Aksi di opo kon
◼ Sortu warskow wi musu hori na prakseri te wi e gi kotoigi na strafuman na strafu-oso?
Na heri grontapu no moro mendri leki aiti milyun strafuman de na strafu-oso, èn wan tu fu den e sori taki den wani sabi moro fu a bun nyunsu (1 Tim. 2:4). Wán bijkantoro e kisi sowan 1400 brifi ala mun fu strafuman nanga den famiri di e aksi lektuur noso di e aksi taki wan sma go na den. Aladi furu fu den strafuman wani sabi moro trutru, toku ondrofeni e sori taki sonwan fu den e du nomo leki den wan sabi moro, soso fu gebroiki a pipel fu Gado fu kisi wini gi densrefi. Nanga a sani disi na prakseri wi alamala musu gi yesi na den warskow ini a tori fu gi kotoigi na strafuman di de na strafu-oso.
Nofo tron strafuman e kisi kotoigi nanga yepi fu brifi. Noiti sisa musu skrifi brifi gi mansma di de na strafu-oso, srefi ta a wani yepi en na yeye fasi. Soso brada nanga ondrofeni musu kisi a frantwortu dati. Sisa di abi ondrofeni kan kisi a wroko fu skrifi brifi gi umasma di de na strafu-oso èn di e sori taki den wani sabi moro fu a waarheid fu Bijbel. Noiti wi musu seni moni noso tra kado gi den strafuman, awinsi den e aksi wi fu du dati.
Te wan sma di de na strafu e sori taki a wani sabi moro fu waarheid, dan en nen nanga na adres fu en musu seni go gi a gemeente di de moro krosibei fu a strafu-oso. Moro furu den brada drape abi ondrofeni èn den sabi san den musu du fu yepi den sortu sma disi te problema e opo kon. Efu wi no sabi efu wan gemeente de na ini a kontren fu a strafu-oso, dan wi kan seni a nen nanga na adres go na a bijkantoro.
A de wan bun sani te a brada di kisi a wroko fu studeri nanga den strafuman e hori wan konmakandra pe difrenti fu den kan studeri na a srefi ten. Ma, spesrutu okasi pe preikiman abi demakandra na wan fri fasi nanga den strafuman no musu hori na ini a strafu-oso. Moro fara, a no bun taki preikiman e go na wan strafu-oso na iniwan ten te den wani èn den no musu abi krosibei demakandra nanga den strafuman.
Meki wi de „koni leki sneki èn toku sondro takrufasi leki doifi” te wi e prati a bun nyunsu nanga strafuman di de na strafu-oso.—Mat. 10:16.