De kolokoe — Sori boenati na den mofinawan

„A sma di e feragti a sma na en sé, e sondoe, ma kolokoe a sma de di e sori boenati gi den mofinawan.” — ODO 14:21.

1, 2. San ben psa nanga dri osofamiri tapoe den Filipijnen, èn foe loekoe sortoe aksi disi e tjari wi go?

NA A JOEROE ten di dri osofamiri foe Filipijnen na ini na distrikt Pangasinan ben de tapoe wan kristen komakandra, faja ben bigin onfroewakti sodati den oso foe den ben bron tron asisi. Di den ben doro na a presi pe na oso foe den ben tanapoe, a ben de taki den no ben abi njanjan èn ooktoe nowan sribipresi moro. Kompe kristen di ben kon sabi sortoe rampoe ben miti den, ben haasti densrefi go na den, nanga njanjan èn ben seti sani foe tjari den go na oso foe trawan ini na gemeente. Na tra mamanten kristen ben doro nanga bamboe èn nanga tra bowmateriaal. Na brada lobi disi ben meki indruk tapoe den birtisma. Ooktoe den dri osofamiri ben ondrofeni na boen krakti foe dati. Na faja ben pori den oso foe den, ma na bribi foe den èn tra kristen égifasi ben tan tanapoe faste èn ben kon moro tranga leki wan bakapisi foe na lobi doe disi. — Mattéus 6:33; teki gersi 1 Korinte 3:12-14.

² Den sortoe ondrofeni tori disi no e waran na ati? Den no e tranga wawan na bribi foe wi ini na lobi foe libisma, ma moro ete na ini na krakti foe na troetroe kristendom (Tori foe den Apostel 28:2). Ma wi e ferstan san de na bijbel gron foe doe na fasi dati ’san boen gi ala sma, ma spesroetoe gi den sma di abi na srefi bribi leki wi’? (Galacia 6:10) Èn fa wi ben sa kan doe persoonlek moro na ini na tori disi?

Wan toemsi moi eksempre gi wi

3. Foe san wi kan de séker ini a tori foe Jehovah sorgoe gi wi?

³ Na discipel Jakobus e taigi wi: „Ibri boen presenti èn volmaakti kado e kon foe tapoe” (Jakobus 1:17). O troe disi de, bika Jehovah e seti sani psa marki gi wi jeje èn skin tanboen! Ma san ai poti a fesi? Na den jeje sani. A ben gi wi a bijbel foe eksempre, sodati wi ben sa abi jeje tiri nanga howpoe. Na howpoe dati abi en roetoe tapoe na presenti foe en Manpikin, foe soema na praktis ofrandi ben de na fundamenti dati wi e kisi pardon èn abi na ferwakti tapoe tégo libi. — Johannes 3:16; Mattéus 20:28.

4. San e sori krin dati Gado ooktoe abi belangstelling gi wi skin fanowdoe?

⁴ Jehovah abi ooktoe belangstelling gi wi skin tanboen. Na apostel Paulus ben tak-go-tak-kon foe disi nanga sma na ini na owroe Lystra. Aladi den no ben de troe anbegiman tokoe den no ben kan taki dati a no de so dati na Mekiman ’ben doe boen, foedi a e gi alen komoto foe hemel èn ten pe froktoe e kon foe di a foeroe wi ati psa marki nanga njanjan èn prisiri’ (Tori foe den Apostel 14:15-17). Foe lobi ede meki Jehovah no e sorgoe wawan ini wi fanowdoe, ma a sorgoe ooktoe ini sani foe na libi na skinfasi. Joe no denki dati disi e meki dati a de na „kolokoe Gado”? 1 Timóteus 1:11.

5. San wi kan leri tapoe na fasi tapoe san Gado ben handri nanga na owroe Israël?

⁵ Na fasi fa Gado ben handri nanga a owroe Israël, e gi wan eksempre foe na balansifasi tapoe san a e poti prakseri na tapoe den jeje fanowdoe èn a tapoe den skin situwasi foe en anbegiman. Fosi a ben sorgoe dati en pipel ben kisi a Wet. Den kownoe foe en ben moe meki persoonlek wan boekoe foe na Wet èn na pipel ben kon tapoe geregeld ten makandra foe jere fa den e lési en Wet (Deuteronomium 17:18; 31:9-13). Na Wet ben sorgoe foe wan tabernakel ofoe temepl èn foe priester gi na wroko di ben abi foe doe nanga srakti-ofrandi, sodati a pipel ben kan kisi a boenati foe Gado. Den Israëlsma ben kon geregeld makandra foe jeje anbegi (Deuteronomium 16:1-17). Leki wan bakapisi foe ala disi meki aparti Israëlsma ben kan de goedoe na jejefasi na fesi foe Gado.

6, 7. Fa Jehovah ben sori ini a wet foe a sorgoe foe en gi den skin nowtoe foe den Israëlsma?

⁶ Ma na Wet ben sori ooktoe omeni notisi Gado ben abi gi den skinomstandigheden foe en dienstknegti. Kande joe e denki na ini disi na den wet di Israël ben kisi foe hygiëne èn maatregel foe skotoe na panja foe infektiesiki kon de pikinso (Deuteronomium 14:11-21; 23:10-14). Ma tokoe joe no moe loekoe psa den seti di Gado ben seti foe jepi den pôtiwan èn den mofinawan. Wan takroe gesontoe ofoe wan rampoe soleki wan faja di bron sani ofoe wan watra di soengoe sani, kan meki wan Israëlsma kon de pôti. Ini en wet Jehovah e erken srefi dati a no ala sma ben sa de na ini precies densrefi skinomstandigheid (Deuteronomium 15:11). Ma a ben doe moro leki soso firi gi den pôtiwan nanga den mofinawan. A ben seti sani foe gi jepi.

⁷ Den sortoe sma disi ben sa abi na a fosi presi njanjan fanowdoe. Foe dat’ede Gado ben komanderi dati pasi ben sa gi na den pôtiwan na ini Israël foe waka piki njanjan na den gron èn ini den froktoedjari ofoe foe den olijfbon (Deuteronomium 24:19-22; Leviticus 19:9, 10; 23:22). Na fasi tapoe fa Jehovah ben handri, no ben gi sma dekati foe de lesi ofoe libi foe begi te den ben man foe wroko. Wan Israëlsma di ben waka piki njanjan, ben moe span ensrefi èn kande joeroe langa a moe wroko na ini na faja son foe tjari a njanjan kon makandra foe a dé. Ma wi no moe loekoe psa a sani disi dati Gado tapoe a fasi disi ben seti sani gi den di ben kon de pôti. — Teki gersi Ruth 2:2; Psalm 69:33; 102:17.

8. (a) Aparti djoe ben kisi dekati foe doe sortoe sani foe na boen foe den brada foe den? (Teki gersi nanga Jeremia 5:26, 28.) (b) Fa joe kan teki na fasi di Gado ben gi den djoe dekati nanga na fasi di de now algemeen?

⁸ Jehovah bon meki ooktoe kon a krin omeni belangstelling a ben abi gi den mofinawan te joe loekoe den wortoe soleki disi tanapoe na ini Jesaja 58:6, 7. Ini wan ten na ini san boen foeroe Israëlsma di ben de tevréde nanga densrefi èn nanga foeroe dorosé sori foe sani ben e faste, a proféti foe Gado ben ferklari: „A no disi na a faste di mi e teki? Foe seni den wan di den masi go ini fri, èn dati oenoe ben sa broko ibri oedoe leki wan tjatjari ini toe pisi? A no de so, foe prati oen brede gi den angriwan, èn dati oen ben sa tjari den wan di no abi oso èn di den e kwinsi go ini oen oso? Dati efoe oen si wan soso-skin-wan oen moe weri krosi gi en, èn dati oen no ben sa kibri oensrefi gi oen égi meti?” Wantoe sma ini a ten disi e hori ai nanga frede tapoe san wan sma ben sa kan kari na kontren foe den „égi makrikifasi”. Den de klari wawan foe jepi wan mofinawan efoe foe den sé a no e aksi persoonlek offer ofoe moeilekheid. Fa a ben de trafasi nanga na jeje tapoe san krakti ben poti na tapoe ini den Wortoe foe Gado nanga mofo foe Jesaja! — Loekoe Ezechiël 18:5-9.

9. Sortoe rai ini a leni foe moni wi e feni ini a wet, èn Gado e gi tranga foe abi sortoe fasi?

⁹ Na broko-ede gi pôti Israël brada kan kon a krin ini den bepaling di ben abi foe doe nanga na leni foe moni. Wan Israëlsma nanga leti ben kan ferwakti rente te a ben leni moni na wan sma di ben wani gebroiki en foe opo wan bisnis ofoe foe meki en bisnis kon moro bigi. Ma Jehovah ben taki foe no aksi rente te moni ben leni na wan pôti brada, di noso ini na broeja foe en kande ben sa kori go doe ogri (Exodus 25:25; Deuteronomium 15:7, 8, 11; 23:19, 20; Odo 6:30, 31). Na fasi foe Jehovah gi den ongolokoewan ben moe de wan eksempre gi en pipel. Wi e kisi srefi na pramisi: „A sma di e sori boenati gi na mendriwan, e leni na Jehovah, èn na fasi fa ai doe a sa pai en” (Odo 19:17). Go prakseri dati pikinso — foe leni na Jehovah èn foe abi na sékerfasi dati a sa pai joe baka boen foeroe!

10. San joe kan aksi joesrefi baka te joe e loekoe na eksempre foe Gado?

¹⁰ Wi moe aksi oen alamala soboen: San na a fasi fa Gado e loekoe sani èn na fasi fa ai doe nanga den mofinawan wani taki gi wi? Mi ben leri foe en volmaakti eksempre èn proberi foe waka na en baka? Mi kan tjari kenki kon, sodati na ini a fasi disi mi e sori moro na prenki foe Gado? — Genesis 1:26.

Soleki a Tata de, a so a Manpikin de

11. Fa na sorgoe foe Jezus ben kroederi nanga di foe en Tata? (2 Korinte 8:9)

¹¹ Jezus Kristus de a sori foe „Jehovah glori èn na soifri afdruk foe en persoon” (Hebrewsma 1:3). Wi ben sa kan ferwakti foe dat’ede dati na ini ala fasi a ben sa sori na sorgoe di en Tata ben abi gi den sma di ben abi belangstelling gi na troe anbegi. Dati a ben doe toe. Jezus ben meki sma si dati na pôtifasi di ben moe poeroe a pasi na jeje pôtifasi: „Kolokoe den sma de di sabi boenboen den jeje nowtoe, bikasi na kownoekondre foe hemel na foe den” (Mattéus 5:3; teki gersi Lukas 6:20). Kristus ben taki ooktoe: „Na foe dati mi ben gebore èn na foe dati mi ben kon na ini grontapoe foe gi kotoigi foe na waarheid” (Johannes 18:37). Sma no ben sabi en ooktoe moro foeroe leki wan sma di e doe wondroe ofoe e dresi sma, ma leki Leriman (Markus 10:17-21; 12:28-33). Loekoe ini a pistori disi san Markus 6:30-34 e taki. Wi e lési dati Jezus na wan bepaalde okasi ben meki wan pisten fri foe ben kan kisi krakti. Ne „a ben si wan bigi ipi di ben de leki skapoe sondro herder”. San Jezus ben doe? „A ben bigin leri den foeroe sani.” Ija, Jezus ben naki en skin foe tjari den sani gi den san den ben abi moro tranga fanowdoe: waarheid nanga san den ben sa kan kisi tégo libi. — Johannes 4:14; 6:51.

12. San wi kan leri foe Markus 6:30-34 nanga Markus 6:35-44 foe a fasi fa Jezus ben e loekoe sani?

¹² Aladi Jezus moro foeroe ben poti ensrefi tapoe den jeje nowtoe foe den sakafasi djoe, tokoe a no ben waka psa den skin nowtoe foe den. Na tori foe Markus e meki wi si dati Jezus ben abi wan opo ai gi na fanowdoe gi letterlek njanjan. Den apostel ben tjari fosi kon a fesi foe seni na ipi sma gwe sodati den „ben sa kan bai wan sani gi densrefi foe njan”. Jezus no ben agri nanga dati. Morofara den apostel ben tjari na mogelijkheid kon na fesi foe gebroiki wan pikinso foe na osomoni di den ben abi na den foe bai njanjan. Ma na presi foe dati Jezus ben teki na bosroiti foe doe na barinen wondroe pe a ben poti gi 5000 man, plus den oema nanga pikin foe den wan eenvoudig njanjan foe brede nanga fisi. A kan de dati sonwan ini a ten dati ben méne dati a ben de makriki gi Jezus nanga jepi foe wan wondroe foe sorgoe foe den fanowdoe foe na ipi foe sma. Tokoe wi no moe loekoe psa na troe tori dati a ben broko en ede troetroe gi den èn ini akroederi nanga dati a ben handri. — Markus 6:35-44; Mattéus 14:21.a

13. Na ini sortoe fasi moro ete Jezus ben sori en belangstelling foe na tanboen foe den sma?

¹³ Joe ben lési kande den evangelietori di e meki joe si dati Jezus firi gi den ongolokoewan no ben de nomo gi den pôtiwan. A ben jepi ooktoe den sikiwan èn den wan di ben kisi kwinsi (Lukas 6:17-19; 17:12-19; Johannes 5:2-9; 9:1-7). Ooktoe a no ben de soso wan afersi foe dresi den sma di ben de toevallig ini en birti. Sontron a ben go spesroetoe na wan sikiman foe jepi en. — Lukas 8:41-55.

14, 15. (a) Foe san-ede wi kan de séker dati Jezus ben ferwakti foe en bakaman dati ini ibri fasi den ben sa sorgoe gi sma leki en? (b) San wi ben sa kan aksi wisrefi heri boen?

¹⁴ Ma den nowtoe foe pôtiwan èn den discipel di ben kisi kwinsi (sma di ben e soekoe waarheid) de na ini a ati wawan foe den sma di ben kan gi lekti foe di den ben e doe wondroe? Nono. Ala den discipel foe Jezus ben moesoe broko-ede foe den èn handri akroederi nanga dati. Na wan goedoeman di ben wani tégo libi, a ben gi foe eksempre na dekati di e kon now. „Seri ala san joe abi èn prati nanga den pôtiwan èn joe sa abi wan goedoe ini hemel” (Lukas 18:18-22). Jezus ben gi ooktoe na rai: „Te joe go na wan fesa njanjan, kari dan den pôtiwan, den di abi mankeri, den malengriwan èn den breniwan; èn joe sa de kolokoe, foe di den no abi noti nanga san den kan pai joe baka. Bika den sa pai joe dati baka ini na opobaka foe den regtvaardikiwan.” — Lukas 14:13, 14.

¹⁵ Wan kristen de wan bakaman foe Kristus èn foe dat’ede ibriwan sma foe wi ten kan aksi densrefi: Ofara mi e waka baka na fasi nanga doe foe Jezus ini a tori foe den pôtiwan, den wan di e kisi kwinsi èn den ongolokoewan? Na ini ala opregtifasi wi kan taki asrefi sani leki na apostel Paulus: „Waka na mi baka, soleki mi e waka baka Kristus”? — 1 Korinte 11:1.

Paulus — wan eksemre foe wan sma di ben de kolokoe

16. Pe na belangstelling foe Paulus ben go spesroetoe?

¹⁶ A de wan sani di fiti ini a tori disi foe taki foe Paulus, bika en toe ben de wan eksempre foe wi waka na en baka. Soleki wi ben sa ferwakti, a ben poti ensrefi ini a fosi presi tapoe den jeje fanowdoe foe trawan. A ben de wan ’boskopoeman di ben opo doe wroko ini a presi foe Kristus èn ben begi tra sma taki: „Kon verzoen nanga Gado”’ (2 Korinte 5:20). Paulus ben kisi a spesroetoe wroko foe préki gi sma di no ben de djoe èn foe opo gemeente a den mindri. A ben skrifi: „Mi ben kisi na boen njoensoe foe den di no ben besnij.” — Galacia 2:7.

17. Fa wi sabi dati Paulus ben e broko en ede ooktoe gi skin nowtoe?

¹⁷ Ma Paulus, di tokoe ben taki dati a ben waka baka Jezus, poti dan (netleki Jehovah èn Jezus) notisi na den skinmankeri ofoe moeilekheid nanga san kompe anbegiman ben abi foe doe nanga den? Meki Paulus srefi piki. Ini Galacia 2:9 ai go moro fara foe taki: „Jakobus nanga Cefas [Petrus] èn Johannes ben langa gi mi nanga Barnabas na leti-anoe foe teki prati makandra, sodati wi ben sa go na den naatsi”. Morofara Paulus ben taki na ini na vers di e kon direkt dja a baka na sani disi: „Soso wi ben moe tan memre den pôtiwan. Mi ben doe foe dat’ede ooktoe serjoesoe moeiti foe doe dati joisti” (Galacia 2:10). Paulus ben ferstan soboen, dati en, alwasi a ben de wan zendeling-apostel di ben tjari na frantwortoe foe foeroe gemeente, no ben kan abi en toemsi druk foe ben sori belangstelling gi na skin tanboen foe en brada nanga sisa.

18. Foe sortoe „pôtiwan” Paulus ben taki foe den kande na ini Galacia 2:10, èn foe san-ede notisi ben moe poti tapoe den?

¹⁸ Kande „den pôtiwan” foe soema ai taki foe den ini Galacia 2:10 ben de moro foeroe djoe kristensma ini Jeruzalem nanga Judea. A fesi „wan knoroe ben de foe na sé foe den djoe di ben taki Griki tege den djoe di ben e taki Hebrewtongo . . . foedi den ben e loekoe psa den weduwe foe den na ini na aladé prati foe njanjan” (Tori foe den Apostel 6:1). Di Paulus ben taki dati a ben de wan apostel foe den naatsi, a ben meki foe dat’ede kon a krin dati a no ben loekoe psa no wan sma ini na kristen bradafasi (Romeini 11:13). A ben ferstan dati ooktoe tapoe na skin sorgoe foe brada den wortoe di e kon now e sori a tapoe: „Sodati no wan pratifasi ben sa de ini na skin, ma den memre foe en ben sa abi na srefi sorgoe foe makandra. Ma efoe wan memre e njan pina dan ala trawan e njan pina makandra.” — 1 Korinte 12:25, 26.

19. Sortoe bewijsi wi abi dati Paulus èn trawan ben handri ini akroederi nanga a sorgoe foe den gi den pôtiwan?

¹⁹ Te kristen ini Jeruzalem nanga Judéa ben abi en moeilek foe pôtifasi nanga angriten na ini a presi dati ofoe foe ferfolgoe ede, dan wantoe farawe gemeente ben opo doe wan sani foe jepi. A no de foe taki dati den ben sa begi foe den mofina brada foe den èn ben aksi Gado foe jepi èn trowstoe den. Ma den no ben libi a tori na a sani dati. Paulus ben skrifi dati „den sma di de ini Macedonia nanga Achaje, nanga ala prisiri ben prati foe den goedoe foe den, foe di den ben gi wan bijdrage na den pôtiwan a mindri den santawan na Jeruzalem” (Romeini 15:26, 27). Den sma di ben gi den sortoe moni bijdrage disi na den brada di ben e njan pina, ben kon goedoe „foe ibri sortoe foe lobi foe gi trawan sani, di nanga jepi foe wi e tjari wan tangi begi na Gado” (2 Korinte 9:1-13). Disi no ben sa de gi den wan réde foe de kolokoe?

20. Foe san-ede den brada di ben gi bijdrage foe den „pôtiwan” ben kan de kolokoe?

²⁰ Den brada di e prati den moni èn sani di den abi nanga „den pôtiwan a mindri den santawan foe Jeruzalem” ben abi wan ekstra fundamenti foe kolokoe. Nanga na sorgoe foe den gi den brada foe den di e njan pina dan den sma di den e gi bijdrage ben sa kisi na jepi foe kisi a boenati foe Gado. Wi kan ferstan foe san-ede disi de so, te wi loekoe na Griki wortoe di vertaal na ini Romeini 15:26 èn 2 Korinte 9:13 nanga „bijdrage” èn di abi na prakseri foe „marki foe kompefasi, bewijsi foe brada wanfasi, srefi presenti”. A wortoe disi e gebroiki ooktoe na ini Hebrewsma 13:16 pe tanapoe: „No frigiti boiti foe dati foe doe boen èn foe joe prati nanga trawan bika den sortoe srakti-ofrandi disi switi na Gado.”

Wi sa de kolokoe?

21. Wi kan kon na sortoe bosroiti ini a tori foe na fundamenti foe kisi kolokoe?

²¹ Ini a takmakandra disi wi ben ondrosoekoe na bewijsmateriaal foe na bijbel foe san kon a krin dati Jehovah Gado, Jezus Kristus èn na apostel Paulus ben broko ede nanga den mofinawan. Wi ben si dati den alamala ben erken dati jeje nowtoe moe kisi na fosi prakseri. Ma a de ooktoe troe dati den alamala na tapoe wan toemsi praktis fasi ben sori dati den abi belangstelling gi den pôtiwan, èn den wan di de ini ongolokoe omstandigheid. Na gi foe praktis jepi ben meki den kolokoe. Disi de ooktoe moro mendri troe gi wi? Na apostel Paulus ben gi tranga „foe hori den wortoe foe Masra Jezus iniprakseri, di ensrefi ben taki: ’A moro kolokoe foe gi sani leki foe kisi sani.’” — Tori foe den Apostel 20:35.

22. Sortoe fasi foe na afersi disi abi na belangstelling foe wi ete?

²² Ma joe kan aksi joesrefi heri boen taki: San mi kan doe now persoonlek? Fa mi kan sabi troetroe soema de ini nowtoe? Fa mi kan gi jepi tapoe wan fasi di no e gi tranga foe kon lesi, di de nanga switifasi èn di de wan troetroe sani, di e hori prakseri nanga den firi foe trawan èn di de ini balansi nanga kristen plekti foe panja na boen njoensoe. Na tra artikel sa hori ensrefi bezig nanga fasi foe na afersi disi èn gi wan fundamenti foe kisi ekstra kolokoe.

[Foetoewortoe]

Joe ben si den punt di e kon now?

◻ Fa Gado ben sori belangstelling gi wi jeje èn wi skin nowtoe?

◻ San e sori dati Jezus no ben broko en ede wawan foe jepi sma foe di a leri den na waarheid?

◻ Sortoe eksempre Paulus ben gi na na sé foe den pôtiwan?

◻ Now di joe stoeka den eksempre foe Jehovah, Jezus èn na apostel Paulus, san joe kan loekoe leki sani di joe moe doe?

[Prenki na tapoe bladzijde 4]

Kristen owroeman nanga trawan moe gebroiki Jezus rai na ini Lukas 14:13, 14 na ini den ala dé libi