Kon na a „bribi na ini Gado wortoe”-distriktkongres!
FOEROE miljoenmiljoen sma sa de na den hondrohondro presi na heri grontapoe. Na Amerkankondre wawan, 193 kongres de na tapoe schema foe hori. Na ini Fransi Gajana wán Sranantongo kongres de na tapoe schema, èn na ini Sranan toe kongres sa hori. A fosiwan sa hori tapoe 15 te nanga 17 augustus na Gakaba èn a di foe toe sa hori tapoe 29 te nanga 31 augustus na Paramaribo. Kande joe sa fisiti wán foe den dri-dei konmakandra disi — freida te go miti sonde.
Joe sa kisi winimarki foe bogobogo praktis bijbel leri. Na moro foeroe foe den presi a programa sa bigin ibri 9:30 mamanten nanga pokoe. Freida mamanten sa abi wan 25 miniti interview nanga sma na tapoe soema a bribi foe den na ini a Wortoe foe Gado ben abi foeroe krakti. A fosi programa dati sa kaba nanga a thema lezing: „Waka nanga bribi, no nanga a si foe sani.”
A fosi lezing na tapoe freida bakadina sa taki foe a prenspari ròl di jongoewan abi na ini a kresten gemeente. Baka dati, a symposium di abi dri pisi sa taki foe den bijbel markitiki di abi foe doe nanga a fasi fa wan kresten e tjari ensrefi te a e taki, nanga den maniri foe en, èn den krosi di a e weri. Baka dati, den lezing „Loekoe boen foe no lasi bribi” èn „A Wortoe foe Gado abi libi”, sa poti prakseri na tapoe a moi froemane na ini Hebrewsma kapitel 3 nanga 4. A programa foe freida sa kaba nanga a lezing „Wan boekoe gi ala sma”.
A fosi lezing na tapoe satra mamanten na „Bribi sondro wroko, dede”. Wan tra prenspari lezing a mamanten dati, „Kon tranga èn stanfaste na ini waarheid”, e taki fa wan sma kan gro na jejefasi. A programa sa kaba nanga wan faste pisi foe wan kongres, „Bribi na ini Gado Wortoe e meki wan sma e teki dopoe”, èn baka dati sani sa sreka gi njoen disipel foe teki dopoe.
A fosi lezing na tapoe satra bakadina „Feti tranga gi a bribi” e taki foe a froemane na ini a bijbelboekoe Judas. Wan symposium foe wán joeroe langa nanga a thema „Meki wi go na a oso foe Jehovah” sa taki foe den winimarki foe den kresten konmakandra. A programa foe a dei dati sa kaba nanga a lezing „A sortoe bribi foe joe — E kisi tesi now”.
A programa foe sondoe mamanten abi wan symposium foe dri pisi, di sa taki foe a bijbelboekoe Joèl, èn so srefi fa wi kan gebroiki en na ini a ten foe wi. Baka dati wan bijbel drama sa kon di abi a thema „Hori joe ai soifri”. Wan heimarki foe a kongres, na a poebliki taki na bakadina, „Bribi nanga a tamara foe joe”.
Foe troe, joe sa kon goedoe na jejefasi te joe de drape. Joe sa kisi wan switi kari na tapoe ibri dei. Meki plan now foe man go. Foe kon sabi a konmakandra presi di de moro krosibei foe pe joe e libi, joe kan meki kontakti nanga a Kownoekondre zaal foe Jehovah Kotoigi na ini joe birti, noso joe kan skrifi go na den sma di tjari a tijdschrift disi kon na doro. Joe kan feni den adres toe foe den presi pe kongres sa hori na ini Sranan nanga Fransi Gajana na ini na uitgave foe A Waktitoren foe 15 februari.