Trowstoe gi den sma di e kisi kwinsi

JOE no si joe heri libi kaba, taki sma e gebroiki son wortoe ibritron baka na ini njoensoe? Joe weri foe leisi den wortoe dati leki orlokoe, ogridoe rampoe, angri, nanga pina? Ma wi kan si krin taki wán wortoe no de foe feni na ini njoensoe tori. Tokoe a de wan wortoe di abi wan sani na ini di a libisma famiri abi fanowdoe troetroe. A wortoe na „trowstoe”.

„Foe gi trowstoe” wani taki „foe gi krakti nanga howpoe na” èn „foe lekti a sari di wan sma e sari noso foe kowroe den broko-ede” foe wan sma. Nanga ala a broeja di ben de na grontapoe na ini a heri di foe 20 jarihondro, a de troetroe fanowdoe foe abi howpoe èn foe lekti a sari di sma e sari. A troe, taki son wan foe wi na ini a ten disi abi moro materia goedoe leki den afo foe wi oiti ben kan denki foe abi. Moro foeroe disi de foe di sabidensi go na fesi. Ma sabidensi nanga technologie no trowstoe wi so, taki den poeroe ala den sani di e meki a libisma famiri pina. San na den sani disi?

Foeroe jarihondro pasa kaba, a koni man Salomo ben taki foe wán prenspari reide taki pina de, di a ben taki: „A wan libisma tiri tapoe a tra libisma nanga ogri bakapisi gi en” (Preikiman 8:9). Sabidensi nanga technologie no ben man kenki a fasi di libisma abi foe wani tiri en kompe. Na ini a di foe 20 jarihondro, disi ben abi leki bakapisi taki kondre ben kisi ogri-ati tiriman di e kwinsi sma èn taki kondre ben feti makandra na wan ogri-ati fasi.

Sensi 1914, moro leki wan hondro miljoen sma dede leki bakapisi foe feti. Prakseri foe a hebi pen di a nomroe foe sma disi e prenki — miljoenmiljoen osofamiri di e sari èn di abi trowstoe fanowdoe. Èn feti abi tra sortoe pina leki bakapisi boiti a dede di sma dede na wan ogri-ati fasi. Na a kaba foe a di foe toe grontapoefeti, moro leki 12 miljoen loweman ben de na Europa. Na ini den jari di no pasa so langa ete, moro leki wan nanga afoe miljoen sma lowe foe den presi na Zuidowstoe-Asia pe feti de. Feti na den Balkan Staten meki taki moro leki toe miljoen sma ben moesoe lowe gowe libi a tanpresi foe den — foeroe leisi den ben moesoe lowe gi „a kiri di sma e kiri trawan foe krin wan ras”.

Loweman abi trowstoe fanowdoe troetroe, spesroetoe den sma di moesoe lowe gowe libi den tanpresi foe den nanga noti moro na den anoe leki den goedoe di den man tjari, èn den no sabi pe foe go noso san a tamara sa tjari gi den nanga den osofamiri foe den. Den sma dati na sma di de foe sari èn di kisi kwinsi moro leki tra sma; den abi trowstoe fanowdoe.

Na presi na grontapoe pe sma abi moro vrede, miljoenmiljoen sma e libi pikinmoro leki srafoe foe na ekonomia sistema foe grontapoe. A troe, taki son sma abi boen foeroe goedoe na materia sei. Ma a moro bigi pisi moesoe meki moeiti ibri dei foe wroko moni. Foeroe sma e soekoe wan boen oso. Moro nanga moro sma de sondro wroko. „Na ini a jari 2020”, na so wan koranti foe Afrika e taki na fesi, „grontapoe e waka go miti wan boen bigi rampoe tapoe a kontren foe wroko, nanga moro leki 1.3 miljard sma moro di e soekoe wroko.” Foe troe den wan di e kisi kwinsi na ekonomia sei, abi „krakti nanga howpoe” — trowstoe — fanowdoe.

Foe di son sma e soekoe wan loesoe gi situwâsi di e meki sma lasi-ati, dan den e tron ogriman. A no de foe taki, dati disi e tjari soso problema kon gi den sma di den e doe ogri, èn a hei nomroe foe sma di e doe takroedoe e meki taki moro sma e kisi kwinsi. No so langa pasa ete, wan titel foe wan artikel na ini The Star, wan koranti foe Johannesburg, Zuid-Afrika, ben taki: „Wán dei ini a libi foe ’a kondre pe sma e kiri trawan moro leki ala tra kondre na grontapoe.’” Na artikel ben taki foe wan gewoon dei na ini èn na lontoe Johannesburg. A dei dati, den ben kiri fo sma èn foe aiti sma den ben foefoeroe a wagi foe den. Skowtoe ben kisi foe jere taki 17 tron den ben foefoeroe na ini wan birti pe sma e libi di goedoe pikinso. Boiti foe dati, den ben ròs wan toe sma foe di den ben gebroiki fetisani. Soleki fa a koranti ben taki, dan skowtoe ben taki foe a dei disi leki wan „tiri [dei] te joe e teki en gersi tra dei”. Wi kan froestan taki den famiri foe den sma di trawan kiri nanga den wan di trawan broko go na ini den oso èn di kisi foe doe nanga a foefoeroe di sma foefoeroe a wagi foe den, e kisi kwinsi troetroe. Den abi djaranti nanga howpoe — trowstoe — fanowdoe.

Na son kondre, joe abi papa nanga mama di e seri den pikin foe den, meki den go libi wan motjo libi. Foe wán kondre na Asia pe foeroe fisitiman e go foe teki „seks trip”, den froeteri taki a kondre abi toe miljoen motjo, èn foeroe foe den, sma ben bai noso den ben foefoeroe di den ben de wan pikin-nengre. Tra sma de, di e kisi moro kwinsi leki den sma disi di wi moesoe sari? A tijdschrift Time ben taki foe a morsoe bisnis disi, èn ben froeteri foe wan konmakandra di organisâsi foe Zuidowstoe-Asia oemasma ben hori na ini 1991. Drape den ben kon si taki „foe sensi [1975], sma ben seri 30 miljoen oemasma na heri grontapoe”.

Ma a no abi foe de so, taki soso te sma e seri pikin foe go libi wan motjo libi, taki den de sma di e kisi kwinsi. Moro nanga moro pikin, e kisi foe doe nanga papa nanga mama èn famiriman di e meshandri den noso srefi e go didon na den nanga tranga na ini den eigi oso. Den sortoe pikin dati kan waka wan langa pisi ten ete nanga mankeri di den kisi na emotioneel sei. Troetroe, den sma di e kisi kwinsi èn di wi moesoe sari, abi trowstoe fanowdoe.

Wan sma di ben ondrosoekoe a kwinsi di sma e kisi

Kownoe Salomo ben kon skreki foe ala a kwinsi di libisma e kisi. A ben skrifi: „Mi foe mi sei ben drai foe loekoe ala den sani di sma e doe na ondro son foe kwinsi tra sma, èn, loekoe! den watra-ai foe den wan di den ben e kwinsi, ma den no ben abi no wan sma foe trowstoe den.” — Preikiman 4:1.

Efoe a koni kownoe ben froestan 3000 jari pasa kaba taki den sma di ben kisi kwinsi troetroe ben abi wan sma fanowdoe foe trowstoe den, dan san a ben o taki na ini a ten disi? Ma tokoe Salomo ben sabi taki no wan onvolmaakti libisma, pe ensrefi ben de na ini toe, ben kan gi a trowstoe di libisma abi fanowdoe. Wan moro bigi sma ben de fanowdoe foe poeroe a makti foe den sma di e kwinsi trawan. So wan sma de?

Na ini bijbel, Psalm 72 e taki foe wan prenspari sma di e gi ala sma trowstoe. Na kownoe David, a papa foe Salomo, ben skrifi a psalm. Den tapoesei wortoe foe a psalm e taki: „Foe Salomo.” A de krin, taki na owroe kownoe David ben skrifi foe a Sma di ben o kisi a kownoestoeroe foe en. A Sma disi, soleki fa a psalm e taki, ben o tjari têgo froelekti kon foe di a ben o poeroe ala sani di e kwinsi sma. „Na ini den dei foe en a regtfardikiwan sa sproiti, èn vrede pasa marki, te leki moen no de moro. Èn a sa abi sma na en ondro foe se te go miti se . . . te na den oekoe foe grontapoe.” — Psalm 72:7, 8.

Kande di David ben skrifi den wortoe disi, dan a ben denki foe en manpikin Salomo. Ma Salomo ben froestan taki a no ben de ini en makti foe dini a libisma famiri na a fasi fa a psalm e taki foe en. A ben kan meki den wortoe foe a psalm kon troe soso na wan pikin fasi èn gi a boen foe a nâsi Israèl, no gi a boen foe heri grontapoe. A de krin, taki a psalm disi di Gado meki sma taki nanga jepi foe profeititori, ben sori go na wan sma di ben bigi moro Salomo. Soema ben de dati? A ben kan de Jesus Krestes wawan.

Di wan engel ben meki bekènti taki Jesus ben gebore, dan a ben taki: „Jehovah Gado sa gi en a kownoestoeroe foe en tata David” (Lukas 1:32). Boiti dati, Jesus ben sori go na ensrefi leki „moro foeroe leki Salomo” (Lukas 11:31). Sensi di Jesus opo baka èn go sidon na Gado en reti-anoe, a de na hemel, na a presi foe pe a kan meki den wortoe foe Psalm 72 kon troe. Moro fara, a kisi a krakti nanga makti foe Gado foe broko a tjatjari di kwinsiman e poti na libisma tapoe (Psalm 2:7-9; Danièl 2:44). Dati meki Jesus na a sma di sa meki den wortoe foe Psalm 72 kon troe.

Heri esi kwinsi sa kon na wan kaba

San disi wani taki? A wani taki, dati heri esi a sa de wan troetroe sani taki wi kon fri foe ala sortoe fasi fa libisma e kwinsi wi. Jesus ben taki na fesi dati a boen bigi pina nanga kwinsi di wi e si na ini a di foe 20 jarihondro disi ben o de wan pisi foe a marki di ben o sori „a kaba foe a seti foe sani” (Mateus 24:3). Boiti dati, a ben taki na fesi: „Nâsi sa opo go feti nanga nâsi èn kownoekondre nanga kownoekondre” (Mateus 24:7). A pisi dati foe a profeititori ben bigin kon troe na a ten di a fosi grontapoefeti ben bigin na ini 1914. „Bika kroektoedoe sa kon moro foeroe”, Jesus ben taki moro fara, „meki a lobi foe moro foeroe sma sa kon kowroe” (Mateus 24:12). Kroektoedoe èn a de di sma de sondro lobi, tjari wan godelowsoe geslakti kon di e kwinsi sma. Foe dati ede, a ten moesoe de krosibei taki Jesus Krestes sa kon na mindri leki a njoen Kownoe foe grontapoe (Mateus 24:32-34). San dati wani taki gi den libisma di e kisi kwinsi, di e bribi na ini Jesus Krestes èn di froetrow na en tapoe leki a Sma di Gado poti foe trowstoe a libisma famiri?

Foe kisi wan piki na tapoe na aksi dati, dan meki wi leisi wan toe tra wortoe foe Psalm 72 di e kon troe na ini Krestes Jesus: „A sa froeloesoe a pôtiwan di e bari foe kisi jepi, so srefi a sma di e kisi kwinsi èn ibri sma di no abi jepiman. A sa firi sari gi den mofinawan èn gi a pôtiwan; èn a sa froeloesoe den sili foe den pôtiwan. Foe kwinsi èn foe ogri di e doe nanga tranga a sa froeloesoe a sili foe den, èn a broedoe foe den sa de warti na ini en ai” (Psalm 72:12-14). So boen, Jesus Krestes, a Kownoe di Gado poti na wroko, sa sorgoe taki no wan sma abi foe pina moro foe di a e kisi kwinsi. A abi a makti foe tjari wan kaba kon na ala sortoe onregtfardikifasi.

’Dati sori so moi’, wan sma ben sa kan taki, ’ma fa a de nanga now? Sortoe trowstoe de gi den wan di e pina nownowde?’ Foe taki en leti, trowstoe de gi den sma di e kisi kwinsi. Den toe artikel di e kon now na ini a tijdschrift disi sa sori fa miljoenmiljoen sma e kisi trowstoe kaba foe di den e kweki wan krosibei matifasi nanga a troe Gado, Jehovah, èn nanga en lobi Manpikin, Jesus Krestes. So wan matifasi kan trowstoe wi na ini den ten disi di e kwinsi wi èn kan tjari wan sma go na têgo libi sondro kwinsi. Jesus ben taigi Gado na ini begi: „Disi wani taki têgo libi, foe den e teki sabi doronomo na ini den foe joe, a wan-enkri troe Gado, èn foe en di joe ben seni kon, Jesus Krestes.” — Johanes 17:3.

[Prenki na tapoe bladzijde 4, 5]

No wan libisma sa kwinsi wan trawan na ini Gado njoen grontapoe