Foe ala ten wan kaba sa kon na ogri di sma e doe nanga tranga — Fa?

FOE tapoe na ogri di sma e doe nanga tranga èn di e kon moro dei foe dei, dan wan toe foto na Amerkankondre ben proeberi wan njoen sani — sma ben kan kisi moni noso goedoe te den ben o tjari gon kon, èn no wan sma ben o aksi den wani sani. San ben de a bakapisi? Foe eksempre, a ben kostoe a foto St. Louis, 341.000 Amerkan dala foe tjari 8500 gon kon makandra. So wan sortoe sani di ben doe toe na ini a foto New York, ben meki taki den ben feni moro leki wán doesoen fetisani.

Sortoe bakapisi ala den sani disi ben abi na tapoe takroedoe? Na wan sari foe taki, dati a no ben abi foeroe bakapisi. Na St. Louis, a nomroe foe sma di trawan kiri nanga wan gon, ben hei srefisrefi a jari na baka. Na ini a foto New York, so wan toe miljoen gon de na sma ete. Na Amerkankondre, sma abi wan sani foe 200 miljoen gon, pikinmoro wán gon gi ibri mansma, oemasma, nanga pikin-nengre. Na tra kondre, moro nanga moro sma e doe ogri na sma nanga tranga, foe di den e gebroiki wan gon, èn sma e broko den ede nanga dati. „Na mindri 1983 nanga 1993, skowtoe skrifi taki a nomroe foe feti di pasa na Ingrisikondre pe gon ben de ini a tori, ben kon 14.000, san de pikinmoro toe tron moro hei leki fosi”, na so The Economist e taki. Ala di a nomroe foe sma di trawan kiri no hei so, tokoe wan sani foe wán miljoen fetisani de na a kondre dati, ala di wet no e gi pasi foe dati.

A no de foe taki, dati te den nomroe dati di e frede sma, e kon moro pikin, dan dati na wan boen sani. Ma den sani di lanti proeberi, soleki den wan di wi kari dja, pikinmoro no e doe noti na den troetroe reide di e meki taki sma e doe ogri nanga tranga. San na den reide dati? Foeroe reide kari, ma wan toe foe den de prenspari. Foe di wan banti no de na ini na osofamiri èn sma no e leri foe libi akroederi boen gwenti nanga wet, meki foeroe jongoewan go moksi densrefi nanga groepoe jongoewan, bika den wani abi a firi taki den de wan memre foe wan groepoe. Foe di a e kori foeroe sma foe meki foeroe moni, dan den go gebroiki ogri di doe nanga tranga. Onregtfardikifasi e poesoe trawan foe seti tori nanga jepi foe ogri di doe nanga tranga. A firi di sma e firi boen, foe di den e si a kondre, a ras, noso a posisi foe den moro hei leki di foe trawan, e meki taki den e tapoe den ai gi a pina foe trawan. Den sani disi na troetroe reide di sma no man loesoe makriki.

San kan doe?

Moro skowtoe, a koti foe moro langa strafoe, a hori di ai moesoe hori na tapoe soema nanga soema abi pasi foe abi wan gon, a dedestrafoe — ala den sani na sani disi di sma tjari kon na fesi èn den ben proeberi den foe skotoe takroedoe nanga ogri di sma e doe nanga tranga. Na difrenti fasi den ben abi boen bakapisi, ma a sari foe a tori de, taki ogri di sma e doe nanga tranga de wan pisi foe wi libi ete. Foe san ede? A de foe di den sani disi di lanti doe, na soso foe doe wan sani na den bakapisi nomo.

Na a tra sei, foeroe koniman feni taki a sroto foe tjari wan kaba kon na ogri di sma e doe nanga tranga, na a leri di sma e kisi. Ala di a prakseri disi na wan boen prakseri, tokoe wi moesoe taki dati a no na den kondre wawan pe sma no abi foeroe okasi foe go na skoro, taki sma e doe ogri nanga tranga. Foe taki en leti, dan a gersi leki wan toe foe den kondre pe sma e doe ogri nanga tranga, na den kondre toe di abi den moro hei markitiki foe sma kan kisi leri. A no moeilek foe si taki a no soso a leri di sma e kisi, di de fanowdoe, ma sma moesoe kisi a joisti leri. Sortoe leri dati ben sa de? Wan sma de di man foe leri sma foe lobi vrede èn foe de opregti?

„Mi, Jehovah, na joe Gado, a Sma di e leri joe foe gi joesrefi wini, a Sma di e meki joe waka na tapoe a pasi di joe moesoe waka. O efoe joe troetroe ben sa poti prakseri nomo na tapoe den komando foe mi! Dan a vrede foe joe ben sa tron leki wan liba, èn a regtfardikifasi foe joe leki den skwala foe se” (Jesaja 48:17, 18). Fa Jehovah Gado e leri sma foe lobi vrede èn foe de nanga regtfardikifasi? Moro foeroe nanga jepi foe bijbel, a Wortoe foe en.

A krakti foe a Wortoe foe Gado

Bijbel kwetikweti no de wan boekoe nomo nanga owroe anansitori nanga odo di no e teri moro na ini a ten disi èn di no e fiti. A abi den gronprakseri nanga prakseri na ini foe a Mekiman foe libisma, di, soleki fa en e si sani na a moro boen fasi, sabi moro betre leki iniwan tra sma fa libisma tan. „Neleki fa hemel hei moro grontapoe, na so den pasi foe mi hei moro den pasi foe oenoe, èn den prakseri foe mi leki den prakseri foe oenoe”, na so Jehovah Gado e taki. — Jesaja 55:9.

Na foe disi ede meki na apostel Paulus e sori taki „a wortoe foe Gado de libilibi èn a abi krakti èn a srapoe moro leki iniwan feti-owroe di e koti na toe sei, èn a e boro go srefi so dipi taki a e prati sili nanga jeje, èn den skroefoe foe a skin nanga a fatoe na ini den bonjo foe den, èn a man foe si krin san na ati e denki èn abi na prakseri” (Hebrewsma 4:12). Ija, a Wortoe foe Gado abi a krakti foe doro na ati foe wan sma èn doe wan sani nanga dati èn kenki a fasi fa a e denki èn fa a e tjari ensrefi. A no disi de fanowdoe na ini a ten disi foe kenki den fasi di sma abi foe doe ogri nanga tranga?

Jehovah Kotoigi, di de now so wan feifi miljoen na moro leki 230 kondre, na krinkrin boeweisi taki a Wortoe foe Gado, troetroe abi a krakti foe kenki libi, meki den tron moro betre sma. Na mindri den joe abi sma foe ala kondre, tongo, nanga ras. Den abi ala sortoe posisi na ekonomia sei noso na sociaal sei èn den na sma di ini a ten di pasa ben leri èn ben doe ala sortoe sani. Fosi, son wan foe den ben doe ogri nanga tranga èn a libi foe den ben lai nanga problema. Ma na presi foe meki taki den sortoe sani disi tjari feantifasi kon na den mindri, noso strei, a desko di sma e desko makandra, nanga bita-atifasi, den leri foe wini den problema disi èn na heri grontapoe den tron wan pipel di lobi vrede èn di de na ini wánfasi. Fa disi ben man?

Wan wroko e doe foe tjari wan kaba kon na ogri di sma e doe nanga tranga

Jehovah Kotoigi e firi froeplekti foe jepi trawan foe kisi a soifri sabi foe den prakseri foe Gado soleki fa dati tjari kon na krin na ini bijbel, a Wortoe foe en. Na ala sei foe grontapoe, den e soekoe den sma di wani leri den pasi foe Jehovah èn kisi leri foe en. Den abi boen bakapisi nanga a moeiti di den e doe. A bakapisi foe a leriwroko disi de taki wan heri moi profeititori e kon troe.

So wan 2700 jari pasa, a profeiti Jesaja ben skrifi na ondro a krakti foe santa jeje: „A moesoe pasa na ini den kaba pisi foe den dei [taki] . . . foe troe, foeroe sma sa go èn taki: ’Kon, meki wi opo go na a bergi foe Jehovah, na a oso foe a Gado foe Jakob; èn en sa leri wi foe den pasi foe en, èn wi sa waka na tapoe den foetoepasi foe en.’” — Jesaja 2:2, 3. 

Foe kisi leri foe Jehovah èn foe waka na tapoe den foetoepasi foe en kan tjari heri moi kenki kon na ini a libi foe sma. Na ini a srefi profeititori dati den taki na fesi foe wan foe den kenki dati: „Den sa moesoe naki den feti-owroe foe den kon tron proegoe èn den lansri foe den kon tron koti-nefi. Nâsi no sa opo feti-owroe teige nâsi, so srefi den no sa leri feti moro” (Jesaja 2:4). Foeroe sma leisi a tekst disi. Foe taki en leti, a tekst disi skrifi na tapoe a skotoe foe a Pren foe den Verenigde Nâsi na a foto New York. A e memre sma na san den Verenigde Nâsi wani foe doe, ma di den no man doe. No wan politiek organisâsi foe libisma sa man poeroe orlokoe nanga ogri di sma e doe nanga tranga. Na wan sani di Jehovah Gado wawan man doe. Fa a sa doe disi?

A de krin taki a no ala sma sa teki a kari foe „opo go na a bergi foe Jehovah” èn ’leri den pasi foe en’ èn „waka na tapoe den foetoepasi foe en”; èn a no ala sma sa wani foe „naki den feti-owroe foe den kon tron proegoe èn den lansri foe den kon tron koti-nefi”. San Jehovah sa doe nanga den sortoe sma dati? A no sa tan gi den na okasi noso wakti foe ala ten foe den kon kenki. Foe tjari wan kaba kon na ogri di sma e doe nanga tranga, dan Jehovah sa tjari wan kaba kon toe na den wan di wani hori densrefi na a ogri di den doe nanga tranga.

Wan prenspari sani foe leri

San Gado ben doe na ini a ten foe Noa na wan warskow gi wi na ini a ten disi, di wi kan leri foe en. Bijbel e sori sortoe grontapoe ben de na a ten dati: „Grontapoe ben kon pori na ini na ai foe a troe Gado èn grontapoe ben kon foeroe nanga ogri di sma e doe nanga tranga.” Ini a tori foe disi, Gado ben taigi Noa: „A kaba foe ala skin kon na fesi mi, bika foe den ede meki grontapoe kon foeroe nanga ogri di sma e doe nanga tranga; èn loekoe, mi e pori den makandra nanga grontapoe.” — Genesis 6:11, 13.

Wi moesoe hori wan prenspari sani na prakseri. Di Gado ben tjari a Froedoe kon na tapoe a geslakti dati, dan a ben kibri Noa nanga en osofamiri. Foe san ede? Bijbel e piki: „Noa ben de wan regtfardiki man. A ben sori foe de sondro fowtoe na mindri den sma foe en ten. Noa ben waka nanga a troe Gado” (Genesis 6:9; 7:1). Ala di a no ben abi foe de so taki ala sma di ben libi na a ten dati ben doe ogri di doe nanga tranga, tokoe soso Noa nanga en osofamiri „ben waka nanga a troe Gado”. Foe dati ede den ben tan na libi di na ogri grontapoe dati ben kon na wan kaba.

Wi si taki grontapoe kon „foeroe [baka] nanga ogri di sma e doe nanga tranga”, èn wi kan de seiker taki Gado e si san e pasa. Neleki fa a ben doe na ini a ten foe Noa, na so a no sa wakti langa moro foe doe wan sani foe tjari wan kaba kon na ogri di sma e doe nanga tranga èn disi a sa doe foe ala ten. Ma a sa sorgoe toe gi wan fasi foe kibri den wan di e leri den ’pasi foe a troe Gado’ now, den wan di e doe wan sani na tapoe en bigi leriwroko foe tjari vrede kon.

Jehovah gebroiki a psalm singiman foe taki foe a djaranti disi: „Ete wan sjatoe ten, èn a godelowsoe sma no sa de moro; èn joe sa loekoe pe a de, èn a no sa de. Ma den safri-ati sma sa abi grontapoe, èn foe troe den sa feni switi prisiri na ini vrede pasa marki.” — Psalm 37:10, 11.

Jehovah Kotoigi sa prisiri foe studeri bijbel nanga joe, so taki joe kan moksi joesrefi nanga den wan di e taki: „Kon meki wi opo go na a bergi foe Jehovah, na a oso foe a Gado foe Jakob; èn en sa leri foe wi den pasi foe en, èn wi sa waka na tapoe den foetoepasi foe en” (Jesaja 2:3). Te joe e doe dati, dan joe kan de wan foe den sma di sa si a kaba foe ala godelowsoefasi nanga ogri di sma e doe nanga tranga. Joe kan „feni switi prisiri na ini vrede pasa marki”.

[Sma di abi a reti foe a prenki na tapoe bladzijde 3]

Reuters/Bettmann