Boskopoeman foe a vrede foe Gado kon makandra
„WI KISI deki-ati foe ibri distriktkongres di wi fisiti”, wan kresten owroeman na Amerkankondre e taki. „Ma foe a jari disi wi no man taki srefisrefi. Ibri dei wi ben gowe èn e aksi wisrefi fa a programa foe a tra dei ben sa de moro leki san wi ben prakseri, èn wi no ben kisi sjen!”
Efoe joe ben fisiti wan foe den „Boskopoeman foe a vrede foe Gado”-distriktkongres, dan seiker joe ben sa agri nanga a fajafaja fisitiman disi. Ibri dei foe a kongres ben poti prakseri tapoe wan tra sei foe a wroko di Jehovah Kotoigi e doe leki boskopoeman foe Gado. Meki wi loekoe a dri-dei programa baka.
„O switi . . . a sma [de] di e bariwroko gi vrede”
Disi ben de a thema foe a fosi dei foe a kongres. A ben abi en gron tapoe Jesaja 52:7. Na ini den moeilek ten disi, foeroe sma e dini Jehovah na ini situwâsi di de wan tjalensi. A lezing „Jere san faja preikiman foe vrede abi foe taki” ben abi interview nanga wan toe foe den getrow sma disi. A ben gi deki-ati troetroe foe jere san densrefi e taki, èn na so fasi den fisitiman na a kongres ben kisi a djaranti taki Jehovah kan gi den krakti toe, èn taki a kan gi den srefi a „krakti di e pasa san de normaal” foe jepi den foe horidoro. — 2 Korentesma 4:7.
Den sani di Jehovah e aksi foe wi no de wan hebi lai gi wi (1 Johanes 5:3). Disi ben tjari kon na krin na ini a lasti lezing foe a mamanten programa, di ben abi leki heimarki a tjari di den ben tjari a brochure foe 32 bladzijde kon na doro, di abi leki nen San Gado e aksi foe wi? A njoen jepisani disi foe studeri èn di abi moi prenki, seiker sa plei wan prenspari ròl foe jepi moro sma foe leri foe den prakseri foe Gado. Komentaar fa foe gebroiki a njoen poeblikâsi disi de foe feni na ini a lasti studie-artikel foe a tijdschrift disi na tapoe bladzijde 16 nanga 17.
A lezing „Horidoro na ini wroko di boen” ben poti krakti na tapoe taki Jehovah sabi den tesi foe wi heri boen. Foe horidoro wani taki dati wi moesoe tanapoe kánkan; froedrage sani èn no lasi howpoe. Jehovah gi wi en Wortoe, en jeje, nanga en organisâsi foe jepi wi. Horidoro de fanowdoe foe preiki, ma a preikiwroko e jepi wi foe horidoro, foe di a e hori a bribi foe wi na libi. Foe di wi de so krosibei foe a kaba, wi no moesoe meki den problema foe wi kowroe a faja di wi abi, bika soso den sma di e horidoro te na a kaba sa kisi froeloesoe. — Mateus 24:13.
A thema lezing, „A ròl foe wi leki boskopoeman foe a vrede foe Gado”, ben poti prakseri na tapoe a fri di den djoe katibosma ben kon fri foe Babilon èn na tapoe a kon di a soifri anbegi na Jerusalem ben kon boen baka na ini 537 b.G.T. A sani disi di ben feni presi, ben de soso foe tesi na fesi san Gado Kownoekondre sa doe heri esi na heri grontapoe (Psalm 72:7; Jesaja 9:7). A wroko di wi kisi na ini a ten disi na foe preiki a boen njoensoe foe a Kownoekondre disi èn foe libi akroederi a boskopoe dati. Lobi gi Gado èn gi den sma na wi sei moesoe poesoe wi foe tan go doro nanga a wroko disi sondro foe stòp. — Tori foe den Apostel 5:42.
Wan heimarki foe a programa foe freida ben de a symposium „Loekoe boen nanga den kibri trapoe foe prisiriten”. Disiten pokoe, kino, video, telefisi show, video prei, boekoe, tijdschrift, nanga komedi, nofo tron e sori a fasi fa ogri jeje e prakseri. Foe dati ede, wi moesoe „tegoe gi godelowsoefasi” èn „hori fasti na san boen” (Romesma 12:9). Ija, wi moesoe si doti prisiriten leki tegoe sani èn wi moesoe wai pasi gi en, ala di wi e prakseri foe sani di de krin, di de boen, èn sani di moesoe kisi prèise (Filipisma 4:8). Den poeblikâsi nanga den jepisani foe doe ondrosoekoe, di Jehovah en organisâsi gi, e poesoe a froestan foe wi foe prakseri boen sani èn den e leri wi foe si san boen èn san ogri (Hebrewsma 5:14). Wi moesoe hori fasti na den sani disi neleki fa wi ben sa hori fasti na wan vlot na ini wan krasi se.
Baka dati a lezing ben kon: „Kakafoetoe gi Didibri — No froedrage no wan strei nanga Gado.” Sjatoe bifo den Israèlsma ben o go na ini a Pramisi Kondre, doesoendoesoen foe den ben fadon na ini a trapoe foe hoeroedoe. Pinehas no ben froedrage no wan strei nanga a troe anbegi. A ben doe wan sani gawgaw teige den sma di ben doe ogri, èn a gi di a ben gi ensrefi ini a dini foe Jehovah wawan, ben plisi Jehovah (Numeri 25:1-13). A marki foe Satan na foe kisi wi so fara taki wi no fiti moro foe go na ini a njoen grontapoe foe Gado. Neleki Pinehas, wi moesoe gens den moeiti di Didibri e doe foe doti wi. Awansi wi trow noso wi no trow, wi moesoe „lowe gi hoeroedoe”. — 1 Korentesma 6:18.
„Hori a soifrifasi foe a Wortoe foe Gado hei na wan loyaal fasi” ben de a lasti lezing na tapoe a fosi dei foe a kongres. Foeroe sma di e vertaal bijbel e kenki noso e poeroe wan toe pisi foe den Boekoe foe bijbel. Foe eksempre, foe plisi den sma di e horibaka gi den reti foe oemasma, meki den sma di vertaal The New Testament and Psalms: An Inclusive Version e taki foe Gado no leki a Tata, ma leki a Tata-Mama èn e taki foe Jesus leki „a Libisma-wan” na presi foe a „Manpikin foe libisma”. Kontrari foe dati, a Nieuwe-Wereldvertaling (Njoen-Grontapoevertaling) e hori so getrow na a tekst di skrifi na ini a fosi tongo, taki a jepi wi foe froestan wan toe bijbel tori moro boen. Foe eksempre, a takiman ben taki: „A ben de a soifri fasi fa den ben vertaal a New World Translation, di ben poti a fondamenti meki wi ben orga den gemeente baka, foe di wi ben poti den skin foe owroeman na wroko, èn dati de moro akroederi a model di a fosi jarihondro gemeente ben poti.” Wi e sori a loyaalfasi foe wi na a Wortoe foe Gado, te wi e leisi en ibri dei èn e gebroiki den rai foe en. A takiman ben taki toe: „Wi e sori taki wi e horibaka na wan loyaal fasi gi a Wortoe foe Gado, te wi e preiki en fajafaja na tra sma èn te wi e gebroiki en finifini te wi e leri tra sma, èn noiti e proeberi foe meki a fiti den idea foe wi foe di wi e drai en noso foe di wi e taki moro leki san a wani taki troetroe.”
’A vrede foe Gado e pasa ala prakseri’
A thema disi di abi en fondamenti tapoe Filipisma 4:7, ben poti a fondamenti gi a di foe toe dei foe a kongres. Foeroe foe a bodoi di ben pristeri, ben taki foe a joisti fasi fa wi moesoe si wi diniwroko, wi osofamiri, a gi di wi gi wisrefi abra na Gado, èn tra afersi foe na aladei libi.
Baka wan takimakandra foe a deitekst, wan symposium ben pristeri nanga a titel „Boskopoeman di e tjari boen njoensoe foe vrede”. A boskopoe di wi e tjari, na wan boskopoe foe vrede, èn wi moesoe gi en na ini vrede (Efeisesma 6:15). A marki foe wi na foe wini ati, no foe wini haritaki. A leri èn den poeblikâsi di wi e kisi foe Jehovah en organisâsi e jepi wi foe doe dati. Wi no moesoe meki a mi-no-ke fasi foe sma meki wi lasi-ati. Na presi foe dati, wi moesoe ’doe ala san wi man’, foe abi wan boen gwenti foe persoonlijk studie, foe fisiti konmakandra, èn foe abi wan prati na ini a preikiwroko (2 Timoteus 2:15). Wan sani di wi no moesoe frigiti, na taki wi moesoe doe boen gi tra sma, spesroetoe gi den wan di abi a srefi bribi leki wi (Galasiasma 6:10). A no de foe taki, foe doe ala san wi man no wani taki dati wi moesoe wroko pasa marki. San ibri wan foe wi man doe akroederi wi eigi bekwaamfasi èn wi situwâsi pe wi de na ini, na dati Jehovah e feni boen.
A pipel foe Gado e gi a ten foe den, den krakti, nanga den goedoe foe den, foe meki Kownoekondre afersi go na fesi. A lezing „Gi nanga wan prisiri ati na ini Jehovah en organisâsi” ben tjari kon na krin, taki te moro sma di wi kan gersi nanga skapoe, e doe wan sani na tapoe a Kownoekondre boskopoe, dan moro wrokosani de fanowdoe, konmakandra presi, nanga bijkantoro. Den bijdrage foe wi e meki taki na organisâsi man abi ala sani di de fanowdoe foe doe a preikiwroko na heri grontapoe. Te wi e gi foeroe, dan dati e gi grani toe na Jehovah èn a e tjari prisiri gi a sma di e gi. Foe dati ede, leki kresten wi no moesoe frigiti a prenspari afersi disi foe wi anbegi. — 2 Korentesma 8:1-7.
Na a kaba foe a mamanten pisi, a dopoe-lezing ben de — di de ala ten wan heimarki na den bigi konmakandra foe Jehovah Kotoigi. A de wan bigi prisiri foe si sma di didjonsro ben gi densrefi abra na Gado, e waka na baka Jesus foetoestap di den ben teki dopoe! (Mateus 3:13-17). Ala sma di e doe a stap disi, kisi leri foe a fonten foe a moro bigi koni — bijbel. Boiti dati, den feni troetroe marki na ini a libi, èn den blesi nanga a vrede di e kon foe a sabi di den sabi taki san den e doe, de boen. — Preikiman 12:13.
Krinkrin rai ben gi na ini a lezing: „Meki a koni foe man si sani krin kibri joe.” A koni foe man si sani krin, de toemoesi prenspari na ini bisnis tori. Wi no moesoe doe persoonlijk bisnis afersi na ini a Kownoekondre zaal, èn wi no moesoe mesbroiki kompe kresten foe meki moni gi wisrefi. (Teki gersi Johanes 2:15, 16.) A koni foe man si sani krin, de fanowdoe toe te wi e poti moni na ini wan bisnis noso te wi e leni moni gi wisrefi noso te wi e leni sma moni. „A go di wan bisnis afersi no go boen na mindri kresten, meki a froewakti foe den no kon troe èn meki wan toe foe den lasi srefi a jejefasi foe den, foe di esi-esi den ben bigin meki triki plan foe meki moni”, a takiman ben taki. Ala di a no fowtoe gi kresten foe doe bisnis nanga makandra, tokoe a de wan koni sani foe de fersektiki. Èn te toe sma sroto wan bisnis kroederi, dan ala ten den kondisi moesoe skrifi na tapoe papira.
Na ini a lezing „Leki man èn leki oema A ben meki den”, den ben taki foe den markitiki foe Gado gi mansma nanga oemasma. A ròl foe mansma nanga oemasma kon kron na ini a heri historia. „Na wan fowtoe fasi foeroe sma e teki man-nengrefasi poti tapoe wan lin nanga a basi foe trawan na wan ogri-ati fasi, tranga-atifasi, noso tranga heimemre-firi foe mansma”, a takiman ben taki. „Ini son koeltoeroe a ben sa de wan freimde sani, srefi wan sjen sani gi wan man foe krei pe sma de noso srefi te a de en wawan. Tokoe Johanes 11:35 e froeteri taki, ala di Jesus ben de na mindri na ipi sma dorosei foe a grebi foe Lasarus, ’Jesus ben bigin krei.’” Fa a de nanga oemasma? Foeroe tron den e si oemasma soso na a moi foe den na skinfasi. Ma a takiman ben aksi: „Efoe wan oema moi, ma a mankeri froestanfasi èn a lobi meki trobi, lobi meki spotoe foe hati a firi foe trawan, noso a asranti, wi kan taki troetroe taki a moi, taki troetroe a de wan oema?” (Teki gersi Odo 11:22; 31:26.) Kresten mansma nanga oemasma e doe moeiti foe gebroiki bijbel gronprakseri na ini a fasi fa den e taki, fa den e tjari densrefi, èn fa den e weri krosi. A takiman ben taki: „A makriki foe lespeki wan man di e sori a froktoe foe a jeje, èn a makriki foe lobi wan oema di e doe dati.” — Galasiasma 5:22, 23.
Baka dati, a symposium ben kon „A Gado foe vrede e broko en ede nanga joe”. Foeroe kresten e broko den ede na moni sei. Ma tokoe Jehovah e pramisi: „Mi no sa gowe libi joe kwetikweti, èn noiti mi no sa drai mi baka gi joe.” (Hebrewsma 13:5). Ala di den abi problema na ekonomia sei, son wan foe den sori froetrow na ini a pramisi disi foe di den go na ini a jepi-pionier noso a gewoon pionierwroko. Tra sma di no man pionier nownow, poti Kownoekondre afersi na a fosi presi foe di den e teki ibri okasi foe gi kotoigi (Mateus 6:33). Ala den sortoe moeiti disi de foe prèise! Jehovah organisâsi gi foeroe poeblikâsi foe jepi wi nanga wi diniwroko èn foe jepi wi foe kakafoetoe gi den problema foe wi. Efoe wi e sori warderi gi den sani na jejefasi di Jehovah gi, dan a sa blesi wi nanga vrede na ini a broeja ekonomia ten disi. — Psalm 29:11.
Na a kaba foe a lasti lezing foe a dei, „Feti baka a vrede foe Gado na ini na osofamiri libi”, den fisitiman na den kongres ben breiti foe kisi a njoen boekoe, A sroto gi wan kolokoe osofamiri. „Studeri a boekoe disi joesrefi èn leki osofamiri, na wan fajafaja fasi”, a takiman ben gi a deki-ati. „Doe serjoesoe moeiti foe gebroiki den rai foe en di gron tapoe bijbel, èn joe kan de seiker taki a vrede nanga kolokoe foe joe osofamiri sa kon moro foeroe.”
„Hori a wánfasi . . . na ini a banti foe vrede di e tjari wánfasi kon”
A thema disi di gron tapoe Efeisesma 4:3, ben de wan boen wan gi a lasti dei foe a kongres. Jehovah Kotoigi, di kon foe ala nâsi foe grontapoe, kisi leri foe Gado. Foe dati ede, den lobi vrede. Den e waka na baka na eksempre foe Jesus èn den e doe tranga moeiti „foe tan hori a wánfasi foe jeje na ini a banti foe vrede di e tjari wánfasi kon”.
A vrede di de foeroe na ini Gado organisâsi ben kon na fesi na ini a symposium „Kon sabi den joisti sortoe boskopoeman”. Falsi profeiti ben de na Israèl foe owroeten. Ma, den troe boskopoeman foe Gado — soleki den profeiti Jesaja, Esekièl, nanga Jeremia — ben taki soifri na fesi taki Jerusalem ben o fadon, a pisiten te den sa de na ini katibo, èn a fri di a pipel foe Gado ben sa kon fri te foe kaba. Wan srefi sortoe situwâsi de na ini a ten disi. Falsi boskopoeman de foeroe na ini politiek èn falsi relisi. Ma tokoe Jehovah opo den Kotoigi foe en foe meki a prakseri di a abi nanga a seti foe sani disi, bekènti. Spesroetoe foe sensi 1919, Jehovah gebroiki den foetoeboi foe en foe meki a boskopoe foe Gado bekènti. Den e difrenti srefisrefi foe den falsi boskopoeman foe krestenhèit! Meki wi plei a ròl foe wi fajafaja na ini a wroko disi, teleki Jehovah taki dati a klari.
A lezing „Arki èn gi jesi na a Wortoe foe Gado” ben poti krakti na tapoe taki den Boekoe foe bijbel na a moro bigi fonten foe kisi tiri, trowstoe, nanga howpoe (Jesaja 30:20, 21; Romesma 15:4). Moro nanga moro a grontapoe na ini a ten disi, e gi toemoesi foeroe primisi. Foe dati ede, moro leki oiti wan ten, wi moesoe arki a rai di e kon foe a Wortoe foe Gado èn foe en organisâsi. Jehovah sabi den swakifasi foe wi, èn na ini en Wortoe a taki krinkrin san na a pasi di sa gi wi wini. A sabi di wi sabi taki Jehovah e horibaka gi wi, e gi wi a froetrow foe doe ala sani di a e aksi foe wi.
Disi ben sreka a froestan foe den arkiman gi a drama na ini owroeten krosi. A ben abi leki titel „Foe san ede wi moesoe lespeki theokrasia seti?” Nanga a bijbel tori foe Gideon di gebroiki leki fondamenti, a drama disi ben poti krakti na tapoe wan tranga lès — wi moesoe waka na baka den leri foe Gado èn wi no moesoe poti wi eigi denki na ini en presi noso foe proeberi foe no gebroiki a rai foe a theokrasia.
A poebliki taki ben go foe a tori „Troe vrede te foe kaba! — Foe sortoe fonten?” A vrede di Gado e pramisi de moro leki iniwan sani di di a grontapoe disi kan prakseri. „Troe vrede wani taki vrede ala dei”, na so a takiman ben taki. „A vrede foe Gado wani taki wan grontapoe sondro siki, pen, sari, nanga dede.” Bijbel e froeteri wi taki Jehovah „e meki feti kon na wan kaba te na a moro farawe presi foe grontapoe” (Psalm 46:9). Fa a sa doe disi? Foe di a sa poeroe a sma di e soetoe faja gi feti, Satan Didibri (Openbaring 20:1-3). Disi sa opo a pasi gi safri-ati sma foe ’abi grontapoe èn foe feni switi prisiri na ini vrede pasa marki’. — Psalm 37:11.
Na baka a loekoe di wi ben loekoe a Waktitoren studie-artikel sjatoe baka gi a wiki dati, a lasti lezing foe a kongres ben hori. A lezing disi di ben poesoe wi, di abi leki titel „Go na fesi leki boskopoeman foe a vrede foe Gado”, ben poti krakti na tapoe taki a preikiwroko foe wi de wan aparti sani èn a de tranga fanowdoe. Now a no a ten foe doe en safrisafri, foe draidrai, noso foe drai go baka na den fowtoe prakseri. Wi kisi den sani di wi abi fanowdoe — a boskopoe foe Gado, en santa jeje, èn boen foeroe sani di e kon foe en lobi-ati theokratis organisâsi. Leki foetoeboi foe Jehovah, meki wi foe dati ede, tan go na fesi leki boskopoeman foe a vrede foe Gado!
[Faki/Prenki na tapoe bladzijde 9]
Wan sani di seti na ini lobi gi osofamiri
Den sma di ben fisiti a di foe toe dei foe a „Boskopoeman foe a vrede foe Gado”-distriktkongres ben prisiri srefisrefi foe kisi a njoen poeblikâsi di abi leki titel A sroto gi wan kolokoe osofamiri. A boekoe disi abi bodoi foe bijbel di sa abi wini gi ala osofamiri di lobi Gado.
Wan owroeman foe Connecticut, Amerkankondre, e taki: „Na tapoe 15 juni wi ben kisi a Kolokoe osofamiri-boekoe foe wi. Na tapoe 16 juni mi ben leisi afoe foe a boekoe kaba. Na tapoe 17 juni wi ben abi wi fosi osofamiri studie na ini a boekoe, èn a ben gi wi foeroe deki-ati sote! Na tapoe a srefi dei dati, mi ben kaba leisi a boekoe. A moi poeblikâsi disi seiker sa de wan warti sani gi den sma di e gebroiki en. Na eerlijkfasi fa a boekoe skrifi èn a bodoi foe en di fiti a ten disi, e gi wi moro boeweisi taki ’a getrow èn koni srafoe’ e gi ’njanjan na a reti ten’ èn taki a sabi heri boen san na den sani di wi abi fanowdoe na ini den moeilek ten disi”. — Mateus 24:45-47.
[Prenki na tapoe bladzijde 7]
Jongoewan nanga owroewan wani sabi san Gado e aksi