Gi den pôtisma howpu
1 Yesus ben lobi fu poti prakseri na pôtisma. Okasi ben de di Yesus ben du wondru gi pôtisma, fu di a ben gi den san den ben abi fanowdu èn a ben dresi den sikiwan. Ma a moro prenspari sani di a ben du gi den pôtisma, na fu preiki a „bun nyunsu” gi den (Mat. 11:5). Te now ete a Kresten diniwroko e tyari wini kon gi den pôtisma, ma sosrefi gi tra sma.—Mat. 24:14; 28:19, 20.
2 Wan trutru howpu: Nofo tron den kerki fesiman fu Krestenhèit e pramisi den pôtisma taki den sa kon gudu efu den e gi a kerki furu sani. Ma Bijbel e leri taki na a Kownukondre fu Gado wawan sa tyari wan kaba kon na pôtifasi, èn a sa lusu ala den problema fu libisma (Ps. 9:18; 145:16; Yes. 65:21-23). Te wi e sori den pôtisma san Bijbel e leri trutru, dan wi e gi den howpu èn wi e sori den o prenspari a de fu kon leri sabi Gado èn fu dini en.—Mat. 5:3.
3 Den Fariseiman di ben e libi na ini a ten fu Yesus no ben lobi den pôtisma kwetikweti, den ben wisiwasi den, èn den ben kari den ‘am-ha·’aʹrets, noso „pipel fu a kondre”. Ma Yesus ben si ’a brudu fu den’, noso a libi fu den, leki wan „warti” sani (Ps. 72:13, 14). Wi kan teki na eksempre fu Yesus èn ’du bun’ gi den pôtisma disi, fu di wi e sori switifasi gi den èn wi e hori den firi fu den na prakseri (Odo 14:31). Noiti wi musu taki na wan fasi di e sori taki wi e wisiwasi den sma di e libi na ini pôti birti, èn noiti wi musu draidrai fu gi den kotoigi. Furu sma di e arki a Kownukondre boskopu na pôtisma.
4 Yepi den pôtisma now: Te wi e leri den pôtisma na ini a kontren fu wi den gronprakseri fu Bijbel, dan dati e yepi den nownow kaba fu no pina so furu moro. Fu eksempre, Bijbel e krutu drungufasi, dòbel, sma di lesi, sma di e gebroiki tabaka, nanga tra sani di e meki taki sma e kon pôti (Odo 6:10, 11; 23:21; 2 Kor. 7:1; Ef. 5:5). Bijbel e gi sma deki-ati fu no bedrigi trawan èn fu wroko nanga den „heri sili”. Disi na tu moi fasi di wrokobasi lobi fu si na sma di e wroko gi den (Kol. 3:22, 23; Hebr. 13:18). Fu taki en leti, wan ondrosuku e sori taki furu wrokobasi e suku wrokoman di no e bedrigi sma èn di de opregti.
5 Yehovah e broko en ede nanga den pôtisma di e pina. Heri esi Yesus Krestes sa frulusu „den mofinawan di e bari fu kisi yepi” (Ps. 72:12). Teleki a ten dati doro, wi abi a grani fu trowstu tra sma, èn sosrefi den pôtisma, nanga a boskopu fu Bijbel di e gi den howpu.