Jehovah — Wan Gado di e tjari kibritori kon na krin
„Wan Gado de na hemel di de wan Sma di e tjari kibritori kon na krin.” — DANIÈL 2:28.
1, 2. (a) Fa Jehovah e difrenti foe en bigi Feanti? (b) Fa libisma e sori taki den e difrenti na a fasi disi toe?
JEHOVAH, a moro hei èn lobi-ati Gado foe na universum, a wan-enkri Kriaman, na wan Gado foe koni nanga retidoe. A no abi foe kibri soema a de, san na den wroko foe en, noso den prakseri foe en. Na en eigi ten èn te ensrefi bosroiti so, a e tjari ensrefi kon na krin. Na a fasi disi a e difrenti foe en Feanti, Satan Didibri, di e proeberi foe kibri soema a de troetroe èn san na den prakseri foe en.
2 Neleki fa Jehovah nanga Satan de kontrari makandra, na so a de toe nanga den anbegiman foe den. Den sma di e waka na Satan baka, abi toe fesi èn den e bidrigi sma. Den e proeberi foe sori densrefi leki boen sma, ala di den e doe den wroko foe doengroe. Den kresten na Korente ben kisi foe jere taki den no ben moesoe froewondroe foe a tori disi. „Bika den sortoe sma dati na falsi apostel, bidrigi wrokoman, di e kenki densrefi na ini apostel foe Krestes. Èn dati no de foe froewondroe, bika Satan srefi e tan kenki ensrefi na ini wan engel foe leti” (2 Korentesma 11:13, 14). Kresten, na a tra sei, e loekoe go na Krestes leki a Fesiman foe den. Di a ben de na grontapoe, dan a ben sori den eigifasi foe en Tata, Jehovah Gado, na wan volmaakti fasi (Hebrewsma 1:1-3). So boen, te kresten e doe san Krestes e doe, dan den e teki na eksempre foe Jehovah, a Gado foe waarheid, di no e kibri no wan sani èn di de a Gado foe leti. Den so srefi no feni en fanowdoe foe kibri soema den de troetroe, den wroko foe den, noso san den abi na prakseri. — Efeisesma 4:17-19; 5:1, 2.
3. Fa wi kan boeweisi taki a kragi foe sma no troe taki trawan e dwengi sma di e tron Jehovah Kotoigi foe den go na ini wan „sikrit sekte”?
3 Na ten di Jehovah feni boen, a e tjari finifini tori kon na krin foe den sani di a abi na prakseri èn foe a tamara di libisma fosi no ben sabi noti foe en. Na a fasi disi, a de wan Gado di e tjari kibritori kon na krin. So boen, sma di wani dini en e kisi a kari — ija, den e kisi tranga — foe leri den tori dati di tjari kon na krin. Wan ondrosoekoe di ben doe na ini 1994 na ondro moro leki 145.000 Kotoigi na ini wan kondre na Europa, ben sori taki gemiddeld, ibriwan foe den ben ondrosoekoe persoonlijk den leri foe Jehovah Kotoigi dri jari langa bifo den ben teki a bosroiti foe tron wan Kotoigi. Den ben teki a bosroiti akroederi den eigi fri wani, sondro taki wan sma ben dwengi den. Èn den ben tan abi a fri foe abi den eigi wani èn doe den eigi sani. Foe eksempre, foe di wan toe sma no ben agri moro nanga den hei markitiki di abi foe doe nanga boen gwenti nanga wet gi kresten, meki den ben teki a bosroiti baka ten taki den no ben wani de Kotoigi moro. Ma a de moi foe si, taki na ini den feifi jari di pasa, wan heri ipi foe den sma disi di ben de Kotoigi fosi, ben doe wan sani foe bigin abi demakandra baka èn kon de aktief baka leki Kotoigi.
4. Nanga sortoe sani getrow kresten no moesoe broko den ede, èn foe san ede?
4 Soleki fa wi ben sa kan froewakti, dan a no ala sma di ben de Kotoigi fosi, e drai kon baka, èn na mindri den joe abi sonwan di wan ten ben abi frantiwortoe posisi na ini a kresten gemeente. Disi no moesoe froewondroe wi, bika srefi wan foe Jesus en moro krosibei bakaman, na apostel Judas, ben gowe libi en (Mateus 26:14-16, 20-25). Ma disi na wan reide foe broko joe ede nanga a krestendom srefi? Disi meki taki a boen bakapisi di Jehovah Kotoigi abi nanga a wroko di den e doe foe gi sma leri, kon de leki noti? Kwetikweti, neleki fa a sani di Judas Iskariòt ben doe leki wan toriman, no ben tapoe Gado foe doe san a ben abi na prakseri.
A de Almakti èn tokoe a de nanga lobi-ati
5. Fa wi doe sabi taki Jehovah nanga Jesus lobi libisma, èn fa den sori a lobi disi?
5 Jehovah na wan Gado foe lobi. A e broko en ede nanga sma (1 Johanes 4:7-11). Ala di a abi wan hei posisi, tokoe a lobi foe teki libisma leki en mati. Foe wan foe den owroeten foetoeboi foe en, wi e leisi: „’Abraham ben sori bribi na ini Jehovah, èn foe a sani disi ede den ben si en leki regtfardiki’, èn den ben kari en ’a mati foe Jehovah’” (Jakobus 2:23; 2 Kroniki 20:7; Jesaja 41:8). Neleki fa libisma di de mati, e prati inibere tori noso kibritori nanga makandra, na so Jehovah e doe disi nanga den mati foe en. Na ini disi, Jesus ben teki na eksempre foe en Tata, bika a ben tron mati nanga den disipel foe en èn ben prati kibritori nanga den. „Mi no e kari oenoe srafoe moro,” a ben taigi den, „bika wan srafoe no sabi san en masra e doe. Ma mi kari oenoe mati, bika ala den sani di mi jere foe mi Tata, mi meki oenoe kon sabi dati” (Johanes 15:15). Den inibere tori, noso „kibritori” di soso Jehovah, en Manpikin, nanga den mati foe den ben sabi, e tai den kon na wán na ini wan tranga banti foe lobi nanga a gi di den e gi densrefi fajafaja. — Kolosesma 3:14.
6. Foe san ede Jehovah no abi foe kibri den prakseri foe en?
6 A nen Jehovah wani taki, „A e meki sani doe kon”, èn disi e sori taki a man tron ibri sani di a wani tron, so taki a kan doe san a abi na prakseri. Tra fasi leki fa a de nanga libisma, Jehovah no abi foe kibri den prakseri foe en foe di a ben sa frede taki trawan ben sa kan hendri en foe doe den prakseri foe en. A no kan meki fowtoe, dati meki na wan krin fasi a e tjari foeroe sani di a abi na prakseri foe doe, kon na krin na ini bijbel, a Wortoe foe en. A e pramisi: „Mi wortoe . . . no sa drai kon baka na mi sondro bakapisi, ma seiker a sa doe a sani dati di mi abi prisiri na ini, èn foe troe, a sa abi boen bakapisi na ini san mi ben seni en go.” — Jesaja 55:11.
7. (a) San Jehovah ben taki na fesi na ini Eden, èn fa Satan ben sori taki Gado abi leti? (b) Fa a gronprakseri na ini 2 Korentesma 13:8 de troe ala ten?
7 No langa baka di oproeroe ben de na ini Eden, Jehovah ben tjari sjatoe kon na krin san ben o de a bakapisi te foe kaba foe a trobi di ben e go nanga langa, na mindri en nanga en Feanti, Satan. Den ben o masi a pramisi Siri foe Gado na wan fasi di ben o tjari foeroe pen kon, ma dati no ben o de foe ala ten, ala di den ben o masi Satan krinkrin te foe kaba (Genesis 3:15). Na ini 33 G.T., Didibri troetroe ben masi a Siri, Krestes Jesus, foe di a ben sorgoe taki A dede. Na a fasi disi, Satan ben meki den Boekoe foe bijbel kon troe èn na a srefi ten a ben sori taki Jehovah na a Gado foe waarheid, ala di disi no ben de a prakseri foe Satan kwetikweti. A si di a no wani si waarheid nanga regtfardikifasi na ai, so srefi a bigimemre fasi foe en èn na abi di a no abi berow, ben meki taki a ben doe soifri san Gado ben taki na fesi dati a ben o doe. Ija, gi ala gensman foe waarheid, srefi gi Satan srefi, a gronprakseri disi troe: „Wi no kan doe no wan sani teige a waarheid, ma soso gi a waarheid.” — 2 Korentesma 13:8.
8, 9. (a) San Satan sabi, ma a sabi disi e tjari a doe di Jehovah o doe den prakseri foe en, kon ini kefar? (b) Na tapoe sortoe krin warskow den gensman foe Jehovah no e poti prakseri, èn foe san ede?
8 Sensi a ten di a Kownoekondre foe Gado ben opo na ini 1914 sondro foe sma ben si disi nanga ai, Openbaring 12:12 fiti: „Foe dati ede, oen prisiri, oen hemel nanga oenoe di e libi drape! Heloe foe grontapoe nanga se, bika Didibri saka kon na oenoe, èn a abi bigi atibron, foe di a sabi taki a abi wan sjatoe pisi ten nomo.” Ma tokoe, a sabi di Satan sabi taki a ten foe en sjatoe, e meki taki a e kenki a pasi foe en? Dati ben o wani taki, dati Satan ben o erken taki Jehovah na a Gado foe waarheid èn taki en wawan warti foe sma anbegi en leki a Moro Hei Tiriman. Ma Didibri no wani sabi taki a lasi, ala di a sabi den troetori disi foe Jehovah.
9 Sondro foe kibri wan sani, Jehovah e tjari kon na krin san sa pasa te Krestes e kon foe tjari kroetoe kon na tapoe a grontapoe sistema foe Satan (Mateus 24:29-31; 25:31-46). Foe a tori disi, a Wortoe foe en e meki bekènti foe den grontapoe tiriman: „Awansi den e taki: ’Vrede nanga seikerfasi!’, tokoe wantronso wan pori sa kon na den tapoe ini wán momenti, neleki fa banawtoe pen e miti wan bere-oema di de foe meki” (1 Tesalonikasma 5:3). Den sma di e teki na eksempre foe Satan no e poti prakseri na tapoe a krin warskow disi. Den breni foe di na ati foe den godelowsoe, èn disi e tapoe den foe abi berow foe a godelowsoe fasi foe den èn foe kenki den plan nanga den taktik di den abi, foe proeberi gens den prakseri foe Jehovah.
10. (a) Te o fara 1 Tesalonikasma 5:3 kon troe kande, ma san a pipel foe Jehovah moesoe doe? (b) Foe san ede sma sondro bribi sa gens a pipel foe Gado nanga moro tranga na ini a ten di e kon?
10 Spesroetoe foe sensi 1986, di den Verenigde Nâsi ben meki wan Internationaal Jari foe Vrede bekènti, grontapoe taki soso foe vrede nanga seikerfasi. Sani doe krinkrin foe proeberi djaranti a vrede na grontapoe, èn soleki fa a sori, dan a moeiti disi di den doe abi wan toe boen bakapisi. Na disi na a heri kontroe foe a profeititori disi, noso wi kan froewakti taki na ini a tamara a wan noso tra sortoe froewondroe sani o meki bekènti? Jehovah sa tjari a tori dati kon na krin na en reti ten. Disiten, meki wi tan na ai na jejefasi, „e froewakti èn e hori boen na prakseri a denoja foe a dei foe Jehovah” (2 Petrus 3:12). Ala di ten e pasa gowe èn sma e tan taki foe vrede nanga seikerfasi, son sma di sabi a warskow disi, ma di no wani poti prakseri na en tapoe kan kon asranti, moro nanga moro èn taki dati Jehovah no sa, noso no kan meki en wortoe kon troe. (Teki gersi Preikiman 8:11-13; 2 Petrus 3:3, 4.) Ma troe kresten sabi taki Jehovah sa doe san a abi na prakseri!
A joisti lespeki gi den sma noso wrokosani di Jehovah e gebroiki
11. San Danièl nanga Josef ben leri foe Jehovah?
11 Di kownoe Nebukadnesar, a tiriman foe a Njoen-Babilonia Grontapoemakti, ben abi wan dren di ben trobi en, èn di a no ben kan memre moro, dan a ben aksi jepi. Den priester, towfroeman nanga loekoeman foe en no ben kan froeteri en san ben de a dren foe en èn den no ben man froeklari toe san dati ben wani taki. Ma Gado en foetoeboi, Danièl, ben man doe disi, ala di a ben erken wantewante taki a tjari di a ben tjari a dren kon na krin èn san dati ben wani taki, no ben de foe en eigi koni ede. Danièl ben taki: „Wan Gado de na hemel di de wan Sma di e tjari kibritori kon na krin, èn a meki kownoe Nebukadnesar kon sabi san o pasa na ini a lasti pisi foe den dei” (Danièl 2:1-30). Foeroe jarihondro na fesi dati, Josef, wan tra profeiti foe Gado, ben ondrofeni na so wan sortoe fasi toe taki Jehovah na a Sma di e tjari kibritori kon na krin. — Genesis 40:8-22; Amos 3:7, 8.
12, 13. (a) Soema ben de a moro bigi profeiti foe Gado, èn foe san ede joe e piki so? (b) Soema na ini ten disi e dini leki „sma di e hori ai na tapoe den santa kibritori foe Gado”, èn fa wi moesoe prakseri foe den?
12 A moro bigi profeiti foe Jehovah di ben dini na grontapoe ben de Jesus (Tori foe den Apostel 3:19-24). Paulus ben froeklari: „Gado, di langaten pasa kaba na foeroe okasi èn na difrenti fasi ben taki nanga den afo foe wi nanga jepi foe den profeiti, taki nanga wi na a kaba foe den dei disi nanga jepi foe wan Manpikin, di a poti leki erfgenaam foe ala sani, èn di nanga jepi foe en, ben meki den seti foe sani.” — Hebrewsma 1:1, 2.
13 Jehovah ben taki nanga den fositen kresten nanga jepi foe en Manpikin, Jesus, di ben meki den kibritori foe Gado bekènti na den. Jesus ben taigi den: „Na oenoe e kisi a grani foe froestan den santa kibritori foe a kownoekondre foe Gado” (Lukas 8:10). Baka ten, Paulus ben taki foe salfoe kresten leki „sma di de na ondro Krestes èn leki sma di e hori ai na tapoe den santa kibritori foe Gado” (1 Korentesma 4:1). Na ini a ten disi, salfoe kresten e tan dini na a fasi disi, foe di den de a getrow èn koni srafoe-groepoe di nanga jepi foe a Tiri Skin foe den e gi jeje njanjan na a reti ten (Mateus 24:45-47). Efoe wi abi foeroe lespeki gi den profeiti foe owroeten di ben de na ondro a krakti foe Gado en santa jeje, èn abi spesroetoe lespeki gi a Manpikin foe Gado, dan wi no moesoe abi lespeki toe gi den sma di Jehovah e gebroiki na ini a ten disi foe tjari tori foe bijbel kon na krin di en pipel abi so tranga fanowdoe na ini den moeilek ten disi? — 2 Timoteus 3:1-5, 13.
Doe sani meki ala sma si, noso doe sani kibrikibri?
14. O ten kresten e doe den sani foe den kibrikibri, èn na a fasi disi den e teki na eksempre foe soema?
14 A tjari di Jehovah e tjari sani kon na krin sondro foe kibri wan sani, wani taki dati ala ten èn na ini ala situwâsi kresten moesoe taki foe ala sani di den sabi? We, kresten e teki a rai di Jesus ben gi den apostel foe en foe „koni leki sneki èn tokoe [foe de] sondro fowtoe leki doifi” (Mateus 10:16). Awansi sma taigi kresten taki den no kan anbegi Gado soleki fa a konsensi foe den e aksi dati foe den, tokoe den e tan „gi jesi na Gado”, bika den e froestan taki no wan libisma organisâsi abi a reti foe skotoe sma foe anbegi Jehovah (Tori foe den Apostel 5:29). Jesus srefi ben sori taki disi na wan sani di fiti. Wi e leisi: „Now baka den sani disi, Jesus ben waka lontoe na ini Galilea, foe di a no ben wani waka lontoe na ini Judea, bika den djoe ben e soekoe foe kiri en. Ma a fesa foe den djoe, a wiwirikampoe-fesa ben de krosibei. Dati meki Jesus ben taigi den [den troetroe brada foe en di no ben abi bribi]: . . . ’Oen go na a fesa; mi no e go ete na a fesa disi, bika a joisti ten foe mi no doro krinkrin ete.’ So boen, baka di a ben taigi den den sani disi, a ben tan na Galilea. Ma di den brada foe en ben go na a fesa, dan ensrefi ben go toe, no so taki sma ben kan si en, ma na kibrifasi.” — Johanes 7:1, 2, 6, 8-10.
Wi moesoe froeteri foe wan tori noso wi moesoe hori en gi wisrefi?
15. Fa Josef ben sori taki son leisi a de wan lobi-ati sani te wi no e froeteri tra sma wan kibritori?
15 Sontron, a no de wan koni sani wawan, ma wan lobi-ati sani toe foe hori wan afersi gi wisrefi. Foe eksempre, san Josef, a kwekipapa foe Jesus, ben doe di a ben kon sabi taki Maria, a trow-misi foe en di a ben o kisi foe trow nanga en, ben de „nanga bere nanga jepi foe santa jeje”? Wi e leisi: „Ma foe di Josef, en masra, ben de regtfardiki èn a no ben wani meki a kisi sjen na poebliki, meki a ben abi na prakseri foe prati nanga en na kibrifasi” (Mateus 1:18, 19). A no ben sa de wan boen-ati sani srefisrefi, efoe a ben meki Maria kisi sjen na poebliki!
16. San na a frantiwortoe di owroeman, so srefi ala tra memre foe a gemeente, te disi abi foe doe nanga inibere tori?
16 Sma no moesoe froeteri inibere tori di ben kan gi wan sma sjen noso pen, na trawan di no abi reti na tapoe. Kresten owroeman e hori disi na prakseri te den moesoe gi persoonlijk rai noso moesoe trowstoe kompe kresten noso kande srefi te den moesoe piri-ai gi den foe di den sondoe serjoesoe teige Jehovah. A de fanowdoe foe handri den afersi disi soleki fa bijbel e taki; a no de fanowdoe èn a no de wan lobi-ati sani te wan sma e taki foe inibere tori nanga den wan di no abi noti foe doe nanga disi. Seiker, memre foe a kresten gemeente no sa proeberi foe hori druk tapoe owroeman foe meki den froeteri den foe inibere tori, ma den sa lespeki a frantiwortoe di den owroeman abi foe hori inibere tori gi densrefi. Odo 25:9 e taki: „Taki joe eigi afersi nanga a kompe foe joe, èn no meki sma kon sabi froetrow takimakandra foe wan trawan.”
17. Foe san ede kresten nofotron no e taki nanga trawan foe inibere tori, ma foe san ede den no kan doe dati ala ten?
17 A gronprakseri disi de so toe na ini na osofamiri noso na mindri krosibei mati. Efoe wi no wani kisi kesekese èn poti matifasi na ondro druk, dan a de prenspari taki wi e hori son inibere tori gi wisrefi. „A winti foe noordsei e tjari wan hebi alen kon neleki nanga a pen foe wan oema di de foe meki; èn wan tongo di e froeteri wan kibritori, neleki wan fesi di den kroetoe na poebliki” (Odo 25:23). A no de foe taki, dati loyaalfasi na Jehovah nanga den regtfardiki gronprakseri foe en, so srefi a lobi di wi abi gi sma di doe wan sondoe, kan dwengi wi wawan leisi foe froeteri srefi inibere tori na papa nanga mama, kresten owroeman, noso tra sma di abi a reti na tapoe.a Ma nofotron, kresten no e taki nanga tra sma foe persoonlijk afersi foe trawan, èn den e kibri den leki den e kibri den eigi afersi.
18. Sortoe dri kresten eigifasi kan jepi foe sabi san wi moesoe froeteri èn san wi no moesoe froeteri tra sma?
18 Foe taki en sjatoe, wan kresten e teki na eksempre foe Jehovah foe di a no e froeteri trawan foe son afersi te dati no de fanowdoe, èn a e froeteri disi soso te dati fiti. Te wan kresten e bosroiti san a sa froeteri noso san a no sa froeteri, dan sakafasi, bribi nanga lobi e tiri en. Sakafasi e jepi en foe no meki bigi gi ensrefi, nanga a proeberi di a e proeberi foe meki tra sma loekoe en nanga froewondroe, foe di a e froeteri den ala sani di a sabi noso foe di a e meki den kon angri foe sabi kibritori di a no mag taki foe den. Bribi na ini a Wortoe foe Jehovah nanga a kresten gemeente e boeweigi en foe preiki foe tori di Gado gi na ini bijbel, ala di a e loekoe boen dati a no taki sani di ben sa kan afrontoe trawan na a bigin kaba. Ija, lobi e boeweigi en foe taki krin foe sani di e gi Gado glori èn di sma moesoe sabi, so taki den kan kisi libi. Na a tra sei, a no e froeteri tra sma foe persoonlijk afersi di a no mag taki foe den, foe di a e froestan taki nofotron, efoe a e doe dati dan dati ben sa sori taki a e mankeri lobi.
19. Sortoe fasi foe doe sani e jepi sma foe kon sabi soema na troe kresten, èn san na a bakapisi foe disi?
19 A balansi fasi disi foe doe sani, e jepi wi foe kon sabi soema na troe kresten. Den no e kibri a nen foe Gado, foe di den e gebroiki a nen èn den no e kibri en toe nanga a teki di den e teki wan dangra Dri-wánfasi leri abra di sma no man froeklari. Na den falsi relisi abi gado di sma no sabi, ma a no de so nanga a troe anbegi. (Loekoe Tori foe den Apostel 17:22, 23.) Den salfoe Kotoigi foe Jehovah troetroe e warderi a grani di den abi foe de „sma di e hori ai na tapoe den santa kibritori foe Gado”. Foe di den e taki krin foe den kibritori disi nanga trawan, meki den e jepi opregti sma foe soekoe a matifasi foe Jehovah. — 1 Korentesma 4:1; 14:22-25; Sakaria 8:23; Maleaki 3:18.
[Foetoewortoe]
a Loekoe „No abi wan prati na den sondoe foe tra sma” na ini A Waktitoren foe 15 november 1985.
San joe ben sa piki?
◻ Foe san ede Jehovah no abi foe kibri den prakseri foe en?
◻ Gi soema Jehovah e tjari den kibritori foe en kon na krin?
◻ San na a frantiwortoe di kresten abi ini a tori foe inibere tori?
◻ Sortoe dri eigifasi sa jepi kresten foe sabi san den moesoe froeteri èn san den no moesoe froeteri tra sma?
[Prenki na tapoe bladzijde 8, 9]
Nanga en Wortoe, Jehovah e tjari kibritori kon na krin