Na idea e tron wan pisi foe den relisi foe Owstoesei kondre
„Ala ten mi ben prakseri taki a dede di a sili no man dede ben de wan universeel waarheid di ala sma ben bribi. Dati meki mi ben froewondroe troetroe di mi ben kon sabi taki son koniman foe Owstoesei kondre èn foe Westsei kondre no ben agri nanga a bribi. Now mi e aksi misrefi fa den hindoesma ben kon sabi na idea foe a dede di sma no man dede.” — WAN UNIVERSITEIT STUDENTI DI BEN KWEKI LEKI WAN HINDOESMA.
1. Foe san ede a de prenspari taki wi sabi fa a leri di e taki dati libisma no man dede èn di de foe feni na ini difrenti relisi, ben bigin èn ben kon panja na ala sei?
FA NA idea taki libisma abi wan sili di no man dede, ben tron wan pisi foe a Hindoe-bribi nanga tra relisi foe Owstoesei kondre? Na aksi de wan prenspari sani srefi gi sma di e libi na den Westsei kondre di kande no sabi den relisi dati boen, foe di a bribi abi krakti tapoe a fasi fa ibriwan sma e si a tamara. Foe di a leri di e taki dati libisma no man dede, na wan algemeen marki foe moro foeroe relisi na ini a ten disi, meki, te wi sabi fa na idea ben bigin, dan foe troe wi kan froestan makandra moro boen èn abi wan moro boen komunikâsi.
2. Foe san ede India ben de wan prenspari kondre di ben abi krakti tapoe den relisi na Asia?
2 Ninian Smart, wan profesor foe na Universiteit foe Lancaster na Ingrisikondre di e ondrosoekoe sani tapoe a kontren foe relisi, e taki: „India na a moro prenspari presi di ben abi krakti tapoe den relisi na Asia. A sani disi no de so nomo foe di foeroe bribi komoto na India srefi — a Hindoe-bribi, a Boeda-bribi, a Jaina-bribi, a Sikh-bribi, èn so moro fara — ma foe di wan foe den bribi disi, a Boeda-bribi, ben kon abi foeroe krakti tapoe a koeltoeroe foe pikinmoro heri Owstoe-Asia.” Foeroe koeltoeroe di a Boeda-bribi ben abi krakti tapoe den na a fasi disi, „te now ete e si India leki den mamakondre na jejefasi”, na so hindoe sabiman Nikhilananda e taki. Dan fa a leri disi di e taki dati sma no man dede, ben bigin na India èn na tra presi foe Asia?
A leri foe a Hindoe-bribi di e taki foe a nasi di sma e nasi
3. Soema kande ben tjari na idea taki den sili e froisi go na wan tra presi, kon na India, soleki fa wan historia skrifiman e taki?
3 Na ini a di foe siksi jarihondro b.G.T., di Pythagoras nanga den bakaman foe en na Grikikondre ben e gi sma deki-ati foe teki a leri di e taki dati den sili e froisi go na wan tra presi, hindoe koniman di ben e libi na a sjoro foe na Indus liba nanga a Ganges liba na India, ben kon nanga a srefi idea dati. A fasi fa a bribi disi ben kon na a srefi ten „ini a Griki libimakandra èn na India, no kan de wan sani di kon so”, na so historia skrifiman Arnold Toynbee e taki. „Wan fonten [di abi krakti] tapoe den alamala,” na so Toynbee e sori, „ben kan de a libimakandra foe sma di komoto na Europa nanga Asia èn di e wakawaka lontoe sondro foe abi wan fasti tanpresi di, na ini a di foe aiti èn na ini a di foe seibi jarihondro G.T., ben saka kon na India, Zuid-Westsei Asia, a bigi kontren di gersi sabana na a noordsei sjoro foe a Blaka Se, nanga den kontren foe Balkan nanga Anatolia.” Soleki fa a sori, dan den lo di komoto na Europa nanga Asia èn di ben wakawaka lontoe sondro foe abi wan fasti tanpresi, ben tjari na idea foe a froisi di a sili e froisi go na wan tra presi, go nanga den na India.
4. Foe san ede na idea taki den sili e froisi go na wan tra presi, e hari a prakseri foe hindoe koniman?
4 Fosi disi, a Hindoe-bribi ben kon de kaba na India, di den Ariasma ben doro wan sani foe 1500 b.G.T. Sensi a bigin, den hindoesma ben bribi taki a sili ben de tra fasi leki a skin èn taki a sili ben tan na libi, baka te wan sma dede. Na so fasi den hindoesma ben anbegi den afo èn ben poti njanjan gi den sili foe den dedewan foe den, so taki den ben kan njan. Hondrohondro jari baka dati, di na idea foe a froisi di den sili e froisi go na wan tra presi ben doro India, a moesoe ben de so taki na idea ben hari a prakseri foe den hindoe koniman di ben feti nanga a problema di sma na heri grontapoe abi nanga ogri èn nanga pina. Den hindoe koniman ben moksi na idea disi nanga san sma e kari a wet foe karma, a wet foe sani di e pasa èn den bakapisi di e kon foe dati, èn na so den ben kon nanga a leri foe a nasi di sma e nasi pe wan sma e kisi pai noso strafoe na ini a tra libi gi den boen sani nanga den takroe sani di a doe na ini en libi.
5. San na a troetroe marki di a sili moesoe doro, soleki fa a Hindoe-bribi e taki?
5 Ma wan tra idea ben de di ben abi krakti tapoe a leri foe a Hindoe-bribi ini a tori foe a sili. „A gersi leki a troe taki na a srefi ten di den ben kon nanga a leri di e taki dati a sili e froisi go na wan tra presi nanga a leri foe a karma, noso srefi na wan tra ten na fesi,” na so na Encyclopædia of Religion and Ethics e taki, „wan pikin groepoe foe sma na N. India di tja-ede . . . safri-safri ben kon nanga wan tra idea — a filosofia idea foe a Brahman-Ātman [a moro hei èn têgo Brahman, a moro hei sani di de].” Den ben moksi na idea disi nanga a leri foe a nasi di sma e nasi foe sori krin san sa pasa nanga hindoesma te foe kaba— foe kon fri foe a froisi di a sili e froisi ibritron baka, foe man de wán nanga a moro hei sani di de. Den hindoesma e bribi taki den kan doro a sani dati te den e doe moeiti foe tjari densrefi na wan fasi di a libimakandra feni boen èn te den e doe moeiti foe kon sabi a spesroetoe fasi fa hindoesma e denki.
6, 7. San a Hindoe-bribi foe a ten disi e bribi ini a tori foe wan libi, baka te wan sma dede?
6 Na so fasi hindoe koniman ben meki na idea taki den sili e froisi go na wan tra presi, kon tron a leri foe a nasi di sma e nasi, foe di den ben moksi na idea dati nanga a wet foe a karma èn nanga na idea foe Brahman. Octavio Paz, wan poewema skrifiman di fosi ben de wan ambasadoro foe Meksikow na India èn di ben wini wan Nobelprijs, e skrifi: „Di a Hindoe-bribi ben kon panja, dan wan idea ben kon panja toe . . . di de prenspari gi a Brahman-bribi, a Boeda-bribi èn gi tra relisi foe Asia: metempsychose, a froisi di den sili e froisi foe a wan libi go na wan tra libi.”
7 A leri foe a nasi di sma e nasi na a fondamenti leri foe a disiten Hindoe-bribi. Hindoe filosofiaman Nikhilananda e taki: „Ibri opregti hindoesma abi na overtoigi taki a no de na aparti grani foe soso wan toe sma nomo di teki poeroe foe trawan foe kisi libi sondro foe man dede, ma na a reti di ala sma kisi te den gebore.”
San a Boeda-bribi e taki foe a gebore di wan sma e gebore ibritron baka
8-10. (a) San a Boeda-bribi e taki foe a de di libisma de? (b) Fa wan sabiman foe a Boeda-bribi e froeklari fa wan sma e gebore baka?
8 A Boeda-bribi ben seti na India wan sani foe 500 b.G.T. Soleki fa boedasma gwenti taki, dan wan prins foe India di ben nen Siddhārtha Gautama, èn di sma ben kon sabi leki Boeda baka di a kisi froelekti, ben seti a Boeda-bribi. Foe di a Boeda-bribi ben komoto na a Hindoe-bribi, dan na son fasi den leri foe a Boeda-bribi de a srefi leki den leri foe a Hindoe-bribi. Soleki fa a Boeda-bribi e taki, dan a de di libisma de, wani taki dati den e gebore èn e dede ibritron baka èn soleki fa a de nanga a Hindoe-bribi, dan den sani di ibri sma ben doe na ini en fosi libi, e bepaal a libi di a abi now.
9 Ma a Boeda-bribi no e taki dati wan sma de na libi foe di a sili foe a sma e tan na libi, baka te a sma dede. „[Boeda] ben si ini a libisma sili soso wan lo difrenti situwâsi di abi foe doe nanga a froestan, di e tan wan sjatoe pisi ten nomo, sani di tranga lostoe e hori na makandra”, na so Arnold Toynbee e taki. Ma Boeda ben bribi taki wan sani — wan situwâsi noso krakti — e abra foe a wan libi go na wan trawan. Dr. Walpola Rahula, wan sabiman di de wan boedasma e tjari kon na krin:
10 „Wan sma na noti moro leki den krakti foe a skin èn foe a froestan makandra. A sani di wi e kari dede, na a natoeroe skin di no e wroko moro kwetikweti. Ala den krakti disi no de moro te a skin no e wroko moro? A Boeda-bribi e taki: ’Dati no de so.’ A wani di sma wani de, a wani di sma wani libi go doro, a wani di sma wani gebore ibritron baka èn na angri di den e angri foe den sani dati, na wan kefalek bigi krakti di e boeweigi a heri libi foe sma, heri sani di de èn di e boeweigi heri grontapoe srefi. A de a moro bigi krakti di de na grontapoe. Soleki fa a Boeda-bribi e taki, dan a krakti disi no e tapoe foe wroko te a skin no e wroko moro, san wani taki dati wan sma dede; ma a e tan sori ensrefi na wan tra fasi, èn a e kon de baka, di den e kari a gebore di wan sma e gebore baka.”
11. Fa a boedasma e prakseri foe wan libi, baka te wan sma dede?
11 A fasi fa a boedasma e si a libi, baka te wan sma dede na disi: Wan sma de foe têgo efoe a doro a lasti marki foe a nirvana, a e kon fri foe a gebore di a e gebore ibritron baka. A nirvana no de wan situwâsi foe têgo kolokoe noso wan situwâsi foe de wán nanga a moro heiwan di de. A de wan situwâsi nomo pe a sma no de — a „presi pe dede no de”, te wan sma no de moro. Webster’s Ninth New Collegiate Dictionary e taki foe a „nirvana” leki „wan presi noso wan situwâsi pe sma frigiti sorgoe, pen noso troetroe sani di e pasa dorosei foe a skin”. Na presi foe soekoe wan libi sondro foe man dede, boedasma e kisi deki-ati foe go moro hei leki dati foe di den doro a nirvana.
12-14. San den difrenti sortoe Boeda-bribi e taki foe na idea taki sma no man dede?
12 Di a Boeda-bribi ben kon panja na difrenti presi foe Asia, a ben meki den leri foe en fiti den bribi foe den sma foe den presi dati. Foe eksempre, a Mahayana Boeda-bribi, wan sortoe Boeda-bribi di de a moro prenspariwan na China nanga Japan, e bribi na ini den bodhisattva foe hemel, noso den Boeda foe a tamara. Den bodhisattva e skoifi a nirvana foe den go na wan tra ten, so taki den kan gebore someni tron baka foe kan dini tra sma èn jepi den foe doro a nirvana. Na so wan fasi wan sma kan bosroiti efoe a wani tan gebore ibritron baka, srefi baka te a doro a nirvana.
13 Wan tra kenki di ben kon abi krakti spesroetoe tapoe sma na China nanga Japan, na a leri di e taki foe a Soifri Kondre na Westsei di Boeda Amitabha, noso Amida-Boeda, ben tjari kon. Den wan di e kari a nen foe Boeda foe di den e bribi, e kon gebore baka na ini a Soifri Kondre, noso paradijs, pe a situwâsi drape e jepi den foe kisi blesi te foe kaba. San kon foe a leri disi? Profesor Smart, di wi ben kari na fesi kaba, e tjari kon na krin: „Soleki fa wi ben kan froewakti, dan ini a denki foe foeroe sma den glori foe a paradijs foe san son wan foe den Mahayana boekoe e taki finifini, ben kon ini a presi foe a nirvana leki a moro hei marki di den ben moesoe doro.”
14 A Boeda-bribi foe Tibet e teki tra bribi abra toe foe a kondre. Foe eksempre, a boekoe foe Tibet di e taki foe den dedewan e sori san o pasa te foe kaba nanga wan sma na ini a pisi ten baka te a sma dede èn bifo a sma e gebore baka. Sma e taki dati den dedewan e si a brenki leti foe a moro hei sani di de, èn den wan di no man froedrage a leti, no e kon fri, ma den e kon gebore baka. A de krin taki a Boeda-bribi nanga den difrenti fasi foe en, e taki dati sma no man dede.
Na ini a Sjinto-bribi foe Japan den e anbegi den afo
15-17. (a) Fa na anbegi di sma e anbegi den jeje foe den afo ben bigin na ini a Sjinto-bribi? (b) Fa a bribi di sma e bribi taki a sili no man dede, de wan fondamenti sani gi a Sjinto-bribi?
15 Wan relisi ben de na Japan bifo a Boeda-bribi ben kon drape na ini a di foe siksi jarihondro G.T. A ben de wan relisi sondro nen, pe den ben bribi na ini sani di ben abi foe doe nanga den moreel markitiki foe a pipel èn nanga den gwenti foe den. Ma di a Boeda-bribi ben kon drape, dan a ben de fanowdoe foe tjari wan difrenti kon na mindri a relisi foe Japan nanga a freimde relisi. Èn na so fasi a nen „Sjinto”, di wani taki „a pasi foe den gado”, ben kon de.
16 San a fosi Sjinto-bribi ben bribi ini a tori foe wan libi, baka te wan sma dede? Di den ben bigin prani aleisi na tapoe swampoegron, dan „a prani di den ben prani sani na tapoe swampoegron ben meki taki a ben de fanowdoe foe abi libimakandra di ben orga boen èn di ben tranga,” na so Kodansha Encyclopedia of Japan e tjari kon na krin, „èn sma ben bigin doe pranigron ceremonia — di baka ten ben prei so wan prenspari ròl na ini a Sjinto-bribi”. A frede di sma frede den sili di komoto gowe ben meki taki den owroeten sma disi ben bigin kon nanga a prakseri foe plisi den nanga jepi foe ceremonia. Disi ben tron na anbegi di sma ben anbegi den jeje foe den afo.
17 Akroederi a Sjinto-bribi, wan sili di „komoto gowe” abi en persoonlijkheid ete, ma dede doti en. Te den sma di lasi wan lobiwan na dede, e teki prati na ceremonia foe memre a dedesma, dan a sili kon krin foe ala ogri, èn a e kisi wan eigifasi foe wan sma di lobi vrede èn di lobi doe boen. Baka wan pisi ten, a jeje foe wan afo e kisi a posisi foe wan afo di de wan gado, noso wan gado di e loekoe sma. Foe di a Sjinto-bribi ben de na a srefi ten leki a Boeda-bribi, meki a ben teki wan toe leri foe a Boeda-bribi abra, so srefi a leri di e taki foe a paradijs. So boen, wi e si taki a de wan fondamenti sani gi a Sjinto-bribi, foe bribi taki sma no man dede.
A leri di a Tao-bribi e leri taki sma no man dede; na ini a Confucius-bribi den e anbegi den afo
18. Fa den taosma e denki foe a dede di sma no man dede?
18 Lau-tse, di sma e taki dati a libi na China na ini a di foe siksi jarihondro b.G.T., ben seti a Tao-bribi. Soleki fa a Tao-bribi e taki, dan a marki di sma moesoe doro na ini a libi, na foe meki den sani di libisma doe, kon de wán nanga Tao — a fasi fa a natoeroe de. Foe a fasi fa wan taosma e prakseri foe a dede di sma no man dede, wi kan taki na a fasi disi: Tao na a wet di e tiri na universum. Tao no abi wan bigin èn a no abi wan kaba. Te wan sma e libi akroederi Tao, dan a sma de wan pisi foe a sani dati èn sa libi foe têgo.
19-21. Sortoe moeiti den taosma ben doe foe den sani ede di den ben denki?
19 Foe di taosma ben doe moeiti foe de wán nanga a natoeroe, meki te foe kaba den ben abi belangstelling spesroetoe gi a têgo ten foe a natoeroe èn gi a fasi fa a natoeroe ben man kon njoen baka. Den ben prakseri taki, efoe wan sma ben libi ini wánfasi nanga Tao, noso nanga a fasi fa a natoeroe de, dan kande na wán noso tra fasi a sma ben kan kon sabi den sikrit foe a natoeroe èn mankeri, siki nanga dede srefi no ben o miti en.
20 Den taosma ben bigin proeberi njoen fasi foe prakseri dipi, foe leri bro, èn foe njan spesroetoe njanjan, so taki, soleki fa den ben prakseri, a skin no ben kan go na baka so esi èn no dede so esi toe. No langa baka dati, den ben bigin panja tori foe sma di no man dede èn di ben kan frei na tapoe den wolkoe èn ben kon èn ben gowe baka o ten den ben wani èn di ben libi na tapoe santa bergi noso na fara èilanti someni jari langa, èn dow noso froktoe di abi towfroe krakti ben e hori den na libi. Historia foe China e taki dati na ini 219 b.G.T., kèiser Tj’in Sje Hwang-ti ben seni wan heri ipi boto nanga 3000 boi nanga oemapikin go, foe soekoe na èilanti P’eng-lai di sma e froeteri ini tori foe dati, a tanpresi foe den sma di no man dede, so taki den ben kan tjari a wiwiri kon baka di e meki taki sma no man dede. Wi no abi foe taki dati den no ben drai kon baka nanga a wondroe dringi.
21 A soekoe di taosma ben soekoe têgo libi, ben meki taki den ben go proeberi nanga jepi foe fositen scheikunde foe meki perki di ben sa sorgoe taki den no ben man dede. Soleki fa den taosma ben si a tori, dan libi ben kon de te den toe krakti jin nanga jang (na oema elementi nanga a man elementi) di ben de kontrari makandra, ben kon de wán. Foe dati ede, te den sma nanga jepi foe fositen scheikunde ben moksi loto (doengroe kloroe, noso jin) nanga kwik (brenki kloroe, noso jang), dan den ben meki dati gersi a fasi fa sani e waka ini a natoeroe èn den ben denki taki a sani di den ben meki ben sa de wan perki di kibri sma foe den no man dede.
22. San ben de a bakapisi foe a krakti di a Boeda-bribi ben abi tapoe a relisi libi foe den Sneisi?
22 Na a di foe seibi jarihondro G.T., a Boeda-bribi ben boro kon na ini a relisi libi foe den Sneisi. A bakapisi ben de wan moksipatoe nanga pisi foe a Boeda-bribi, afkodrei, nanga na anbegi foe den afo na ini. „A Boeda-bribi nanga a Tao-bribi”, na so profesor Smart e taki, „ben meki taki a stroektoeroe nanga a fondamenti ben kon gi a bribi di sma ben bribi taki wan libi de, baka te wan sma dede, ma di no ben de so krin ini na anbegi di Sneisi foe fositen ben anbegi den afo.”
23. San Confucius ben prakseri foe na anbegi di sma ben anbegi den afo?
23 Confucius, wan tra barinen koniman foe China di ben libi na ini a di foe siksi jarihondro b.G.T., di a filosofia foe en ben tron a fondamenti gi a Confucius-bribi, no ben taki foeroe foe wan libi, baka te wan sma dede. Na presi foe dati a ben poti prakseri na tapoe taki a de prenspari foe abi moreel boenfasi èn foe tjari joesrefi na wan fasi di a libimakandra feni boen. Ma a ben feni en boen taki sma ben anbegi den afo èn a ben poti foeroe krakti tapoe a hori di den moesoe hori densrefi na ceremonia di abi foe doe nanga den jeje foe den afo di dede.
Tra relisi foe Owstoesei kondre
24. San a Jaina-bribi e leri foe a sili?
24 A Jaina-bribi ben seti na India na ini a di foe siksi jarihondro b.G.T. Mahavira, a sma di ben seti a bribi, ben leri taki ala libi sani abi sili di e libi foe têgo èn taki a sili kan kisi froeloesoe foe a katibo foe a karma soso te wan sma kwetikweti no e denki en eigi afersi moro èn e dwengi ensrefi pasa marki èn te a no e gebroiki ogri na wan toemoesi tranga fasi gi no wan kriatoeroe. Jainasma e bribi den sani disi te na ini a ten disi.
25, 26. Sortoe bribi foe den hindoesma de foe feni toe na ini a Sikh-bribi?
25 India na so srefi a presi pe a Sikh-bribi ben bigin, wan relisi di abi 19 miljoen sma. A relisi disi ben bigin na ini a di foe tinasiksi jarihondro, di goeroe Nanak ben bosroiti foe moksi a moro boen pisi foe a Hindoe-bribi nanga na Islam èn seti wan relisi di ben bondroe kon na wán. A Sikh-bribi ben teki den bribi abra foe den hindoesma di e taki foe a sili di no man dede, foe a nasi di sma e nasi èn foe a karma.
26 A de krin taki a bribi di sma e bribi taki a libi e go doro, baka te a skin dede, na wan fondamenti pisi foe moro foeroe relisi foe Owstoesei kondre. Ma fa a de nanga krestenhèit, a Djoe-bribi nanga na Islam?
[Karta na tapoe bladzijde 10]
(Efoe joe wani sabi pe den sani disi skrifi, loekoe a brochure)
CENTRAAL-ASIA
KASHMIR
TIBET
CHINA
KOREA
JAPAN
Banaras
INDIA
Bodh Gaya
MIANMAR
THAILAND
KAMBODJA
SRI LANKA
JAVA
A DI FOE DRI JARIHONDRO b.G.T.
FOSI JARIHONDRO b.G.T.
FOSI JARIHONDRO G.T.
A DI FOE FO JARIHONDRO G.T.
A DI FOE SIKSI JARIHONDRO G.T.
A DI FOE SEIBI JARIHONDRO G.T.
A Boeda-bribi ben abi krakti tapoe heri Owstoe-Asia
[Prenki na tapoe bladzijde 9]
A nasi di sma e nasi na a fondamenti leri foe a Hindoe-bribi
[Prenki na tapoe bladzijde 11]
Wan taosma e proeberi foe libi foe têgo, te a e libi ini wánfasi nanga a natoeroe
[Prenki na tapoe bladzijde 12]
Confucius ben feni en boen taki sma ben anbegi den afo