Jehovah e gi krakti na a wan di weri
„Den wan di e howpoe tapoe Jehovah, sa kisi njoen krakti baka. Den sa opo go na loktoe nanga den frei neleki di foe wan aka.” — JESAJA 40:31.
1, 2. San Jehovah e gi den sma di e froetrow tapoe en, èn tapoe san wi sa poti prakseri now?
AKA de na mindri den fowroe di de den moro tranga fowroe di e frei na loktoe. Den kan frei boen fara sondro taki den e naki nanga den frei srefi. Nanga den frei di kan bradi sowan toe meter, „a Kownoe foe den Fowroe”, a gowtoe aka, na „wan foe den aka di e naki na ati foe sma moro leki ala den tra aka; te a e opo go na loktoe abra den bergi nanga den gron, [a] e frei hei gi foeroe joeroe langa abra den bergi, dan a e go moro hei e frei na wan spiraal fasi teleki joe e si soso wan doengroe penti na ini a loktoe”. — The Audubon Society Encyclopedia of North American Birds.
2 Jesaja ben prakseri foe a frei di den aka man frei, di a ben skrifi: „[Jehovah] e gi krakti na a wan di weri; èn a sma di de sondro dinamis krakti, a e gi krakti srefisrefi pasa marki. Den boi sa kon weri èn den sa kon swaki, èn den jonkoeman sa naki foetoe troetroe, ma den wan di e howpoe tapoe Jehovah, sa kisi njoen krakti baka. Den sa opo go na loktoe nanga den frei neleki di foe wan aka. Den sa lon èn den no sa kon swaki; den sa waka èn den no sa kon weri” (Jesaja 40:29-31). Fa a e gi wan sma trowstoe foe sabi taki Jehovah e gi den wan di e froetrow tapoe en, a krakti di den abi fanowdoe foe go doro, neleki A e gi den sma frei foe wan aka di, leki fa a gersi, no e kon weri! Now, poti prakseri tapoe wan toe foe den sani di a seti gi den sma di weri foe den kan kisi krakti baka.
A krakti foe begi
3, 4. (a) Jesus ben gi den disipel foe en tranga foe doe san? (b) San wi kan froewakti foe Jehovah te wi e begi en?
3 Jesus ben gi den disipel foe en tranga foe den „begi ala ten èn noiti no tapoe nanga dati” (Lukas 18:1). A de so, taki te wi e taigi Jehovah san de tapoe wi ati, dan dati sa jepi wi troetroe foe kisi krakti baka èn foe wai pasi gi a firi di wi e firi foe tapoe te a druk foe a libi gersi wan toemoesi hebi sani? Ija dati de so, ma wan toe sani de di wi moesoe hori na prakseri.
4 Wi moesoe denki boen sortoe piki wi kan froewakti foe Jehovah tapoe den begi foe wi. Wan kresten oema di ben kon depressief srefisrefi, ben taki baka ten: „Neleki fa a de nanga tra siki, Jehovah no e doe wondroe nojaso. Ma a e jepi wi troetroe foe kakafoetoe gi a siki èn foe kon gosontoe baka so fara leki dati kan na ini a sistema disi.” A ben tjari kon na krin foe san ede begi ben de wan bigi jepi, di a ben taki: „Mi ben kan kisi Jehovah en santa jeje 24-joeroe-foe-wán-dei.” So boen, Jehovah no e kibri wi gi den druk foe a libi di kan tron wan hebi gi wi, ma a e „gi santa jeje na a sma di e aksi en foe dati”! (Lukas 11:13; Psalm 88:1-3) A jeje dati kan meki wi doro ala san de fanowdoe foe pasa iniwan sortoe tesi noso druk di kan miti wi (1 Korentesma 10:13). Efoe a de fanowdoe, a kan gi wi „krakti di e pasa den sani di de normaal” foe horidoro teleki Gado Kownoekondre poeroe ala den problema di e meki sma lasi-ati, na ini a njoen grontapoe di de so krosibei. — 2 Korentesma 4:7.
5. (a) Foe meki den begi foe wi abi boen bakapisi, dan sortoe toe sani de toemoesi prenspari? (b) Fa wi kan begi te wi e feti nanga wan swakifasi foe a skin? (c) Te wi e horidoro na ini begi èn taki spesroetoe toe san wi wani, dan san dati sa sori Jehovah?
5 Efoe wi wani taki den begi foe wi abi boen bakapisi, dan wi moesoe horidoro, èn wi moesoe taki spesroetoe san na a problema èn san wi wani (Romesma 12:12). Foe eksempre, efoe joe e kon weri son ten foe di joe e feti nanga wan swakifasi foe a skin, dan na a bigin foe ibri dei, begi Jehovah tranga foe jepi joe wai pasi gi a man di joe no man tapoe nanga a spesroetoe swakifasi dati na ini a dei. Na a srefi fasi, joe moesoe begi toe a heri dei èn bifo joe e go sribi ibri neti. Efoe a swakifasi kon baka, dan begi Jehovah pardon, ma so srefi taki nanga En foe a sani di meki joe fadon baka na ini a swakifasi èn san joe kan doe foe wai pasi gi den sani dati na ini a ten di e kon. Te joe e horidoro na ini begi na so wan fasi èn te joe de spesroetoe toe na ini den sani di joe e taki, dan dati sa sori a „Jereman foe begi” taki joe de opregti na ini a wani di joe wani wini a feti. — Psalm 65:2; Lukas 11:5-13.
6. Foe san ede wi abi leti foe froewakti taki Jehovah sa arki wi begi srefi te wi e firi taki kande wi no warti foe begi?
6 Tokoe, son tron den wan di kon weri, kan firi taki den no warti moro foe begi. Wan kresten oema di ben firi so wan fasi, ben taki baka ten: „Dati na wan toemoesi kefarlek fasi foe denki, bika dati wani taki dati wisrefi wani kroetoe wisrefi, ma a kroetoe dati no de gi wi.” Foe troe, „Gado ensrefi na a Kroetoeman” (Psalm 50:6). Bijbel e gi wi a djaranti taki, ala di „wi ati kan kroetoe wi . . . , tokoe Gado bigi moro leki wi ati èn a sabi ala sani” (1 Johanes 3:20). Fa a e gi wi trowstoe foe sabi taki ala di wi kan kroetoe wisrefi leki sma di no warti foe begi, tokoe Jehovah no abi foe denki so leki fa wi e denki! Jehovah „sabi ala sani” foe wi, so srefi den situwâsi na ini wi libi di kande e meki taki wi e firi taki wi no warti notinoti (Psalm 103:10-14). A sari-ati foe en èn a man di a man froestan ala sani, e meki taki a e jere den begi di e kon foe „wan ati di broko èn masi” (Psalm 51:17). Fa ensrefi sa weigri foe jere a begi di wi e begi en tranga foe jepi wi, te ensrefi e kroetoe „ibriwan sma di e tapoe en jesi gi a kragi begi foe a mofina wan”? — Odo 21:13.
A switifasi foe a bradafasi
7. (a) San na wan tra sani di Jehovah seti gi wi foe jepi wi foe kisi krakti baka? (b) Sortoe sani di wi sabi foe a bradafasi foe wi, kan jepi wi foe kisi krakti?
7 Wan tra sani di Jehovah seti gi wi foe jepi wi kisi njoen krakti baka, na wi kresten bradafasi. Fa a de wan bigi grani foe de wan pisi foe a famiri foe brada nanga sisa na heri grontapoe! (1 Petrus 2:17) Te den druk foe a libi e kon hebi gi wi, dan a switifasi foe a bradafasi kan jepi wi foe kisi krakti baka. Fa so? A sabi di wi sabi taki wi no de wi wawan te wi e kisi foe doe nanga den tjalensi di e gi stress, kan meki taki wi kisi krakti baka. Sondro tweifri, na mindri den brada nanga sisa foe wi, wan toe foe den de di ben kisi foe doe nanga den srefi sortoe druk noso tesi disi èn di ben firi a srefi fasi fa wi e firi (1 Petrus 5:9). Wi no e weri wi ede moro efoe wi sabi taki san e miti wi, no de wan freimde sani èn taki tra brada nanga sisa ben firi a srefi fasi fa wi e firi now.
8. (a) Sortoe eksempre e sori fa wi kan feni foeroe jepi nanga trowstoe di de fanowdoe na ini a bradafasi foe wi? (b) Na sortoe fasi joesrefi ben kisi jepi noso trowstoe foe „wan troe mati”?
8 Na ini a waran foe a bradafasi, wi kan feni ’troe mati’ di, te wi e lasi-ati, kan jepi wi èn di kan trowstoe wi te dati de fanowdoe (Odo 17:17). Foeroe tron, ala san de fanowdoe na wan toe switi wortoe noso foe doe wan boen sani. Wan kresten oema di ben feti nanga a firi di a ben firi taki a no warti notinoti, e memre: „Mati ben de di ben sa taki nanga mi foe den boen sani foe misrefi èn na so den ben jepi mi foe wini den negatief sani di mi ben denki” (Odo 15:23). Baka a dede foe a jongoe oema-pikin foe en, wan sisa no ben man singi Kownoekondre singi na den gemeente konmakandra moro, spesroetoe den singi di ben taki foe na opobaka. „Wan leisi”, a sisa e memre, „wan sisa di ben sidon na a tra sei ben si fa mi ben krei. A ben kon na mi, ben poti den anoe foe en lontoe mi, èn ben singi san ben tan abra foe a singi makandra nanga mi. Mi ben firi so foeroe lobi gi den brada nanga sisa èn mi ben firi so kolokoe taki wi ben kon na a konmakandra, foe di mi ben kon kisi misrefi taki drape jepi de gi wi, drape na a Kownoekondre zaal.”
9, 10. (a) Fa wi kan jepi foe hori wi bradafasi waran? (b) Sortoe sma spesroetoe abi gosontoe demakandra fanowdoe? (c) San wi kan doe foe jepi den wan di abi deki-ati fanowdoe?
9 A no de foe taki, dati ibriwan foe wi abi a frantiwortoe foe jepi hori a kresten bradafasi waran. Foe dati ede, wi moesoe meki wi ati kon „moro bradi” gi ala wi brada nanga sisa (2 Korentesma 6:13). Fa a ben sa de wan sari gi den wan di kon weri, foe firi taki a lobi foe a bradafasi no ben sa switi moro gi den! Tokoe, son kresten taki dati den e firi den wawan èn taki trawan e libi den so. Wan sisa di abi wan masra di de teige waarheid, ben aksi: „Soema no wani kisi deki-ati, abi lobi demakandra, èn matifasi di e bow wan sma, èn soema no abi den sani disi fanowdoe? Grantangi, memre wi brada nanga sisa taki wi abi den fanowdoe!” Ija, spesroetoe den wan di den situwâsi na ini a libi e hebi gi den — den wan nanga trowpatna di no de na bribi, den wan di de den wawan na ini wan osofamiri leki soso wán papa noso wán mama, den wan di abi siki di e go nanga langa, den wan di owroe, èn trawan — abi gosontoe demakandra fanowdoe. A de so, taki wan toe foe wi moesoe kisi foe jere a sani disi ete wan leisi?
10 San wi kan doe foe jepi? Meki wi bradi wisrefi na ini a sori di wi e sori lobi. Te wi wani gi moro sma a kari foe kon fisiti wi na oso, dan meki wi no frigiti noiti den wan di abi deki-ati fanowdoe (Lukas 14:12-14; Hebrewsma 13:2). Na presi foe denki taki a situwâsi foe den sa meki taki den no sa man kon, foe san ede wi no ben sa gi den wan kari? Dan meki densrefi bosroiti san den wani doe. Srefi te den no man kon, dan tokoe den sa kisi deki-ati foe di den sa sabi taki trawan e prakseri den. Dati kan de joisti san den abi fanowdoe foe kisi krakti baka.
11. Tapoe sortoe fasi den wan di abi en hebi, kan abi jepi fanowdoe?
11 Den wan di abi en hebi, kande abi tra sortoe jepi fanowdoe. Foe eksempre, wan mama kan abi wan lepi brada fanowdoe di e sori belangstelling gi a boi foe en di no abi papa (Jakobus 1:27). Wan brada noso wan sisa di abi wan serjoesoe siki, kande sa abi wan sma fanowdoe di kan jepi en foe bai sani noso jepi en nanga osowroko. Kande wan moro owroe sma abi wan sma fanowdoe di e kon loekoe en, noso kande a abi wan sma fanowdoe di e jepi en foe go na ini a velddienst. Te den sortoe jepi disi de fanowdoe dorodoro, dan dati ’e tesi na opregtifasi foe wi lobi’ troetroe (2 Korentesma 8:8). Na presi foe wi waka gowe foe den sma di abi wi jepi fanowdoe, foe di wi e prakseri a ten nanga a moeiti di dati sa teki, meki wi pasa a tesi foe sori kresten lobi boen foe di wi e firi sortoe sani trawan abi fanowdoe èn e jepi den toe nanga dati.
A krakti foe Gado en Wortoe
12. Fa a Wortoe foe Gado e jepi wi foe kisi krakti baka?
12 Wan sma di e tapoe foe njan, sa lasi en krakti heri esi. Na so, wan tra fasi fa Jehovah e gi wi krakti foe go doro na foe di A e sorgoe taki wi e kisi boen njanjan na jejefasi (Jesaja 65:13, 14). Sortoe jeje njanjan a e gi wi? Moro leki ala tra sani, A gi wi en Wortoe, bijbel. (Mateus 4:4; teki gersi Hebrewsma 4:12.) Fa bijbel kan jepi wi foe kisi krakti baka? Te den druk nanga den problema di wi abi, e bigin pori wi krakti safrisafri, dan wi kan kisi krakti baka foe di wi e leisi fa den getrow man nanga oema na ini bijbel ten ben firi èn fa den ben abi foe feti nanga den troetroe problema na ini a libi. Ala di den ben de toemoesi boen eksempre foe sma di hori den soifri-retifasi, tokoe den ben de libisma „nanga firi leki wi” (Jakobus 5:17; Tori foe den Apostel 14:15). Den ben kisi foe doe nanga tesi èn nanga druk di gersi den di foe wi. Poti prakseri tapoe wan toe eksempre.
13. Sortoe bijbel eksempre e sori taki getrow man nanga oema na ini bijbel ten ben abi firi èn ondrofeni di de leki a di foe wi?
13 A famiri-edeman Abraham ben sari foeroefoeroe foe a dede foe a wefi foe en, ala di Abraham ben bribi na ini na opobaka. (Genesis 23:2; teki gersi Hebrewsma 11:8-10, 17-19.) David di ben abi berow, ben firi neleki den sondoe foe en ben meki taki a no warti notinoti foe dini Jehovah (Psalm 51:11). Moses ben firi taki a no ben man doe den sani di a ben moesoe doe (Exodus 4:10). Epafroditus ben kon depressief di a ben kon sabi taki wan serjoesoe siki ben o meki taki a no ben sa man doe so foeroe leki a ben sa wani na ini „a wroko foe Masra” (Filipisma 2:25-30). Paulus ben abi foe feti nanga den sondoe foe a skin (Romesma 7:21-25). Efowdia nanga Sentike, toe salfoe sisa na ini a gemeente na Filipi, so leki fa a sori, no ben man feni en so boen nanga makandra (Filipisma 1:1; 4:2, 3). Fa a e gi wi deki-ati foe sabi taki den getrow sma disi ben firi èn ben ondrofeni sani neleki fa wi e doe dati, èn tokoe den no ben tapoe! Èn so srefi Jehovah no ben drai en baka gi den.
14. (a) Sortoe wrokosani Jehovah gebroiki foe jepi wi foe kisi krakti foe en Wortoe? (b) Foe san ede den Waktitoren nanga Ontwaakt! tijdschrift abi artikel di e taki foe sociaal afersi, osofamiri afersi, nanga emotioneel afersi?
14 Foe jepi wi foe kisi krakti foe a Wortoe foe En, Jehovah e gebroiki a getrow èn koni srafoe groepoe foe gi „njanjan na a reti ten” doronomo (Mateus 24:45). Langa ten kaba, a getrow srafoe gebroiki a Waktitoren nanga Ontwaakt! tijdschrift foe horibaka gi bijbel waarheid èn foe meki Gado Kownoekondre bekènti leki a wan-enkri howpoe gi libisma. Spesroetoe na ini den lasti someni tenti jari, na a reti ten den tijdschrift disi ben abi artikel di gron tapoe den Boekoe foe bijbel èn di ben taki foe tjalensi di ben kan miti a pipel foe Gado na sociaal sei, na ini na osofamiri libi, nanga na emotioneel sei. Foe san ede den sortoe bodoi disi ben tjari kon na doro? A no de foe taki, foe jepi den wan di e kisi foe doe nanga den tjalensi disi so taki den kan kisi krakti nanga deki-ati foe Gado en Wortoe. Ma den sortoe artikel disi e jepi wi alamala toe foe froestan moro krin san kan trobi wi brada nanga wi sisa te den sortoe sani disi e miti den. So boen wi sreka moro boen foe doe san Paulus taki nanga den wortoe: „Taki na wan deki-ati fasi nanga den sma di lasi-ati, horibaka gi den swaki wan, abi langa pasensi nanga ala sma.” — 1 Tesalonikasma 5:14.
Owroeman di de „wan kibripresi gi a winti”
15. San Jesaja ben taki na fesi foe den wan di ben sa dini leki owroeman, èn sortoe frantiwortoe disi e poti tapoe den owroeman?
15 Jehovah gi wi wan tra sani foe jepi wi te wi e kon weri — den gemeente owroeman. Foe den disi a profeiti Jesaja ben skrifi: „Ibriwan moesoe de leki wan kibripresi gi a winti èn wan kibripresi gi a hebi alen, leki kriki ini wan kondre sondro watra, leki a kowroe foe wan hebi stonbergi di de leti opo ini wan kondre di drei” (Jesaja 32:1, 2). So boen, den owroeman abi a frantiwortoe foe doro den eigifasi disi di Jehovah ben taki na fesi foe den. Den „moesoe boeweisi taki den de” fonten foe trowstoe nanga kowroe-ati gi trawan èn den moesoe wani foe „tan tjari a hebi [noso, „den sani di e trobi soema”; troetroe, „hebi sani”] foe makandra” (Galasiasma 6:2, foetoewortoe). Fa den kan doe disi?
16. San den owroeman kan doe foe jepi wan sma di e firi taki a no warti foe begi srefi?
16 Soleki wi ben taki kaba, dan son leisi wan sma di kon weri kande e firi taki a no warti srefi foe begi. San den owroeman kan doe? Den kan begi nanga a sma èn begi gi a sma (Jakobus 5:14). Te den e aksi Jehovah nomo, so taki a sma di weri kan jere dati, foe jepi a wan dati foe froestan omeni Jehovah lobi en èn omeni trawan lobi en, dan dati seiker ben sa gi trowstoe. Te wan sma di lasi-ati, e jere a fajafaja begi di e komoto na a ati foe wan owroeman, dan dati kan jepi a sma foe tranga en overtoigi baka. A sma dati kan denki so, taki efoe den owroeman abi na overtoigi taki Jehovah sa gi piki tapoe den begi gi a boen foe a sma dati, dan a sma dati srefi kan abi na overtoigi dati toe.
17. Foe san ede owroeman moesoe de sma di e arki èn di e firi nanga a trawan?
17 „Ibri sma moesoe de esi foe arki, no de esi foe taki”, na so Jakobus 1:19 e taki. Foe jepi den sma di kon weri foe kisi krakti baka, dan den owroeman moesoe de sma di e arki èn e firi nanga den wan di kon weri. Na ini son kefal, den memre foe a gemeente e feti nanga problema noso druk di wi no kan loesoe na ini a seti foe sani disi. Dan, san den kan abi fanowdoe a no wan loesoe gi a problema, ma foe taki nanga wan sma nomo di e arki den boen — wan sma di no e taigi den fa den moesoe firi ma di e arki den sondro foe kroetoe den. — Lukas 6:37; Romesma 14:13.
18, 19. (a) Foe di wan owroeman de esi foe jere, dan fa dati kan jepi en foe no meki a lai kon moro hebi gi wan sma di weri? (b) San na den bakapisi te owroeman e sori taki den „e firi nanga trawan”?
18 Owroeman, te oenoe de esi foe jere, dan dati kan jepi oenoe foe no meki a lai foe wan sma di weri, kon moro hebi sondro taki dati de fanowdoe. Foe eksempre, efoe wan brada noso wan sisa misi wan toe konmakandra noso no e doe so foeroe moro na ini a velddienst, dan troetroe a sma dati abi rai fanowdoe foe doe moro foeroe na ini a velddienst noso foe kon moro na den konmakandra? Kande dati de so. Ma joe sabi ala finifini sani foe a tori? A kan taki a sma en gosontoe e go na baka moro nanga moro? Den frantiwortoe na ini na osofamiri kenki no so langa pasa? A kan taki tra situwâsi de, noso tra druk de di hebi gi a sma? Memre, taki a sma kan abi a firi kaba taki a fowtoe, foe di a no man doe moro.
19 Dan, fa joe kan jepi a brada noso sisa? Bifo joe kon na wan bosroiti noso gi rai, dan joe moesoe arki! (Odo 18:13) Nanga koni aksi joe moesoe soekoe foe ’hari’ den firi di de na ini a sma en ati (Odo 20:5). No doe leki den firi disi no de — si taki den de. A sma di weri, kande abi a djaranti fanowdoe baka taki Jehovah e broko en ede nanga wi èn taki A e froestan taki son ten wi no man doe so foeroe moro (1 Petrus 5:7). Te owroeman e sori taki den „e firi nanga trawan”, dan den wan di weri kan ’feni kowroe-ati gi den sili’ (1 Petrus 3:8; Mateus 11:28-30). Te den wan di kon weri, feni so wan kowroe-ati, dan a no sa de fanowdoe foe taigi den foe doe moro; na ati foe den sa troesoe den foe doe ala san den man doe na ini a dini foe Jehovah. — Teki gersi 2 Korentesma 8:12; 9:7.
20. Foe di a kaba foe a kroektoe geslakti disi de so krosibei, dan san moesoe de wi fasti bosroiti foe doe?
20 Foe troe, wi e libi na ini a pisiten di e aksi moro foe wi, moro leki oiti bifo na ini a heri libisma historia. Den druk foe a libi na ini Satan en grontapoe e kon moro bigi te wi e go moro fara na ini a ten foe a kaba. Memre, leki wan lew di e onti, Didibri e wakti wi foe wi kon weri so taki wi kan tapoe, èn a kan wini wi leki wan makriki prooi. O fa wi kan foeroe nanga tangi taki Jehovah e gi krakti na den wan di kon weri! Meki wi gebroiki ala den sani di a seti gi wi foe gi wi krakti foe go doro, neleki A ben gi wi den makti frei foe wan aka. Foe di a kaba foe a kroektoe geslakti disi de so krosibei, dati meki now a no a ten foe tapoe foe lon a strei-lon gi a sani di wi o wini — têgo libi. — Hebrewsma 12:1.
San joe e piki?
◻ San wi kan froewakti foe Jehovah te wi e begi en?
◻ Na sortoe fasi wi kan kisi krakti foe wi kresten bradafasi?
◻ Fa a Wortoe foe Gado e jepi wi foe kisi krakti baka?
◻ San den owroeman kan doe foe jepi den sma di kon weri so taki den sma disi kan kisi krakti baka?
[Prenki na tapoe bladzijde 16]
Te wi wani gi moro sma a kari foe kon fisiti wi na oso, dan meki wi no frigiti noiti den sma di abi deki-ati fanowdoe
[Prenki na tapoe bladzijde 17]
Owroeman kan aksi Jehovah foe jepi den sma di kon weri foe froestan o foeroe Jehovah nanga trawan lobi den