„No meki den anoe foe joe kon swaki”

„No meki den anoe foe joe kon swaki. Jehovah, joe Gado, de na joe mindri. Leki wan Maktiwan, a sa gi froeloesoe.” — SEFANJA 3:16, 17.

1. San wan bijbel sabiman ben taki foe a profeititori foe Sefanja?

A PROFEITITORI foe Sefanja ben go moro fara leki en fosi kontroe na ini a di foe seibi nanga a di foe siksi jarihondro b.G.T. Na ini den froeklari di profesor C. F. Keil ben gi ini a tori foe Sefanja, a ben skrifi: „A profeititori foe Sefanja . . . no e bigin wawan nanga san e meki bekènti foe wan universeel kroetoe di sa kon na tapoe heri grontapoe, pe a kroetoe e komopo di sa kon na tapoe Juda foe den sondoe foe den ede, èn na tapoe den nâsi, foe a feantifasi ede di den ben abi gi a pipel foe Jehovah; ma a e froeteri toe foe a bigi, ogri dei foe Jehovah.”

2. Sortoe agersifasi de na mindri a situwâsi di ben de na ini a ten foe Sefanja èn a situwâsi di de na ini krestenhèit na ini a ten disi?

² Na ini a ten disi, a kroetoe bosroiti di Jehovah teki, na foe tjari den nâsi kon na wán foe kisi pori na wan moro bigi fasi leki fa dati ben pasa na ini a ten foe Sefanja (Sefanja 3:8). Soleki fa Gado e si en, dan spesroetoe den nâsi di e taki dati den na kresten nâsi, abi bigi fowtoe. Neleki fa Jerusalem ben kisi wan hebi strafoe foe di a no ben de getrow na Jehovah, na so krestenhèit moesoe gi frantiwortoe na Gado foe a loesoe fasi fa a e handri. Den kroetoe foe Gado di ben meki bekènti teige Juda nanga Jerusalem na ini a ten foe Sefanja, e fiti den kerki nanga den sekte foe krestenhèit moro boen srefi. Den so srefi doti a soifri anbegi foe di den ben leri sma sani di e meki Gado lasi grani, ala di foeroe foe den leri komopo na den heiden. Den meki miljoenmiljoen foe den gosontoe manpikin foe den na ini a ten disi dede na ini feti. Boiti dati, den sma di e libi na ini na agersi Jerusalem, e moksi a sokari krestendom nanga astrologie, afkodrei tori, nanga a lagi seks hoeroedoe, san e memre sma na a anbegi di sma ben anbegi Ba-al. — Sefanja 1:4, 5.

3. San wi kan taki foe den foeroe fesiman foe grontapoe nanga den politiek tiri na ini a ten disi, èn san Sefanja ben taki na ini wan profeititori?

³ Foeroe politiek fesiman foe krestenhèit lobi so, te den abi wan bigi nen na ini kerki. Ma neleki fa a ben de nanga den „granman” foe Juda, na so wan lo foe den e meki gebroiki foe sma na wan fasi di no fiti, neleki „lew di e bari”, nanga gridi „wolfoe” (Sefanja 3:1-3). Den politiek bakaman di e waka leki srafoe baka den sortoe sma dati, „e foeroe na oso foe den meester foe den nanga ogri di e doe nanga tranga èn nanga bedrigifasi” (Sefanja 1:9). Someni sma e pai tjoekoe èn abi kroekafasi. Te joe e loekoe den politiek tiri na ini krestenhèit èn na dorosei foe krestenhèit, dan joe e si taki moro nanga moro foe den ’abi bigimemre’ gi a pipel foe Jehovah foe den legre, den Kotoigi foe en, di den e si leki wan lagi „sekte” (Sefanja 2:8; Tori foe den Apostel 24:5, 14). Foe ala den sortoe politiek fesiman disi nanga den bakaman foe den, Sefanja ben taki na ini wan profeititori: „No a solfroe foe den, gowtoe foe den sa man froeloesoe den tapoe a dei foe Jehovah en atibron; ma a faja foe doe sani fajafaja, sa njan heri grontapoe, bika a sa pori ala den sma di e libi na grontapoe, ija wan takroe pori.” — Sefanja 1:18.

„Kisi kibri tapoe a dei foe Jehovah en atibron”

4. San e sori taki sma sa pasa a bigi dei foe Jehovah libilibi, ma san den moesoe doe?

⁴ A no ala den sma di ben libi na Juda, ben kisi pori na ini a di foe seibi jarihondro b.G.T. Na so sma sa de toe, di sa tan na libi tapoe a bigi dei foe Jehovah. Jehovah ben gebroiki en profeiti Sefanja foe taigi den sma dati: „Bifo a reglementi e tjari wan sani kon na krin, bifo a dei pasa gowe neleki boeba foe karoe, bifo a faja atibron foe Jehovah e kon na oen tapoe, bifo a dei foe Jehovah en atibron e kon na oen tapoe, soekoe Jehovah, ala oen safri-atisma foe grontapoe, di doe den kroetoe bosroiti foe En. Soekoe regtfardikifasi, soekoe safrifasi. Kande oenoe sa kisi kibri tapoe a dei foe Jehovah en atibron.” — Sefanja 2:2, 3.

5. Soema na ini a ten disi foe a kaba, ben de den fosiwan di ben poti prakseri na tapoe a warskow foe Sefanja, èn fa Jehovah gebroiki den?

⁵ Na ini a ten foe a kaba foe a grontapoe disi, dan den fosi sma di ben poti prakseri na tapoe a kari di ben gi nanga jepi foe wan profeititori, ben de a fikapisi foe Israèlsma na jejefasi, den salfoe kresten (Romesma 2:28, 29; 9:6; Galasiasma 6:16). Foe di den soekoe regtfardikifasi nanga safrifasi èn foe di den ben abi lespeki gi den kroetoe bosroiti foe Jehovah, meki den ben kon fri foe Babilon a Bigiwan, a grontapoemakti foe falsi relisi, èn na ini 1919 Gado ben feni den boen baka. Sensi a ten dati, èn spesroetoe sensi 1922, a getrow fikapisi disi meki den kroetoe foe Jehovah bekènti teige den kerki nanga den sekte foe krestenhèit èn teige den politiek nâsi, èn disi den ben doe sondro foe frede.

6. (a) San Sefanja ben taki na ini wan profeititori foe a getrow fikapisi? (b) Fa a profeititori disi kon troe?

⁶ Foe a getrow fikapisi disi, Sefanja ben taki na ini wan profeititori: „Foe troe mi sa meki wan pipel di abi sakafasi èn di mofina, tan abra na joe mindri, èn den troetroe sa kon soekoe kibri na a nen foe Jehovah. Ini a tori foe den wan di tan abra foe Israèl, den no sa doe onregtfardikifasi, èn den no sa taki wan lei, èn sma no sa feni wan bedrigi tongo na ini a mofo foe den; bika densrefi sa njan èn troetroe sa langa densrefi didon, èn no wan sma sa de di sa meki den beifi” (Sefanja 3:12, 13). Den salfoe kresten disi pori a nen foe Jehovah ala ten tapoe a fosi presi, ma disi den ben doe spesroetoe sensi 1931, di den ben teki a nen Jehovah Kotoigi (Jesaja 43:10-12). Foe di den ben poti krakti na tapoe a strei di abi foe doe nanga a soevereiniteit foe Jehovah, meki den gi a nen foe Gado grani, èn disi sori foe de wan froeloesoe gi den (Odo 18:10). Jehovah gi den njanjan na jejefasi bogobogo, èn den e tan na ini wan jeje paradijs sondro foe frede. — Sefanja 3:16, 17.

„Wan nen èn wan bigi grani na mindri ala den pipel”

7, 8. (a) Sortoe tra profeititori kon troe ini a tori foe a fikapisi foe Israèl na jejefasi? (b) San miljoenmiljoen sma kon si, èn san joesrefi e denki foe a tori disi?

⁷ Sma ben si taki a fikapisi e hori tranga na a nen foe Jehovah èn na den regtfardiki gronprakseri foe en Wortoe. Opregti sma kon si a difrenti na mindri a fasi fa a fikapisi e tjari ensrefi èn a kroekafasi nanga a hoigrifasi foe den politiek nanga relisi fesiman foe a grontapoe disi. Jehovah blesi „den wan di tan abra foe Israèl [na jejefasi]”. A gi den a grani foe tjari en nen, èn a meki den kisi wan boen nen na den pipel foe grontapoe. A de soleki fa Sefanja ben taki na ini wan profeititori: „’Na a ten dati mi sa tjari oenoe kon dja, ija, na ini a ten di mi e tjari oenoe kon na makandra. Bika mi sa meki oenoe kon tron wan nen èn wan bigi grani na mindri ala den pipel foe grontapoe, te mi sa meki den wan foe oenoe di de na ini katibo, drai kon baka na fesi oen ai’, na so Jehovah taki.” — Sefanja 3:20.

⁸ Sensi 1935, troetroe miljoenmiljoen sma kon si taki a blesi foe Jehovah de na tapoe a fikapisi. Nanga prisiri den e waka na baka den djoe disi na jejefasi, noso den Israèlsma, ala di den e taki: „Wi wani go nanga oenoe, foe di wi jere taki Gado de nanga oenoe” (Sakaria 8:23). Den „tra skapoe” disi e si a salfoe fikapisi leki „a getrow èn koni srafoe”, di Krestes poti na wroko „foe loekoe ala den goedoe foe en [na grontapoe]”. Nanga tangi den e gebroiki foe a njanjan na jejefasi di a srafoe groepoe ben sreka „na a joisti ten”. — Johanes 10:16; Mateus 24:45-47.

9. Sortoe „tongo”, miljoenmiljoen sma leri foe taki, èn na ini sortoe bigi wroko den tra skapoe e dini „skowroe na skowroe” makandra nanga a salfoe fikapisi?

⁹ Makandra nanga a fikapisi, den miljoenmiljoen tra skapoe disi e leri foe libi èn foe taki akroederi a „soifri tongo”.a Jehovah ben gebroiki Sefanja foe taki a profeititori: „Dan mi sa meki pipel kenki go na wan soifri tongo, so taki den alamala kan kari a nen foe Jehovah, foe kan dini en skowroe na skowroe” (Sefanja 3:9). Ija, leki wán man, den tra skapoe e dini Jehovah „skowroe na skowroe” makandra nanga den salfoe memre foe a „pikin ipi”, foe doe a toemoesi prenspari wroko foe preiki „a boen njoensoe disi foe a kownoekondre . . . leki wan kotoigi gi ala nâsi”. — Lukas 12:32; Mateus 24:14.

„A dei foe Jehovah sa kon”

10. Foe sortoe sani a salfoe fikapisi ben abi na overtoigi ala ten, èn san den sa si leki wan groepoe?

¹⁰ Doronomo a salfoe fikapisi ben tan hori na prakseri san na apostel Petrus ben taki na ondro krakti foe santa jeje: „Jehovah no e draidrai nanga a pramisi foe en, soleki fa son sma e denki taki a e draidrai, ma a abi pasensi nanga oenoe foe di a no wani taki wan sma e kisi pori, ma a wani taki ala sma moesoe abi berow. Ma tokoe a dei foe Jehovah sa kon leki wan foefoeroeman” (2 Petrus 3:9, 10). Memre foe a getrow srafoe-groepoe noiti no tweifri taki a dei foe Jehovah ben o kon na ini wi ten. A bigi dei dati sa bigin nanga den kroetoe di Gado sa tjari kon na tapoe krestenhèit, na agersi Jerusalem, nanga a tra pisi foe Babilon a Bigiwan. — Sefanja 1:2-4; Openbaring 17:1, 5; 19:1, 2.

11, 12. (a) Sortoe tra pisi foe a profeititori foe Sefanja kon troe foe a fikapisi? (b) Fa a salfoe fikapisi poti prakseri na tapoe a kari: „No meki joe anoe kon swaki”?

¹¹ A getrow fikapisi e prisiri taki na ini 1919 den kon fri foe a katibo di den ben de na ini na jejefasi na Babilon a Bigiwan, a grontapoemakti foe falsi relisi. Den ondrofeni a kontroe foe a profeititori foe Sefanja: „Bari foe prisiri ede, o oemapikin foe Sion! Bari prisiri babari, o Israèl. Prisiri èn breiti pasa marki nanga joe heri ati, o oemapikin foe Jerusalem! Jehovah poeroe den kroetoe di ben de na joe tapoe. A poeroe a feanti foe joe. A kownoe foe Israèl, Jehovah, de na joe mindri. Joe no sa frede rampoe moro. A dei dati den sa taigi Jerusalem: ’No frede, o Sion. No meki den anoe foe joe kon swaki. Jehovah joe Gado, de na joe mindri. Leki wan Maktiwan, a sa gi froeloesoe.’” — Sefanja 3:14-17.

¹² Nanga na overtoigi èn nanga den boeweisi di e sori pasa marki taki Jehovah de na den mindri, a salfoe fikapisi go doro sondro foe frede, foe doe a wroko di den kisi foe Gado. Den preiki a boen njoensoe foe a Kownoekondre èn den meki sma kon sabi den kroetoe di Jehovah sa tjari kon na tapoe krestenhèit, a tra pisi foe Babilon a Bigiwan, nanga a heri godelowsoe seti foe sani foe Satan. Awinsi sortoe sani ben miti den, ala den someni tenti jari sensi 1919, den gi jesi na a komando foe Gado: „No frede, o Sion. No meki den anoe foe joe kon swaki.” Den meki den anoe foe den tan wroko tranga, foe di den ben e prati miljardmiljard traktaat, tijdschrift, boekoe, nanga brochure di e meki a Kownoekondre foe Jehovah bekènti. Gi den tra skapoe, di sensi 1935 ben kon na den sei, a salfoe fikapisi ben de wan eksempre di e tranga a bribi.

„No meki den anoe foe joe kon swaki”

13, 14. (a) Foe san ede son djoe ben hari densrefi poeroe foe a dini di den ben dini Jehovah, èn fa disi ben kon na krin? (b) San ben sa de wan don sani foe doe, èn foe sortoe wroko wi no moesoe meki wi anoe kon swaki?

¹³ Ala di wi ’e tan froewakti’ a bigi dei foe Jehovah, dan fa wi kan kisi praktis jepi foe a profeititori foe Sefanja? Na a fosi presi, wi moesoe loekoe boen taki wi no e tron leki den djoe na ini a ten foe Sefanja di ben tapoe foe waka na baka Jehovah, foe di den ben tweifri taki a dei foe Jehovah ben de krosibei. A no ben abi foe de so, taki den djoe disi ben sori krin taki den ben tweifri, ma a fasi fa den doe, ben tjari kon na krin taki den no ben bribi troetroe taki a bigi dei foe Jehovah ben de krosibei. Den ben poti prakseri na tapoe a tjari di den ben tjari goedoe kon na makandra, na presi taki den ben tan froewakti Jehovah. — Sefanja 1:12, 13; 3:8.

¹⁴ A ten disi a no a ten foe meki tweifri kon na ini wi ati. A ben sa de wan don sani troetroe efoe na ini wi prakseri noso wi ati wi ben sa skoifi a dei foe Jehovah di de na pasi (2 Petrus 3:1-4, 10). Wi moesoe loekoe boen taki wi no e tapoe foe waka na baka Jehovah noso taki wi ’e meki den anoe foe wi kon swaki’ na ini a diniwroko foe en. Disi wani taki toe dati wi no „e wroko nanga wan slak anoe” te wi e preiki „a boen njoensoe”. — Odo 10:4; Markus 13:10.

Feti foe no kisi wan mi-no-kefasi

15. San ben sa kan de a reide taki wi no e wroko so tranga moro ini a diniwroko foe Jehovah, èn fa den ben taki na fesi na ini a profeititori foe Sefanja foe a problema disi?

¹⁵ Na a di foe toe presi, wi ben sa moesoe de na ai foe no meki a mi-no-kefasi di e swaki a jeje, kisi krakti na wi tapoe. Na foeroe Westsei kondre, sma no e broko den ede nanga jeje afersi èn dati kan meki taki wan toe preikiman foe a boen njoensoe lasi-ati. So wan mi-no-kefasi ben de na ini a ten foe Sefanja. Jehovah ben gebroiki en profeiti foe taki: „Mi sa poti prakseri na tapoe den man di e . . . taki na ini den ati: ’Jehovah no sa doe boen èn a no sa doe ogri’” (Sefanja 1:12). A. B. Davidson skrifi wan pisi foe a tori disi na ini a Cambridge Bible for Schools and Colleges, èn a ben taki dati disi e sori go na sma di „soengoe go na ini wan mi-no-kefasi sondro foe abi wan firi, noso srefi taki den no bribi taki wan moro hei makti kan kon boemoei nanga libisma afersi”.

16. Sortoe fasi foe denki foeroe memre foe den kerki foe krestenhèit abi, ma sortoe deki-ati Jehovah e gi wi?

¹⁶ Na someni presi na grontapoe, foeroe sma na ini a ten disi abi wan mi-no-kefasi, èn spesroetoe na ini den kondre di moro goedoe. Srefi memre foe den kerki foe krestenhèit no e bribi taki Jehovah Gado sa boemoei ensrefi nanga libisma afersi na ini wi ten. Den e drai den baka gi den moeiti di wi e doe foe tjari a boen njoensoe foe a Kownoekondre kon gi den, foe di den e lafoelafoe èn sori nanga dati taki den no e bribi san wi e taki noso foe di den e gi wan sjatoe piki: „Mi no abi belangstelling!” Nanga den sortoe situwâsi disi a kan de wan troetroe tjalensi foe horidoro nanga a kotoigiwroko. A e tesi a hori di wi e horidoro. Ma nanga jepi foe a profeititori foe Sefanja, Jehovah e gi a getrow pipel foe en krakti, foe di a e taki: „No meki den anoe foe joe kon swaki. Jehovah joe Gado, de na joe mindri. Leki wan Maktiwan, a sa gi froeloesoe. Nanga prisiri a sa breiti pasa marki foe joe ede. A sa tan pî na ini a lobi foe en. A sa prisiri foe joe ede nanga prisiri babari.” — Sefanja 3:16, 17.

17. Na baka sortoe moi eksempre den njoen wan na mindri den tra skapoe moesoe waka, èn fa?

¹⁷ A troe taki, na ini a disiten historia foe Jehovah en pipel, a fikapisi, so srefi den moro owroewan na mindri den tra skapoe, doe wan bigi wroko foe tjari sma kon na wán na ini den lasti dei disi. Ala den getrow kresten disi sori taki den horidoro ala den someni tenti jari. Den no gi pasi taki a mi-no-kefasi di a moro bigi pisi foe den sma na ini krestenhèit abi, meki den lasi-ati. So boen, no meki den moro njoen wan na mindri den tra skapoe lasi-ati foe di na someni kondre na ini a ten disi, foeroe sma abi wan mi-no-kefasi ini a tori foe jeje afersi. No meki den gi pasi taki ’den anoe foe den kon swaki’, noso taki wi no e wroko so tranga moro. Meki den gebroiki ibri okasi foe pristeri A Waktitoren, Ontwaakt!, nanga tra moi poeblikâsi di ben meki spesroetoe foe jepi sma di agersi skapoe, foe leri a waarheid di abi foe doe nanga a dei foe Jehovah èn den blesi di sa kon.

Go na fesi ala di wi e wakti a bigi dei!

18, 19. (a) Sortoe deki-ati foe horidoro wi kan feni na ini Mateus 24:13 nanga Jesaja 35:3, 4? (b) Sortoe blesi wi sa kisi, te wi e go na fesi leki wán man ini a diniwroko foe Jehovah?

¹⁸ Jesus ben taki: „A sma di horidoro te na a kaba, na en sa kisi froeloesoe” (Mateus 24:13). So boen, no meki wi abi „swaki anoe” noso ’kindi di e beifi’, ala di wi e wakti a bigi dei foe Jehovah! (Jesaja 35:3, 4) A profeititori foe Sefanja e gi wi wan djaranti, ala di a e taki foe Jehovah: „Leki wan Maktiwan, a sa froeloesoe” (Sefanja 3:17). Ija, Jehovah sa froeloesoe a „bigi ipi” foe di a sa meki den pasa a lasti pisi foe „a bigi banawtoe”, te a e gi en Manpikin a komando foe naki den politiek nâsi broko na pisipisi, di tan „abi bigimemrefasi” gi a pipel foe en. — Openbaring 7:9, 14; Sefanja 2:10, 11; Psalm 2:7-9.

¹⁹ Ala di a bigi dei foe Jehovah e kon krosibei, meki wi go na fesi fajafaja ini a dini di wi e dini en „skowroe na skowroe”! (Sefanja 3:9) Te wi e doe disi, dan wisrefi nanga someni trawan, sa de sma di sa „kisi kibri tapoe a dei foe Jehovah en atibron” èn dan wi sa si fa en santa nen e kon santa.

[Foetoewortoe]

Foe loekoe sani sjatoe baka

◻ Na sortoe fasi a situwâsi di de na ini krestenhèit na relisi sei, de a srefi leki a situwâsi di ben de na ini a ten foe Sefanja?

◻ Fa foeroe politiek fesiman na ini a ten disi gersi den „granman” foe grontapoe na ini a ten foe Sefanja?

◻ Sortoe pramisi na ini Sefanja kon troe foe a fikapisi?

◻ San miljoenmiljoen sma kon si?

◻ Foe san ede wi no moesoe meki wi anoe kon swaki ini a diniwroko foe Jehovah?

[Prenki na tapoe bladzijde 14]

Neleki Sefanja, na so a getrow fikapisi foe salfoe kresten meki den kroetoe foe Jehovah bekènti sondro foe frede

[Prenki na tapoe bladzijde 16]

Den „tra skapoe” no gi pasi taki a mi-no-kefasi foe sma meki den lasi-ati