Wi abi troetroe mati fanowdoe
JENNY nanga Sue abi wan fajafaja takimakandra di de prisiri. Lafoe e bari, ai e brenki — a heri fasi fa den e doe, e sori taki den abi troetroe belangstelling gi san a trawan abi foe taki. Ala di den komoto na difrenti koeltoeroe, tokoe a de krin taki gi foeroe sani den abi a srefi belangstelling èn taki den abi foeroe lespeki gi makandra.
Na wan tra presi, joe abi Erik nanga Dennis di e wroko makandra na wan projekt, wan foe den omeni projekt di den wroko wan toe jari kaba nanga makandra. Den no de spanspan, èn sondro moeiti den e lafoe nanga makandra. Te den e go abra foe taki foe serjoesoe tori, dan den e taigi makandra na wan eerlijk fasi fa den e prakseri foe sani. Den e lespeki makandra. Neleki fa Jenny nanga Sue na troetroe mati, na so Erik nanga Dennis na troetroe mati toe.
A fasi fa den e taki dja foe sani, e waran joe ati kande, èn e meki joe denki foe joe eigi mati. Ma a kan de so toe, taki disi e meki joe angri foe abi den sortoe matifasi disi. Joe kan abi den matifasi disi toe!
Foe san ede wi abi troetroe mati fanowdoe
A de prenspari gi wi gosontoe na froestan sei èn na skinfasi foe abi boen matifasi. Ma te wi abi a firi taki wi de wi wawan, dan disi no wani taki, dati wan sani no boen nanga wi. Wan toe sma di e ondrosoekoe sani e taki dati a firi di wan sma abi taki a de en wawan, na wan angri, wan natuurlijk fasi foe sori taki wi abi kompe fanowdoe. Awansi san na a tori, neleki fa njanjan e meki angri kon moro mendri noso e poeroe en, na so a joisti matifasi kan meki a firi di wi abi taki wi de wi wawan, kon moro mendri noso a kan poeroe en srefi. Boiti dati, foe abi boen mati di e si wi leki warti sma, no de wan sani di no kan.
Libisma ben meki nanga a firi taki den abi wan kompe fanowdoe (Genesis 2:18). Bijbel e taki foe wan troetroe mati, noso wan kompe, dati „en mama meki en gi te banawtoe de” (Odo 17:17). Foe dati ede, troetroe mati moesoe man aksi makandra jepi te dati de fanowdoe. Ma matifasi wani taki moro leki foe abi wan sma soso pe wi kan go foe kisi jepi, noso wan sma di de wan kompe di wi kan wroko nanga en noso plèi nanga en. Boen mati e meki den moro boen eigifasi foe makandra kon na fesi. Odo 27:17 e taki: „Nanga isri, isri srefi e kon srapoe. Na so, wan man e srapoe a fesi foe wan trawan.” Neleki fa wan pisi isri kan gebroiki foe srapoe wan nefi di meki foe a srefi sortoe isri, na so wan mati kan srapoe a koni nanga a jejefasi foe a trawan. Efoe den froewakti foe wi no kon troe èn disi e meki taki wi firi sari, dan a kan meki wi firi moro boen, te wan mati e loekoe wi na wan switifasi èn e gi wi deki-ati di komoto na bijbel.
Na ini bijbel, matifasi abi foe doe nanga lobi, noso a de di wan sma de wan boen mati, a hori di wan sma e hori sani na wan froetrowfasi, èn a de di wan sma de wan kompe. Matifasi kan abi foe doe toe nanga birtisma, wroko kompe, èn so moro fara. Son sma e si son famiriman toe leki den moro boen mati. Ma gi foeroe sma na ini a ten disi, a de wan moeilek sani foe feni troetroe mati èn foe hori den. Foe san ede disi de so? Joe kan njan boen foe troetroe matifasi di e tan?