Kisi froeloesoe foe go na ini wan regtfardiki njoen grontapoe
„Èn foe troe den sa feni switi prisiri na ini vrede pasa marki.” — PSALM 37:11.
1, 2. (a) Fa a froeloesoe di Jehovah sa gi na ini a ten foe wi, sa difrenti foe a fasi fa a ben froeloesoe sma na ini owroeten? (b) Na ini sortoe grontapoe Jehovah sa tjari a pipel foe en?
JEHOVAH na wan Gado foe froeloesoe. Na ini owroeten, a ben froeloesoe a pipel foe en na foeroe okasi. Den froeloesoe disi ben de foe wan sjatoe pisi ten, bika no wan leisi Jehovah ben tjari en têgo kroetoe kon na tapoe a heri grontapoe foe Satan. Ma na ini wi ten, Jehovah sa tjari a moro bigi froeloesoe foe alaten kon djonsro gi den foetoeboi foe en. A leisi disi, a sa pori ibri pisi foe a sistema foe Satan na heri grontapoe, èn a sa tjari den foetoeboi foe en go na ini wan têgo regtfardiki njoen grontapoe. — 2 Petrus 2:9; 3:10-13.
2 Jehovah e pramisi: „Ete wan sjatoe ten, èn na ogriwan no sa de moro . . . Ma den safri-ati sma sa abi grontapoe, èn foe troe den sa feni switi prisiri na ini vrede pasa marki” (Psalm 37:10, 11). O langa? „Na den regtfardiki sma sa abi grontapoe, èn den sa libi na tapoe foe têgo” (Psalm 37:29; Mateus 5:5). Ma fosi dati e pasa, a grontapoe disi sa kon na ini a moro bigi pisi ten foe broeja leki oiti ben de.
A „bigi banawtoe”
3. San Jesus ben taki foe a „bigi banawtoe”?
3 Na ini 1914, a grontapoe disi ben kon na ini en „lasti dei” (2 Timoteus 3:1-5, 13). Now wi de 83 jari na ini a pisi ten dati èn wi e doro a kaba foe en te, soleki fa Jesus ben taki na fesi, a sani sa pasa di e kon now: „Wan bigi banawtoe sa de, soleki foe sensi a bigin foe grontapoe te now no kon ete, nôno, èn no sa kon moro toe” (Mateus 24:21). Ija, a sa de moro ogri srefi leki a di foe Toe Grontapoefeti, di so wan 50 miljoen sma ben lasi den libi. Fa dati na wan pisi ten di sa seki grontapoe, di e kon krosibei!
4. Foe san ede a kroetoe foe Gado e kon na tapoe „Babilon a Bigiwan”?
4 A „bigi banawtoe” sa kon wantronso, „na ini wán joeroe” (Openbaring 18:10). A bigin foe disi sa de foe si na a kroetoe di Gado sa tjari kon na tapoe ala falsi relisi, di a Wortoe foe Gado e kari „Babilon a Bigiwan” (Openbaring 17:1-6, 15). A moro prenspari marki foe Babilon foe owroeten ben de falsi relisi. Disiten Babilon de neleki na owroeten prenki foe en èn a e agersi a grontapoemakti foe falsi relisi. A plèi leki hoeroe foe di a go wroko makandra nanga den politiek elementi. A horibaka gi den orlokoe foe den èn a blesi legre na ala toe sei, san ben abi leki bakapisi taki sma foe a srefi relisi e kiri makandra (Mateus 26:51, 52; 1 Johanes 4:20, 21). A tapoe en ai gi den kroektoedoe foe den bakaman foe en èn a froefolgoe troe kresten. — Openbaring 18:5, 24.
5. Fa a „bigi banawtoe” e bigin?
5 A „bigi banawtoe” e bigin te den politiek elementi wantronso o doe „Babilon a Bigiwan” ogri. Den „no sa wani si a hoeroe na ai èn den sa gi en pori èn meki a de nanga sososkin, èn den sa njan den pisi foe en skin èn sa bron en nanga faja krinkrin” (Openbaring 17:16). Baka dati, den sma di fosi ben horibaka gi en „sa krei foe en ede èn naki densrefi foe di den e sari foe en ede” (Openbaring 18:9-19). Ma den foetoeboi foe Jehovah froewakti disi langaten kaba, èn den sa bari taki: „Prèise Jah, . . . bika a tjari kroetoe kon na tapoe a bigi hoeroe, di ben pori grontapoe nanga a hoeroedoe foe en, èn a teki refensi gi a broedoe foe den srafoe foe en di de na a anoe foe [a hoeroe].” — Openbaring 19:1, 2.
Den kon doe den foetoeboi foe Gado ogri
6, 7. Foe san ede den foetoeboi foe Jehovah kan abi froetrow, te sma o kon doe den ogri na ini a „bigi banawtoe”?
6 Te den politiek elementi pori falsi relisi kaba, dan den sa kon foe doe den foetoeboi foe Jehovah ogri. Satan, „Gog foe a kondre foe Magog” e taki na ini wan profeititori: „Mi sa kon na den wan tapoe di abi rostoe, di e tan na ini seikerfasi.” Foe di a e denki taki a kan kisi den makriki, meki a e go na den tapoe nanga „wan bigi sroedati legre . . . , neleki wolkoe di e tapoe a kondre” (Esekièl 38:2, 10-16). A pipel foe Jehovah sabi taki sma no sa man doe den na ogri disi, bika den e froetrow tapoe Jehovah.
7 Di Farao nanga den legre foe en ben denki taki den ben fasi den foetoeboi foe Gado na a Redi Se, dan Jehovah ben froeloesoe a pipel foe en na wan wondroe fasi èn a ben pori den legre foe Egipti (Exodus 14:26-28). Na ini a „bigi banawtoe”, te den nâsi denki taki den fasi a pipel foe Jehovah, dan agen a sa kon foe froeloesoe den na wan wondroe fasi baka: „Tapoe a dei dati . . . mi atibron sa opo kon na ini mi noso. Èn na ini a bigi faja di mi abi, na ini a faja foe mi atibron, mi sa moesoe taki” (Esekièl 38:18, 19). Dan a heimarki foe a „bigi banawtoe” sa de toemoesi krosibei!
8. Sortoe wondroe sani e pasa bifo Jehovah e kiri den godelowsoesma, èn nanga sortoe bakapisi?
8 Na wan seiker momenti, baka te a „bigi banawtoe” e bigin, ma fosi Jehovah e tjari en kroetoe kon na tapoe a tra pisi foe a grontapoe disi, wondroe sani sa pasa. Loekoe a bakapisi di disi sa abi. „Dan a marki foe a Manpikin foe libisma [Krestes] sa kon de foe si na hemel, èn dan ala den lo foe grontapoe sa naki densrefi na ini wan sari krei, èn den sa si a Manpikin foe libisma e kon na tapoe den wolkoe foe hemel nanga krakti èn bigi glori” (Mateus 24:29, 30). „Marki sa de . . . na ini son nanga moen nanga stari, . . . ala di sma e kon weri foe frede ede, èn a froewakti di den e froewakti den sani di sa pasa na a grontapoe pe sma e libi.” — Lukas 21:25, 26.
„A froeloesoe foe oenoe e kon krosibei”
9. Foe san ede den foetoeboi foe Jehovah kan ’opo den ede foe den go na loktoe’ te wondroe sani e pasa?
9 Gi a spesroetoe ten dati, a profeititori foe Lukas 21:28 e fiti. Jesus ben taki: „Te den sani disi e bigin pasa, opo tanapoe leti-opoe èn opo oen ede go na loktoe, bika a froeloesoe foe oenoe e kon krosibei.” Den feanti foe Gado sa beifi foe frede ede, bika den sa sabi taki den wondroe sani di e pasa, e kon foe Jehovah. Ma den foetoeboi foe Jehovah sa prisiri, foe di den sabi taki a froeloesoe foe den e kon krosibei.
10. San a Wortoe foe Gado e taki foe a heimarki foe a „bigi banawtoe”?
10 Dan Jehovah e wai a sistema foe Satan poeroe wan lasti leisi: „Mi sa kroetoe misrefi nanga [Gog], nanga pestsiki èn nanga broedoe; èn wan hebi alen di e soengoe presi èn nanga alen nanga pisipisi ijs, faja nanga swarfoe mi sa meki fadon na tapoe en nanga den troepoe fetiman foe en . . . Èn den sa moesoe sabi taki mi na Jehovah” (Esekièl 38:22, 23). Ala den pisi foe a sistema foe Satan e kisi pori. A heri libimakandra foe sma di no e denki Gado, e kisi pori. Dati na Armagedon, a heimarki foe a „bigi banawtoe”. — Jeremia 25:31-33; 2 Tesalonikasma 1:6-8; Openbaring 16:14, 16; 19:11-21.
11. Foe san ede den foetoeboi foe Jehovah e kisi froeloesoe èn e pasa a „bigi banawtoe” libilibi?
11 Miljoenmiljoen anbegiman foe Jehovah na heri grontapoe sa kisi froeloesoe èn pasa a „bigi banawtoe” libilibi. Den na a „bigi ipi” di komoto „na ala nâsi nanga lo nanga pipel nanga tongo”. Foe san ede den e kisi froeloesoe na so wan fasi di e gi frede? Foe di den e doe ’santa diniwroko [gi Jehovah] dei nanga neti’. Dati meki den e pasa a kaba foe a grontapoe disi libilibi èn den e kon na ini wan regtfardiki njoen grontapoe (Openbaring 7:9-15). So boen, den de kotoigi foe a kontroe foe a pramisi foe Jehovah: „Howpoe tapoe Jehovah èn hori a pasi foe en, èn en sa hei joe so taki joe kan kisi grontapoe. Te den sa koti den godelowsoewan poeroe, dan joe sa si disi.” — Psalm 37:34.
A njoen grontapoe
12. Sortoe sani den sma di e pasa Armagedon libilibi, kan froewakti?
12 Fa dati sa de wan span ten — godelowsoefasi no sa de moro èn a moro moi pisi ten na ini a heri libisma historia sa bigin! (Openbaring 20:1-4) Fa den sma di pasa Armagedon libilibi, sa de Jehovah tangi taki den kon na ini wan moi, krin libimakandra di Gado meki, wan njoen grontapoe, di sa kenki kon tron wan paradijs! (Lukas 23:43) Èn noiti moro den sa abi foe dede! (Johanes 11:26) Ija, foe bigin nanga a ten dati, den sa abi a froewondroe, toemoesi moi howpoe foe libi so langa leki Jehovah e libi!
13. Fa Jesus e go doro nanga a wroko foe dresi sma di a ben bigin nanga dati na grontapoe?
13 Jesus, di Jehovah poti leki hemel Kownoe, sa sorgoe taki froewondroe blesi sa gi na den sma di kisi froeloesoe. Di a ben de na grontapoe, a ben opo breni ai èn dofoe jesi èn a ben dresi „ala sortoe siki èn ibri sortoe mankeri” (Mateus 9:35; 15:30, 31). Na ini a njoen grontapoe, a sa go doro nanga a moi wroko dati foe dresi sma, ma dan na heri grontapoe. Leki a Sma di e teki presi gi Gado, a sa meki a pramisi kon troe: „[Gado] sa figi poeroe ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba” (Openbaring 21:4). Noiti moro datra noso den sma di e sreka beri, sa de fanowdoe! — Jesaja 25:8; 33:24.
14. Sortoe froeloesoe den foetoeboi foe Jehovah sa kisi di dede kaba?
14 Den sma di sa kisi froeloesoe toe na ala den getrow foetoeboi foe Gado di dede na ini a ten di pasa. Na ini a njoen grontapoe, den sa kon fri foe a makti foe a grebi. Jehovah e gi a djaranti: „Wan opobaka o de foe den regtfardikiwan nanga den onregtfardikiwan” (Tori foe den Apostel 24:15). Soleki fa a sori, dan „regtfardiki[wan]” sa kisi wan opobaka fosi èn den sa jepi foe bradi a Paradijs. Fa a sa de wan prisiri sani gi den sma di pasa Armagedon libilibi foe jere den ondrofenitori foe den getrow sma di ben dede langaten pasa kaba, èn di kon na libi baka now! — Johanes 5:28, 29.
15. Taki foe wan toe foe den sani di sma sa ondrofeni na ini a njoen grontapoe.
15 Ala den sma di de na libi sa ondrofeni na a ten dati san a psalm singiman ben taki foe Jehovah: „Joe e opo joe anoe èn e meki den lostoe foe ala libisani kon troe” (Psalm 145:16). No wan angri no sa de moro: Grontapoe srefi sa kon ini wan ecologisch balansi baka èn gi njanjan bogobogo (Psalm 72:16). No wan sma sa de moro di no abi oso: „Den sa bow oso troetroe èn libi na ini”, èn ibriwan sma sa sidon „na ondro en droifibon èn na ondro en figabon, èn no wan sma sa de di e meki den beifi” (Jesaja 65:21, 22; Mika 4:4). Frede no sa de moro: No wan orlokoe no sa de moro, no wan ogri di e doe nanga tranga, noso takroedoe (Psalm 46:8, 9; Odo 2:22). „Heri grontapoe kon de na rostoe, a kon fri foe broeja. Sma e prisiri nanga prisiri babari.” — Jesaja 14:7.
16. Foe san ede regtfardikifasi sa foeroe a njoen grontapoe?
16 Na ini a njoen grontapoe, den sa poeroe den propaganda wrokosani di e panja den prakseri foe Satan. Na presi foe dati, „regtfardikifasi na san den sma di e libi na tapoe a fatoe gron sa leri troetroe” (Jesaja 26:9; 54:13). Nanga boen jeje leri di e gi doronomo ibri jari, „grontapoe seiker sa kon foeroe nanga a sabi foe Jehovah, soleki fa watra e tapoe a se” (Jesaja 11:9). Prakseri nanga doe di e bow sma sa foeroe a libisma famiri (Filipisma 4:8). Prakseri foe disi, wan libimakandra foe sma na heri grontapoe di fri foe takroedoe, foe a prakseri di sma e prakseri densrefi nomo, djaroesoe — wan internationaal bradafasi pe ala sma e abi den froktoe foe Gado jeje. Ija, nownow srefi a bigi ipi e kweki den eigifasi dati. — Galasiasma 5:22, 23.
Foe san ede so langa?
17. Foe san ede Jehovah wakti so langa fosi a tjari wan kaba kon na godelowsoefasi?
17 Ma foe san ede Jehovah ben wakti so langa foe poeroe godelowsoefasi èn foe froeloesoe a pipel foe en meki den go na ini a njoen grontapoe? Prakseri foe san ben moesoe doe. A moro prenspari sani na a regtfardiki di a soevereiniteit foe Jehovah moesoe regtfardiki, a reti di a abi foe tiri. Foe di a meki nofo ten pasa, dan a sori na wan fasi di sma no man tweifri na dati, taki libisma tiri di no ben de na ondro a soevereiniteit foe en, no man abi boen bakapisi srefisrefi (Jeremia 10:23). So boen, now Jehovah abi ala reti foe poti a tiri foe en hemel Kownoekondre di de na ini na anoe foe Krestes, ini a presi foe libisma tiri. — Danièl 2:44; Mateus 6:9, 10.
18. O ten den bakapikin foe Abraham ben o kisi a kondre Kanan?
18 San pasa na ini ala den jarihondro disi de a srefi leki san ben pasa na ini a ten foe Abraham. Jehovah ben taigi Abraham taki den bakapikin foe en ben o kisi a kondre Kanan — ma no baka te fo hondro jari ben pasa, „bika den sondoe foe den Amoritsma no ben kon na wan kaba ete” (Genesis 12:1-5; 15:13-16). Djaso a wortoe „Amoritsma” (wan prenspari lo) kande e sori tapoe ala den sma foe Kanan. Dati meki so wan fo jarihondro ben o pasa, fosi Jehovah ben o meki en pipel teki Kanan abra. Na ini a pisi ten dati, Jehovah ben meki den nâsi na Kanan seti den libimakandra foe den. Nanga sortoe bakapisi?
19, 20. Sortoe libimakandra den Kanansma ben abi?
19 A Bible Handbook foe Henry H. Halley e taki dati na Megido, den archeoloogman ben feni san tan abra foe wan tempel foe Astoret, na oema-gado wefi foe Ba-al. A e skrifi: „No so fara foe a tempel disi wan beripe ben de, pe den ben feni foeroe watrakan, di ben abi pisi di tan abra foe beibi na ini di sma ben òfer na ini a tempel disi. . . . Den Profeiti foe Ba-al nanga Astoret ben de officieel kiriman foe pikin-nengre.” „Wan tra toemoesi takroe sani di ben doe, ben de [san] sma kari ’fondamenti ofrandi’. Te wan oso ben moesoe bow, dan den ben òfer wan pikin, èn a skin foe en den ben mesre na ini a skotoe.”
20 Halley e taki: „Na anbegi di sma ben anbegi Ba-al, Astoret, nanga tra gado foe Kanan ben abi foe doe nanga den moro takroe sortoe bradjari fesa; den tempel foe den ben de prenspari presi foe takroedoe. . . . Den Kanansma ben anbegi foe di den ben gi densrefi abra na hoeroedoe, . . . èn baka dati foe di den ben kiri den fosi gebore pikin foe den, leki wan ofrandi gi den srefi gado disi. A gersi leki na wan bigi marki, a kondre Kanan ben tron wan sortoe Sodom nanga Gomora, ma now na ini wan heri kondre. . . . Wan libimakandra nanga a sortoe takroe porifasi èn ogri-atifasi dati abi a reti foe tan moro langa? . . . Den archeoloogman di ben diki na ini san ben tan abra foe den Kanan foto e froewondroe taki Gado no ben pori den fosi a ten dati.” — Teki gersi 1 Kownoe 21:25, 26.
21. Fa a situwâsi foe den Kanansma èn di foe a ten foe wi, gersi makandra?
21 A godelowsoefasi foe den Amoritsma ben „kon na wan kaba”. So boen, Jehovah ben abi ala reti now foe kiri den. Na so a de toe na ini a ten disi. A grontapoe disi foeroe nanga ogri di e doe nanga tranga, hoeroedoe, èn nanga na abi di sma no abi lespeki gi den wet foe Gado. Èn foe di wi abi leti foe tegoe foe na ogri-ati sani di sma ben doe foe òfer pikin na ini Kanan foe owroeten, dan san wi kan taki foe na òfer di sma òfer miljoenmiljoen jongoe sma na ini den orlokoe foe a grontapoe disi, wan sani di takroe moro iniwan sani di doe na ini Kanan? Foe troe, Jehovah abi ala reti now foe tjari a godelowsoe sistema disi kon na wan kaba.
Wan tra sani e doe
22. San e doe foe a pasensi ede di Jehovah abi na ini a ten disi?
22 A pasensi di Jehovah abi na ini den lasti dei disi, meki taki wan tra sani e doe. A e gi ten foe tjari a bigi ipi kon na wán èn foe gi den leri, èn a nomroe foe den de moro leki feifi miljoen kaba. Na ondro a tiri foe Jehovah, den kon tron wan organisâsi di e go na fesi. Mansma, oemasma, nanga jongoewan e kisi leri foe leri tra sma den waarheid foe bijbel. Den konmakandra foe den èn den bijbel poeblikâsi e leri den, den lobi pasi foe Gado (Johanes 13:34, 35; Kolosesma 3:14; Hebrewsma 10:24, 25). Boiti dati, den e leri bekwaamfasi na ini a bow-wroko, a sabidensi di abi foe doe nanga elektrik sani, a druk di den e druk sani, nanga tra kontren so taki den kan horibaka gi a wroko foe preiki a „boen njoensoe” (Mateus 24:14). Kande den sa gebroiki den koni dati foe gi leri èn foe bow sani, na ini a njoen grontapoe na ala sei.
23. Foe san ede a de wan grani foe de na libi na ini a ten disi?
23 Ija, na ini a ten disi Jehovah e sreka den foetoeboi foe en foe pasa a „bigi banawtoe” libilibi foe go na ini wan regtfardiki njoen grontapoe. Dan no wan Satan nanga en godelowsoe grontapoe sa de moro foe feti nanga dati, no wan siki, sari, nanga dede no sa de moro. Nanga foeroe faja èn nanga prisiri, a pipel foe Gado sa go doro nanga a switi wroko foe bow wan paradijs, pe ala dei sa de wan „switi prisiri”. Fa a de wan bigi grani taki wi e libi na ini a heimarki disi foe den jarihondro, foe sabi èn foe dini Jehovah, èn foe froestan taki heri esi wi sa ’opo wi ede go na loktoe foe di a froeloesoe foe wi e kon krosibei’! — Lukas 21:28; Psalm 146:5.
Aksi foe loekoe sani sjatoe baka
◻ San na a „bigi banawtoe”, èn fa a e bigin?
◻ Foe san ede Gog no sa man doe den foetoeboi foe Jehovah ogri?
◻ Fa a „bigi banawtoe” e kon na wan kaba?
◻ Sortoe toemoesi moi wini a njoen grontapoe sa abi?
◻ Foe san ede Jehovah wakti so langa fosi a tjari a sistema disi kon na wan kaba?
[Prenki na tapoe bladzijde 16]
Heri grontapoe sa kenki kon tron wan paradijs