Wan kibritori di kresten no e prefoeroe foe hori gi densrefi!
„Mi taki nanga grontapoe na poebliki. . . . Noti mi no ben taki kibrikibri.” — JOHANES 18:20.
1, 2. San a Griki wortoe mu·steʹri·on wani taki, soleki fa den e gebroiki en na ini bijbel?
A GRIKI wortoe mu·steʹri·on vertaal 25 leisi leki „santa kibritori” èn dri leisi leki „dangratori” na ini a Nieuwe Wereldvertaling van de Heilige Schrift (Njoen-Grontapoevertaling foe den Santa Boekoe foe bijbel). Wan kibritori di den e kari santa, moesoe de prenspari troetroe! Iniwan sma di kisi a grani foe kon sabi so wan kibritori, moesoe si en leki wan bigi grani, foe di a sma warti foe prati wan kibritori makandra nanga a Moro Hei Gado foe na universum.
2 Expository Dictionary of Old and New Testament Words foe Vine, e taki dati na ini moro foeroe kefal, „santa kibritori” na wan moro boen vertaling leki „dangratori”. A e taki foe mu·steʹri·on: „Na ini [den kresten Griki Boekoe foe bijbel] a no e sori go na wan dangratori (soleki fa a de na ini Ingrisitongo), ma a e sori go na wan sani di a froestan foe libisma no man teki, èn di soso wan openbaring foe Gado kan tjari kon na krin na wan fasi èn na wan ten di Gado poti, èn a de soso gi den sma di a Jeje foe En meki den kon froestan sani dorodoro. Ini algemeen, wan kibritori wani taki sabi di trawan e hori gi densrefi; na ini bijbel a e sori na tapoe waarheid di tjari kon na krin. Foe dati ede den wortoe di spesroetoe abi foe doe nanga a tori disi na den wortoe leki ’meki bekènti’, ’meki kon na krin’, ’tjari kon na krin’, ’preiki’, ’froestan’, ’prati sani’.”
3. Fa a kresten gemeente foe a fosi jarihondro ben difrenti foe son dangra relisi groepoe?
3 A froeklari disi e sori na tapoe wan bigi difrenti di de na mindri den dangra relisi groepoe di ben de foeroe na ini a fosi jarihondro èn a fositen kresten gemeente di ben opo paspas. Ala di den sma di den ben wij kon na ini den sikrit sekte, nofotron ben de na ondro wan pramisi so taki den no man taki noti foe den leri foe a relisi, tokoe noiti den ben poti kresten na ondro so wan pramisi. A troe taki na apostel Paulus ben taki foe „a koni foe Gado na ini wan santa kibritori”, èn ben kari en „a koni di kibri”, dati wani taki, dati a koni kibri gi „den tiriman foe a seti foe sani disi”. A no kibri gi kresten di a sani disi ben tjari kon na krin gi den nanga jepi foe Gado jeje, so taki den ben sa kan meki en bekènti. — 1 Korentesma 2:7-12; teki gersi Odo 1:20.
Sma kon sabi san na a „santa kibritori”
4. Na tapoe soema a „santa kibritori” e poti a prakseri, èn fa?
4 A „santa kibritori” foe Jehovah e poti prakseri na tapoe Jesus Krestes. Paulus ben skrifi: „[Jehovah] ben meki a santa kibritori foe en wani bekènti gi wi. A de foe di a e plisi en, taki ensrefi ben abi a prakseri, foe abi wan tiri te na a kaba foe den fasti ten, namkoe, foe tjari ala sani kon na makandra baka na ini Krestes, den sani na hemel èn den sani na grontapoe. Ija, na ini en” (Efeisesma 1:9, 10). Paulus ben taki moro fini srefi foe a fasi fa a „santa kibritori” ben de, di a ben sori go na a de di a de fanowdoe foe abi „wan soifri sabi foe a santa kibritori foe Gado, dati wani taki, Krestes”. — Kolosesma 2:2.
5. San abi foe doe nanga a „santa kibritori”?
5 Ma moro de ini a tori, bika a „santa kibritori” na wan kibritori di abi foeroe sei. A no de soso a sabi di sma e kon sabi soema na Jesus leki a pramisi Siri noso Mesias; a wani taki so srefi a ròl di Jesus kisi na ini a prakseri foe Gado. A wani taki wan hemel tiri, Gado en Mesias Kownoekondre, soleki fa Jesus ben tjari boen kon na krin di a ben taigi den disipel foe en: „Na oenoe e kisi a grani foe froestan den santa kibritori foe a kownoekondre foe hemel, ma den sma dati no e kisi a grani disi.” — Mateus 13:11.
6. (a) Foe san ede a de wan joisti sani foe taki dati ’sma kibri a santa kibritori langaten’? (b) Fa a ben tjari kon na krin safrisafri?
6 Wan langa pisi ten ben moesoe pasa na mindri a fosi leisi di ben taki foe a prakseri foe Gado foe gi wan fondamenti gi a Mesias Kownoekondre èn a tjari di „a santa kibritori . . . [ben o tjari] kon na wan kaba” (Openbaring 10:7; Genesis 3:15). Disi ben o tjari kon na wan kaba te a Kownoekondre ben o opo, soleki fa wi kan si te wi e teki Openbaring 10:7 gersi nanga 11:15. Foe taki en leti, so wan 4000 jari ben pasa sensi di a fosi Kownoekondre pramisi ben gi na ini Eden, te leki a ten di a Sma di ben poti na wroko leki Kownoe, ma di no ben bigin tiri ete, ben sori ensrefi na ini 29 G.T. Ete wan tra 1885 jari ben pasa fosi a Kownoekondre ben opo na ini hemel na ini 1914. So boen, safrisafri a „santa kibritori” ben tjari kon na krin na ini wan pisi ten foe pikinmoro 6000 jari. (Loekoe bladzijde 16.) Paulus troetroe ben abi leti di a ben taki foe „a tjari kon na krin foe a santa kibritori di sma kibri langaten, ma now a meki kon na krin èn sma kon sabi en”. — Romesma 16:25-27; Efeisesma 3:4-11.
7. Foe san ede wi kan froetrow dorodoro tapoe a getrow èn koni srafoe?
7 Tra fasi leki fa a de nanga libisma, di abi wan sjatoe ten nomo foe libi, Jehovah noiti no de na ondro a druk foe ten foe tjari den kibritori foe en kon na krin toemoesi froekoe. A troetori disi moesoe jepi wi foe no de sma di no abi pasensi te son bijbel aksi no kan tjari kon na krin now soleki fa wi ben sa wani. Bescheidenfasi foe a sei foe a getrow èn koni srafoe-groepoe, di kisi a komando foe gi a kresten osofamiri njanjan na a reti ten, e meki taki a no e teki a fri foe no sidon wakti sani èn a no e taki toemoesi esi fa a e denki foe wan tori di a no e froestan boen. A srafoe-groepoe e doe moeiti foe no gi sma a prakseri taki a sabi ala sani. A no abi toemoesi bigimemre foe taki dati now a no kan gi piki na tapoe ibri aksi, foe di a e hori Odo 4:18 boen na prakseri. Ma a de troetroe wan span sani foe sabi taki Jehovah, na en eigi reti ten èn na en eigi fasi, sa go doro foe tjari den kibritori foe en di abi foe doe nanga en prakseri, kon na krin! Noiti wi no moesoe tron sma di no abi pasensi nanga a seti foe Jehovah, èn e proeberi na wan fasi di no de bescheiden foe froeteri foe sani di wi no e froestan boen ete fosi a Sma di e tjari kibritori kon na krin, doe dati. A de wan djaranti troetroe foe sabi taki a kanaal di Jehovah e gebroiki na ini a ten disi no e doe dati! A de getrow èn a de koni. — Mateus 24:45; 1 Korentesma 4:6.
Sma moesoe froeteri foe a kibritori di tjari kon na krin!
8. Fa wi doe sabi taki a „santa kibritori” moesoe meki bekènti?
8 Jehovah no tjari en „santa kibritori” kon na krin gi kresten foe den hori dati gi densrefi. A moesoe meki bekènti, akroederi a gronprakseri di Jesus ben gi ala den bakaman foe en — no soso gi wan toe kerki tiriman: „Oenoe na a leti foe grontapoe. Wan foto di de na tapoe wan bergi, den no kan kibri. Sma e leti wan lampoe èn den no e poti en na ondro wan baskita, ma na tapoe a kandratiki, èn a e skèin na tapoe ala den sma na ini na oso. So srefi, meki oen leti skèin gi sma, so taki den kan si den boen wroko foe oenoe èn gi glori na oen Tata, di de na hemel.” — Mateus 5:14-16; 28:19, 20.
9. San e sori taki Jesus no ben de wan revoman, soleki fa son sma e taki?
9 Jesus no ben abi revo prakseri foe opo wan ondrogron organisâsi foe bakaman foe feti na baka sikrit prakseri. Na ini a boekoe Early Christianity and Society, Robert M. Grant ben skrifi foe na opo di a di foe toe jarihondro apologist Justinus Martyr ben opo taki gi a boen foe den fositen kresten: „Efoe kresten ben de revoman, dan den ben o tan kibri densrefi, so taki den ben kan doro a marki foe den.” Ma fa kresten ben kan „tan kibri densrefi” èn na a srefi ten de leki „wan foto . . . di de na tapoe wan bergi”? Den no ben prefoeroe foe kibri a leti foe den na ondro wan baskita! Foe dati ede a tiri no ben abi foe frede a wroko di den ben doe. A skrifiman disi ben go doro foe taki foe den leki „den moro boen patna foe a kèiser gi na afersi foe vrede nanga boen orde”.
10. Foe san ede kresten no moesoe kibri soema na den?
10 Jesus no ben wani, taki den disipel foe en ben kibri soema den ben de, neleki fa den memre foe wan so-kari relisi sekte e doe dati (Tori foe den Apostel 24:14; 28:22). Efoe wi no ben o skèin a leti foe wi na ini a ten disi, dan dati no ben o plisi Krestes èn a Tata foe en, a Sma di e tjari kibritori kon na krin, èn wi no ben sa de kolokoe te wi e doe dati.
11, 12. (a) Foe san ede Jehovah wani, taki a krestendom moesoe meki bekènti? (b) Fa Jesus ben gi a joisti eksempre?
11 Jehovah „no wani taki wan sma e kisi pori, ma a wani taki ala sma moesoe abi berow” (2 Petrus 3:9; Esekièl 18:23; 33:11; Tori foe den Apostel 17:30). A fondamenti foe kisi pardon gi den sondoe foe libisma di abi berow, na bribi na ini a froeloesoe-ofrandi foe Jesus Krestes, di ben gi ensrefi leki wan loesoe paiman gi ala sma — no gi wan toe sma nomo — so taki„ibriwan sma di e sori bribi na ini en, no ben sa kisi pori, ma ben sa abi têgo libi” (Johanes 3:16). A de prenspari taki sma e kisi jepi foe doe san de fanowdoe, so taki na ini a kroetoe di e kon den kan kisi kroetoe leki skapoe, no leki bokoboko. — Mateus 25:31-46.
12 A troe krestendom no moesoe de kibrikibri; a moesoe meki bekènti na ibri fasi di fiti. Jesus srefi ben gi a joisti eksempre. Di den granpriester ben aksi en foe den disipel foe en èn a leri di a ben gi, dan a ben taki: „Mi taki nanga grontapoe na poebliki. Ala ten mi ben gi leri na ini wan snoga èn na ini a tempel pe ala den djoe e kon makandra; èn noti mi no ben taki kibrikibri” (Johanes 18:19, 20). Nanga na eksempre disi na prakseri, sortoe sma di abi frede gi Gado ben o prefoeroe foe no froeteri a sani di Gado froeklari leki wan sani di moesoe meki bekènti? Soema ben o prefoeroe foe kibri „a sroto foe sabi” di e tjari go na têgo libi? Efoe wan sma ben o doe disi, dan dati ben o meki en de leki den relisi hoigriman foe a fosi jarihondro. — Lukas 11:52; Johanes 17:3.
13. Foe san ede wi moesoe preiki na ibri okasi?
13 Meki no wan sma oiti taki dati wi leki Jehovah Kotoigi hori a Kownoekondre boskopoe foe Gado gi wisrefi! Efoe sma e teki a boskopoe noso den e weigri en, sma moesoe sabi taki a preiki. (Teki gersi Esekièl 2:5; 33:33.) Foe dati ede, meki wi gebroiki ibri okasi foe taki foe a boskopoe foe waarheid nanga ala sma, awansi pe wi e miti den.
Naki aka na ini a kakoembe foe Satan
14. Foe san ede wi no moesoe draidrai foe doe na anbegi foe wi na poebliki?
14 Na foeroe presi, a media e poti prakseri na tapoe Jehovah Kotoigi moro nanga moro. Neleki san ben pasa nanga den fositen kresten, na so sma nofotron e froeteri sani foe den di no troe èn den e poti den na a srefi presi leki den relisi sekte di sma e tweifri na den èn den sikrit organisâsi (Tori foe den Apostel 28:22). A ben sa kan, taki foe di wi e preiki na poebliki, dati moromoro wi e tron sma di trawan wani doe ogri? A no ben o de wan koni sani kwetikweti, èn a no ben o de akroederi a rai toe di Jesus ben gi, foe gi wisrefi abra na kesekese, efoe dati no de fanowdoe (Odo 26:17; Mateus 10:16). Ma a Kownoekondre preikiwroko di e gi wini, èn di e jepi sma foe meki a libi foe den kon moro betre, no moesoe doe kibrikibri. A e gi Jehovah glori, èn e opo en hei, foe di a e poti ala prakseri na en tapoe èn na tapoe en Kownoekondre di opo. Foe wan pisi, den sani di sma na Owstoe-Europa èn na ini pisi foe Afrika ben doe na tapoe a bijbel waarheid no so langa pasa ete, èn di e gi prisiri, ben de foe a moro krin fasi ede fa a waarheid kan preiki drape now.
15, 16. (a) Sortoe marki wi e doro nanga a doe di wi e doe sani na wan krin fasi èn nanga a tanboen foe wi na jejefasi, ma disi na wan reide foe broko wi ede? (b) Foe san ede Jehovah e naki aka na ini a kakoembe foe Satan?
15 A troe taki a krin fasi fa Jehovah Kotoigi e preiki, a jeje paradijs di den abi, èn a tanboen foe den — ini a tori foe libisma di e horibaka gi den èn ini a tori foe materia sani — e hari a prakseri foe sma. Ala di den tori disi e wiki a belangstelling foe opregti sma, a de wan tegoe sani kande gi gensman (2 Korentesma 2:14-17). Foe taki en leti, disi kan de wan sani di e kori den legre foe Satan te foe kaba, foe doe a pipel foe Gado wan ogri.
16 Wi moesoe broko wi ede foe a sani disi ede? No akroederi a profeititori di de foe feni na ini Ezekièl kapitel 38. A e taki na fesi dati Gog foe Magog, wan fasi foe taki foe Satan Didibri sensi di den trowe en kon na ini a birti foe grontapoe baka di a Kownoekondre opo na ini 1914, sa teki fesi ini a doe di sma o doe a pipel foe Gado wan ogri (Openbaring 12:7-9). Jehovah e taigi Gog: „Joe moesoe taki: ’Mi sa opo go teige a kondre foe a boitipresi. Mi sa kon na den wan tapoe di abi rostoe, di e tan na ini seikerfasi, den alamala di e tan sondro skotoe, èn den no abi greni nanga doro srefi.’ A sa de foe teki ala goedoe èn foe foefoeroe ala sani krinkrin, foe poti joe anoe baka na tapoe den broko pranasi pe sma go tan baka èn na tapoe wan pipel di tjari kon na wan di komopo na den nâsi, wán di e tjari goedoe nanga tra sani di den abi, kon makandra, den wan di e tan leti na a mindri foe grontapoe” (Ezekièl 38:11, 12). Ma vers 4 e sori taki a pipel foe Gado no moesoe frede na ogri disi, foe di na wan sani di Jehovah e doe. Ma foe san ede Gado ben sa gi pasi — ija, meki srefi — taki sma wani doe a pipel foe en wan bigi ogri? Na ini vers 23 wi e leisi a piki foe Jehovah: „Troetroe mi sa meki misrefi kon bigi èn santa misrefi èn meki sma kon sabi mi na fesi foe foeroe nâsi; èn den sa moesoe sabi taki mi na Jehovah.”
17. Fa wi moesoe si na ogri di Gog sa wani doe heri esi?
17 So boen, na presi taki a pipel foe Gado frede foe di Gog e soekoe foe doe den wan ogri, den e loekoe nanga bigi froewakti go na a tra kontroe disi foe bijbel profeititori. Fa a de wan span sani foe sabi taki, foe di Jehovah e meki sani waka boen nanga en organisâsi di joe kan si nanga ai, èn a e blesi den, dan a e naki aka na ini a kakoembe foe Satan èn e meki en nanga en sroedati legre lasi krinkrin! — Esekièl 38:4.
Now moro leki oiti!
18. (a) Sortoe sani foeroe sma e kon froestan now, èn foe san ede? (b) Fa a sani di sma e doe na tapoe a Kownoekondre preikiwroko, de leki wan krakti reide di e boeweigi wi?
18 Na ini a ten disi, Jehovah Kotoigi no kibri no wan sani te den taki foe a fasi fa den e si sani akroederi bijbel, awansi disi ben de wan sani di sma no lobi. Someni tenti jari kaba, den warskow gi den kefar foe a smoko foe tabaka nanga a fowtoe gebroiki foe drug, taki a no de wan koni sani efoe sma e gi pasi na ala sani te den e kweki pikin, èn gi den takroe bakapisi foe ontspanning di lai nanga a seks di no mag nanga ogridoe di doe nanga tranga, èn gi den kefar foe broedoe transfusie. Den sori go toe na a kenki di na evolutie leri e kenki ibritron baka. Moro nanga moro sma e taki now: „Tokoe Jehovah Kotoigi abi leti.” Efoe wi no ben meki a fasi fa wi e denki bekènti na so wan krin fasi, dan den no ben kan taki a sani dati. Èn no frigiti dati efoe den e taki so wan sani, dan den de foe taki: „Satan, joe na wan leiman; tokoe Jehovah abi leti.” Dati na troetroe wan krakti reide di e boeweigi wi foe tan teki na eksempre foe Jesus, èn taki a wortoe foe waarheid na poebliki! — Odo 27:11.
19, 20. (a) Foe sortoe fasti bosroiti a pipel foe Jehovah ben taki na ini 1922, èn den wortoe disi e fiti ete? (b) Fa wi moesoe si a „santa kibritori” foe Jehovah?
19 Langaten kaba, a pipel foe Jehovah ben froestan a froeplekti di den abi ini a tori disi. Tapoe wan prenspari kongres na ini 1922, J. F. Rutherford, di na a ten dati ben de presidenti foe a Waktitoren Genootschap, ben prisiri a poebliki foe en di a ben taki: „De serjoesoe, de na ai, de fajafaja, abi deki-ati. De getrow èn troe kotoigi foe Masra. Go na fesi ini a feti te leki ibri fortresi foe Babilon pori krinkrin. Meki a boskopoe bekènti na ala sei. Grontapoe moesoe sabi taki Jehovah na Gado èn taki Jesus Krestes na Kownoe foe den kownoe èn Masra foe den masra. Disi na a dei foe ala den dei. Loekoe, a Kownoe e tiri! Oenoe na en poebliki bariwrokoman. Foe dati ede meki bekènti, meki bekènti, meki bekènti, a Kownoe nanga en kownoekondre.”
20 Den wortoe disi di ben de prenspari na ini 1922, de moro prenspari 75 jari baka dati, di a tjari kon na krin foe Krestes leki a Kroetoeman nanga a Sma di e teki refensi, de moro krosibei! A boskopoe foe Jehovah en Kownoekondre di opo èn foe a jeje paradijs di a pipel foe Gado de na ini, na wan „santa kibritori, di moi someni taki den no e prefoeroe foe hori en gi densrefi. Soleki fa Jesus srefi ben taki so krin, dan den bakaman foe en, nanga a jepi foe santa jeje, moesoe de kotoigi „te na a moro farawe pisi foe grontapoe” foe taki foe a moro prenspari ròl di a abi na ini den têgo prakseri foe Jehovah (Tori foe den Apostel 1:8; Efeisesma 3:8-12). Foe taki en leti, leki foetoeboi foe Jehovah, a Gado di e tjari kibritori kon na krin, wi no e prefoeroe foe hori a kibritori disi gi wisrefi!
San joe ben sa piki?
◻ San na a „santa kibritori”?
◻ Fa wi doe sabi taki a moesoe meki bekènti?
◻ San e meki taki Gog wani doe a pipel foe Jehovah wan ogri, èn san wi moesoe prakseri foe disi?
◻ Sortoe fasti bosroiti ibriwan foe wi moesoe abi?
[Faki na tapoe bladzijde 16]
Wan „santa kibritori” di tjari kon na krin safrisafri
◻ Baka 4026 b.G.T.: Gado e pramisi foe wiki wan Siri foe gi Satan pori. — Genesis 3:15
◻ 1943 b.G.T.: A froebontoe nanga Abraham e kisi krakti, èn disi e pramisi taki a Siri sa kon nanga jepi foe Abraham. — Genesis 12:1-7
◻ 1918 b.G.T.: Isak e gebore leki erfgenaam foe a froebontoe. — Genesis 17:19; 21:1-5
◻ Wan sani foe 1761 b.G.T.: Jehovah e taki dati a Siri sa kon nanga jepi foe Isak en manpikin Jakob. — Genesis 28:10-15
◻ 1711 b.G.T.: Jakob e sori taki a Siri sa kon nanga jepi foe en manpikin Juda. — Genesis 49:10
◻ 1070-1038 b.G.T.: Kownoe David e leri taki a Siri sa de en bakapikin èn a sa tiri foe têgo leki Kownoe. — 2 Samuèl 7:13-16; Psalm 89:35, 36
◻ 29-33 G.T.: Sma e kon sabi taki Jesus na a Siri, a Mesias, a kroetoeman gi a tamara, èn a Sma di poti na wroko leki Kownoe, ma di no ben bigin tiri ete. — Johanes 1:17; 4:25, 26; Tori foe den Apostel 10:42, 43; 2 Korentesma 1:20; 1 Timoteus 3:16
◻ Jesus e tjari kon na krin taki a sa abi kompe tiriman nanga kroetoeman, taki a hemel Kownoekondre sa abi borgoe na grontapoe, èn taki ala den bakaman foe en moesoe de Kownoekondre preikiman. — Mateus 5:3-5; 6:10; 28:19, 20; Lukas 10:1-9; 12:32; 22:29, 30; Johanes 10:16; 14:2, 3
◻ Jesus e tjari kon na krin taki a Kownoekondre sa opo na wan fasti ten, soleki fa den sani di ben o pasa na grontapoe, ben o sori. — Mateus 24:3-22; Lukas 21:24
◻ 36 G.T.: Petrus e kon sabi taki sma di no de djoe sa de Kownoekondre erfgenaam toe. — Tori foe den Apostel 10:30-48
◻ 55 G.T.: Paulus e tjari kon na krin taki na a ten foe Krestes en denoja, den Kownoekondre erfgenaam sa kisi wan opobaka foe libi sondro foe man dede èn sondro foe man kisi pori. — 1 Korentesma 15:51-54
◻ 96 G.T.: Jesus, di e tiri kaba na tapoe den salfoe bakaman foe en, e tjari kon na krin taki te foe kaba a nomroe foe den sa de 144.000. — Efeisesma 5:32; Kolosesma 1:13-20; Openbaring 1:1; 14:1-3
◻ 1879 G.T.: Zion’s Watch Tower e sori go na 1914 leki a jari di de toemoesi prenspari ini a tjari di Gado en „santa kibritori” sa tjari kon na krin”
◻ 1925 G.T.: The Watch Tower e froeklari taki a Kownoekondre ben opo na ini 1914; a „santa kibritori” foe a Kownoekondre moesoe meki bekènti. — Openbaring 12:1-5, 10, 17
[Prenki na tapoe bladzijde 15]
Jehovah Kotoigi e meki a Kownoekondre foe Jehovah bekènti na poebliki neleki Jesus, a Fesiman foe den