A kresten lobi foe ontfanga sma boen na ini wan grontapoe di prati
„Dati meki wi de na ondro a froeplekti foe teki den sortoe sma dati na ini oso na wan switifasi, so taki wi kan tron kompe wrokoman na ini waarheid.” — 3 JOHANES 8.
1. Sortoe presenti di sma ben sa wani troetroe, a Mekiman gi a libisma famiri?
„LIBISMA no abi no wan moro betre sani na ondro son leki foe njan èn foe dringi èn foe prisiri ensrefi, èn taki disi moesoe de wan kompe gi den na ini den tranga wroko na ini ala den dei foe den libi, di a troe Gado gi den na ondro son” (Preikiman 8:15). Nanga den wortoe dati na owroeten Hebrew sma di ben tjari sani kon na wán, e froeteri wi taki Jehovah Gado no wani nomo taki den libisma mekisani foe en moesoe prisiri èn de kolokoe, ma a e gi den sani toe foe den kan firi so. Na ini a heri libisma historia, a wán sani di ala sma na ala presi e angri foe en, sori foe de a prisiri di den wani prisiri densrefi èn abi wan boen ten.
2. (a) Fa a libisma famiri gebroiki a sani di Jehovah ben abi na prakseri gi den, na wan fasi di no fiti? (b) San na a bakapisi?
2 Na ini a ten disi wi e libi na ini wan libimakandra pe sma e libi soso foe kan abi prisiri èn a feti di den e feti na baka prisiri nanga boen ten, e teki ala den prakseri. Moro foeroe sma tron ’sma di lobi densrefi nomo . . . [sma di] lobi prisiri moro leki foe lobi Gado’ leki fa bijbel ben taki na fesi (2 Timoteus 3:1-4). A no de foe taki, dati disi de krinkrin kontrari san Jehovah Gado ben abi na prakseri. Te a feti di sma e feti na baka boen ten noso a wani di den wani plisi densrefi nomo, e tron a moro prenspari marki, dan no wan troe satisfaksi no de, èn ’ala sani kon de foe soso èn wan strei foe kisi winti’ (Preikiman 1:14; 2:11). A bakapisi de, taki grontapoe foeroe nanga sma di abi a firi taki den de den wawan èn di broko-saka, èn disi baka, e tjari foeroe problema kon na ini a libimakandra (Odo 18:1). Sma no e froetrow makandra moro èn den prati na ini ras, na sociaal sei èn na moni sei.
3. Fa wi kan feni troe prisiri nanga satisfaksi?
3 Fa sani ben o de heri tra fasi efoe sma ben waka na baka a fasi fa Jehovah e handri nanga trawan — foe abi switifasi, foe lobi foe gi sani, foe lobi foe ontfanga sma boen! A ben taki krin taki a sroto foe feni troe kolokoe no de na a proeberi di wi e proeberi foe satisferi wi eigi lostoe. Na presi foe dati, disi na a sroto: „Moro kolokoe de ini a gi foe sani, leki ini a kisi foe sani (Tori foe den Apostel 20:35). Efoe wi wani feni troe prisiri nanga satisfaksi, dan wi moesoe wini problema nanga pratifasi di ben sa kan tanapoe na wi pasi. Èn wi moesoe opo wi ati gi den wan di e dini Jehovah makandra nanga wi. A de prenspari taki wi e waka na baka a rai: „Dati meki na ondro a froeplekti foe teki den sortoe sma dati na ini oso na wan switifasi, so taki wi kan tron kompe wrokoman na ini waarheid” (3 Johanes 8). Te wi e sori taki wi lobi foe ontfanga den sma di warti dati boen, so fara leki a situwâsi foe wi e gi pasi foe dati, dan dati e tjari wini kon na toe fasi — a de foe a boen foe den wan di e gi, nanga den wan di e kisi. Dan soema na den wan di warti dati èn di wi moesoe ’teki na ini oso na wan switifasi’?
„Loekoe den pikin di no abi papa nanga mama moro èn den weduwe”
4. Sortoe kenki na ini na osofamiri stroektoeroe wi e si srefi na mindri son wan foe Jehovah en pipel?
4 Boen osofamiri nanga kolokoe trowlibi de wan sani di wi no e si foeroe na ini a ten disi. A nomroe foe sma di brokotrow èn foe mama di no trow, e gro nomonomo èn na heri grontapoe dati kenki na osofamiri stroektoeroe foe papa, mama nanga pikin. A bakapisi de, taki foeroe sma di tron Jehovah Kotoigi na ini den jari di no pasa so langa ete, komoto na osofamiri di prati. Den brokotrow noso den prati foe a trowpatna foe den, noso den e libi na ini osofamiri di abi a papa noso a mama wawan. Boiti dati, soleki fa Jesus ben taki na fesi, dan a waarheid di en ben leri, tjari pratifasi kon na ini foeroe osofamiri. — Mateus 10:34-37; Lukas 12:51-53.
5. San Jesus ben taki dati kan de wan fonten foe gi deki-ati na den wan di de na ini osofamiri di prati na relisi sei?
5 A e waran wi ati foe si taki den njoen wan e teki wan boen bosroiti gi a waarheid, èn nofo tron wi e trowstoe den nanga Jesus pramisi di e gi deki-ati: „Foe troe, mi e taigi oenoe: No wan sma libi oso noso brada noso sisa noso mama noso papa noso pikin noso pranigron foe mi ede èn foe a boen njoensoe ede, di no sa kisi wan hondro tron nownow, na ini a pisi ten disi, oso nanga brada nanga sisa nanga mama nanga pikin nanga pranigron, makandra nanga froefolgoe, èn na ini a seti foe sani di e kon, têgo libi.” — Markus 10:29, 30.
6. Fa wi kan kon tron ’brada, sisa, mama, nanga pikin’ gi den „pikin di no abi papa nanga mama èn den weduwe”, na wi mindri?
6 Ma soema na den ’brada nanga sisa nanga mama nanga pikin’ disi? No te wan sma e si wan heri ipi sma na wan Kownoekondre zaal, èn nofo tron a de wán hondro noso moro sma, di e kari densrefi brada nanga sisa, dan dati wani taki foe ensrefi, dati a moesoe abi a firi taki den na en brada, sisa, mama, nanga pikin. Loekoe a tori disi: A disipel Jakobus e memre wi taki efoe wi wani taki Jehovah feni wi anbegi boen, dan wi moesoe ’loekoe den pikin di no abi papa nanga mama èn den weduwe na ini a banawtoe foe den, èn no meki grontapoe flaka wi’ (Jakobus 1:27). Dati wani taki, dati wi moesoe loekoe boen foe no abi a fasi di grontapoe sma abi foe djaf foe den goedoe di den abi èn foe di den abi wan hei posisi na ini a libimakandra, èn taki dati e tapoe wi foe sori sari-ati na den „pikin di no abi papa nanga mama èn den weduwe”. Na presi foe dati, wi fosi moesoe bigin gi den wi matifasi nanga a lobi di wi lobi foe ontfanga den boen.
7. (a) San na a troetroe marki foe a lobi di joe lobi foe ontfanga „pikin di no abi papa nanga mama èn weduwe”, boen? (b) Soema toe sa man foe sori a kresten lobi foe onfanga sma boen?
7 Foe lobi foe ontfanga „pikin di no abi papa nanga mama èn den weduwe” boen, no wani taki ala ten taki wi moesoe jepi den nanga san den e mankeri na materia sei. Osofamiri di abi a papa noso a mama wawan noso osofamiri di prati na relisi sei, no abi foe de na ini problema na moni sei. Ma a gosontoe demakandra, a fasi fa a de na ini wan osofamiri, a matifasi nanga sma di abi difrenti jari, nanga a prati foe boen sani na jejefasi — dati na sani na ini a libi di warti troetroe. So boen, te wi e memre taki a no de a bigi di a fesa bigi, ma taki a de a jeje foe lobi nanga wánfasi di de prenspari, dan a de troetroe wan boen sani taki ten na ten, srefi „pikin di no abi papa nanga mama èn den weduwe”, kan sori taki den lobi foe ontfanga kompe kresten boen! — Teki gersi 1 Kownoe 17:8-16.
Trakondre-sma de na wi mindri?
8. Sortoe kenki wi kan si na ini foeroe gemeente foe Jehovah Kotoigi?
8 Wi e libi na ini wan ten pe foeroe sma e froisi go na tra kondre. „Moro leki 100 miljoen sma na heri grontapoe e libi na kondre pe den no de wan borgoe, èn 23 miljoen sma ben abi foe froisi go na wan tra presi na ini den eigi kondre”, na so World Press Review e taki. Wan bakapisi di kon foe disi na taki na ini foeroe kontren, spesroetoe na ini foto di moro bigi, gemeente foe Jehovah en pipel di fosi moro foeroe ben abi sma foe soso wán ras noso nationaliteit, abi sma now foe difrenti pisi foe grontapoe. Kande disi de so pe joe de. Ma fa wi moesoe si den „dorosei-sma” nanga „trakondre-sma” disi, soleki fa grontapoe e kari den kande, di kande abi wan tra tongo, gwenti nanga fasi foe libi leki di foe wi?
9. Sortoe serjoesoe trapoe kan kisi wi ini a tori foe a fasi fa wi e si „dorosei-sma” nanga „trakondre-sma” di e kon na ini a kresten gemeente?
9 Foe taki en so, wi no moesoe meki no wan bita-atifasi gi dorosei-sma gi wi a firi taki na wán noso tra fasi wi warti a grani foe sabi a waarheid, moro leki den wan di komoto na wan tra kondre noso san sma e kari heiden kondre; èn wi no moesoe abi a firi taki den njoen sma disi e hendri wi ini a gebroiki di wi wani gebroiki a Kownoekondre zaal noso tra presi di wi abi foe kon makandra. Na apostel Paulus ben moesoe memre wan toe foe den fosi jarihondro djoe kresten, di ben abi den sortoe denki dati, taki troetroe no wan sma warti en foe kisi wan sani; a ben de a no-froedini boen-atifasi foe Gado di ben meki taki ibri wan sma man kisi froeloesoe (Romesma 3:9-12, 23, 24). Wi moesoe breiti taki a no-froedini boen-atifasi foe Gado e doro someni sma di na wán noso tra fasi no ben kisi na okasi foe jere a boen njoensoe (1 Timoteus 2:4). Fa wi kan sori taki a waran firi di wi abi gi den, na wan opregti sani?
10. Fa wi kan sori taki wi lobi troetroe foe ontfanga den „trakondre-sma” boen na wi mindri?
10 Wi kan waka na baka a froemane foe Paulus: „Erken makandra foe dati ede, neleki fa Krestes ben erken wi, nanga a glori foe Gado na prakseri” (Romesma 15:7). Te wi froestan taki sma foe tra kondre noso wan tra background nofo tron no abi den sani di den abi fanowdoe, dan wi moesoe sori den switifasi nanga belangstelling te wi man foe doe disi. Wi moesoe teki den na wi mindri, èn si ibriwan foe den „leki wan sma di gebore na ini joe kondre” en ’lobi en leki joesrefi’ (Lefitikus 19:34). Disi no de makriki foe doe kande, ma wi sa abi boen bakapisi efoe wi e memre a rai: „Stòp foe kon de leki a seti foe sani disi, ma kon kenki foe di oenoe e kenki oen prakseri, so taki oenoe kan ondrosoekoe èn si gi oensrefi san na a boen, switi èn volmaakti wani foe Gado”. — Romesma 12:2.
Prati sani nanga den santawan
11, 12. Na sortoe spesroetoe fasi den ben hori son foetoeboi foe Jehovah na prakseri na ini (a) Israèl foe owroeten (b) a fosi jarihondro?
11 Na mindri den wan di warti troetroe taki wi e hori den na prakseri èn taki wi lobi foe ontfanga den boen, na den lepi kresten di e wroko tranga foe wi tanboen na jejefasi. Jehovah ben sreka sani spesroetoe gi den priester nanga den Leifisma na Israèl foe owroeten (Numeri 18:25-29). Na ini a fosi jarihondro, den ben gi kresten tranga toe foe sorgoe gi den wan di ben dini den na ini spesroetoe wroko. A tori na 3 Johanes 5-8 e sori wi pikinso sortoe krosibei banti foe lobi ben de na mindri den fositen kresten.
12 Na owroe apostel Johanes ben warderi en troetroe taki Gajus ben sori switifasi èn a lobi di a ben lobi foe ontfanga son brada boen di ben e rèis èn di den ben seni go fisiti a gemeente. Ala den brada disi — so srefi Demetrius, di kande ben de a sma di ben tjari a brifi foe Johanes kon — ben de freimdesma gi Gajus noso a no ben sabi den ete. Ma sma ben ontfanga den boen, foe di a ben de „foe a boen foe [Gado] nen taki den ben go na doro.” Johanes e taki en na a fasi disi: „Dati meki wi de froeplekti foe teki den sortoe sma dati na ini oso na wan switifasi, so taki wi kan tron kompe wrokoman na ini waarheid.” — 3 Johanes 1, 7, 8.
13. Soema foe wi na ini a ten disi warti en spesroetoe foe wi ’teki den na ini oso na wan switifasi’?
13 Na ini a ten disi, na ini na organisâsi foe Jehovah, foeroe sma de di e span densrefi boen tranga gi a boen foe a heri demakandra foe brada. Na ini disi joe abi so srefi den opziener di e rèis, èn di wiki na wiki e gebroiki a ten nanga a krakti foe den foe tranga den gemeente; den zendeling, di e gowe libi famiri nanga mati foe go preiki na ini tra kondre; den wan di e dini na Bethel-oso noso bijkantoro, di nanga den friwani e dini foe horibaka gi a preikiwroko na heri grontapoe; èn den wan di de na ini a pionierwroko, di e gebroiki a moro bigi pisi foe a ten nanga a krakti foe den na ini a velddienst. A prenspari sani de, taki den alamala e wroko tranga, no foe kisi o sortoe persoonlijk glori noso wini, ma foe di den abi lobi gi a kresten bradafasi èn gi Jehovah. Den warti foe wi waka na den baka, bika den gi densrefi nanga den heri sili èn den e froedini en foe wi ’teki den na ini oso na wan switifasi’.
14. (a) Fa a doe kon taki wi „e tron moro betre kresten” te wi e sori taki wi lobi foe ontfanga getrow sma boen? (b) Foe san ede Jesus ben taki dati Maria ben teki „a boen pisi”?
14 Te wi e „teki den sortoe sma dati na ini oso na wan switifasi”, na apostel Johanes ben sori, dan wi „e tron kompe wrokoman na ini waarheid”. A bakapisi de, taki na wán noso tra fasi wi e tron moro betre kresten. Disi de, foe di kresten wroko wani taki toe foe doe boen gi kompe bribiman (Odo 3:27, 28; 1 Johanes 3:18). Na wan tra fasi wi kan kisi pai toe. Di Maria nanga Marta ben ontfanga Jesus na ini den oso, dan Marta ben wani sori taki a ben de wan oema di ben lobi foe ontfanga sma boen, foe di a ben sreka „foeroe sani” gi Jesus. Na wan tra fasi, Maria ben sori taki a ben lobi foe ontfanga sma boen. A „ben go sidon na den foetoe foe Masra èn ben tan arki a wortoe foe en”, èn Jesus ben prèise en foe di a ben teki „a boen pisi” (Lukas 10:38-42). Takimakandra nanga den wan di abi ondrofeni foeroe jari kaba, nofo tron na den heimarki foe wan neti di sma ben abi demakandra nanga den. — Romesma 1:11, 12.
Na spesroetoe okasi
15. Sortoe spesroetoe fesa kan sori foe de prisiri ten gi Jehovah pipel?
15 Ala di troe kresten no e hori densrefi na pôpi gwenti noso no e hori den fesa foe grontapoe, tokoe okasi de pe den e kon makandra foe njan boen foe a de di den de makandra. Foe eksempre, Jesus ben go na wan trow-oso na Kana èn a ben meki a fesa kon moro prisiri, di a ben doe en fosi wondroe drape (Johanes 2:1-11). Na so a de toe na ini a ten disi, taki a pipel foe Jehovah abi prisiri ten makandra na den srefi sortoe spesroetoe okasi dati, èn a hori foe fesa na wan fasi di fiti, e meki den sortoe okasi dati kon tron prisiri ten. Ma sortoe sani fiti?
16. Sortoe tirilin wi abi foe a joisti fasi fa wi moesoe tjari wisrefi, srefi na spesroetoe okasi?
16 Te wi e studeri bijbel, dan wi e leri sortoe waka nanga libi fiti gi kresten, èn disi wi e doe ala ten (Romesma 13:12-14; Galasiasma 5:19-21; Efeisesma 5:3-5). Prisiri demakandra, efoe a abi foe doe nanga trow-oso noso nanga iniwan tra okasi, no e gi wi pasi foe trowe wi kresten markitiki noso foe doe wan sani di wi no gwenti foe doe; noso wi no de froeplekti foe hori wisrefi na ala den gwenti foe a kondre pe wi e libi. Foeroe foe den gwenti dati abi en fondamenti na tapoe falsi relisi doe noso kroektoe bribi, èn trawan abi foe doe nanga wan waka nanga libi di krinkrin no fiti gi kresten. — 1 Petrus 4:3, 4.
17. (a) San e sori taki a trow-oso na Kana ben orga boen èn boen tiri ben de? (b) San e sori taki Jesus ben feni a fesa dati boen?
17 Te wi e leisi Johanes 2:1-11, dan a no moeilek gi wi foe si taki a fesa ben de wan bigi fesa èn taki wan bigi nomroe fisitiman ben de drape. Ma Jesus nanga den disipel foe en ben de sma di ’ben kisi wan kari foe kon’; den no ben go na a fesa sondro foe sma froewakti den, ala di wan toe foe den kande ben de famiriman foe a sma di ben gi den wan kari. Wi e si toe taki „den wan di ben e dini sma” ben de èn wan „fesiman”, di ben o taki san den ben moesoe gi den sma noso san den ben moesoe doe. Ala den sani disi e sori taki a fesa ben orga boen èn wan joisti tiri ben de. A tori e tapoe foe di a e taki dati nanga san Jesus ben doe na a fesa, a „ben meki sma si a glori foe en”. A ben sa gebroiki a fesa dati foe doe disi, efoe a ben de wan fesa pe sma ben de onborsoe èn no ben man dwengi densrefi? Kwetikweti.
18. San wi moesoe hori boen na prakseri te wan okasi de foe abi prisiri demakandra?
18 Dan san wi kan taki foe iniwan spesroetoe fesa pe wi moesoe de a sma di gi trawan wan kari? Wi moesoe hori na prakseri taki a marki foe ontfanga trawan boen na taki wi alamala ben sa kan „tron kompe wrokoman na ini waarheid”. So boen, a no nofo foe kari wan fesa wan „Kotoigi”-konmakandra. Wi kan poti na aksi: A de troetroe wan boeweisi foe soema wi de èn san wi e bribi? Noiti wi moesoe si den sortoe fesa dati leki okasi foe si o fara wi kan go foe hori strei nanga den fasi foe grontapoe, èn gi wisrefi abra na „a lostoe foe skin nanga a lostoe foe den ai nanga a prodo di wan sma e prodo nanga den sani di a abi foe tan na libi” (1 Johanes 2:15, 16). Na presi foe dati, den fesa disi moesoe sori na wan joisti fasi sortoe posisi wi e teki leki Jehovah Kotoigi, èn wi moesoe de seiker taki san wi e doe, e tjari glori nanga grani kon gi Jehovah. — Mateus 5:16; 1 Korentesma 10:31-33.
’Lobi foe ontfanga sma boen sondro foe knoroe’
19. Foe san ede wi moesoe „lobi foe ontfanga makandra boen sondro foe knoroe”?
19 Foe di a situwâsi na grontapoe e tan go na baka èn sma e kon prati moro nanga moro, meki wi moesoe doe ala san wi kan foe tranga a krosibei banti di de na mindri troe kresten (Kolosesma 3:14). Dati meki wi moesoe abi „tranga lobi gi makandra”, soleki fa Petrus ben gi wi tranga foe doe. Dan, na ini wortoe di sma e froestan krin, a ben taki moro fara: „Lobi foe ontfanga makandra boen sondro foe knoroe” (1 Petrus 4:7-9). Wi de klariklari foe wi fosi bigin sori taki wi lobi foe ontfanga wi brada boen, foe span wisrefi tranga foe sori switifasi èn foe lobi foe gi jepi? Noso wi e knoroe te wi e kisi so wan okasi? Efoe wi e doe dati, dan wi e meki a prisiri di wi ben kan abi, lasi a warti foe en èn wi ben kan lasi a kolokoe toe di wi ben sa kisi foe di wi ben doe boen. — Odo 3:27; Tori foe den Apostel 20:35.
20. Sortoe blesi e wakti wi efoe wi e sori a lobi foe ontfanga sma boen na ini a grontapoe foe a ten disi di prati?
20 Te wi e wroko krosibei nanga wi kompe kresten, foe di wi de nanga switifasi èn wi lobi foe ontfanga makandra boen, dan dati sa tjari boen foeroe blesi kon (Mateus 10:40-42). Jehovah ben pramisi den sortoe sma disi taki a ben o „bradi en tenti na den tapoe. Den no [ben o] abi angri moro èn den no [ben o] dreiwatra moro”. Foe de na ini a tenti foe Jehovah wani taki dati a e gi wi kibri èn a e doe wi boen (Openbaring 7:15, 16; Jesaja 25:6). Ija, leti na wi fesi wi abi a froewakti foe njan boen foe a boen di Jehovah e doe wi foe têgo. — Psalm 27:4; 61:3, 4.
Joe kan tjari disi kon na krin?
◻ San wi no moesoe frigiti efoe wi wani feni troe pisiri nanga satisfaksi?
◻ Soema na den „pikin di no abi papa nanga mama èn den weduwe”, èn fa wi moesoe „loekoe den”?
◻ Fa wi moesoe si den „dorosei-sma” nanga „trakondre-sma” na wi mindri?
◻ Soema na den wan di warti en foe wi hori den spesroetoe na prakseri na ini a ten disi?
◻ Fa wi moesoe sori a troetroe jeje foe lobi foe ontfanga sma boen na spesroetoe okasi?
[Prenki na tapoe bladzijde 16, 17]
Te wi e hori fesa, wi kan sori taki wi lobi foe ontfanga trakondre-sma, noso pikin di no abi papa, den wan di de na ini a foeroeten diniwroko, nanga tra fisitiman boen