Wan Sma De Di E Broko En Ede Trutru Nanga Wi

DUSUNDUSUN sma e sori taki den e broko den ede trutru nanga trawan. Den no e prakseri sondro firi èn na wan fasi di e sori taki den e denki soso densrefi nomo, taki den problema fu tra sma a no den broko-ede. Na presi fu dati, den e du ala sani di den kan du — son leisi den e poti a libi fu den na ini kefar srefi — fu lekti a pina fu sma. Disi na wan kefalek bigi wroko, wan di e kon moro muilek fu di den no man basi den bigi makti.

Den sani leki bigi-ai, politiek krukafasi, orloku, nanga naturu rampu kan bruya srefi „a muiti fu sma di sabi a heri fini fu a tori èn di abi wan fasti bosroiti fu puru angri”, na so wan sma di e yepi trawan e taki. Fu puru angri na soso wán fu den heri ipi problema di e miti den sma di e broko den ede nanga trawan. Den e feti tu nanga sani leki siki, pôtifasi, onregtfardikifasi, nanga a bigi pina di de a bakapisi fu orloku. ¿Ma den e wini a strei?

Na edeman fu wan fu den organisâsi di e yepi sma ben taki dati a ’muiti dati fu sma di sabi a heri fini fu a tori èn di abi wan fasti bosroiti’ fu lekti angri nanga pen, de neleki a sari-ati Samariaman na ini na agersitori fu Yesus Krestes (Lukas 10:29-37). Ma awansi san den e du, na so a ben taki, a nomru fu sma di e kisi kwinsi e tan kren. Dati meki a ben aksi: „San a bun Samariaman ben o du te a ben o waka a srefi pasi ibridei baka, wan tu yari langa èn ibri wiki a ben feni na sei pasi ete wan tra sma di fufuruman ben ròs?”

A ben o makriki efu wan sma ben o broko kindi gi a sani di den kari ’a siki di e kiri sma fu di den kon weri fu gi yepi’, èn a no ben o gi yepi moro fu di a no sabi moro san fu du. Wi musu gi den sma di e broko den ede trutru nanga trawan, grani taki den no gi abra (Galasiasma 6:9, 10). Fu eksempre, wan man di ben skrifi go na a Jewish Telegraph na Ingrisikondre ben prèise Yehovah Kotoigi di „ben yepi dusundusun Dyu fu pasa den pina fu Auschwitz”, na a ten fu Nazi Doisrikondre. „¡Te nyanyan no ben de furu,” na so a skrifiman ben taki, „dan den ben prati a brede fu den nanga den [Dyu] brada nanga sisa fu wi!” Den Kotoigi ben tan du san den ben kan du nanga den sani di den ben abi.

Ma fu taki en leti, awansi omeni brede e prati, dati no sa tyari wan kaba kon krinkrin na a pina di libisma e pina. Disi no wani taki kwetikweti, dati wi no abi warderi gi den sani di sari-ati sma du. Ala sani di sma e du na wan yoisti fasi fu kan lekti a pina, na wan bun sani. Den Kotoigi dati ben lekti a pen fu den tra strafuman pikinso, èn te fu kaba a Nazisme no ben de moro. Ma a sistema fu grontapu di e meki taki sma e kisi kwinsi de ete, èn someni sma de ete di no e broko den ede nanga trawan. Iya, „wan geslakti de di abi tifi leki feti-owru èn di abi kakumbe leki srakti-nefi, fu nyan den sma di e pina puru fu grontapu èn den pôtiwan na a libisma famiri” (Odo 30:14). Kande yu e aksi yusrefi fu san ede disi de so.

Fu San Ede Pôtifasi Nanga Kwinsi De?

Yesus Krestes ben taki wan leisi: „Den pôtiwan de ala ten nanga unu, èn te unu wani, unu kan du bun gi den ala ten” (Markus 14:7). ¿Yesus ben wani taki dati noiti wan kaba ben o kon na pôtifasi nanga kwinsi? ¿Neleki son sma, a ben bribi taki a pina dati na wan fu den sani di Gado abi na prakseri fu gi den sari-ati sma na okasi fu sori omeni den e broko den ede nanga trawan? ¡Nôno! Yesus no ben bribi dati. A ben sori nomo taki pôtifasi ben o de wan pisi fu a libi so langa a sistema fu sani disi de. Ma Yesus ben sabi disi tu: A no ben de a prakseri di en Tata na hemel ben abi biginbigin fu meki a situwâsi disi de na grontapu.

Yehovah Gado ben kria grontapu fu de wan paradijs, a no ben musu de wan presi pe someni pôtifasi, onregtfardikifasi, nanga kwinsi de. A ben sori omeni a lobi a libisma famiri fu di a ben sorgu fu moi sani di ben o meki sma prisiri moro fu a libi. ¡Iya, luku a nen srefi fu a dyari pe Adam nanga Eva, a fosi papa nanga mama fu wi, ben de! A ben nen Eden, san wani taki „Prisiri” (Genesis 2:8, 9). Yehovah no ben gi libisma na okasi nomo fu gebroiki soso den sani di den ben abi fanowdu fu tan na libi na ini wan soi presi pe den e kisi kwinsi. Di Yehovah ben kaba kria sani, dan a ben ondrosuku san a ben meki èn a ben taki dati a ben de „heri bun”.—Genesis 1:31.

We dan, fu san ede someni pôtifasi, kwinsi nanga tra sani di e pina sma, de na grontapu na ini a ten disi? A disiten ogri seti fu sani de, fu di a fosi papa nanga mama fu wi ben bosroiti fu meki opruru teige Gado (Genesis 3:1-5). Disi ben meki na aksi kon efu Gado ben abi a reti fu aksi den sma di a kria fu gi yesi na en. Dati meki Yehovah ben gi den bakapikin fu Adam primisi fu du sani na den fasi fu wan pisi ten. Gado ben broko en ede ete nanga san ben e pasa nanga a libisma famiri. A ben sorgu gi wan fasi fu puru ala ogri di na opruru dati teige en ben o tyari kon. Èn a no de langa moro taki Yehovah sa tyari wan kaba kon na pôtifasi nanga kwinsi — fu taki en leti, na ala pina.—Efeisesma 1:8-10.

Wan Problema Di Libisma No Man Lusu

Na ini den yarihondro sensi di Gado ben kria libisma, libisma kon de moro fara fu den markitiki fu Yehovah (Deuteronomium 32:4, 5). Fu di libisma ben tan opo densrefi teige den wet nanga den gronprakseri fu Gado, meki den feti nanga makandra, èn „libisma tiri a tra libisma nanga ogri bakapisi gi en” (Preikiman 8:9). Den sma di e prakseri soso densrefi nomo èn di wani du sani na den fasi, na presi fu gi yesi na a soevereiniteit fu Gado, ben gens ala muiti di sma du fu tyari wan trutru regtfardiki libimakandra kon, pe no wan sani de di ben sa pina sma.

Ete wan tra problema de — wan problema di furu sma ben sa si leki wan don sani fu bribi. A sma di e meki sma opo densrefi teige Gado e sutu faya gi sma ete fu du ogri èn fu prakseri soso densrefi nomo. A sma dati na Satan Didibri, èn Yesus Krestes ben kari en „a tiriman fu a grontapu disi” (Yohanes 12:31; 14:30; 2 Korentesma 4:4; 1 Yohanes 5:19). Na ini na openbaring di na apostel Yohanes ben kisi, den e sori taki Satan na a moro prenspari reide di e meki taki helu de — a moro prenspari sma di e „kori heri grontapu pe sma e libi”.—Openbaring 12:9-12.

Awansi omeni son sma e broko den ede nanga tra sma, noiti den sa man puru Satan Didibri noso sa man kenki a sistema disi di e meki taki dei fu dei moro nanga moro sma e kisi kwinsi. Dan san de fanowdu fu lusu den problema fu libisma? A lusu no de soso wan sma di e broko en ede nanga wi. Wan sma de fanowdu di wani puru Satan nanga a heri onregtfardiki sistema disi èn di abi a makti tu fu du dati.

„Yu Wani Pasa . . . na Grontapu”

Gado e pramisi fu pori na ogri seti fu sani disi. A wani du dati èn a abi a makti tu fu du dati (Psalm 147:5, 6; Yesaya 40:25-31). A profeiti Bijbel buku Danièl ben taki na fesi: „A Gado fu hemel sa opo wan kownukondre di noiti no sa kisi pori. Èn a kownukondre srefi no sa gi na no wan tra pipel. A sa broko ala den kownukondre disi na pisipisi èn tyari wan kaba kon na den, èn ensrefi sa tan te ten di no skotu” — iya, fu têgo (Danièl 2:44). Yesus Krestes ben prakseri fu a têgo hemel tiri disi di sa tyari bun kon gi sma, di a ben leri den disipel fu en fu aksi Gado na ini begi: „Meki yu kownukondre kon. Meki yu wani pasa, soleki na hemel, so tu na grontapu.”—Mateus 6:9, 10.

Yehovah sa piki den begi dati bika a e broko en ede trutru nanga a libisma famiri. Soleki fa den profeiti wortu na Psalm 72 e taki, dan Gado sa gi en Manpikin Yesus Krestes a makti fu tyari wan têgo frulekti kon gi den pôtiwan, den sma di e pina èn den sma di e kisi kwinsi èn di e horibaka gi a tiri fu Yesus. Dati meki a psalm singiman disi ben singi na ondro krakti fu santa yeye: „Meki a [Gado en Mesias Kownu] krutu den sma fu a pipel di e kisi kwinsi, meki a frulusu den manpikin fu a pôtiwan, èn meki a masi a bedrigiman. . . . A sa frulusu a pôtiwan di e bari fu kisi yepi, so srefi a sma di e kisi kwinsi èn ibri sma di no abi yepiman. A sa firi sari gi den mofinawan èn gi a pôtiwan, èn a sa frulusu den sili fu den pôtiwan. Fu kwinsi èn fu ogri di e du nanga tranga a sa frulusu a sili fu den, èn a brudu fu den sa de warti na ini en ai.”—Psalm 72:4, 12-14.

Na apostel Yohanes ben si na ini wan fisyun di ben taki fu a ten fu wi, „wan nyun hemel nanga wan nyun grontapu”, wan heri nyun seti fu sani di Gado sa seti. ¡A sa de wan blesi trutru gi a libisma famiri di e pina! Yohanes di ben taki na fesi san Yehovah o du, ben skrifi: „Mi ben yere wan tranga sten di komoto na a kownusturu, e taki: ’¡Luku! A tenti fu Gado de na libisma, èn en sa tan nanga den, èn den sa de en pipel. Èn Gado srefi sa de nanga den. Èn a sa figi puru ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba.’ Èn a Sma di ben sidon na tapu a kownusturu, ben taki: ’¡Luku! Mi e meki ala sani kon nyun.’ A e taki tu: ’Skrifi, bika den wortu disi de getrow èn tru.’”—Openbaring 21:1-5.

Iya, wi kan bribi den wortu disi, bika den de getrow èn tru. Dyonsro Yehovah sa puru pôtifasi, angri, kwinsi, siki nanga ala onregtfardikifasi na grontapu. Soleki fa a tijdschrift disi tyari kon na krin someni leisi kaba nanga yepi fu Bijbel, dan wan heri ipi buweisi e sori taki wi e libi na ini a ten te den pramisi disi sa kon tru. ¡A nyun grontapu di Gado pramisi de krosibei! (2 Petrus 3:13) Dyonsro Yehovah sa „swari dede fu têgo” èn a sa „figi den watra-ai puru na den fesi”.—Yesaya 25:8.

Solanga dati no pasa ete, wi kan breiti taki srefi nownow kaba sma de di e broko den ede trutru nanga trawan. Wan sani di e prisiri wi moro na taki Yehovah Gado srefi e broko en ede trutru nanga wi. Dyonsro a sa puru ala kwinsi nanga pina.

Yu kan frutrow dorodoro na ini den pramisi fu Yehovah. En futuboi Yosua ben du dati seiker. Sondro fu tweifri a ben taigi a pipel fu Gado na ini owruten: „Unu sabi heri bun nanga un heri ati èn nanga un heri sili, taki no wán wortu fu ala den bun wortu di Yehovah, un Gado, taigi unu, tan sondro fu kon tru. Den alamala kon tru gi unu. No wán wortu fu den tan sondro fu a kon tru” (Yosua 23:14). Fu dati ede, ala di a seti fu sani disi de ete, no meki den tesi di e miti yu kande, broko yu saka. Trowe ala den broko-ede fu yu na tapu Yehovah, bika a e broko en ede trutru nanga yu.—1 Petrus 5:7.

[Prenki na tapu bladzijde 7]

Na ini a nyun grontapu di Gado pramisi, pôtifasi, kwinsi, siki nanga onregtfardikifasi no sa de moro