Sori taki joe lobi foe teki tra sma na oso
1 A sori taki joe lobi teki tra sma na oso de wan warti sani gi a sma di e teki a trawan na oso leki a fisitiman. A de wan kristen plekti (Hebr. 13:2). Son sma de now ini na waarheid foe di na lobi foe teki trawan na oso leki wan kristen ben wroko boen tapoe den. Joe e sori taki joe lobi foe teki tra sma na joe oso troetroe? Joe e soekoe fasi foe tjari kenki kon ini dati?
2 Den e skrifi foe a lobi foe teki tra sma na oso leki (na teki foe sma na joe oso nanga joe heri ati èn nanga lobi èn a meki foe fisitiman ofoe freemde sma njan èn dringi). Den wortoe „nanga joe heri ati” wani taki „foe komoto foe joe ati” èn „joe e bedoel en boen”. Te a lobi foe teki tra sma na joe oso soboen wani de wan troetroe sani èn abi waarde, dan a moesoe komoto na joe ati. Neleki Lydia wan sma di lobi foe teki tra sma na oso, e ’dwengi na fisitiman foe kon’ (Tori. 16:14,15). Sma di lobi foe teki tra sma troetroe na oso e soekoe okasi foe doe boen gi tra sma.
FA FOE SORI EN
3 Fa wi kan sori taki wi lobi foe teki tra sma na wi oso? Èn na soema? Ini owroeten na lobi foe teki sma na oso ben sori gi proféti èn spesroetoe dienstknegti foe Gado. Son sma ben gi engel srefi foe njan èn dringi foe di den ben abi na fasi foe teki sma na den oso (Gen. 18:3, 8). Prakseri pikinso fa Zacheus, Martha, Maria nanga Lazarus ben kisi pai foe di den ben sori gi Jezus taki den lobi tra sma! (Luk. 19:5-10; 10:38-42) So toe ini wi ten foeroe sma na a fasi disi ben kisi blesi foe di den ben sori taki den ben lobi foe teki opziener di e waka lontoe, takiman di kon fisiti na gemeente, pionier nanga zendeling na den oso. — Rom. 1:11.
4 Sosrefi toe njoen sma de ini na gemeente di sa njan boen foe na lobi di wi lobi teki tra sma ini wi oso. Son sma ini na gemeente kande e sjensjen. Trawan kande no e wroko foeroe moni aladi trawan baka de tapoe den jari ofoe no de so gesontoe. Son jongoewan no abi papa ofoe mama ini na waarheid. Sortoe krakti a ben sa abi tapoe den efoe wi ben sa kari den kon na wi oso foe wan njanjan ofoe foe wan noso tra gesontoe ontspanning ofoe makandra nanga trawan studeri ini na osofamiri? Prakseri na koni rai foe Jezus ini Lukas 14:12-14.
5 Te wi e sori taki wi lobi teki tra sma ini wi oso dan disi no mag tan soso na sma di de ini wi gemeente. Wi e sori disi toe gi wi birti sma di de ini nowtoe foe di wan ongolokoe, siki noso dede ini na famiri miti den. Wi e meki gebroiki foe sori famiriman taki wi lobi foe teki sma na wi oso? Wi moe sori dati wi de ini balans èn e si sani na wan boen fasi te wi o gi wi ten na disi; kande wi sa kan gebroiki den sortoe okasi dati foe gi den okasi préki ofoe ini wi taki gi den tranga, na sé na jepi di kande wi e gi ini tra okasi.
DEN PAIMAN
6 Na sori foe a lobi teki tra sma na oso leki wan kristen e aksi ten nanga moeiti. Ma efoe wi e gi wisrefi tapoe na fasi disi, dan disi e marki wi leki Kristus discipel (Joh. 13:35). Jehovah wani dati wi de sma di e gi. Wi e kisi moro satisfaksi nanga kolokoe foe gi sani leki foe teki sani (Tori. 20:35). Aladi a de kostoe extra wroko tokoe wi wani hori ini prakseri taki wroko de wan presenti foe Gado (Prék. 3:13). Na sili di lobi foe gi sani kan froewakti wan paiman foe na gi foe sani di bedoel boen. — Odo 11:25; Luk. 6:38.
7 Wi e ondrofeni boen foeroe prisiri te wi e si dati a lobi foe teki sma na wi oso leki wan kristen ben meki wan sma abi wan prati dorodoro na a moro prenspari fasi foe gi sani, namkoe na Kownoekondre prékiwroko. Fa a de wan sani di e gi satisfaksi te wi e si sma di wi ben sori taki wi lobi teki tra sma na oso e njan boen foe Jehovah tégo seti foe sani ini wan njoen ordening! Ia, a sori taki wi lobi teki trawan na wi oso kan abi waarde foe tégo gi den sma di e sori dati leki den sma di e kisi dati. — Matt. 25:34-40.