Foe san ede na Avondmaal foe Masra wani taki wan sani gi joe?
JESUS KRESTES ben seti na Avondmaal foe Masra na a lasti neti foe en libi leki libisma. Dati ben de fodewroko mofoneti, 31 maart èn Jesus ben dede tapoe freida bakadina, 1 april. Foe di den dei foe a Djoe kalender ben e waka foe mofoneti foe a wan dei te go miti di foe a tra dei, meki na Avondmaal foe Masra nanga a dede foe Jesus ala toe ben feni presi tapoe 14 Nisan, 33 G.T.
Foe san ede Jesus ben seti na avondmaal disi? San a brede nanga a win di a ben gebroiki wani taki? Soema moesoe njan èn dringi foe disi? Omeni tron na avondmaal disi moesoe njan? Èn fa a kan wani taki wan sani gi joe?
Foe san ede a ben seti en?
Foe na Avondmaal foe Masra, Jesus ben taigi den apostel foe en: „Tan doe disi foe memre mi”. So leki fa wan tra vertaling e taki, a ben taki: „Doe disi foe tan hori mi na prakseri” (1 Korentesma 11:24; The New English Bible). Te joe loekoe en fini, dan nofotron den e sori tapoe na Avondmaal foe Masra leki a Memrefesa foe a dede foe Krestes.
Jesus ben dede leki wan sma di tan hori en soifri-retifasi foe di a hori a soevereiniteit foe Jehovah hei èn na so fasi a boeweisi taki Satan na wan leimofo tjalensiman foe di a e kragi taki opregti libisma e dini Jehovah nanga a prakseri foe wini gi densrefi nomo (Job 2:1-5). A dede foe en ben meki Gado ati prisiri. — Odo 27:11.
Nanga jepi foe en dede leki volmaakti libisma, Jesus ben ’gi en sili toe leki wan froeloesoe paiman na a presi foe foeroe sma’ (Mateus 20:28). Foe di a fosi sma ben sondoe teige Gado a ben meki volmaakti libisma libi nanga den froewakti foe en lasi gowe. Ma, „Gado ben lobi grontapoe [foe libisma] so te taki a ben gi en wan enkri gebore Manpikin, so taki ibriwan sma di e sori bribi ini en no ben sa kisi pori ma ben sa abi têgo libi” (Johanes 3:16). Ija, „a paiman foe sondoe na dede, ma a presenti di Gado e gi na têgo libi nanga jepi foe Krestes Jesus, wi Masra”. — Romesma 6:23.
„A ben kisi en foe Masra”
Den wortoe foe na apostel Paulus e trowe leti kon tapoe a memre foe a dede foe Krestes: „Mi ben kisi foe Masra a sani di mi ben gi abra na oenoe toe, taki Masra Jesus ben teki wan brede na a neti di den ben o meki den teki en go sroto èn baka di a ben taki tangi, a broko en èn ben taki: ’Disi wani taki mi skin di de foe a boen foe oenoe. Tan doe disi foe memre mi.’ Na a srefi fasi a doe toe nanga a kan, baka di a ben njan a njanjan foe a neti, a ben taki: ’A kan disi wani taki a njoen froebontoe nanga krakti foe mi broedoe. Ibritron te oenoe e doe disi, doe en foe memre mi.’ Bika ibritron te oenoe e njan a brede disi èn e dringi foe a kan disi, oenoe e tan meki a dede foe Masra bekènti, te leki a kon”. — 1 Korentesma 11:23-26.
Foe di Paulus no ben de drape nanga Jesus nanga den 11 apostel na 14 Nisan, 33 G.T. a krin taki a „ben kisi a bodoi disi foe Masra” na ini wan openbaring di ben gi nanga jepi foe santa jeje. Jesus ben seti a Memrefesa „na a neti di Judas ben o meki a go ini anoe” foe den djoe feanti, di ben meki den Romesma anga Krestes na wan oedoe. Den wan di abi a reti foe teki prati na a brede nanga win, di ben de wan simbôl, ben sa doe dati foe memre en.
Ofoeroe tron a ben moesoe hori?
San den wortoe foe Paulus wani taki: „Ibritron te oenoe e njan a brede disi èn e dringi foe a kan disi, oenoe e tan meki a dede foe Masra bekènti, te leki a kon?” Getrow salfoe kresten sa teki prati na den simbôl foe a Memrefesa „foeroetron” te leki den dede, foe baka ten den kisi wan opobaka foe libi ini hemel. Gi Gado nanga grontapoe, so boen, foeroetron den e sori den bribi ini a sani di Jehovah seti nanga jepi foe na ofrandi foe Jesus. Foe o langa? „Te leki a doro”, Paulus ben taki, so leki fa a sori dan a ben wani taki den ben moesoe tan hori en te leki Jesus doro foe teki den salfoe bakaman foe en ini hemel foe di a sa gi den wan opobaka ini a ten foe en „denoja” (1 Tesalonikasma 4:14-17). Disi de ini akroederi nanga den wortoe foe Krestes gi den 11 getrow apostel: „Te mi e teki mi pasi gowe èn sreka wan presi gi oenoe, mi e kon baka èn mi sa teki oenoe na mi oso foe oenoe de na mi, foe oenoe moesoe de toe pe mi de”. — Johanes 14:3.
A dede foe Krestes moesoe memre ibri dei noso ibri wiki? We, Jesus ben seti na Avondmaal foe Masra èn den ben kiri en na tapoe a Paska, di ben de a memre foe a kon fri foe katibo na Egipti. Te joe loekoe en boen, den e kari en „Krestes wi Paska” bikasi en na a Pikin Skapoe di den òfer gi kresten (1 Korentesma 5:7). Den ben hori a Paska wantron nomo wan jari, na 14 Nisan (Exodus 12:6, 14; Levitikus 23:5). A sani disi e sori taki a dede foe Jesus moesoe memre so foeroe nomo leki den ben e hori a Paska — wantron wan jari, no ibri dei noso ibri wiki.
Foeroe jarihondro langa sma di taki den na kresten ben memre a dede foe Jesus wantron wan jari. Foe di den ben e doe dati na 14 Nisan, den ben kari den Kwartodeceniasma, san ben wani taki den „tinafosma”. A historia-skrifiman J.L. von Mosheim ben skrifi foe den: „Den kresten foe Pikin-Asia ben abi a gwenti foe hori a santa fesa disi, leki a memre foe a seti foe na Avondmaal foe Masra, èn a dede foe Jesus Krestes, na a srefi ten di den Djoe ben e njan den Paska pikinskapoe, namkoe na a mofoneti foe a di foe tinafo dei foe a fosi moen [Nisan]. . . . Den ben firi taki den ben moesoe waka baka na eksempel foe Krestes neleki fa den ben sa hori wan wet.
San den simbôl wani taki
Paulus ben taki dati Jesus „ben teki wan brede, baka di a ben taki tangi, a broko en”. A brede dati di ben gersi boeskoetoe di ben baka foe blon nanga watra sondro sroedeki (noso gist) ben moesoe broko foe den ben kan njan en. Ini bijbel agersitori, sroedeki, na sondoe noso bidrigifasi. Di Paulus ben e sori kresten foe Korente tranga foe trowe wan immoreel man na dorosei foe a gemeente, a ben taki: „Oenoe no sabi taki wan pikinso sroedeki e meki a heri deki soewa? Poeroe na owroe sroedeki, so taki oenoe kan tron wan njoen deki, so leki oenoe de sondro soewa. Bikasi, foetroe, den ben srakti Krestes, wi Paska. Meki foe dati ede wi tan hori a fesa na a srefi fasi ala ten, no nanga owroe sroedeki, no nanga sroedeki foe takroefasi èn ogridoe, ma nanga brede di no abi soewa foe opregtifasi èn nanga waarheid” (1 Korentesma 5:6-8). Foe di wan pikin pisi foe sroedeki e soewa a heri deki, noso ipi foe brede, na so a gemeente ben sa kon doti ini Gado ai efoe den no ben poeroe a takroe krakti di a kroektoedoe foe a sondoe sma ben kan abi na den tapoe. A ben de fanowdoe taki den ben moesoe poeroe a „sroedeki” na den mindri, neleki fa den Israèlsma no ben kan abi sroedeki ini den oso na a ten foe a Fesa foe den brede sondro sroedeki, di den ben hori baka a Paskafesa.
Jesus ben taki foe a brede sondro sroedeki foe a Memrefesa: „Disi wani taki mi skin di de foe a boen foe oenoe” (1 Korentesma 11:24). A brede e teki presi foe a volmaakti libisma skin foe Jesus, foe di Paulus ben skrifi: „Te [Jesus] e kon ini grontapoe a e taki: ’„Srakti-ofrandi nanga ofrandi joe no ben wani, ma joe ben sreka wan skin gi mi. Boen bron-ofrandi nanga sondoe-ofrandi joe no ben feni boen.” Dan mi ben taki, „Loekoe! Mi e kon (ini a boekoelolo den ben skrifi foe mi) foe doe joe wani, o Gado”’. . . . Nanga a „wani” dati di a ben taki foe en, wi ben kon de santa nanga jepi foe na ofrandi foe a skin foe Jesus Krestes wantron foe ala ten” (Hebrewsma 10:5-10). A volmaakti libisma skin foe Jesus ben de sondro sondoe èn ben dini leki wan froeloesoe ofrandi gi libisma. — Hebrewsma 7:26.
Baka di Jesus ben begi gi a kan nanga redi win di no ben moksi nanga falsi sani, a ben taki: „A kan disi wani taki a njoen froebontoe nanga krakti foe mi broedoe” (1 Korentesma 11:25). Wan tra vertaling na: „A kan disi wani taki a njoen froebontoe di e kisi krakti nanga mi broedoe” (Moffatt). Neleki fa a broedoe foe mankaw nanga manskapoe ben meki a froebontoe na mindri Gado nanga a nâsi Israèl ben kisi krakti, na so a broedoe foe Jesus di trowe ini dede ben meki a njoen froebontoe kon kisi krakti toe. Foe di den e taki foe a njoen froebontoe, dan dati e jepi wi foe kon si krin soema na den sma di abi a reti foe abi prati na den simbôl foe a Memrefesa.
Soema moesoe teki prati
Den salfoe bakaman foe Jesus ini a njoen froebontoe e teki prati nanga reti na den Memrefesa simbôl. A froebontoe disi sroto na mindri Gado nanga Israèl na jejefasi (Jeremia 31:31-34; Galasiasma 6:16). Ma a njoen froebontoe seikerseiker sa tjari blesi gi ala libisma di e gi jesi èn joe kan de na mindri denwan di e kisi den blesi dati.
Sma di e teki prati na den simbôl foe a Memrefesa moesoe de ini a persoonlijk froebontoe foe a Kownoekondre di Jesus ben meki. Di Jesus ben seti a njanjan disi, a ben taigi den loyaal apostel foe en: „Mi e sroto wan froebontoe nanga oenoe, neleki fa mi Tata ben sroto wan froebontoe nanga mi, foe wan kownoekondre” (Lukas 22:29). A Kownoekondre froebontoe di Gado ben sroto nanga kownoe David ben sori go na fesi na Jesus, a sma di ben o tiri foe têgo ini a hemel Kownoekondre. Den 144.000 Israèlsma na jeje fasi di sa tiri makandra nanga en, den e agersi den leki den e tanapoe na tapoe a hemel bergi Sion nanga a Pikin Skapoe, Jesus Krestes. Te den e kisi wan opobaka, den sa tiri nanga Krestes leki kownoe nanga priester (2 Samuèl 7:11-16; Openbaring 7:4; 14:1-4; 20:6). Soso denwan di de ini a njoen froebontoe èn ini a persoonlijk froebontoe nanga Jesus abi a reti foe gebroiki den simbôl foe na Avondmaal foe Masra.
A jeje foe Gado e kotoigi nanga a jeje foe den salfoewan taki den na En pikin èn kompe erfgenaam nanga Krestes. Paulus ben skrifi: „A jeje srefi e gi kotoigi nanga wi froestan taki wi na pikin foe Gado. We, efoe wi na pikin, wi na erfgenaam toe: ija, erfgenaam foe Gado, ma kompe-erfgenaam nanga Krestes, efoe wi e pina makandra so taki wi kan kisi glori makandra toe” (Romesma 8:16, 17). A santa jeje foe Gado, noso en wroko krakti, e prani ini den salfoewan a froetrow taki den de foe kisi hemel libi. Den e si ala sani di Den Boekoe e taki foe hemel libi leki a de gi den èn den de klariklari foe òfer ala grontapoe sani, dati wani taki libisma libi. Ala di libi ini wan grontapoe paradijs sa de wan wondroe sani, den salfoewan no abi a howpoe dati (Lukas 23:43). Wan seiker èn fasti hemel howpoe di no gron tapoe falsi relisi fasi foe si sani, e gi den a reti foe gebroiki den simbôl foe a Memrefesa.
Jehovah no ben sa feni en boen efoe wan sma e pristeri ensrefi leki wan sma di kisi kari foe de wan hemel kownoe èn priester te a no kisi so wan kari (Romesma 9:16; Openbaring 22:5). Gado ben kiri Korak foe di a ben e soekoe a priesterwroko na wan asrantifasi (Exodus 28:1; Numeri 16:4-11, 31-35). We, san foe doe efoe tranga firi foe fosi relisi idea ben meki wan sma meki wan fowtoe gebroiki foe den Memrefesa simbôl? Dan a man noso na oema dati moesoe stòp foe gebroiki den èn na wan sakafasi begi Gado pardon. — Psalm 19:13.
Fa a e wroko tapoe joe
A no de wan moesoe taki wan sma moesoe abi prati na den Memrefesa simbôl bifo a kan kisi wini foe a froeloesoe ofrandi èn kisi têgo libi na grontapoe. Foe eksempel, bijbel no e sori no wan sani taki den sma disi di ben e frede Gado, so leki Abraham, Sara, Isak, Rebeka, Boas, Rut nanga David, dati wan ten o kon taki den o teki prati na den simbôl disi. Ma den nanga ala den tra sma di e winsi foe kisi libi sondro kaba na a grontapoe disi, sa moesoe foe sori bribi ini Gado nanga Krestes èn ini a seti foe Jehovah foe a ofrandi foe Jesus (Johanes 3:36; 14:1). Na alajari hori foe a fesa foe a dede foe Krestes e dini leki wan memre na a bigi ofrandi dati.
A prensparifasi foe na ofrandi foe Jesus ben tjari kon na fesi di na apostel Johanes ben taki: „Mi e skrifi oenoe den sani disi foe oenoe no doe wan sondoe. Èn srefi, efoe wan sma doe wan sondoe, dan wi abi wan jepiman na a Tata, Jesus Krestes, wan regtfardikiwan. Èn a de wan soen-ofrandi foe wi sondoe, ma no wawan foe di foe wi, ma so srefi toe foe a heri grontapoe” (1 Johanes 2:1, 2). Salfoe kresten kan taki dati Jesus „na wan soen-ofrandi gi den sondoe foe den”. Ma, a de toe wan ofrandi gi den sondoe foe heri grontapoe, foe di a e meki têgo libi ini a paradijs grontapoe di de now krosibei na wi fesi, kon de wan sani di man, gi a libisma famiri di e gi jesi!
Te joe de na a memrefesa foe Krestes dede, joe sa njanboen foe wan bijbel takimakandra di sa meki joe go denki. Joe sa kisi foe jere agen omeni Jehovah Gado nanga Jesus Krestes ben doe gi wi. A sa gi joe jeje wini foe de makandra nanga denwan di abi dipi warderi gi Gado nanga Krestes èn foe a froeloesoe ofrandi foe Jesus. Na okasi sa krakti joe winsi foe troe foe tron wan sma di e kisi a no-froedini boen-atifasi foe Gado, di e tjari joe go na têgo libi. Nanga wi heri ati wi e kari joe foe kon makandra nanga Jehovah Kotoigi baka te son dongo 6 april 1993, foe memre a dede foe Jesus Krestes bikasi na Avondmaal foe Masra kan wani taki foeroe gi joe.