Kownoekondre preikiman e froeteri
Prati Kownoekondre siri na ibri okasi
BIJBEL, a Wortoe foe Gado, e gi sma deki-ati foe wroko fajafaja. Kownoe Salomo ben taki: „Sai joe siri na mamanten èn no meki joe anoe rostoe te leki neti doro; bika joe no sabi pe disi sa abi boen bakapisi, a kan de djaso noso a kan de drape, noso taki ala toe sa boen a srefi.” — Preikiman 11:6.
Na ibri okasi di fiti, Jehovah Kotoigi e sai „siri” foe di den e preiki a boen njoensoe foe Gado Kownoekondre. Na moro leki 230 kondre nanga èilanti groepoe, den e tan „go doro sondro foe stòp foe gi leri èn foe meki a boen njoensoe foe Krestes Jesus bekènti” (Tori foe den Apostel 5:42). Den ondrofenitori di e kon now, e sori fa Jehovah Kotoigi no e ’meki den anoe foe den rostoe’ na ini a preikiwroko.
◻ Na ini a republiek Kaapferdia, wan Kotoigi foe Jehovah ben e waka pasa wan strafoe-oso di a ben de na ini velddienst. Na tapoe a djari foe a strafoe-oso, wan toe strafoeman ben sidon na ini wan bon. Di den strafoeman ben si a Kotoigi na gron, den ben bari taki den ben wani wan toe tijdschrift. A Kotoigi ben tai wan toe Waktitoren nanga Ontwaakt! tijdschrift na wan ston èn ben trowe den abra a skotoe foe a strafoe-oso. A bakapisi foe a belangstelling disi di den sma ben sori, ben de taki 12 bijbelstudie ben bigin. Dri foe den strafoeman gi den libi abra na Gado èn den pristeri densrefi gi a dopoe nanga watra. Moro leki wan jari now, wan foe den strafoeman dini leki wan foeroeten evangelie preikiman, noso pionier. Ma fa den e doe velddienst wroko na ini strafoe-oso? Fosi den e prati a strafoe-oso na ini gebied. Dan den e prati a gebied na mindri den dri Kotoigi èn den e wroko cel foe cel. Den Kownoekondre preikiman disi e go baka na den wan di abi belangstelling pikinmoro a srefi fasi leki fa Jehovah Kotoigi e doe na heri grontapoe — foe di den e tjari gobaka. Ma wán sani di de tra fasi, na den omeni leisi di den e hori bijbelstudie. Na presi taki den e studeri bijbel soso wán noso toe tron wan wiki gi wan joeroe noso moro, son strafoeman e studeri ibri dei! Boiti dati, na edeman foe a strafoe-oso gi den Kotoigi primisi foe hori ala gemeente konmakandra na ini a strafoe-oso.
◻ Wan oema na Potogisikondre ben kisi wan lo poeblikâsi foe a Waktitoren Genootschap, baka di a granmama foe en dede. Foe di a no ben de wan Kotoigi foe Jehovah, meki a no ben wani hori den boekoe. Ma a no ben wani pori den. Wan dei a ben taigi wan Kotoigi foe Jehovah di ben kon na en ala di a ben doe oso-foe-oso diniwroko, foe a bibliotheek. A Kotoigi ben aksi en efoe a ben sabi omeni a bibliotheek warti troetroe. Na oema ben piki: „Foe taki en leti, mi no sabi omeni den warti troetroe, ma fa mi kan kon sabi disi?” Na oema ben teki wan bijbelstudie, èn sjatoe baka dati a ben kon si a waarde foe a bibliotheek foe en granmama. Now en srefi na wan dopoe Kotoigi foe Jehovah. Boiti dati, na oemapikin foe en èn wan krosibei mati foe a famiri e studeri bijbel toe. Fa den boekoe disi di a ben kisi ben sori foe de wan warti goedoe!