Soema na troetroe boskopoeman foe vrede?
Tapoe 31 mei 1996, njoensoe ben meki wan sani bekènti di ben gersi wan boskopoe foe vrede. A dei na fesi, wan officieel froeklari ben tjari kon na doro èn ben erken taki Benjamin Netanyahu, di ben o tron a vice-presidenti foe Israèl, ben „si en leki wan serjoesoe plekti foe meki den takimakandra gi vrede go doro, vrede nanga seikerfasi, na mindri a kondre Israèl èn ala den birti kondre foe en, èn so srefi nanga den Palestijnsma”.
A verkiezing foe Netanyahu di ben meki bekènti srefisrefi, ben meki foeroe sma aksi densrefi efoe vrede na ini a Mindri-Owstoesei ben sa kon de wan troe sani. Efoe na so a ben sa de, a ben sa kan dan taki tra nâsi kan doe leki Israèl, foe frigiti den kesekese foe den?
A no de foe taki, a moro makriki foe pramisi vrede leki foe meki vrede. Foe di foeroe sma e froestan disi, meki den ben tweifri na dati. Soleki fa a njoensoeman Hemi Shalev ben taki, „afoe foe den sma na Israèl abi a firi now taki heri esi sani sa kon boen baka, èn a tra afoe foe den sma e bribi taki Israèl fasi na ini wan hèl na grontapoe”. A ben taki sjatoe: „Son sma e prisiri; trawan e krei.”
Na so a de nanga a proeberi di libisma e proeberi foe tjari vrede kon. A wini di wan fesiman nanga den bakaman foe en wini, wani taki lasi gi a groepoe di e gens den. A de di sma no de tevrede e meki wan sma firi taki trawan kori en, èn nofo tron a firi dati e meki sma opo densrefi kontrari makti. Awansi na ini a Mindri Owstoesei, Latino-Amerika, Owstoe-Europa, noso wan tra presi — den moeiti di libisma e meki foe tjari vrede, de wan sani di e kori sma.
Troetroe vrede de krosibei!
Na a ten di a vrede na ini a Mindri-Owstoesei ben de fajafaja na ini njoensoe, wan tra boskopoe foe vrede ben de foe jere. Disi no ben de wan politiek lezing di ben meki bekènti srefisrefi; èn so srefi a no ben de wan froebontoe foe vrede na mindri nâsi. Na presi foe dati, a boskopoe disi ben meki wan vrede bekenti di sa kon soso nanga jepi foe Gado Kownoekondre. Pe a boskopoe disi ben de foe jere? Na moro leki 1900 „Boskopoeman foe a vrede foe Gado”-distriktkongres di Jehovah Kotoigi ben hori na heri grontapoe na ini a pisi ten foe 1996 te go miti 1997.
Na den kongres disi a ben tjari kon na krin taki no wan tiri foe libisma kan tjari troetroe vrede nanga seikerfasi kon. Foe san ede? Bika disi ben sa aksi foe den taki den moesoe tjari wan kaba kon na ala sani di e poeroe a vrede foe wi ibri dei. Troetroe vrede wani taki dati wi e wiki ibri mamanten sondro a kefar foe orlokoe nanga ogri di e doe nanga tranga. A wani taki dati no wan ogridoe no de moro, no wan sroto moro na den doro foe wi, no wan sma sa frede foe waka tapoe strati, no wan osofamiri no sa de moro di prati. Sortoe tiri na grontapoe kan tjari ala den sani dati kon? Ija, sortoe tiri na grontapoe ben sa proeberi srefi foe pramisi dati?
Ma Gado Kownoekondre kan èn sa tjari den sani disi kon. Bijbel e pramisi: „Loekoe! A tenti foe Gado de nanga libisma, èn en sa tan nanga den, èn den sa de en pipel. Èn Gado srefi sa de nanga den. Èn a sa figi poeroe ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba” (Openbaring 21:3, 4). Dati sa tjari troetroe froelekti kon gi a libisma famiri di e pina!
A pramisi foe Jehovah Gado, a no wan soso sani. Bijbel e gi wi a djaranti: „Gado a no libisma taki a moesoe froeteri lei, èn a no de so srefi wan manpikin foe libisma taki a moesoe firi sari. Ensrefi taki en èn a no sa doe en, èn en taki èn a no sa doe en?” (Numeri 23:19) Ija, san Gado pramisi, sa kon troe — gi a blesi foe ala den sma di e teki a sei foe en.
Gado boskopoeman foe vrede
Sma sabi Jehovah Kotoigi heri boen foe a faja di den abi foe preiki foe a Kownoekondre foe Gado. Ibri jari, makandra den e gebroiki moro leki wán miljard joeroe foe froeteri tra sma a boskopoe foe bijbel di e gi deki-ati. Disi de wan kontroe foe den wortoe foe Jesus: „A boen njoensoe disi foe a kownoekondre sa preiki na heri grontapoe pe sma e libi, leki wan kotoigi gi ala nâsi, èn dan a kaba sa kon” (Mateus 24:14). A boskopoe di den Kotoigi e tjari de troetroe „boen njoensoe”, bika a e meki a hemel Kownoekondre foe Gado bekènti leki a wan-enkri howpoe gi a libisma famiri. Èn dati na wan heri boen howpoe gi a ten di e kon!
Now kaba a Kownoekondre foe Gado e meki wan troetroe banti foe vrede nanga brada lobi na mindri den sma di e saka densrefi na en ondro. Jesus ben taki: „Nanga disi ala sma sa sabi taki oenoe na mi disipel, efoe oenoe abi lobi na oen mindri” (Johanes 13:35). Jehovah Kotoigi e doe tranga moeiti foe handri akroederi a fondamenti markitiki di a troe krestendom e aksi foe den. Leki wan bakapisi foe dati, den abi wan toemoesi moi bradafasi di e tjari wánfasi kon na mindri Djoe nanga Arabiersma, Krowâsiasma nanga Serfiasma, Hoetoe nanga Toetsi. A vrede disi di de soso wan dren gi a moro bigi pisi foe a libisma famiri, de nownowde a sani di miljoenmiljoen Kotoigi foe Jehovah na heri grontapoe abi.
Na a programa foe a „Boskopoeman foe a vrede foe Gado”-distriktkongres, prakseri ben poti na tapoe foe gi deki-ati foe tan libi akroederi den bijbel gronprakseri èn foe tan preiki a boen njoensoe foe Gado Kownoekondre. Wi e aksi joe foe leisi a raport di e kon now, foe a dri-dei kongres di ben gi deki-ati èn di miljoenmiljoen sma ben e njan boen foe en.