Hori a Memrefesa na wan fasi di fiti

A BEN de na a neti foe 14 Nisan 33 G.T., di Jesus ben seti a Memrefesa.a Didjonsro a ben kaba hori a Paskafesa makandra nanga den 12 apostel foe en, foe dati ede wi kan de seiker foe a datum. Baka di Jesus seni a toriman Judas, gowe, a „ben teki wan brede, ben taki wan blesi, ben broko en èn ben gi en na den, èn ben taki: ’Teki, disi wani taki mi skin.’ Èn baka di a ben teki wan beker, a ben gi Gado tangi èn ben gi en na den, èn den alamala ben dringi foe en. Èn a ben taigi den: ’Disi wani taki mi „broedoe foe a froebontoe”, di sa trowe foe a boen foe foeroe sma.”’ — Markus 14:22-24.

Jesus ben gi den disipel foe en a komando foe memre a dede foe en, foe di disi ben de prenspari (Lukas 22:19; 1 Korentesma 11:23-26). Na ofrandi foe en ben de a wan-enkri ofrandi di ben kan froeloesoe a libisma famiri foe a floekoe foe sondoe nanga dede di den ben kisi (Romesma 5:12; 6:23). A brede nanga a win di a ben gebroiki, ben de simbôl foe en volmaakti skin nanga en broedoe. Foe di wi sabi san na a datum di Jesus ben seti a Memrefesa, dan ibri jari wi kan hori a fesa na a dei di e kroederi nanga a datum dati, neleki fa den ben doe nanga a djoe Paskafesa. Ma wi moesoe doe disi na wan fasi di fiti. Foe san ede?

Na apostel Paulus ben taki dati den sma di e teki prati na den simbôl foe brede nanga win, ben sa „tan meki a dede foe Masra bekènti, te leki a doro” (1 Korentesma 11:26). A mamatori foe a fesa ben sa de so boen a dede foe Jesus èn san a wani taki gi libisma. A fesa ben o de wan serjoesoe wan, wan ten foe prakseri a boen-ati foe Gado èn a warderi di wi moesoe abi gi Jehovah nanga en Manpikin (Romesma 5:8; Titus 2:14; 1 Johanes 4:9, 10). Dati meki Paulus ben warskow: „So boen, a sma di e njan a brede noso e dringi foe a beker foe Masra na wan fasi di no fiti, sa sondoe na a skin èn na a broedoe foe Masra.” — 1 Korentesma 11:27.

Na wan fasi di fiti — Fa?

A de krin, taki Gado no ben sa prisiri efoe wi ben sa pori a fesa foe di wi e doe sani di sma e tweifri na den noso foe di wi e teki heiden gwenti abra (Jakobus 1:27; 4:3, 4). Disi ben sa wani taki dati wi poeroe na oen mindri den pôpi sani di sma e doe na a ten foe Pasen. Efoe wi wani doe san Jesus taigi wi foe doe, foe „tan doe disi foe memre [en]”, dan wi ben sa wani foe hori a Memrefesa neleki fa a ben seti en (Lukas 22:19; 1 Korentesma 11:24, 25). Disi ben sa poeroe den tra sani na oen mindri di den kerki foe krestenhèit poti na a fesa. A New Catholic Encyclopedia e erken taki „a Mis foe now, e difrenti foeroe nanga a toemoesi eenvoudig fesa di Krestes nanga den Apostel foe En ben hori”. Èn foe di krestenhèit e hori a Mis so foeroe, srefi ala dei, meki den drifi komoto na san Jesus ben abi na prakseri, èn meki a kon tron wan gewoon fesa.

Paulus ben skrifi den kresten na Korente foe sma di ben teki prati na wan fasi di no fiti, foe di wan problema ben kon na ini a gemeente ini a tori foe na Avondmaal foe Masra. Wan toe sma no ben abi lespeki gi a santafasi foe a fesa. Den ben tjari den eigi njanjan kon nanga den èn den ben njan en bifo a konmakandra noso na a ten foe a konmakandra. Nofo tron den ben njan èn ben dringi pasa marki. Disi ben meki den kon de nanga sribi na ai èn a froestan foe den no ben de so krin. Foe di den no ben de na ai na froestan sei èn na jejefasi, meki den „no [ben kan] si a skin krin” èn na so fasi den ben tron sma di ben „sondoe na a skin èn na a broedoe foe Masra”. Na a srefi ten dati, den wan di no ben njan, ben abi angri èn disi ben e poeroe den prakseri toe. Pikin moro no wan foe den ben kan teki prati na den simbôl nanga warderi èn foe froestan krinkrin o serjoesoe a fesa ben de — taki a fesa ben de foe memre a dede foe Masra. Disi ben abi leki bakapisi taki Gado ben kroetoe den, bika den no ben sori lespeki gi a fesa, èn srefi ben wisiwasi a fesa. — 1 Korentesma 11:27-34.

A de fanowdoe foe abi a koni foe man si sani krin

Son sma teki prati na den simbôl foe a Memrefesa, ala di, baka ten den ben kon froestan taki den no ben moesoe doe dati. Den sma di nanga reti e teki prati na den simbôl foe a Memrefesa, na Gado ben froekisi den èn a jeje foe Gado kotoigi nanga den foe dati (Romesma 8:15-17; 2 Korentesma 1:21, 22). A no densrefi bosroiti taki den warti foe dati. A nomroe di Gado poti foe den sma di sa tiri makandra nanga Krestes na hemel, na 144.000, wan pikin nomroe te joe e teki en gersi ala den wan di e feni wini foe a loesoe-paiman foe Krestes (Openbaring 14:1, 3). Gado ben bigin froekisi den sma na ini a ten foe Jesus, èn dati meki na ini a ten disi joe abi soso wan toe sma nomo di e teki prati. Èn te sonwan foe den dede, dan a nomroe moesoe kon moro pikin.

Foe san ede wan sma no nanga reti ben sa kan teki prati na den simbôl? Kande dati kon foe a fasi fa a relisi di a ben abi fosi ben meki a denki — taki ala getrow sma e go na hemel. Noso kande a kon foe di a wani wan posisi noso foe di a e prakseri ensrefi nomo — wan firi taki wan sma moesoe kisi moro leki trawan — èn wan angri di wan sma abi foe de prenspari. Kande a de a bakapisi foe tranga firi di a e kisi foe den hebi problema di a abi noso wan sari sani di ben pasa, san meki a lasi belangstelling foe libi na grontapoe. A kan de toe taki wan sma de wan boen mati foe wan sma di abi na hemel howpoe. Wi alamala moesoe memre taki a bosroiti de na Gado wawan, no na wi (Romesma 9:16). Foe dati ede, efoe wan sma, „baka te a ondrosoekoe ensrefi finifini”, kon si taki troetroe a no moesoe teki prati na den simbôl, dan a moesoe tapoe nanga dati now. — 1 Korentesma 11:28.

A howpoe di Gado gi na a moro bigi pisi foe a libisma famiri na di foe têgo libi na ini wan paradijs na grontapoe. Dati na wan moi blesi di wi kan froewakti èn wan di kan hari a firi foe wi makriki (Genesis 1:28; Psalm 37:9, 11). Na grontapoe den getrow-wan sa de baka nanga den lobiwan foe den di opo baka èn den sa miti den regtfardiki sma foe owroeten, soleki Abraham, Sara, Moses, Rakab, David, nanga Johanes a Dopoeman — ala sma di dede, bifosi Jesus ben opo a pasi foe sma libi na hemel. — Mateus 11:11; teki gersi 1 Korentesma 15:20-23.

Den sma di abi a howpoe foe libi na grontapoe, e hori na Avondmaal foe Masra na wan fasi di fiti foe di den drape èn e poti prakseri na tapoe a fesa na wan lespekifasi, ala di den no e teki prati na a brede nanga a win. Den abi wini so srefi foe na ofrandi foe Krestes, di e gi den na okasi foe abi wan boen posisi na fesi foe Gado (Openbaring 7:14, 15). Te den e arki a lezing di e hori, dan a warderi di den abi gi santa sani e kon moro bigi, èn a wani di den wani tan na ini wánfasi nanga a pipel foe Gado na ala sei e kon moro tranga.

A jari disi, baka te son dongo na toedewroko 2 april, a Memrefesa sa hori na ini ala den moro leki 78.000 gemeente foe Jehovah Kotoigi na heri grontapoe. Joe sa de drape?

[Foetoewortoe]

[Prenki na tapoe bladzijde 8]

Jehovah Kotoigi e hori a Memrefesa wan tron wan jari