De leki boskopoeman foe a vrede foe Gado
„O switi na tapoe den bergi den foetoe foe . . . a sma [de] di e meki vrede bekènti.” — JESAJA 52:7.
1, 2. (a)Sortoe boen njoensoe moesoe meki bekènti, soleki fa Jesaja 52:7 ben taki na fesi? (b) San den wortoe foe a profeititori foe Jesaja ben wani taki ini a kefal foe owroeten Israèl?
BOEN njoensoe de foe meki bekènti! A de a njoensoe foe vrede — troetroe vrede. A de wan boskopoe foe froeloesoe di abi foe doe nanga a Kownoekondre foe Gado. Langa ten pasa kaba, a profeiti Jesaja ben skrifi foe disi, èn den wortoe foe en kibri gi wi na Jesaja 52:7, pe wi e leisi: „O switi na tapoe den bergi den foetoe foe a sma de di e tjari boen njoensoe kon, a sma di e meki vrede bekènti, a sma di e tjari boen njoensoe kon foe wan moro boen sani, a sma di e meki froeloesoe bekènti, a sma di e taigi Sion: ’Joe Gado tron kownoe!’”
2 Jehovah ben meki en profeiti Jesaja skrifi a boskopoe dati gi a boen foe owroeten Israèl èn gi a boen foe wi na ini a ten disi. San disi wani taki? Na a ten di Jesaja ben skrifi den wortoe dati, dan kande den Asiriasma ben tjari a noordsei kownoekondre Israèl go na ini katibo kaba. Baka ten, den ben o tjari den sma di ben libi na Juda, a zuidsei kownoekondre, go na Babilon leki katiboman. Den dei dati ben de dei foe sari nanga broeja na ini a nâsi, bika a pipel no ben gi jesi na Jehovah èn foe dati ede den no ben abi vrede nanga Gado. Soleki fa Jehovah ben taigi den, dan a sondoe fasi fa den ben tjari densrefi, ben meki wan prati kon na mindri den nanga a Gado foe den (Jesaja 42:24; 59:2-4). Ma Jehovah ben meki Jesaja froeteri na fesi, taki na a reti ten den portoe foe Babilon ben sa wai opo. A pipel foe Gado ben o de fri foe drai go baka na a mamakondre foe den, foe bow a tempel foe Jehovah drape baka. Sion ben sa meki kon boen baka èn sma ben sa bigin baka foe anbegi a troe Gado na Jerusalem. — Jesaja 44:28; 52:1, 2.
3. Fa a pramisi foe wan meki kon boen baka foe Israèl ben de wan profeititori foe vrede toe?
3 A pramisi disi foe kon fri ben de wan profeititori foe vrede toe. Te den Israèlsma ben o go baka na a kondre di Jehovah ben gi den, dan dati ben o de wan boeweisi foe a sari-ati foe Gado èn foe a berow foe den. A ben o sori taki den ben de ini vrede nanga Gado. — Jesaja 14:1; 48:17, 18.
„Joe Gado tron kownoe!”
4. (a) Na sortoe fasi wi ben kan taki dati na ini 537 b.G.T ’Jehovah ben tron kownoe’? (b) Fa Jehovah ben seti afersi gi a boen foe en pipel na ini den jari di ben kon?
4 Di Jehovah ben tjari a fri disi kon na ini 537 b.G.T., dan a ben fiti taki a njoensoe ben kan meki bekènti gi Sion: „Joe Gado tron kownoe!” A troe taki Jehovah na a „Kownoe foe ten di no abi kaba” (Openbaring 15:3). Ma a fri di a ben fri en pipel, ben de wan njoen fasi foe sori en soevereiniteit. A ben sori na wan toemoesi aparti fasi, taki en krakti nanga makti hei moro leki a moro tranga libisma grontapoemakti te na a ten dati (Jeremia 51:56, 57). Leki bakapisi foe a wroko di a jeje foe Jehovah ben wroko, den tra komplòt di ben meki teige en pipel ben poeroe na pasi (Ester 9:24, 25). Ibri tron baka, Jehovah ben kon na mindri na difrenti fasi, foe meki den kownoe foe Media-Persia wroko makandra foe doe en eigi soeverein wani (Sakaria 4:6). Den toemoesi moi sani di ben pasa na ini den dei dati, skrifi gi wi na ini den bijbel boekoe Esra, Nehemia, Ester, Hagai, nanga Sakaria. Èn fa disi e tranga a bribi foe wi te wi e go loekoe den baka!
5. Foe sortoe toemoesi prenspari sani di ben pasa den e taki na Jesaja 52:13–53:12?
5 Ma san ben pasa na ini 537 b.G.T. èn baka dati, ben de soso wan bigin. Wantewante baka a profeititori foe a meki kon boen baka na ini kapitel 52, Jesaja ben skrifi foe a kon foe a Mesias (Jesaja 52:13–53:12). Nanga jepi foe a Mesias, di ben sori foe de Jesus Krestes, Jehovah ben sa gi wan boskopoe foe fri nanga vrede di ben sa wani taki moro srefi leki san ben pasa na ini 537 b.G.T.
Jehovah en moro bigi boskopoeman foe vrede
6. Soema na Jehovah en moro bigi boskopoeman foe vrede, èn sortoe komando a ben fiti tapoe ensrefi?
6 Jesus Krestes na Jehovah en moro bigi boskopoeman foe vrede. Jesus na a Wortoe foe Gado, Jehovah en eigi Takiman (Johanes 1:14). Akroederi disi, pikinso baka di Jesus teki dopoe na ini Jordan liba, a ben go na ini a snoga na Nasaret, a ben opo tanapoe, èn na ini Jesaja kapitel 61 a ben leisi nanga wan tranga sten a komando di a ben kisi. A komando dati ben sori krin taki Gado ben seni en kon foe preiki foe sani di ben abi foe doe nanga „froeloesoe” èn wan „kon boen baka”, èn so srefi foe na okasi di sma ben kisi foe feni a boen-ati foe Jehovah. Tokoe Jesus ben doe moro leki foe meki wan boskopoe foe vrede bekènti. Gado ben seni en toe foe poti wan fondamenti gi vrede di e tan. — Lukas 4:16-21.
7. Sortoe bakapisi e kon foe a vrede nanga Gado, di kan kon nanga jepi foe Jesus Krestes?
7 Na a ten di Jesus ben gebore, engel ben sori densrefi na skapoeman krosibei foe Betlehem, èn den ben e prèise Gado èn ben e taki: „Glori na ini den moro hei presi na Gado, èn na grontapoe vrede na mindri sma foe boen wani” (Lukas 2:8, 13, 14). Ija, vrede ben o de gi den sma di Gado ben sori a boen wani foe en, foe di den ben sori bribi na ini a seti foe en di ben kon nanga jepi foe en Manpikin. San dati ben sa wani taki? A ben o wani taki dati libisma, ala di den gebore ini sondoe, ben kan kisi wan krin posisi na Gado, wan matifasi nanga en di a e feni boen (Romesma 5:1). Den ben kan njan boen foe a bedarifasi foe inisei, a vrede, di sma no kan kisi na no wan enkri tra fasi. Na Gado en fasti ten, sma ben o kon fri foe ala den bakapisi foe a sondoe di den kisi foe Adam, èn den ben o kon fri toe foe siki nanga dede. Sma no ben o breni noso dofoe noso malengri moro. Foe ala ten, a ben o poeroe swakifasi di e weri sma skin, nanga ede-siki di e sari sma ati. A ben sa kan, taki sma e njan boen foe têgo foe libi ini volmaaktifasi. — Jesaja 33:24; Mateus 9:35; Johanes 3:16.
8. Soema kan kisi a vrede foe Gado?
8 Soema kan kisi a vrede foe Gado? Ala sma di e sori bribi na ini Jesus Krestes kan kisi en. Na apostel Paulus ben skrifi taki ’nanga jepi foe en, Gado ben feni en boen foe verzoen Ensrefi baka nanga ala tra sani, foe di a ben soekoe vrede nanga jepi foe a broedoe di Jesus ben trowe na a pina-oedoe’. Na apostel ben taki moro fara, taki a kon boen baka disi ben sa abi foe doe nanga „den sani na hemel” — dati wani taki, den sma di ben sa de kompe erfgenaam nanga Krestes na hemel. A ben sa abi foe doe toe nanga „den sani na grontapoe” — dati wani taki, den sma di ben sa kisi na okasi foe libi foe têgo na a grontapoe disi, te a kon tron wan paradijs dorodoro (Kolosesma 1:19, 20). Foe di ala den sma disi e gebroiki a waarde foe Jesus en srakti-ofrandi èn foe di den e gi jesi na Gado nanga den heri ati, meki den ben kan njan boen foe wan waran matifasi nanga Gado. — Teki gersi Jakobus 2:22, 23.
9. (a) Na tapoe sortoe tra matifasi a vrede foe Gado abi krakti? (b) Sortoe makti Jehovah ben gi en Manpikin, foe di a ben abi na prakseri foe tjari têgo vrede kon na alasei?
9 O prenspari so wan vrede nanga Gado de! Efoe vrede nanga Gado no de, dan no wan vrede di e tan noso di wani taki wan sani, kan de na iniwan tra matifasi. Vrede nanga Jehovah na a fondamenti foe troe vrede na grontapoe (Jesaja 57:19-21). A fiti taki Jesus Krestes na a Granman foe vrede (Jesaja 9:6). Jehovah gi a sma disi di nanga jepi foe en, libisma kan kon boen baka nanga Gado, a makti toe foe tiri (Danièl 7:13, 14). Èn foe den bakapisi foe a tiri di Jesus o tiri a libisma famiri leki Granman, Jehovah e pramisi: „Na vrede, wan kaba no sa kon.” — Jesaja 9:7; Psalm 72:7.
10. Fa Jesus ben gi wi wan eksempre di a ben meki a vrede foe Gado bekènti?
10 Ala libisma abi a boskopoe foe a vrede foe Gado fanowdoe. Jesus srefi ben gi wan fajafaja eksempre foe di a ben preiki a boskopoe dati. A ben doe dati na ini a birti foe a tempel na Jerusalem, na tapoe a skoinsi sei foe wan bergi, te a ben de na pasi, na wan Samaria oema na wan peti, èn na ini den oso foe den sma. Awansi pe sma ben de, Jesus ben soekoe okasi foe preiki foe a Kownoekondre foe Gado. — Mateus 4:18, 19; 5:1, 2; 9:9; 26:55; Markus 6:34; Lukas 19:1-10; Johanes 4:5-26.
Leri foe waka na ini den foetoestap foe Krestes
11. Sortoe wroko Jesus ben leri den disipel foe en?
11 Jesus ben leri den disipel foe en foe preiki a boskopoe foe a vrede foe Gado. Den ben kon froestan taki, neleki fa Jesus ben de a „getrow èn troe kotoigi” foe Jehovah, den ben abi a frantiwortoe toe foe gi kotoigi (Openbaring 3:14; Jesaja 43:10-12). Den ben si Krestes leki a Fesiman foe den.
12. Fa Paulus ben sori a prensparifasi foe a preikiwroko?
12 Na apostel Paulus ben taki-go-taki-kon foe a prensparifasi foe a preikiwroko disi, foe di a ben taki: „Boekoe e taki: ’No wan sma di e poti en bribi na en tapoe, a sa meki en fesi fadon.’” Dati wani taki, no wan sma di e sori bribi na ini Jesus Krestes leki a Moro Prenspari Sma di Jehovah gebroiki foe tjari froeloesoe kon, a sa meki en fesi fadon. Èn no wan sma ras e meki taki a sma dati no boen, bika Paulus ben taki moro fara: „Wan difrenti no de na mindri djoe nanga Grikisma, bika a srefi Masra de na den tapoe, di goedoe gi ala den wan di e kari en. Bikasi ’ibri sma di e kari a nen foe Jehovah sa kisi froeloesoe’” (Romesma 10:11-13). Ma fa sma ben sa kon sabi foe na okasi dati di den e kisi?
13. San ben de fanowdoe foe sma ben kan jere a boen njoensoe, èn san den fosi jarihondro kresten ben doe na tapoe a sani dati di ben de fanowdoe?
13 Paulus ben taki foe a fanowdoe di sma ben de fanowdoe, foe di a ben poti aksi di ibri foetoeboi foe Jehovah moesoe go prakseri foe den. Na apostel ben aksi: „Fa den sa kari en efoe den no e bribi na ini en? Ma fa den sa bribi na ini en efoe den no jere foe en? Ma fa den sa jere sondro foe wan sma e preiki? Ma fa den sa preiki efoe wan sma no seni den go?” (Romesma 10:14, 15) A historia foe a fositen krestendom e gi wan libilibi boeweisi taki mansma nanga oemasma, jongoewan nanga owroewan, ben doe wan sani na tapoe na eksempre di Krestes nanga den apostel foe en ben gi. Den ben tron fajafaja preikiman foe a boen njoensoe. Foe di den ben waka baka na eksempre foe Jesus, meki den ben preiki gi sma awansi pe den ben kan feni den. Foe di den no ben wani misi no wan sma, meki den ben doe a diniwroko foe den na poebliki presi èn oso foe oso. — Tori foe den Apostel 17:17; 20:20.
14. Fa a ben sori foe de troe taki „den foetoe” foe den sma di e meki a boen njoensoe bekènti, ben de „switi”?
14 A no de foe taki, dati a no ala sma ben ontfanga kresten preikiman na wan switi fasi. Ma tokoe den wortoe di Paulus teki foe Jesaja 52:7 ben sori foe de troe. Baka di a ben poti na aksi: ’Fa den sa preiki efoe wan sma no seni den go?’, a ben taki toe: „Soleki fa skrifi: ’O switi den foetoe foe den wan de di e meki boen njoensoe foe boen sani bekènti!’” Moro foeroe foe wi no e si den foetoe foe wi leki sani di switi, noso moi. So boen, san disi wani taki dan? Soleki fa a gwenti de, dan na den foetoe e tjari wan sma te a e go preiki gi trawan. Den foetoe dati troetroe e sori soema a sma de. Èn wi kan de seiker taki, gi foeroe sma di ben jere a boen njoensoe foe den apostel èn foe tra fosi jarihondro disipel foe Jesus Krestes, den fositen kresten disi ben de troetroe wan moi sani foe si (Tori foe den Apostel 16:13-15). Moro leki dati, den ben de wan diri sani ini na ai foe Gado.
15, 16. (a) Fa den fositen kresten ben sori taki den troetroe ben de boskopoeman foe vrede? (b) San kan jepi wi foe doe a diniwroko foe wi na a srefi fasi fa den fosi jarihondro kresten ben doe dati?
15 Den bakaman foe Jesus ben abi wan boskopoe foe vrede, èn den ben tjari en na wan vrede fasi. Jesus ben leri den den sani disi: „Awansi pe oenoe e go na ini wan oso, oenoe moesoe taki fosi: ’Meki na oso disi abi vrede.’ Èn efoe wan mati foe vrede de drape, dan oen vrede sa kon na en tapoe. Ma efoe a no de so, dan a sa drai kon baka na oenoe” (Lukas 10:5, 6). Sja·lōmʹ, noso „vrede”, na wan fasi fa djoesma gwenti taki odi. Ma den leri foe Jesus abi foe doe nanga moro foeroe sani leki disi. Leki „sma di e teki presi gi Krestes”, den salfoe disipel foe en ben gi sma tranga: „Kon boen baka nanga Gado” (2 Korentesma 5:20). Akroederi den leri foe Jesus, den ben taki nanga sma foe a Kownoekondre foe Gado èn san a ben kan wani taki gi den leki ibriwan sma aparti. Den sma di ben arki, ben kisi wan blesi; den sma di ben weigri foe teki a boskopoe, ben lasi.
16 Jehovah Kotoigi e doe a diniwroko foe den na a srefi fasi na ini a ten disi. A boen njoensoe di den e tjari go na sma, a no foe den; na foe a Sma di seni den go. A wroko foe den na foe tjari en go na sma. Efoe sma e arki en, dan den e poti densrefi ini a posisi foe kan kisi toemoesi moi blesi. Efoe den no wani arki en, dan den e weigri foe abi vrede nanga Jehovah Gado èn nanga en Manpikin, Jesus Krestes. — Lukas 10:16.
Abi vrede na ini wan broeja grontapoe
17. Fa wi moesoe tjari wisrefi, srefi te wi e kisi foe doe nanga sma di wani doe wi ogri, èn foe san ede?
17 Awansi san sma e doe te den jere a boskopoe, a de prenspari gi den foetoeboi foe Jehovah foe hori na prakseri taki den na boskopoeman foe a vrede foe Gado. Sma foe grontapoe e soekoe trobi kande foe di den ati e bron èn den e sori na atibron foe den foe di den e taki sani foe hati sma firi noso foe di den e bari kosi den sma di e tanteri den. Kande son wan foe wi ben doe dati fosi. Ma efoe wi weri a njoen sma di wi moesoe de èn no de wan pisi foe grontapoe now, dan wi no sa waka baka den fasi foe grontapoe (Efeisesma 4:23, 24, 31; Jakobus 1:19, 20). Awansi san trawan e doe, wi sa poti a rai disi na ini wi libi: „Efoe a kan, so langa a e anga foe oenoe, abi vrede nanga ala sma.” — Romesma 12:18.
18. San wi moesoe doe efoe wan poebliki lantiman e moeilek wi, èn foe san ede?
18 A kan, taki wanwan leisi wi e kon na fesi poebliki lantiman foe a diniwroko foe wi ede. Foe sori a makti foe den, meki kande den e ’aksi wi’ foe tjari kon na krin foe san ede wi e doe son sani noso foe san ede wi no e teki prati na wan spesroetoe sani di sma e doe. Kande den wani sabi foe san ede wi e preiki a boskopoe di wi e tjari — wan boskopoe di e poeroe a bere foe falsi relisi kon na doro èn di e taki foe a kaba foe a disiten seti foe sani. A lespeki di wi abi gi na eksempre foe Krestes sa boeweigi wi foe sori wan safoe fasi èn dipi lespeki (1 Petrus 2:23; 3:15). Foeroe tron den sortoe lantiman dati de ondro druk foe den kerki tiriman noso kande foe den eigi basi. Wan safoe piki di gi na wan lespeki fasi, kan jepi den foe froestan taki a wroko foe wi no de wan kefar gi den noso gi a vrede foe den sma di e libi ini a birti. So wan piki e meki lespeki, wan wroko makandra, nanga vrede, kon na den sma di e teki a piki. — Titus 3:1, 2.
19. Na sortoe wroko Jehovah Kotoigi noiti no e teki prati?
19 Na heri grontapoe, sma sabi Jehovah Kotoigi leki sma di no e teki prati na a feti di grontapoe e feti. Den no abi foe doe nanga den trobi di grontapoe e meki foe ras, relisi, noso politiek ede (Johanes 17:14). Foe di Gado Wortoe e tiri wi foe „saka [wi]srefi na ondro den hei tirimakti”, meki wi no ben o prakseri srefi foe teki prati na sani foe trangajesi tirimakti èn opo wisrefi teige lanti (Romesma 13:1). Jehovah Kotoigi noiti no moksi densrefi nanga groepoe di abi leki marki foe trowe wan tirimakti. Te wi e hori na prakseri den markitiki di Jehovah poti gi den kresten foetoeboi foe en, dan kwetikweti wi no e teki prati na a trowe foe broedoe noso na iniwan sortoe ogri di doe nanga tranga! Troe kresten no e taki nomo foe vrede; den e libi akroederi a boskopoe di den e preiki.
20. Sortoe historia Babilon a Bigiwan abi ini a tori foe vrede?
20 Tra fasi leki san troe kresten e doe, dan den sma di e teki presi gi den relisi organisâsi foe krestenhèit no boeweisi taki den de boskopoeman foe vrede. Den relisi foe Babilon a Bigiwan — den kerki foe krestenhèit èn so srefi den tra relisi di no de foe krestenhèit — horibaka gi den feti foe den nâsi, ben gi pasi meki den pasa, noso ben teki fesi srefi na ini den. Den soetoe faja toe foe sma froefolgoe getrow foetoeboi foe Jehovah, èn kiri den srefi. Dati meki Openbaring 18:24 e froeklari foe Babilon a Bigiwan: „Na ini en den ben feni a broedoe foe den profeiti èn foe den santawan èn foe ala den wan di den kiri na grontapoe.”
21. San foeroe opregti sma e doe te den e si a difrenti na mindri a fasi fa Jehovah en pipel e tjari densrefi èn a fasi fa den wan di e hori densrefi na falsi relisi, e tjari densrefi?
21 Tra fasi leki den relisi foe krestenhèit nanga a tra pisi foe Babilon a Bigiwan, a troe relisi na wan positief krakti di e tjari sma kon na wán. Jesus Krestes ben taigi den troe bakaman foe en: „Nanga disi ala sma sa sabi taki oenoe na mi disipel, efoe oenoe abi lobi na oen mindri” (Johanes 13:35). A de wan lobi di e pasa den skotoe na nationaal sei, na sociaal sei, na ekonomia sei, èn na a sei foe den ras di e prati tra libisma now. Foe di miljoenmiljoen sma na heri grontapoe si disi, meki den e taigi den salfoe foetoeboi foe Jehovah: „Wi wani go nanga oenoe, foe di wi jere taki Gado de nanga oenoe.” — Sakaria 8:23.
22. Fa wi e si a kotoigiwroko di moesoe doe ete?
22 Wi leki Jehovah en pipel, breiti srefisrefi nanga san doe kaba, ma a wroko no kaba ete. Baka te wan gronman e sai siri èn e kweki den sani di a prani, dan a no e tapoe nanga a wroko. A e tan wroko, spesroetoe na a span pisi foe a kotiten. Kotiten e aksi foe wan sma taki a moesoe meki fajafaja moeiti sondro foe tapoe. Èn nownowde, moro leki oiti na fesi wan moro bigi kotiwroko e doe foe tjari anbegiman foe Jehovah kon makandra. A de wan ten foe prisiri (Jesaja 9:3). A troe taki, wi e kisi foe doe nanga gens èn nanga mi-no-ke fasi. Kande wi srefi e meki moeiti toe foe feti nanga serjoesoe siki, moeilek osofamiri situwâsi, noso problema na ekonomia sei. Ma a lobi gi Jehovah e boeweigi wi foe horidoro. A boskopoe di Gado gi wi, na wan sani di sma moesoe jere. Ija, a de wan boskopoe foe vrede. A de a boskopoe di Jesus srefi ben preiki — a boen njoensoe foe a Kownoekondre foe Gado.
San joe e piki?
◻ Sortoe kontroe Jesaja 52:7 ben abi na tapoe na owroeten Israèl?
◻ Fa Jesus ben sori foe de a moro bigi boskopoeman foe vrede?
◻ Fa na apostel Paulus ben sori san Jesaja 52:7 abi foe doe nanga a wroko di kresten e doe?
◻ San a wani taki toe foe de boskopoeman foe vrede na ini wi ten?
[Prenki na tapoe bladzijde 13]
Neleki Jesus, na so Jehovah Kotoigi de boskopoeman foe a vrede foe Gado
[Prenki na tapoe bladzijde 15]
Jehovah Kotoigi e tan soekoe vrede awansi san sma e doe na tapoe a Kownoekondre boskopoe