Foe san ede wondroe wawan no e meki wan sma e bribi
SI, NA bribi. Na so foeroe sma e prakseri. Son sma e taki dati den ben sa bribi na ini Gado efoe a ben sa sori ensrefi na wan wondroe fasi. Kande dati de so, ma so wan overtoigi ben sa meki wan sma abi troetroe bribi?
Loekoe den Israèlsma Korak, Datan, nanga Abiram. Bijbel e sori taki den ben de drape èn ben si den wondroe disi foe Gado di e meki sma abi frede na wan lespeki fasi: den tin plaag di ben kon na tapoe Egipti, a lowe di a nâsi Israèl ben lowe pasa a Redi Se, èn a kiri di Gado ben kiri a Farao foe Egipti èn den sroedati legre foe en (Exodus 7:19–11:10; 12:29-32; Psalm 136:15). Korak, Datan, nanga Abiram ben jere Jehovah e taki toe komoto na hemel, na a bergi Sinai (Deuteronomium 4:11, 12). Tokoe, no langa na baka di den wondroe disi ben feni presi, dan den dri man ben bigin soetoe faja gi wan oproeroe teige Jehovah èn den foetoeboi foe en di a poti na wroko. — Numeri 16:1-35; Psalm 106:16-18.
Pikinmoro 40 jari na baka, wan profeiti di ben nen, Bileam, ben de kotoigi toe foe wan wondroe. Srefi a kon di engel ben kon ini a tori, no ben man tapoe en foe teki a sei foe den feanti foe Gado, den Moabietsma. Ala di a wondroe dati ben feni presi, tokoe Bileam ben go doro èn ben teki sei teige Jehovah Gado èn En pipel (Numeri 22:1-35; 2 Petrus 2:15, 16). Ma a abi di Bileam no ben abi bribi, ben de noti te joe teki en gersi di foe Judas Iskariòt. Ala di a ben de wan krosibei kompe foe Jesus èn a ben de wan kotoigi foe boen foeroe difrenti sortoe wondroe, tokoe Judas ben tori Krestes gi dritenti pisi solfroe moni. — Mateus 26:14-16, 47-50; 27:3-5.
Den djoe relisi fesiman ben sabi so srefi den foeroe wondroe di Jesus ben doe. Baka di a ben gi Lasarus wan opobaka, den ben erken srefi: „A man disi e doe foeroe marki.” Ma a si di den ben si taki Lasarus e libi now, ben safoe na ati foe den èn ben gi den bribi? Nôno, kwetikweti. Na presi foe dati den ben meki triki plan foe kiri Jesus nanga Lasarus! — Johanes 11:47-53; 12:10.
Srefi di Gado ben kon langalanga ini a tori, tokoe dati no ben meki den godelowsoe man dati e bribi. Ala di Jesus ben de na ini a kontren foe a tempel wan leisi, a ben begi tranga: „Tata, gi joe nen glori.” Jehovah ben piki nanga wan sten di komoto na hemel: „Mi ben gi en glori kaba èn mi sa gi en glori baka.” Tokoe a wondroe dati di ben feni presi, no ben poti bribi na ini na ati foe den sma di ben de drape. Bijbel e taki: „Ala di a ben doe so foeroe marki na den fesi, den no ben e poti bribi na ini en.” — Johanes 12:28-30, 37; teki gersi Efeisesma 3:17.
Foe san ede wondroe no e gi bribi
Fa a kan taki ala di so foeroe wondroe ben doe, tokoe bribi no ben de? Na erken di den djoe relisi fesiman no ben wani erken Jesus, ben de wan spesroetoe froewondroe sani te joe e prakseri taki na a ten di a ben bigin nanga en diniwroko, den djoe leki wan groepoe ben „froewakti” a „Krestes”, noso a Mesias (Lukas 3:15). Ma a problema ben de den sani di den ben froewakti. Wan skrifiman foe wortoeboekoe, W. E. Vine e skrifi san wan boen bekènti bijbel sabiman ben taki, dati den djoe ben abi tranga idea foe wan Mesias di ben sa meki den djoe „wini grontapoe” èn ben sa meki a „libi waka boen gi den na materia sei”. So boen, den no ben de klariklari gi Jesus foe Nasaret di abi sakafasi èn di no e boemoei nanga politiek, èn di ben kon na den mindri leki a troe Mesias na ini 29 G.T. Den relisi fesiman ben frede toe taki den leri foe Jesus ben sa broeja a fasi fa a libimakandra ben seti èn taki a ben sa tjari a prenspari posisi foe den kon ini kefar (Johanes 11:48). A denki di den ben abi kaba na fesi èn a prakseri di den ben prakseri densrefi nomo, ben breni den gi den sani di den wondroe foe Jesus ben wani taki.
Baka ten, den djoe relisi fesiman nanga tra sma, ben trowe den wondroe boeweisi taki Gado ben feni den bakaman foe Jesus boen. Foe eksempre, di den apostel foe en ben dresi wan man di ben malengri foe sensi a ben gebore, dan den atibron memre foe a djoe hei kroetoebangi ben aksi: „San wi moesoe doe nanga den man disi? Bika, a de troe taki wan prenspari marki ben feni presi nanga jepi foe den, di ala den sma di e tan na Jerusalem ben si, èn wi no kan taki dati a no troe. Ma tokoe, so taki a no panja moro fara, na mindri a pipel, meki wi tapoe skreki gi den foe no taki moro tapoe gron foe a nen disi nanga no wan sma” (Tori foe den Apostel 3:1-8; 4:13-17). A de krin taki a kefalek moi wondroe disi no ben poti bribi na ini na ati foe den man dati.
Na angri di sma abi gi makti, a bigimemre foe den, nanga gridi fasi, na sani di boeweigi foeroe sma foe tranga na ati foe den. Disi ben sori foe de a kefal nanga Korak, Datan, nanga Abiram, di wi ben kari kaba na ini a bigin. Djaroesoefasi, frede, èn wan lo tra takroe eigifasi hendri tra sma. Wi e memre so srefi den tranga-jesi engel, den ogri jeje, di ben abi a grani wan ten foe si a fesi foe Gado srefi (Mateus 18:10). Den no e tweifri taki Gado de. Ija, „den ogri jeje e bribi èn e beifi” (Jakobus 2:19). Tokoe den no abi bribi na ini Gado.
San troetroe bribi wani taki
Bribi na moro leki overtoigi nomo. A de so srefi moro leki wan sjatoe emotioneel fasi fa sma e handri na tapoe wan wondroe. Hebrewsma 11:1 e taki: „Bribi na a seiker froewakti foe sani di wan sma e howpoe na tapoe, a krin boeweisi foe troe sani, ma di sma no e si.” Wan sma di abi bribi, abi na overtoigi na ini en ati taki ala sani di Jehovah Gado e pramisi, kon troe kaba, foe taki en so. Boiti dati, a seiker boeweisi foe troetori di wi no man si ete, de so krakti taki sma e taki dati bribi na a srefi leki boeweisi. Ija, bribi abi en gron tapoe boeweisi. Èn na ini a ten di pasa, den wondroe ben plèi wan ròl foe meki bribi gro noso foe meki a kon moro tranga. Den marki di Jesus ben doe, ben de foe overtoigi tra sma taki en ben de a Mesias di Gado ben pramisi (Mateus 8:16, 17; Hebrewsma 2:2-4). Na a srefi fasi, den presenti disi foe Gado santa jeje, noso wroko krakti, soleki a dresi di den ben dresi sma nanga jepi foe wondroe èn a taki di sma ben taki na ini tongo, ben boeweisi taki Jehovah no ben feni den djoe boen moro, ma taki a boen-ati foe en ben de now na tapoe a kresten gemeente, di en Manpikin, Jesus Krestes, ben seti. — 1 Korentesma 12:7-11.
Wan foe den wondroe fasi fa a ben gi en jeje, ben de taki a ben meki sma man profeteri. Te sma di no e bribi ben si a wondroe disi, dan wan toe foe den ben kisi a firi foe anbegi Jehovah, èn ben e froeklari: „Gado de troetroe na oenoe mindri” (1 Korentesma 14:22-25). Ma Jehovah Gado no ben abi na prakseri taki wondroe ben sa de wan marki foe a kresten anbegi ala ten. Na so na apostel Paulus ben skrifi: „Awansi presenti foe profeteri de, den sa kon na wan kaba; awansi tongo de, den sa tapoe den” (1 Korentesma 13:8). Soleki fa den boeweisi e sori, dan den presenti disi ben tapoe na a dede foe den apostel èn foe den sma di ben kisi den presenti disi nanga jepi foe den apostel.
Sma no ben sa abi wan fondamenti foe bribi dan? Nôno, bika Paulus ben taki: „[Gado] no ben gi kotoigi foe ensrefi foe di a ben doe boen, foe di a e gi oenoe alen foe hemel nanga boen jariten, èn foe di a e foeroe oen ati bogobogo nanga njanjan èn nanga bigi prisiri” (Tori foe den Apostel 14:17). Ija, gi reti-ati sma di wani opo a froestan èn na ati foe den gi den boeweisi di de lontoe wi, „den eigifasi foe en [Jehovah Gado] di sma no kan si nanga ai, de krin foe si sensi di grontapoe meki, bika den de foe si na ini den sani di ben meki, ija, en têgo krakti nanga en makti leki Gado, so taki den [den wan di no e bribi na ini Gado] no man regtfardiki densrefi”. — Romesma 1:20.
A no nofo foe bribi wawan taki Gado de. Paulus ben gi a tranga: „Stòp foe kon de leki a seti foe sani disi, ma kon kenki foe di oenoe e kenki oen prakseri, so taki oenoe kan ondrosoekoe èn si gi oensrefi san na a boen, switi èn volmaakti wani foe Gado” (Romesma 12:2). Wi kan doe disi te wi e studeri den Boekoe foe bijbel fajafaja, nanga a jepi foe den kresten poeblikâsi, soleki a tijdschrift disi. Bribi di abi en gron tapoe a soifri sabi foe Gado Wortoe, bijbel, no swaki. Den sma di kon sabi a wani foe Gado èn di e doe en na ini bribi, e doe santa diniwroko gi Gado. — Romesma 12:1.
Bribi, sondro foe si
Na apostel Tomas ben abi problema foe bribi taki Jesus ben opo baka na dede. „Efoe mi no si a marki foe den spikri na ini en anoe èn mi no soetoe mi finga na ini a marki di den spikri libi na baka èn mi no soetoe mi anoe na ini en seibere, dan mi no sa bribi kwetikweti”, Tomas ben froeklari. Di baka ten Jesus ben teki wan libisma skin di ben abi den soromarki foe a spikri di den ben spikri en na wan postoe, dan Tomas ben handri boen na tapoe a wondroe disi. Ma Jesus ben taki: „Kolokoe foe den sma di no e si èn tokoe e bribi.” — Johanes 20:25-29.
Na ini a ten disi, miljoenmiljoen Jehovah Kotoigi e „waka na ini bribi, no nanga a si foe sani” (2 Korentesma 5:7). Ala di den no ben si den wondroe di skrifi na ini bijbel, tokoe den e bribi tranga taki den ben feni presi. Den Kotoigi abi bribi na ini Gado èn na ini en Wortoe. Nanga a jepi foe en jeje, den man foe froestan den sani di bijbel e leri èn a moro prenspari thema foe bijbel — a regtfardiki di a soevereinfasi foe Jehovah Gado moesoe regtfardiki nanga jepi foe en hemel Kownoekondre (Mateus 6:9, 10; 2 Timoteus 3:16, 17). Nanga foeroe wini gi densrefi, den troetroe kresten disi e gebroiki a koni rai foe bijbel na ini den libi (Psalm 119:105; Jesaja 48:17, 18). Den e erken a boeweisi, di sma no man sori tra fasi, taki den bijbel profeititori de wan marki taki a ten foe wi na „den lasti dei”, èn den abi bribi taki a njoen grontapoe di Gado pramisi, de heri krosibei (2 Timoteus 3:1-5; Mateus 24:3-14; 2 Petrus 3:13). A de wan prisiri gi den foe prati a sabi foe Gado nanga tra sma (Odo 2:1-5). Den sabi taki a de soso nanga jepi foe wan studie foe den Boekoe foe bijbel taki den sma di e soekoe Gado, kan feni en troetroe. — Tori foe den Apostel 17:26, 27.
Joe e memre Albert ete, di wi ben kari na ini a fosi artikel? Wan toe dei na baka di a ben begi gi wan wondroe di a no ben kisi, a ben kisi fisiti foe wán foe den Jehovah Kotoigi, wan owroe oema di ben libi wan toe bijbel poeblikâsi na baka gi en. Baka dati, Albert ben teki wan fri oso-bijbelstudie. Ala di a ben e leri sabi a bijbel boskopoe moro boen, a lasi-ati foe en ben kon tron prisiri. A ben kon froestan taki tokoe a ben feni Gado.
Den Boekoe foe bijbel e gi a tranga: „Soekoe Jehovah oen pipel, ala di oenoe kan feni en. Kari en, ala di a sori foe de krosibei” (Jesaja 55:6). Joe kan doe disi, no foe di joe e wakti tapoe wan disiten wondroe foe Gado, ma foe di joe e teki soifri sabi foe en Wortoe. Disi de prenspari, bika wondroe wawan no e tranga bribi.
[Prenki na tapoe bladzijde 5]
Srefi na kisi di Lasarus ben kisi wan opobaka na wan wondroe fasi, no ben boeweigi den feanti foe Jesus foe sori bribi
[Prenki na tapoe bladzijde 7]
Bribi moesoe gron tapoe a soifri sabi foe bijbel