Meki Jehovah pai joe nanga boen
„Memre disi . . . foe a boen foe mi, o mi Gado . . . Memre mi, o mi Gado, foe a boen foe mi.” — NEHEMIA 13:22, 31.
1. San e jepi den wan di gi densrefi abra na Gado foe gi Jehovah wan boen frantiwortoe?
DEN foetoeboi foe Jehovah abi ala a jepi di de fanowdoe foe kan gi en wan boen frantiwortoe. Foe san ede? Foe di den abi wan krosibei matifasi nanga Gado, leki wan pisi foe en organisâsi na grontapoe. A tjari den prakseri foe en kon na krin gi den, èn a gi den jepi nanga inzicht na jejefasi, foe di a gebroiki en santa jeje (Psalm 51:11; 119:105; 1 Korentesma 2:10-13). Nanga den spesroetoe situwâsi disi na prakseri, Jehovah e aksi den foetoeboi foe en na grontapoe na wan lobi-ati fasi foe gi en frantiwortoe foe san den de èn foe san den e doe ini a krakti foe en èn nanga a jepi foe en santa jeje.
2. (a) Na sortoe fasi Nehemia ben gi Gado wan boen frantiwortoe foe ensrefi? (b) Nanga sortoe begi Nehemia ben bosroiti a bijbelboekoe di e tjari en nen?
2 Wan man di ben gi Gado wan boen frantiwortoe foe ensrefi ben de Nehemia, a sma di ben kanti win gi a Persia kownoe Artakserkses (Longimanus) (Nehemia 2:1). Nehemia ben tron granman foe den djoe èn ben bow a skotoe foe Jerusalem baka, ala di a ben kisi foe doe nanga feanti èn nanga kefar. Nanga faja gi a troe anbegi, a ben sorgoe taki sma ben hori densrefi na a wet foe Gado èn a ben sori taki a ben broko en ede nanga den sma di trawan ben kwinsi (Nehemia 5:14-19). Nehemia ben gi den Leifisma tranga foe krin densrefi doronomo, foe hori wakti na den portoe, èn foe santa a Sabadei. Dati meki a ben kan begi: „Memre disi toe foe a boen foe mi, o mi Gado, èn firi sari gi mi akroederi a lobi boen-atifasi foe joe di de pasa marki.” A ben fiti toe taki Nehemia ben kaba en boekoe di Gado ben meki en skrifi, nanga a begi: „Memre mi, o mi Gado, foe a boen foe mi.” — Nehemia 13:22, 31.
3. (a) Fa joe ben sa taki soema na wan sma di e doe boen? (b) Sortoe aksi wi ben sa kan poti gi wisrefi te wi e loekoe a waka nanga libi foe Nehemia?
3 Wan sma di e doe boen, abi boen eigifasi èn a e doe regtfardiki sani foe trawan feni boen foe dati. Nehemia ben de so wan man. A ben abi lespeki frede gi Gado èn wan tranga faja gi a troe anbegi. Boiti dati, a ben de nanga tangi foe den grani di a ben abi ini a diniwroko foe Gado èn a ben gi Jehovah wan boen frantiwortoe foe ensrefi. Te wi e loekoe a waka nanga libi foe en, dan kande dati sa meki taki wi e aksi wisrefi: ’Fa mi e si den grani nanga frantiwortoe di Gado gi mi? Sortoe frantiwortoe foe misrefi mi e gi Gado nanga Jesus Krestes?’
Te wi abi sabi foe bijbel dan wi moesoe gi frantiwortoe
4. Sortoe komando Jesus ben gi den bakaman foe en, èn san den wan ben doe di ben abi „a joisti jejefasi foe kisi têgo libi”?
4 Jesus ben gi den bakaman foe en a komando disi: „Go . . . èn meki disipel foe sma foe ala nâsi, èn dopoe den . . . , èn leri den foe doe ala den sani di mi komanderi oenoe” (Mateus 28:19, 20). Den ben moesoe meki disipel foe di den ben gi sma leri. Den wan di ben kisi leri na a fasi disi èn di ben „abi a joisti jejefasi foe kisi têgo libi”, ben o teki dopoe, soleki fa Jesus ben doe (Tori foe den Apostel 13:48; Markus 1:9-11). A wani di den ben wani ondrow ala den sani di a ben komanderi, ben o kon foe na ati. Den ben o kon so fara taki den ben o gi densrefi abra foe di den ben o teki soifri sabi foe Gado Wortoe èn gebroiki dati. — Johanes 17:3.
5, 6. Fa wi moesoe froestan Jakobus 4:17? Sori nanga eksempre fa wi kan gebroiki dati.
5 O moro dipi wi bijbel sabi e go, o moro betre a fondamenti de gi a bribi foe wi. Na a srefi ten, a frantiwortoe di wi moesoe gi Gado, e kon moro bigi. Jakobus 4:17 e taki: „Efoe wan sma sabi fa foe doe san boen èn tokoe a no e doe en, dan dati na wan sondoe gi en.” Soleki fa a sori, dan den wortoe disi na wan bosroiti foe san a disipel Jakobus ben taki didjonsro foe a djaf di wan sma e djaf na presi taki a froetrow dorodoro na tapoe Gado. Efoe wan sma sabi taki sondro a jepi foe Jehovah a no kan doe noti san e tan foe wan langa pisi ten, ma a no e handri akroederi disi, dan disi na wan sondoe. Ma den wortoe foe Jakobus kan gebroiki toe gi a sondoe di wan sma e sondoe foe di a no e doe san a moesoe doe. Ini na agersitori di Jesus ben gi foe den skapoe nanga den bokoboko, foe eksempre, den bokoboko e kisi kroetoe, no foe di den doe ogri sani, ma foe di den no jepi den brada foe Krestes. — Mateus 25:41-46.
6 Wan man di Jehovah Kotoigi ben hori wan bijbelstudie na en, no ben go foeroe na fesi na jejefasi, soleki fa a sori foe di a no ben tapoe nanga smoko, ala di a ben sabi taki a ben sa moesoe doe dati. Wan owroeman ben aksi en foe leisi Jakobus 4:17. Baka di na owroeman taki wan sani foe san a tekst disi wani taki, na owroeman ben taki: „Ala di joe no dopoe, tokoe joe moesoe gi frantiwortoe èn joe moesoe teki ala frantiwortoe foe a bosroiti di joe teki.” Kolokoe taki a man ben doe wan sani na dati, a ben tapoe nanga smoko, èn sjatoe baka dati a ben kan teki dopoe leki wan fasi foe sori taki a ben gi ensrefi abra na Jehovah Gado.
Wi moesoe gi frantiwortoe foe a diniwroko foe wi
7. San na wan fasi foe sori taki wi de nanga tangi foe „a sabi foe Gado”?
7 Na opregti wani foe wi, moesoe de foe plisi wi Mekiman. Wan fasi foe sori taki wi de nanga tangi gi „a sabi foe Gado”, na foe doe a komando foe meki sma tron disipel foe en Manpikin, Jesus Krestes. Disi na wan fasi toe foe sori taki wi lobi Gado nanga a sma na wi sei (Odo 2:1-5; Mateus 22:35-40). Ija, a sabi di wi abi foe Gado e meki taki wi moesoe gi en frantiwortoe, èn wi moesoe si wi kompe libisma leki sma di kan tron disipel.
8. Foe san ede wi kan taki dati Paulus ben firi taki a ben moesoe gi Gado frantiwortoe foe en diniwroko?
8 Na apostel Paulus ben sabi taki te wan sma e teki a boen njoensoe nanga en heri ati èn e gi jesi na dati, dan dati abi froeloesoe leki bakapisi, ala di te wan sma no e teki en, dan dati kan tjari pori kon (2 Tesalonikasma 1:6-8). Foe dati ede a ben firi taki a ben moesoe gi Jehovah frantiwortoe foe a diniwroko di a ben doe. Te joe loekoe en boen, dan Paulus nanga den kompe foe en ben warderi a diniwroko foe den someni taki den ben loekoe boen foe no meki sma prakseri taki den ben kisi wini foe dati na monisei. Boiti dati, Paulus ati ben poesoe en foe taki: „Now, efoe mi e meki a boen njoensoe bekènti, dan dati a no wan reide gi mi foe djaf, bika a froeplekti poti na mi tapoe. Troetroe, heloe foe mi efoe mi no ben meki a boen njoensoe bekènti!” — 1 Korentesma 9:11-16.
9. Sortoe prenspari paiman ala kresten moesoe pai?
9 Leki foetoeboi foe Jehovah di gi wisrefi abra, ’a froeplekti poti na wi tapoe foe meki a boen njoensoe bekènti’. Na wi wroko foe preiki a Kownoekondre boskopoe. Wi ben teki a frantiwortoe dati di wi ben gi wisrefi abra na Gado. (Teki gersi Lukas 9:23, 24.) Boiti dati, wi abi wan paiman di wi moesoe pai. Paulus ben taki: „Na den Grikisma èn na den barbaar, na den koniwan èn na den wan di no e gebroiki den froestan mi de na paiman: dati meki mi e angri foe meki a boen njoensoe bekènti toe na oenoe, di de na Rome” (Romesma 1:14, 15). Paulus ben de na paiman bika a ben sabi taki a ben de en plekti foe preiki, so taki sma ben kan jere a boen njoensoe èn kisi froeloesoe (1 Timoteus 1:12-16; 2:3, 4). Foe dati ede a ben wroko tranga foe doe a wroko di a ben kisi foe doe èn pai en paiman na kompe libisma. Leki kresten, wi so srefi abi so wan paiman foe pai. A Kownoekondre preikiwroko na wan prenspari fasi toe foe sori lobi gi Gado, gi en Manpikin, èn gi den sma na wi sei. — Lukas 10:25-28.
10. San son sma doe foe kan doe moro na ini a diniwroko foe den?
10 Wan fasi foe gi Gado wan boen frantiwortoe na foe gebroiki den bekwaam fasi foe wi foe doe moro na ini wi diniwroko. Teki wan eksempre: Foeroe sma foe someni nationaal groepoe ben kon na Ingrisikondre na ini den jari di no pasa so langa ete. Moro leki 800 pionier (foeroeten Kownoekondre preikiman) nanga hondrohondro tra Kotoigi e leri difrenti tongo foe doro den sortoe sma dati nanga a boen njoensoe. Disi ben abi leki bakapisi taki moi krakti gi na a diniwroko. Wan pionier di e leri Sneisi na wan groepoe, ben taki: „Noiti mi ben denki taki oiti mi ben sa leri mi tongo na tra Kotoigi, so taki den kan prati a waarheid nanga trawan na a fasi disi. A de so wan prisiri sani!” Joe ben kan doe moro ini joe diniwroko na so wan fasi toe?
11. San ben de a bakapisi di wan kresten ben kisi okasi foe gi kotoigi?
11 Leki fa a sori, dan ibriwan foe wi ben sa doe san wi ben kan doe foe froeloesoe wan man di de foe dede na watra. Den foetoeboi foe Jehovah angri toe foe gebroiki den bekwaamfasi foe den foe gi kotoigi na ibri okasi. No so langa pasa ete, wan Kotoigi ben sidon sei wan oema na ini wan bus èn a ben taki nanga en foe bijbel. Foe di na oema ben prisiri nanga san a ben jere, meki a ben poti foeroe aksi. Di a Kotoigi ben moesoe saka foe a bus, dan na oema ben aksi en foe kon na en oso na presi foe dati, foe di a ben abi foeroe aksi ete. A Kotoigi ben agri. San ben de a bakapisi? A ben opo wan bijbelstudie nanga en, èn siksi moen baka dati, na oema ben tron wan Kownoekondre preikiman di no dopoe ete. Sjatoe baka dati, na oema srefi ben hori siksi oso-bijbelstudie. Disi na troetroe wan moi pai di wan sma e kisi foe di a gebroiki en bekwaamfasi na ini a Kownoekondre diniwroko!
12. Fa wi kan gebroiki wi bekwaamfasi leki bedinari na wan boen fasi na ini a velddienst?
12 Wi kan gebroiki wi bekwaamfasi leki bedinari heri boen na ini a veld nanga den poeblikâsi soleki a Sabi di e tjari joe go na têgo libi boekoe di abi 192 bladzijde. Te nanga april 1996, a skrifi-komte foe a Tiri Skin foe Jehovah Kotoigi ben feni en boen taki a Sabi-boekoe tjari kon na doro na ini moro leki 140 tongo, èn na a ten dati 30.500.000 eksemplaar foe a boekoe disi ben druk kaba na ini 111 tongo. A boekoe disi ben skrifi nanga a marki foe jepi bijbel studenti foe leri nofo foe Gado Wortoe nanga den prakseri foe en, so taki den kan poti leki marki foe gi densrefi abra na Jehovah èn teki dopoe. Foe di Kownoekondre preikiman no sa hori wan oso-bijbelstudie nanga a srefi studenti foeroe jari langa, meki den kan hori bijbelstudie nanga moro sma noso kan meki a prati di den abi ini na oso-foe-oso wroko nanga tra fasi foe a diniwroko, kon moro bigi (Tori foe den Apostel 5:42; 20:20, 21). Foe di den sabi taki den moesoe gi Gado frantiwortoe meki den e poti sma prakseri na tapoe den warskow foe Gado (Esekièl 33:7-9). Ma a moro prenspari sani di den abi na prakseri na foe gi Jehovah grani èn foe jepi someni sma leki den kan foe leri a boen njoensoe na ini a sjatoe pisi ten di de ete gi a godelowsoe seti foe sani disi.
Gi wan boen frantiwortoe leki osofamiri
13. Foe san ede osofamiri di e dini Gado, moesoe abi wan osofamiri bijbelstudie doronomo?
13 Ibri wan sma aparti èn ibri osofamiri di e teki a troe kresten bribi moesoe gi Gado frantiwortoe èn foe dati ede moesoe „go doro foe kon lepi” èn foe kon „tranga ini a bribi” (Hebrewsma 6:1-3; 1 Petrus 5:8, 9). Foe eksempre, den wan di studeri a Sabi-boekoe èn teki dopoe moesoe kisi moro bijbel sabi foe di den e kon doronomo na konmakandra èn foe di den e leisi bijbel nanga tra kresten poeblikâsi. Osofamiri di e dini Gado, doronomo moesoe abi wan osofamiri studie toe, bika dati na wan prenspari fasi foe „tan na ai, tanapoe kánkan ini a bribi, tjari [densrefi] leki mansma, kon tranga” (1 Korentesma 16:13). Efoe joe na a edeman foe wan osofamiri, dan joe spesroetoe moesoe gi Gado frantiwortoe foe a sorgoe di joe moesoe sorgoe taki joe osofamiri e kisi boen njanjan na jejefasi. Neleki fa boen njanjan e jepi wi foe abi wan boen gosontoe, na so nofo njanjan na jejefasi di e gi doronomo, de fanowdoe efoe joe nanga joe osofamiri moesoe tan „gosontoe ini a bribi”. — Titus 1:13.
14. San ben de a bakapisi foe a kotoigi di wan Israèl oemapikin ben gi, di ben kisi boen leri?
14 Efoe pikin de ini joe osofamiri, dan Gado sa pai joe nanga boen foe di joe e gi den gosontoe leri na jejefasi. Den sa feni boen foe a leri dati, soleki fa a ben de nanga wan jongoe oemapikin foe Israèl di den Siriasma ben teki tjari gowe na ini den dei foe Gado en profeiti Elisa. A ben tron na oemafoetoeboi foe a wefi foe wan Siria legre edeman, Na-aman, di ben abi gwasi siki. Ala di na oemapikin ben jongoe, tokoe a ben taigi a misi foe en: „Efoe mi meester ben de nomo na fesi a profeiti di de na Samaria! Dan a ben o dresi en foe a gwasi foe en.” Foe di a ben gi kotoigi, meki Na-aman ben go na Israèl, èn te foe kaba ben doe san Elisa ben taigi en foe doe taki a ben moesoe wasi ensrefi seibi tron na ini Jordan liba, èn a ben kon krin foe a gwasi siki. Boiti dati, Na-aman ben tron wan anbegiman foe Jehovah. Fa dati ben moesoe prisiri a jongoe oemapikin dati! — 2 Kownoe 5:1-3, 13-19.
15. Foe san ede a de prenspari gi papa nanga mama foe gi den pikin foe den boen leri na jejefasi? Gi eksempre.
15 Na ini a grontapoe disi di no abi boen gwenti nanga wet èn di de ini a makti foe Satan, a no makriki foe kweki pikin di e frede Gado (1 Johanes 5:19). Ma sensi Timoteus en pikin-nengre-ten, en granmama Lois nanga en mama Eunice, ben leri en den Boekoe foe bijbel nanga boen bakapisi (2 Timoteus 1:5; 3:14, 15). A studeri di joe e studeri bijbel nanga den pikin foe joe, e tjari den go na kresten konmakandra doronomo, èn te foe kaba e meki den go nanga joe na ini a diniwroko, na alamala sani di de wan pisi foe a leri di joe moesoe gi den èn di joe moesoe gi Gado frantiwortoe foe dati. Wan kresten oema na Wales, di owroe moro leki 80 jari now, e memre taki na ini den bigin jari foe 1920, en papa ben teki en go nanga en te a ben waka 10 kilometer abra wan bergi (foe go èn foe kon, a waka e teki 20 kilometer) foe prati bijbel traktaat gi den sma foe a dorpoe na ini a tra lagipresi. „A ben de na den waka disi taki mi papa ben poti a waarheid na ini mi ati”, a e taki nanga tangi.
Owroeman e gi frantiwortoe — Fa?
16, 17. (a) Sortoe grani, owroeman foe na owroeten Israèl, di ben lepi na jejefasi, ben kisi? (b) Foe san ede a e aksi moro foeroe foe kresten owroeman na ini a ten disi, te joe teki en gersi a situwâsi na Israèl foe owroeten?
16 „Weti wiwiri na wan toemoesi moi kownoe-ati, te den feni en na a pasi foe regtfardikifasi”, na so a koni man Salomo ben taki (Odo 16:31). Ma a no de soso a jari di wan sma abi di e meki taki a man tjari frantiwortoe na ini a gemeente foe Gado pipel. Owroe man foe owroeten Israèl di ben lepi na jejefasi, ben dini leki kroetoeman nanga sma di ben moesoe sorgoe taki retidoe ben de èn taki vrede, boen orde, nanga gosontoe na jejefasi ben tan (Deuteronomium 16:18-20). Ala di dati de so toe nanga a kresten gemeente, tokoe a e aksi moro foe owroeman, foe di a kaba foe a seti foe sani disi e kon moro krosibei. Foe san ede?
17 Den Israèlsma ben de wan ’pipel di [Gado] ben froekisi’ èn di a ben froeloesoe foe Egipti foe owroeten. Foe di den ben kisi a Wet nanga jepi foe Moses, a mindriman foe den, meki den bakapikin foe den ben gebore na ini wan nâsi di ben gi ensrefi abra na Jehovah èn di ben sabi den gronprakseri foe en (Deuteronomium 7:6, 11). Ma na ini a ten disi no wan sma gebore na ini so wan nâsi di gi ensrefi abra, èn te joe teki en gersi tra sani, dan wan toe sma nomo e gro kon bigi na ini osofamiri di e dini Gado èn di sabi bijbel waarheid boen. Spesroetoe den wan di bigin „waka na ini waarheid” no so langa ete, abi leri fanowdoe kande foe sabi fa foe libi akroederi bijbel gronprakseri (3 Johanes 4). Foe dati ede, fa a de wan bigi frantiwortoe di de na tapoe a skowroe foe getrow owroeman foe di den e ’tan hori a model foe gosontoe wortoe’ èn e jepi a pipel foe Jehovah! — 2 Timoteus 1:13, 14.
18. Sortoe jepi, gemeente owroeman moesoe de srekasreka foe gi, èn foe san ede?
18 Wan jongoe pikin di e leri waka, kan naki foetoe èn fadon. A no e firi seiker èn a abi a jepi nanga a djaranti foe papa nanga mama fanowdoe. Wan sma di gi ensrefi abra na Jehovah ben kan naki foetoe toe noso fadon na jejefasi. Srefi na apostel Paulus ben feni en fanowdoe foe feti foe doe san reti noso boen na ini Gado ai (Romesma 7:21-25). Skapoeman foe na ipi foe Gado moesoe gi lobi-ati jepi na kresten di meki fowtoe ma di abi troetroe berow. Di owroeman ben go na wan oema di ben gi ensrefi abra, èn di ben meki wan serjoesoe fowtoe, dan a ben taki na fesi foe en masra di ben gi ensrefi abra toe: „Mi sabi taki oenoe o sluit mi uit!” Ma a ben bari krei di den ben taigi en taki den owroeman ben wani sabi sortoe jepi ben de fanowdoe foe meki na osofamiri kon boen baka na jejefasi. Foe di den owroeman ben froestan taki den moesoe gi frantiwortoe, meki den ben prisiri foe jepi wan kompe bribiman di ben abi berow. — Hebrewsma 13:17.
Tan gi wan boen frantiwortoe
19. Fa wi kan tan gi Gado wan boen frantiwortoe foe wisrefi?
19 Gemeente owroeman nanga ala tra foetoeboi foe Gado moesoe tan gi Jehovah wan boen frantiwortoe foe densrefi. Disi man, efoe wi e anga na Gado Wortoe èn e doe en wani (Odo 3:5, 6; Romesma 12:1, 2, 9). Wi wani doe boen spesroetoe na den wan di de ini a srefi bribi leki wi (Galasiasma 6:10). Ma a kotiwroko foeroe ete, èn den wrokoman e tan de wan pikin nomroe (Mateus 9:37, 38). So boen, meki wi doe boen na trawan foe di wi e meki a Kownoekondre boskopoe bekènti fajafaja. Jehovah sa pai wi nanga boen, efoe wi e doe akroederi a gi di wi gi wisrefi abra, e doe en wani, èn e meki a boen njoensoe bekènti na wan getrow fasi.
20. San wi e leri te wi e loekoe a waka nanga libi foe Nehemia?
20 Meki wi tan abi foeroe foe doe ini a wroko foe Masra foe dati ede (1 Korentesma 15:58). Èn a ben sa de heri boen efoe wi e prakseri foe Nehemia, di ben bow a skotoe foe Jerusalem, di ben sorgoe taki sma ben hori densrefi na a Wet foe Gado, èn a ben horibaka gi a troe anbegi fajafaja. A ben begi taki Jehovah Gado ben o memre en foe a boen di a ben doe. Meki a de so, taki joe e dini Jehovah na a srefi fasi, èn meki a pai joe nanga boen.
San joe e piki?
◻ Sortoe eksempre Nehemia ben gi?
◻ Foe san ede a sabi di wi abi foe bijbel, e meki taki wi moesoe gi Gado frantiwortoe?
◻ Fa wi kan gi Jehovah wan boen frantiwortoe na ini wi diniwroko?
◻ San osofamiri kan doe foe gi wan boen frantiwortoe na Gado?
◻ Fa kresten owroeman e gi frantiwortoe?
[Prenki na tapoe bladzijde 28]
Neleki Paulus, wi kan gi Gado wan boen frantiwortoe foe wisrefi leki Kownoekondre preikiman
[Prenki na tapoe bladzijde 29]
Den pikin foe joe tranga na ini a bribi neleki a jongoe Israèl oemapikin na ini na oso foe Na-aman?