Joe e bribi na ini reïncarnatie?
„JOE e memre a birmeisje di joe ben lobi, di joe ben e gro kon bigi djaso na India?”, Mukundbhai ben skrifi gi en manpikin, wan universiteit studenti na Amerkankondre. „Baka wan toe wiki a o trow. Mi ben denki taki joe ben moesoe sabi dati.”
Foe san ede a papa ben froeteri en manpikin a njoensoe disi? Foeroe jari pasa, nanga tranga Mukundbhai ben tjari wan kaba kon na a lobi matifasi foe den toe tini disi. Boiti dati, a manpikin ben de siksi jari kaba na Amerkankondre foe kisi moro hei skoro. Na ini a ten dati a no ben miti nanga a meisje, èn Mukundbhai ben sabi dati.
Ma foe san ede a ben broko en ede dan? A ben broko en ede bika Mukundbhai ben bribi na ini reïncarnatie, noso a gebore di wan sma e gebore agen.a Efoe a ben de so, taki a lobi matifasi foe den toe pikin disi ben de foe di den ben de trowpatna kaba na ini den fosi libi, dan a ben sa de wan ogri sani foe hori den aparti now di den doro a jari taki den mag trow. Mukundbhai ben wani nomo foe meki en manpikin sabi foe a trow di ben o de, bifo a meisje ben sa tron a wefi foe wan tra sma na ini a libi disi.
Loekoe wan tra kefal. Wan meisje di ben abi fo jari ben didon difrenti leisi nanga pen na ini wan ati-oso na Mumbai, India. En problema ben de taki a ben abi wan klep di no ben wroko boen na ini en ati. A goedoe papa nanga mama foe en no ben man si fa a pikin e pina. Ma den ben prakseri: „Wi moesoe teki en leki fa a de. A moesoe de so, taki a ben doe wan sani na ini a fosi libi foe en, meki a e froedini disi.”
A bribi na ini reïncarnatie e plèi wan prenspari ròl na ini a libi foe miljoenmiljoen sma na ini a Hindoe bribi, a Boeda bribi, a Jainisme bribi, a bribi foe den Sikh, nanga tra relisi di bigin na India. Sma e si den ondrofeni na ini a libi — foe a lobi di wan sma kon lobi wan trawan, te go miti a njan di wan sma e njan pina serjoesoe — leki bakapisi foe sani di sma ben doe na ini wan fosi libi noso na ini den fosi libi foe en.
Foeroe sma na ini den Westsei kondre abi belangstelling gi a leri foe reïncarnatie. Shirley MacLaine, wan Amerkan oema di e plèi kino, e taki dati a e bribi na ini reïncarnatie. A skrifiman, Laurel Phelan, foe Vancouver, British Columbia na Kanada, e froeklari taki a e memre sani foe 50 fosi libi di a ben abi. Na ini wan ondrosoekoe di ben doe gi CNN/USA Today na ini 1994 foe si fa sma e prakseri moro leki 270 foe den 1016 bigisma ben taki dati den e bribi na ini reïncarnatie. A bribi na ini reïncarnatie na so srefi wan pisi foe a New Age-beweging. Ma sortoe boeweisi e horibaka gi a bribi disi?
„Den sani di wi e memre foe wan fosi libi!”, na so den sma di e bribi na ini reïncarnatie e taki. Foe dati ede, di Ratana di ben abi dri jari, na Bangkok, ben bigin „memre sani foe wan libi di a ben abi bifo leki wan kerki oema di ben dede di a ben owroe moro leki 60 jari”, dan foeroe foe den sma di ben loekoe a tori ben erken a kefal foe en leki wan troetroe boeweisi gi reïncarnatie.
Ma tokoe foeroe sma e tweifri. Èn a kan so srefi taki tra froeklari de gi den sani di sma e memre foe den fosi libi.b Na ini en boekoe Hinduism: Its Meaning for the Liberation of the Spirit, a Hindoe filosoof, Nikhilananda, e taki dati ’den ondrofeni di sma ben abi na baka dede, no man boeweisi nanga a froestan’. Tokoe a e froeklari taki „a leri di abi foe doe nanga a gebore di wan sma e gebore agen, na wan sani di kan, moro leki wan sani di no kan”.
Ma bijbel e horibaka gi a leri disi? Èn sortoe howpoe gi den dedewan a Wortoe foe Gado di skrifi nanga en santa jeje, e gi?
[Foetoewortoe]
a The New Encyclopædia Britannica e taki dati „reïncarnatie” wani taki „a gebore di a sili e gebore agen wán leisi noso moro leisi na ini sani di e bestan, di kan de libisma, meti, noso na ini wan toe geval, prani”. Den wortoe „a gebore di wan sma e gebore agen” den e gebroiki so srefi gi a sani disi di e feni presi, ma sma na ala sei e erken a wortoe „reïncarnatie” moro foeroe. Difrenti wortoeboekoe foe den tongo di sma e taki na India, e gebroiki den toe wortoe disi sondro foe meki difrenti na den mindri.
b Loekoe bladzijde 5-7 foe na uitgave foe na Ontwaakt! foe 8 juni 1994.
[Prenki na tapoe bladzijde 4]
A e kisi strafoe bika foe den sondoe di a ben doe na ini wan fosi libi?