„Unu Kenki a Fasi Fa Mi Ben E Prakseri fu Kotoigi fu Yehovah”
DATI na san wan amtenari fu wan dungru-oso fu Polen ben taki fu wan artikel di ben taki fu a wroko fu Kotoigi fu Yehovah soleki fa a ben skrifi na ini na uitgave fu wi fu 15 oktober 1998. Na artikel „Te ati di tranga leki ston e tron ati di e piki bun”, ben fruteri fu a bun bakapisi di Kotoigi fu Yehovah ben abi na ini a wroko di den ben wroko nanga strafuman na dungru-oso na ini Wołów, Polen.
Fosi a Waktitoren tijdschrift di kari na tapusei ben tyari kon na doro gi a publiki, wan spesrutu konmakandra ben seti fu gi den strafuman a tijdschrift tapu 13 september 1998 na a dungru-oso Wołów. Den sma di ben kisi wan kari fu de drape ben de kotoigi fu a foto, dopu strafuman nanga tra strafuman di ben abi belangstelling èn furu amtenari fu a dungru-oso. Den sani di e kon now na wan tu sani di den sma di ben drape ben taki.
Jerzy, wan fu den kotoigi fu Yehovah di ben teki dopu na ini a dungru-oso moro leki feifi yari pasa, ben taki: „Mi e prisiri srefisrefi fu di mi kan leisi tide omeni muiti den brada fu den gemeente na ini a birti du kaba fu yepi wi.” A ben taki moro fara: „Mi e tan meki muiti fu go na fesi, èn mi kan si fa Yehovah e vorm mi.”
Wan tra strafuman di ben nen Zdzisław, ben taki fu a kotoigi wroko na ini dungru-oso: „Tapu a momenti disi fo strafuman e sreka fu teki dopu èn den wan di sori belangstelling no so langa ete, e tan kon na den konmakandra na a zaal fu wi. Na artikel disi na wan sani di e gi wi tranga fu du moro wroko tapu a kontren disi.” ¡Dati na wan moi fasi fu denki te wi e hori na prakseri dati Zdzisław abi 19 yari ete fu sidon na dungru-oso!
Baka di wan amtenari fu dungru-oso ben leisi na artikel fu a dungru-oso fu Wołów, a ben taki: „Wi ben kisi spesrutu grani. Noiti mi ben denki taki a dungru-oso disi ben sa kisi so wan bun nen na publiki na ini 130 tongo fu grontapu. Mi lobi fa unu de èn mi e warderi den muiti di unu e du gi den strafuman.” Wan tra amtenari ben taki moro fara: „Unu kenki a fasi fa mi ben e prakseri fu Kotoigi fu Yehovah. Fosi mi ben e si unu leki sma di fromu pasamarki. Now mi e si unu leki sma di e hori densrefi na gronprakseri.”
A driktoro fu a dungru-oso fu Wołów, Marek Gayos, ben lafu pikinso èn ben taki: „Biginbigin wi ben denki taki unu no ben sa man du furu. Wi ben denki taki unu ben de wan fu den relisi nomo di abi wan tranga angri fu doro a marki fu meki den strafuman kon bun baka nanga yepi fu Bijbel. Ma di wi si den bakapisi di unu ben abi na ini a bigin kaba, dan wi ben bosroiti fu wroko krosibei makandra nanga unu. Unu e kon dyaso sondro fu weri neigi yari langa kaba now, èn mi e warderi srefisrefi san unu du te so fara.”
Ma fa den tra strafuman fu a dungru-oso na Wołów ben taki fu na artikel? A belangstelling fu den strafuman ben de so kefalek taki den kotoigi na ini a dungru-oso ben klari ala den tijdschrift di den ben abi. Amtenari fu a dungru-oso so srefi ben sori belangstelling fu di den ben aksi 40 eksemplaar moro gi densrefi. Fu ben man gi den sma den tijdschrift di den ben aksi, dan den gemeente na ini a foto ben yepi èn ben gi 100 eksemplaar moro na den brada na ini dungru-oso. Na a srefi ten, a nomru fu sma di ben kon na a konmakandra na ini dungru-oso ben gro.
Piotr Chodún, di de wan amtenari foe dungru-oso di wroko krosibei makandra nanga den Kotoigi fu Yehovah ben taki: „Wi ben bosroiti fu poti na artikel disi na ini ala den grasi-kasi fu a dungru-oso fu wi so taki sma kan si den. Wi e howpu taki ala den strafuman di no e studeri Bijbel nanga unu ete sa leisi a tijdschrift.”
A moi eksempre fu den Kotoigi nanga a fasti bosroiti fu den fu meki muiti fu preiki, e tan abi bun bakapisi. Boiti den 15 strafuman di go na fesi te den kon de klariklari fu teki dopu, tu amtenari fu a dungru-oso gi a libi fu den abra na Yehovah èn wan tra strafu-oso amtenari aksi fu kisi wan bijbelstudie. A no de fu taki dati den brada di e preiki na ini a dungru-oso na ini Wołów e gi ala grani na Yehovah Gado gi a bun bakapisi di den abi.—Teki gersi 1 Korentesma 3:6, 7.
[Prenki na tapu bladzijde 28]
Dri Kotoigi nanga wan strafuman na a pristeri fu a tijdschrift na ini a zaal fu a dungru-oso pe lezing e hori