Den ben doe a wani foe Jehovah

Jesus ben kisi prèise leki Mesias èn Kownoe!

NA IPI sma di ben meki babari èn di ben e kon na Jerusalem tapoe 9 Nisan, 33 G.T., ben froewondroe foeroe Judeasma. Ala di a no ben de wan freimde sani foe si sma e kon na ini groepoe na ini a foto bifo a Paska, tokoe a ben de tra fasi nanga den fisitiman disi. A moro prenspari sma na den mindri ben de wan man di ben e rei na tapoe a pikin foe wan boeriki. A man ben de Jesus Krestes, èn den sma ben e poti krosi nanga taki foe palmbon na en fesi na gron ala di den e bari: „Froeloesoe grantangi, a Manpikin foe David! Blesi foe a sma di e kon na ini a nen foe Jehovah! Froeloesoe en grantangi, na ini den hei presi na tapoesei!” Di den ben si na ipi sma, na ati foe foeroe sma di ben de kaba na Jerusalem ben boeweigi den foe moksi densrefi nanga a groepoe sma di ben e waka. — Mateus 21:7-9; Johanes 12:12, 13.

Ala di a ben kisi prèise now, Jesus ben sabi taki tesi ben wakti en. Ija, na ini feifi dei nomo, den ben sa kiri en na ini a srefi foto disi! Ija, Jesus ben sabi taki Jerusalem ben de wan feanti gebied, èn nanga a sani dati na prakseri, a ben sreka sani foe kon opo-opo na ini a foto.

Wan owroeten profeititori ben kon troe

Na ini 518 b.G.T., Sakaria ben taki na fesi foe a kon di Jesus ben sa kon na ini Jerusalem leki wan winiman. A ben skrifi: „Prisiri pasa marki, o joe oemapikin foe Jerusalem. Loekoe! Joe kownoe srefi e kon na joe. A de regtfardiki, ija, a kisi froeloesoe; a abi sakafasi èn a e rèi na tapoe wan boeriki, srefi na tapoe wan meti di bigi kaba, a manpikin foe wan oemaboeriki. . . . Èn foe troe a sa taki foe vrede nanga den nâsi; èn a tirimakti foe en sa de foe se te kon miti se èn foe a Liba te na a kabapisi foe grontapoe.” — Sakaria 9:9, 10.

Na so a kon di Jesus ben e kon na ini Jerusalem tapoe 9 Nisan, ben meki bijbel profeititori kon troe. A no ben de wan sani di ben feni presi foe ensrefi, ma a ben de wan sani di ben prakseri boen na fesi. Bifo dati, leti dorosei foe Jerusalem, Jesus ben gi toe foe den disipel foe en a komando: „Go na ini a dorpoe di oenoe e si na oen fesi, èn wantewante oenoe sa feni wan oemaboeriki di tai, nanga wan pikin na en sei; loesoe den èn tjari den kon na mi. Èn efoe wan sma e taigi oenoe wan sani, dan oenoe moesoe taki: ’Masra abi den fanowdoe.’ Dan a sa seni den kon wantewante” (Mateus 21:1-3). Ma foe san ede Jesus ben wani rei go na ini Jerusalem na tapoe wan boeriki, èn san a fasi fa na ipi ben handri, ben wani taki?

Wan boskopoe di abi foe doe nanga a posisi foe wan kownoe

Wan sani di sma kan si, abi foeroe tron moro krakti leki san sma e taki. Foe dati ede, wan toe leisi Jehovah ben meki den profeiti foe en demo a boskopoe foe den, foe man poti moro krakti na tapoe a profeitis boskopoe (1 Kownoe 11:29-32; Jeremia 27:1-6; Esekièl 4:1-17). A fasi disi foe abi komunikâsi, di sma man si krinkrin nanga ai, ben abi wan tranga krakti na tapoe a froestan foe srefi den moro tranga-ati sma di e loekoe. Na wan srefi sortoe fasi, Jesus ben tjari wan krakti boskopoe di a ben e rei na tapoe wan boeriki kon na ini a foto Jerusalem. Fa?

Na ini bijbel ten den ben gebroiki a boeriki gi sani di abi foe doe nanga sma di abi hei posisi. Foe eksempre, Salomo ben rei na tapoe na „oema muilboeriki” foe en papa, wan pikin foe wan asi nanga wan man boeriki, foe meki den salfoe ena (1 Kownoe 1:33-40). So boen, te Jesus ben sa rei na tapoe wan boeriki go na Jerusalem, dan dati ben sa wani taki dati a ben sori ensrefi leki wan kownoe. A fasi fa na ipi ben handri ben poti krakti na tapoe a boskopoe disi. A groepoe, di seiker ben abi moro foeroe Galileasma na ini, ben panja den krosi foe den na fesi foe Jesus — wan sani di e memre wi na a meki di sma ben meki bekènti na poebliki taki Jehu ben tron kownoe (2 Kownoe 9:13). A taki di den ben taki foe Jesus leki „a Manpikin foe David” ben poti krakti na tapoe a reti di a abi foe tiri, soleki fa a wet ben sori (Lukas 1:31-33). Èn a gebroiki di den ben gebroiki den taki foe palmbon, ben sori a saka di den ben e saka densrefi na ondro a tirimakti foe en leki kownoe. — Teki gersi Openbaring 7:9, 10.

So boen, a groepoe sma di ben waka kon na ini Jerusalem tapoe 9 Nisan, ben gi a krinkrin boskopoe taki Jesus ben de a Mesias èn Kownoe di Gado ben poti na wroko. A no de foe taki, a no ala sma ben breiti foe si taki Jesus ben sori ensrefi na a fasi disi. Spesroetoe den Fariseiman ben prakseri taki a no e fiti srefisrefi taki Jesus ben kisi so wan kownoe grani. „Leriman”, den ben aksi, èn seiker nanga atibron na ini den sten, „piri-ai gi den disipel foe joe”. Jesus ben piki: „Mi e taigi oenoe: Efoe den disi ben sa tan pî, dan den ston ben sa bari taki” (Lukas 19:39, 40). Ija, Gado Kownoekondre ben de a thema foe a preikiwroko foe Jesus. Sondro foe frede a ben sa meki a boskopoe disi bekènti, awansi sma ben sa teki a boskopoe ofoe no.

Lès gi wi

Foeroe deki-ati ben de fanowdoe gi Jesus foe go na ini Jerusalem na a fasi fa a profeiti Sakaria ben taki na fesi. A ben sabi taki te a ben sa doe dati, a ben tjari na atibron foe den feanti foe en kon na en tapoe. Bifo a ben opo go na hemel, Jesus ben komanderi den bakaman foe en foe preiki a boen njoensoe foe Gado Kownoekondre èn foe „meki disipel foe sma foe ala nâsi” (Mateus 24:14; 28:19, 20). Deki-ati de fanowdoe toe foe doe a wroko disi. A no ala sma e breiti foe jere a boskopoe. Son sma no e span nanga en, ala di trawan e gens en. Wan toe tirimakti ben poti wet teige a preikiwroko noso ben tapoe en krinkrin.

Ma tokoe Jehovah Kotoigi e froestan taki a boen njoensoe foe a Kownoekondre foe Gado di seti kaba, moesoe preiki, awansi sma e arki noso den e weigri foe arki (Esekièl 2:7). Ala di den e go doro foe doe a wroko disi di e froeloesoe libi, den e kisi froetrow foe a pramisi di Jesus ben doe: „Loekoe! mi de nanga oenoe ala den dei te na a kaba foe a seti foe sani.” — Mateus 28:20.

[Foetoewortoe]