Gowe libi foeroe gi wan moro bigi sani

SOLEKI FA JULIUS OWO BELLO BEN FROETERI

Gi 32 jari langa mi ben de wan Aladura.a Mi ben bribi taki a fasi fa sma e dresi siki nanga jepi foe begi èn bribi, ben sa loesoe ala den problema foe mi èn ben sa dresi ala sortoe siki. Noiti mi ben bai dresi, èn srefi sani di ben kan saka a pen. Na ini den jari dati, no wan sma na ini mi osofamiri ben abi foe go na ati-oso. Te wan foe den pikin foe mi ben siki, dan mi ben begi gi en dei nanga neti te leki a ben kon betre. Mi ben bribi taki Gado ben e piki den begi foe mi èn ben e blesi mi.

MI BEN de foe Egbe Jolly, a moro prenspari sociaal club na Akure, wan foto na a westsei foe Nigeria. Den mati foe mi ben de den moro goedoewan èn den moro makti sma na ini wi foto. Foeroe tron a Deji, a kownoe foe Akure, ben fisiti mi na ini mi oso.

Mi ben de wan sma toe di trow nanga moro leki wán oema, foe di mi ben abi siksi wefi èn foeroe oema nanga soema mi no ben trow. A bisnis foe mi ben go heri boen na fesi. Ala sani ben waka boen gi mi. Ma leki a bisnisman di e rèis doe bisnis, na ini Jesus en agersitori foe a peri, mi ben feni so wan kefalek warti sani taki mi gowe libi feifi wefi foe mi, den oema nanga soema mi no ben trow, a kerki, a sociaal club, èn a hei posisi na grontapoe, gi a warti sani disi. — Mateus 13:45, 46.

Fa mi ben tron wan Aladura

A fosi leisi di mi ben jere foe den Aladura, ben de na ini 1936, di mi ben abi 13 jari. Wan mati foe mi di nen Gabriel, ben taigi mi: „Efoe joe e go na a Apostel Kerki foe Krestes, joe sa jere Gado e taki.”

„Fa Gado e taki?” mi ben aksi en.

A ben taki: „Kon, èn joe sa si.”

Mi ben wani srefisrefi foe arki na Gado. So boen, a neti dati mi ben go nanga Gabriel na a kerki. A pikin gebow ben foeroe nanga anbegiman. A gemeente ben bigin singi ibri tron baka: „Oenoe kon! Djaso na pe Jesus de!”

Di den ben singi ibri tron baka, wan sma ben bari: „Saka kon, santa jeje!” Wan tra sma ben hari a djendjen, èn a heri gemeente ben kon pî. Baka dati, wan oema ben bigin takitaki na wan span fasi na ini wan freimde tongo. Wantronso a bigin bari taki: „Oen arki a boskopoe foe Gado! Disi na san Gado taki: „Begi gi den ontiman so taki den no e kiri libisma!” A ben span srefisrefi.

Mi ben bribi taki Gado ben taki nanga jepi foe en, èn dati meki a jari na baka, mi ben teki dopoe leki wan memre foe na Apostel Kerki foe Krestes.

A fosi kontakti di mi ben abi nanga Jehovah Kotoigi

Na ini 1951 mi ben teki wan eksemplaar foe a Waktitoren foe wan Kotoigi di nen Adedeji Boboye. Mi ben lobi a tijdschrift, èn dati meki mi ben teki wan abonnement èn ben leisi en doronomo. Na ini 1952 mi ben fisiti wan fo-dei distriktkongres foe Jehovah Kotoigi na ini a foto Ado Ekiti.

San mi ben si na a kongres ben abi krakti na mi tapoe. Mi ben prakseri serjoesoe foe tron wan foe den Kotoigi foe Jehovah ma mi ben poeroe a prakseri dati. Mi problema ben de taki mi ben abi dri wefi nanga wán oema nanga soema mi no ben trow, na a srefi ten. Mi ben prakseri taki mi no ben sa man libi nanga wán wefi nomo kwetikweti.

Di mi ben drai go baka na Akure, mi ben taigi Adedeji foe no fisiti mi moro, èn mi no ben njoen mi abonnement tapoe A Waktitoren. Mi ben wroko nanga moro faja na ini mi kerki. Bika, na so mi ben prakseri, Gado ben blesi mi foe sensi a ten di mi ben moksi misrefi nanga na Apostel Kerki foe Krestes. Mi ben trow nanga dri wefi èn ben meki foeroe pikin. Mi ben bow mi eigi oso. Noiti mi ben abi foe go didon na ati-oso. Foe di a gersi taki Gado ben piki den begi foe mi, foe san ede mi sa wani kenki mi relisi dan?

Moro hei posisi makandra nanga lasi-ati

Mi ben bigin gi foeroe moni na a kerki leki bijdrage. Heri esi den ben meki mi tron wan owroeman na ini a kerki, wan posisi di ben meki mi man si fa a kerki e wroko na inisei. Den sani di mi ben si ben broeja mi. A pastoor nanga den „profeiti” ben lobi moni; a gridi foe den ben skreki mi.

Foe eksempre, na ini maart 1967 mi ben tron papa foe dri pikin, di dri difrenti wefi meki. A ben de a gwenti na ini a kerki foe dopoe wan pikin èn gi en wan nen. Foe dati ede mi ben tjari presenti — fisi, swawatra, nanga batra soft — gi a pastoor foe sreka gi a ceremonia.

Na a kerki dei, a pastoor ben taki na fesi a heri gemeente: „Den goedoe sma na ini a kerki disi froewondroe mi. Den wani dopoe den pikin èn gi den wan nen, èn a wan-enkri sani di den e tjari kon na soft nanga fisi. Nowan meti! Nowan bokoboko! Prakseri foe disi! Kain ben òfer bigi jamsi gi Gado, ma tokoe Gado no ben teki na ofrandi dati foe di broedoe no ben de na ini. Gado wani sani nanga broedoe na ini. Abel ben tjari wan meti, èn Gado ben teki na ofrandi foe en.”

Na a momenti dati mi opo tanapoe èn mi ben lon gowe na dorosei. Ma tokoe mi ben fisiti a kerki ete. Mi ben gebroiki moro ten foe abi sociaal demakandra èn foe fisiti den konmakandra foe a club foe mi. Son tron mi ben fisiti den konmakandra na a Kownoekondre zaal, èn mi ben njoen mi abonnement tapoe A Waktitoren baka. Ma tokoe mi no ben klari ete foe tron wan foe den Kotoigi foe Jehovah.

A bosroiti foe dini Jehovah

A momenti pe wan bigi kenki ben kon gi mi, ben de na ini 1968. Wan dei mi ben bigin leisi wan artikel na ini A Waktitoren di e taki foe na ogri-ati froefolgoe di sma ben froefolgoe den Jehovah Kotoigi na Malawi. A ben froeteri foe wan meisje di abi 15 jari, di sma ben tai na wan bon èn den ben abi seks siksi leisi nanga en nanga tranga, bika a ben weigri foe skeki nanga a bribi foe en. A ben skreki mi srefisrefi, èn mi no ben leisi a tijdschrift moro, ma mi ben tan prakseri foe en. Mi ben kon froestan taki no wan enkri meisje na ini mi kerki ben sa sori sowan bribi. Baka ten a neti dati, mi ben teki a tijdschrift èn ben leisi a bladzijde baka.

Mi ben bigin studeri bijbel serjoesoe. Foe di mi ben kisi moro sabi, mi ben bigin si fa a kerki ben kori wi. Soleki fa a ben troe na ini owroeten, den priester foe wi ben ’e libi nomo na wan loesoe fasi’ (Hosea 6:9). Den sortoe man dati ben de den falsi profeiti gi soema Jesus ben warskow wi! (Mateus 24:24) Mi no ben bribi den fisjoen èn den krakti wroko foe den moro. Mi ben teki a bosroiti foe broko nanga falsi relisi èn foe jepi tra sma foe doe a srefi sani.

Moeiti foe hori mi na ini a kerki

Di den owroeman foe a kerki ben froestan taki mi ben abi a fasti bosroiti foe gowe libi a kerki, den ben seni wan groepoe sma foe kon begi mi. Den no ben wani lasi wan prenspari fonten pe den e feni moni. Den ben pristeri mi foe meki mi tron Baba Egbe, a papa foe wan foe den Apostel kerki foe Krestes na Akure.

Mi ben weigri foe teki a sani disi di den ben pristeri mi èn mi ben taigi den foe san ede. „A kerki lei gi wi”, mi ben taki. „Den e taki dati ala boen sma sa go na hemel. Ma mi leisi bijbel, èn mi abi na overtoigi taki soso 144.000 sma sa go na hemel. Den tra regtfardikisma sa libi na ini wan paradijs na grontapoe.” — Mateus 5:5; Openbaring 14:1, 3.

A pastoor foe a kerki ben proeberi foe meki den wefi foe mi de kontrari mi. A ben taigi den foe den tapoe Jehovah Kotoigi foe kon na wi oso. Wán foe den wefi foe mi ben poti vergif na ini mi njanjan. Toe foe den ben warskow mi foe wan fisjoen di den ben si na ini kerki. A fisjoen ben sori taki mi ben sa dede efoe mi ben gowe libi a kerki. Ma ala di den sani disi ben pasa, mi ben tan gi kotoigi na den wefi foe mi, èn mi ben gi den wan kari foe kon na den konmakandra nanga mi. „Oenoe sa feni tra masra drape”, mi ben taki. Ma nowan foe den ben sori pikinso belangstelling, èn den ben tan go doro foe proeberi foe broko mi saka.

Te foe kaba, tapoe 2 februari 1970, di mi ben kon baka na oso foe wan krosibei foto pe mi ben go, mi ben si taki na oso ben leigi. Ala den wefi foe mi nanga den pikin ben gowe foe oso.

Tan nanga wán wefi

’Now mi kan seti mi trowlibi kon boen’, mi ben prakseri. Mi ben aksi mi moro owroe wefi, Janet, foe kon baka na oso. A ben wani dati. Ma en famiri ben gens na idea dati srefisrefi. Di den tra wefi foe mi ben kon jere taki mi ben aksi Janet foe kon baka, den ben go na a oso foe en papa èn ben proeberi foe fon en. Ne a famiri foe en ben kari mi kon na wan konmakandra.

Pikinmoro 80 sma ben de na a konmakandra. Wan omoe foe Janet, di ben de na edeman foe a famiri, ben taki: „Efoe joe wani trow nanga wi oemapikin baka, dan joe moesoe teki den tra oema baka. Ma efoe joe wani libi akroederi a njoen relisi foe joe èn tan nanga wán wefi, dan joe moesoe soekoe wan tra oema. Efoe joe e teki Janet baka, dan den tra wefi foe joe sa kiri en, èn wi no wani taki na oemapikin foe wi moesoe dede.”

Baka foeroe takitaki, a famiri ben kon froestan taki mi ben abi a fasti bosroiti foe abi wán wefi nomo. Te foe kaba den ben kon safoe. Na omoe ben taki: „Wi no sa poeroe joe wefi foe joe. Joe kan teki en nanga joe.”

Tapoe 21 mei 1970, Janet nanga mi ben trow akroederi wet. Neigi dei na baka, mi ben dopoe leki wan foe den Jehovah Kotoigi. Na ini december foe a srefi jari, Janet ben dopoe toe.

Mi e njan boen foe den blesi foe Jehovah

Den memre foe a fosi kerki foe wi ben profeteri taki efoe wi ben sa tron Kotoigi, wi ben sa dede. Dati ben de pikinmoro 30 jari pasa. Srefi efoe mi dede now, a ben sa de foe di mi ben tron wan foe den Jehovah Kotoigi? Efoe mi wefi dede now, wan sma kan taki dati a dede foe di a tron wan foe den Jehovah Kotoigi?

Mi doe tranga moeiti foe sori den 17 pikin foe mi a pasi foe a waarheid. Ala di foeroe foe den ben de bigisma kaba di mi ben tron wan Kotoigi, tokoe mi ben gi den deki-ati foe studeri bijbel èn mi ben teki den go na den konmakandra nanga kongres. A de wan prisiri gi mi taki feifi foe den e dini Jehovah nanga mi. Wán foe den e dini makandra nanga mi leki owroeman na ini a gemeente. Wan trawan na wan dinari ini a diniwroko na ini wan krosibei gemeente. Toe foe den pikin foe mi e dini leki gewoon pionier.

Te mi e prakseri baka foe fosi, dan mi e froewondroe foe a no-froedini boen-atifasi foe Jehovah foe di a ben jepi mi foe tron en foetoeboi. O troe den wortoe foe Jesus de: „No wan sma kan kon na mi, boiti efoe a Tata, di ben seni mi kon, e hari en kon”! — Johanes 6:44.

[Foetoewortoe]