’Oenoe moesoe de santa, bikasi mi de santa’
„Oenoe moesoe sori taki oenoe de santa, bikasi mi, Jehovah, oen Gado, de santa.” — LEFITIKUS 19:2.
1. Soema na wan toe sma di grontapoe e si leki santa?
MORO foeroe foe den moro bigi relisi foe grontapoe abi sma di den e si leki santa sma. Sma e si Moeder Teresa, wan non di ben de pôpi foe a wroko di a ben doe en heri libi langa na India, leki wan santa sma bikasi a ben gi ensrefi foe dini den pôti sma. Den e kari a paus a „Santa Tata”. Wan toe Katoliksma e si José María Escrivá, a sma di ben bigin Opus Dei, a disiten Katolik groepoe, leki wan „eksempre foe santafasi”. A Hindoe bribi abi swami, noso santa man. Den ben kari Gandhi wan santa man. A Boeda bribi abi santa moniki, èn na Islam abi santa profeiti. Ma san a wani taki troetroe foe de wan santa sma?
2, 3. (a) San den wortoe „santa” nanga „santafasi” wani taki? (b) San na wan toe aksi di moesoe kisi piki?
2 A wortoe „santa” wani taki „1. . . foe abi foe doe nanga wan gado; santa. 2. Abi lespeki gi, noso de warti foe dati . . . 3. Libi akroederi wan strak noso hei moreel, relisi noso jeje sistema . . . 4. Poti spesroetoe noso poti aparti gi wan relisi marki.” Na ini bijbel, santafasi wani taki „krin na relisi sei noso soifri na relisi sei”. Akroederi a verwijsboekoe foe bijbel, Inzicht in de Schrift, „a fosi Hebrew [wortoe] qoʹdhesh abi a prakseri foe a de di wan sma de aparti, a gi di wan sma e gi ensrefi krinkrin, noso a santa di a de santa gi Gado, . . . a poti di wan sma poti na wan sei gi a diniwroko foe Gado”.a
3 A nâsi Israèl ben kisi a komando foe de santa. A Wet foe Gado ben taki: „Mi na Jehovah, oen Gado; èn oenoe moesoe santa oensrefi èn oenoe moesoe sori taki oenoe de santa, bikasi mi de santa.” Soema ben de a Fonten foe santafasi? Fa onvolmaakti Israèl sma ben kan tron santa? Èn sortoe lès wi kan feni gi wisrefi na ini a ten disi, na ini a kari di Jehovah e gi foe kon santa? — Lefitikus 11:44.
San Israèl ben abi foe doe nanga a Fonten foe santafasi
4. San ben sori a santafasi foe Jehovah na Israèl?
4 Ala sani di ben abi foe doe nanga na anbegi di Israèl ben anbegi Jehovah Gado, den ben moesoe si leki santa èn den ben moesoe handri nanga den leki santa sani. Foe san ede? Bikasi Jehovah srefi de a bigin èn a fonten foe santafasi. A tori foe Moses foe a sreka di den ben sreka a santa tabernakel nanga den krosi nanga den moimoi sani, e tapoe nanga den wortoe: „Te foe kaba den ben meki a brenki plaat di meki foe soifri gowtoe, di ben de a santa marki foe a gi di den gi densrefi abra na Gado, èn na en tapoe den ben kerfoe wan sani, nanga a koni foe man kerfoe sani tapoe wan zegel: ’Santafasi de foe Jehovah.’” A brenki plaat disi di meki foe soifri gowtoe, ben fasi na a ede-doekoe foe a hei-priester, èn a plaat disi ben wani taki dati a hei-priester ben poti aparti gi wan wroko foe spesroetoe santafasi. Te den ben si a marki disi pe sani ben kerfoe na tapoe, e skèin na ini a leti foe a son, dan dati ben memre den doronomo na a santafasi foe Jehovah. — Exodus 28:36; 29:6; 39:30.
5. Fa onvolmaakti Israèlsma ben kan de santa?
5 Ma fa den Israèlsma ben kan kon santa? Soso nanga jepi foe a krosibei matifasi foe den nanga Jehovah èn na anbegi di den e anbegi en na wan soifri fasi. Den ben abi soifri sabi fanowdoe foe „a Moro Santawan” so taki den kan anbegi en na ini santafasi, krin na skinfasi èn na jejefasi (Odo 2:1-6; 9:10). Foe dati ede den Israèlsma ben moesoe anbegi Gado nanga wan soifri reide èn wan soifri ati. Ibri hoigrifasi foe anbegi ben sa de wan tegoe sani gi Jehovah. — Odo 21:27.
Foe san ede Jehovah ben kroetoe Israèl
6. Fa den djoe na ini den dei foe Maleaki ben handri nanga a tafra foe Jehovah?
6 Disi ben de krin foe si di den Israèlsma, na wan mi-no-ke fasi, ben e tjari ofrandi di no boen èn di swaki go na a tempel. Nanga jepi foe en profeiti Maleaki, Jehovah ben kroetoe den ofrandi di no ben de boen: „’Mi no abi no wan prisiri na oenoe’, Jehovah foe den legre taki, ’èn mi no e prisiri foe a presenti-ofrandi foe oen anoe’. . . . ’Ma oenoe e pori mi santafasi foe di oenoe e taki: „A tafra foe Jehovah na wan sani di kon doti, èn den froktoe foe en na wan tegoe sani, a njanjan foe en.” Èn oenoe taki: „Loekoe! Fa oenoe e weri oensrefi so!” èn oenoe meki taki sma e hari den noso gi en’, Jehovah foe den legre taki. ’Èn oenoe tjari wan sani kon di priti, èn a lanwan, èn a sikiwan; ija, oenoe tjari [en] kon leki wan presenti. Mi kan prisiri foe en na oenoe anoe?’ Jehovah taki.” — Maleaki 1:10, 12, 13.
7. Sortoe sani di no santa, den djoe ben doe na ini a di foe feifi jarihondro b.G.T.?
7 Gado ben gebroiki Maleaki foe kroetoe den falsi doe foe den djoe, dati ben de kande na a di foe feifi jarihondro b.G.T. Den priester no ben gi wan boen eksempre, èn a fasi fa den ben tjari densrefi no ben santa srefisrefi. A pipel di ben waka na baka na eksempre foe den, no ben hori densrefi na den gronprakseri foe Gado, èn den ben go so fara toe foe broko trow nanga den wefi foe den, kande so taki den ben kan teki moro jongoe heiden wefi. Maleaki ben skrifi: „’Jehovah srefi gi kotoigi na mindri joe nanga a wefi foe joe jongoe jari, nanga soema oenoe handri feradelek,b ala di a de joe patna èn a wefi foe joe froebontoe. . . . Èn oenoe moesoe kibri oensrefi gi oen jeje, èn no wan sma moesoe handri feradelek nanga a wefi foe en jongoe jari. Bikasi a no wani si brokotrow na ai’, Jehovah, a Gado foe Israèl, taki.” — Maleaki 2:14-16.
8. Fa a disiten fasi fa sma e si brokotrow abi krakti na tapoe wan toe sma na ini a kresten gemeente?
8 Na ini a ten disi, na foeroe kondre pe a makriki foe broko wan trow, a nomroe foe trow di broko, kren esi-esi. Srefi na tapoe a kresten gemeente a abi krakti. Son sma ben prati nanga a patna foe den toemoesi esi, na presi foe soekoe a jepi foe den owroeman foe man loesoe den problema èn foe proeberi foe meki a trowlibi foe den waka boen. Nofo tron a de den pikin di e pina foeroe na emotioneel sei. — Mateus 19:8, 9.
9, 10. Fa wi moesoe prakseri foe na anbegi di wi e anbegi Jehovah?
9 Soleki fa wi ben si didjonsro, foe di a situwâsi na jejefasi ben takroe toemoesi na ini den dei foe Maleaki, meki Jehovah ben kroetoe langalanga na anbegi foe Juda di warti noti èn a ben sori taki a ben sa teki soifri anbegi wawan. Disi no moesoe meki wi denki foe a fasi fa wi e anbegi Jehovah Gado, a Tiriman foe hemel nanga grontapoe, a Fonten foe troe santafasi? Wi e gi Gado troetroe santa diniwroko? Wi e hori wisrefi na ini wan krin situwâsi na jejefasi?
10 Disi no wani taki dati wi moesoe de volmaakti, bikasi dati na wan sani di no kan, noso taki wi moesoe teki wisrefi gersi nanga tra sma. Ma a wani taki dati ibri kresten moesoe gi a moro boen anbegi na Gado, di a man gi na ini en eigi situwâsi. Disi e sori go na a fasi foe na anbegi foe wi. A santa diniwroko foe wi moesoe de a moro boen wan di wi kan gi — namkoe, santa diniwroko. Fa wi kan doe dati? — Lukas 16:10; Galasiasma 6:3, 4.
Soifri ati abi soifri anbegi leki bakapisi
11, 12. San na a fonten foe a fasi fa sma e tjari densrefi na wan fasi di no santa?
11 Jesus ben gi leri krinkrin taki san de na ini na ati, sa kon de krin foe si nanga jepi foe den sani di wan sma e taki èn e doe. Jesus ben taigi den Fariseisma di ben regtfardiki densrefi, ma di no ben de santa, taki: „Sneki pikin, fa oenoe kan taki boen sani te oenoe na godelowsoe sma? Bikasi san foeroe na ati pasa marki, na dati a mofo e taki.” Baka ten, a ben sori taki ogridoe e opo kon foe ogri prakseri na ini na ati, noso foe na inisei sma. A ben taki: „San e komoto na a mofo, e kon foe na ati, èn den sani dati e doti wan sma. Foe eksempre, ogri prakseri, kiri, soetadoe, hoeroedoe, foefoeroe, falsi kotoigi nanga blasfemia, e kon foe na ati. Disi na den sani di e doti wan sma.” — Mateus 12:34; 15:18-20.
12 Disi e jepi wi foe froestan taki sani di sma e doe èn di no santa, a no sani di den e doe wantewante so noso sondro taki den abi wan reide gi dati. Den sani dati na a bakapisi foe den doti prakseri di ben de na wan kibri fasi na ini na ati — kibri lostoe èn kande foe a sidon di sma e sidon dren foe sani. Dati na foe san ede Jesus ben kan taki: „Oenoe ben jere taki den ben taki: ’Joe no moesoe doe soetadoe.’ Ma mi e taigi oenoe taki ibriwan sma di e tan loekoe wan oema foe kan abi sekslostoe gi en, na ini en ati a doe soetadoe kaba nanga en.” Nanga tra wortoe, hoeroedoe nanga soetadoe sidon tranga kaba na ini na ati bifo wan sma doe wan sani. Èn na ini situwâsi pe na okasi de, dan den prakseri di no santa e tron a tjari di sma e tjari densrefi na wan fasi di no santa. Hoeroedoe, soetadoe, homo libi, foefoeroe, blasfemia, èn a fadon di sma e fadon komoto na bribi, e tron wan toe foe den bakapisi di de krin foe si. — Mateus 5:27, 28; Galasiasma 5:19-21.
13. San na wan toe eksempre foe sori fa prakseri di no santa, kan meki sma doe sani di no santa?
13 Wi kan gi eksempre foe disi na difrenti fasi. Na wan toe kondre, dòbel-oso e kon esi-esi moro foeroe, èn dati e gi moro okasi foe dòbel. Wan sma ben sa kan fadon na ini a tesi foe go soekoe jepi na den sortoe loesoe disi gi den moni problema foe en. Triki denki ben sa kan kori wan brada foe weigri foe teki bijbel gronprakseri noso foe no si den leki prenspari.c Na ini wan tra kefal, a de di a de makriki foe loekoe seks boekoe, awinsi tapoe telefisi, video, computer, noso na ini boekoe, ben kan meki wan kresten tjari ensrefi na wan fasi di no santa. Efoe a no e poti prakseri moro na tapoe a jeje fetisani foe en, dan heri esi a kan fadon na ini hoeroedoe. Ma na ini moro foeroe kefal, a saka di wan sma e saka go na ini sondoe e bigin na ini a froestan. Ija na ini den sortoe situwâsi disi, den wortoe foe Jakobus kon troe: „Ibriwan sma e kisi tesi foe di en eigi lostoe e hari en èn e kori en. Baka dati a lostoe, te a meki froktoe, e tjari sondoe kon.” — Jakobus 1:14, 15; Efeisesma 6:11-18.
14. Fa foeroe sma kon boen baka foe a tjari di den no tjari densrefi na wan santa fasi?
14 Kolokoe taki foeroe kresten di sondoe foe di den ben swaki, e sori troetroe berow, èn den owroeman man foe meki den sortoe sma disi kon boen baka na jejefasi. Srefi foeroe sma di sluit uit foe di den no ben abi berow, e kisi densrefi te foe kaba èn den e kon de wan memre baka na ini a gemeente. Den e kon froestan o makriki Satan ben teki den abra di den ben gi pasi meki prakseri di no santa bigin gi roetoe na ini den ati. — Galasiasma 6:1; 2 Timoteus 2:24-26; 1 Petrus 5:8, 9.
A tjalensi — Foe erken den swakifasi foe wi èn foe doe wan sani na tapoe
15. (a) Foe san ede wi moesoe erken èn doe wan sani na tapoe den swakifasi foe wi? (b) San kan jepi wi foe erken den swakifasi foe wi?
15 Wi moesoe doe moeiti foe kon sabi fa wi eigi ati de troetroe. Wi wani kon sabi den swakifasi foe wi, erken den, èn doe wan sani foe wini den? Wi wani aksi wan opregti mati san wi ben kan doe foe meki go na fesi, èn dan e arki a rai foe en? Efoe wi wani tan santa, dan wi moesoe wini den swakifasi foe wi. Foe san ede? Bikasi Satan sabi den swakifasi foe wi. A sa gebroiki den triki wrokosani foe en foe poesoe wi foe doe sondoe èn foe tjari wisrefi na wan fasi di no santa. Nanga jepi foe den triki sani di a e doe, a e proeberi foe prati wi foe a lobi foe Gado so taki wi no de santa moro èn taki Jehovah no wani gebroiki wi moro gi na anbegi foe en. — Jeremia 17:9; Efeisesma 6:11; Jakobus 1:19.
16. Sortoe strei Paulus ben abi?
16 Na apostel Paulus ben abi en eigi problema nanga tesi, soleki fa ensrefi taki na ini a brifi foe en gi den Romesma: „Mi sabi taki na ini mi, dati wani taki, na ini mi skin, no wan sani no de di boen; bikasi a man di mi man winsi de na ini mi, ma a man di mi man doe san boen no de na ini mi. Bikasi a boen di mi wani doe, mi no e doe, ma na ogri di mi no wani doe, na dati mi e doe. . . . Mi e prisiri troetroe foe a wet foe Gado akroederi a sma di mi de na inisei, ma na ini den memre foe mi skin, mi e si wan tra wet e feti nanga a wet foe mi froestan èn di e tjari mi go na ini katibo foe a wet foe a sondoe di de ini den memre foe mi skin.” — Romesma 7:18-23.
17. Fa Paulus ben man wini a strei di a ben strei nanga den swakifasi?
17 A prenspari penti na ini a kefal foe Paulus na taki a ben erken den swakifasi foe en. Ala di a ben abi den, tokoe a ben kan taki: „Mi e prisiri troetroe foe a wet foe Gado akroederi a sma [na jejefasi] di mi de na inisei.” Paulus ben lobi san boen èn a no ben wani si takroe na ai. Ma tokoe a ben abi wan strei foe feti, a srefi feti di wi alamala abi — nanga Satan, nanga grontapoe, èn nanga a skin. So boen, fa wi kan wini a feti foe tan santa, aparti foe a grontapoe disi nanga en fasi foe denki? — 2 Korentesma 4:4; Efeisesma 6:12.
Fa wi kan tan santa?
18. Fa wi kan tan santa?
18 Wi no e kon santa te wi e doe san moro makriki noso te wi wani satisferi wisrefi nomo. A sortoe sma dati ala ten baka sa soekoe reide gi a fasi fa a e tjari ensrefi èn a sa proeberi foe gi wan tra sani a fowtoe. Kande wi moesoe leri foe teki a frantiwortoe foe den sani di wi e doe èn no moesoe de leki wan toe sma di e taki dati takroe bakapisi na a lòt foe den bikasi foe a background foe a famiri foe den noso foe di den gebore nanga den eigifasi dati. A roetoe foe na afersi de na ini na ati foe a sma. A sma lobi regtfardikifasi? A e angri gi santafasi? A e angri foe kisi den blesi foe Gado? A psalm singiman ben tjari kon na krin foe san ede a de fanowdoe foe de santa, di a ben taki: „Drai gowe foe sani di takroe, èn doe san boen; proeberi foe feni vrede, èn feti na en baka.” Na apostel Paulus ben skrifi: „Meki oen lobi de sondro hoigrifasi. Tegoe gi godelowsoefasi, hori fasti na san boen.” — Psalm 34:14; 97:10; Romesma 12:9.
19, 20. (a) Fa wi kan bow wi froestan? (b) San a wani taki foe abi boen persoonlijk studie?
19 Wi kan „hori fasti na san boen” efoe wi e si afersi na a fasi fa Jehovah e si den èn efoe wi abi a denki foe Krestes (1 Korentesma 2:16). Fa wi kan doe disi? Te wi e studeri Gado Wortoe doronomo èn e prakseri dipi foe en wortoe. Omeni tron a rai disi gi kaba! Ma wi e si en nofo leki wan serjoesoe sani? Foe eksempre, joe e studeri a tijdschrift disi troetroe, e loekoe den bijbel tekst, bifo joe e kon na a konmakandra? Te wi e taki foe studeri, dan wi no e taki nomo foe a hari di wi e hari lin na ondro wan toe zin foe ibri paragraaf. Wi kan loekoe wan studie artikel esi-esi èn hari lin na ini pikinmoro leki 15 miniti. Dati wani taki dati wi studeri na artikel? Te joe loekoe en boen, a ben sa kan teki wán joeroe noso toe joeroe foe studeri èn foe teki a jeje winimarki na ini wi, di ibri artikel e gi.
20 Kande wi moesoe gi wisrefi tranga leri foe drai wi baka gi a telefisi gi wan toe joeroe ibri wiki èn e poti prakseri troetroe na tapoe a santafasi foe wisrefi. A studeri di wi e studeri doronomo e bow wi na jejefasi, èn a e poesoe a prakseri foe wi foe teki joisti bosroiti — bosroiti di e meki wi „tjari [wisrefi] na wan santa fasi”. — 2 Petrus 3:11; Efeisesma 4:23; 5:15, 16.
21. Sortoe aksi moesoe kisi piki ete?
21 Na aksi de now: Na ini sortoe tra kontren èn fasi fa wi e tjari wisrefi, wi leki kresten kan de santa, neleki fa Jehovah santa? Na artikel di e kon now sa gi wi bodoi di warti foe prakseri foe den.
[Foetoewortoe]
a A Watchtower Bible and Tract Society of New York, Inc., tjari a verwijsboekoe disi di abi toe pisi, kon na doro.
b Gi wan moro finifini ondrosoekoe foe san „verraderlijk” (feradelek) wani taki, loekoe Ontwaakt! foe 8 februari 1994, bladzijde 21, „Wat voor echtscheiding haat God?” (Sortoe brokotrow Gado no wani si na ai?)
c Gi moro bodoi foe san ede dòbel no de wan santa fasi fa sma e tjari densrefi, loekoe Ontwaakt! foe 8 august 1994, bladzijde 14-15, di a Watchtower Bible and Tract Society of New York, Inc., tjari kon na doro.
Joe e memre disi ete?
◻ Fa den ben kon sabi a Fonten foe santafasi na Israèl?
◻ Na sortoe fasi na anbegi foe den Israèlsma no ben santa na ini den dei foe Maleaki?
◻ Pe a e bigin taki wan sma e tjari ensrefi na wan fasi di no santa?
◻ San wi moesoe erken efoe wi wani de santa?
◻ Fa wi kan tan santa?