’Oenoe moesoe kon santa toe na ini ala fasi fa oenoe e tjari oensrefi’
„Oenoe so srefi moesoe kon santa toe, akroederi a Santa Sma di ben kari oenoe, na ini ala fasi fa [oenoe] e tjari [oensrefi], bika Boekoe taki: „Oenoe moesoe de santa, bika mi de santa.” —1 PETRUS 1:15, 16.
1. Foe san ede Petrus ben gi kresten a deki-ati foe de santa?
FOE SAN EDE na apostel Petrus ben gi a rai di skrifi na tapoesei? Bikasi a ben si taki a de fanowdoe taki ibri kresten e kibri den prakseri foe en èn den sani di a e doe so taki den kan de akroederi a santafasi foe Jehovah. Foe dati ede, bifo a ben taki den wortoe di skrifi na tapoesei, a ben taki fosi: „Tranga oen jeje foe doe a wroko, hori oensrefi dorodoro . . . Leki pikin di e gi jesi, no seti oensrefi moro akroederi den lostoe di oenoe ben abi fositen, di oenoe no ben sabi.” — 1 Petrus 1:13, 14.
2. Foe san ede den lostoe foe wi no ben de santa bifo wi ben leri a waarheid?
2 Den fositen lostoe foe wi no ben de lostoe di ben santa. Foe san ede? Bikasi foeroe foe wi ben waka a pasi foe grontapoe, bifo wi ben teki a kresten waarheid. Petrus ben sabi disi di a ben skrifi krinkrin: „A nofo taki na ini a ten di pasa oenoe doe a wani foe den nâsi foe di oenoe ben gi oensrefi abra na doe foe loesoe fasi foe libi, gridi lostoe, a dringi foe win pasa marki, dringi èn njan pasa marki, fesa foe dringi sopi nanga na anbegi foe kroektoe gado na wan fasi di wet no e gi pasi foe dati.” A no de foe taki, dati Petrus no ben taki foe sani di sma e doe èn di no santa èn di wi sabi soso na ini a disiten grontapoe foe wi, bikasi na a ten dati sma no ben sabi den sani dati. — 1 Petrus 4:3, 4.
3, 4. (a) Fa wi kan tapoe den fowtoe lostoe? (b) Kresten moesoe de sondro firi? Froeklari.
3 Joe ben si taki den lostoe disi na lostoe di e doe hari sma skin, den zintuigen foe wi, èn den firi foe wi? Te wi e gi den lostoe disi na okasi foe basi wi, dan heri makriki den prakseri nanga den sani di wi e doe, kan tron sani di no santa. Disi e sori taki a de fanowdoe foe meki a krakti foe wi denki basi den sani di wi e doe. Paulus ben taki en na a fasi disi: „Dati meki mi e teki a sari-ati foe Gado begi oenoe, oen brada, foe pristeri oen skin leki wan srakti-ofrandi di de libilibi, santa èn e fiti Gado ai, wan santa diniwroko nanga a krakti foe oen denki.” — Romesma 12:1, 2.
4 Efoe wi wani pristeri Gado wan santa srakti-ofrandi, dan wi moesoe meki a krakti foe wi denki, no den firi foe wi, basi wi. O foeroe sma ben doe hoeroedoe bikasi den ben gi pasi meki den firi foe den basi a fasi fa den e tjari densrefi! Dati no wani taki dati wi moesoe dwengi den firi foe wi foe no sori den, noso bikasi fa wi ben sa kan sori prisiri na ini a diniwroko gi Jehovah? Ma efoe wi wani sori den froktoe foe a jeje na presi foe den wroko foe a skin, dan wi moesoe kenki a denki foe wi go na a fasi fa Krestes e denki. — Galasiasma 5:22, 23; Filipisma 2:5.
Wan santa prijs, wan santa libi
5. Foe san ede Petrus ben froestan a fanowdoe foe de santa?
5 Foe san ede Petrus ben froestan heri boen taki a de fanowdoe taki kresten moesoe de santa? Bikasi a ben sabi heri boen san na a santa prijs di ben pai foe loesoe a libisma famiri di e gi jesi. A ben skrifi: „Oenoe sabi taki a no nanga sani di e pori gowe, nanga solfroe noso gowtoe, taki oenoe ben kon fri foe a fasi fa oenoe ben tjari oensrefi na wan fasi di warti noti, èn di oenoe ben kisi foe oen fositen tata. Ma a ben de nanga diri broedoe, leki di foe wan pikin skapoe di no doti èn di no abi flaka, ija foe Krestes” (1 Petrus 1:18, 19). Ija, a Fonten foe santafasi, Jehovah Gado, ben seni en wan-enkri gebore Manpikin, „a Santa Sma”, go na grontapoe foe pai a loesoe-paiman di ben sa gi libisma na okasi foe abi wan boen matifasi nanga Gado. — Johanes 3:16; 6:69; Exodus 28:36; Mateus 20:28.
6. (a) Foe san ede a no makriki gi wi foe feti na baka wan santa fasi foe tjari wisrefi? (b) San kan jepi wi foe tjari wisrefi na wan santa fasi?
6 Ma wi moesoe erken taki a no makriki foe libi wan santa libi ala di wi de na mindri a kroeka grontapoe foe Satan. A e poti trapoe gi troe kresten di e proeberi foe tan na libi ini en seti foe sani (Efeisesma 6:12; 1 Timoteus 6:9, 10). Den druk foe grontapoe wroko, foe a gens foe famiri, foe spotoe na skoro, nanga a druk foe tini, e meki a de fanowdoe foe tan tranga na jejefasi efoe wan sma wani tan hori en santafasi. Dati e poti krakti na tapoe a prenspari ròl foe a persoonlijk studie foe wi èn foe fisiti den kresten konmakandra doronomo. Paulus ben gi Timoteus a rai: „Tan hori a model foe gosontoe wortoe di joe ben jere foe mi, nanga a bribi nanga lobi di abi foe doe nanga Krestes Jesus” (2 Timoteus 1:13). Na ini wi Kownoekondre zaal wi e jere den wortoe dati di e gi gosontoe èn wi e leisi den te wi e studeri bijbel persoonlijk. Den kan jepi wi foe de santa na ini a fasi fa wi e tjari wisrefi ibri dei èn na ini foeroe difrenti situwâsi.
Santa fasi foe tjari wisrefi na ini na osofamiri
7. Fa santafasi moesoe abi krakti na tapoe wi osofamiri libi?
7 Di Petrus ben teki den wortoe foe Lefitikus 11:44 skrifi, a ben gebroiki a Griki wortoe haʹgi·os di wani taki, „de aparti foe sondoe èn foe dati ede e gi wisrefi na Gado, santa” (An Expository Dictionary of New Testament Words, foe W. E. Vine). Fa a santafasi disi moesoe abi krakti na tapoe wi na ini wi kresten osofamiri libi? A wani taki troetroe taki wi osofamiri libi moesoe gron tapoe lobi, bikasi „Gado na lobi” (1 Johanes 4:8). A lobi foe òfer wisrefi, na a oli di e safoe a matifasi na mindri den trowpatna èn na mindri papa nanga mama èn den pikin. — 1 Korentesma 13:4-8; Efeisesma 5:28, 29, 33; 6:4; Kolosesma 3:18, 21.
8, 9. (a) Sortoe situwâsi e opo kon son tron na ini wan kresten oso? (b) Sortoe gosontoe rai bijbel e gi ini na afersi disi?
8 Wi ben sa kan prakseri taki a de foe ensrefi taki a lobi disi ben sa de na ini wan kresten osofamiri. Ma wi moesoe erken taki a no ala ten lobi e tiri a situwâsi na ini wan toe kresten osofamiri na a fasi fa a moesoe de. A ben sa kan gersi taki a de so na a Kownoekondre zaal, ma o makriki a santafasi foe wi ben sa kan kon moro mendri te wi de na oso. Dan wantewante so wi ben sa kan frigiti taki a wefi de wi kresten sisa ete noso taki a masra de a srefi brada ete (èn kande wan dinari na ini a diniwroko noso wan owroeman) di ben gersi taki wi ben lespeki en na a Kownoekondre zaal. Wi e bigin mandi, èn fajafaja kesekese kan opo kon. Wan dobroe markitiki srefi ben kan kon safrisafri na ini wi libi. A no de wan matifasi moro foe wan kresten masra nanga wan kresten oema, ma soso foe wan man nanga wan oema di abi wan kesekese. Den frigiti taki wan santa situwâsi moesoe de na ini na oso. Kande den e bigin taki leki grontapoe sma. A makriki srefisrefi taki ogri wortoe, dreigi wortoe kan komoto dan na a mofo! — Odo 12:18; teki gersi Tori foe den Apostel 15:37-39.
9 Ma Paulus e gi a rai: „No meki no wan pori wortoe [Griki, loʹgos sa·prosʹ, „doti wortoe”, èn foe dati ede den no santa] komoto na joe mofo, ma ibri wortoe di boen foe bow tra sma pe a de fanowdoe, so taki nanga dati den arkiman kan kisi wan sani di boen.” Èn dati abi foe doe nanga ala den arkiman na ini na oso, so srefi den pikin. — Efeisesma 4:29; Jakobus 3:8-10.
10. Fa rai ini a tori foe santafasi e fiti toe gi pikin?
10 A tirilin disi di abi foe doe nanga santafasi, de so srefi gi den pikin na ini wan kresten osofamiri. A makriki srefisrefi gi den foe kon foe skoro go na oso èn bigin waka na baka na eksempre foe den grontapoe speri foe den di e taki na wan oproeroe fasi èn na wan fasi di no e sori respeki! Pikin, no lobi den fasi fa den boi di no abi boen maniri e tjari densrefi, den boi di ben afrontoe a profeiti foe Jehovah èn di abi den speri tide na ini dotimofo blasfemia sma (2 Kownoe 2:23, 24). A fasi fa joe e taki no moesoe doti nanga a grofoe doti taki foe sma di lesi toemoesi noso di don toemoesi foe gebroiki boen wortoe. Leki kresten, wi wortoe moesoe de santa, switi, e bow sma, a moesoe de boen èn a moesoe „abi tesi nanga sowtoe”. A moesoe meki sma sabi wi leki sma di e difrenti foe tra sma. — Kolosesma 3:8-10; 4:6.
Santafasi te wi e handri nanga memre foe wi osofamiri di no de na bribi
11. Foe san ede a de di wan sma de santa, no wani taki dati wan sma moesoe denki taki a moro betre leki trawan?
11 Ala di na wan opregti fasi wi e proeberi foe kweki santafasi, tokoe wi no moesoe sori wisrefi hei moro trawan èn handri neleki wi moro betre leki tra sma, spesroetoe te wi e handri nanga den memre foe wi osofamiri di no de na bribi. A switi fasi fa wi e tjari wisrefi leki kresten moesoe jepi den nomo foe si taki wi e difrenti na wan positief fasi, taki wi sabi fa foe sori lobi nanga sari-atifasi, neleki fa a boen Samariasma na ini na agersitori foe Jesus ben doe. — Lukas 10:30-37.
12. Fa kresten trowpaar kan meki taki a waarheid e hari den patna foe den moro?
12 Petrus ben poti krakti na tapoe a prensparifasi foe abi wan joisti fasi foe tjari wisrefi nanga wi osofamiri memre di no de na bribi, di a ben skrifi gi den kresten wefi: „Na a srefi fasi, oen wefi, saka oensrefi na oen eigi masra ondro, so taki efoe son wan foe den no e gi jesi na a wortoe, dan a fasi fa den wefi [foe den] e tjari densrefi kan wini den sondro wan wortoe, foe di den si fa oenoe ben tjari oensrefi na wan boen fasi makandra nanga dipi lespeki.” Wan kresten wefi (noso wan masra ini a tori disi) kan meki waarheid hari wan patna di no de na bribi, efoe a fasi fa a e tjari ensrefi de krin, e hori sma na prakseri, èn de nanga lespeki. Disi wani taki dati a no moesoe hori strak na wan theokrasia schema, so taki a no e sorgoe boen gi a patna di no de na bribi noso taki a no e poti prakseri na en tapoe.a — 1 Petrus 3:1, 2.
13. Fa son tron owroeman nanga dinari ini a diniwroko kan jepi den masra di no de na bribi foe warderi a waarheid?
13 Son tron den owroeman nanga den dinari ini a diniwroko kan jepi so wan trowpaar te den kon sabi èn abi demakandra nanga a masra di no de na bribi, na tra okasi. Na a fasi disi a kan si taki den Kotoigi na gewoon sma, sma di abi boen maniri èn di abi belangstelling gi foeroe sani, so srefi gi sani di no abi foe doe nanga bijbel. Na ini wán kefal, wan owroeman ben sori belangstelling gi a lobi di wan masra ben lobi foe go oekoe. Dati ben nofo foe broko a skotoe di ben de na mindri den na a bigin èn foe bigin wan matifasi. Te foe kaba, a masra dati ben kon tron wan dopoe brada. Na ini wan tra kefal, wan masra di no de na bribi ben lobi kanari fowroe. Den owroeman no ben gi abra. Wán foe den ben go studeri sani foe den kanari fowroe so taki a tra leisi te a ben sa miti a man, a ben kan bigin wan takimakandra foe a tori dati di a masra ben lobi! Te wan sma de santa, dan dati no wani taki dati a moesoe de strak noso taki a moesoe si sani na wán fasi nomo. — 1 Korentesma 9:20-23.
Fa wi kan de santa na ini a gemeente?
14. (a) San na wán foe den fasi di Satan e gebroiki foe swaki a gemeente? (b) Fa wi kan kakafoetoe gi a trapoe foe Satan?
14 Satan Didibri na wan ogri-ati leiman, bikasi a Griki wortoe gi Didibri, di·aʹbo·los, wani taki „kragiman” noso „ogri-ati leiman”. Ogri-ati lei na wan foe den sani di a sabi doe heri boen, èn a e proeberi foe gebroiki dati na ini a gemeente. A sani di a e gebroiki moro, na foe taki takroe foe tra sma. Wi e gi pasi taki a kan gebroiki wi a fasi disi di no santa? Fa dati ben kan pasa? Te wi e bigin foe taki takroe foe sma, foe taki den sani di wi kisi foe jere, noso foe arki na dati. A koni odo e taki: „Wan man di e doe triki sani e tan meki trobi, èn wan ogri-ati leiman e prati den wan di abi froetrow demakandra” (Odo 16:28). San na a dresi gi a taki di sma e taki takroe foe sma èn foe ogri-ati lei? Wi moesoe sorgoe taki a fasi fa wi e taki, moesoe de ala ten na wan fasi di e bow sma èn a moesoe abi en gron tapoe lobi. Efoe wi e soekoe den boen eigifasi foe wi brada na presi foe soekoe fowtoe di den abi kande, dan den takimakandra di wi abi sa de ala ten switi èn den sa abi foe doe nanga jeje afersi. Hori na prakseri taki a makriki foe feni fowtoe na tra sma. Èn a sma di e froeteri joe takroe foe tra sma, kan froeteri tra sma takroe foe joe toe! — 1 Timoteus 5:13; Titus 2:3.
15. Sortoe eigifasi foe kresten sa jepi foe hori ala sma santa na ini a gemeente?
15 Foe man hori a gemeente santa, wi alamala moesoe abi a denki foe Krestes, èn wi sabi taki a moro prenspari eigifasi foe en de lobi. Foe dati ede Paulus ben gi den Kolosesma a rai foe abi sari-atifasi neleki Krestes: „Foe dati ede, leki den wan di Gado froekisi, di santa èn di a lobi, weri gi oensrefi den safoe firi foe lobi foe sari-ati, boen-atifasi, sakafasi foe jeje, safri-atifasi nanga langa pasensi . . . , gi makandra pardon na wan fri fasi . . . Boiti den sani disi, weri lobi gi oensrefi, bika a de wan volmaakti banti foe wànfasi.” Ne a ben taki moro fara: „Meki so srefi a vrede foe a Krestes basi oen ati.” Seiker, nanga a jeje disi foe gi pardon, wi kan tan hori a wánfasi èn a santafasi foe a gemeente. — Kolosesma 3:12-15.
A santafasi foe wi de foe si na ini a birti foe wi?
16. Foe san ede a santa anbegi foe wi moesoe de kolokoe anbegi?
16 Fa a de nanga den birtisma foe wi? Fa den e prakseri foe wi? Wi e skèin a prisiri foe a waarheid, noso wi e meki a gersi wan hebi? Efoe wi de santa neleki fa Jehovah de santa, dan dati moesoe de krin foe si na a fasi fa wi e taki èn a fasi fa wi e tjari wisrefi. A moesoe de krin taki a santa anbegi foe wi, de wan kolokoe anbegi. Foe san ede? Bikasi Jehovah wi Gado, de wan kolokoe Gado di wani taki den anbegiman foe en moesoe de nanga prisiri. Foe dati ede a psalm singiman ben kan taki foe a pipel foe Jehovah na ini owroeten: „Kolokoe foe a pipel di en Gado na Jehovah!” Wi e sori a kolokoe dati? Den pikin foe wi so srefi e sori tevredefasi te den de na mindri a pipel foe Jehovah na den Kownoekondre zaal èn na den bigi konmakandra? — Psalm 89:15, 16; 144:15b.
17. San wi kan doe na wan praktis fasi foe sori taki a santafasi foe wi de na ini balansi?
17 Wi kan sori balansi toe na ini a santa anbegi foe wi, te wi abi wan jeje foe wroko makandra èn te wi e sori switifasi gi den birtisma foe wi. Son tron a de fanowdoe taki den birtisma foe wi e kon makandra, kande foe krin a birti, noso neleki fa den e doe na ini son kondre, foe jepi foe meki den pasi nanga den strati kon moro boen. Ini a tori disi, a santafasi foe wi kan de krin foe si na a fasi fa wi e sorgoe gi wi djari, prasi, noso tra gron di wi abi. Efoe wi e libi doti e didon na ala presi noso wi abi wan djari di no krin, kande srefi owroe brokobroko wagi di ala sma kan si, wi kan taki dan taki wi e handri wi birtisma nanga lespeki? — Openbaring 11:18.
Santafasi na wrokope èn na skoro
18. (a) San de wan moeilek situwâsi gi kresten na ini a ten disi? (b) Fa wi kan de difrenti foe a grontapoe?
18 Na apostel Paulus ben skrifi den kresten na ini a foto Korente di no ben de santa: „Na ini a brifi foe mi, mi ben skrifi oenoe foe stòp de ini a kompani foe hoeroeman, ala di mi no abi na prakseri foe no de krinkrin ini a kompani foe den hoeroeman foe a grontapoe disi noso den sma di abi bigi-ai nanga den bedrigiman noso den sma di e anbegi kroektoe gado. Noso, te joe loekoe en boen, dan oenoe ben moesoe komoto na grontapoe” (1 Korentesma 5:9, 10). Disi de wan moeilek situwâsi gi kresten di moesoe de ala dei nanga sma di no abi boen gwenti nanga wet noso di no e libi akroederi no wan gwenti nanga wet srefisrefi. Disi na wan bigi tesi tapoe a soifri retifasi, spesroetoe na ini koeltoeroe pe sma e kisi deki-ati foe froeferi tra sma na seks-sei, foe doe kroektoedoe, èn foe no de eerlijk, noso taki sma e tapoe den ai gi den sani disi. Na wrokope noso na skoro, wi no kan gi pasi foe lagi den markitiki foe wi so taki den sma di de lontoe wi kan si wi leki „gewoon” sma. Na presi foe dati, a kresten fasi fa wi e tjari wisrefi na wan boen fasi èn na wan fasi di e difrenti, moesoe de krin foe si na sma di poti prakseri na tapoe dati, na den wan di e erken na angri di den abi na jejefasi èn di e soekoe wan moro boen sani. — Mateus 5:3; 1 Petrus 3:16, 17.
19. (a) Sortoe tesi oenoe pikin abi na skoro? (b) San papa nanga mama kan doe foe horibaka gi den pikin foe den èn foe meki den tjari densrefi na wan santa fasi?
19 Na a srefi fasi, den pikin foe wi e miti foeroe tesi na skoro. Oenoe papa nanga mama, oenoe e fisiti a skoro pe oen pikin e go? Joe sabi sortoe situwâsi de moro foeroe drape? Joe abi boen kontakti nanga den skoromeester noso skoromisi? Foe san ede den aksi disi de prenspari? Bikasi na ini foeroe foto na grontapoe, den skoro tron kefalek presi foe ogridoe di doe nanga tranga, foe drug, nanga seks. Fa den pikin foe oenoe kan hori den soifri retifasi èn tjari densrefi na wan santa fasi, efoe den no e kisi ala jepi foe den papa nanga mama foe den di e froestan a situwâsi foe den? A de joisti taki Paulus ben gi papa nanga mama a rai: „Oen papa, no tanteri oen pikin, so taki den no lasi-ati” (Kolosesma 3:21). Wán fasi foe tanteri pikin na a froestan di oenoe no e froestan den aladei problema èn den tesi foe den. A sreka di den moesoe sreka gi den tesi na skoro, e bigin na a fasi fa a jeje kontren de na ini wan kresten oso. — Deuteronomium 6:6-9; Odo 22:6.
20. Foe san ede santafasi de prenspari gi wi alamala?
20 Leki bosroiti, foe san ede santafasi de prenspari gi wi alamala? Bikasi a de leki wan kibri gi wi teige a grontapoe foe Satan nanga en fasi foe denki, di e soetoe kon na wi tapoe. A de wan blesi nownow èn a sa de wan blesi na ini a ten di e kon. A e jepi foe gi wi a djaranti foe a libi di sa de a troetroe libi na ini a njoen grontapoe foe regtfardikifasi. A e jepi wi foe de kresten di abi balansifasi, di opo gi sma, èn di lobi foe abi komunikâsi — no sma di de strak fanatieksma doronomo. Foe taki en makriki, a e meki wi de leki Krestes. — 1 Timoteus 6:19.
[Foetoewortoe]
a Foe kisi moro bodoi fa foe abi wan koni matifasi nanga patna di no de na bribi, loekoe De Wachttoren foe 15 augustus 1990, „Veronachtzaam uw huwelijkspartner niet!” (Sorgoe gi joe trowpatna) bladzijde 20-22 èn 1 november 1988 bladzijde 24, 25, paragraaf 20-22.
Joe e memre disi ete?
◻ Foe san ede Petrus ben si taki a de fanowdoe foe gi kresten rai ini a tori foe santafasi?
◻ Foe san ede a no makriki foe libi wan santa libi?
◻ San wi alamala kan doe foe meki a santafasi na ini na osofamiri kon moro boen?
◻ Efoe a gemeente moesoe tan santa, na sortoe fasi wi no moesoe tjari wisrefi, di no de santa?
◻ Fa wi kan tan santa na wrokope èn na skoro?
[Prenki na tapoe bladzijde 16, 17]
Leki Kotoigi foe Jehovah wi moesoe abi prisiri na ini a diniwroko foe Gado èn na ini tra aktiviteit