Du leki Yesus èn sori taki yu e broko yu ede nanga den pôtiwan

PIKINMORO sensi libisma de, den e pina èn den e kisi kwinsi. Aladi a Wet di Gado ben gi den Israelsma, ben abi leki marki fu kibri den pôtiwan èn fu yepi den so taki den no pina so furu, toku den Israelsma no ben hori densrefi na a Wet disi (Amos 2:6). A profeiti Esekièl ben krutu a fasi fa sma ben e handri nanga den pôtiwan. A ben taki: „A pipel fu a kondre srefi, ben abi wan sistema fu bedrigi èn fu fufuru sma, èn den handri takru nanga a mofinawan èn a pôtiwan, èn a sma di e libi na den mindri leki freimde sma den du ogri sondro retidu.”—Esekièl 22:29.

Den srefi sani disi ben e pasa di Yesus ben de na grontapu. Den kerki fesiman no ben e broko den ede kwetikweti nanga den pôtiwan. Bijbel e taki dati den ben „lobi moni” èn taki ’den ben e fufuru den gudu fu den uma di lasi den masra na ini dede’. Boiti dati, den ben si en leki wan moro prenspari sani fu hori densrefi na den gwenti fu den, leki fu sorgu gi den owruwan nanga den pôtiwan (Lukas 16:14; 20:47; Mateyus 15:5, 6). A moi fu sabi taki na ini na agersitori di Yesus ben fruteri fu a Samariaman, wan priester nanga wan Leifisma ben koti a pasi abra di den si wan man di kisi mankeri. Na presi fu yepi a man disi, den waka pasa.—Lukas 10:30-37.

Yesus ben sori taki a ben e broko en ede nanga den pôtiwan

Den Evangelie tori di e taki fu Yesus en libi, e sori taki a ben sabi heri bun sortu problema den pôtiwan ben abi, èn taki a ben broko en ede trutru nanga den. Aladi Yesus ben libi na ini hemel fosi, toku a gowe libi ala den sani di a ben abi, èn a tron wan libisma di ’ben kon pôti fu a bun fu wi’ (2 Korentesma 8:9). Di Yesus si den ipi sma, dan „a ben sari den, bika sma ben pina den èn den ben waka bruyabruya leki skapu di no abi skapuman” (Mateyus 9:36). A tori fu a pôti uma di lasi en masra na ini dede, e sori taki a no a bigi moni di den gudusma ben gi, ben naki Yesus en ati, fu di den sma dati ben gi „san ben tan abra fu a moni fu den”. Ma na a pikinso moni di a pôti uma ben gi ben naki Yesus en ati, fu di na uma ben gi ’ala san a ben abi fu sorgu ensrefi, èn a poti a moni dati na ini a kisi’.—Lukas 21:4.

Yesus no ben abi sari-ati nomo gi den pôtiwan, ma a ben wani yepi den tu na ini den nowtu. En nanga den apostel fu en ben e tyari moni kon na wán, èn den ben e gi a moni dati na den pôti Israelsma (Mateyus 26:6-9; Yohanes 12:5-8; 13:29). Yesus ben meki den sma di ben wani tron en disipel, frustan taki den ben de fruplekti fu yepi den pôtiwan. A taigi wan yongu tiriman: „Go seri ala den sani di yu abi èn prati a moni dati nanga den pôtisma, dan yu sa kisi wan gudu na hemel; èn tron wan bakaman fu mi.” Ma a man disi no ben wani seri den gudu fu en. A sani disi e sori taki a ben lobi den gudu fu en moro leki a ben lobi Gado nanga tra sma. Sobun, a no ben abi den fasi di wan disipel fu Yesus musu abi.—Lukas 18:22, 23.

Den bakaman fu Krestes e broko den ede nanga den pôtiwan

Baka di Yesus dede, dan den apostel nanga den tra bakaman fu Krestes ben tan sori taki den e broko den ede nanga den pôti Kresten. Na a ten fu 49 G.T. na apostel Paulus ben kon makandra nanga Yakobus, Petrus, nanga Yohanes èn den ben taki fu a wroko di Masra Yesus Krestes ben gi Paulus fu preiki a bun nyunsu. Den ben agri taki Paulus nanga Barnabas ben musu go na „den trakondre sma”, èn taki den ben musu preiki spesrutu gi den sma di no ben de Dyu. Ma Yakobus nanga den tra apostel, gi Paulus nanga Barnabas a rai fu „tan prakseri den pôtisma”. Èn Paulus „du bun furu muiti fu du dati”.—Galasiasma 2:7-10.

Na a ten di Kèiser Klaudius ben e tiri, wan bigi angriten kon de na difrenti pisi fu a Gran Kownukondre Rome. Fu dati ede, den Kresten na Antiokia „bosroiti taki ibriwan fu den ben o seni san iniwan fu den ben man gi fu yepi den brada di ben tan na Yudea; èn na dati den du tu, èn den meki Barnabas nanga Saulus tyari den sani disi go na den owru man”.—Tori fu den Apostel 11:28-30.

Tru Kresten na ini a ten disi e frustan tu taki den bakaman fu Yesus musu sori taki den e broko den ede nanga den pôtiwan, spesrutu nanga den Kresten brada nanga sisa fu den (Galasiasma 6:10). Fu dati ede, den e sori taki den e broko den ede trutru nanga den wan di de na nowtu. Fu eksempre, na ini 1998 wan bigi dreiten pori wan bigi pisi fu a noord-owstusei fu Brasyonkondre. A dreiten pori na aleisi, a pesi, nanga a karu di sma ben prani, èn a sani disi meki taki wan bigi angriten kon de. A ben de a moro bigi angriten di ben de na ini den 15 yari di pasa. Na son presi, sma no ben abi nofo watra fu dringi srefi. Wantewante Yehovah Kotoigi na tra pisi fu a kondre, bigin seti sani fu yepi den sma drape. A no ben teki langa fosi den tyari bun furu nyanyan kon na wán, èn den pai a kostu fu tyari den sani gi den sma drape.

Den Kotoigi di ben gi moni nanga tra sani di den sma ben abi fanowdu, ben skrifi: „Wi breiti srefisrefi taki wi ben man yepi den brada fu wi, spesrutu fu di wi sabi taki a sani disi meki na ati fu Yehovah prisiri. Noiti wi e frigiti den wortu di skrifi na ini Yakobus 2:15, 16.” Den bijbeltekst dati e taki: „Efu wan brada noso wan sisa no abi krosi fu tapu en skin èn efu a no abi nofo nyanyan gi a dei, ma toku wan fu unu e taigi den: ’Tan bun, hori un skin waran, sorgu taki unu nyan un bere furu’, ma unu no e gi den san den abi fanowdu gi den skin, dan sortu bun unu du?”

Na ini wan fu den gemeente fu Yehovah Kotoigi na ini a foto São Paulo, yu abi wan Kotoigi di abi sakafasi èn di e wroko fayafaya. A sisa disi pôti, èn furu tron a musu meki tranga muiti fu feni den moro prenspari sani di a abi fanowdu fu tan na libi. A e taki: „Aladi mi pôti, toku a Bijbel boskopu gi mi wan trutru marki na ini mi libi. Mi no sabi san ben o pasa nanga mi efu den Kresten brada nanga sisa fu mi no ben yepi mi.” No so langa pasa, a Kresten uma disi di e wroko bun tranga, ben musu du wan oparâsi, ma a no ben man pai gi dati. Den Kresten brada nanga sisa na ini a gemeente ben man yepi en fu pai gi na oparâsi disi. Na so tru Kresten na heri grontapu e yepi den brada nanga sisa fu den te den de na nowtu.

Ma awansi fa den sortu ondrofenitori disi e naki wi ati, toku a de krin fu si taki na opregti muiti disi di sma e meki no kan tyari wan kaba kon na pôtifasi. Prenspari tirimakti nanga bigi organisâsi di e yepi sma na heri grontapu, ben man yepi wan tu sma, ma toku den no ben man lusu a problema di de sensi libisma de na grontapu. Fu dati ede na aksi disi e opo kon: Na sortu fasi wan kaba o kon na pôtifasi èn na tra problema di sma abi?

Leri fu Bijbel e tyari wan trutru lusu kon

Den Evangelie tori e fruteri taki Yesus Krestes ben gwenti fu du bun gi den pôtisma, noso gi den sma di ben abi tra nowtu (Mateyus 14:14-21). Ma san ben de a moro prenspari sani gi en? Na wan okasi, baka di Yesus ben yepi wan tu sma di de na nowtu, dan a taigi den disipel fu en: „Kon meki wi go na wan tra presi na den pikin foto di de na ini a birti, so taki mi kan preiki drape tu.” Fu san ede Yesus ben tapu fu yepi den sikiwan nanga den wan di de na nowtu, soso fu go doro nanga a preikiwroko fu en? A fruklari fu san ede a du dati: „Na fu dati ede [namku, fu preiki] mi kon” (Markus 1:38, 39; Lukas 4:43). Aladi Yesus ben feni en prenspari fu du bun gi sma di ben de na nowtu, toku a moro prenspari sani di a ben kon fu du, na fu preiki fu Gado Kownukondre.—Markus 1:14.

Fu di Bijbel e gi Kresten a rai fu „waka soifri na en [Yesus] baka”, meki Kresten na ini a ten disi sabi soifri san de moro prenspari te den e meki muiti fu yepi trawan (1 Petrus 2:21). Neleki Yesus, den Kresten disi e yepi sma di de na nowtu. Ma soleki fa a ben de nanga Yesus, na so den Kresten disi e si en tu leki a moro prenspari sani na ini den libi fu meki sma kon sabi a Bijbel boskopu di e taki fu bun nyunsu fu Gado en Kownukondre (Mateyus 5:14-16; 24:14; 28:19, 20). Ma fu san ede a de moro prenspari fu preiki a boskopu di de na ini Gado Wortu, leki fu yepi sma na wan tra fasi?

Ondrofenitori fu sma na heri grontapu e sori taki te sma e frustan a bun rai fu Bijbel èn e gi yesi na dati, dan den sabi moro bun san fu du te den e kisi fu du nanga den problema na ini a libi, èn nanga pôtifasi. Boiti dati, Yehovah Kotoigi na ini a ten disi e preiki a Bijbel boskopu di e taki fu Gado en Kownukondre. A boskopu disi e gi sma wan howpu gi a ten di e kon, èn a howpu disi e gi sma wan marki na ini a libi, srefi te den e kisi fu du nanga takru situwâsi (1 Timoteyus 4:8). San na a howpu dati?

A Wortu fu Gado e gi wi wan dyaranti gi a ten di e kon: „Wi e fruwakti nyun hemel nanga wan nyun grontapu, soleki fa a [Gado] ben pramisi, èn drape regtfardikifasi o tan” (2 Petrus 3:13). Te Bijbel e taki fu „grontapu”, dan son leisi dati abi fu du nanga den sma di e libi na grontapu (Genesis 11:1). Sobun, a regtfardiki „nyun grontapu” di Gado pramisi, na wan libimakandra fu sma di Gado feni bun. Gado Wortu e pramisi tu taki te Krestes sa tiri grontapu, dan den sma di Gado feni bun, sa kisi a presenti fu têgo libi, èn den sa libi wan koloku libi na ini wan paradijs na grontapu (Markus 10:30). Ala sma kan abi a tumusi moi tamara disi, sosrefi den pôtiwan. Na ini a „nyun grontapu” dati, pôtifasi no sa de noiti moro.

[Faki/Prenki na tapu bladzijde 7]

FA YESUS O „FRULUSU A PÔTIWAN”?—Psalm 72:12

RETIDU: „Meki a krutu den sma di e kisi kwinsi na mindri a pipel, meki a frulusu den manpikin fu a pôtiwan, èn meki a masi a bedrigiman” (Psalm 72:4). Te Krestes o tiri grontapu, dan retidu sa de na ala sei. Nowan kruktudu o de, bika na a sani dati e meki taki pôtifasi de na ini furu kondre di ben kan de gudu kondre efu sani ben waka tra fasi.

VREDE: „Na ini den dei fu en a regtfardikiwan sa sproiti, èn vrede sa de pasa marki, teleki a mun no de moro” (Psalm 72:7). Nofo tron a de so taki na den problema nanga den orloku na mindri libisma na den moro prenspari sani di e meki taki pôtifasi de na grontapu. Krestes sa tyari trutru vrede kon na grontapu, èn na so a sa tyari wan kaba kon na problema nanga orloku.

SARI-ATI: „A sa firi sari gi a mofinawan èn gi a pôtiwan, èn a sa frulusu den sili fu den pôtiwan. Fu kwinsi èn fu ogri di e du nanga tranga a sa frulusu a sili fu den, èn a brudu fu den sa de warti na ini en ai” (Psalm 72:12-14). Den mofinawan, den pôtiwan, nanga den wan di e kisi kwinsi sa tron wan bigi koloku famiri, di de na ini wánfasi ondro a tiri fu Kownu Yesus Krestes.

WAN BUN LIBI: „Aleisi sa de bogobogo na grontapu” (Psalm 72:16). Te Krestes o tiri, dan sma sa abi wan gudu libi èn den no sa mankeri noti. Na ini a ten disi a de so nofo tron taki pôtifasi e kon fu di nyanyan e mankeri, noso fu di angriten de. Ma na ini a ten di de na wi fesi sma no sa pina moro leki bakapisi fu den sani dati.

[Prenki na tapu bladzijde 4, 5]

Yesus ben wani yepi den pôtiwan na ini den nowtu

[Prenki na tapu bladzijde 6]

A Bijbel boskopu e gi sma trutru howpu