe grontapoe abra, efoe wi no abi foe doe dorodoro nanga na organisâsi foe Jehovah, noso efoe wi e gowe libi den regtfardiki markitiki foe wi hemel Tata. — 1 Korentesma 4:4.
Kon fri foe a loweman foto
12. O langa, sma di ben abi broedoe paiman fosi, ben moesoe tan na a foto di gersi a loweman foto?
12 Wan kiriman di no ben kiri foe espresi na Israèl, ben moesoe tan na wan loweman foto „teleki a hei-priester dede” (Numeri 35:28). So boen, o langa sma di ben abi broedoe paiman fosi moesoe tan na ini a sani di gersi a loweman foto? Teleki den no abi den diniwroko foe a Hei-priester, Jesus Krestes, moro fanowdoe. „A man foe froeloesoe den wan krinkrin di e kon na Gado nanga jepi foe en”, na so Paulus ben taki (Hebrewsma 7:25). So langa leki iniwan sortoe foe broedoe paiman e go nanga langa, na so langa den diniwroko foe a Hei-priester de fanowdoe, so taki onvolmaakti libisma kan tanapoe nanga reti bifo Gado.
13. Soema na den „manpikin foe Israèl” nownowde, èn o langa den moesoe tan na ini a „loweman foto”?
13 Memre taki den loweman foto foe owroeten, ben de foto di seti gi „den manpikin foe Israèl”, den freimde sma di ben tan drape, nanga tra sma di ben kon foe tan na den mindri. „Den manpikin foe Israèl”, na Israèlsma na jejefasi (Galasiasma 6:16). Den moesoe tan na ini a sani di gersi a loweman foto, so langa den de na grontapoe ete. Foe san ede? Bikasi den de ete na ini na onvolmaakti skin èn foe dati ede den abi a waarde foe a verzoen-ofrandi foe a hemel Hei-priester foe den, fanowdoe. Ma te den salfoe kresten disi dede èn e kisi wan opobaka foe libi leki jeje na hemel, dan den no abi den diniwroko foe a verzoen-ofrandi foe a Hei-priester moro langa fanowdoe; den sa gowe libi a libisma skin foe têgo èn den no sa de moro langa libisma di abi broedoe paiman. Gi den salfoewan disi di kisi wan opobaka, a Hei-priester sa dede kaba foe verzoen èn foe kibri den.
14. Sortoe tra sani e meki taki den sma di abi a howpoe foe libi na hemel, moesoe tan na ini a loweman foto nojaso?
14 Na abi di den abi libismafasi, e meki taki den wan di sa de „erfgenaam makandra nanga Krestes” na hemel, moesoe tan na ini a sani di gersi a loweman foto teleki den kaba a libi foe den na grontapoe na ini dede na wan getrowfasi. Te den dede, den sa òfer a libismafasi foe den, foe têgo (Romesma 8:17; Openbaring 2:10). Jesus en ofrandi e fiti soso gi den sma di abi libismafasi. Foe dati ede, a Hei-priester e dede gi den wan di de foe na Israèl na jejefasi te den e kisi wan opobaka leki jeje mekisani di sa tan libi foe têgo na hemel leki „sma di abi prati na ini a natoeroe foe Gado”. — 2 Petrus 1:4.
15. Soema na den ’freimde sma di e tan drape’ nanga ’den tra sma di e kon foe tan na den mindri’ nownowde, èn san a bigi Hei-priester sa doe gi den?
15 O ten a Hei-priester sa „dede” gi den disiten ’freimde sma di e tan drape’ nanga ’den tra sma di e kon foe tan na oen mindri’, e gi den na okasi foe libi a sani di gersi a loweman foto? Den sma disi foe a bigi ipi no kan komoto wantewante na a loweman foto baka a bigi banawtoe. Foe san ede dati no kan? Foe di den sa de ete na ini na onvolmaakti sondoe skin foe den èn den sa abi foe tan kisi kibri foe a Hei-priester. Foe di den e meki gebroiki foe den diniwroko foe En foe verzoen, na ini a pisiten te a sa de kownoe nanga priester gi doesoen jari langa, dati meki den sa tron volmaakti libisma. Baka dati, Jesus sa pristeri den na Gado gi wan lasti tesi di sa moesoe sori srefisrefi foe têgo fa a de nanga a soifri retifasi foe den, foe di Satan nanga den ogri jeje foe en, sa kon fri gi wan pisiten. Foe di den sa pasa a tesi disi bikasi Gado feni den boen, dati meki Jehovah sa froeklari den regtfardiki. Na so den sa tron troetroe volmaakti libisma. — 1 Korentesma 15:28; Openbaring 20:7-10.a
16. O ten den sma di e pasa a bigi banawtoe libilibi, no sa abi den diniwroko foe verzoen foe a Hei-priester, moro langa fanowdoe?
16 So boen, dan, den sma di sa pasa a bigi banawtoe libilibi, sa moesoe tan abi wan boen konsensi foe di den e tan na ini a sani di gersi a loweman foto te na a kaba foe Krestes en doesoen jari tiri. Leki libisma di kon volmaakti, a no sa de fanowdoe moro taki a Hei-priester e doe diniwroko foe verzoen èn den sa komoto na ondro a kibri foe En. Dan, Jesus sa dede gi den leki Hei-priester, foe di a no sa abi foe handri moro langa gi a boen foe den nanga jepi foe a krin broedoe foe na ofrandi foe en. Na a ten dati, den sa libi a sani di gersi a loweman foto.
17. Foe san ede a no sa de fanowdoe gi den sma di opo baka na ini a pisiten foe Krestes en doesoen jari tiri foe den go na ini a sani di gersi a loweman foto èn foe den tan drape?
17 Den sma di sa kisi wan opobaka na ondro Jesus en doesoen jari tiri, sa moesoe go na ini a sani di gersi a loweman foto èn tan drape teleki a hei-priester dede? Nôno, bikasi foe di den dede, dati meki den ben pai a strafoe gi den sondoefasi foe den kaba (Romesma 6:7; Hebrewsma 9:27). Tokoe, a Hei-priester sa jepi den foe doro volmaaktifasi. Efoe den pasa a lasti tesi baka a doesoen jari tiri boenboen, dan so srefi Gado sa froeklari den regtfardiki nanga a djaranti taki den sa libi foe têgo na grontapoe. A no de foe taki, dati efoe den no e doe den sani di Gado e aksi foe den, dan ibri libisma di no pasa a lasti tesi èn di no hori en soifri retifasi, sa kisi kroetoe foe Gado èn den sa kisi pori toe.
18. Na ini a tori foe a de di Jesus de kownoe nanga priester, san sa tan foe têgo nanga a libisma famiri?
18 Te foe kaba, den hei-priester na Israèl ben dede. Ma Jesus „kon tron wan hei-priester kroederi a fasi foe Melkisedek foe têgo” (Hebrewsma 6:19, 20; 7:3). So boen, a kaba di Jesus e kaba foe dini leki Hei-priester gi a libisma famiri, no e kaba a libi foe en. Den boen bakapisi foe a diniwroko foe en leki Kownoe èn leki Hei-priester sa tan nanga a libisma famiri foe têgo, èn libisma sa de nanga tangi foe têgo gi En, foe di a ben dini na den fasi disi. Boiti dati, foe têgo, Jesus sa teki fesi na ini a soifri anbegi foe Jehovah. — Filipisma 2:5-11.
Warti lès gi wi
19. Sortoe lès wi kan leri na ini a tori foe lobi nanga a si di sma no wani si trawan na ai efoe wi e loekoe a sani di seti na ini a tori foe den loweman foto?
19 Wi kan leri difrenti sortoe lès foe a seti foe den loweman foto. Foe eksempre, no wan enkri kiriman di no ben wani si a sma di a kiri na ai èn ben wani kiri en troetroe, ben kisi na okasi foe tan na a loweman foto (Numeri 35:20, 21). So boen, dan fa ibriwan sma di de na ini a sani di gersi a loweman foto, kan gi pasi taki a wani di a no wani si en brada na ai kan gro na ini en ati? „Ibriwan sma di no wani si en brada na ai, na wan kiriman,” na so na apostel Johanes ben skrifi, „èn oenoe sabi taki no wan kiriman abi têgo libi inisei foe en.” Foe dati ede, meki wi „go doro foe lobi makandra, bikasi lobi e kon foe Gado”. — 1 Johanes 3:15; 4:7.
20. Foe kan kisi kibri foe a Sma di e teki refensi gi broedoe, san den sma di de na ini a sani di gersi a loweman foto moesoe doe?
20 Foe kan kisi kibri foe a sma di e teki refensi gi broedoe, dan den kiriman di no ben kiri foe espresi, ben moesoe tan na a loweman foto èn no koiri go pasa a lanki foe den weigron. Fa a de nanga den sma di de na ini a sani di gersi a loweman foto? Foe kan kisi kibri foe a bigi Sma di e teki refensi gi broedoe, den no moesoe gowe libi a foto. Foe troe, den moesoe tan na ai gi sani di kan kori den èn di e hari den foe go na a lanki foe den weigron, foe taki en so. Den moesoe loekoe boen taki lobi gi Satan en grontapoe no gro kon na ini na ati foe den. Disi kan meki taki den sa abi foe begi èn meki moeiti, ma a libi foe den e anga foe dati. — 1 Johanes 2:15-17; 5:19.
21. Sortoe prisiri wroko di e gi satisfaksi, den sma e doe di de na ini a loweman foto nojaso?
21 Den kiriman di no ben kiri foe espresi di ben tan na den fositen loweman foto, ben moesoe de wrokoman di e doe boen wroko. So srefi toe, den salfoe „manpikin foe Israèl” gi wan moi eksempre leki sma di e doe a kotiwroko boen èn sma di e meki a Kownoekondre bekènti (Mateus 9:37, 38; Markus 13:10). Leki ’freimde sma di drape’ nanga ’tra sma di e kon foe tan na den mindri’ na ini a loweman foto nojaso, kresten di abi a howpoe foe libi na grontapoe, abi a grani foe doe a wroko disi di e kibri sma libi, makandra nanga den salfoe wan di de na grontapoe ete. Èn fa disi na wan prisiri wroko di e gi satisfaksi! Den sma di e wroko getrow na ini a sani di gersi a loweman foto, sa lowe komoto foe têgo dede foe na anoe foe a Sma di e teki refensi gi broedoe. Na presi foe dati, den sa kisi winimarki foe têgo foe En diniwroko leki Gado en bigi Hei-priester. Joe sa tan na ini a loweman foto èn libi foe têgo?
[Foetoewortoe]
Fa joe ben sa piki?
◻ Foe san ede wi kan taki dati den miljardmiljard sma na grontapoe abi broedoe paiman?
◻ Sortoe ròl Jesus Krestes abi na ini a tori foe a libisma famiri?
◻ San na a sani di gersi a loweman foto, èn fa wan sma e kon na ini en?
◻ O ten sma sa kon fri foe a sani di gersi a loweman foto?
◻ Sortoe warti lès wi kan leri foe a seti di den loweman foto seti?
[Prenki na tapoe bladzijde 27]
Joe sabi sortoe prenspari ròl Jesus Krestes abi?