Te pina no sa de moro
PINA no ben de wan pisi foe a fosi prakseri foe Gado gi a libisma famiri. A no en ben kon nanga na idea, èn a no wani dati toe. ’Efoe na so a de’, joe e aksi kande, ’fa a ben bigin, èn foe san ede Gado gi dati pasi foe tan te now ete?’ — Teki gersi Jakobus 1:13.
A piki de foe feni na ini a fosi sani di skrifi foe a libisma historia, bijbel, èn spesroetoe a boekoe Genesis. A e taki dati wi fosi papa nanga mama, Adam nanga Eva, ben waka na baka Satan Didibri na ini a opo di a ben opo ensrefi teige Gado. A fasi fa den ben handri ben opo prenspari aksi di ben kroetoe a troetroe fondamenti foe na universeel wet nanga ordroe. Di den ben teki a reti foe bosroiti gi densrefi san boen èn san ogri, dan den ben tjalansi a soevereiniteit foe Gado. Den ben tweifri efoe a abi a reti foe tiri èn efoe en na a wan-enkri sma di moesoe kroetoe san „boen nanga ogri”. — Genesis 2:15-17; 3:1-5.
Foe san ede a no gebroiki en makti wantewante foe meki den doe en wani?
’Ija, foe san ede Gado no gebroiki en makti wantewante foe meki den doe en wani?’, joe e aksi kande. Gi foeroe sma a gersi wan makriki afersi. ’Gado ben abi a makti. A ben sa moesoe gebroiki en foe pori den sma di ben opo densrefi teige en’, den e taki (Psalm 147:5). Ma aksi joesrefi disi: ’Mi e agri wantewante nanga ala sma di e gebroiki moro hei makti foe meki tra sma doe a wani foe den? Mi no e tegoe wantewante te wan diktator e gebroiki kiri-legre foe kiri den feanti foe en?’ Moro foeroe sma di abi boen froestan e skreki foe so wan sani.
’Ke’, joe e taki, ’ma efoe Gado ben gebroiki a makti dati, dan no wan sma ben sa tweifri na sani di a doe.’ Joe de seiker? A no de so, taki sma e tweifri na a fasi fa Gado e gebroiki en makti? Den e aksi densrefi foe san ede a no gebroiki en makti son tron, soleki te a e gi pasi meki ogridoe de. Èn den e aksi densrefi foe san ede a gebroiki en na tra okasi. Srefi Abraham di ben de getrow ben abi wan problema nanga a fasi fa Gado ben gebroiki En makti teige den feanti foe En. Memre di Gado ben teki a bosroiti foe pori Sodom. Na wan fowtoe fasi Abraham ben frede taki den boen sma ben sa dede makandra nanga den ogriwan. A ben bari: „Mi no man denki taki joe e handri na a fasi disi, foe kiri a regtfardiki man nanga a godelowsoewan” (Genesis 18:25). Srefi sma di abi wan boen froestan, soleki Abraham, abi a djaranti fanowdoe taki a sma di abi ala makti no sa gebroiki dati na wan fowtoe fasi.
A no de foe taki, dati Gado ben kan pori Adam, Eva, nanga Satan wantewante. Ma prakseri fa dati ben kan abi krakti na tapoe den tra engel noso den tra mekisani di ben moesoe kon ete, di ben sa kon sabi baka ten san a ben doe. Disi ben sa kan meki den tan abi froeferi aksi di abi foe doe nanga a joisti fasi fa Gado e tiri? Disi no ben sa opo na okasi foe kroetoe Gado taki a ben de, foe taki en leti, wan sortoe ogri tiriman di abi ala makti, soleki fa Nietzsche ben kari en, wan Gado di sondro sari e kiri ibri sma di e gens en?
Foe san ede a no e dwengi sma foe doe san boen?
’Gado no ben kan dwengi sma nomo foe doe san boen?’ son sma kan aksi. We, prakseri foe disi toe. Na ini a heri historia, den tirimakti proeberi foe dwengi sma foe denki na a fasi fa den e denki. Wan toe tirimakti noso wan toe aparti tiriman doe difrenti sani foe basi a froestan foe tra sma, kande nanga jepi foe drug noso nanga oparâsi, èn na so fasi den e poeroe a moi presenti di sma kisi foe man bosroiti sani gi densrefi. Wi no warderi en taki wi abi wan fri wani, srefi efoe wi kan mesbroiki a presenti dati di wi kisi? Wi e tapoe wi ai gi a proeberi di wan tirimakti noso wan tiriman ben sa proeberi foe poeroe a fri dati di wi abi?
Sortoe tra sani ben de foe doe dan, boiti taki Gado ben kan gebroiki en makti wantewante foe dwengi sma foe hori a wet? Jehovah Gado ben teki a bosroiti taki a moro boen fasi fa foe handri nanga a opo di sma ben opo densrefi teige en, ben sa de foe gi den sma di ben trowe den wet foe en na okasi gi wan pisi ten, sondro taki den abi foe gi jesi na a tiri foe en. Disi ben sa gi a libisma famiri, di kon foe Adam nanga Eva, na okasi gi wan pisi ten nomo foe tiri densrefi sondro foe saka densrefi na ondro a wet foe Gado. Foe san ede a ben doe disi? Bika a ben sabi taki, baka wan pisi ten, krinkrin boeweisi ben sa kon moro foeroe, di ben sa boeweisi taki a fasi fa en e tiri de ala ten a moro boen wan èn a moro regtfardiki wan, srefi te a e gebroiki en makti di no abi kaba, foe dwengi sma foe doe en wani, èn taki ibri sma di e opo ensrefi teige En, oiti sa kisi rampoe. — Deuteronomium 32:4; Job 34:10-12; Jeremia 10:23.
Fa a de nanga ala den sma di no doe noti, ma tokoe e ondrofeni pina?
’Na a srefi ten, fa a de nanga ala den sma di no doe noti, ma tokoe e ondrofeni pina’?, joe e aksi kande. ’A de troetroe fanowdoe taki den e firi pen soso foe boeweisi wan penti foe wet?’ We, Gado no gi pasi meki ogri de, soso foe boeweisi wan penti foe a wet di no de krin foe froestan. Na a tra sei, a de foe sori krinkrin a prenspari waarheid taki en wawan na a soeverein èn taki a de prenspari foe gi jesi na den wet foe en so taki ala den sani di a meki kan abi doronomo vrede nanga kolokoe.
Wan toemoesi prenspari sani foe hori na prakseri na taki Gado sabi taki a kan poeroe krinkrin ala ogri di disi kan doe a libisma famiri. A sabi taki te foe kaba, a sjatoe ten foe pen èn pina sa tjari winimarki kon. Prakseri foe a mama di e hori en pikin steifi ala di a datra e spoiti a pikin nanga wan vaccine foe kibri a pikin teige wan siki di ben sa kan kiri a pikin efoe a no ben kisi dati. No wan mama wani foe en pikin firi pen. No wan datra wani meki en sikisma e pina. Na a momenti dati, a pikin no e froestan foe san ede a e firi pen, ma baka ten a sa froestan foe san ede den ben gi pasi gi dati.
Troetroe trowstoe gi den sma di e pina?
Son sma e denki kande taki foe sabi den sani disi wawan, kan gi pikinso trowstoe nomo na den sma di e pina. Hans Küng e taki dati wan krin froeklari gi a reide foe san ede pina de, „no de wan jepi gi wan sma di e pina, neleki fa a no de wan jepi te joe e hori wan lezing foe sori a fasi fa njanjan meki, gi wan man di e dede foe angri”. A e aksi: „Ala koni taki-go-taki-kon foe a pina di sma e pina, troetroe kan gi libisma, di pikinmoro no sabi san foe doe moro nanga a pina di den e pina, deki-ati?” We, ala „koni taki-go-taki-kon” foe libisma di e weigri foe arki a Wortoe foe Gado, bijbel, no gi deki-ati na den sma di e pina. Den sortoe taki-go-taki-kon foe libisma ben meki soso moro problema kon, foe di den e taki dati a ben de a prakseri foe Gado taki libisma e pina èn taki a grontapoe ben meki foe de leki wan lagipresi di foeroe nanga watra-ai, noso leki wan presi foe tesi sma foe si soema sa kisi libi na ini hemel te foe kaba. Disi e pori Gado nen troetroe!
Tokoe bijbel srefi e gi troetroe trowstoe. A no e gi a srefi froeklari nomo foe san ede pina de, ma a e bow froetrow toe na ini a seiker pramisi foe Gado taki a sa poeroe ala ogri di kon nanga a gi di a gi pasi meki pina de gi wan sjatoe pisiten.
A ’kon di ala sani sa kon boen baka’
Heri esi na ini a ten disi, Gado sa meki den sani kon boen baka na a fasi fa a ben prakseri taki den ben moesoe de, bifo den fosi libisma di a ben meki ben opo densrefi teige en. A fasti ten di a ben gi so taki libisma kan tiri densrefi sondro foe gi en frantiwortoe, pikinmoro kon na wan kaba. Wi e libi na ini a ten te a sa seni „Jesus go, di moesoe tan na hemel srefi teleki ten te ala den sani kon boen baka, foe san Gado ben taki nanga jepi foe a mofo foe en santa profeiti foe owroeten.” — Tori foe den Apostel 3:20, 21.
San Jesus Krestes sa doe? A sa poeroe ala den feanti foe Gado na grontapoe (2 Tesalonikasma 1:6-10). A no sa kiri den esi-esi, soleki fa den libisma ogri-ati tiriman e doe dati. Den kefalek foeroe boeweisi di e sori den kefalek takroe bakapisi foe a tiri di libisma e tiri na wan fowtoe fasi, sa sori taki Gado abi ala reti foe gebroiki a makti foe en di no abi kaba, foe meki sma doe en wani (Openbaring 11:17, 18). Na ini a bigin disi sa wani taki „banawtoe” soleki fa noiti grontapoe ben ondrofeni, wan srefi sortoe, ma tokoe wan moro bigiwan leki a Froedoe foe den dei foe Noa (Mateus 24:21, 29-31, 36-39). Den sma di sa libi pasa a „bigi banawtoe” disi, sa ondrofeni „ten di e gi kowroe-ati” te den sa si a kontroe foe ala den pramisi di Gado ben doe „nanga jepi foe a mofo foe den santa profeiti foe en” (Tori foe den Apostel 3:19; Openbaring 7:14-17). San Gado pramisi?
We, den owroeten profeiti foe Gado e taki dati wan kaba sa kon na a pina di feti nanga kiri e tjari kon. Foe eksempre, Psalm 46:9 e taigi wi: „A e meki feti kon na wan kaba te na a moro farawe presi foe grontapoe.” No wan sma sa de moro di e pina ala di a doe noti èn no wan loweman sa de moro di de ini sari situwâsi, èn so srefi no wan sma sa abi seks nanga trawan nanga tranga moro, no wan lan sma sa de moro, èn no wan sma sa dede na ini takroe feti! A profeiti Jesaja e taki: „Nâsi no sa opo feti-owroe teige nâsi, so srefi den no sa leri feti moro.” — Jesaja 2:4.
Den profeiti e taki na fesi toe taki wan kaba sa kon na a pina di e kon foe ogri di doe nanga tranga èn foe kroektoedoe. Odo 2:21, 22 e pramisi taki „den opregti sma sa tan na grontapoe” èn taki den sma di e gi sma pen èn e meki sma pina, „den sa hari den poeroe foe en”. Sma no sa „tiri tapoe a tra libisma [moro] nanga ogri bakapisi gi en” (Preikiman 8:9). Ala den godelowsoewan den sa poeroe gowe foe têgo (Psalm 37:10, 38). Ibri sma sa man foe libi na ini vrede nanga seikerfasi, sondro pina. — Mika 4:4.
Moro fara, den profeiti e pramisi toe taki wan kaba sa kon toe na pina di e kon foe siki na skin sei nanga na emotioneel sei. (Jesaja 33:24). Jesaja e pramisi taki den breniwan, den dofoewan, den malengriwan, èn den alamala di abi problema nanga siki, sa kon betre (Jesaja 35:5, 6). Gado sa drai den bakapisi foe dede baka. Jesus ben taki na fesi taki „ala sma di de na ini den memre-grebi, sa jere en sten èn sa kon na doro” (Johanes 5:28, 29). Na ini en fisjoen foe „wan njoen hemel èn wan njoen grontapoe” na apostel Johanes ben kisi foe jere taki „Gado srefi . . . sa figi poeroe ala watra na den ai, èn dede no sa de moro, no wan sari, no wan babari, no wan pen no sa de moro” (Openbaring 21:1-4). Prakseri foe dati! No wan pen, no wan watra-ai, no wan babari, no wan dede — no wan pina sa de moro!
Awansi sortoe rampoe feni presi na ini a pisi ten disi di Gado gi pasi meki ogridoe de, tokoe ala sani sa kon boen baka. Srefi a memre di sma kan memre a pen èn a pina foe den — di noiti ben de a prakseri foe Gado — sa figi poeroe krinkrin. „Sma sa frigiti den fositen banawtoe troetroe . . . Sma no sa memre den sani foe fositen moro”, Jesaja ben taki na fesi (Jesaja 65:16, 17). A fosi prakseri di Gado ben abi gi wan volmaakti libisma famiri di e libi na ini dorodoro vrede nanga kolokoe na ini wan paradijs na grontapoe, sa kon troe krinkrin (Jesaja 45:18). Sma sa abi froetrow na ini a soevereiniteit foe en dorodoro. A sa de wan bigi grani foe libi na ini a ten dati te Gado sa tjari wan kaba kon na ala a pina foe libisma, wan ten te a e sori taki en no de wan sortoe „ogri tiriman, bedrigiman, koriman, kiriman”, soleki fa Nietzsche ben froeklari, ma taki ala ten a abi lobi, koni, èn a regtfardiki na ini a fasi fa a e gebroiki ala a makti di a abi!
[Prenki na tapoe bladzijde 5]
Wan toe tiriman doe sani foe basi a froestan foe tra sma, èn na so fasi den e poeroe a teki di den sma disi man teki bosroiti gi densrefi
[Sma di abi a reti foe a prenki]
UPI/Bettmann
[Prenki na tapoe bladzijde 7]
Te pina no de moro, dan ala sma sa njan boen foe a libi dorodoro