Meki ala sma gi Jehovah glori!

„Den moesoe gi Jehovah glori na ini a kontren foe leti.” — JESAJA 24:15.

1. Fa den profeiti foe Jehovah ben si a nen foe en, san de wan heri tra sani leki sortoe sani di krestenhèit e doe na ini a ten disi?

JEHOVAH — a glori nen foe Gado! Fa den getrow profeiti foe owroeten ben prisiri foe taki na ini a nen dati! Nanga bigi prisiri den ben gi glori na a Soeverein Masra foe den, Jehovah, di a nen foe en e meki sma kon sabi en leki a Bigiwan di abi wan prakseri (Jesaja 40:5; Jeremia 10:6, 10; Esekièl 36:23). Srefi den wan di den e kari pikin profeiti ben gi Jehovah glori nanga foeroe firi. Wan foe den ben de Hagai. Na ini a boekoe Hagai di abi 38 vers nomo, a nen foe Gado e gebroiki 35 tron. So wan profeititori e sori leki wan sani di no abi firi, te sma e poti a titel „Masra” ini a presi foe a bigi nen Jehovah, soleki fa den toemoesi boen apostel foe krestenhèit e vertaal en na ini den bijbel vertaling foe den. — Teki gersi 2 Korentesma 11:5.

2, 3. (a) Fa wan spesroetoe profeititori di e taki foe a meki kon boen baka foe Israèl, ben kon troe? (b) Sortoe prisiri a djoe fikapisi nanga den kompe foe den ben abi toe?

² Na Jesaja 12:2, den e gebroiki a nen na toe fasi.a A profeiti e froeklari: „Loekoe! Gado na mi froeloesoe. Mi sa froetrow èn mi no sa frede; bika Jah Jehovah na mi krakti èn mi makti, èn na en ben tron a froeloesoe foe mi.” (Loekoe so srefi Jesaja 26:4.) So boen, so wan 200 jari bifo Israèl ben kon fri foe a katibo foe Babilon, Jah Jehovah ben gebroiki en profeiti Jesaja foe gi a djaranti taki En ben de a makti Froeloesoeman foe den. A katibo dati ben moesoe tan foe 607 te nanga 537 b.G.T. Jesaja ben skrifi toe: „Mi Jehovah, na a sma di e doe ala sani, . . . A Sma di e taki foe Sirus: ’En na mi skapoeman, èn ala sani di e plisi mi, a sa doe dorodoro’; srefi te mi e taki foe Jerusalem: ’Den sa bow en baka’, èn foe a tempel: ’Den sa poti joe fondamenti.’” Soema ben de a Sirus disi? A moi foe si, taki a ben sori foe de kownoe Sirus foe Persia, di ben wini Babilon na ini 539 b.G.T. — Jesaja 44:24, 28.

³ Soleki fa den wortoe foe Jehovah ben taki di Jesaja ben skrifi, dan Sirus ben kon nanga a komando gi Israèl: „Iniwan sma di de na oen mindri foe a heri pipel foe en, meki a de so taki en Gado de nanga en. So boen, meki a hari go na Jerusalem di de na Juda, èn meki a bow na oso baka foe Jehovah, a Gado foe Israèl — en na a troe Gado — di ben de na Jerusalem.” Wan fikapisi, di ben breiti srefisrefi makandra nanga den Netinim di no ben de Israèlsma èn den manpikin foe den foetoeboi foe Salomo, ben drai go baka na Jerusalem. Den ben doro biten foe hori a Wiwirikampoe-fesa na ini 537 b.G.T. èn tjari ofrandi gi Jehovah na tapoe en altari. A tra jari, na ini a di foe toe moen, den ben poti a fondamenti foe a di foe toe tempel, ala di sma ben bari foe prisiri ede èn ben prèise Jehovah. — Esra 1:1-4; 2:1, 2, 43, 55; 3:1-6, 8, 10-13.

4. Fa Jesaja kapitel 35 nanga 55 ben kon troe?

⁴ Jehovah en profeititori di e taki foe wan kon boen baka, ben o kon troe na ini Israèl na wan toemoesi moi fasi: „A gran sabana nanga a presi sondro watra sa breiti pasa marki, èn a drei kontren sa de nanga prisiri èn a sa gi bromki leki a safraan. . . . Drape den wan sa de di sa si a glori foe Jehovah, a moifasi foe wi Gado.” „Nanga prisiri oen pipel sa hari go, èn nanga vrede den sa tjari oenoe kon na inisei. Den bergi nanga den pikin bergi srefi sa kon de nanga prisiri na oen fesi nanga prisiri babari . . . Èn gi Jehovah a moesoe tron wan sani di e barinen, wan marki te ten di no skotoe di den no sa koti poeroe.” — Jesaja 35:1, 2; 55:12, 13.

5. Foe san ede a prisiri foe Israèl no ben tan langa?

⁵ Ma a prisiri dati no ben tan langa. Den pipel di ben libi krosibei foe den, ben soekoe foe moksi a bribi foe den makandra èn wroko anoe na anoe foe bow a tempel. Ini a bigin, den djoe ben kakafoetoe gi en èn den ben froeklari: „Oenoe no abi noti foe doe nanga wi foe bow wan oso gi a Gado foe wi, bika makandra, wisrefi sa bow gi Jehovah, a Gado foe Israèl, neleki fa kownoe Sirus, a kownoe foe Persia, komanderi wi.” Den sma disi di ben libi krosibei foe den ben kon de bigi gensman now. Den „ben meki den anoe foe a pipel foe Juda kon swaki doronomo èn ben meki den lasi-ati foe no doe a bow-wroko”. Den ben gi Artakserkses, a sma di ben kon baka Sirus, wan fowtoe prakseri toe foe a situwâsi, èn a wan disi ben gi wan komando foe tapoe nanga a bow foe a tempel (Esra 4:1-24). Seibitenti jari langa den ben tapoe nanga a wroko. Na wan sari sani, taki na ini a pisi ten dati den djoe ben go libi wan libi foe lobi materia goedoe nomo.

„Jehovah foe den legre” e taki

6. (a) San Jehovah ben doe na tapoe a situwâsi na Israèl? (b) Foe san ede a sani di a nen foe Hagai sori foe wani taki, e fiti so?

⁶ Ma tokoe Jehovah ben sori ’en krakti nanga en makti’ gi a boen foe Israèl foe di a ben seni profeiti go, spesroetoe Hagai nanga Sakaria foe memre den djoe na den frantiwortoe di den abi. A nen foe Hagai abi foe doe nanga wan fesa, bika a sori foe wani taki „Gebore na wan fesadei”. A fiti taki Hagai ben bigin taki profeititori na a fosi dei foe a moen foe a Wiwirikampoe-fesa, na a ten di den djoe ben moesoe „kon de nanga prisiri nomo” (Deuteronomium 16:15). Jehovah ben meki Hagai tjari fo boskopoe go na ini wan ten foe 112 dei. — Hagai 1:1; 2:1, 10, 20.

7. Fa den bigin wortoe foe Hagai moesoe gi wi deki-ati?

⁷ Di Hagai ben bigin nanga en profeititori a ben taki: „Disi na san Jehovah foe den legre taki” (Hagai 1:2a). Soema ben sa kan de den „legre” dati? Den na Jehovah en legre foe engel, son tron den e taki foe den na ini bijbel leki sroedati legre (Job 1:6; 2:1; Psalm 103:20, 21; Mateus 26:53). A no e gi wi deki-ati na ini a ten disi taki a Soeverein Masra Jehovah srefi e gebroiki den hemel legre disi di sma no man wini, foe tiri a wroko foe wi foe meki a troe anbegi kon boen na grontapoe baka? — Teki gersi 2 Kownoe 6:15-17.

8. Sortoe fasi foe si sani ben abi krakti na tapoe Israèl, èn nanga sortoe bakapisi?

⁸ San ben de na ini a fosi boskopoe foe Hagai? A pipel ben taki: „A ten no doro, a ten foe na oso foe Jehovah, foe bow en.” A bow foe a tempel, san ben prenki a meki di na anbegi foe Gado ben meki kon boen baka, no ben de a moro prenspari sani moro di den ben broko den ede nanga dati. Den ben go bow oso gi densrefi di ben gersi palèisi. A prakseri di den ben prakseri soso foe materia goedoe ben kowroe a faja di den ben abi gi na anbegi foe Jehovah. A bakapisi ben de, taki a ben poeroe en blesi. Den gron foe den no ben gi froktoe moro, èn den no ben abi nofo krosi gi a kowroe winterten. A moni di den ben wroko no ben de so foeroe moro, èn a ben de neleki den ben poti moni na ini wan saka nanga olo. — Hagai 1:2b-6.

9. Sortoe krakti froemane di e bow sma, Jehovah ben gi?

⁹ Toe tron Jehovah ben gi a krakti froemane: „Poti oen ati na tapoe den pasi foe oenoe.” Soleki fa a sori, dan Serubabel, a granman foe Jerusalem, nanga a granpriester Josuab ben arki èn sondro foe frede den ben gi a heri pipel deki-ati „[foe] arki a sten foe Jehovah, a Gado foe den, na wortoe foe a profeiti Hagai, foe di Jehovah, a Gado foe den, ben seni en kon; èn a pipel ben bigin frede foe Jehovah ede”. Boiti dati, „Hagai, a boskopoeman foe Jehovah, ben go doro foe taigi a pipel akroederi a komando di Jehovah ben gi a boskopoeman, taki: ’„Mi de nanga oenoe”, na so den wortoe foe Jehovah de’”. — Hagai 1:5, 7-14.

10. Fa Jehovah ben gebroiki en makti gi a boen foe Israèl?

¹⁰ Kande son owroe sma na Jerusalem ben denki taki a glori foe a tempel di den ben bow baka ben sa de „noti” te den ben teki en gersi a glori foe na owroe tempel. Ma so wan 51 dei baka dati, Jehovah ben boeweigi Hagai foe meki wan di foe toe boskopoe bekènti. A ben taki: „’Kon tranga, o Serubabel,’ na so den wortoe foe Jehovah de, ’èn kon tranga, o Josua, a manpikin foe Josadak, a granpriester. Èn kon tranga, ala oen pipel foe a kondre,’ na so den wortoe foe Jehovah de, ’èn wroko. Bika mi de nanga oenoe’, na so den wortoe foe Jehovah foe den legre de. . . . No frede.’” Jehovah, di baka wan pisi ten ben o gebroiki en bigi makti foe ’seki hemel nanga grontapoe’, ben sorgoe taki den ben kakafoetoe gi ala gensman, srefi gi wan komando foe kownoe foe tapoe a bow-wroko. Na ini moro mendri leki feifi jari den ben tjari a bow foe a tempel kon na wan moi kaba. — Hagai 2:3-6.

11. Fa Gado ben foeroe a di foe toe tempel nanga ’moro bigi glori’?

¹¹ Nanga dati, wan moi pramisi ben kon troe: „’Den sani foe ala den nâsi di sma wani srefisrefi, moesoe kon na ini; èn mi sa foeroe na oso disi nanga glori’, na so Jehovah foe den legre taki” (Hagai 2:7). Den ’sani di sma wani srefisrefi’, ben sori foe de den sma di no ben de Israèlsma di ben kon anbegi na a tempel dati, foe di a ben prenki a glori foe en bigi denoja. Fa sma ben kan teki a tempel disi di ben bow baka, gersi a wan di den ben bow na ini Salomo dei? A profeiti foe Gado ben froeklari: „’A glori foe a lasti oso disi sa kon moro bigi leki di foe a fosiwan’, na so Jehovah foe den legre taki” (Hagai 2:9). Na ini a fosi kontroe foe a profeititori, a tempel di den ben bow baka, ben tan moro langa leki a fosi oso. A ben de ete di Mesias ben doro na ini 29 G.T. Moro fara, bifo den feanti foe en di ben fadon komoto na bribi ben kiri en na ini 33 G.T., a Mesias srefi ben gi a tempel glori di a ben preiki a waarheid drape.

12. San ben de a reide taki den fosi toe tempel ben de?

¹² A fosi tempel nanga a di foe toe tempel na Jerusalem ben de foe wan toemoesi prenspari reide ede, foe di den ben de wan prenki foe prenspari marki foe a priesterwroko foe a Mesias èn foe meki a soifri anbegi foe Jehovah tan na grontapoe te leki a Mesias ben kon troetroe. — Hebrewsma 10:1.

A jeje tempel di abi glori

13. (a) Sortoe sani di ben pasa ini a tori foe a jeje tempel, ben feni presi foe 29 te nanga 33 G.T.? (b) Sortoe spesroetoe prati Jesus loesoe-paiman ben abi na ini den sani disi di ben pasa?

¹³ Hagai en profeititori di e taki foe wan meki kon boen baka, wani taki wan spesroetoe sani gi ten di ben o kon ete? Ija, seiker! A tempel di den ben bow baka na Jerusalem ben kon de a moro prenspari presi foe ala troe anbegi na grontapoe. Ma a ben de wan prenki foe wan jeje tempel di ben o abi moro glori. A ben bigin wroko na ini 29 G.T. di, na a ten foe Jesus dopoe na ini Jordan liba, Jehovah ben salfoe Jesus leki Granpriester, èn santa jeje ben saka kon na en tapoe leki wan doifi (Mateus 3:16). Baka di Jesus ben kaba en diniwroko na grontapoe foe di a ben dede wan ofrandi dede, a ben kisi wan opobaka na hemel, di a Moro Santapresi foe a tempel e prenki, èn drape a ben pristeri Jehovah a waarde foe en ofrandi. Disi ben de leki wan loesoe-paiman, di ben tapoe den sondoe foe den disipel foe en, èn na a dei foe a Pinksterfesa foe 33 G.T., a ben opo a pasi foe salfoe den disipel leki ondro-priester na ini Jehovah en jeje tempel. A getrow diniwroko foe den te na dede na ini a tempel fesidjari na grontapoe ben o meki taki den ben o kisi wan opobaka na hemel, foe go doro nanga a priesterwroko.

14. (a) Sortoe prisiri ben kon makandra nanga a fajafaja wroko foe a fositen kresten gemeente? (b) Foe san ede a prisiri disi no ben tan langa?

¹⁴ Doesoendoesoen djoe di ben abi berow — èn baka ten den heiden — ben kon na ipi-ipi na a kresten gemeente dati, èn ben teki prati na a wroko foe meki a boen njoensoe foe Gado Kownoekondre tiri di ben o kon na grontapoe, bekènti. Baka so wan 30 jari, na apostel Paulus ben kan taki dati a boen njoensoe ben preiki „na ala mekisani di de na ondro hemel” (Kolosesma 1:23). Ma baka a dede foe den apostel, boen foeroe sma ben fadon komoto na bribi, èn a leti foe waarheid ben bigin swaki. Den sekte foe krestenhèit, di ben abi den gron tapoe heiden leri nanga filosofia, ben soekoe foe tapoe a troetroe krestendom. — Tori foe den Apostel 20:29, 30.

15, 16 (a) Fa wan profeititori ben kon troe na ini 1914? (b) Sortoe wroko foe tjari sani kon makandra ben marki a lasti pisi foe a di foe 19 jarihondro nanga a fosi pisi foe a di foe 20 jarihondro?

¹⁵ Hondrohondro jari ben pasa. Dan na ini den jari foe 1870, wan groepoe opregti kresten ben bigin nanga wan dipi studie foe bijbel. Nanga jepi foe bijbel den ben man sori go na a jari 1914 leki a jari di ben marki a kaba foe „a fasti ten foe den nâsi”. A ben de na a ten dati, di den seibi agersi „ten” (2520 jari di libisma ben tiri leki meti) ben kon na wan kaba te Krestes Jesus — a Sma di abi „a reti na tapoe leki fa wet taki”, foe de a Mesias Kownoe foe grontapoe — ben tron kownoe na hemel (Lukas 21:24; Danièl 4:25; Esekièl 21:26, 27). Spesroetoe foe sensi 1919, den Bijbel Ondrosoekoeman disi di sma sabi na ini a ten disi leki Jehovah Kotoigi, na heri grontapoe teki prati fajafaja na a wroko foe panja a boen njoensoe foe a njoen Kownoekondre di seti. A ben de na ini 1919 di wan toe doesoen foe den ben piki na tapoe a kari foe doe a wroko, di den ben gi na a kongres na Cedar Point, Ohio, Amerkankondre. A nomroe foe den ben gro te nanga a jari 1935 di 56.153 sma ben gi velddienst bericht. Na ini a jari dati, 52.465 sma ben gebroiki den simbôl foe brede nanga win na a alajari Memrefesa foe Jesus dede, èn na so fasi den ben sori sma a howpoe di den ben abi foe tron priester makandra nanga Krestes Jesus na ini a hemel kontren foe Jehovah en bigi jeje tempel. Den sa dini nanga en toe leki kompe kownoe na ini en Mesias Kownoekondre. — Lukas 22:29, 30; Romesma 8:15-17.

¹⁶ Ma Openbaring 7:4-8 nanga 14:1-4 e sori taki ala nanga ala a nomroe foe den salfoe kresten disi de soso 144.000, èn foeroe foe den ben tjari kon makandra na ini a fosi jarihondro bifo someni sma ben fadon komoto na bribi. Sensi a kaba foe a di foe 19 jarihondro èn te go miti a bigin foe a di foe 20 jarihondro, Jehovah kaba tjari a groepoe disi kon makandra di kon krin nanga a watra foe en Wortoe. A ben froeklari den regtfardiki foe di den ben sori bribi na ini Jesus verzoen-ofrandi, èn te foe kaba den ben kisi wan segel na den tapoe leki salfoe kresten di ben o doro a nomroe foe 144.000.

17. (a) Sortoe wroko foe tjari sani kon makandra, go doro foe sensi 1930? (b) Foe san ede Johanes 3:30 de so prenspari dja? (Loekoe so srefi Lukas 7:28.)

¹⁷ San e kon baka te den froekisi a heri nomroe foe salfoewan kaba? Na ini 1935, na wan spesroetoe kongres na Washington, D.C., Amerkankondre, den ben meki bekènti taki a „bigi ipi” foe Openbaring 7:9-17 ben de wan groepoe di sma ben sa si „baka” te den 144.000 sma ben tjari kon makandra èn a tamara foe den de têgo libi na ini wan paradijs grontapoe. Baka di Johanes a Dopoeman, di na opobaka foe en sa de na grontapoe leki wan foe den „tra skapoe”, ben sori krin soema ben de a salfoe Jesus, dan a ben taki foe a Mesias: „Moro sma moesoe tan go na a sma dati, èn moro mendri sma moesoe tan kon na mi” (Johanes 1:29; 3:30; 10:16; Mateus 11:11). A wroko foe Johanes a Dopoeman foe sreka den disipel foe a Mesias ben kaba di Jesus ben teki a wroko abra foe froekisi wan nomroe foe sma di ben kon moro foeroe èn di ben o de foe den 144.000 sma. Na ini 1930 wan tra sani ben pasa. Moro mendri sma ben de di den „ben kari èn ben froekisi” foe kon de wan foe den 144.000 sma, ala di wan bigi gro ben bigin ini a nomroe foe sma di ben de foe a „bigi ipi” „tra skapoe”. A bigi ipi disi e tan gro ala di wi e kon krosibei foe a kaba foe a godelowsoe grontapoe sistema na Armagedon. — Openbaring 17:14b.

18. (a) Foe san ede wi kan froewakti nanga ala froetrow taki „miljoenmiljoen sma di e libi now noiti no sa dede”? (b) Foe san ede wi moesoe poti prakseri fajafaja na tapoe Hagai 2:4?

¹⁸ Na ini den fosi jari foe 1920, wan lezing di Jehovah Kotoigi ben gi, ben nen „Miljoenmiljoen sma di e libi now noiti no sa dede”. Disi kan sori foe de toemoesi positief na a ten dati. Ma na ini a ten disi wi kan taki den wortoe dati nanga ala overtoigi. A leti di de na tapoe bijbel profeititori di e kon krin moro nanga moro èn a broeja di de na ini a grontapoe disi di e dede gowe, e sori krin taki a kaba foe a sistema foe Satan de toemoesi krosibei! A verslag foe a Memrefesa gi 1996 e sori taki 12.921.933 sma ben go na a fesa, èn foe den disi soso 8757 (0,068 procent) sma ben sori taki den abi wan hemel howpoe foe di den ben gebroiki den simbôl. A wroko foe meki a troe anbegi kon boen baka, e doro en kaba. Ma meki wi noiti no go doe a wroko dati safrisafri. Ija, Hagai 2:4 e taki: „’Èn kon tranga, ala oen pipel foe a kondre’, na so den wortoe foe Jehovah de, ’èn wroko. Bika mi de nanga oenoe’, na so den wortoe foe Jehovah foe den legre de.” Meki wi abi a fasti bosroiti foe no meki no wan fasi di sma abi foe lobi materia goedoe nomo noso a fasi fa grontapoe sma e denki tapoe a faja di wi abi gi a wroko foe Jehovah! — 1 Johanes 2:15-17.

19. Fa wi kan abi wan prati na a kontroe foe Hagai 2:6, 7?

¹⁹ A grani di wi abi foe teki prati na a disiten kontroe foe Hagai 2:6, 7 na wan prisiri sani: „Disi na san Jehovah foe den legre taki: ’Ete wan leisi — a de wan sjatoe pisi ten — èn mi sa seki hemel nanga grontapoe nanga se nanga a drei gron. Èn mi wani seki ala nâsi, èn den sani foe ala den nâsi di sma wani srefisrefi, moesoe kon na ini; èn mi sa foeroe na oso disi nanga glori’, na so Jehovah foe den legre taki.” Bigi-ai, kroektoedoe, nanga bita-atifasi panja na alasei na ini a di foe 20 jarihondro grontapoe disi. A de troetroe na ini den lasti dei foe en, èn Jehovah bigin „seki” en kaba foe di a seni den Kotoigi foe en foe ’meki en dei foe atibron bekènti’ (Jesaja 61:2). A seki disi di sani sa seki na fesi sa abi en heimarki na ini a pori di grontapoe sa kisi na Armagedon, ma fosi a ten dati, Jehovah e tjari „den sani foe ala den nâsi di sma wani srefisrefi” — den safri-atiwan, den sma di agersi skapoe na grontapoe, kon makandra foe doe a diniwroko foe en (Johanes 6:44). A „bigi ipi” disi ’e doe santa diniwroko’ now na ini a grontapoe fesidjari foe na oso disi foe anbegi. — Openbaring 7:9, 15.

20. Pe wi kan feni a moro diri goedoe?

²⁰ Te wi e dini na ini Jehovah en jeje tempel, dan dati e tjari wini kon di warti moro iniwan materia goedoe (Odo 2:1-6; 3:13, 14; Mateus 6:19-21). Boiti dati, Hagai 2:9 e taki: „’A glori foe a lasti oso disi sa kon moro bigi leki di foe a fosiwan’, na so den wortoe foe Jehovah foe den legre de. ’Èn na a presi disi mi sa gi vrede’, na san Jehovah foe den legre taki.” San den wortoe disi wani taki gi wi na ini a ten disi? Tra artikel foe wi sa froeteri dati.

[Foetoewortoe]

Aksi foe loekoe sani sjatoe baka

◻ Sortoe eksempre foe den profeiti wi moesoe teki ini a tori foe Jehovah nen?

◻ Sortoe deki-ati wi e kisi foe a krakti boskopoe foe Jehovah gi Israèl di meki kon boen baka?

◻ Sortoe jeje tempel di abi glori, de na ini a ten disi?

◻ Sortoe wroko foe tjari sani kon makandra, doe baka makandra na ini a di foe 19 nanga a di foe 20 jarihondro, nanga sortoe bigi froewakti?

[Prenki na tapoe bladzijde 7]

Den hemel legre foe Jehovah e tiri èn e horibaka gi den Kotoigi foe en na grontapoe