A moro bigi glori foe na oso foe Jehovah
„’Mi wani foeroe na oso disi nanga glori,’ na so Jehovah foe den legre taki.” — HAGAI 2:7
1. San santa jeje abi foe doe nanga bribi èn nanga wroko?
DI WAN oema di de wan Kotoigi foe Jehovah ben preiki oso foe oso, a ben miti wan misi foe wan Pinkster gemeente di ben taki: ’Wi abi santa jeje, ma oenoe na den sma di e doe a wroko.’ Na wan switi fasi a Kotoigi ben tjari kon na krin gi na oema taki, na ati foe wan sma di abi santa jeje sa boeweigi en foe ensrefi foe doe Gado wroko. Jakobus 2:17 e taki: „Bribi foe en srefi, efoe a no abi wroko, dede.” Nanga a jepi foe Jehovah en jeje, den Kotoigi foe en kweki wan tranga bribi, èn a ’foeroe en oso nanga glori’ foe di a e meki den doe regtfardiki wroko — moro foeroe ’a preiki di den e preiki a boen njoensoe foe a Kownoekondre na heri grontapoe pe sma e libi, leki wan kotoigi gi ala nâsi’. Te a wroko disi doe soleki fa Jehovah wani en, „dan a kaba sa kon”. — Mateus 24:14.
2. (a) Sortoe blesi wi sa kisi, te wi e gi wisrefi abra na a wroko foe Jehovah? (b) Foe san ede wi moesoe breiti te a gersi leki wi ’moesoe wakti’?
2 Foe den wortoe disi foe Jesus wi kan kon na a bosroiti taki a wroko di wi e doe na ini a ten disi, moesoe poti prakseri na tapoe a wroko di wi kisi foe preiki „a glori boen njoensoe foe a kolokoe Gado”, na tra sma (1 Timoteus 1:11). O moro wi e prisiri foe gi wisrefi abra na ini a diniwroko foe Jehovah, o moro esi a kaba sa gersi foe kon. Na Habakuk 2:2, 3 wi e leisi den wortoe foe Jehovah: „Skrifi a fisjoen, èn skrifi en krin na tapoe den ston tafra, so taki a sma di e leisi en nanga wan tranga sten, kan doe disi grati. Bika a fisjoen de gi a fasti ten ete, èn a e tan lon go doro te na a kaba, èn a no sa froeteri wan lei. Awansi a ben sa meki oenoe wakti srefi na en tapoe, tan froewakti en; bika a sa kon troe sondro foe misi. A no sa kon lati.” Ija, „a fisjoen” sa kon troe „awansi a ben sa meki [sma] wakti srefi na en tapoe”. Foe di wi de na ini a di foe 83 jari foe Jesus Kownoekondre tiri, meki son sma kan denki taki nownowde wi de na ini wan pisi ten pe sani sa pasa moro lati. Ma wi no moesoe breiti taki a kaba no kon ete? A gersi leki wan wondroe taki na ini den tin jari disi foe 1990, den poeroe a skotoe di den ben skotoe a preikiwroko na Owstoe-Europa, na pisi foe Afrika, nanga tra kondre, so taki den kan preiki a boen njoensoe baka. A gersi di a gersi leki sma ’moesoe wakti’, e gi ten so taki wan lo „skapoe” moro kan tjari kon na wán na ini den kontren disi di opo no so langa pasa ete. — Johanes 10:16.
3. Foe san ede a fasi fa wi e si sani now ini a tori foe „a geslakti disi” moesoe poesoe wi foe doe a wroko foe Gado nanga a firi taki a de tranga fanowdoe?
3 „A no sa kon lati”, a profeiti e taki. Jesus ben taki dati a godelowsoe geslakti disi no ben o pasa gowe fosi „den sani disi feni presi” (Mateus 24:34). A fasi fa wi e froestan den wortoe disi foe en now, wani taki dati a preikiwroko foe wi no de so tranga fanowdoe moro?a Den troetori e sori taki a de heri tra fasi! A geslakti foe wi ten e trowe ensrefi na ini godelowsoefasi nanga kroektoedoe moro leki iniwan ten na ini a historia na fesi. (Teki gersi Tori foe den Apostel 2:40.) Wi moesoe doe a wroko foe wi nanga a firi taki a de tranga fanowdoe (2 Timoteus 4:2). Ala den profeititori di abi foe doe nanga a ten di a bigi banawtoe o kon, e sori taki a sa kon wantronso, esbiten, te sma no froewakti en — leki wan foefoeroeman (1 Tesalonikasma 5:1-4; Openbaring 3:3; 16:15). „Foe dati ede oenoe so srefi moesoe sori taki oenoe de srekasreka, bika a Manpikin foe libisma e kon na wan joeroe di oenoe no ben prakseri” (Mateus 24:44). Foe di a godelowsoe geslakti disi foe a libisma famiri e doro a momenti taki a o kisi pori, a de seiker taki wi no ben sa wani trowe a diri howpoe di wi abi foe wan têgo libi èn go „lolo [baka] na ini [a] tokotoko” foe den prisiri sani foe grontapoe! — 2 Petrus 2:22; 3:10; Lukas 21:32-36.
4. Sortoe situwâsi meki taki moro „njanjan na a reti ten” de fanowdoe, èn fa den sorgoe gi den sani disi di de fanowdoe?
4 Soleki fa a profeititori foe Jesus e taki, dan na ini 1914, di a libisma famiri ben doro a ten foe „a kaba foe a seti foe sani”, „wan bigin foe pen di e kon foe banawtoe ede” ben de. Sari, rampoe, nanga kroektoedoe kon moro foeroe te leki a dei foe tide (Mateus 24:3-8, 12). Na a srefi ten, Jehovah gi a salfoe getrow èn koni srafoe-groepoe a komando foe gi jeje „njanjan na a reti ten” na a osofamiri foe a Meester foe den, Krestes (Mateus 24:45-47). Na tapoe en kownoestoeroe di de na hemel, a Mesias Kownoe disi e tiri wan kefalek bigi programa now foe gi njanjan na jejefasi na heri grontapoe.
Boen foeroe „njanjan sani”
5. Sortoe prakseri e poti na tapoe a moro prenspari sortoe „njanjan”?
5 Loekoe a sreka di den sreka „njanjan sani” (Lukas 12:42). A moro prenspari sani di de tapoe a lijst foe sani di kresten e njan, na Gado Wortoe, bijbel. Efoe wi wani leri bijbel na sma na wan boen fasi, dan wan foe den fosi sani di de fanowdoe na wan vertaling di sma kan leisi èn di de soifri. Na ini den jari di pasa, safrisafri den sorgoe gi a sani disi di de fanowdoe, spesroetoe foe sensi 1950 di den ben tjari a New World Translation of the Christian Greek Scriptures (Njoen-Grontapoevertaling foe den kresten Griki Boekoe foe bijbel) kon na doro na ini Ingrisitongo. Na ini 1961 a New World Translation (Njoen-Grontapoevertaling) foe a heri bijbel ben de foe kisi, èn no langa baka dati, bijbel ben kon toe na ini tra prenspari tongo. Den 3 uitgave di ben kon na doro na ini a dienstjari 1996 e tjari a nomroe kon na tapoe 27, èn foe disi, 14 de a heri bijbel. Foe man doe a wroko disi na bijbel, èn so srefi bijbel jepisani, meki so wan 1174 kresten di gi densrefi abra, e wroko now foeroeten leki vertaler na 77 kondre.
6. Fa a Genootschap sorgoe gi a fanowdoe di bijbel poeblikâsi de tranga fanowdoe?
6 Foe man horibaka gi a wroko di a legre disi foe vertaler e doe, dan den 24 bijkantoro foe a Waktitoren Genootschap di abi wan drukkerij, meki moro poeblikâsi leki oiti. Den e tan poti moro high-speed druk pers na ini den bigi bijkantoro, foe man doe a wroko disi. A wroko foe meki den Waktitoren nanga Ontwaakt! tijdschrift gro ibri moen, èn ala nanga ala a doro wan nomroe foe 943.892.500 eksemplaar, wan gro foe 13,4 procent gi a jari. Den bijbel nanga boekoe di abi wan tranga kafti di den meki na Amerkankondre, Brasjonkondre, Doisrikondre, Finland, Italia, Japan, Korea nanga Meksikow wawan gro foe 40 procent na ini 1995 na 76.760.098 eksemplaar na ini 1996. Tra bijkantoro gi wan moi bijdrage toe na a gro di ben de ini a meki foe poeblikâsi.
7. Fa Jesaja 54:2 e kon moro tranga fanowdoe now?
7 Foeroe foe a gro ben de fanowdoe na ini 1990 di den ben poeroe a skotoe di den ben skotoe a wroko foe Jehovah Kotoigi na Owstoe-Europa nanga Afrika. Na angri gi njanjan na jejefasi bigi na den presi disi. Foe dati ede a krakti kari disi de ete èn a de moro tranga fanowdoe now: „Meki a presi foe joe tenti kon moro bigi. Èn meki den bradi den tentidoekoe foe joe bigi tabernakel. Gi ala san joe abi. Meki den titei foe joe tenti kon moro langa, èn meki den prin foe joe tenti kon tranga.” — Jesaja 54:2.
8. Na sortoe fasi, sma e sori taki den lobi foe gi sani foe horibaka gi a wroko na monisei?
8 So boen, a ben de fanowdoe taki foeroe foe den 104 bijkantoro foe a Genootschap ben moesoe meki kon moro bigi. Foe di foeroe foe den presi pe den opo a wroko paspas de na ini wan moeilek situwâsi na ekonomia sei, meki den bijdrage gi a wroko na heri grontapoe di den kondre e gi di de moro goedoe, e tapoe wan bigi pisi foe den kostoe foe a gro disi. Kolokoe taki den gemeente nanga aparti sma gi nanga den heri ati, akroederi san skrifi na Exodus 35:21: „Baka dati den ben kon, ibriwan sma di ati ben boeweigi en foe doe so, èn den ben tjari kon, ibriwan sma di jeje ben poesoe en foe doe so, a bijdrage gi Jehovah foe a wroko.” Wi e gebroiki na okasi disi foe taigi ala den sma tangi di ben abi wan prati na a sori disi di den sori taki den lobi foe gi sani. — 2 Korentesma 9:11.
9. Fa Romesma 10:13, 18 e kon troe na ini a ten disi?
9 Na ini 1996, den poeblikâsi foe a Waktitoren Genootschap troetroe gi glori na Jehovah nen èn den prakseri foe en, te na den moro farawe presi foe grontapoe. A de neleki fa na apostel Paulus ben taki na fesi. Di a ben teki den wortoe foe a profeititori foe Joèl nanga a di foe 19 Psalm taki, dan a ben skrifi: „’Ibri sma di e kari a nen foe Jehovah, sa kisi froeloesoe.’ Ma tokoe mi e aksi: Den no ben e jere disi kande? Ija, seiker: te joe loekoe en boen, dan ’na heri grontapoe a babari foe den ben go, èn den wortoe foe den te na den moro farawe presi foe grontapoe’” (Romesma 10:13, 18). Foe di en pipel e hei a bigi nen Jehovah na a fasi disi, meki den plèi wan prenspari ròl foe lai en oso foe anbegi nanga glori. Ma fa spesroetoe, a wroko disi foe meki sani bekènti ben go boen na ini 1996? Grantangi loekoe a tabel di e kon now tapoe bladzijde 18 te nanga 21.
A kotiwroko e doe na heri grontapoe
10. Sortoe toemoesi moi sani joe e si na ini a wroko di a pipel foe Jehovah e doe, soleki fa den sori dati sjatoe na ini a tabel tapoe bladzijde 18 te nanga 21?
10 Noiti ete den wortoe foe Jesus di de foe feni na Lukas 10:2 ben abi someni krakti: „A kotiwroko bigi troetroe, ma a no foeroe wrokoman de. Begi a Masra foe a kotiwroko foe dati ede, foe a seni wrokoman go doe a kotiwroko foe en.” Joe e doe wan sani na tapoe a kari dati? Miljoenmiljoen sma na heri grontapoe e doe dati. Disi wi kan taki foe a njoen heimarki ede foe 5.413.769 Kownoekondre preikiman di ben gi velddienst rapport na ini 1996. Moro fara, 366.579 njoen brada nanga sisa ben teki dopoe. Fa wi e si leki wan warti sani, den „sani [disi] foe ala den nâsi, di sma wani srefisrefi” èn di e teki prati now na a ’wroko foe foeroe Jehovah en oso foe anbegi nanga glori’! — Hagai 2:7.
11. Foe san ede wi alamala abi reide foe de nanga prisiri pasa marki?
11 Den bericht foe a gro di de na ini den presi pe a wroko opo paspas, moi kefalek. Trawan foe wi djaroesoe tapoe den wan di e prisiri now foe so wan gro? Kwetikweti, wi e prisiri nanga den. Ala kondre ben abi wan pikin bigin. Sakaria, wan profeiti di ben libi na ini a ten foe Hagai, ben skrifi: „Soema wisiwasi a dei foe den pikin sani?” (Sakaria 4:10) Wi breiti pasa marki taki na kondre pe a kotoigiwroko seti boen, miljoenmiljoen Kownoekondre preikiman de now, èn taki den e wroko a gebied foeroe tron, èn srefi ibri wiki na foeroe bigi foto. Wi abi reide foe go doe en safrisafri ala di Jehovah e gi na okasi now foe gi froeloesoe na sma na ini den presi pe den ben tapoe a wroko fosi? Noiti! „A veld na grontapoe”, Jesus ben taki (Mateus 13:38). Wi moesoe tan gi wan kotoigi di e doe finifini, neleki fa den fositen disipel ben gi wan boen kotoigi na a kaba foe a djoe seti foe sani. — Tori foe den Apostel 2:40; 10:42; 20:24; 28:23.
Go na fesi ala ten
12. Sortoe sani e poesoe wi foe go „na fesi langalanga”? (Loekoe so srefi a boksoe „Doe a kotiwroko ’foe den moro farawe presi na grontapoe’”.)
12 Ija, wi moesoe tan gro, èn go „na fesi langalanga” nanga Jehovah en hemelwagi foe engel (Esekièl 1:12). Wi e hori den wortoe foe Petrus na prakseri: „Jehovah no e draidrai nanga a pramisi foe en, soleki fa son sma e denki taki a e draidrai, ma a abi pasensi nanga oenoe foe di a no wani taki wan sma e kisi pori, ma a wani taki ala sma moesoe abi berow” (2 Petrus 3:9). Meki a faja foe wi brada na den kondre di pôti na ekonomia sei, èn di warti foe prèise, poesoe wi. Iniwan sani di sa meki en gersi leki a kon wantronso foe Armagedon skoifi, e gi okasi taki hondro doesoendoesoen sma kan tjari kon makandra na ini den kondre disi, so srefi na ini foeroe kontren di den wroko foeroe. No meki a fowtoe foe denki wan tra sani: „A bigi dei foe Jehovah de krosibei. A de krosibei, èn a e hasti ensrefi foe troe” (Sefanja 1:14). Wi, foe wi sei, ben sa moesoe hasti wisrefi toe, foe kan gi wan lasti boen kotoigi!
13, 14. (a) San wi kan taki foe a prati di poeblikâsi prati na ini 1996? (b) Sortoe spesroetoe plan gemeente kan meki ibri jari, èn fa joe e prakseri foe abi wan prati na dati?
13 Ala di den fini tori no de foe feni na ini a tabel foe a dienstjari, tokoe na ini a jari di pasa wan moi gro ben de foe si na ini a prati foe bijbel, boekoe, nanga tijdschrift. Foe eksempre, a nomroe foe tijdschrift di prati na heri grontapoe e sori wan gro foe 19 procent, èn ala nanga ala 543.667.923 eksemplaar ben prati. Den tijdschrift foe wi e meki en moro makriki foe gebroiki den foe preiki na difrenti fasi — na strati, na ini park, na bushalte, na kontren pe wenkri de. Bericht e sori taki na son kontren pe a Kownoekondre preikiwroko e doe foeroe, sma di e doe wroko di den kisi spesroetoe skoroleri foe dati lobi a fasi fa den tijdschrift foe wi de, èn den e teki bijbelstudie.
14 Ibri jari na ini a moen april, den gemeente gwenti foe orga spesroetoe tijdschriftwroko, èn den e wroko wan heri dei oso foe oso èn na poebliki presi. A gemeente foe joe sa teki prati na disi na ini april 1997? Den sreka toemoesi aparti uitgave foe A Waktitoren nanga Ontwaakt! gi april, èn a pristeri di den e pristeri den na a srefi ten na heri grontapoe, troetroe sa de wan sani di e naki sma ati! Na tapoe na èilanti Siprus, den gemeente e gebroiki den wortoe, „doro ibriwan sma someni leki a kan nanga a Kownoekondre boskopoe” leki wan sani foe hari sma prakseri, èn ibri moen srefi den ben hori densrefi soifri na a sortoe tijdschriftwroko dati di ben poti tapoe schema, ala di den doro wan njoen heimarki foe 275.359 tijdschrift di den prati na ini a jari, wan gro foe 54 procent.
A lasti boskopoe foe Hagai
15. (a) Foe san ede Jehovah ben seni moro boskopoe go nanga Hagai? (b) Sortoe sani a di foe dri boskopoe foe Hagai moesoe leri wi?
15 Siksi tenti na dri dei baka di Jehovah ben gi a di foe toe boskopoe foe en, A ben seni Hagai go nanga wan di foe dri sani di ben meki bekènti di wi kan poti prakseri na tapoe dati na ini a ten disi. Hagai ben taki neleki den djoe ben poti a fondamenti foe a tempel na a ten dati, di troetroe den ben poti 17 jari na fesi. Ete wan tron Jehovah ben feni en fanowdoe foe tjari wan krin kon. Den priester nanga a pipel ben abi wan mi-no-ke fasi èn foe dati ede no ben krin na ini Jehovah ai. A ben kan, taki son wan foe Jehovah en pipel e doe en safrisafri na ini a ten disi, èn srefi go moksi densrefi nanga den fasi di grontapoe abi foe gi toemoesi foeroe primisi èn foe lobi soso materia goedoe? A de tranga fanowdoe taki „foe bigin nanga a dei disi” wi alamala e poti wi ati na tapoe a gi di wi moesoe gi Jehovah nen glori, èn froetrow tapoe a pramisi foe en: „Foe bigin nanga a dei disi mi sa gi [oenoe] blesi.” — Hagai 2:10-19; Hebrewsma 6:11, 12.
16. Sortoe „seki” de krosibei, èn san sa de a bakapisi?
16 Tapoe a srefi dei dati, a wortoe foe „Jehovah foe den legre” ben kon na Hagai foe wan di foe fo èn lasti tron. A ben sori san de na ini a ’seki di a sa seki hemel nanga grontapoe’, èn a ben taki: „Mi sa drai a kownoestoeroe foe den kownoekondre tapoe troetroe èn pori a krakti foe den kownoekondre foe den nâsi; èn mi wani drai a fetiwagi tapoe nanga den tjariman foe en, èn den asi nanga den tjariman foe den sa fadon troetroe, ibriwan foe den nanga jepi foe a feti-owroe foe en brada” (Hagai 2:6, 21, 22). Foe dati ede, a „seki” disi sa doro en heimarki te Jehovah e krin grontapoe dorodoro na Armagedon. Na a ten dati, „den sani foe ala den nâsi di sma wani srefisrefi” sa tjari kon na ini kaba, foe tron a bigin foe a libisma libimakandra gi a njoen grontapoe. Fa disi na reide foe de nanga prisiri èn foe gi Jehovah prèise! — Hagai 2:7; Openbaring 19:6, 7; 21:1-4.
17. Fa Jesus poti leki wan „segel-linga”?
17 Te Hagai e kaba a profeititori foe en, dan a e skrifi: „’Na a dei dati’, na so den wortoe foe Jehovah foe den legre de, ’mi sa teki joe, o Serubabel . . . èn mi sa poti joe leki wan segel-linga troetroe, bika na joe mi froekisi’, na so den wortoe foe Jehovah foe den legre de” (Hagai 2:23). Krestes Jesus de now a sma di e prenki Jehovah en Mesias Kownoe nanga Granpriester, di e doe den toe wroko makandra di tiriman Serubabel nanga granpriester Josua ben doe aparti na a Jerusalem na grontapoe. Jesus de neleki wan officieel segel-linga na Jehovah en reti-anoe, a sma di e tron „Ija” leki a wrokosani di Jehovah e gebroiki foe meki den foeroe „pramisi foe Gado” kon troe (2 Korentesma 1:20; Efeisesma 3:10, 11; Openbaring 19:10). A heri profeitis boskopoe foe bijbel e poti prakseri na tapoe a seti foe Gado foe gi Krestes leki Kownoe nanga Froeloesoeman. — Johanes 18:37; 1 Petrus 1:18, 19.
18. Fa den lasti „wortoe foe Jehovah foe den legre” sa abi wan kontroe di e gi kowroe-ati?
18 Troetroe na ini a ten foe wi, a moro bigi glori de foe feni na ini Jehovah en jeje tempel di e skèin krin! Èn sjatoe baka te Jehovah poeroe a heri sistema foe Satan, dan Hagai 2:9 sa abi wan tra prisiri kontroe: „’Na ini a presi disi mi sa gi vrede’, na so den wortoe foe Jehovah foe den legre de.” Vrede te foe kaba! — wan universeel vrede di e tan, di Jehovah e gi wi a djaranti foe dati nanga jepi foe en „segel-linga” Krestes Jesus, a „Granman foe Vrede”, di den e skrifi foe en: „Na a kownoe tirimakti di de pasa marki èn na vrede, wan kaba no sa kon . . . A faja foe Jehovah foe den legre srefi sa doe disi” (Jesaja 9:6, 7). Foe têgo, a glori foe Jehovah en oso foe anbegi sa skèin na ini a heri kontren foe en universeel soevereiniteit di de ini vrede. Meki a de troetroe so, taki wi e tan na ini na oso dati! — Psalm 27:4; 65:4; 84:10.
[Foetoewortoe]
a Loekoe „Kisi kibri na mindri wan ’kroektoe geslakti’” nanga „Wan ten foe tan na ai” na ini A Waktitoren foe 1 november 1995.
Joe kan tjari disi kon na krin?
◻ Fa na oso foe Jehovah na ini a ten disi e kon ’foeroe nanga glori’?
◻ Foe san ede noiti ete a ben de so tranga fanowdoe foe preiki a boen njoensoe?
◻ Na sortoe fasi a bericht foe a dienstjari 1996 e poesoe wi foe preiki nanga a firi taki a de tranga fanowdoe?
◻ Fa Krestes e dini leki Jehovah en „segel-linga”?
[Faki na tapoe bladzijde 15]
Doe a kotiwroko „foe den moro farawe presi foe grontapoe”
NA Jesaja 43:6 wi e leisi a komando foe Jehovah: „Gi mi san joe abi. Tjari den manpikin foe mi kon foe farawe, èn den oemapikin foe mi te foe den moro farawe presi foe grontapoe.” A bijbeltekst disi e kon troe na wan toemoesi aparti fasi na ini a ten disi na Owstoe-Europa. Teki foe eksempre Moldafia di fosi ben de wan kommunist kondre. Drape joe abi dorpoe pe afoe foe den sma na Kotoigi now. Den moesoe teki waka boen fara foe feni kontren foe preiki, ma den e meki a moeiti! Foeroe preikiman na ini den gemeente disi na den pikin foe papa nanga mama di den ben seni leki strafoeman go na Siberia na ini den bigin jari foe 1950. Now den osofamiri foe den e teki fesi na ini a kotiwroko. Foe den 12.565 preikiman, 1917 ben teki dopoe a jari disi di pasa. Joe abi 43 gemeente di ibriwan foe den abi so wan 150 preikiman, èn den kring gro foe fo gemeente kon tron aiti na ini a njoen dienstjari.
San de wan aparti sani foe si toe, na a gro na Albania. Drape wan toe Kotoigi, ben njan pina so wan 50 jari langa foe a moro ogri-ati fasi fa tiriman ben pina den. Sma ben kiri wan toe foe den. Disi e tjari a pramisi foe Jesus kon na prakseri: „No frede gi den sani di joe e go njan pina foe den. Loekoe! Didibri sa tan trowe sonwan foe oenoe go na ini strafoe-oso, so taki oenoe sa kisi tesi dorodoro . . . Boeweisi taki oenoe de getrow, srefi te na dede èn mi sa gi joe a kownoe-ati foe libi”. (Openbaring 2:10; loekoe so srefi Johanes 5:28, 29; 11:24, 25.) San wi e si now na Albania? Foe troe a de wan toemoesi moi fasi fa a pramisi foe Jehovah e kon troe, soleki dati de foe feni na Jesaja 60:22: „A pikinwan srefi sa tron wan doesoen!” Na ini 1990, soso wán preikiman ben gi velddienst bericht na Albania. Ma moro „wrokoman” foe Italia nanga tra kondre ben piki tapoe a kari foe Jesus: „Go foe dati ede, èn meki disipel foe sma . . . , èn dopoe den” (Mateus 28:19; Lukas 10:2). Na ini 1996, na a ten foe a Memrefesa foe a dede foe Jesus dede, 773 preikiman ben de aktief ini a veld, èn den ben tjari 6523 sma kon na den Memrefesa konmakandra foe den, moro leki aiti tron a nomroe foe preikiman! Den kontren di de fara ben froeteri taki foeroe sma ben kon. Ala di den no ben abi preikiman foe a presi srefi drape, tokoe den foto Kukës nanga Divjakë ben abi 192 fisitiman na ini a wan foto èn 230 na ini a trawan. Na Krujë, di abi soso wán preikiman, 212 sma ben de na a Memrefesa. Den 30 preikiman foe Korçë ben joeroe presi gi moro leki 300 sma. Baka di a nomroe dati ben foeroe a zaal te na a noko, den ben moesoe seni 200 tra sma gowe, foe di presi no ben de moro. Foe troe a de wan veld di lepi foe den koti en!
A bericht disi e kon foe Roemeinia: „Di wi ben doe na oso-foe-oso-wroko, dan wi ben miti wan sma di ben taki dati a ben de wan foe Jehovah Kotoigi èn ben libi na ini wan pikin foto pe, so fara leki wi sabi, no wan Kotoigi ben de. A ben taigi wi taki boiti en, 15 tra sma ben de di foeroe jari kaba ben hori konmakandra fodewroko nanga sonde, èn taki den ben bigin preiki oso foe oso. A dei na baka wi ben go na a foto dati. Tinafeifi mansma, oemasma, nanga pikin-nengre ben e wakti wi na ini toe kamra, èn den ben teki 20 boekoe nanga 20 njoen tijdschrift. Wi ben sori den fa foe hori bijbelstudie. Wi ben singi makandra èn ben piki na tapoe den aksi foe den di troetroe ben moesoe kisi wan piki. A sma di ben teki fesi na ini a groepoe, ben bekènti: ’Wan toe dei pasa kaba, mi ben begi Jehovah nanga watra na mi ai foe a seni wan skapoeman kon gi wi, èn mi kisi wan piki na tapoe a begi foe mi.’ Wi ben breiti srefisrefi, èn di wi ben gowe, leki wan pikin di no abi papa noso mama èn di te foe kaba ben feni wan papa, a ben taki: ’Grantangi no frigiti wi. Kon loekoe wi baka!’ Wi ben doe dati, èn now seibi bijbelstudie e hori na ini a foto dati. Na ini foeroe njoen kontren, a wroko e bigin na wan toemoesi moi fasi nanga bijbel poeblikâsi, di sma e warderi troetroe, èn disi e sori taki a wroko e kon foe Gado.”
[Raportoe na tapoe bladzijde 18-21]
1996 DINIWROKO RAPORTOE FOE JEHOVAH KOTOIGI NA HERI GRONTAPOE
(Loekoe a tijdschrift)
[Prenki na tapoe bladzijde 16, 17]
Den e tjari „den sani foe ala nâsi di sma wani srefisrefi” kon na makandra na den Èilanti foe Se (1), Zuid-Amerika (2), Afrika (3), Asia (4), Noord-Amerika (5), nanga Europa (6)